Adam bala ịnam kaa ya ụbwọ ju ẹla nya ịchọọchị nya ịfada yẹẹyẹẹ. Ma ụka kị wẹ ka jẹ́ bwu ẹpwụ nya ịBayịbụụ nyori ẹnyị nya Ohe nya-a ri iJihova lẹ, ịwa angị imimiiye wẹ ka ri Alibeenu nya iJihova ịlẹ kị la ila ọchịchị yẹẹyẹẹ. Adam hwabwọ la ọ-kọ ekpeku nya iJisọsị. Ọkọkọ nya ọọwa, ọ kpa ẹla ọjẹ́jẹ nya ekeji ọkọkọ nyamwụ yẹ ẹpwụ oleji nya ube nyahị da kaka ri Ube nya Ịpyị-Adịrahụ ọhọhẹ ọlẹ kahị la ịị San Juan del Monte, ba Manila ba, ko ri egbeju ẹpwa nya Philippines.

Nyọlẹ kị mam la 1952 kpá, adam bala ịnam kaa mẹ ẹla nya iJihova jẹm jaabwọ kị kaa mẹjẹ aanam alẹng angị ine bala anyang angị ịta ịlẹ kị ma jene nyam. Jaabwọ kam wẹẹ nwà, adam kaa jum ọhụ nyọka wa egbeju nya ịBayịbụụ ookpokpo ẹnụ myị́ ẹnụ, ọ tị kpa apwụ ị-da ịBayịbụụ wụlẹ nyahị datị-datị mẹ ang jẹm ịnyịnyị. Ụka ọhẹ, adam bala ịnam kaa wụrụ angị kpẹhị rịrị isekut bala angịlẹ ká egbeju ẹpwa du ẹrụ, nyọka hụ ẹpwa nyahị. Ugbiyegu nyahị kaa ye ọkẹkẹnị bala ọhụ ojuju bwu oja nya aanahị ịwẹ, ọọwa tị guhị wuu gbịla nyọka hu ụkụrwọ nya iJihova kụ ịlahị ọ-ọhịhị nyahị.

M̀ jẹ́ ang lụmẹ-lụmẹ bwu ẹga nya adam bala ịnam, chajị ị ri angị godayị giri-giri ha iJihova. Nyọlẹ ká ọlịkẹjẹ ịnam gbu kpá ọọlajị nya ẹdụrụ ọhẹ, am bala adam dọmwụ nyọka ye ịlahị nya ụgbẹyị lawụlẹ la 1971. Ma la 1973 kam gu ẹka 20 lẹ, adam à gbu tị myị́myị́ lẹlẹ. Ọlẹ ká adam bala ịnam á juwa kaka du kam la ịlọm ụbwọọm bala ọ-lala o-ri ọhịhị nyam nyị da uhwo. Ma “ẹhị ọrịrịị-rịrị ọnyịịla” ọla ịBayịbụụ ya “ọ-jẹ́ myịmyị ọlala” ham bala ọ-dam ụbwọ nyọka la irya ọnyịịla ọkọkọ nyọka la ọkịlẹtụ o-kpenyi, du kam jẹ́ ya ụbwọ chị iJihova giri-giri. (Hib. 6:19) Lụka o-kpii nyọlẹ ká adam gbu kpá, ị chụm nyọka ri ọngọ kpa ụka nyam wuu ya ẹrụ ọnyịịla e-epweji nya Coron ọlẹ ká enyi dakoko ju, ụ-ụwa ịị Palawan.

M̀ gu ẹka 21 ụka kam pwụ epweji nya Coron. Ọlẹ kị kpam nwa e-epweji ọtụka wẹẹ, ọ lam ẹbyẹbyị nyọka yẹ nyori ala epweji ọwẹ á la ila bala enyi gbuu ka, ang ịrụnyẹ á tị ji lụmẹ ka ịnyịnyị. Ịlẹhị lẹ aanahị angị ịmanyị-ịmanyị juwa, am kem à ri ọngọ  ye ịlahị nya ụgbẹyị lẹ, du kam kaa kpehe nya ẹla Ohe ụbwọọm. Ẹ-ẹpwụ nya ọya nya ọgbanyẹ, iwoo nya ugbiyegu nyam bala aligu nyam kaa wum kpoye-kpoye. Alodu, m̀ kaa mwụụrụ yẹ ịdịchụ ka egbamwụ la egbejida ja nyà bwu ahị nyam. Ọ lam lala am nyị ka tụụbwọ hi ụkụrwọ ọwẹ kam ka rụ ka ẹpwa.

Lụka onwee ọlịnyị, m̀ kaa ya ẹla ọla irya nyam wuu je iJihova ẹ-ẹpwụ nya abwọ ọrịrị. M̀ kaa kpịtịya nya ẹla ọ-kpụ́ ọngịnyị ẹjẹ ọhẹ ọlẹ kam wa bwu ịBayịbụụ lee apwụ nyahị. Ẹla ọla Eje Ọnyịịla 19:14 kaa wẹ irya nyam bwu ụka ka ụka. M̀ jẹ́ nyori iJihova ka ri ‘Ẹga ọkpịbaa nyam bala Ọngọgbam kpehe’ kori kam kaa kụ irya ju ẹla ịlẹ kị chịla ẹ-ẹga nyamwụ, lala akụrwọ bala abwẹla nyamwụ. Ang ọjẹ́jẹ ọla ẹpwụ nya Ẹpwang ọ-Kụ Gbeji ọhẹ ká egbeju nyamwụ ri “You Are Never Alone” a dam ụbwọ yẹẹyẹẹ. M̀ wọọ mwụba-mwụba lẹ. Ọ lala o-ri am nyị juwa ụbwọọm bala iJihova ụka ọlịnyị, ọ tị kaa ya iwe ọnyịịla-ọnyịịla ham nyọka raabwọ, jẹ́ ang, bala ọ-kụ irya jwoo.

Ọ́ tata nyọlẹ kam pwụ epweji nya Coron ene kịị chụm nya ọngọgbahị nya ọjịra-jịra kaka. Nyọlẹ kam à ri ọngọgbahị nya ọjịra-jịra kem wẹẹ, epwihi ọnyị myị́ ọnyị, m̀ kaa kpa ịlahị nya apa nya ọjịra-jịra ịlẹ kị ri Theocratic Ministry School, Service Meeting, Congregation Book Study, bala Ẹpwang ọ-Kụ Gbeji Ọjẹ́jẹ. M̀ kaa họ ụpa nya ẹla o-ya dodehe bwu ịBayịbụụ ha alụma epwihi ọnyị myị́ ọnyị ịnyịnyị. Ọlẹ kọ tị kpịpyọ nyamwụ ri, o du kam kaa hi ụbwọ kụ irya u-uhye nya ịlọm kpụ m ka la ịlọm ụbwọọm kaka!

Ụkụrwọ nya ẹrụ ọnyịịla ọ-kpa pyẹ nyam ọla Coron nwụ egbe yẹẹyẹẹ kpụ angịhyẹ ịlẹ kam kaa mẹ ịBayịbụụ jẹ hu enyi Ohe. Ma ọ tị ju akama ẹ-ẹpwụ ịnyịnyị. Ụka ọhẹ, m̀ kaa jẹdịyẹ bwu alụtụrụ gbee da alẹnụ ene kam ka pwụ ẹga ọlẹ kam ka ya ẹla nya Ohe, la ọdọmwụ jẹ́ ẹga kam ka nune kori kam pwụ ụwa ka. Epweji ichiche ịkịla ịlẹ ká enyi dakoko ju ji ẹpwụ nya ẹga ịlẹ kahị kaa ya ẹla nya Ohe ịnyịnyị. Ụka lụmẹ-lụmẹ, m̀ kaa ju ụmwụ ọlẹ kị ya injin ku kpoye nya ihu ọlẹ kọ kaa yẹ ọhụụ kaka ya ẹla nya Ohe, nanana nyori ḿ jẹ́-ẹ da awa ka! Ẹ-ẹpwụ nya ụka olujwo ọwẹ wuu, iJihova chewu kem bala ọ-dam ụbwọ. Ụka ohyẹẹkpẹ, m̀ wẹ ka yẹ nyori iJihova wẹẹ nwụlam nọ gbe akama ọgụgụ ọla ẹpwụ nya ụkụrwọ ọkịla ọlẹ kị ka ya ham.

La 1978, ị yam du ka Papua New Guinea, oye ẹtẹ nya Australia. Papua New Guinea ri ẹpwụma ọlẹ ká ịgbọdọ ji yẹẹyẹẹ, ụwa tụ ahị ju ẹpwụma nya Spain. Ọ lam ẹbyẹbyị nyọka jẹ́ nyori angịnyị ịlala uku ịta ịlụwa kaa ya ìja kpoye nya 800. Ọ tị há nyori ụmụmẹ nyaa kiji jẹ́-ẹ ya òja nya Melanesian Pidgin, kị kaa wụrọọ nyị Tok Pisin.

M̀ yẹ jula ọjịra-jịra nya angị kaa ya ọkịrara pwụ ụka ọhẹ ụ-ụwa ịị Port Moresby, kọ ri egbeju ẹpwa. Ma nyọlẹ kọ pyịnyẹng, m̀ mwụ ka ọjịra-jịra ọlẹ kị kaa ya òja nya Tok Pisin, ọọwa m dọmwụ nya ịkịlasị ọlẹ kị ka mẹ òja ọwẹ jẹm lẹlẹ. M̀ kaa kpa ẹla ọlẹ kam wẹẹ jẹ́ ị-ịkịlasị mẹ ang jẹ ụka kam kpehe kaka ya ẹla nya Ohe. Ọọwa dam ụbwọ nyọka jẹ́ òja ọwẹ hyaa-hyaa. Lụka o-kpii, m̀ jẹ́ họ ụpa nya ẹla o-ya dodehe bwu ịBayịbụụ ha alụma la òja nya Tok Pisin. Ọ lam ẹbyẹbyị yẹẹyẹẹ nyọlẹ kị chụm nyọka kpẹhị rịrị isekut nya aanahị ịla ọjịra-jịra ịlẹ kị kaa ya òja nya Tok Pisin ene kọ ka la ẹka nyọlẹ kam pwụ Papua New Guinea. Ọjịra-jịra nya aanahị ịịwa ji ẹga datị-datị ịlẹ kị ju ẹpwụ yẹẹyẹẹ.

Nyọlẹ ká ọjịra-jịra ịịwa ji lụrụ hi awụlẹ wẹẹ, m̀ kaa nwụla ọjịra-jịra nya isekut lụmẹ-lụmẹ nọ bala  ọ-kaa ka anyị lụmẹ-lụmẹ ịnyịnyị. Ụka nya ọgbanyẹ, m̀ kaa la ịlọm ụbwọọm chajị m̀ yẹ ịlọm ẹ-ẹpwụ nya ẹwpụma onyeewe, òja onyeewe, bala ọhọhọ onyeewe. Nyọlẹ ká ịgbọdọ lụmẹ, ká ọpyị á tị la pẹẹpẹẹ ka wẹẹ, ọ kaa lujwo nyọka ju ang ọrụnyẹ bwu ọjịra-jịra ọhẹ ka ọkịla. Lẹ m̀ kaa ju ụgbọ oluhye lala epwihi ọnyị myị́ ọnyị. Ụka ọhẹ, am kem ị kaa hu ẹ-ẹpwụ nya ụgbọ oluhye ọlẹ kọ hogo wẹ wuu lẹ. Ẹdịyẹ nya ụgbọ oluhye ọwẹ kaa lam uhi-uhi jaabwọ ká ụgbọ nya enyi kaa lam ịnyịnyị!

Angị ịmanyị-ịmanyị à la ifon lẹ, ọọwa dudu kam kaa ya ẹla bala ala ọjịra-jịra bwula ileta ọdada. Ụka ọhẹ, m̀ kaa pweeji ene ká ileta nyam ka wu aanahị ọyị, du kam kaa ta angịnyị wo nya ẹga ọlẹ ká Alibeenu nya iJihova ji. Ma ụka myị́ ụka kam tị yẹ aanahị, ị kaa yem myị yẹẹyẹẹ du kam kaa kpịtịya nya ang odudu kam wẹẹ ya ịlọm kịla iya ọlịịwẹ. M̀ yẹ nyori iJihova dam ụbwọ a-agbẹyị lụmẹ-lụmẹ, igu oriri nyam balọọ tị wu yẹẹyẹẹ ịnyịnyị.

Lụka ọhọhẹ ọlẹ kam ka ọjịra-jịra ka epweji ọla ọnụ enyi ọlẹ kị wụrụ nyị Bougainville, ahụ bala ọrụ ọhẹ wẹ ka tọm la umwẹhụ, lẹ ị tọm wo yẹkẹẹ, “À kpịtịya nyahị wẹẹ?” M̀ kpịtịya kam ya ẹla nya Ohe je ahụ bala ọrụ ịwẹ ụka ọhọhẹ ọlẹ kam pweeji ịị Port Moresby. M̀ dọmwụ nya ịBayịbụụ ọjẹ́jẹ balaa ene kam yaa ụbwọ ha ọọnahị ọlẹng ọhẹ ụ-ụwa. Ịwa angị imimiiye hu enyi Ohe lẹẹlẹẹ lẹ! Ọwẹ ri ọhẹ ẹ-ẹpwụ nya ahị ọwawa lụmẹ-lụmẹ ịlẹ kam yé ẹ-ẹpwụ nya ẹka ịta ịlẹ kam họ ụkụrwọ ịị Papua New Guinea.

Ene kam ka rụ bwu Coron la 1978, m̀ gbachị ọọnahị ọnyang ọhẹ kọ há ụhị yẹẹyẹẹ, kọ tị ri ọngọ hu ịlọmwụ ha ịnyịnyị. Ọwa à ri Adel lẹ. Ọ kaa ye ịlahị nya ụgbẹyị, nanana nyori ọ kaa kpẹhị rịrị anyị nyamwụ imiiye, kị ri Samuel bala Shirley. Ọ kaa kpẹhị rịrị okwirichi ịnamwụ ịnyịnyị. M̀ tịrẹkpẹ ka Philippines la Ọya Ọharụ nya 1981, ọọwa ahị ye awụlẹ lẹlẹ. Nyọlẹ kahị ye awụlẹ kpá, ahị kaa ye ịlahị nya ụgbẹyị kpụrụrụ bala ọ-kaa kpẹhị rịrị ugbiyegu lawụlẹ.

Nanana nyori m̀ la ugbiyegu lẹ, la 1983, ị myị́myị́ chụm nyọka kpa ụka nyam wuu ya ẹrụ ọnyịịla kpụ ị yam du ka Linapacan Island, o-oye nya Palawan. Ahị wuu ugbiyegu mwụ ka epweji onwee ọwẹ ká Alibeenu nya iJihova ọhẹ-lọhẹ á ji ka. Ịnam-ẹpwa gbu nyọlẹ kahị pwụ ụwa lala ẹka ịịwẹ. Ma, ahị kịnyaa la ẹrụ ọnyịịla ọ-kpa pyẹ, ọọwa tị dahị ụbwọ nyọka bọhụ lụka nya ọjụjụ ọwẹ. Ahị dọmwụ nya ịBayịbụụ ọ-mẹjẹ angịnyị lụmẹ-lụmẹ ịị Linapacan, iru nya angịịwa tị nwa kịlahị ịnyịnyị du kahị baba nya Ube nya Ịpyị-Adịrahụ ochiche ọhẹ. Lẹ ahị nwụ ọhẹ la ịlọhị. Nyọlẹ kọ la ẹka ịta nyọlẹ kahị pwụ epweji ọwẹ, ọ kpụhị ịpyọ nyọka yẹ angịnyị angị 110 kị wẹ ọ-Họ Kpa Kpịtịya, iru nyaa tị nwa ka hu enyi Ohe ịnyịnyị nyọlẹ kahị rụ kpá.

La 1986, ị yam du ka Culion, kọ ri epweji ọhẹ ọlẹ ká enyi dakoko ju, kị la ẹgẹhẹ ọlẹ ká angị la ẹdụrụ nya ekpo kaa ji. Nyọlẹ kọ nọ chẹẹ, ị chụ Adel ahụ nyam nyọka ri ọngọ kpa ụka nyamwụ wuu kpa ẹrụ ọnyịịla pyẹ ịnyịnyị. Ụka nya ọgbanyẹ, ahị kaa juhi nyọka ya ẹla nya Ohe je angịlẹ ká ekpo bịrị ịnyịrọ nyaa. Ma aanahị ịlụwa tị ya ahị ọdahile hahị nyori nyị họ angị la ẹdụrụ ọwẹ uda kpụ ị ka jẹ́-ẹ ya chị kịla ọngọkịla ahyaahị kaka lẹ. Angịhyẹ nya alẹdụrụ ịwẹ kaa ka ọjịra-jịra ka ẹpwa nya ọọnahị ọnyang ọhẹ. Ọ́ tata ene ká uhi nyọka ya ẹla  nya Ohe jaa myị́ hiihi kaka, ahị tị yẹ nyori ọ kpịpyọ nyọka ya ẹhị ọrịrịị-rịrị ọla ịBayịbụụ ha angịlẹ kọ laa lala o-ri Ohe bala angịnyị ehe ịkịla nyị nyẹẹkpẹ daa lẹ. Ọ kpịpyọ nyọka yẹ jaabwọ ká angịlẹ ká ẹdụrụ jụ ọtụka-ọtụka jẹ́ wẹẹ chị ọkẹkẹnị u-uhye nya ẹhị ọrịrịị-rịrị nya ahyẹẹnụ ọlẹ ká ịnyịrọ nyaa ka la gogo kpẹẹkpẹẹ.—Luk. 5:12, 13.

Ányị anyị nyahị à tị́ bwu yẹ ba iwe-ahụrụ nya ọhịhị ọla Culion? Am bala Adel ahụ nyam wụrụ anjwo imiiye ịhyẹ kị ri anyịnịna bwu Coron nyọka hụ tahị chajị ká anyị nyahị ka ya alogu ịnyịịla. Samuel, Shirley, bala anjwo ịịwa kaa kpehe nya ẹla Ohe la ịlaa kaka mẹ ang jẹ anjwo ịkịla lụmẹ-lụmẹ, ọọwa am bala ahụ nyam à kaa mẹ ang jẹ adịda bala ịnịna nya anyị ịịwa lẹlẹ. Ụka ọhẹ dọmwụ ji kahị kaa mẹ ang jẹ ugbiyegu 11. Nyọlẹ kọ nọ chẹẹ, ahị mẹ ang jẹ angịnyị lụmẹ-lụmẹ gbee kahị jẹ́-ẹ ya ọjịra-jịra ọkịla yeji!

Ụka nya ọgbanyẹ, am kem à ri ọngọgbahị nya ọjịra-jịra o-oye nya ẹgẹwẹ wuu lẹ. Lẹ egbeju ẹpwa ya am nyị ka họ ọjịra-jịra nya epwihi-epwihi ha ọjịra-jịra ọla Culion ọlẹ kọ la angị kpa ẹrụ ọnyịịla pyẹ angị ineku, ene kam ka họ ịnyịnyị ọọjịra-jịra ọla Marily ọlẹ ká angị kpa ẹrụ ọnyịịla pyẹ angị ihikichu ji, ká ọngịnyị ka ju ụmwụ nya enyi lala awa ịta ene kọ ka pwụ ụwa. Ụka kahị họ ọjịra-jịra ụ-ụwa kpá, ugbiyegu nyahị kaa wule ọgbọdọ lala awa ịmanyị tị́ kaka mẹ ịBayịbụụ jẹ e-epweji ọlẹ kị wụrụ nyị Halsey.

Nyọlẹ kọ nọ chẹẹ, angịnyị lụmẹ-lụmẹ wẹ ka jẹ́ ẹlịlẹhị e-epweji nya Marily bala Halsey du kahị nwụ Ube nya Ịpyị-Adịrahụ ẹ-ẹga imimiiye ịwẹ. Jaabwọ kọ la ịị Linapacan, aanahị bala angịlẹ ká ịBayịbụụ ọ-jẹ́jẹ kpụ ịpyọ à kpa ang-abwọ nya ube kpehe bala ọ-họ ụkụrwọ nya ube ọnwụnwụ ọọwa gụ́ lẹ. Ọlẹ kị nwụ ịị Marily la ẹga ọhụhụ nya angịnyị angị 200 myị́, ị tị ka jẹ́-ẹ pyọọ maa gụ́ ọọwa. Ọwẹ du kahị jẹ́-ẹ la ọjịra-jịra ọtụka ịkịla ụ-ụwa.

La 1993 ká anjwo ịwẹ la gbẹgbịlẹ lẹ, am bala Adel ahụ nyam dọmwụ nyọka họ ụkụrwọ nya isekut ọ-kpẹhị rịrị myị́myị́ ịị Philippines. Ọọwa la 2000 tị lẹ, ị wụrụm ka ube-ụpwụ ọlẹ kọ ri Ministerial Training School nyọka mẹ ang jẹm chajị kam ka ri ọngọ mẹ ang jẹ uube-ụpwụ ọwọwa lẹlẹ. Ḿ yẹ ịlọm lala ọngọ nwa ọ-ka họ ụkụrwọ nya ang ọmẹjẹ ka, ma Adel ahụm tị kaa jum ọhụ ụka wuu. Ọ kpụm ịtịya nyori iJihova nyị ka ya ọngịrị ham nyọka jụ ụkụrwọ onyeewe ọwẹ họ. (Filip. 4:13) Adel jẹ́ ẹlẹwẹ  chajị ọ kaa jụ ụkụrwọ nyamwụ họ nanana nyori ọ́ la gogo ị-ịnyịrọ lụmẹ ka.

La 2006 kam juwa ụkụrwọ nya ang ọmẹjẹ wẹẹ, ahị wẹ ka jẹ́ nyori ahụ nyam la ẹdụrụ nya Parkinson ọlẹ kọ du ká ịnyịrọ nya ọngịnyị kaa che. Ẹlẹwẹ lahị ahị bwuu! Ụka kam byi ahụ nyam nyori m tụụbwọ hi ụkụrwọ nyam nyọka jẹ́-ẹ kpahị jwoo mẹ, ọ wẹm yẹkẹẹ: “Chuchuu mwahị nya ịdongkita ọlẹ kọ ka jẹ́-ẹ dam ụbwọ u-uhye nya ẹdụrụ nyam mẹ, m̀ jẹ́ nyori iJihova ka dahị ụbwọ nyọka họ ụkụrwọ nyamwụ kịnyaa.” Ẹ-ẹpwụ nya ẹka ịrwọnyẹ kịlahị nya ọọwa, ahụ nyam kịnyaa la ụkụrwọ nya iJihova la ọ-ma ala ya ka. Ụka kọ jẹ́-ẹ jẹdịyẹ kaka, ọ kaa kụ oje nya ala ẹjẹẹ kpa ya ẹla nya Ohe. Ụka kọ la gbee ká ẹla oyaya lujwo họọ, ọ kaa wẹ ẹla la omyi ẹla ookpokpo lee imiiye ịịwẹ ọọjịra-jịra kem. Gbee daka ụka ká Adel ahụ nyam gbu la ẹka nya 2013, aanahị lụmẹ-lụmẹ kaa da ụpwụ du wẹ ka joo obe ọhọhọ nya ọhụ ọbaba nyamwụ. Ahị kpa awụlẹ kpoye nya ẹka 30 lẹ, ahụ nyam tị ri ọngọ họ kpẹẹkpẹẹ bala ọngọ la ọháha ịnyịnyị. Lẹ ụka ká igu nwọọ, ọjụjụ bala irya nya ụbwọm ọlala tịrẹkpẹ wẹ ọkịlẹtụ nyam myị́myị́.

O ri irya nya Adel ahụ nyam kam ka kịnyaa la ụkụrwọ nyam lẹ, m̀ họ ịnyị. M̀ kaa họ ụkụrwọ ụka myị́ ụka, ọọwa tị dam ụbwọ nyọka bọhụ ẹ-ẹpwụ nya ụbwọm ọlala. Bwu 2014 ka 2017, ị ya ụkụrwọ ham nyọka ju ọjịra-jịra ịlẹ kị kaa ya òja nya Tagalog ẹ-ẹpwụma ịlẹ kị hile ụkụwọ nyahị ịhyẹ ụga. Nyọlẹ kam họ ọọwa kpá, m̀ ju ọjịra-jịra ịlẹ kị kaa ya òja nya Tagalog ụga ka Taiwan, United States, bala Canada. La 2019, m̀ mẹ ang jẹ la òja nya Ọkịrara uube-ụpwụ ọlẹ kọ ri School for Kingdom Evangelizers ụ-ụwa India bala Thailand. M̀ kaa yé ọkẹkẹnị ọtụka ẹ-ẹpwụ nya akụrwọ ịwẹ wuu. M̀ jẹ́-ẹ chị ọkẹkẹnị gụgụụgụ ụka kam hu ịlọm wuu họ ụkụrwọ nya iJihova.

Ẹ-ẹpwụ nya ụkụrwọ onyeewe ọnyị myị́ ọnyị, m̀ kaa tụ ju aanahị ịlẹ kam tọ chwẹẹ, lẹ ọ-rụ hyaa á kaa chịkpẹẹ lụmẹ ka. Ụka ọlịnyị, m̀ kaa maga nyọka dahịhile iJihova yẹẹyẹẹ. M̀ kaa ye ụbwọ ọdada nyamwụ ụka myị́ ụka, lẹ ọọwa dam ụbwọ nyọka ye ọyẹda ọhẹ-lọhẹ kọ ji ẹ-ẹpwụ nya iwe-ahụrụ nyam myị. Lẹẹlẹẹ, m̀ ri ọngọ kpa ụka nyamwụ wuu ya ẹrụ ọnyịịla ịị Philippines. M̀ la ịlọm ọọjịra-jịra onyeewe ọlẹ kam ji lẹẹlẹẹ lẹ, aanahị ịlụwa tị kaa dam ụbwọ bala ọ-kpahị jum yẹẹyẹẹ lala ugbiyegu. Ọ kaa myịm lẹhị ịnyịnyị nyọka yẹ jaabwọ ká Samuel bala Shirley kaa gbịla ọmyịmyị nya ịnaa.—3 Jọn. 4.

Ee, m̀ la iru nya ịmayẹ ẹ-ẹpwụ nya ọhịhị nyam, tụ ọ-yẹ ahụ nyam ká ẹdụrụ kpọọ ya ụhị gbee kọọ gbu. M̀ baba nyọka yẹ ba iwe-ahụrụ ịdatị-datị ọ-ọhịhị ịnyịnyị. Ma, m̀ tị yẹ nyori iJihova á ‘lụrụ hiihi ahị angịnyị ehe kpong-kpong ka.’ (Ụkụr. 17:27) Ụbwọ nya iJihova ‘á la kpii’ kpoye nyọka jẹ́-ẹ da anchẹ nyamwụ ụbwọ bala o-jwaa ọngịrị ka, tụ́ angịlẹ kị dọmwụ kụ ẹga o-nwee. (Ayị. 59:1) IJihova, kọ ri Ẹjwọ nyam, juwa balam ẹ-ẹpwụ nya ọhịhị nyam wuu, ọọwa tị myịm lẹhị yẹẹyẹẹ. Ḿ la ụbwọ ẹnẹnẹhẹ lẹka.