Mary bala John a ọrụmwụ kụ ụpa nya odehe ọlẹ kị ka jẹ́-ẹ ya ẹrụ ọnyịịla je iru nya angịlẹ kị bwu ẹpwụma nya Philippines kaka họ ụkụrwọ ụ-ụwa. Lụka ká ẹdụrụ nya COVID-19 kpehe, Mary dọmwụ nya ịBayịbụụ ọjẹ́jẹ ta angịnyị ẹ-ẹpwụma ọlẹ kọ kụ, ma ọ tị kaa jẹ́ ang bala angịlẹ kị juwa ẹ-ẹpwụma ịkịla ịnyịnyị. Ányị ọ tị́ kaa bwu họ ịnyị?

Mary kaa tọ ọngọlẹ kọ wẹẹ jẹ́ ịBayịbụụ ta wo yẹkẹẹ: “À jẹ́ ọngọkịla ọhẹ ọlẹ kọ ka myọnụ nya ịBayịbụụ ọjẹ́jẹ?” Kori kọ ya nyị ee, ọ kaa byoo nyori nyị ya ọwa je ọngọọwa. Ịtọ ẹla ọchịkpẹẹ ọlịịwẹ ọtọtọ kaa cheju ụ-ụgbẹyị ọnyịịla. Ịyẹ tị́ du? Chajị angịnyị ịlẹ kị jẹ́ apyobwuna nya Omyi Ẹla nya Ohe kaa tịtọ nyọka mẹ ang ọlẹ kị jẹ́ jẹ alugbiyegu bala aligu nyaa. Ịyẹ à tị́ ri ocheju nya ịtọ ọlẹ ká Mary kaa tọ angịlẹ kọ kaa mẹ ịBayịbụụ jẹ?

Jasmin, ká Mary kaa mẹ ịBayịbụụ jẹ dọọ abwọ chị angị ine ịkịla du kọ kaa mẹ ang jaa ịnyịnyị. Ang ọjẹ́jẹ kpụ Kristine, kọ ri ọngọhẹ nyaa ịpyọ gbee kọ byi Mary nyori nyị ka jẹ́ ang ta ọwa ụka imiiye ẹ-ẹpwụ nya epwihi. Ụka ká Mary tọ Kristine wo kori kọ jẹ́ ọngọhẹ ọlẹ kọ ka myọnụ nya ịBayịbụụ ọjẹ́jẹ, ọ yẹkẹẹ: “M̀ ka ya aligu nyam jeng.” Ẹ-ẹpwụ nya epwihi ịmanyị-manyị, Kristine da Mary abwọ chị angị ine ịkịla ịlẹ kị nwụlanọ nya ang ọjẹ́jẹ ịnyịnyị. Ụka ọkịla, Kristine da Mary abwọ chị aligu nyamwụ ịkịla myị́myị́, angịịwa tị dọọ abwọ chị angịkịla ịnyịnyị wẹẹ.

Kristine tịtọ ká alugbiyegu nyamwụ ịlẹ kị juwa ịị Philippines ka jẹ́ ang u-uhye nya ịBayịbụụ ịnyịnyị. Lẹ ọ ya ẹla nya Ohe je Andrea, kọ ri ọnyị nyamwụ ọnyang. Ụka nya ọgbanyẹ, Andrea kaa kụ irya yẹkẹẹ, ‘Alibeenu nya iJihova ri ịgba ọgbagba ọdatị, ị́ kaa myị la iJisọsị ka, ụpa nya ịBayịbụụ ọlẹ kị da la òja nya iHiburu kem ị kaa wa lẹ.’ Ma nyọlẹ kị jẹ́ ang la awụlẹ ụka ookpokpo kpá, ọ wẹ ka jẹ́ nyori ala ịlẹ kọ wo u-uhye nya Alibeenu nya iJihova rị ịnịịkịla. Ụka kị ja jẹ́ ang balọọ, ọ kaa ya gboo yẹkẹẹ: “Ọ́ kpụ ka ịBayịbụụ á ya ịnyị lẹ aalẹ, ọ ka ri ẹlịlẹhị pyii lẹ!”

Nyọlẹ kọ nọ chẹẹ, Andrea ya Mary je aligu nyamwụ imiiye bala ọngọhẹ ọọlụkụwọ nyamwụ, du ká angị ịta ịịwa dọmwụ nya ịBayịbụụ ọjẹ́jẹ ịnyịnyị. Ịnyịnyị, la Mary ọjẹ́jẹ ka, ọnyị nya ọnyịnịna nya adịda nya Andrea ọhẹ kọ kpụ idu juwa u-ube kaa ke ụrụ lụka nya ang ọjẹ́jẹ ọọwa. Ọọwa ẹnẹhẹ lẹ, Angela à byi Andrea nyị ya ọwa je Mary chajị ká ọwa ịnyịnyị ka jẹ́ ịBayịbụụ lẹlẹ. Ẹla ọlẹ ká Angela wẹẹ jẹ́ họ yẹẹyẹẹ. Ẹ-ẹpwụ nya ọya ookpokpo, ọ kpa ịBayịbụụ lụmẹ-lụmẹ e-egbeju, ọ tị tịtọ nyọka jẹ́ ang ụka ine ẹ-ẹpwụ nya epwihi ịnyịnyị! Ụbwọ ọdada nya Andrea du ká Angela jẹ́-ẹ yẹ jula ala ọjịra-jịra bwula intanẹtị.

Ụka ká Mary yẹ nyori Joshua ọrụ Kristine kaa chịdayị ẹ-ẹkpẹ nyọka wo ẹla lụka nya ang ọjẹ́jẹ  nya Kristine, Mary tọọ wo kori kọ tịtọ nyọka yẹ julọọ. Joshua wẹ yẹkẹẹ: “M̀ ka ke ụrụ wo kem myị́, ma ịtọ ẹla ọhẹ-lọhẹ á ka wẹ ẹga nyam ka; kori a tọm ịtọ ẹla m̀ ka wuleji rụ.” Ẹ-ẹpwụ nya iminiti ịrụ nyọlẹ ká ang ọjẹ́jẹ dọmwụ, ọ tọ ịtọ ẹla kpoye nya ịlẹ ká Kristine tọ, ọ tị nwụlanọ nyọka jẹ́ ịBayịbụụ kịnyaa ịnyịnyị.

Ịtọ ẹla ọchịkpẹẹ ọlẹ ká Mary tọ du ká angịnyị lụmẹ-lụmẹ dọmwụ nya ịBayịbụụ ọjẹ́jẹ. Nyọlẹ kị ju iru ịịwẹ wẹẹ, ọ ya iwe da ká angịkịla ịla ọjịra-jịra ka da ụbwọ mẹ ang jáa. Angịlẹ ká Mary dọmwụ nya ịBayịbụụ ọjẹ́jẹ ta la angịnyị angị 28 ụ-ụwa ẹ-ẹpwụma ine.

Jasmin, kọ ri ọngọhọhẹ ọlẹ kahị ya ẹla rụ ẹ-ẹpwụ nya oja ọlẹ, hu enyi Ohe la Ọya Ohene nya 2021. Kristine hu enyi Ohe la Ọya Ọharụ nya 2022, ọ tị rụ tịrẹkpẹ ka Philippines ka jula ugbiyegu nyamwụ lẹ. Angị imiiye ịkịla ịlẹ ká Kristine da Mary abwọ nyaa hu enyi Ohe ịnyịnyị lẹ. Angela hu enyi Ohe nyọlẹ kọ la ọya ịmanyị-ịmanyị kịlahị nya ọọwa kpụ ọ kaa ye ịlahị nya ụgbẹyị kpụrụrụ lẹẹlẹẹ lẹ. Joshua ọrụ Kristine, bala Andrea ọnyị nyaa ọnyang bala angị ịkịla datị-datị wẹẹ nwà kịlahị yẹẹyẹẹ.

Lụka nya oyi ọhọhẹ, ẹrụ ọnyịịla pyẹ la agaga chajị nyọlẹ ká alugiyegu bala aligu kaa kpa ya je awụlẹ. (Jọn. 1:41, 42a; Ụkụr. 10:24, 27, 48; 16:25-33) À ka tọ ọngọlẹ ká wẹẹ jẹ́ ang ta bala angịkịla ịlẹ ká ẹla nya ịBayịbụụ kpụ ịpyọ wo myị́ nyori, “À jẹ́ ọngọkịla ọhẹ ọlẹ kọ ka myọnụ nya ịBayịbụụ ọjẹ́jẹ?” Kori ká tọ ịtọ ẹla ọchịkpẹẹ ọlịịwẹ wo, ọhẹka ahụ ịnyịnyị ka ye angịnyị lụmẹ-lụmẹ ịlẹ kị ka myọnụ nya ịBayịbụụ ọjẹ́jẹ.