1. Ányị ẹla o-ya bala angịkịla ẹ-ẹrụ ọnyịịla ọ-kpa pyẹ à tị́ kaa la angịhyẹ? (Yẹ ifoto ịnyịnyị.)

 AHỊ anchẹ nya iJihova kaa ya ẹrụ ọnyịịla chajị nya ọháha ọlẹ kahị la ẹ-ẹga nya Adahị olepwoohe bala ọlẹ kahị tịtọ nyọka da angịkịla ụbwọ jọ́ọ ịnyị. Ẹrụ ọnyịịla ọ-kpa pyẹ kaa kpụ aanahị lụmẹ-lụmẹ ịpyọ. Ma, ọ́ tị kaa chị angịkịla kpẹẹ lụmẹ ka. Ịyẹ tị́ du? Angịhyẹ kaa ju oyi bala ọ-yẹ ịlaa lala angị jẹ́ mẹ ang jẹ ka. Ọ kaa la angịhyẹ abwẹbwẹhẹ nyọka hu ang ka ẹpwa nya angịkịla. Angịkịla kaa juhi ká angịnyị ka myị ke ụrụ ka. Ị mẹjẹ angịhyẹ bwu eji-eji nyọka cheji ba hi ẹla. Lẹ nanana nyori aanahị ịwẹ la ọháha ẹ-ẹga nya iJihova yẹẹyẹẹ, ọ kaa laa ujwo nyọka ya ẹla ta angịlẹ kị jẹ́ ka. Ma ị jẹ́ jaabwọ ká ụkụrwọ ọwẹ baba ka ba, lẹ ị tịtọ nyọka lụpa ẹ-ẹpwụ nyamwụ ụka myị́ ụka. Ọọwa ka kpụ iJihova ịpyọ lụmẹ!

2. Kori ká kaa yé ọkẹkẹnị ẹ-ẹpwụ nya ẹrụ ọnyịịla ọ-kpa pyẹ ka, ịyẹ tị́ du ká ọkịlẹtụ ka kpụng enyi ka?

² Ọ kaa lang ụjwọ ụka ọhẹ nyọka yé ọkẹkẹnị ẹ-ẹpwụ nya ẹrụ ọnyịịla ọ-kpa pyẹ ọọlajị nya irya ọlịịwẹ? Kori kọọ lịnyị aalẹ, ọkịlẹtụ a kpụng enyi ka. Irya ọlịnyị ka mẹjẹ myị́ nyori à kaa kpịlọng keji bala ọ-tịtọ nyọka kpa angịkịla irya wẹ ẹga nyịlọng ka. Ọ myịmyị ka mẹjẹ myị́ nyori á tịtọ káahụ bala ọngịnyị ka ya ẹla ju awụlẹ ka. Ọngọngọhẹ-ẹ́ tị kaa tịtọ kị ka pwa ẹla nyamwụ ka, ọgụgụụgụ ụka kọ juwa tịtọ nyọka họ ang ọnyịịla ha angịkịla. Adang olepwoohe jẹ́ ang ịlẹ kị ri akama nyang, ọ tị tịtọ nyọka dang ụbwọ. (Ayị. 41:13) A-ang ọjẹ́jẹ ọlẹ, ahị ka yẹ ang ịrụ ịlẹ kị ka jẹ́-ẹ dang ụbwọ ụka ká la irya ọlịnyị bala abwọlẹ ká ka bwu yé ọkẹkẹnị ẹ-ẹpwụ nya ẹrụ ọnyịịla ọ-kpa pyẹ nyang.

 OMYI ẸLA NYA OHE A JUNG ỌNGỊRỊ

3. Ịyẹ à tị́ da iJeremaya ụbwọ nyọka ya ẹla Ohe ju angịkịla?

³ Bwu ụka-ụka onyogo, omyi ẹla nya Ohe kaa ju anchẹ nyamwụ ọngịrị ụka kị la ụkụrwọ olujwo. Ọlọmwụ iJeremaya ri ọngọhẹ lẹpwụ nyaa. Ọ lọọ uhihi ụka ká iJihova ya ụkụrwọ jwoo ụ-ụbwọ nyọka ya ẹla nyamwụ dodehe. IJeremaya yẹkẹẹ: “Ḿ ka jẹ-ẹ̀ kpa ọnụ-ẹla koo. M̀ ri ọnjwo wẹẹ.” (Jer. 1:6) Ányị ọ tị́ bwu kụrụ uhi ojuju nyamwụ? O yé ọngịrị bwula omyi ẹla nya Ohe. O yẹkẹẹ: “Ọlala ila ẹ-ẹpwụ nya ekpinegu nyam! M̀ maga nyọka tụ ang kụrwọọ, ḿ tị họọ myị ka.” (Jer. 20:8, 9) Ẹga ọlẹ ká iJeremaya kaa ya ẹla nya Ohe á chịkpẹẹ ka, ma omyi ẹla ọlẹ ká Ohe ya doo ẹrụ ya ọngịrị họọ nyọka jụ ụkụrwọ ọwẹ họ.

4. Ịyẹ tị́ kaa họ ụka kahị wa Omyi ẹla nya Ohe bala ọ-kụ irya jwoo kpori-kpori? (Ala iKolosi 1:9, 10)

⁴ Angịnyị nya ịKịrayịsị kaa yé ọngịrị bwula omyi ẹla nya Ohe ọlẹpwụ nya Ụpwụ Ịgọgọ. Ụka ká ọlẹrụ ịPọlụ da ụpwụ du ka ọjịra-jịra ọla iKolosi, o ya nyori ẹla nyịlẹhị ọjẹ́jẹ nyị ka da aanịnọwa ụbwọ nyọka “juwa la ụma nya ọhịhị ọchịla-chịla ọlẹ kọ kaa kpụ Ọngọlahị Ohe Oluhye ayịdang ịpyọ” jaabwọ kị wẹẹ “nwụ́ ugbe bwula . . . ụkụrwọ ọnyịịla.” (Wa Ala iKolosi 1:9, 10.) Ẹrụ ọnyịịla ọ-kpa pyẹ juwa ẹ-ẹpwụ nya ụkụrwọ ọnyịịla ọọwa. Lẹ ụka kahị wa Omyi ẹla nya Ohe bala ọ-kụ irya jwoo kpori-kpori, ọmyịmyị nyahị ẹ-ẹga nya iJihova kaa la ọngịrị gụ ọọwa, ang o-du kahị baba nyọka kpa ẹrụ ọnyịịla pyẹ tị kaa lahị gbagbịla gụ ọọwa ịnyịnyị.

5. Ányị ahị tị́ ka bwu yé apyobwuna yẹẹyẹẹ bwu ịBayịbụụ ọwawa bala ịBayịbụụ ọjẹ́jẹ nyahị?

⁵ Kori kahị ka yé apyobwuna yẹẹyẹẹ bwu Omyi ẹla nya Ohe aalẹ, áhị ka chị agaga ju ịBayịbụụ ọwawa, ịBayịbụụ ọjẹ́jẹ, bala irya ọ-kụ jwoo ka. Hwoo dụmwọ-dụmwọ. Kori ká gba chị ụpa nya Ụpwụ Ịgọgọ ọhẹ ọlẹ ká wo etu nyamwụ yẹẹyẹẹ ka, a hwoo kpoo ka. Ọkọkọ nya ọọwa, kpa Watch Tower Publications Index lee Research Guide for Jehovah’s Witnesses mwahị nya ọ-dawụlẹ nyamwụ. Kori ká chị agaga ju ang ọjẹ́jẹ nyang ka, à ka ju ahị ọ-dahile nyang ọngịrị nyori Omyi ẹla nya Ohe ri ịnyịlẹhị. (1 Tẹs. 5:21) Jaabwọ ká ahị ọ-dahile nyang wẹẹ nwà, ịnyị ọ ka kpụng ịpyọ nyọka mẹ ẹla ọlẹ ká wẹẹ jẹ́ jẹ angịkịla lẹ.

 NWỤLANỌ GBE ẸRỤ ỌNYỊỊLA Ọ-KPA PYẸ YẸẸYẸẸ

6. Ịyẹ tị́ du kahị ka nwụlanọ yẹẹyẹẹ gbe ẹrụ ọnyịịla ọ-kpa pyẹ?

⁶ Kori ká nwụlanọ gbe ẹrụ ọnyịịla ọ-kpa pyẹ, á ka juhi lụmẹ ụka ká juwa ya ẹla ju angịkịla ka. IJisọsị nwụla angịjụgbẹyị nyamwụ nọ ene koo daa ẹrụ ka ya ẹrụ ọnyịịla. (Luk. 10:1-11) Chajị nyọlẹ kị kpa ẹla ọlẹ ká iJisọsị mẹjáa họ ụkụrwọ, ị jẹ́ họ ang ịnyịịla lụmẹ-lụmẹ, ọọwa tị du kị chị ọkẹkẹnị.—Luk. 10:17.

7. Ányị ahị tị́ ka bwu nwụlanọ myị́ gbe ẹrụ ọnyịịla ọ-kpa pyẹ? (Yẹ ifoto ịnyịnyị.)

⁷ Ányị ahị tị́ ka bwu nwụlanọ gbe ẹrụ ọnyịịla ọ-kpa pyẹ? Ahị baba nyọka kụ irya nya abwọlẹ kahị ka ya ọnụ nọ me ẹlịlẹhị jẹ angịkịla. Ọ kaa há nyọka kụ irya nya abwọlẹ ká angịhyẹ kaa ya ụka kị wo ẹla nyahị bala abwọlẹ kahị ka bwu waa ẹla ịnyịnyị. Ọọwa ụka kahị ka ẹga nya angịnyị lẹ, ahị kaa maga nyọka dọhụ pịlẹ, chị ụmwẹhụ, bala ọ-ya ẹla taa kpẹnẹẹ lẹlẹ.

8. Ụgbẹyị oyina angịnyị nya ịKịrayịsị à tị́ lala ẹja ibene-bene?

⁸ Ọlẹrụ ịPọlụ chabwọ nya ụkụrwọ ọlẹ kahị la ẹ-ẹpwụ nya ẹrụ ọnyịịla ọ-kpa pyẹ ụka kọ yẹkẹẹ: “Ẹ-ẹpwụ nyahị ahị angị dẹwụ-dẹwụ ịlẹ kahị lala ẹja ọpyị ọlam-ọlam ọlẹ kọ kaa bene myị́, Ohe Oluhye a mwọọgịlẹ tụụbwọ hi ụdụ ọlịnya” ju lẹ. (2 Kọr. 4:7) Ịyẹ à tị́ ri ụdụ ọlịnya ọwẹ? O ri ụkụrwọ nya ẹrụ ọnyịịla nya Ịpyị-Adịrahụ ọ-kpa pyẹ ọlẹ kọ kaa chị ọhịhị da. (2 Kọr. 4:1) Ịyẹ à tị́ ri ẹja ibene-bene? Ị ku ọmwakpa nya anchẹ nya Ohe ịlẹ kị kaa kpa ẹrụ ọnyịịla ka ya je angịkịla. Lụka nya ịPọlụ anyị, alọhị kaa ya ang i-ju apyobwuna lala ang oriri, ere, bala okpoko ju ẹ-ẹpwụ nya ọta ọpyị kpa ka anyị. Ụ-ụgbẹyị ọlịnyị-ịnyị iJihova à ya ẹrụ ọnyịịla juhi ụ-ụbwọ lẹ. Bwula ụbwọ ọdada nya iJihova, ahị ka yé ọngịrị ọlẹ kahị baba nyọka kịnyaa la ẹrụ ọnyịịla ọ-kpa pyẹ.

RAABWỌ BỊLẸ UGBODU OJUJU

9. Ányị ahị tị́ ka bwu kụrụ uhi nya ọngịnyị ehe ojuju lee uhi nya angịnyị ọ-ka myị ke ụrụ ka? (Yẹ ifoto ịnyịnyị.)

⁹ Ụka ọhẹ, ahị ka juhi nya ọngịnyị ehe lee o-juhi nyori angịnyị á ka myị ke ụrụ ka myị́. Ányị ahị tị́ ka bwu kụrụ uhi ọwẹ? Kpịtịya nya abwọ ọrịrị nya alẹrụ nya iJisọsị ụka kị byaa nyị ba la o-ya ẹla nya Ohe. Ọkọkọ kị ka juhi nyaa, ị bịlẹ iJihova kọ ka ya “ọngịrị  ọ-kpa ya ẹla myị́ la uhi ojuju-ka” haa. IJihova tị wẹ abwọ ọrịrị nyaa ahyaahị ịnyịnyị. (Ụkụr. 4:18, 29, 31) Kori kahị kaa juhi nya angịnyị ehe ụka ọhẹ, ahị ịnyịnyị a raabwọ ha iJihova kọ ka dahị ụbwọ. Bịlẹ iJihova kọ dang ụbwọ chajị ká ọháha ọlẹ ká la ẹ-ẹga nya angịnyị ehe ka kụrụ uhihi nyaa ọlẹpwụ nyang.

10. Ányị iJihova à tị́ kaa dahị ụbwọ họ ụkụrwọ nyahị lala Alibeenu nyamwụ? (Ayịsaya 43:10-12)

¹⁰ IJihova chụhị nyọka ri Alibeenu nyamwụ, ọ tị chịhị ehe nyọka dahị ụbwọ ju ugbodu. (Wa Ayịsaya 43:10-12.) Kụ ẹhị yẹ agbẹyị ine ịhyẹ ịlẹ kọ kaa họ ịnyị wẹẹ. Ọhọhẹ, iJisọsị kaa juwa balahị ụka myị́ ụka kahị ja ya ẹrụ ọnyịịla. (Mat. 28:18-20) Oheeye, iJihova chụ alegu-ẹrụ nyọka dahị ụbwọ. (Ọwụ. 14:6) Ọhata, iJihova ya olegu ịgọgọ nyamwụ hahị nyọka dahị ụbwọ kpịtịya nya ang ịlẹ kahị jẹ́ ene. (Jọn. 14:25, 26) Ohene, iJihova ya aanịna alẹng bala anyang hahị ịlẹ kị ka kpahị chị. Bwula ụbwọ ọdada nya iJihova bala aanahị, ahị la ang myị́ ang ọlẹ kahị baba nyọka ju ugbodu bala ọ-kịnyaa la ẹrụ ọnyịịla ọ-kpa pyẹ.

HỌ ỤKỤRWỌ BA IWE-AHỤRỤ NYA ẸGA ỌLẸ KÁ JI JẸ BALA Ọ-LA IRYA ỌNYỊỊLA

11. Ụka ká juwa kpa ẹrụ ọnyịịla pyẹ, ányị a tị́ ka bwu yẹ angịnyị gụ ọọwa? (Yẹ ifoto ịnyịnyị.)

¹¹ Ọkịlẹtụ kaa kpụng enyi ụka ká tọ angị ịmanyị-ịmanyị ẹ-ẹpwa? Kori kọ lịnyị à tịlọng wo: ‘Ale aloye ọlẹ à tị́ kaa ji lụka ọlẹ?’ (Ụkụr. 16:13) ‘Ị ka juwa ọ-ọlụkụrwọ lee ị tị́ ka ihi?’ Kori kọ lịnyị, anụ ka yẹ angịnyị gụ ọọwa kori kanụ họ ụkụrwọ tụ́ opeje da? Ọọnahị ọhẹ ká ẹnyị nyamwụ ri Joshua yẹkẹẹ, “M̀ kaa yé iwe ya ẹla Ohe yẹẹyẹẹ ụka kam juwa jẹdịyẹ i-ihi bala ẹpwụ nya alụma.” Ọwa bala Bridget ahụ nyamwụ kaa yẹ angịnyị ẹ-ẹpwa ịnyịnyị ụka kị kele la obyi bala ẹnụ nya ịSọndị lẹnụ.—Efe. 5:15, 16.

12. Ányị ahị tị́ ka bwu jẹ́ ang ọlẹ ká angịnyị myị la lee ang ọlẹ kọ juwa i-irya nyaa?

¹² Kori ká angịnyị á kaa ke ụrụ lụmẹ ka, maga ká jẹ́ ang ọlẹ kị myị la lee ang ọlẹ kọ kaa kpaa ịpyọ. Joshua bala Bridget kaa kpa ịtọ ẹla ọla ịlahị nya ịtịrakị dọmwụ nya ẹla oyaya. Ọ-chụ pwokwita, kori kọ ri ịtịrakị ọlẹ kọ ri, A Tị́ Me Irya ká ịBayịbụụ Ri Ụpwụ Ọlányị? kị ja kpa  ya ẹla, ị kaa yẹkẹẹ: “Angịhyẹ kaa yẹ ịBayịbụụ lala ụpwụ o-bwu ẹga nya Ohe, ịnyị ọ tị kaa la angịkịla ka. Ányị ahụ à tị́ yọọ?” Ọwẹ du kị jẹ́-ẹ ya ẹla.

13. Ịyẹ tị́ du kahị ka jẹ́-ẹ ya nyori ahị jụ ụkụrwọ họ kori ká angịnyị á dọmwụ myị ke ụrụ ka? (Etu 27:11)

¹³ Ụkụrwọ ọ-jụ họ nyahị á kpụnịrọ ụrụ okeke nya angịnyị ka. Ịyẹ tị́ du? Chajị ahị họ ang ọlẹ ká iJihova bala Ọnyị nyamwụ tịtọ kahị ka họ, kọ ri ẹrụ ọnyịịla oyaya lẹ. (Ụkụr. 10:42) Kori kahị dọmwụ yé ọngịnyị ya ẹla ta ka wẹwẹ lee kori kị dọmwụ pwà la o-ke ụrụ wo ẹla nyahị, ahị ka jẹ́-ẹ chị ọkẹkẹnị chajị ahị jẹ́ nyori ẹla nyahị kpụ Adahị olepwoohe ịpyọ.—Wa Etu 27:11.

14. Ịyẹ tị́ du kahị ka chị ọkẹkẹnị ụka ká ọọnahị ọkịla á yé ọngịnyị ọlẹ kọ tịtọ nyọka jẹ́ ang gụ ọọwa?

¹⁴ Ahị ka jẹ́-ẹ chị ọkẹkẹnị ịnyịnyị ụka ká ọọnahị ọkịla á yé ọngịnyị ọlẹ kọ tịtọ nyọka jẹ́ ang gụ ọọwa. Ẹpwang ọ-Kụ Gbeji chụ ụkụrwọ nyahị ọlẹ ka pwoku angị mwahị nya ọnyị ọlẹ kọ byi. Iru nya angịnyị kaa jẹ bwu ẹgẹhẹ ka ẹga ọkịla juwa mwahị nyamwụ. Ụka kị yẹ ọnyị ọọwa, ọ-ọngọlẹ ko yọọ jene kem à kaa chị ọkẹkẹnị ka, angịlẹ wuu kị mwahị nyamwụ kaa chị ọkẹkẹnị. Angịnyị ọ-dụbwọ wẹ ka ri angịjụgbẹyị á ri ụkụrwọ nya ọngọ ookpokpo ka. Ahị baba nya ọng myị́ ọng wuu nya ahị ọ-ka jẹ́-ẹ wu angịnyị ọyị, lẹ ahị wuu kaa chị ọkẹkẹnị ụka ká ọngọ onyeewe á wẹ ọjịra-jịra.

KỤ IRYA NYA ỌHÁHA ỌLẸ KÁ LA HA IJIHOVA BALA ANGỊNYỊ

15. Ányị ẹla ọlụpwụ nya ịMatiyu 22:37-39 à tị́ ka dahị ụbwọ nyọka yé ọkẹkẹnị gụ ọọwa ẹ-ẹpwụ nya ẹrụ ọnyịịla ọ-kpa pyẹ nyahị? (Yẹ ifoto nya ọgbanyẹ.)

¹⁵ Ẹrụ ọnyịịla ọ-kpa pyẹ ka chịhị ila gụ ọọwa kori ká irya nyahị á nọ u-uhye nya ọháha ọlẹ kahị la ha iJihova bala angịnyị ehe. (Wa ịMatiyu 22:37-39.) Kụ irya nya ọkẹkẹnị ọlẹ ká iJihova ka chị ụka kọ yẹhị kahị ja họ ụkụrwọ ọwẹ bala ọkẹkẹnị ọlẹ ká angịkịla ka chị ụka kị dọmwụ nyọka jẹ́ ịBayịbụụ! Kpịtịya ịnyịnyị nyori angịlẹ kị ke ụrụ wo ẹla nyahị bala o-cheje nyọka gbịgba ha iJihova, ka hịhị gboyi myị́ oyi.—Jọn. 6:40; 1 Tim. 4:16.

16. Ányị ahị tị́ ka yé ọkẹkẹnị ẹ-ẹpwụ nya ẹrụ ọnyịịla ọ-kpa pyẹ kori kahị dọmwụ jẹ́ kpehe bwu ẹpwa nyahị ka? Ọ-chụ pwokwita oyina à tị́ ji?

¹⁶ Ịngịhyẹ du ká jẹ́-ẹ kpehe hi ẹpwa nyang ka? Kori ko lịnyị, à kụ irya nya ang ọlẹ ká  ka jẹ́-ẹ họ nyọka mẹ ọháha nyang jẹ ẹ-ẹga nya iJihova bala angịkịla. Ụka nya ẹdụrụ nya COVID-19, Samuel bala Dania á jẹ́ kpehe bwu ẹpwa nyaa ka. La ụka olujwo ọwẹ wuu, ị kaa ya ẹla Ohe bwu ifon ụka myị́ ụka, da ụpwụ du ta angịnyị, bala ọ-mẹ ang jẹ bwu Zoom. Samuel ya ẹla ta angịlẹ kọ tọ u-ube utoji ọlẹ kị wẹẹ họọ utoji nya ẹbẹ ọgọja. O yẹkẹẹ: “Ụka ká ang á lujwo, ahị ka me imahị lee ọ-la ọkịlẹtụ okpenyi myị́, ọọwa tị ka ma ọmyịmyị nyahị yẹ myị́. Ahị baba nyọka yé ọkẹkẹnị ẹ-ẹpwụ nya ịgba ọgbagba nya iJihova.” Ụka ọwẹ-ọwẹ, Dania keji, lẹ ọ́ jẹ́ wuleji bwu ịbẹẹdị ka ẹ-ẹpwụ nya ọya ịta gbẹgbịlẹ. Ẹ-ẹkpẹ nya ọọwa, ọ baba nya oje nya angị ju ẹjẹẹ ẹ-ẹpwụ nya ọya ịrwọnyẹ. Ọ yẹkẹẹ: “M̀ maga nyọka họ jaabwọ ká iwe-ahụrụ nyam ya iwe da ham ka ba. M̀ jẹ́ ya ẹla ju ọngọ họ utoji ọhẹ ọlẹ kọ juhi ụga. M̀ myịmyị jẹ́ ya ẹla bala angịlẹ kịị ya ang du ẹrụ wẹ ẹpwa nyahị. M̀ myịmyị jẹ́ kpa ifon ya ẹla Ohe je ọngọhẹ ọlẹ kọ kaa họ ụkụrwọ u-ube utoji ọhẹ.” Iwe-ahụrụ nya Samuel bala Dania á ya iwe da haa nyọka họ jaabwọ kị tịtọ ka, ma ị họ ọlẹ kị ka jụ họ myị́ bala o-yé ọkẹkẹnị ẹ-ẹpwụ nyamwụ.

17. Ányị ahị tị́ ka bwu yé apyobwuna yẹẹyẹẹ bwu ẹla ọlẹ kị gba kpehe ẹ-ẹpwụ nya ang ọjẹ́jẹ ọlẹ?

¹⁷ Maga ká ba ẹla ịrụ ịlẹ kị gba kpehe ẹ-ẹpwụ nya ang ọjẹ́jẹ ọlẹ wuu jẹ. Ọnyọnyọọnyị nyaa lala ang nya ịnẹpwa ịdatị-datị ịlẹ kị kaa kpa kpụ́ ang oriri. Ụka kị yaa ịwa wuu ju lawụlẹ lẹ, ang oriri à kaa lịpyọ lẹlẹ. Ụka kahị kpa ẹla ịwẹ wuu họ ụkụrwọ, ahị ka jẹ́-ẹ la ọngịrị nyọka kụrụ ọkịlẹtụ okpenyi wuu bala o-yé ọkẹkẹnị ẹ-ẹpwụ nya ẹrụ ọnyịịla ọ-kpa pyẹ.