ỊBAYỊBỤỤ ya ẹla lụmẹ-lụmẹ u-uhye nya ‘angịnyị ehe ịlam-ịlam lala ahị,’ ịlẹ kị la irya ọkụku ụma nyahị. (Jem. 5:17) Ọ-chụ pwokwita, ahị wo etu nya ẹla ọlẹ ká ịPọlụ ya ẹ-ẹpwụ nya ụpwụ nya Ala iRom 7:21-24 yẹẹyẹẹ: “Ịnyị a du, ụka myị́ ụka kam juwa tịtọ nyọka họ ang ọnyịịla lẹ, ká ang onyobyi ọhọhọ mwọọgịlẹ kaa hu gẹgịlẹ ị-ịlahị nyam dachichi lẹlẹ. . . . Oo! Ọlịnyịribyi, m ri lẹlẹ!” Ụka kahị juwa ma uya ta ọ-la kpẹẹkpẹẹ-ka nyahị, ahị kaa ye ẹjẹ ọkpụ́kpụ ụka kahị wo ẹla nya ịlẹhị ọlịịwẹ.

ỊPọlụ ya ẹla u-uhye nya irya omeme nyamwụ ịkịla ịnyịnyị. Ụ-ụpwụ nya Ala ịGalatiya 2:20, ọ ya nyori iJisọsị nyị ri “Ọngọlẹ [kọọwa nyị] há lụmẹ gbee kọ hu ịlọmwụ kpa kaka kịla iya chajị [nyamwụ].” ỊPọlụ dahịhile ẹlẹwẹ. À kaa la irya ọlịịwẹ ịnyịnyị? Ọ́ ka ri ụka myị́ ụka ka myị́.

Kori kahị me irya nyori áhị ju apyobwuna ka chajị nya ọhọbịrị ọhẹ ọlẹ kahị họ lụka ọkẹkpẹ, ọ ka lujwo ụka ọhẹ nyọka myị nyori ahị há iJihova bala o-ri ọ hịnyọhi hahị lẹ. Ọ tị ka myịmyị lujwo gụ ọọwa nyọka myị nyori iJisọsị gbu chajị nyahị ahị kpangga. IJisọsị tịtọ kahị ka yẹ iya ọkịlaa-kịla nyamwụ lala ang āhị ịnyịlẹhị? Kori kọ lịnyị, ịyẹ à tị́ ka dahị ụbwọ nyọka họ ịnyị? Ahị kụ ẹhị yẹ ịtọ ẹla imiiye ịwẹ wẹẹ.

IJisọsị tịtọ kahị ka yẹ iya ọkịlaa-kịla nyamwụ lala āhị ọlẹ kị ya hahị ahị kpangga ịnyịlẹhị. Ahị tị́ họ ányị kahị jẹ́? Kụ irya nya ẹla ọlẹ ká ụpwụ nya iLuku 23:39-43 chabwọ wẹẹ. Ị gu ọlẹng ọhẹ iloo ba iJisọsị ba. Ọ myị nyori ọwa nyị họ ẹla onyobyi lụka ọkẹkpẹ. Ẹla ọlẹ kọ họ ka tịpyọ lụmẹ ịnyịlẹhị, chajị angịlẹ kị họ ang onyobyi ọlịnyị ị kaa gu iloo ba okoji lẹ. Ẹla ọwẹ jwọọ ọ-ọkịlẹtụ yẹẹyẹẹ, dudu kọ bịlẹ iJisọsị yẹkẹẹ: ‘Chuchuu, aa kpịtịya nyam ụka ká pwụ Ịpyị-Adịrahụ nyang.’

Ányị iJisọsị à tị́ họ mẹ? Kụ irya nya ọjụjụ ọlẹ ká iJisọsị chịpwụrụ bwu ụka kọ wẹẹ maga nyọka pyị́ egbeju nyamwụ chajị kọ ka jẹ́-ẹ yẹ ọlẹng ọwẹ ẹ-ẹhị wẹẹ. Nanana nyori ọwa ayịdang juwa ẹ-ẹpwụ nya ajụjụ, iJisọsị chị ụmwẹhụ bala o-ju ọlẹng ọwẹ ọhụ. Ọ byoo yẹkẹẹ: ‘M̀ jam bying alẹ oleeri ọlẹ yẹkẹẹ, à ka juwa balam ị-ịParadayịsị.’ IJisọsị ka jẹ́-ẹ kpọọ ịtịya ịnọ yẹkẹẹ: Am “Ọnyị nya ọngịnyị ehe warị wẹ odehe ọlẹ kaka . . . hu ọhịhị nyam kịla iya wọnụ nyaa ịwa wuu ju. Chajị ká iru nya angịnyị ka jẹ́-ẹ bwula ọọwa la ọchịda nya Ohe Oluhye.” (Mat. 20:28) Ọkọkọ nya ọọwa lẹ, iJisọsị mẹjọ́ọ nyori iya ọkịlaa-kịla nyamwụ nyị ju apyobwuna họọ ọwa lịlọmwụ kpangga. O ya ẹla balọọ jaabwọ ká aligu kaa ya ẹla lawụlẹ. O ya nyori ‘à ka juwa balaam.’ Ọ myịmyị byi ọlẹng ọwẹ nyori nyị ka juwa ị-ịParadayịsị ám̀ odehe ọlẹ.

Ọ la gbagbịla nyori iJisọsị tịtọ ká ọlẹng ọwẹ ka jẹ́ nyori iya ọkịlaa-kịla nya ọwa nyị ka ju apyobwuna họọ ọwa ayịdang. Kori ká iJisọsị á la irya ọnyịịla ọlịịwẹ ẹ-ẹga nya oluguru ẹla ọlẹ kọ la iwe nyọka gbịgba ha Ohe Oluhye ka aalẹ, ọ ka la irya ọnyịịla ọ-gụ ọọwa ẹ-ẹga nya ọngọ hụ enyi Ohe ọlẹ kọ kaa gbịgba ha Ohe Oluhye. Ịyẹ à tị́ ka dahị ụbwọ nyọka myị ịnyịlẹhị nyori, iya ọkịlaa-kịla nya ịKịrayịsị ju apyobwuna hahị ahị ayịdang, nanana nyori ahị họ ịhọbịrị lụka ọkẹkpẹ?

Ụkụrwọ ọlẹ ká iJisọsị ya ha ịPọlụ dọọ ụbwọ nyọka jẹ́ nyori ọ gbu chajị nyamwụ ịnyịlẹhị. Ányị ọ tị́ dọọ ụbwọ? Ọ yẹkẹẹ: “M jam ji ịKịrayịsị iJisọsị Ọngọlahị obe ọhọhọ, chajị nyọlẹ kọ ya ọngịrị ọ-kpa họ ụkụrwọ nyamwụ ọlẹ ham bala ọlẹ kọ hum lala ọngọ chịla o-hu ọkịlẹtụ ha ị-ịlahị nyamwụ, du kọ chụm nya ọngọ ya ẹrụ ọnyịịla họọ. Ọ ri nya ịlẹhị, ịnọ, am ayịdang ya ẹla pyị ịKịrayịsị bala ọ-tụ ẹnyị nyamwụ pyịpyị bala ọ-chị oyoyi ju ẹnyị nyamwụ ịnyịnyị ẹnẹhẹ lẹ.” (1 Tim. 1:12-14) Ụkụrwọ nya ịPọlụ họ kọ jẹ́ myị̀myị̀ nyori iJisọsị mẹ ahyẹẹrwẹrwa jẹ ẹ-ẹga nyamwụ, la ọháha ẹ-ẹga nyamwụ, bala ọ-dahịhiloo ọwa ayịdang. IJisọsị ya ụkụrwọ juhi ahị ụ-ụbwọ ịnyịnyị. (Mat. 28:19, 20) Ụkụrwọ ọọwa ka jẹ́-ẹ dahị ụbwọ ịnyịnyị?

Albert ri ọọnahị ọlẹng ọhẹ ọlẹ kọ tịrẹkpẹ wẹ ẹga nya iJihova kpanjẹ, nyọlẹ kị gbọọ bwu ogu nya iJihova lala ẹka iwo ịta kụrụ ine kẹkpẹ. Ọ yẹkẹẹ: “M̀ kaa kpịtịya nya ịhọbịrị nyam lodu bala alẹnụ. Ma, ụka kam juwa kpa ẹrụ ọnyịịla pyẹ, ọ kaa lam lala o-ri iJisọsị ya ụkụrwọ jum am ayịdang ụ-ụbwọ lala ịPọlụ ọngọmyẹrụ. Ọ du kam kaa chị ọkẹkẹnị bala ọ-la irya ọnyịịla ẹ-ẹga nya ịlọm, ọhịhị nyam, bala ijuju nyam.”—Eje. 51:3.

Allan ri ọọnahị ọlẹng ọkịla ọlẹ kọ kaa họ ang onyobyi bala abwẹga ene kọọ jẹ́ ẹlịlẹhị. Ọ yẹkẹẹ: “M̀ kaa kụ irya nya ang ịtịpyọ ịlẹ kam họ angịnyị wẹẹ. Ụka ọhẹ, ọ kaa kpụm ọkịlẹtụ enyi. Ma m̀ ji iJihova obe nyọlẹ kọ ya ẹga da ká ọlọhọbịrị lalam ka kpa ẹrụ ọnyịịla ka ya je angịkịla. Kori kam yẹ jaabwọ ká angịnyị kaa họ ụka kị wo oja ọnyịịla ọwẹ, ọ kaa kpụm ịtịya nyori iJihova ri Ohe ọnyịịla bala Ohe nya ọháha. M̀ me irya ọ kaa kpam da angịlẹ kị la ọhịhị ọtịpyọ lalam ụbwọ ịnyịnyị.”

Ụka kahị juwa kpa ẹrụ ọnyịịla pyẹ, o ri ẹla ọnyịịla kahị wẹẹ họ, ahị tị kaa kụ irya ọnyịịla ịnyịnyị. Ọ kaa kpụhị ịtịya nya ahyẹẹrwẹrwa, ọháha, bala ahị ọdahile nya iJisọsị.

Gbee ka pwụ ụka ọlẹ ká iJihova ka ta odehe nya Olegu Onyobyi ọlẹ ayịreji, ọkịlẹtụ nyahị ka kịnyaa juwa lahị eje u-uhye nya ịhọbịrị nyahị ịlụka ọkẹkpẹ myị́. Ịyẹ à tị́ ka dahị ụbwọ nyọka ma uya ta irya ọkụkụ ọlịnyị?

Jean, ọọnahị ọnyang ọhẹ ọlẹ ká ọkịlẹtụ kaa lọọ eje chajị nyọlẹ kọ kaa họ ịhọbịrị kpịbaa-kpịbaa ene-ene, yẹkẹẹ: “Ọ kpụm ịpyọ lụmẹ nyori ‘Ohe Oluhye lụmẹ gụ ọkịlẹtụ nyahị.’ ” (1 Jọn. 3:19, 20) Ahị ịnyịnyị ka jẹ́-ẹ ye ẹjẹ ọkpụ́kpụ myị́, chajị iJihova bala iJisọsị jẹ́ nyori ahị nyị́ la kpẹẹkpẹẹ ka. Kpịtịya nyori, ị́ ya āhị nya ọ-ra kpehe ọwẹ ha angịnyị ehe ịlẹ kị la kpẹẹkpẹẹ ka, ma ị ya ha alịhọbịrị ịlẹ kị yẹda ịnyị.—1 Tim. 1:15.

Ahị ka jẹ́ myị̀myị̀ nyori iya ọkịlaa-kịla nya iJisọsị nyị ju apyobwuna hahị kori kahị juwa raabwọ bala ọ-kụ irya kpori-kpori u-uhye nya ẹla ọlẹ ká iJisọsị họ ẹ-ẹga nya angịnyị ehe ịlẹ kị la kpẹẹkpẹẹ ka, bala ụka kahị maga nyọka họ ụkụrwọ ọlẹ kọ ya juhi ụ-ụbwọ yẹẹyẹẹ. Kori ká họ ịnyị, à ka jẹ́-ẹ ya, lala ịPọlụ, nyori: “ỊKịrayịsị Ọnyẹwẹ nya Ohe Oluhye, Ọngọlẹ kam há lụmẹ gbee kọ hu ịlọmwụ kpa kaka kịla iya chajị nyam.”