Adam ri ọngọhẹ nya alegbeju ịla United Church of Canada, lẹ epwihi ọnyị myị́ ọnyị ọ kaa yam bala aanam anyang imiiye du ka ang ọmẹjẹ ọlẹ kị kaa la ha anjwo lụtụrụ nya ịchọọchị ọnyọnyọọnyị, ene kahị ka rụ ka tọọ la oje 11:00 nyọka họ ịchọọchị ọlam-ọlam. Alẹnụ, ahị kaa ba ịnam ka Ube nya Ịpyị-Adịrahụ. Ọ́ lujwo nyọka yẹ nyori ọdatị ji ẹ-ẹpwụ nya ịgba ọgbagba imiiye ịwẹ ka.

Ịnam kaa ya ang inyeewe ịlẹ kọ wẹẹ jẹ́ je Bob bala Marion Hutcheson, kị ri aligu nyamwụ tata lẹ. Ịwa ịnyịnyị wẹ ka ye ẹlịlẹhị myị. La ẹka nya 1958, ugbiyegu nya Hutcheson kpam bala anjwo nyaa angị ịta ka ọjịra-jịra ọtụka ọ-la ẹnụtụrụ ineku ọlẹ kọ ri Divine Will International Assembly, kị họ ịị New York City. Ụka kam kụ irya kẹkpẹ, m̀ jẹ́ lẹlẹẹ nyori ụkụrwọ ochiche ọ ri nyọlẹ kị kpam ba ịlaa ka, ma ọjịra-jịra ọwẹ ri ịngịhyẹ ọlẹ kam ka jẹ́-ẹ deeri ẹnẹnẹhẹ ka.

Ụka kam gu ẹka iwo kụrụ, iyo ileji ịlẹ kahị la, ahị kaa kpa kpịlọhị lẹ, ụkụrwọ ọwẹ tịị kpụm ịpyọ yẹẹyẹẹ. M̀ kụ irya u-uhye nyọka ka ube-ụpwụ kaka jẹ́ ang u-uhye nya iyo ọ-họ utoji. Ịnam ya ẹla ọọwa ju ọngọgbahị nya ọjịra-jịra ọhẹ. Ọ kpụm ịtịya nyori ahị nyị jam hịhị “lụka ohyẹẹkpẹ nya odehe ọlẹ,” ene kọọ tọm wo nya abwọlẹ ká ube-ụpwụ ọgbẹgḅilẹ ọ-kaka la ẹka lụmẹ-lụmẹ ka bwu gu igu oriri nyam bala iJihova. (2 Tim. 3:1) Ọọwa lẹ, m ba hi ẹla nya ube-ụpwụ ọgbẹgbịlẹ lẹlẹ.

 Ụka kam họ ụpwụ iwo kpá, m̀ kaa kụ irya u-uhye nya ang ọlẹ kam ka họ ugbẹnyị. Ịlẹhị lẹ, m̀ kaa kpehe nya ẹrụ ọnyịịla ọ-kpa pyẹ la ọmyị́myị́ nya epwihi ọnyị myị́ ọnyị, ma ọ́ kaa kpụm ịpyọ ka, lẹ ḿ yẹ ịlọm lala ọngọ ka jẹ́-ẹ ye ịlahị nya ụgbẹyị myị́ ka. Adam bala ọọnamwụ ochiche ọhẹ kị kaa gbịgba ha iJihova ka, kaa jum ọhụ nyọka kpa ụka nyam wuu họ ụkụrwọ ị-ịKọmpeni ọtụka ọhẹ kọ ji Toronto. Ọọnịna nya adam ọwẹ la iwe-ahụrụ ọgbẹgbịlẹ ụ-ụwa, lẹ m myị ọnụ nya ụkụrwọ ọọwa.

Ụkụrwọ ọlẹ kam kaa họ kpoye nya ụka bala ọ-yẹ jula angị myị la iJihova ka ụka myị́ ụka ịị Toronto du kam la dẹwụ-dẹwụ ẹ-ẹpwụ nya ọjịra-jịra ọ-kaka bala ẹrụ ọnyịịla ọ-kpa pyẹ. Ẹga nya adam ọgbahị kọ ri Olibeenu nya iJihova ka, m kụ ụka nya ọgbanyẹ lẹ, ma nyọlẹ kọ gbu kpá m baba nya ẹga ọkịla ọlẹ kam ka hụ.

Ugbiyegu nya Hutcheson ọlẹ kọ kpam ka ọjịra-jịra ọtụka ọla ẹka nya 1958 wẹ ka lala adịda bala ịnịna ẹ-ẹga nyam. Ị wụrụm ka kụ ẹpwa nyaa bala ọ-dam ụbwọ wẹ ka ri oligu nya iJihova tịrẹkpẹ. La ẹka nya 1960, am bala John ọnyị nyaa hu enyi Ohe. John dọmwụ nyọka ye ịlahị nya ụgbẹyị, ọọwa gum gbịla nyọka họ gụ ọọwa ẹ-ẹpwụ nya ẹrụ ọnyịịla ọ-kpa pyẹ. Aanahị lụmẹ-lụmẹ ọọjịra-jịra yẹ nyori am nyị wẹẹ nwà kịlahị ẹ-ẹpwụ nya ang nya olegu, lẹ nyọlẹ kọ nọ chẹẹ ị chụm nya ọngọ kpịlahị nya ọjịra-jịra ọlẹ kọ ri Ọhịhị Bala Ụkụrwọ Nyahị Ahị Angịnyị nya ỊKịrayịsị lẹẹlẹẹ.

M̀ ye Randi Berge la ẹka nya 1966. Ọ ri ọngọ ye ịlahị nya ụgbẹyị ọlẹ kọ la ịla ọchịchị bala ọ-nwụlanọ nyọka ka ẹga ọlẹ ká ọbaba ji. Ẹla nyahị há ọngọ kpẹhị rịrị isekut yẹẹyẹẹ, lẹ ọ juhi ọhụ nyọka da ọjịra-jịra ọla Orillia, Ontario ụbwọ. Ahị mwụ ka ụwa i-ijata.

Ụka kahị pwụ Orillia bwaa, m̀ dọmwụ nyọka ye ịlahị nya ụgbẹyị kpụrụrụ lala Randi ahụm. M̀ ye ịpyọ ọkpụkpụ nya ụkụrwọ ọwẹ lala Randi ịnyịnyị! Ụka kam họ ụkụrwọ nyịlẹhị-ịlẹhị nyọka ri ọngọ ye ịlahị nya ụgbẹyị ọnyịịla, m̀ yé ịpyọ ọkpụkpụ nya ịBayịbụụ ọ-kpa mẹ ang jẹ bala ọ-ka yẹ jaabwọ ka angịnyị wẹẹ jẹ́ ẹlịlẹhị ọlụwa. Ọ ri ọkẹkẹnị ọtụka ham nyọlẹ kam jẹ́ da ahụ bala ọrụ ọhẹ ụ-ụwa Orillia ụbwọ  nyọka nwụ ọhịhị nyaa họ bala ọ-wẹ ka gbịgba ha iJihova.

Ụka ọhẹ kahị ka Toronto, m̀ gbachị Arnold MacNamara, kọ ri ọngọhẹ ẹ-ẹpwụ nya angị kaa kpịlahị ị-ịBẹtẹlụ. Ọ tọhị wo kori kọ háahị nyọka ri angị kpa ẹrụ ọnyịịla pyẹ lụka nyahị wuu. M̀ wẹ ahyaahị yẹkẹẹ: “Ịnọọ! Ahị nwụlanọ nya ẹga myị́ ẹga, kori ọ́ ri Quebec kaka lẹ!” Irya ọtịpyọ ọlẹ ká angị ya òja nya ọkịrara ịla Canada la u-uhye nya angịlẹ kịị ya òja nya French ịla Quebec chị wum. Ụka ọwẹ, angịnyị kaa hu ẹwụ ta igomenti nyori Quebec nyị ka la ịlọmwụ bwula o-chebwo hi Canada lẹ.

Arnold wẹ yẹkẹẹ, “Quebec kẹnẹ-kẹnẹ egbeju ẹpwa a wẹẹ ya angị kpa ẹrụ ọnyịịla pyẹ la ụka nyaa wuu du ka lẹẹlẹẹ lẹ.” M̀ myị nyọri m̀ ka ka. M̀ jẹ́ nyori ụwa há Randi nyọka ka ene-ene lẹ. M̀ wẹ ka yẹ nyori eje ọchịchị ọwẹ à ri ọlẹ kọ há gụ wuu ẹ-ẹpwụ nya ọhịhị nyahị ẹẹ!

Nyọlẹ kahị jẹ́ òja nya French ẹ-ẹpwu nya epwihi 5 kpá, am bala Randi ahụ nyam bala ahụ bala ọrụ ọkịla ọhẹ ka Rimouski, kọ lala ịmayịlị 336 bwu Montreal. Ahị yẹ nyori ụkụrwọ lụmẹ kahị ka họ ẹ-ẹpwụ nya òja ọwẹ owowo wẹẹ, ọọwa la gede-gede ụka kam wa ẹla o-ya dodehe ọhẹ ọọjịra-jịra. M̀ ya nyori ọjịra-jịra ọtụka ọlẹ kọ wẹẹ warị, “aanahị i-bwu ostrich” ka wẹ, ọkọkọ kam ka ya nya “aanahị i-bwu Austria.”

Ịị Rimouski, aanahị ịyẹẹnọ ine ịhyẹ, kị la ila ọchịchị wẹ ka yẹ julahị ahị angị inine bala ugbiyegu nya Huberdeau tụ anyị nyaa anyang imiiye. Ọọnahị Huberdeau bala ahụ nyamwụ ye ẹpwa ọtụka ọhẹ kọ la apwụ irwiye, ọ ye angị ye ịlahị nya ụgbẹyị ịkịla juwa ụwa, lẹ ị kaa da awụlẹ nwụ uri nya ẹpwa ọọwa lẹlẹ. Ahị kaa wụrọọ nya Ẹpwa Onyoowuru chajị ị ya ido onyoowuru wụ ịlahị bala ịtachị nya ube ọọwa. Ahị kaa la angịnyị angị 12 ka 14 kịị kụ ẹpwa ọọwa. Nyọlẹ kahị ri angị kpa ẹrụ ọnyịịla pyẹ lụka nyahị wuu wẹẹ, am bala Randi ahụm kaa juwa ẹ-ẹpwụ nya ụkụrwọ nya ẹrụ ọnyịịla ọ-kpa pyẹ ọwẹ lụtụrụ, lẹnụ bala alobyi, lẹ ọ myịhị lẹhị nyọlẹ kahị kaa yé angịnyị họ ụkụrwọ bala ẹnụ myị́ ẹnụ—tụ́ ụka ká ohu á ji lụmẹ wẹwẹ.

Ahị bala aanahị ị-la ọmyịmyị ịwẹ yẹ jula awụlẹ gbee kahị lala ugbiyegu ookpokpo. Ụka ọhẹ ahị kaa hụhụ wo ila lawụlẹ lee ọ-la ahyẹẹnụ ọlẹ kahị kaa kpụ ang oriri lawụlẹ. Ọngọhẹ ẹ-ẹpwụ nya aanahị ịwẹ ri ọngọ du ang, lẹ ẹnụ nya ịSatudee ọnyị myị́ ọnyị lobyi ahị kaa mweje bala ọ-chị ewo.

ỊBayịbụụ ọjẹ́jẹ kaa kpa iru nya ala Rimouski ịpyọ! Ẹ-ẹpwụ nya ẹka ịrụ, ọ kpụhị ịpyọ nyọka yẹ jaabwọ kahị la angị jẹ́ ịBayịbụụ lụmẹ-lụmẹ ịlẹ kị wẹẹ nwà ẹ-ẹpwụ nya ang nya olegu kpụ kịị hu enyi Ohe. Ọjịra-jịra nwà ka la angịnyị lala angị 35 ịlẹ kị kaa kpa ẹrụ ọnyịịla pyẹ.

Ịị Quebec, ị mẹ ang jẹ́ẹhị kpori-kpori u-uhye nya abwọlẹ kahị ka jẹ́-ẹ ya ẹla nya Ohe yẹẹyẹẹ. Ahị yẹ jaabwọ ká iJihova dahị ụbwọ ẹ-ẹpwụ nya ẹrụ ọnyịịḷa ọ-kpa pyẹ bala ọ-ya ang ịlẹ kahị baba hahị. Ọ́ ba ọọwa ka, ahị wẹ ka la ọháha ẹ-ẹga nya ala French, òja nyaa, bala ọhọhọ nyaa, ọọwa tị du ká ọhọhọ nya angịkịla háahị ịnyịnyị.—2 Kọr. 6:13.

Lụka ọ-yahị me ka, egbeju ẹpwa ya ahị nyị rụ ka Tracadie, ọlẹ kọ ji ka ọnụ-enyi ọla ọmwẹnụ-ụtụrụ nya New Brunswick. Ọọwa lahị ujwo chajị ahị nwụ uri nya ẹpwa ọlẹ kahị kụ kpangjẹ bala o-ri m kaa chịchịị-chị mẹ ang jẹ uube-ụpwụ ọhẹ. Da ọọwa u-uhye, angịhyẹ ịlẹ kahị kaa mẹ ịBayịbụụ jẹ wẹ ka ri angị kpa ẹrụ ọnyịịla pyẹ kpangjẹ, ahị tị wẹẹ kpa Ube nya Ịpyị-Adịrahụ nyahị nwụ pwụ arịrị wuu lẹ.

Ahị raabwọ la ọmyị́myị́ nya epwihi ọwẹ yẹẹyẹẹ, ọọwa lẹ ahị hu ang ka Tracadie nyọka jẹ́ jaabwọ ká  ụwa la lẹlẹ. Ụwa datị hi Rimouski yẹẹyẹẹ. Ma ahị cheje nyọka kele chajị ụwa iJihova à tịtọ kahị ka ka lẹ. Ahị mẹ iJihova yẹ, ahị tị yẹ jaabwọ kọ hu ang ịlẹ kị ri akama nyahị hiihi. (Mal. 3:10) Nyọlẹ ká igu oriri nya ahụ nyam bala iJihova la ọngịrị wẹẹ, ọ́ kaa yẹ ịlọmwụ-ịlọmwụ ka, ọ tị kaa chị ụmwẹhụ yẹẹyẹẹ ịnyịnyị, lẹ ọmwụmwụ ọwẹ chịhị kpẹẹ.

Robert Ross kem à ri ọngọgbahị nya ọjịra-jịra okpokpo ọlẹ kahị la ọọjịra-jịra onyeewe ọlẹ kahị ji lẹ. Ọwa bala Linda ahụ nyamwụ ye ịlahị nya ụgbẹyị ụ-ụwa ụka ọhẹ lẹ, ị tị chụ nyọka hụ ụwa ụka kị ma ọnyị nya ọgbanyẹ nyaa kpá. Nanana nyori ị wẹẹ kpahị ju ọnyị nyaa, ị kaa juhi ọhụ yẹẹyẹẹ chajị ị kaa ye angga myị bala ọ-kaa kpa ẹrụ ọnyịịla pyẹ la ila ọchịchị.

Ụka ọlẹ kahị họ ụkụrwọ nya ịlahị nya ụgbẹyị o-yeye ẹ-ẹpwụ nya ẹka imiiye ịị Tracadie kpá, ahị ye ọwụrụ-wụrụ ọ-ya ahị guru gbe ka ọhẹ myị́myị́. Ị wụrụụhị nyọka họ ụkụrwọ nya ọngọ kpẹhị rịrị isekut. Ahị họ ụkụrwọ i-isekut nya angị ya òja nya ọkịrara lala ẹka irwiye, ene kịị yahị du ka isekut nya òja nya French ọla Quebec. Ọngọ kpẹhị rịrị district ọla Quebec, ká ẹnyị nyamwụ ri Léonce Crépeault kaa dam ọlẹẹkwaa chajị nya ẹla oyaya nyam ọọjịra-jịra. Ma ọ tị kaa tọm wo ụka ọkịla nyori, “Anyị a tị́ ka họ ká ẹla oyaya nyang ka jẹ́-ẹ la angịnyị gbadaa hyaa?” a Ẹla nyamwụ ọwẹ dam ụbwọ du kam họ ụkụrwọ u-uhye nya ang ọmẹjẹ nyam chajị kọ ka la hukee ká angịnyị tị ka wo etu nyamwụ hyaa.

Ụkụrwọ ọlẹ kam họ kam ka jẹ́-ẹ deeri ẹnẹnẹhẹ ka ri ọlẹ kam họ lụka nya Ọjịra-jịra Ọtụka nya Ẹpwụma Lụmẹ-lụmẹ ọlẹ kị họ ịị Montreal la ẹka nya 1978, ká egbeju nyamwụ ri “Victorious Faith.” M̀ họ ụkụrwọ ẹ-ẹga nya ang oriri. Ahị wẹẹ yahị guru gbe angịnyị lala 80, 000, ahị tị ka ya ang orịrị haa ụ-ụgbẹyị ọlẹ kọ datị hi abwọlẹ kahị kaa họ ene-ene. Ụgbẹyị ọwẹ wuu ri onyeewe gbang-gbang chajị ang oriri ọlẹ kị ka kpụ, ang ịlẹ kị ka kpa kpọọ, bala abwọlẹ kị ka bwu kpọọ datị. Ahị la imoto ịtụka-ịtụka lala 20 ịlẹ kịị kpa ang nyiri, ma ị́ kaa họ ụkụrwọ yẹẹyẹẹ ụka ọhẹ ka. Chajị nya olo ọlẹ kị da ene nya ahyẹẹnụ ọhọhẹ nya ọjịra-jịra ọtụka ọwẹ, áhị jẹ́ yé iwe ka ẹga ọ-kọ ayịlọ ọwẹ ka nwụla ụwa nọ ka gbee da alepwodu. Ahị baba nyọka tụ ila ju bwu alodu nyọka jẹ́-ẹ họ ang oriri nya ụtụrụ hyaa! Ịnyịrọ chịịhị pyẹpyẹ yẹẹyẹẹ, ma m̀ jẹ́ ang yẹẹyẹẹ bwu ẹga nya aanahị ịlẹ kahị wẹẹ họ ụkụrwọ lawụlẹ chajị ị jụ ụkụrwọ họ, ị la gbẹgbịlẹ ẹ-ẹpwụ nya ang nya olegu, bala ọ-kaa chị  ụmwara. Ọọwa du kahị jẹ́ ri aligu daalẹ. O ri ọkẹkẹnị ọtụka nyọka juwa ọọjịra-jịra ọtụka ọla Quebec, kọ ri ẹga ọlẹ ká ọtụpyịpyị ọtụka ji ha aanahị lụka nya ẹka nya 1940 ka 1950, ḿ ka jẹ́-ẹ deeri ẹnẹnẹhẹ kaka!

M̀ jẹ́ ang lụmẹ-lụmẹ bwu ẹga nya angịlẹ kahị kaa kpịlahị lawụlẹ ọọjịra-jịra ịtụka ịlẹ kịị họ ịị Montreal. David Splane, kọ rị ọngọhẹ nya Angị Kpẹhị Rịrị Ogu lẹẹlẹẹ, ri ọngọ kpịlahị nya ọjịra-jịra ọtụka ọwẹ ẹka ọhẹ lẹ. Ụka nya ọjịra-jịra ọtụka ọkịla ọhẹ kị ya ụkụrwọ ọwẹ ham, David dam ụbwọ yẹẹyẹẹ.

Nyọlẹ kahị họ ẹka 36 ẹ-ẹpwụ nya ụkụrwọ nya aanahị o-ju ụga ọwẹ, ị wụrụm nyoka ri ọngọ mẹ ang jẹ Uube-ụpwụ nya Angịgbahị nya Ọjịra-jịra la ẹka nya 2011. Am bala Randi nune ị-ịbẹẹdị lala 75 myị́ ẹ-ẹpwụ nya ẹka imiiye, ma ịlọhị o-hu ha ọọwa á tị ri ododu ka. La ọmyịmyị nya epwihi ọnyọnyọọnyị, ọ kaa myị angịgbahị nya ọjịra-jịra lẹhị yẹẹyẹẹ jaabwọ ká Angị Kpẹhị Rịrị Ogu wẹẹ daa ụbwọ ká igu oriri nyaa bala iJihova ka nwà.

Ụka ọkịla, m̀ myịmyị mẹ ang jẹ Uube-ụpwụ nya Angị Kpa Ẹrụ Ọnyịịla Pyẹ. Ịnyịrọ kaa chị anyị ịla ube-ụpwụ ịwẹ pyẹpyẹ ọọlajị nya ụkụrwọ ọ-lụmẹ haa. Ị kaa hụhụ ị-ịkịlasị lala awa irwiye ẹ-ẹpwụ nya ahyẹẹnụ, ị tị kaa kpa awa ịta nwụlanọ gbe ang ọjẹ́jẹ nya ahyẹẹnụ ọkịla la obyi, ị kaa la ụkụrwọ ine lee ịrụ ẹ-ẹpwụ nya epwihi ọnyị myị́ ọnyị. Am bala ọngọ mẹ ang jẹ ọkịla wụlẹ ya jaa nyori bwula ụbwọ ọdada nya iJihova ị ka jẹ́-ẹ jụ ụkụrwọ ọwẹ họ myị́ lẹ. M̀ kaa kpịtịya pyịyọọ jaabwọ kọ kaa la anyị ịla ube-ụpwụ ịwẹ ẹbyẹbyị ụka kị họ kpoye nya abwọlẹ kị me irya bwula ọ-dahịhile iJihova.

Ịnam ọ-kpa angịkịla i-irya da angịlẹ kọ kaa mẹ ịBayịbụụ jẹ ụbwọ du kị kaa nwà kịlahị ẹ-ẹpwụ nya ang nya olegu, ọọwa tị da adam ụbwọ nyọka nwụ irya ọlẹ kọ la u-uhye nya ẹlịlẹhị họ ịnyịnyị. Ụtụrụ ọhata nyọlẹ ká ịnam gbu kpá, adam wẹ ọjịra-jịra nya ẹla o-ya dodehe bwu ịBayịbụụ ha alụma u-Ube nya Ịpyị-Adịrahụ. Ẹla ọọwa lahị ẹbyẹbyị yẹẹyẹẹ. Ọ tị kịnyaa la ọjịra-jịra ọwẹwẹ pwụ ẹka 26. Nanana nyori ọ hu enyi Ohe ka, angịgbahị nya ọjịra-jịra byim nyori ọwa nya-à kaa pwụ ọjịra-jịra jene epwihi ọnyị myị́ ọnyị wuu lẹ.

Abwẹla ọnyịịla nya ịnam ọwẹ da anyị nyamwụ wuu ụbwọ yẹẹyẹẹ. Aanam anyang ịtịta bala ọrwaa kaa gbịgba ha iJihova la ọmyịmyị. Angị imiiye ẹ-ẹpwụ nyaa kaa họ ụkụrwọ e-egbeju ẹpwa nyahị; ịnya ọngọhẹ ri ọla Portugal, ịnya ọngọkịla ri ọla Haiti.

Am bala Randi ahụ nyam ri angị kpa ẹrụ ọnyịịla pyẹ lụka nyahị wuu lẹẹlẹẹ ịị Hamilton, Ontario. Ụka ọlẹ kahị kaa họ ụkụrwọ nya ọngọ kpẹhị rịrị isekut, ọ kaa kpụhị ịpyọ nyọka ba angịkịla ka ọmwẹẹkpẹ ka bala ịBayịbụụ ọmẹjẹ. Ma ọ ri ọkẹkẹnị hahị nyọlẹ ká angịlẹ kahị kaa mẹ ịBayịbụụ jẹ la ịlọhị wẹẹ nwà kịlahị ẹ-ẹpwụ nya ang nya olegu. Nyọlẹ kahị ri igu ọlam-ọlam bala aanahị ịla ọjịra-jịra onyeewe ọlẹ kahị ji wẹẹ, ahị yẹ jaabwọ ká iJihova daa ụbwọ ụka ká iwe-ahụrụ á chịkpẹẹ bala ụka kọ lujwo

Ụka kahị kụ irya kẹkpẹ, ọ kaa myịhị lẹhị nyọlẹ ká aanahị kpahị i-irya. Ahị ịnyịnyị kaa mẹjẹ jaabwọ kahị “nwụlanọ nyọka” ju angịkịla ọhụ kaka ba chajị kị ka gbịgba ha iJihova la ọngịrị nyaa wuu. (2 Kọr. 7:6, 7) Ọ-chụ pwokwita, ẹ-ẹpwụ nya ugbiyegu ọhẹ, ahụ, ọnyị ọlẹng bala ọnyị ọnyang nyaa ri angị ye ịlahị nya ụgbẹyị kpụrụrụ. M̀ tọ ọrụmwụ wo kori kọ kụ irya u-uhye nya ịlahị nya ụgbẹyị oyeye ụka ọhẹ lẹ. Ọ wẹ nyori ọwa nya-à wẹẹ kpahị ju angị ịta ịlẹ kị wẹẹ ye ịlahị nya ụgbẹyị lẹ. Ọọwa lẹ m tọọ wo yẹkẹẹ: “À ka jẹ́-ẹ daa ụbwọ gụ iJihova?” M̀ jwoo ọhụ nyọka yé ịpyọ ọkpụkpụ ọlẹpwụ nya ụkụrwọ ọwẹ lala alugbiyegu nyamwụ ịwẹ. Ọ ka lala ọya ịrwọnyẹ lẹ, ọwa ịnyịnyị à dọmwụ nya ịlahị nya ụgbẹyị o-yeye lẹlẹ.

Am bala Randi ahụ nyam ka kịnyaa la ọ-ya “ụkụrwọ ẹbyẹbyị” nya iJihova “jẹ aloyi ịlịlahị,” ahị ọ-dahile nyahị tị ri ịwa ịnyịnyị ka yé ịpyọ ọkpụkpụ nya ụkụrwọ nyamwụ jaabwọ kahị yé.—Eje. 71:17, 18.