1. Ụgbẹyị oyina angịnyị nya ịKịrayịsị à tị́ baba nyọka lala okoji? (Yẹ ifoto ịnyịnyị.)

 “IGBACHỊWỤ á kaa mwụ okoji ọlẹ kọ jẹ́-ẹ che kpẹẹ eku ka.” Etu ọwẹ mẹjẹ nyori ekeji baba nyọka yi mana-mana lee ọ-che kpẹẹ ụka ká igbachịwụ á juwa da lọngịrị-ọngịrị chajị kọ ka mwụ eku ka. Ahị ịnyịnyị baba nyọka nwụhọ ụka ká iwe-ahụrụ á lujwo ọ-ọhịhị nyahị chajị kahị ka jẹ́-ẹ kịnyaa la ọ-gbịgba ha iJihova la ọkẹkẹnị. Ányị ahị tị́ ka bwu họ ịnyị? Ahị ka yẹ ẹla ẹkpẹ imiiye pyii bwula ọ-yẹ ba iwe-ahụrụ onyeewe ụka ká ang á yẹda ọ-ọhịhị nyahị bala o-ju ihi nya irya bala eje ọchịchị nya angịkịla.

2. Abwẹla iyina à tị́ ka dahị ụbwọ ụka ká iwe-ahụrụ nyahị á yẹda? Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

² Lala anchẹ nya iJihova, ahị baba nyọka yẹ ẹla ẹkpẹ imiiye. Ahị tịtọ nyọka kpịlọhị keji bala ọ-kpa angịkịla i-irya ịnyịnyị. Ẹ-ẹpwụ nya ang ọjẹ́jẹ ọlẹ, ahị ka yẹ jaabwọ ká abwẹla ụma ịlịịwẹ da Angịnyị nya ịKịrayịsị ịhyẹ ụbwọ nyọka bọhụ ụka ká iwe-ahụrụ nyaa yẹda. Ahị ka yẹ jaabwọ ká abwẹla ịwẹ ka jẹ́-ẹ dahị ụbwọ ịnyịnyị. Ma, ahị jene jẹ́ ang bwu ẹga nya iJihova bala iJisọsị, kị ri angị ya ọgụ-ẹpẹtẹ ọkpẹẹkpẹẹ deeji ẹ-ẹga nya ẹla ọ-yẹ ẹkpẹ imiiye wẹẹ.

3. Ányị ahị tị́ họ kahị jẹ́ nyori iJihova kaa yẹ ẹla ẹkpẹ imiiye?

³ ỊBayịbụụ wụrụ iJihova nya “ẹjwọ” chajị nyori ọ kaa godayị kpakpa, ọ́ kaa pyị giri-giri ka. (Ehile. 32:4) Ma, ọ tị kaa yẹ ẹla ẹkpẹ imiiye ịnyịnyị. Jaabwọ ká iwe-ahụrụ wẹẹ yẹda odehe, iJihova kaa nwụhọ bala ọ-họ ká ang myị́ ang ọlẹ kọ chehe ka họ jira. IJihova họ angịnyị ehe la abwụma nyamwụ, lẹ ahị ka jẹ́-ẹ yẹ ba iwe-ahụrụ onyeewe ịnyịnyị. Ọ ya itiwe nya ehile ịla  ịBayịbụụ ịlẹ kị la gede-gede hahị chajị kahị ka jẹ́-ẹ kpa cheje nya ẹla ụ-ụgbẹyị ọnyịịla ẹ-ẹpwụ nya iwe-ahụrụ ọnyị myị́ ọnyị kahị ji. Ọgụ-ẹpẹtẹ nya iJihova la ịlọmwụ bala itiwe nya ehile ịlẹ kọ ya hahị dahị ụbwọ nyọka jẹ́ nyori nanana nyọlẹ kị wụrụ iJihova nya “ejwo,” ọ kaa yẹ ẹla ẹkpẹ imiiye ịnyịnyị.

4. Ya ọ-chụ pwokwita ọlẹ kọ mẹjẹ nyori iJihova kaa yẹ ẹla ẹkpẹ imiiye wẹẹ. (Ala iLivayị 5:7, 11)

⁴ Agbẹyị nya iJihova la kpẹẹkpẹẹ bala o-memelabwọ. Ọ́ kaa kpa angịnyị ehe nmaa-nmaa ka. Ọ-chụ pwokwita, kụ ẹhị yẹ abwọlẹ ká iJihova họ ẹla memelabwọ ẹ-ẹga nya ala Isirẹlụ wẹẹ. Ọ́ ya ahị guru nyori ọng myị́ ọng wuu, tụ́ alụdụ bala ikpehika nyị ka kpa ang kaka kiliya memeeme ka. Ẹ-ẹpwụ nya iwe-ahụrụ ịhyẹ, ọ ya iwe da ká ọngịnyị ka ya ang kiliya jaabwọ ká iwe-ahụrụ nyamwụ ya iwe da họọ.—Wa Ala iLivayị 5:7, 11.

5. Ya ọ-chụ pwokwita ọlẹ kọ mẹjẹ nyori iJihova kaa kpịlọmwụ keji bala ọ-yẹ ahyẹẹrwẹrwa wẹẹ.

⁵ IJihova kpịlọmwụ keji à du kọ kaa yẹ ẹla ẹkpẹ imiiye lẹ. Ọ-chụ pwokwita, iJihova mẹjẹ jaabwọ kọ kaa kpịlọmwụ keji kaka ba ụka kọ lẹẹ ka ta alọkwọ ịla ịSọdọm ayịreji. IJihova du alegu-ẹrụ nyamwụ kaka byi ịLọtụ ọla abwẹla ọnyịịla nyị rụnyẹ rụ ka oye nya ịgbọdọ mẹ. ỊLọtụ juhi nyọka ka ụwa. Lẹ, ọ bịlẹ kị ka ya iwe da họọ bala ugbiyegu nyamwụ nyọka rụ ka kpịbaa e-epweji nya iSowa, ma epweji ọwẹ tị ji ẹpwụ nya ịlẹ ká iJihova wẹẹ ka ta ayịreji ịnyịnyị. IJihova ka jẹ́-ẹ ya ọnụ rịrị nyori ịLọtụ nyị họ jaabwọ ká ọwa nyị ya kpangga mẹ. Ma ọ ya ẹga da ha ịLọtụ jaabwọ kọ bịlẹ, nanana nyori ọọwa ka du ká epweji nya iSowa ka chịda. (Ọmwụ. 19:18-22) Ẹka ohu ịmanyị tị́ ị-ịlahị nyọọwa, iJihova yẹ alepweji nya iNineve ahyẹẹrwẹrwa ịnyịnyị. Ọ du ọlọmwụ iJona ẹrụ kaka da alụwa ọna nyori epweji ọwẹ bala ang ịtịpyọ ịlụwa nyị ja ka ta ayịreji lẹ. Ma ụka ká ala iNineve yẹ irya da, iJihova yẹ ahyẹẹrwẹrwa nyaa du kọ chaa bala epweji nyaa da.—Jon. 3:1, 10; 4:10, 11.

6. Ya ọ-chụ pwokwita nya abwọlẹ ká iJisọsị yẹ ẹla ẹkpẹ imiiye lala iJihova wẹẹ.

⁶ IJisọsị kaa yẹ ẹla ẹkpẹ imiiye lala iJihova ịnyịnyị. “Ala Isirẹlụ ịlẹ kị hwahị . . . lala ịkpịlọ ịlẹ kị byibyi,” Ohe à doo ẹrụ wẹ odehe nyọka ya ẹrụ ọnyịịla je lẹ. Ma, ọ mẹjẹ nyori ọ kaa yẹ ẹla ẹkpẹ imiiye ụka kọ wẹẹ họ ụkụrwọ nyamwụ ọọwa. Ọ-chụ pwokwita, ọnyang ọhẹ ọlẹ kọ ri ala Isirẹlụ ka bịlọọ nyọka họ ọnyị ọnyang nyamwụ ọlẹ ká “olegu onyobyi wu” uda. IJisọsị yẹ ahyẹẹrwẹrwa nya ọnyang ọọwa kpụ ọ họ ọnyị nyamwụ uda. (Mat. 15:21-28) Yẹ ọ-chụ pwokwita ọkịla lẹẹ wẹẹ. Lụka ká iJisọsị dọmwụ nya ẹrụ ọnyịịla ọ-kpa pyẹ, ọ yẹkẹẹ: ‘Ọng myị́ ọng ọlẹ kọ pwam am ịKịrayịsị arwarụ, am ayịdang tịtị ka pwa ọngọọwa arwarụ ịnyịnyị.’ (Mat. 10:33) Ma, ọ pwa iPita arwarụ nyọlẹ ká ọwa pwa iJisọsị arwarụ ụka ịta gbẹgbịlẹ? Ehe. IJisọsị jẹ́ nyori iPita nyị yẹ irya da bala o-ri nyị la ọmyịmyị. Ụka ká iJisọsị wuleji bwula igu, ọ hu ta iPita bala ọ-họ kọ jẹ́ myị̀myị̀ nyori ọwa nyị hịnyọhi họọ bala o-byoo nyori ọwa nyị la ọháha ẹ-ẹga nyamwụ.—Luk. 24:33, 34.

7. Jaabwọ ká ụpwụ nya Ala iFilipayị 4:5 mẹjẹ, ányị ahị tị́ tịtọ ká angịkịla ka yẹhị?

 ⁷ Ahị yẹ wẹ nyori iJihova Ohe Oluhye bala iJisọsị ịKịrayịsị kaa yẹ ẹkpẹ imiiye lẹ. Ahị tị bẹ? IJihova ya ahị guru kahị ka yẹ ẹla ẹkpẹ imiiye ịnyịnyị. (Wa Ala iFilipayị 4:5.) ỊBayịbụụ ọhẹ yẹ ẹla ọla ọgba ọwẹ da ị-ịlẹ yẹkẹẹ: “Mẹjẹ bwula abwẹla nyang nyori à ri ọngọ jẹ́-ẹ yẹ ẹla ẹkpẹ imiiye.” Ahị ka jẹ́-ẹ tọ ịlọhị wo yẹkẹẹ: “Angịnyị kaa yẹm lala ọngọ kaa yẹ ẹla ẹkpẹ imiiye bala ọ-kaa ye angịkịla myị? Lee ị tị́ kaa yẹm lala ọngọ ya ọnụ rịrị ẹla, lee ọngọ la egbeju ọngịrị? M̀ kaa ya ọnụ rịrị ká angịkịla ka họ ang ụ-ụgbẹyị ọlẹ kam tịtọ kọ ka la pyii? Lee m̀ tị́ kaa ke ụrụ wo la angịkịla bala ọ-myị ju ẹla ọla irya nyaa ụka ká ọọwa á pwoku?’ Abwọlẹ kahị kaa yẹ ẹla ẹkpẹ imiiye kaka ba ka mẹjẹ jaabwọ kahị wẹẹ gbịla iJihova bala iJisọsị kaka ba. Ahị kụ ẹhị yẹ iwe-ahụrụ imiiye ịhyẹ ịlẹ kị ka baba nya ẹla ọ-yẹ ẹkpẹ imiiye wẹẹ. Ẹla ọọwa ri ụka ká iwe-ahụrụ nyahị á yẹda bala ụka ká eje ọchịchị nya angịkịla á datị hi ịnyahị.

8. Ịyẹ à tị́ ka dahị ụbwọ nyọka jẹ́-ẹ yẹ ẹla ẹkpẹ imiiye ụka ká iwe-ahụrụ nyahị á yẹda? (Yẹ ẹla olekpeleji ịnyịnyị.)

⁸ Ahị baba nyọka yẹ ẹla ẹkpẹ imiiye ụka ká iwe-ahụrụ nyahị á yẹda. Ọyẹda ọlịnyị ka ju ọmwụ nya akama ọlẹ kahị yẹ ahị me ka myị́. Ọ-chụ pwokwita, ẹdụrụ ọnyọọngịrị ọhẹ ka jụhị lụka ọ-kpịraka myị́. Lee okpoko o-ji nwà ka bala igomenti ọ-yẹda lụka ọkpahị ju ka, ka du ká ọhịhị ka lujwo hahị kpoye-kpoye myị́. (Ọngọ. 9:11; 1 Kọr. 7:31) Ọ dọmwụ kaa lujwo hahị ụka ọhẹ kori ká ogu nya iJihova á yẹ ụkụrwọ ọlẹ kahị kaa họ ene-ene da. Jaabwọ myị́ abwọ ká akama ọọwa á la, ahị ka jẹ́-ẹ yẹ ba iwe-ahụrụ onyeewe myị́ bwula o-hu ẹta-ẹdịyẹ ine ịlẹ: (1) myị nyori iwe-ahụrụ nyang yẹda lẹ, (2) yẹhị rịrị ka ijuju, (3) ya irya nọ u-uhye nya ang ịnyịịla ịla ọhịhị nyang, bala (4) họ ang ha angịkịla. b Ahị kụ ẹhị yẹ abwọlẹ ká aanahị ịhyẹ bala ịkịla yé apyobwuna bwula o-hu ẹta-ẹdịyẹ ịwẹ wẹẹ.

9. Ányị ahụ bala ọrụ ọhẹ kị kaa kpa ẹrụ ọnyịịla pyẹ ẹ-ẹpwụma ọkịla à tị́ bwu bọhụ ẹ-ẹpwụ nya ọmayẹ ọ-yahị me ka?

⁹ Myị nyori iwe-ahụrụ nyang yẹda lẹ. Emanuele bala Francesca ri angịhyẹ ịlẹ kị ya du ka ẹpwụma ọkịla nyọka kpa ẹrụ ọnyịịla pyẹ ụ-ụwa. Ụka ọlẹ kị wẹẹ dọmwụ nyọka jẹ́ òja nya alụwa bala aanahị ịla ọjịra-jịra lẹ, ẹdụrụ nya COVID-19 à bene du kị baba nyọka chị ịlaa ebwo hi angịkịla lẹlẹ. Ọọwa ịnịna nya Fracesca à gbu lụka ọ-kpahị ju ka lẹlẹ. Ọ ri irya nya Francesca yẹẹyẹẹ nyọka ka ẹpwa ka yẹ alugbiyegu nyamwụ, ma ẹdụrụ ọwẹ dudu kọ jẹ́ ka ẹpwa ka. Ányị ọ tị́ bwu bọhụ ẹ-ẹpwụ nya iwe-ahụrụ olujwo ọwẹ? Họhẹ-họhẹ, Emanuele bala Francesca ahụ nyamwụ kaa raabwọ lawụlẹ ká iJihova ka ya ẹla ọjẹ́jẹ haa nyọka jẹ́-ẹ bọhụ ẹnụ myị́ ẹnụ. IJihova wẹ abwọ ọrịrị nyaa bwula ọ-ya ang nya olegu ịlẹ kị baba haa lụka ọlẹ kọ pwoku bwula ogu nyamwụ. Ọ-chụ pwokwita, ị yé ọhụ ojuju bwu ẹpwụ nya ẹla ọlẹ ká ọọnahị ọlẹng ọhẹ ya ẹ-ẹpwụ nya ifim. Ọ yẹkẹẹ: “Abwọlẹ kahị ye iwe-ahụrụ nyahị onyeewe myị hyaa kaka ba, ịnyịnyị ọkẹkẹnị nyahị à kaa tịrẹkpẹ wahị hyaa kaka ba lẹ. Ọọwa tị du kahị jẹ́-ẹ kpa iwe-ahụrụ onyeewe ọọwa họ ụkụrwọ ụ-ụgbẹyị ọnyịịla.” c Oheeye, ị cheje nyọka kpa ẹrụ ọnyịịla pyẹ bwu ifon gụ́ olene kpụ ị jẹ́ dọmwụ nya ịBayịbụụ ọjẹ́jẹ bala ọngịnyị. Ọhata, ị ya iwe da aanahị ịlụwa daa ụbwọ, ọọwa tị myaa lẹhị ịnyịnyị. Ọọnahị  ọnyang ọhẹ kaa da ẹla kpii bwu ịBayịbụụ kịlaa ẹnụ myị ẹnụ ẹ-ẹpwụ nya ẹka lẹpwụ-lẹpwụ. Ụka ká ahị ịnyịnyị á myị nyori iwe-ahụrụ nyahị yẹda lẹ, ahị ka jẹ́-ẹ chị ọkẹkẹnị ẹ-ẹpwụ nya ang ọlẹ kahị jụ họ.

10. Ányị ọọnahị ọnyang ọhẹ à tị́ bwu bọhụ ụka ká ang yẹda ọ-ọhịhị nyamwụ?

¹⁰ Yẹhị rịrị ka ijuju, ká ya irya nọ u-uhye nya ang ịnyịịla ịla ọhịhị nyang. Ọ jụ ọọnahị Christina bwu Romania kọ kụ Japan, nyọlẹ kị tụ ọjịra-jịra nya òja nya Ọkịrara ọlẹ kọ ji ku. Ma, ọ́ ya irya nyamwụ wuu nọ u-uhye nya ọọwa ka. Ọkọkọ nyọọwa, ọ chụ nyọka họ jaabwọ kọ ka họ ba myị́ ọọjịra-jịra ọlẹ kị kaa ya òja nya ala Japan bwula ọ-kaa kpa ẹrụ ọnyịịla pyẹ la òja ọọwa yẹẹyẹẹ. Ọ byi ọnyang ọhẹ kọ kaa họ ụkụrwọ bala ene-ene nyị da ọwa ụbwọ nyọka jẹ́ òja nya ala Japan ọwẹ gụ́ ọọwa. Ọnyang ọọwa myọnụ nyọka kpa ịBayịbụụ bala ụpwụ nya Chị Ọkẹkẹnị Gboyi Myị́ Oyi! ochiche mẹ òja nya ala Japan jẹ Christina. Lẹ, Christina jẹ́ wo òja nya ala Japan gụ́ olene, ọlẹ kọ tị há gụgụ wuu ri, ọnyang ọọwa tịtọ nyọka jẹ́ ang u-uhye nya ịBayibụụ gụ ọọwa. Kori kahị yẹhị rịrị ka ịlahị bala ọ-ya irya nọ u-uhye nya ang ịnyịịla, iwe-ahụrụ ọ-yẹda kpịraka ka kpa ahị ọwawa ịlẹ kahị ya ahị me ka wahị myị́.

11. Ịyẹ à tị́ da ahụ bala ọrụ ọhẹ ụbwọ nyọka bọhụ ụka kị la akama nya okpoko?

¹¹ Họ ang ha angịkịla. Ahụ bala ọrụ ọhẹ kị kụ ẹpwụma ọlẹ kị hile ụkụrwọ nyahị dọmwụ nyọka la akama nya okpoko ụka ká okpoko ji nwà ka ẹ-ẹpwụma ọọwa. Ányị ị tị bwu bọhụ? Họhẹ-họhẹ, ị maga nyọka chụ ang ịlẹ kị kaa ra hi. Ọọwa lẹ, ị cheje nyọka yẹhị rịrị ọ-ka da angịkịla ụbwọ bwula ẹrụ ọnyịịla ọ-kpa pyẹ ọkọkọ nyọka ya irya nịrọ akama nyaa lẹlẹ. (Ụkụr. 20:35) Ọrụ yẹkẹẹ: “Ẹrụ ọnyịịla ọ-kpa pyẹ ụka wuu du kahị kaa yé ụka kpa kụ irya u-uhye nya akama nyahị ka, ma ahị kaa ya irya nyahị wuu nọ i-irya nya Ohe Oluhye ọhọhọ.” Ụka ká iwe-ahụrụ nyahị á yẹda, ahị ka kpịtịya pyii nyori ọ baba yẹẹyẹẹ nyọka da angịkịla ụbwọ, ọgụgụ bwula ẹrụ ọnyịịla ọ-kpa pyẹ nyahị.

12. Ányị ọgụ-ẹpẹtẹ nya ọlẹrụ ịPọlụ à tị́ ka jẹ́-ẹ dahị ụbwọ nyọka ya ẹla nya Ohe je angịnyị ịlẹ ká iwe-ahụrụ nyaa datị-datị?

¹² Ahị baba nyọka yẹ ẹla ẹkpẹ imiiye ụka kahị juwa kpa ẹrụ ọnyịịla pyẹ. Ahị kaa tọ angịnyị ịlẹ ká ọmyịmyị bala abwẹla nyaa datị-datị, kị tị bwu ẹga datị-datị ịnyịnyị. Ọlẹrụ ịPọlụ kaa yẹ ẹla ẹkpẹ imiiye, lẹ ahị ka jẹ́-ẹ jẹ́ ang bwu ẹga nyamwụ. IJisọsị à chụ ịPọlụ nyọka ri “ọlẹrụ ọnyịịla [ha] ala iJentayịlị” lee alẹpwụma lẹ. (Rom. 11:13) Ẹ-ẹpwụ nya ụkụrwọ ọwẹ, ịPọlụ ya ẹla nya Ohe je ala iJuu, ala iGiriki, angị jẹ́ ụpwụ, angị wụrụ ẹhị ka, alegbeju nya igomenti bala ịdịrịhụ. Nyọka jẹ́-ẹ ya ẹla wu angị datị-datị ịwẹ ọyị ka ọkịlẹtụ, ịPọlụ “kaa ya ịlọm dẹẹchụ bala ọ-ya ịlọm dẹja ẹ-ẹga nya ụma nya angịnyị la datị-datị wuu.” (1 Kọr. 9:19-23) Ọ kaa ya ẹhị reeji nya ẹga ká angịlẹ kọ wẹẹ ya ẹla je bwu, ọhọhọ nyaa bala ang ọlẹ kị myị la. Ọọwa dọọ ụbwọ nyọka jẹ́-ẹ ya ẹla ụ-ụgbẹyị ọlẹ kọ ka du ká ọngọngọọng nyaa ka jẹ́-ẹ wẹ ka jẹ́ Ohe. Ahị ịnyịnyị ka jẹ́-ẹ kpa ẹrụ ọnyịịla pyẹ gụ́ ọọwa kori kahị jẹ́-ẹ yẹ ẹla ẹkpẹ imiiye bala ọ-kaa yẹ ẹla oyaya nyahị da nyọka pwoku iwe-ahụrụ nya angị wẹẹ ke ụrụ wo lahị.

13. Akama oyina ụpwụ nya 1 Ala ịKọrịntị 8:9 à tị́ ya kahị ka cheji ba hi myị́ kori kahị kaa chị ihi ju irya nya angịkịla?

¹³ Ẹla ọ-yẹ ẹkpẹ imiiye ka dahị ụbwọ nyọka chị ihi ju irya nya angịkịla. Ọ-chụ pwokwita, ịkpangkeke ọwụ́wụ́ kaa há aanahị anyang ịhyẹ, ma angịkịla á kaa wụ ka. Aanahị ịhyẹ kaa nwa ere ọnyọọngịrị melabwọ, aanahị ịkịla tị kaa yẹ abwọ hyoo gbang-gbang. Angịnyị nya ịKịrayịsị wuu tịtọ nya ịnyịrọ ogogo, ma ị kaa  chụ ụma nya utoji ọdatị-datị hi awụlẹ. Kori ká ọlẹ kahị chụ á háahị lụmẹ gbee kahị ja tịtọ ká angịkịla ka ye ịnyahị myị aalẹ, ahị ka chị angịkịla mịleji bala ọ-họ ká ebwo ọchịchị ka ji myị́. Áhị ka tịtọ nyọka họ ịnyị kpong-kpong ka! (Wa 1 Ala ịKọrịntị 8:9; 10:23, 24) Ahị kụ ẹhị yẹ oja imiiye ịlẹ kị mẹjẹ nyori itiwe nya ehile ịla ịBayịbụụ ọ-kpa họ ụkụrwọ kaa dahị ụbwọ nyọka la irya ọkpakpa bala ọ-họ ká okpunyi ka ji wẹẹ.

14. Itiwe nya ehile iyina bwu ịBayịbụụ à tị́ ka dahị ụbwọ ẹ-ẹga nya ang ọkụrụ-kụrụ bala agidi ojuju?

¹⁴ Ang ọ-kụrụ-kụrụ bala agidi. IJihova á ya ang myị́ ang ọlẹ kahị ka kurụ jehi ka, ma ọ ya itiwe nya ehile ịlẹ kahị ka jẹ́-ẹ ba jẹ hahị. Ahị baba nyọka kụrụ ang ụ-ụgbẹyị ọlẹ kọ ka chị ihi ju Ohe, mẹjẹ nyori ahị kaa yẹ ẹla ẹkpẹ imiiye, yẹ ịlọhị memelabwọ, bala ọ-la “ẹla ọjẹ́jẹ.” (1 Tim. 2:9, 10; 1 Pit. 3:3) Chajị nyọọwa lẹ, áhị kaa kpa angịkịla irya wẹ ẹga nyịlọhị kpoye bwula ang ọkụrụ-kụrụ nyahị ka. Itiwe nya ehile ịla ịBayịbụụ ka da angịgbahị nya ọjịra-jịra ụbwọ ịnyịnyị nyọka da ehile nya ịlaa ha angịkịla u-uhye nya ang ọkụrụ-kụrụ ka. Ọ-chụ pwokwita, angịgbahị ịla ọjịra-jịra ọhẹ tịtọ nyọka da aanahị ikolobya ịhyẹ ụbwọ ọọlajị nyọlẹ kị wẹẹ gbịla ụma nya inyi ọpwọpwọ nya alodehe. Ị kaa chị inyi nyaa ịịwa eku hi pyịnyẹng, ma ị kaa tụụbwọ hyaa chịkpa-chịkpa. Ányị angịgbahị ịwẹ à tị́ ka bwu daa ụbwọ la ọ-ka daa ehile? Ọngọ kpẹhị rịrị isekut ju angịgbahị nya ọjịra-jịra ịwẹ ọhụ nyọka byi aanahị ịịwa yẹkẹẹ: “Kori kanụ juwa ị-ịlahị ja ya ẹla ká angịnyị á ja mwụrụ yẹ abwọlẹ kanụ la gụ ọ-ka ke ụrụ wo ẹla ọlẹ kanụ wẹẹ ya aalẹ, akama juwa ẹ-ẹpwụ nya ang ọkụrụ-kụrụ nyanụ bala abwọlẹ kanụ kpa ịlọnụ.” Ẹla ọgbagbịla ọwẹ da aanahị ịịwa ụbwọ nyọka jẹ́ ang ọlẹ kị baba nyọka họ la angịgbahị nya ọjịra-jịra ọ-daa ehile ene ka. d

15. Ehile bala itiwe nya ehile ịla ịBayịbụụ iyina à tị́ ka dahị ụbwọ ụka kahị ja ka cheje nya ẹla nya utoji ọhọhọ? (Ala iRom 14:5)

 ¹⁵ Utoji ọhọhọ. Ọngịnyị nya ịKịrayịsị ọnyị myị́ ọnyị à ka cheje u-uhye nya ụma nya utoji ọlẹ kọ ka họ lẹ. (Gal. 6:5) Ụka ká ọngịnyị nya ịKịrayịsị á ja ka cheje nya ụma nya utoji ọlẹ kọ ka họọ, ọ ka baba nyọka ju ihi nya ehile ọlẹ ká ịBayịbụụ da u-uhye nya ịwọ bala ẹga nya ang nya alegu inyibyi. (Ụkụr. 15:20; Gal. 5:19, 20) Ẹga ịkịla ka ri ẹla ịlẹ ká ọngịnyị ka chụ ọlẹ kọ họ́ọ myị́. Angịhyẹ kaa tịtọ nya ụbwọ ọdada bwu ẹga nya angị họ utoji kem nyọka mẹ ụma nya utoji ọlẹ kị ka họ jáa, ọ tị kaa há angịkịla gụ́ nyọka họ utoji ụma ọkịla. Ụma nya utoji ọhẹ ka háahị lee ọ-wụ́ụhị ẹjẹ myị́, ma ahị baba nyọka jẹ́ nyori aanahị ịkịla la ọngịrị nyọka chụ ụma nya utoji ọlẹ kọ háa. Chajị nyọọwa, ahị baba nyọka kpa ẹla ịlẹ i-irya: (1) Ịpyị-Adịrahụ nya Ohe kẹnẹ-kẹnẹ à ka jẹ́-ẹ họhị uda gbang-gbang lẹ. (Ayị. 33:24) (2) Ọngịnyị nya ịKịrayịsị ọnyọnyọọnyị à ka “kpa irya nya ụbwọ nya ịlọmwụ” chụ ang ọlẹ kọ jẹ́ myị̀myị̀ ẹ-ẹga nya utoji ọhọhọ lẹ. (Wa Ala iRom 14:5.) (3) Áhị ka la angịkịla eje lee ọ-họ ẹla ọlẹ kọ ka chaa mịleji ka. (Rom. 14:13) (4) Angịnyị nya ịKịrayịsị kaa mẹ ọháha jẹ bala ọ-jẹ́ nyori ọ-yẹjula awụlẹ nya alọjịra-jịra nyị baba gụ́ ẹla ọla irya nya ịlaa. (Rom. 14:15, 19, 20) Kori kahị kpa ẹla ịwẹ i-irya, ahị ka jẹ́-ẹ yẹ jula awụlẹ bala aanahị alẹng bala anyang, okpunyi tị kaa ji ẹpwụ nya ọjịra-jịra ịnyịnyị.

16. Ányị ọngọgbahị nya ọjịra-jịra à tị́ ka mẹjẹ nyori ọ jẹ́-ẹ yẹ ẹla ẹkpẹ imiiye ụka kị ja me ẹla bala angịgbahị ịkịla? (Yẹ ifoto ịnyịnyị.)

¹⁶ Angịgbahị nya ọjịra-jịra ka ya ọgụ-ẹpẹtẹ ọnyịịla deeji ẹ-ẹga nya ẹla ọ-yẹ ẹkpẹ imiiye. (1 Tim. 3:2, 3) Ọ-chụ pwokwita, ọngọgbahị nya ọjịra-jịra ọhẹ á me irya nyori angịgbahị ịkịla ka ye irya nyamwụ myị pyii chajị nyori o ri ọgbahị nyaa ka. Ọ ka jẹ́ nyori olegu nya iJihova ka jẹ́-ẹ gu ọng myị́ ọng lẹpwụ nyaa gbịla nyọka ya ẹla ọlẹ kọ ka daa ụbwọ nyọka cheje ọnyịịla myị́. Ụka ká ụmụmẹ nya angịgbahị nya ọjịra-jịra á cheje nya ẹla ọlẹ kọ bịrị itiwe nya ehile ịla ịBayịbụụ ka aalẹ, angịkịla nyaa ịlẹ kị jẹ́-ẹ yẹ ẹla ẹkpẹ imiiye kaa nwụlanọ nyọka chẹkpẹ ju eje ọchịchị ọọwa, kori ká ọọwa á ri ọlẹ kọ háa gụ́ ka wẹwẹ.

17. Ahị ọwawa iyina angịnyị nya ịKịrayịsị à tị́ kaa yé nyọlẹ kị jẹ́-ẹ yẹ ẹla ẹkpẹ imiiye?

¹⁷ Angịnyị nya ịKịrayịsị kaa yé apyobwuna yẹẹyẹẹ bwula o-ri angị yẹ ẹla ẹkpẹ imiiye. Ahị jẹ́-ẹ yẹ jula aanahị alẹng bala anyang, okpunyi tị kaa juwa ọọjịra-jịra ịnyịnyị. Ọ kaa kpịpyọ nyọlẹ ká abwẹla bala ọhọhọ nya angịnyị nya iJihova datị-datị hi awụlẹ ma kị tị jẹ́-ẹ yẹjula awụlẹ ẹ-ẹpwụ nya ịgba ọgbagba nyamwụ. Ọlẹ kọ tị gụ́ wuu ri, ahị kaa chị ọkẹkẹnị nyọka jẹ́ nyori ahị wẹẹ gbịla iJihova, Ohe nyahị ọlẹ kọ kaa yẹ ẹla ẹkpẹ imiiye.