1. Ẹlịyẹ angịhyẹ nya anchẹ nya iJihova ịlẹ kị họ kpakpa à tị́ ka da ịwẹẹ ju myị́?

 Ọ KAA kpịpyọ nyọka jẹ́ nyori ẹla nya anchẹ nya iJihova wuu logu-logu kaa kpọọ ịpyọ! ỊBayịbụụ yẹkẹẹ: “[IJihova] chị ọkẹkẹnị ta angịnyị nyamwụ.” (Eje. 149:4) Ma ụka ọhẹ, ọkịlẹtụ kaa kpụ angịhyẹ enyi gbee kị ka da ịwẹ nyori iJihova nyị́ yaa myị ka. Iru nya angịhyẹ ịlẹ kị họ kpẹẹkpẹẹ kahị kaa wo oja nyaa ẹ-ẹpwụ nya ịBayịhụụ kaa la irya ọlịịwẹ ụka ọhẹ ịnyịnyị.—1 Sam. 1:6-10; Job. 29:2, 4; Eje. 51:11.

2. Ẹla nya owo anyị à tị́ kpụ iJihova ịpyọ?

² ỊBayịbụụ ya gede-gede nyori ẹla nya angịnyị ehe ịlẹ kị la kpẹẹkpẹẹ ka ka jẹ́-ẹ kpụ iJihova ịpyọ myị́. Ányị ọ tị́ ka bwu chịkpẹẹ? Ahị ka la ọmyịmyị ẹ-ẹga nya iJisọsị ịKịrayịsị bala o-hu enyi Ohe pyii. (Jọn. 3:16) Ahị kaa bwula ọọwa mẹjẹ a-ahị nya alụma nyori ahị yẹ irya da bwu ịhọbịrị nyahị lẹ bala ọ-myọnụ nyori irya nya iJihova ahị ka họ ẹẹ. (Ụkụr. 2:38; 3:19) IJihova kaa chị ọkẹkẹnị ụka kahị hu ẹta-ẹdịyẹ nyọka ri igu balọọ. Kori kahị ja maga jaabwọ kahị ka họ ba myị́ nyọka họ jaabwọ kahị myọnụ nyọka gbịgba ha iJihova lẹ aalẹ, ẹla nyahị ka kpọọ ịpyọ kpụ ọ ka yẹhị lala aligu nyamwụ lẹ.—Eje. 25:14.

3. Ẹlịyẹ ahị tị́ wẹẹ ka kụ ẹhị yẹ ugbẹnyị?

³ Ịyẹ tị́ tịtị du kọ kaa la angịhyẹ ụka ọhẹ lala o-ri Ohe nyị́ yaa myị ka? Ányị iJihova à tị́ kaa bwu mẹjẹ nyori ẹla nyahị kpọọ ịpyọ? Ányị ọngịnyị nya ịKịrayịsị à tị́ ka bwu jẹ́ myị̀myị̀ nyori ẹla nyamwụ kpụ Ohe ịpyọ?

 ANG ODUDU KỌ KAA LA ANGỊHYẸ LALA O-RI ẸLA NYAA NYỊ́ KPỤ IJIHOVA ỊPYỌ KA

4-5. Nanana nyori ahị ka me ịlọhị ọngọ ju apyobwuna ka ụka ọhẹ myị́, ẹlịyẹ ahị tị́ ka jẹ́ myị̀myị̀?

⁴ Ọ kaa la angịhyẹ nyahị bwu ụka-ụka nya onjwo nyaa lala o-ri ịwa nyị́ ju apyobwuna ka. (Eje. 88:15) Ọọnahị ọlẹng ọhẹ ká ẹnyị nyamwụ ri Adrián yẹkẹẹ: “M̀ kaa yẹ ịlọm lala ọngọ ju apyobwuna ka ụka myị́ ụka. M̀ kpịtịya kam kaa raabwọ ụka kam ri onjwwo nyori alugbiyegu nyam kem à ka pwụ ịParadayịsị lẹ, am-ḿ há kpụ m ka jụwa ka.” Tony, kị kpa nwa ẹ-ẹpwụ nya ẹlịlẹhị bwu eji-eji ka, yẹkẹẹ: “Adam bala ịnam á byim nyori am nyị há ịwa lee ẹla nyam nyị kpụ ịwa ịpyọ ẹnẹnẹhẹ lẹka. Ọọwa du kọ kaa lam lala o-ri am nyị́ ka jẹ́-ẹ họ ẹla kpaa ịpyọ ẹnẹnẹhẹ kaka.”

⁵ Kori kahị la ịlọhị lala angị ju apyobwuna ka ụka ọhẹ, ahị kpịtịya nyori iJihova la ịlọmwụ à gbileehi ba ịlọmwụ lẹ. (Jọn. 6:44) Ọ yẹ ang ọnyịịla ọla ẹga nyahị ọlẹ kahị ka jẹ́-ẹ yẹ la ịlọhị ka myị́, ọ tị jẹ́ ọkịlẹtụ nyahị ịnyịnyị. (1 Sam. 16:7; 2 Ego. 6:30) Lẹ ahị ka jẹ́-ẹ dahịhilọọ nyọlẹ kọ ya nyori ahị nyị ju apyobwuna.—1 Jọn. 3:19, 20.

6. Ányị ịhọbịrị ịlẹ ká ịPọlụ họ lụka ọkẹkpẹ à tị́ kaa lọọ?

⁶ Ene ká angịhyẹ nyahị wẹ ka jẹ́ ẹlịlẹhị, ahị ka họ ang ịlẹ kahị ka ja kpụ ịlọhị abyị u-uhye nyaa myị́. (1 Pit. 4:3) Angịkịla ịlẹ kị dọmwụ kaa gbịgba ha iJihova yẹẹyẹẹ ka dọmwụ kpụ ịlaa abyị ịnyịnyị myị́. Ọkịlẹtụ nyang ahụ kaa ya eje wung ịnyịnyị? O-ri ịnyị aalẹ, jẹ́ nyori anchẹ nya iJihova kaa la akama nya irya ịlịịwẹ, ká ye ẹjẹ ọkpụ́kpụ. Ọ-chụ pwokwita, ọlẹrụ ịPọlụ la ịlọmwụ lala ọlịnyịribyi ụka kọ kụ irya u-uhye nya ọkpẹẹkpẹẹ ọlala ka nyamwụ. (Rom. 7:24) Ẹlịlehị ri, ịPọlụ yẹda bwu ịhọbịrị nyamwụ kpụ ọ hu enyi Ohe lẹ. Kpọkpọọkpọ, ọ yẹ ịlọmwụ lala ọngọlẹ kọ “ri ọhịnyẹnyẹ kpá wuu ẹ-ẹpwụ nya alẹrụ ọnyịịla” bala ọngọ ri “olegbeju nya alọhọbịrị.”—1 Kọr. 15:9; 1 Tim. 1:15.

7. Ẹlịyẹ ahị tị́ ka kpịtịya u-uhye nya ịhọbịrị nyahị ịlụka ọkẹkpẹ?

⁷ Adahị olepwoohe myọnụ nyọka hịnyọhi hahị kori kahị yẹ irya da. (Eje. 86:5) Lẹ kori kahị jẹ́ abyị nya ịhọbịrị ịlẹ kahị họ ịlẹhị, ahị ka jẹ́-ẹ dahịhile ẹla ọlẹ ká iJihova ya nyori ọwa nyị hịnyọhi hahị lẹ.—Kol. 2:13.

8-9. Ányị ahị tị́ ka bwu kụrụ irya ọlẹ kahị kaa la nyori áhị ka jẹ́-ẹ họ ẹla nwa ọ-ka kpụ iJihova ịpyọ ẹnẹnẹhẹ ka?

⁸ Ahị wuu tịtọ nyọka gbịgba ha iJihova jaabwọ kahị ka họ ba myị́. Ma, ọ kaa la angịhyẹ lala o-ri nyị́ ka jẹ́-ẹ họ ẹla nwà ọ-ka kpọọ ịpyọ ẹnẹnẹhẹ ka. Ọọnahị ọnyang ọhẹ ká ẹnyị nyamwụ ri Amanda yẹkẹẹ: “M̀ kaa me nyori m̀ ka họ gụ́ ọọwa ụka myị́ ụka ene kọ ka myị iJihova lẹhị. Lẹ m̀ kaa maga nyọka họ kpoye nya ẹga ọlẹ ká ọngịrị nyam pwụ. Ụka kam ‘mileji,’ ọ kaa lam lala o-ri iJihova nyị wụ ẹjẹ tam jaabwọ kam wẹẹ wụ ta ịlọm lẹ.”

⁹ Ányị ahị tị́ ka bwu kụrụ irya nyori áhị ka jẹ́-ẹ họ ẹla nwà ọ-ka kpụ iJihova ịpyọ ẹnẹnẹhẹ ka? Kpịtịya nyori iJihova ri ọngọ jẹ́-ẹ yẹ ẹla ẹkpẹ imiiye. Ọ́ kaa tịtọ kahị ka họ ang ọ-kịla ọngịrị nyahị kịla ẹnẹnẹhẹ ka. Ang myị́ ang ọlẹ kahị ja họ bwu ọkịlẹtụ nyahị họọ kaa myọọ lẹhị. Ịnyịnyị, kụ irya u-uhye nya angị ịlụka nya ịBayịbụụ ịlẹ kị gbịgba ha iJihova la ọkịlẹtụ nyaa wuu. Kụ irya nya ịPọlụ. Ọ họ ụkụrwọ la ọngịrị-ọngịrị ẹ-ẹpwụ nya ẹka lụmẹ-lụmẹ, jẹ ẹdịyẹ ịmayịlị ịmanyị tị́ juwa ya ọjịra-jịra yeji. Ma, ẹla nyamwụ wụ iJihova ẹjẹ ụka ká iwe-ahụrụ nyamwụ yẹda du kọ jẹ́ kpa ẹrụ ọnyịịla pyẹ lala olene kaka? Ehe. Ọ kịnyaa la ọ-họ ọlẹ kọ ka jụ họ myị́, iJihova tị wahị kụrwọọ ịnyịnyị. (Ụkụr. 28:30, 31) Ịnyịnyị-ịnyịnyị, ang ọlẹ kahị jụ họ ha iJihova ka yẹda jaabwọ ká ụka wẹẹ jẹ myị́. Irya ọlẹ kahị wẹẹ kpa gbịgba họọ à ri ang ọlẹ kọ baba họọ lẹ. Ahị kụ ẹhị yẹ agbẹyị ịhyẹ ịlẹ ká iJihova kaa mẹjẹ nyori ẹla nyahị kpọọ ịpyọ wẹẹ.

 ÁNYỊ IJIHOVA À TỊ́ KAA MẸJẸ NYORI ẸLA NYAHỊ KPỌỌ ỊPYỌ?

10. Ányị ahị tị́ ka bwu “wo” ká iJihova ja ya nyori ẹla nyahị nyị kpụ ọwa ịpyọ? (Jọn. 16:27)

¹⁰ Bwụla ịBayịbụụ. IJihova kaa mwahị nya agbẹyị ịlẹ kọ ka bwu mẹjẹ nyori ọ la ọháha ẹ-ẹga nya anchẹ nyamwụ bala o-ri ẹla nyaa kpọọ ịpyọ. Ụpwụ Ịgọgọ da ju ụka imimiiye ká Ohe byi iJisọsị nyori nyị ri ọlịkẹjẹ nya ọwa bala o-ri ẹla nyamwụ nyị kpụ ọwa ịpyọ. (Mat. 3:17; 17:5) Ọ ka háng ká iJihova ka bying nyori ẹla nyang nyị kpụ ọwa ịpyọ ịnyịnyị? IJihova á kaa ya ẹla tọhị kpụrụrụ alẹ ka, ma ọ kaa ya ẹla tọhị bwula ịBayịbụụ. Ụka kahị wa ụpwụ ịgọgọ kahị wo ẹla ịlẹ ká iJsọsị ya ta angịjụgbẹyị nyamwụ, aalẹ ọ lala o-ri Ohe à wẹẹ ya ẹla tahị ịnyịnyị ẹẹ. (Wa ịJọn 16:27.) IJisọsị kaa gbịla abwẹla nya Adamwụ kpẹẹkpẹẹ. Lẹ ụka kahị wa jaabwọ ká iJisọsị ya nyori ẹla nya angịjụgbẹyị nyamwụ ịlẹ kị họ kpakpa nyị kpụ ọwa ịpyọ, nanana nyori ị́ la kpẹẹkpẹẹ ka, ahị ka jẹ́-ẹ kụ irya nyori iJihova à wẹẹ byihị ịnyị ịnyịnyị ẹẹ.—Jọn. 15:9, 15.

11. Ịyẹ tị́ du ká akama ọyẹyẹ á mẹjẹ nyori ẹla nyahị wụ́ iJihova ẹjẹ ka? (IJemsi 1:12)

¹¹ Bwula ọhọhọ nyamwụ. IJihova kaa nwụlanọ nyọka dahị ụbwọ, bwula ọ-họ ang ịlẹ kahị baba hahị. Ụka ọhẹ, iJihova ka ya iwe da akama ka wẹ ẹga nyahị myị́, jaabwọ kọ ya iwe da ẹ-ẹga nya iJobu. (Job. 1:8-11) Ịmayẹ á mẹjẹ nyori ẹla nyahị wụ Ohe ẹjẹ lẹ ka. Ọkọkọ nya ọọwa, ị ka ya iwe da hahị nyọka mẹjẹ iJihova jaabwọ kahị la ọháha ẹ-ẹga nyamwụ bala ọ-dahịhilọọ kaka ba. (Wa iJemsi 1:12.) Ẹ-ẹpwụ nya ịmayẹ ị-ịwa, ahị ka yẹ jaabwọ kọ la ọháha ẹ-ẹga nyahị bala abwọlẹ kọ kaa dahị ụbwọ nyọka bọhụ.

12. Ẹlịyẹ ahị ka jẹ́ bwu oja nya Dmitrii?

¹² Kụ irya nya ẹla ọlẹ kọ họ ta ọọnahị ọlẹng ọhẹ bwu Asia ká ẹnyị nyamwụ ri Dmitrii wẹẹ. Ụkụrwọ nyamwụ gwọọ myị́, ọ́ tị ye ọkịla ka gbee ẹ-ẹpwụ nya ịya lụmẹ-lụmẹ. Lẹ ọ chụ nyọka kpa ẹrụ ọnyịịla pyẹ gụ́ ọọwa, nyọka mẹjẹ nyori ọ dahịhile iJihova. Ịya lụmẹ-lụmẹ chịpụrụ myịmyị, ọ́ tị ye ụkụrwọ ka ịnyịnyị. Ọọwa tị lẹ, ẹdụrụ ọhẹ à jwoo gbee kọ jẹ́-ẹ wuleji hi ịbẹẹdị kaka lẹlẹ. Ọ dọmwụ nyọka kụ irya nyori ọwa nyị́ ri ọrụ-ahụ bala adịda ọlam kaka, bala o-ri ọhẹka ẹla nya ọwa nyị́ kpụ iJihova ịpyọ kaka. Ọọwa ẹnẹhẹ lobyi lẹ, ọnyị nyamwụ ọnyang à da ẹla ọla ụpwụ nya Ayịsaya 30:15 kpehe la akpa-akpa ju ụpwụ họọ ẹẹ. Ụwa yẹkẹẹ: ‘Anụ ka ye ọngịrị bwula ọ-ba kem  bala ọ-dahịhilem.’ Ọ kpa wẹ ịkịka nya ịbẹẹdị nya adamwụ lẹ ọ byoo yẹkẹẹ, “Adam, ụka ká ọkịlẹtụ á ja bịrịng, maga ká kpịtịya nya ẹla ịla ụpwụ ịgọgọ ọwẹ.” Dmitrii wẹ ka yẹ nyori iJihova họ lụmẹ nyọlẹ ká ugbiyegu nyamwụ la ang oriri, ang ọkụrụ-kụrụ, bala ẹpwa ọlẹ kị ka kụ. Ọ yẹkẹẹ: “Ang ọlẹ kam baba nyọka họ ri ọ-ka wu ịlọm kpa kpọọ bala ọkịnyaa la ọ-dahịhile Ohe nyam.” Kori ká ja chịpwụrụ bwu ẹpwụ nya akama ọlịnyị aalẹ, dahịhile nyori iJihova kpahị jung, ọ tị ka dang ụbwọ nyọka jẹ́-ẹ bọhụ ịnyịnyị.

13. Owo iJihova à tị́ ka kpa byihi nyori ẹla nyahị kpọọ ịpyọ myị́? Ányị ọ tị́ ka bwu họ ịnyị?

¹³ Bwula aanahị ịlạ ọjịra-jịra. IJihova kaa kpa aanahị ịla ọjịra-jịra ya jehi jaabwọ ká ẹla nyahị kpọọ ịpyọ kaka ba. Ọ-chụ pwokwita, ọ ka gu angịkịla gbịla nyọka ya ẹla ọlẹ kọ ka juhị ọhụ lụka ọlẹ kọ pwoku myị́. Ọ lịnyị ẹ-ẹga nya ọọnahị ọnyang ọhẹ bwu Asia ụka kọ la akama ọtụka ọhẹ. Ụkụrwọ nymwụ gwọọ myị́, ene kọọ jụ ẹdụrụ ọtụka-ọtụka ọhẹ. Ọọwa ọrụmwụ à họ ọhọbịrị ọtụka ọhẹ du kị gbọọ hi ọngọgbahị nya ọjịra-jịra o-riri lẹlẹ. Ọọnahị ọwẹ yẹkẹẹ: “Ḿ jẹ́ ang odudu ká ẹla ịwẹ wuu wẹẹ họ ka. M̀ kaa kụ irya nyori ọhẹka m̀ họ ẹlẹhẹ tịpyọ du ká ẹla nyam ja wụ iJihova ẹjẹ lẹ.” Ọọnahị ọnyang ọwẹ bịlẹ iJihova kọ ka mẹjọ́ọ nyori ẹla nyamwụ kpọọ ịpyọ wẹẹ. Ányị Ohe à tị́ bwu họ ịnyị? Ọọnahị ọwẹ ya nyori, “angịgbahị nya ọjịra-jịra ya ẹla balam bala ọ-họ kam jẹ́ myị̀myị̀ nyori iJihova la ọháha ẹ-ẹga nyam.” Ma nyọlẹ ká ụka chịpwụrụ chẹẹ, ọ bịlẹ iJihova kọ ka dọọ ụbwọ. Ọ yẹkẹẹ: “Ahyẹẹnụ ọwa-ọwa m̀ ye ileta bwu ẹga nya ebwo nya aanahị alẹng bala anyang ịhyẹ bwu ọjịra-jịra. Jaabwọ kam ja wa omyi ẹla nya ẹjẹ ọkpụ́kpụ nyaa, m̀ yẹ nyori iJihova à wẹ abwọ ọrịrị nyam wẹ lẹ.” Ee, ụka lụmẹ-lụmẹ iJihova kaa họ kahị ka jẹ́ nyori ẹla nyahị kpọọ ịpyọ, bwula omyi ẹla ọkpẹnẹẹ nya aanahị.—Eje. 10:17.

14. Ụgbẹyị ọkịla oyina iJihova à tị́ kaa bwu mẹjẹ nyori ẹla nyahị kpọọ ịpyọ?

 ¹⁴ IJihova kaa mẹjẹ nyori ẹla nyahị kpọọ ịpyọ bwula ọ-kpa aanahị ya libyi lahị ụka kahị baba nyamwụ ịnyịnyị. Ọ-chụ pwokwita, lụka nya oyi ọhọhẹ, iJihova kpa ọlẹrụ ịPọlụ da ileta 14 du kịla aanamwụ ịla ọjịra-jịra. Ẹ-ẹpwụ nya ileta ị-ịwa, ịPọlụ ya alibyi la aanamwụ kpụrụrụ ụ-ụgbẹyị nya ọháha. Ịyẹ tị́ du ká Ohe ya olegu nyamwụ ha ịPọlụ nyọka da alibyi oyaya ju kpịlọ? IJihova ri Adịda ọnyịịla, lẹ ọ kaa nwụ angịlẹ kị “họọ ka ọkịlẹtụ rịrị.” (Etu 3:11, 12) Lẹ ụka kị ya alibyi lahị bwu ẹpwụ nya ịBayịbụụ, ọọwa á ri iJihova wụ ẹjẹ tahị lẹ ka. Ọkọkọ nya ọọwa, ọ mẹjẹ nyori ẹla nyahị kpụ iJihova ịpyọ wẹẹ. (Hib. 12:6) Ang ịkịla iyina à tị́ kaa mẹjẹ nyori ẹla nyahị kpụ iJihova ịpyọ?

ANG-ẸJẸẸ ỊKỊLA ỊLẸ KỊ MẸJẸ NYORI ẸLA NYAHỊ KPỤ IJIHOVA ỊPYỌ

15. Angịịna iJihova à tị́ kaa ya olegu ịgọgọ nyamwụ ha? Ịyẹ tị́ du ká ọọwa ka ya ọhụ ọ-dapịlẹ hahị?

¹⁵ IJihova kaa ya olegu ịgọgọ nyamwụ ha angịlẹ ká ẹla nyaa kpọọ ịpyọ. (Mat. 12:18) Ahị ka tọ ịlọhị wo myị́ nyori, ‘M̀ jẹ́ kaa yẹ apa nya ugbe nya olegu nya Ohe ịhyẹ chehe ẹ-ẹpwụ nya ọhịhị nyam lẹ?’ À yẹ nyori à jẹ́-ẹ ju ugbodu bala angịnyị lẹẹlẹẹ gụ́ ụka ọlẹ ká jẹ́ iJihova lẹka? Ẹlịlẹhị ri, jaabwọ ká jẹ́ wẹẹ ya ugbe nya olegu ịgọgọ chehe, ịnyịnyị ọ ka lang gede-gede gụ́ olene nyori ẹla nyang kpụ iJihova ịpyọ lẹ!—Yẹ akpa ọlẹ kọ ri “ The Fruitage of the Spirit Is . . . ”

16. Owo anyị iJihova à tị́ ya ụkụrwọ nya ẹrụ ọnyịịla ọ-kpa pyẹ ju ụ-ụbwọ? Ányị ọọwa à tị́ lang? (1 Ala ịTẹsalonika 2:4)

¹⁶ IJihova ya ụkụrwọ nya ẹrụ ọnyịịla ju angịlẹ ká ẹla nyaa kpọọ ịpyọ ụ-ụbwọ. (Wa 1 Ala ịTẹsalonika 2:4.) Yẹ jaabwọ ká ọọnahị ọnyang ọhẹ ká ẹnyị nyamwụ ri Jocelyn yé apyobwuna bwula ẹrụ ọnyịịla ọ-kpa pyẹ ya je angịkịla lẹẹ. Ẹnẹhẹ, ọkịlẹtụ dọmwụ nyọka kpụ Jocelyn enyi ụka kọ chahị une. Ọ yẹkẹẹ: “Ọ lam lala o-ri ḿ la ọngịrị ka hu ịngịngịhyẹ ha myị́ kaka. Ma m̀ tị kaa ye ịlahị nya ụgbẹyị, ẹnẹwẹ tị ri ẹnẹlẹ kam kaa kpehe nya ẹla Ohe. Lẹ m̀ raabwọ lẹ m kpehe nya ẹla Ohe lẹlẹ.” Alụtụrụ nya ẹnụmwụ ọọwa, Joycelyn gbachị Mary. Mary ọọwa ri ọnyang ọlọnahị ọlẹ kọ myọnụ nyọka jẹ́ ịBayịbụụ. Nyọlẹ ká ịya ịmanyị-manyị chịpwụrụ kpá, Mary ya nyori ọwa nyị wẹẹ kpa abwọ rị ká Ohe nyị ka da ọwa ụbwọ ụka ọlẹ ká Joycelyn ya ụbwọ kpụ ụgbẹyị nyamwụ. Ụka ká Joycelyn kụ irya ju ẹlẹwẹ, o yẹkẹẹ: “Ọ lam lala o-ri iJihova wẹẹ byim yẹkẹẹ, ‘ẹla nyang kpụm ịpyọ.’”  Ịlẹhị lẹ, ọ́ng myị́ ọng à ka ke ụrụ wo ẹla nya Ohe ọlẹ kahị kaa ya ka. Ma ahị jẹ́ myị̀myị̀ nyori ọ kaa kpụ iJihova ịpyọ ụka kahị maga da ịlọhị nyọka ya ẹrụ ọnyịịla je angịkịla.

17. Ẹlịyẹ a tị́ jẹ́ bwu ẹla ọlẹ ká Vicky ya u-uhye nya iya ọkịlaa-kịla? (Eje Ọnyịịla 5:12)

¹⁷ IJihova kaa ya iwe da ká angịlẹ ká ẹla nyaa kpọọ ịpyọ ka yé apyobwuna bwu iya ọkịlaa-kịla nya iJisọsị. (1 Tim. 2:5, 6) Ma kori kọ tị myị́myị́ lahị lala o-ri ẹla nyahị nyị́ kpụ iJihova ịpyọ ka, nanana nyori ahị la ọmyịmyị ẹ-ẹga nya iya ọkịlaa-kịla bala o-hu enyi Ohe lẹ bẹẹ? Kpịtịya nyori, nanana nyori áhị ka jẹ́-ẹ dahịhile irya nyahị ụka myị́ ụka ka ma ahị ká jẹ́-ẹ dahịhile iJihova. Ọ kaa yẹ angịlẹ kị la ọmyịmyị u-uhye nya iya ọkịlaa-kịla lala alabwẹla ị-ịlahị nyamwụ, ọ tị myọnụ nyọka wahị kụrwaa ịnyịnyị. (Wa Eje Ọnyịịla 5:12; Rom. 3:26) Irya ọ-kụ u-uhye nya iya ọkịlaa-kịla da Vicky ụbwọ. Nyọlẹ kọ kụ irya kpori-kpori u-uhye nya iya ọkịlaa-kịla ẹnẹhẹ kpá, ọ wẹ ka jẹ́ nyori: “IJihova kaa ju ugbodu balam lụka ọtata lẹ. . . . Ma, ọ tị lala o-ri m̀ wẹẹ yẹkẹẹ: ‘Ọháha nyang á lụmẹ kpụ ọ-ka wum ọyị ka. Iya ọkịlaa-kịla nya Ọnyị nyang á nwa ọ-ka hịlẹ ịhọbịrị nyam ka.’” Irya ọ-kụ u-uhye nya āhị nya iya ọkịlaa-kịla du kọ jẹ́ nyori iJihova la ọháha ẹ-ẹga nyamwụ. Ahị ịnyịnyị ka jẹ́ nyori iJihova la ọháha ẹ-ẹga nyahị bala o-yehị myị, kori kahị kụ irya u-uhye nya iya ọkịlaa-kịla.

18. Ẹlịyẹ ahị tị́ ka jẹ́ myị̀myị̀ kori kahị la ọháha ẹ-ẹga nya Adahị olepwoohe kịnyaa?

¹⁸ Ịlẹhị lẹ ahị ka maga nyọka kpa ẹla ọlẹ kahị jẹ́ ẹ-ẹpwụ nya ang ọjẹ́jẹ ọlẹ wẹ họ ụkụrwọ myị́, ma ọkịlẹtụ ka kpụhị enyi ụka ọhẹ du kọ ka lahị lala o-ri ẹla nyahị nyị́ kpụ iJihova ịpyọ ka myị́. Kori kọ lịnyị, kpịtịya nyori Ohe kaa chị ọkẹkẹnị bala “angịlẹ kị la ọháha ẹ-ẹga nyamwụ.” (Jem. 1:12) Lẹ kịnyaa la ọ-tụ ju iJihova chwẹẹ ká ya ẹhị rịrị a-agbẹyị ịlẹ wuu kọ kaa bwu mẹjẹ nyori ẹla nyang kpọọ ịpyọ mẹ. Kpịtịya ụka myị́ ụka nyori iJihova á ‘lụrụ hiihi ka.—Ụkụr. 17:27.