1. Ịyẹ ahị wuu à tị́ kaa tịtọ ká alugbiyegu nyahị ka họ?

PAULINE, * ọọnahị ọnyang ọhẹ yẹkẹẹ: “Bwụ ụka-ụka ọlẹ kam jẹ́ ẹlịlẹhị, ọ hám ká alugbiyegu nyam wuu ka juwa balam odehe onyeewe. Ọ hám ká Wayne ọrụm bala ọnyị ọlẹng nyahị gụgụụgụ ka gbịgba ha iJihova balam.” Alugbiyegu nyang ịhyẹ juwa kị jẹ́ iJihova bala ọ-la ọháha ẹ-ẹga nyamwụ lẹka? Lala Pauline, ọ ka háng ịnyịnyị myị́ ká alugbiyegu nyang wuu ka gbịgba ha iJihova.

2. Ịtọ ẹla iyina ahị tị́ ka kụ ẹhị yẹ a-ang ọjẹ́jẹ ọlẹ?

² Áhị ka jẹ́-ẹ gbile alugbiyegu nyahị lagbụrụ nyọka ye ẹla nya Ohe myị́ ka. Ma, ahị ka jẹ́-ẹ jwaa ọhụ nyọka kụ irya ju ẹla ọlẹpwụ nya ịBayịbụụ bala ọ-ka ye ẹla ọọwa myị. (2 Tim. 3:14, 15) Ịyẹ tị́ du kahị ka ya ẹla nya Ohe ju alugbiyegu nyahị? Ịyẹ tị́ du kọ baba nyọka jẹ́ jaabwọ kọ laa i-irya? Ányị ahị tị́ ka họ nyọka daa ụbwọ la ọháha ẹ-ẹga nya iJihova lala ahị? Ányị alọjịra-jịra wuu à tị́ ka bwu dahị ụbwọ ịnyịnyị?

3. Jaabwọ ká ụ-ụpwụ nya 2 iPita 3:9 ya, ịyẹ tị́ du kọ baba nyọka ya ẹla nya Ohe ju alugbiyegu nyahị?

³ Lụka okpii, iJihova ka ta odehe ọlẹ ayịreji. Angịlẹ kẹnẹ-kẹnẹ “kị chịla-chịla nyọka la ọhịhị ọmyịmyị-ka,” à ka chịda lẹ. (Ụkụr. 13:48, NW ) Ahị kaa kpa ụka bala ọngịrị nyahị ya ẹla nya Ohe yẹẹyẹẹ ju angịlẹ kị ri angga e-epweji nyahị, lẹ ọ kaa háahị  kahị ka ya ẹla nya Ohe ju alugbiyegu nyahị chajị kị ka gbịgba ha iJihova balahị. IJihova, adịda ọnyịịla nyahị “á tịtọ ká ọngọngọhẹ ka ta ayịreji . . . kpongkpong ka. Ma, ká ọng myị́ ọng wuu ka ya irya da.”—Wa 2 iPita 3:9.

4. Ẹla ọtịpyọ oyina ahị tị́ ka họ myị́ ụka kahị juwa ya ẹla nya Ohe ju alugbiyegu nyahị?

⁴ Ahị baba nyọka kpa i-irya nyori, ọ la ụgbẹyị ọlẹ kahị ka ya ẹrụ ọnyịịla nya ọchịda ọwẹ kọ ka pwoku bala ọ-ka pwoku ka. Lala ọ-chụ pwokwịta, ụka kahị juwa ya ẹla nya Ohe jụ angịlẹ kahị jẹ́ ẹnẹnẹhẹ lẹka, ahị kaa ya ẹla dụmwọ, ma ụka kahị tị tịtọ nyọka ya ẹla nya Ohe ju alugbiyegu nyahị, ahị kaa yọọ kwọnggọọ.

5. Ẹlịyẹ ahị tị́ baba nyọka kpa i-irya ene kahị ka ya ẹla nya Ohe ju alugbiyegu nyahị?

⁵ Angịhyẹ nyahị lụmẹ-lụmẹ kaa chị ijẹma ụka kahị kụ irya kẹkpẹ u-uhye nya abwọlẹ kahị bwu ya ẹla nya Ohe ju alugbiyegu nyahị. Ahị kaa ya nyori, kori kahị jẹ́ ịnọ ahị ka ya ẹla taa ụ-ụgbẹyị ọlịịwẹ ka. ỊPọlụ ọngọmyẹrụ da angịnyị nya ịKịrayịsị ọna yẹkẹẹ: “Anụ́-ụ juwa kpa ẹlẹlẹ ọgẹnẹ-gẹnẹ ya ụma nya ẹla ọlẹ kọ ka ju apyobwuna ha angịkịla ụka wuu mẹ. Chajị kanụ ka jẹ́-ẹ wẹ ẹla ọlẹ kọ pwoku ẹ-ẹga nya ọng myị́ ọng wuu mẹ.” (Kol. 4:5, 6) Ọ há kahị ka kpa ẹla ọmẹjẹ ọwẹ i-irya ụka kahị juwa ya ẹla bala alugbiyegu nyahị. O ri ịnyị ka, ahị ka ya ẹla ọlẹ kọ ka waa ẹjẹ ọkọkọ nyọka daa ụbwọ ke ụrụ wo lahị.

6-7. Oja oyina à tị́ mẹjẹ nyori, ọ baba ká angịnyị nya ịKịrayịsị ka maga nyọka jẹ́ irya nya ahụ lee ọrụ nyaa ọlẹ kọ kaa gbịgba ha iJihova ka?

⁶ Jẹ́ jaabwọ kọ laa i-irya. Ọọnahị Pauline ọlẹ kị gu ẹnyị bwu ọmwụ ọdada yẹkẹẹ: “Ụka nya ọgbanyẹ, m̀ kaa tịtọ nyọka ya ẹla u-uhye nya Ohe Oluhye bala ịBayịbụụ kem ẹ-ẹga nya ayịbam. Áhị kaa ya ẹla u-uhye nya ang ịkịla  ka.” Wayne, ọrụ Pauline á tị́ jẹ́ ẹla ọla ịBayịbụụ gbuu ka, lẹ ó wo etu nya ẹla ọlẹ ká ahụ nyamwụ wẹẹ tịtọ nyọka ya ka. Ọ lọọ lala o-ri, ẹla nya ịgba ọgbagba kem à ri ang ọlẹ kọ ju i-irya nya ahụ nyamwụ ẹẹ. Ọ chị uko nyori, alogu ọtịpyọ ọhẹ nyị chị enyi nya ang nyaa họọ nwà lẹ.

⁷ Pauline, ahụ nyamwụ ya nyori ọwa nyị kaa juwa bala ala ọjịra-jịra ụka lụmẹ-lụmẹ lobyi-obyi bala ọmyị́myị́ nya epwihi. Ụka ọhẹ kaa ri ọjịra-jịra ọkaka, ẹrụ ọnyịịla ọ-kpa pyẹ bala ụya ọyaya balaa. Ọ myịmyị yẹkẹẹ: “Ayịbam kaa nyà ka tọ ẹpwa luhwo-luhwo ụka ọhẹ, dudu kọ kaa lịlọmwụ nwee.” Iwoo nya ahụ bala ọnyị nyamwụ ka wu Wayne ịlẹhị. Ọ́ jẹ́ angịlẹ kị juwa bala ka. Ọ myịmyị lọọ lala o-ri aligu nya ahụ nyamwụ inyeewe ịwẹ nyị baba họọ gụ ọwa ayịbamwụ lẹ. Wayne tịtọ nyọka da ụpwụ pwa Pauline ahụ nyamwụ. À yẹ agbẹyị ịhyẹ ịlẹ ká Pauline ka jẹ́-ẹ bwu mẹjẹ nyori, ọ jẹ́ jaabwọ kọ la ayịbamwụ i-irya?

8. Ẹlịyẹ à tị́ kaa gu alugbiyegu nyahị gụ́, jaabwọ ká ụpwụ nya 1 iPita 3:1, 2 ya?

⁸ Mẹ abwẹla ọnyịịla jẹ. Abwẹla nyahị à kaa gu alugbiyegu nyahị gụ́ ẹla ọlẹ kahị kaa ya, ụka lụmẹ-lụmẹ lẹ. (Wa 1 iPita 3:1, 2.) Pauline wẹ kaka jẹ́ nyori ẹla ọwẹ ri ẹlịlẹhị. Ọ yẹkẹẹ, “M̀ jẹ́ nyori ahị há ayịbam yẹẹyẹẹ, ọ́ ri irya nyamwụ nyọka pwam ka. Ẹla ọọwa ọlẹ kọ tị ya du kam yẹ nyori, m̀ baba nyọka kpa ẹla ọlẹ ká iJihova ya u-uhye nya awụlẹ oyeye họ ụkụrwọ. Ọ baba kam ka mẹ abwẹla ọnyịịla jẹ gụ ọ-ka juwa ya ẹla nya Ohe joo ụka myị́ ụka.” Pauline hwabwọ la ọ-kpa ẹla nya ịBayịbụụ tụ́ rịrị ọrụmwụ, ọọwa lẹ ọ dọmwụ nyọka ja oja balọọ u-uhye nya ẹla ịkịla ẹẹ. Wayne ọwa yẹ nyori, ahụ nyọwa nyị kaa ya ẹla kpẹnẹẹ. Ọnyị nyamwụ tị kaa ju ihi yẹẹyẹẹ ịnyịnyị. (Etu 31:18, 27, 28)  Ụka ọlẹ kọ yẹ jaabwọ ká ẹla ọla ịBayịbụụ wẹẹ da alugbiyegu nyamwụ ụbwọ, ọ dọmwụ nyọka wụrụ ọkịlẹtụ nyamwụ da ha omyi ẹla nya Ohe Oluhye bala ọ-ka ye ẹla ọlụwa myị ịnyịnyị.—1 Kọr. 7:12-14, 16.

9. Ịyẹ tị́ du kọ baba kahị ka kịnyaa juwa maga nyọka da alugbiyegu nyahị ụbwọ?

⁹ Kịnyaa juwa maga nyọka da alugbiyegu nyang ụbwọ. IJihova ya ọgụ-ẹpẹtẹ deeji hahị. Ọ kaa “kịnyaa” juwa ya iwe da ha angịnyị nyọka ke ụrụ wo ẹrụ ọnyịịla chajị kị ka la ọhịhị. (Jer. 44:4) ỊPọlụ ọngọmyẹrụ ịnyịnyị byi iTimoti nyị kịnyaa juwa maga nyọka da angịkịla ụbwọ. Ịyẹ tị́ du? Chajị bwula ọ-họ ịnyị, ọwa lịlọmwụ bala angịlẹ kị ke ụrụ wo ẹla nyamwụ ka la ọchịda. (1 Tim. 4:16) Alugbiyegu nyahị háahị yẹẹyẹẹ, chajị nya ọọwa lẹ, ahị tịtọ kị ka jẹ́ ẹlịlẹhị ọla ịBayịbụụ. Ụka kọ nọ chẹẹ, ẹla oyaya bala abwẹla nya ọọnahị Pauline gu ugbiyegu nyamwụ ụ-ụgbẹyị ọnyịịla. Lẹẹlẹẹ, ọ chị ọkẹkẹnị chajị ọwa bala ọrụmwụ kaa gbịgba ha iJihova lawụlẹ. Ịwa angị imimiiye ri angị ye ịlahị nya ụgbẹyị kpụrụrụ. Wayne tị ri ọngọgbahị nya ọjịra-jịra ịnyịnyị.

10. Ịyẹ tị́ du kahị baba nyọka ju ugbodu?

¹⁰ Ju ugbodu. Ụka kahị yẹ ọhịhị nyahị da nyọka ba ehile nya Ohe Oluhye jẹ, ọ kaa la alugbiyegu nyahị ujwo nyọka ye ọyẹda ọọwa myị. Ụka lụmẹ-lụmẹ, ang ọhọhẹ ọlẹ kị kaa yẹ ri, áhị kaa yẹjulaa ẹ-ẹpwụ nya ịhọhọ nyaa bala ẹla nya upe kaka. Ụka nya ọgbanyẹ, angịhyẹ ugbiyegu nyahị dọmwụ kaa wụ́ ẹjẹ tahị. (Mat. 10:35, 36) Áhị́ tị ka kụ irya nyori ị́ ka jẹ́-ẹ yẹda myị́ ka lẹ ka. Kori kahị ba la ọ-maga nyọka daa ụbwọ jẹ́ ẹlịlẹhị lẹ aalẹ, ahị waa nya angị chịla ọ-ka ta ayịreji lẹ. IJihova á tị ya ụkụrwọ nya eje ọlala hahị ka. IJisọsị ọ ya ụkụrwọ ọọwa ha lẹ. (Jọn. 5:22) Kori kahị ju ugbodu, alugbiyegu nyahị ka ke ụrụ wo ẹla nyahị ẹnẹhẹ myị́ wẹẹ.—Yẹ akpa ọlẹ kọ ri, “ Kpa ỊWẹbsayịtị Nyahị Mẹ Ang Jẹ.”

11-13. Ẹlịyẹ ahị tị́ ka jẹ́ bwu ẹla ọlẹ ká Alice họ ẹ-ẹga nya adamwụ bala ịnamwụ?

¹¹ Godayị giri-giri, ká tị ya ẹla lihi-ihi. (Etu 15:2) Kụ irya nya ẹla ọlẹ kọ họ ọ-ọhịhị nya Alice wẹẹ. Ọ jẹ́ ẹlịlẹhị u-uhye nya iJihova ụka kọ ji lụrụ hi adamwụ bala ịnamwụ. Ị́ myị nyori Ohe Oluhye ji ka, ị tị ri alupe ịnyịnyị. Ọ jẹ́ nyori, ọ baba nyọka ya ẹla ọnyịịla ọlẹ kọ wẹẹ jẹ́ jaa ahyaahị. Ọ yẹkẹẹ: “Kori ká dayị tata ene á ka ya ẹla ọlẹ ká wẹẹ jẹ́ bala ọ-kpa họ ụkụrwọ ju alugbiyegu nyang, ọ ka waa ẹjẹ gụ ọwọwa ụka kị ka jẹ́.” Ọ kpahị nya egbeju nya ẹla ịlẹ kọ jẹ́ nyị ka kpụ adamwụ anyị ịpyọ, lala ẹla u-uhye nya ọháha. Ọọwa lẹ, ọ da ẹla ịlẹ ká ịBayịbụụ ya u-uhye nya ẹla ịịwa du taa bala ọ-taa wo jaabwọ kị yọọ ịnyịnyị ẹẹ. (1 Kọr. 13:1-13) Ọ ji adamwụ anyị obe ọhọhọ nyọlẹ kị kpọọ nwà bala ọ-kpẹhị rịrọọ. Ọ myịmyị ra ang āhị du kịlaa. Ụka ọlẹ kọ kaka wụla adamwụ anyị yẹ, ọ da ịnamwụ ụbwọ họ ụkụrwọ ịlẹpwa tọọ. Ụka nya ọgbanyẹ-ọgbanyẹ, ọ́ kpụ adamwụ anyị ịpyọ nyọlẹ ká Alice ya ẹla u-uhye nya ang onyeewe ọlẹ kọ wẹẹ jẹ jaa ka.

¹² Ụka ọlẹ ká Alice juwa bala adamwụ anyị ẹ-ẹpwa, ọ kaa kịnyaa juwa wa ịBayịbụụ ẹnụ myị́ ẹnụ. Ọ yẹkẹẹ, “Ọọwa da ịnam ụbwọ nyọka jẹ́ jaabwọ ká ịBayịbụụ baba ham ka ba.” Chajị nyọọwa, ayịda Alice tịtọ nyọka jẹ́ ịBayịbụụ chajị kọ ka jẹ́ ang odudu ọlẹ ká ọnyị nyamwụ yẹda bala ọ-ka ye ẹla ọtịpyọ nya ịBayịbụụ ọlẹ kọ ka yụbwọ chị. Alice myịmyị yẹkẹẹ, “M̀ ya ịBayịbụụ họọ bala ọ-da ụpwụ juwa ẹ-ẹpwụ nyamwụ du kịlọọ ịnyịnyị.” Ịyẹ à tị́ ri ocheju nya ẹla ọọwa? Adamwụ á ye ẹla ọtịpyọ ọhẹ ọlẹ kọ ka yụbwọ chị bwu ịBayịbụụ ka. Ọkọkọ nyọọwa lẹ, ẹla ọlẹ kọ wa bwu ụwa gwoo ọ-ọkịlẹtụ yẹẹyẹẹ.

¹³ Ahị baba nyọka godayị giri-giri bala ọ-ya ẹla lihi-ihi, kori kị juwa tụ́ụhị pyịpyị wẹwẹ. (1 Kọr. 4:12b) Alice ọwa bọhụ yẹẹyẹẹ ẹ-ẹpwụ  nya ọtụpyịpyị bwu ẹga nya ịnamwụ. Ọ yẹkẹẹ, “Ụka ọlẹ kam hu enyi Ohe, ịnam wụrụm nya ‘ọnyị ọtịpyọ.’ ” Ányị Alice à tị́ họ? “Ḿ hwabwọ la o-ya ẹla u-uhye nya ang onyeewe ọlẹ kam wẹẹ jẹ́ ka. M̀ ya ẹla taa lihi-ihi nyori, m̀ cheje nyọka ri Olibeenu nya iJihova lẹ, ḿ tị ka tụ́ ẹta kẹkpẹ kaka. M̀ maga nyọka họ ká ịnam ka jẹ́ nyori ọ hám yẹẹyẹẹ. Ahị angị imimiiye jida. M̀ kpụ ang oriri ọnyịịla-ọnyịịla họọ ịnyịnyị. Bwu ụka ọwẹ kịlahị, ịnam dọmwụ nyọka myị ọnụ nyori ịBayịbụụ nyị wẹẹ yẹm da kaka ri ọngịnyị ọnyịịla lẹ.”

14. Ịyẹ tị́ du kahị ka ya ẹga da ká alugbiyegu nyahị ka pyịịhị giri hi ịgba ọgbagba ha iJihova ẹnẹnẹhẹ ka?

¹⁴ Ụka ka kam chẹẹ ene ká alugbiyegu nyahị ka jẹ́ jaabwọ ká ịgba ọgbagba ha iJihova ju apyobwuna hahị kaka ba. Ọ-chụ pwokwita, ụka ká Alice cheje nyọka ye ịlahị nya ụgbẹyị ọkọkọ nyọka họ ụkụrwọ ọlẹ ká adamwụ bala ịnamwụ tịtọ kọ ka họ lẹ, ịnamwụ myịmyị dọmwụ nyọka jida. Ma, Alice godayị giri-giri. Ọ yẹkẹẹ, “Kori ká ya ẹga da ká alugbiyegu nyang á pyịng giri myị́ ẹ-ẹga nya eje ọchịchị nyang ọhẹ lẹ aalẹ, ị ka maga nyọka họ ịnyị ẹ-ẹga nya ẹla ịkịla ịnyịnyị. Kori ká tị godayị giri-giri bala ọ-jwaa ihi, angịhyẹ nyaa ka ke ụrụ wo ẹla nyang myị́.” Ịnyị ọ la ẹ-ẹga nya Alice lẹ. Adamwụ bala ịnamwụ ri angị ye ịlahị nya ụgbẹyị lẹẹlẹẹ. Adamwụ myịmyị ri ọngọgbahị nya ọjịra-jịra.

15. Jaabwọ ká ụpwụ nya ịMatiyu 5:14-16 bala 1 iPita 2:12 mẹjẹ, ányị “abwẹla ọnyịịla” nya alọjịra-jịra á tị́ ka bwu da alugbiyegu nyahị ụbwọ?

¹⁵ IJihova kaa tụ́ angịnyị ba ịlọmwụ bwula “abwẹla ọnyịịla” nya ala ọjịra-jịra nya Angịnyị nya ịKịrayịsị. (Wa ịMatiyu 5:14-16; 1 iPita 2: 12.) Kori ká ahụ nyang lee ọrụng á ri Alibeenu nya iJihova ka, ọ ta ala ọjịra-jịra nyang ụka ọhẹ lẹ? Pauline ọlẹ kahị ya ẹla chajị nyamwụ lẹẹ ene, wụrụ aanahị alẹng bala anyang ịla ọjịra-jịra wẹ ẹpwa nyamwụ chajị ká ọrụmwụ ka jáa. Wanye ọrụmwụ kpịtịya jaabwọ ká ọọnahị ọhẹ dọọ ụbwọ nyọka jẹ́ jaabwọ ká Alibeenu nya iJihova la. Ọ yẹkẹẹ: “Ọ ye ahyẹẹnụ ookpokpo bwu ụkụrwọ nyamwụ chajị kọ ka jẹ́-ẹ warị kaka yẹ olo balam. Ọọwa dam ụbwọ nyọka yẹ nyori, ọ kaa họ ang ịkịla datị hi ịgba ọgbagba nyamwụ ịnyịnyị.”

16. Ịyẹ tị́ du kahị ka wụrụ alugbiyegu nyahị wẹ ọjịra-jịra?

¹⁶ Ụgbẹyị ọnyịịla ọhẹ ọlẹ kahị ka jẹ́-ẹ bwu da alugbiyegu nyahị ụbwọ ri ọ-ka wụraa wẹ ọjịra-jịra. (1 Kọr. 14:24, 25) Ọjịra-jịra ọhọhẹ ọlẹ ká Wanye ka ri ọ-họ kpa kpịtịya nya igu nya ịKịrayịsị chajị o ji lobyi ụka kọọ tụ́ ku bwu ọlụkụrwọ. Ọjịra-jịra ọọwa á tị kaa tata ka ịnyịnyị. Ọ yẹkẹẹ: “Ḿ wo etu nya ẹla ọlẹ kị ya ụ-ụwa ka, ma m̀ kpịtịya nya angịnyị ịlẹ kám tọ ụ-ụwa. Ị wẹ ẹga nyam kaka dọnụ chịm, yụbwọ ham ọlam-ọlam. M̀ yẹ nyori, ị ri angịnyị ịnyịịla.” Ahụ bala ọrụ ọhẹ kaa yẹjula Pauline yẹẹyẹẹ. Ị kaa dọọ ụbwọ kpẹhị rịrị ọnyị nyamwụ ọọjịra-jịra bala ụka nya ẹrụ ọnyịịla ọ-kpa pyẹ. Lẹ, ụka ọlẹ ká Wayne ọrụ Pauline tịtọ nyọka jẹ́ ang u-uhye nya ịgba ọgbagba nya ahụ nyamwụ gụ ọwọwa, o ya ju ọọnahị ọlẹng ọọwa nyọka jẹ́ ịBayịbụụ balọọ.

17. (a) U-uhye nya ẹlịyẹ ahị tị́ ka kpịlọhị abyị ka? (b) Ịyẹ tị́ du kahị ka hwabwọ la ọ-maga nyọka da alugbiyegu nyahị ụbwọ ẹnẹnẹhẹ ka?

¹⁷ Ọ kaa háahị ká alugbiyegu nyahị wuu ka wẹ ka yẹjulahị gbịgba ha iJihova. Ma, jaabwọ myị́ abwọ kahị maga kaka ba nyọka daa ụbwọ wẹ ka ri anchẹ nya Ohe Oluhye, ị́ ka wẹ ka jẹ́ ẹlịlẹhị ka myị́. Kori kọ lịnyị, áhị ka kpịlọhị abyị u-uhye nya eje ọchịchị nyaa ka. Abwẹbwẹhẹ-ẹ́ ji kahị ka bwu gbịlaa lagbụrụ ka gbịgba ha iJihova ka. A tị yẹhị da abwọlẹ ká abwẹla nyang ka bwu daa ụbwọ myị́ bwee koo, ọgụgụ wuu ụka kị yẹ jaabwọ ká ịgba ọgbagba ha iJihova ya ọkẹkẹnị hang. Raabwọ chajị nyaa. Kpa ijẹẹhị ya ẹla taa. A hwabwọ la ọ-maga nyọka daa ụbwọ ẹnẹnẹhẹ ka! (Ụkụr. 20:20) La ahị ọdahile nyori iJihova ka wahị kụrụ aga ọmama nyang. Kori ká alugbiyegu nyang á tị myị ke ụrụ wo ẹla nyang lẹ aalẹ, ị ka la ọchịda!