1. Owo anyị à tị ya ọjịra-jịra yeji i-iFilipayị?

ỤKA ọlẹ ká ịPọlụ, ịSayịlasị, iLuku, bala iTimoti pwụ epweji nya ala iFilipayị ọlẹ kọ juwa e-ekpeleji nya eji ọkpakpa nya ala iRom, ị yẹ jaabwọ ká ẹla nya Ohe Oluhye kpa alụwa ịpyọ lụmẹ kaka ba. Aanahị alẹng angị ine ịwẹ ya ọjịra-jịra yeji ụ-ụwa. Ọọwa lẹ, angị inyeewe ịịwa à dọmwụ nyọka tọ awụlẹ, ọhẹka ẹ-ẹpwa nya ọlọnahị ọtụka ọlẹ kọ ri iLidiya lẹlẹ.—Ụkụr. 16:40.

2. Akama oyina à tị chị ọjịra-jịra onyeewe ọwẹ ọgụ?

² Akama chị ọjịra-jịra onyeewe ọwẹ ọgụ ahyaahị. Olegu Onyobyi kpa angịlẹ ká ẹla nya ịlẹhị ọwẹ waa ẹjẹ tụ ẹrụ ọnyịịla ọ-kpa pyẹ nya ịPọlụ bala alogu-ẹdịyẹ nyamwụ pyịpyị. Ị wu ịPọlụ bala ịSayịlasị, nyaa enyiri bala ọ-yaa ju agba. Nyọlẹ kị gbaa kpehe bwu ube nya agba kpá, ị ju angịjụgbẹyị inyeewe ịwẹ ụga bala ọ-jwaa ọhụ. Ọọwa lẹ, ịPọlụ, ịSayịlasị bala iTimoti à rụ bwu epweji ọwẹ lẹlẹ. Ma, ọhẹka iLuku ọọwa tị hi ụ-ụwa. Ányị ala ọjịra-jịra onyeewe ọwẹ à tị ka họ lẹẹlẹẹ? Bwula ụbwọ ọdada nya olegu ịgọgọ nya iJihova, ị kịnyaa juwa gbịgba ha iJihova la ila ọchịchị. (Filip. 2:12) Ọọwa du ká ịPọlụ chị ọkẹkẹnị nya ịlẹhị-ịlẹhị.

3. Ẹlịyẹ ịPọlụ à tị́ raabwọ chajị nyamwụ ụ-ụpwụ nya Ala iFilipayị 1:9-11?

³ Nyọlẹ ká ẹka iwo chịpwụrụ kpá, ịPọlụ da ụpwụ du kịla ọjịra-jịra ọla iFilipayị. Kori ká wa ụpwụ ọwẹ, à ka yẹ ụma nya ọháha ọlẹ ká ịPọlụ la ha ala iFilipayị. Ọ da yẹkẹẹ: ‘Ọháha ọgẹnẹ-ọgẹnẹ nya ịKịrayịsị iJisọsị m kaa kpa wu iwoo nyanụ ụka wuu lẹ.’ (Filip. 1:8) Ọ da ụpwụ du taa nyori ọwa nyị kaa raabwọ chajị nyaa. Ọ myịmyị bịlẹ iJihova kọ ka daa ụbwọ kpa ọháha nyaa nwà kịlahị-ịlahị, chụ ang ịlẹ kị chịla-chịla gụgụ wuu, la charị-charị, ọ-ka chị angịkịla mileji ka, bala ọ-ka kịnyaa juwa nwụ́ ugbe nya abwẹla ọnyịịla. Ịlẹhị, à ka myị nyori, ahị ka jẹ́-ẹ ye apyobwuna bwu omyi ẹla nya ịPọlụ ọwẹ. Lẹ, ahị wa ụpwụ ọlẹ  ká ịPọlụ da du kịla ala iFilipayị wẹẹ (Wa Ala iFilipayị 1:9-11.) Ahị ka kụ ẹhị yẹ ang ịlẹ kọ gu ẹnyị wẹ, bala abwọlẹ ahị ka bwu kpa họ ụkụrwọ.

4. (a) Jaabwọ ká ụpwụ nya 1 ịJọn 4:9, 10 ya, ányị iJihova à tị́ mẹ ọháha nyamwụ jẹ ẹ-ẹga nyahị? (b) Ányị ahị tị́ ka la ọháha ha Ohe Oluhye kaka ba?

⁴ IJihova mẹ ọháha ọtụka nyamwụ jẹ ẹ-ẹga nyahị bwula ọ-ya Ọnyị nyamwụ du wẹ odehe ka gbu chajị nyahị. (Wa 1 ịJọn 4:9, 10.) Ọháha ọlẹ ká Ohe Oluhye la ẹ-ẹga nyahị guhi gbịla nyọka la ọháha họọ. (Rom. 5:8) Ányị ahị tị́ ka la ọháha ha Ohe Oluhye kaka ba? IJisọsị wẹ ịtọ ẹla ọwẹ, ụka kọ byi ọla ịFarịsii ọhẹ yẹkẹẹ, “[IJihova] Ohe Oluhye nyang ka háng nya ịlẹhị-ịlẹhị bwu ẹpwụ nya ọkịlẹtụ nyang wuu, bwu ẹpwụ nya ugbodu okpukpuru nyang wuu bala ọ-bwu ẹpwụ nya irya omeme nyang wuu.” (Mat. 22:36, 37) Áhị tịtọ ká ọháha nyahị ẹ-ẹga nya Ohe Oluhye ka ri ọlahị imiiye ka. Ọkọkọ nyọọwa, ahị tịtọ ká ọháha nyahị ẹ-ẹga nyamwụ ka la ọngịrị gụ ọwọwa ẹnụ myị́ ẹnụ. ỊPọlụ byi ala iFilipayị nyori, ọháha nyaa nyị “nwa . . . ka ịlahị-ịlahị.” Ịyẹ ahị tị́ ka họ nyọka ju ọháha nyahị ẹ-ẹga nya Ohe Oluhye ọngịrị?

5. Ányị ọháha nyahị à tị́ ka bwu la ọngịrị gụ ọwọwa?

⁵ Ahị baba nyọka jẹ́ Ohe Oluhye ene kahị ka jẹ́-ẹ la ọháha họọ. ỊBayịbụụ yẹkẹẹ: “Ọng myị́ ọng ọlẹ kọ la ọháha . . . kaka lẹ aalẹ, ọngọọwa á jẹ́ ọngọlẹ ká Ohe Oluhye ri kpong-kpong ka. Chajị, ọháha ọlala nya ịlẹhị kpangga, Ohe Oluhye a ri lẹ.” (1 Jọn. 4:8) ỊPọlụ ọngọmyẹrụ ya nyori ọháha nyahị ẹ-ẹga nya iJihova nyị ka la ọngịrị gụ ọwọwa jaabwọ kahị wẹẹ ‘la ẹla ọjẹ́jẹ bala ọngịrị ọ-kpa gu ẹla ene hi awụlẹ datị nyamwụ.’ (Filip. 1:9) Ụka ọlẹ kahị dọmwụ nyọka jẹ́ ịBayịbụụ nya ọgbanyẹ, iJihova háahị nanana nyori áhị jẹ́ abwụma nyamwụ lụmẹ lẹ ka. Ọọwa lẹ, ọháha nyahị ẹ-ẹga nya iJihova à nwà kịlahị-ịlahị jaabwọ kahị wẹẹ jẹ́ ang chajị nyamwụ gụ ọwọwa ẹẹ. Ang odudu kọ baba nyọka jẹ́ ịBayịbụụ bala ọ-kụ irya ju ẹla ọlẹ kahị wẹẹ wa kpori-kpori à wẹ lẹ.—Filip. 2:16.

6. Jaabwọ ká ụpwụ nya 1 ịJọn 4:11, 20, 21 ya, ụgbẹyị oyina ahị tị́ ka bwu nwà kịlahị-ịlahị ẹ-ẹpwụ nya ọháha?

⁶ Ọháha ọtụka ọlẹ ká Ohe Oluhye la u-uhye nyahị, ka guhi gbịla nyọka mẹ ọháha jẹ ẹ-ẹga nya aanahị. (Wa 1 ịJọn 4:11, 20, 21.) Ọhẹka, ahị ka kụ irya nyori, ọ ka chịkpẹẹ nyọka la ọháha ẹ-ẹga nya aanahị, chajị ahị wuu kaa gbịgba ha iJihova bala ọ-tịtọ nyọka ba ọgụ-ẹpẹtẹ nyamwụ jẹ. Ahị kaa ba ọgụ-ẹpẹtẹ nya iJisọsị jẹ, ọngọlẹ kọ chajị nya ọháha ya ọhịhị nyamwụ kịla iya chajị nyahị. Ma, ụka ọhẹ ọ kaa lahị ujwo nyọka ju ihi nya ehile nyọka la ọháha ẹ-ẹga nya awụlẹ. Ahị kụ ẹhị yẹ ọ-chụ pwokwịta ọhẹ ọọjịra-jịra nya ala iFilipayị wẹẹ.

7. Ẹlịyẹ ahị tị́ ka jẹ́ bwu ẹla ọlẹ ká ịPọlụ byi Iyodiya bala iSintike?

⁷ Iyodiya bala iSintike “ri angị kaa rịrị chii” juwa họ ụkụrwọ la ila ọchịchị bala ịPọlụ. Ma, ọhẹka ị mwọ ẹla, du kị ri aligu kaka. Ẹ-ẹpwụ nya ụpwụ ọlẹ ká ịPọlụ da du ta ọjịra-jịra ọlẹ ká anyang imiiye ịwẹ ji, ọ wụrụ ẹnyị nya Iyodiya bala iSintike kpangga bala o-jwaa ọhụ nyọka “myị ju awụlẹ” lee ọ-yẹjula awụlẹ. (Filip. 4:2, 3) ỊPọlụ me irya nyori ọ baba nyọka ya ẹla ju alọjịra-jịra wuu. Ọ da ụpwụ du taa yẹkẹẹ, “Anụ myị kanụ juwa họ ịngịngịhyẹ nyanụ ẹ-ẹpwụ nya ẹla ọ-mwọ ya lee ịwẹẹ ọdada ọhẹ-lọhe kpong-kpong ka.” (Filip. 2:14) Nyịlẹhị-ịlẹhị, ụbwọ ọ-gbile ụrụ nya ịPọlụ ọwẹ á da Iyodiya bala iSintike ụbwọ kem ka, ma ọ da alọjịra-jịra ọla iFilipayị wuu ụbwọ nyọka ju ọháha nyaa ọngịrị ẹ-ẹga nya awụlẹ.

8. (a) Ịyẹ tị́ du kọọ lujwo ụka ọhẹ nyọka mẹ ọháha jẹ ẹ-ẹga nya aanahị? (b) Ịyẹ à tị́ ka jẹ́-ẹ dahị ụbwọ?

⁸ Lala Iyodiya bala iSintike, ọ kaa lujwo hahị nyọka mẹ ọháha jẹ ẹ-ẹga nya aanahị ụka ọhẹ,  chajị ahị ya irya nyahị nịrọ a-ang ọtịpyọ ọlẹ kị kaa họ kem. Ahị wuu kaa họ ẹla ọlẹ kọ chịla ka ẹnụ myị́ ẹnụ. Kori kahị ya irya nyahị nịrọ a-ang ọtịpyọ ọlẹ ká aanahị kaa họ kem, ọháha nyahị ẹ-ẹga nyaa ka nyiri dẹyị-dẹyị. Lala ọ-chụ pwokwita, kori ká ọọnahị ọhẹ á deeri nyọka dahị ụbwọ kpa Ube nya Ịpyị-Adịrahụ cheri-cheri, ahị ka wẹẹjẹ tọọ myị́. Kori kahị dọmwụ nyọka kụ irya u-uhye nya ang ịkịla ịlẹ ká ọọnahị ọwẹ kaa họ tịpyọ wuu, ahị ka juwa wẹẹjẹ tọọ gụ ọwọwa. Ọọwa lẹ, ọháha nyahị ẹ-ẹga nyamwụ à ka juwa nyiri lẹlẹ. Kori kahị yẹ ịlọhị iiwe-ahụrụ ọlịịwẹ, ọ baba kahị ka kpịtịya nya ẹla ọlẹ: IJihova kaa yẹ ang ịtịpyọ ịlẹ kahị kaa họ, tụ́ ang ịtịpyọ ịlẹ ká aanahị kaa họ. Ma, nanana nyori ahị kaa họ ang ịtịpyọ, ọ la ọháha u-uhye nyahị bala aanahị. Chajị nya ọọwa lẹ, ọ baba kahị ka gbịla iJihova bwula ọ-yẹhị nyahị rịrị a-abwẹla ịnyịịla nya aanahị. Kori kahị họ ụkụrwọ yẹẹyẹẹ nyọka mẹ ọháha jẹ ẹ-ẹga nya aanahị, ahị kaa yẹjula awụlẹ gụ ọwọwa.—Filip. 2:1, 2.

9. Ịyẹ à tị́ ri ang ịhyẹ ịlẹ kị “chịla-chịla gụgụ wuu” ká ịPọlụ ya ẹla rụ́ ụ-ụpwụ ọlẹ kọ da du ta ala iFilipayị?

⁹ Ohe Oluhye kpa ịPọlụ byi Angịnyị nya ịKịrayịsị ịla iFilipayị nyị ‘chụ ang ịlẹ kị chịla-chịla gụgụ wuu.’ Ahị ịnyịnyị baba nyọka họ ịnyị alẹ. (Filip. 1:10) Ang ịlẹ kị chịla-chịla ịhyẹ ri ọ-ka họ ká ẹnyị nya iJihova ka la cheri-cheri, irya nyamwụ ọ-ka họ jịra, okpunyi bala ọ-yẹjula awụlẹ ọla ọjịra-jịra. (Mat. 6:9, 10; Jọn. 13:35) Kori ká ang ịwẹ á ri ang ịbaba gụgụ wuu ọ-ọhịhị nyahị lẹ aalẹ, ahị mẹjẹ nyori iJihova háahị lẹ.

10. Ányị ahị tị́ ka họ chajị ká iJihova ka yẹhị lala angị la charị-charị?

¹⁰ ỊPọlụ ya myịmyị nyori ahị nyị ka “la charị-charị.” Ọọwa á ri yẹkẹẹ, ahị ka la kpẹẹkpẹẹ ka. Áhị ka jẹ́-ẹ la charị-charị ụ-ụgbẹyị ọlẹ ká iJihova la charị-charị ka. Ma iJihova ka yẹhị lala angị la charị-charị kori kahị maga nyịlẹhị-ịlẹhị nyọka la ọháha okpori-kpori bala ọ-chụ ang ịlẹ kị chịla-chịla gụgụ wuu. Ụgbẹyị ọhẹ ọlẹ kahị ka jẹ́-ẹ mẹ ọháha jẹ ri ọ-ka maga kahị ka chị angịkịla mileji ka.

11. Ịyẹ tị́ du kọ baba lụmẹ nyọka chị angịkịla mileji ka?

¹¹ Ụbwọ o-gbile ụrụ nyọka la abyị lee ọ-chị angịkịla mileji ka á ri ẹla nya ayịlọ ka. Ányị ahị tị́ ka bwu chị angịkịla mileji myị́? Ahị ka họ ịnyị bwula ụya ọyaya ọlẹ kahị kaa chụ, ang ọkụrụ-kụrụ nyahị, lee ụkụrwọ nyahị. Ọhẹka ang ọlẹ kahị chụ nyọka họ á ka tịpyọ ka myị́. Ma, kori ká ang ọọwa á tị há irya oleje nya ọngọkịla ka, kọ chị mileji aalẹ, ọ tịpyọ. IJisọsị ya nyori nyị ka hiigu hahị gụ nyọka ya ẹjwọ ọtụka-ọtụka ju ori dahị o-omyi, húuhi ju ka ẹpwụ nya ihu, gụ ọ-ka chị ọkpịlọ nyamwụ ookpokpo mileji!—Mat. 18:6.

12. Ẹlịyẹ ahị tị́ ka jẹ́ bwu ọgụ-ẹpẹtẹ nya ahụ bala ọrụ ị-ye ịlahị nya ụgbẹyị ịwẹ?

¹² Ányị aanahị ahụ bala ọrụ i-ye ịlahị nya ụgbẹyị ịhyẹ à tị́ kpa omyi ẹla nya iJisọsị ọwẹ họ ụkụrwọ? Ị juwa ọọjịra-jịra ookpokpo bala ahụ bala ọrụ ọhẹ kị hu enyi Ohe kpanjẹ, kị tị bwu ugbiyegu ọlẹ kị kaa ya iwe da haa nyọka họ ang lụmẹ-lụmẹ ka. Ahụ bala ọrụ ịlẹ kị hu enyi Ohe wẹ me irya nyori nyị́ há ká Ọngịnyị nya ịKịrayịsị nyị ka ka ẹga ọ-yẹ ifim ka, kori kọ dọmwụ ri ifim o-pwoku kị yẹ ụ-ụwa wẹwẹ. Ị wụ ẹjẹ nyọlẹ kị wẹ ka jẹ́ nyori ahụ bala ọrụ ị-ye ịlahị nya ụgbẹyị ịwẹ nyị ka ẹga ọọwa ka yẹ ifim ọhẹ. Nyọlẹ ká ẹla ọwẹ họ kpá, aanahị ahụ bala ọrụ ị-ye ịlahị nya ụgbẹyị ịwẹ cheje nyọka ba la ọ-ka ẹga ọ-yẹ ifim gbee ká ahụ bala ọrụ inyeewe ịwẹ ka jẹ́-ẹ mẹ ang jẹ irya oleje nyaa nyọka jẹ́ ang ọtịpyọ bala ang ọnyịịla datị hi awụlẹ yẹẹyẹẹ. (Hib. 5:14) Ụ-ụgbẹyị ọwẹ, aanahị ahụ bala ọrụ i-ye ịlahị nya ụgbẹyị ịwẹ mẹjẹ nyori ị la ọháha ẹ-ẹga nya ahụ bala ọrụ inyeewe  ịwẹ, ẹ-ẹpwụ nya ẹla ọyaya nyaa kem ka, ma bwula abwẹla nyaa ịnyịnyị.—Rom. 14:19-21; 1 Jọn. 3:18.

13. Ányị ahị tị́ ka họ du ká ọngọkịla ka họ ọhọbịrị myị́?

¹³ Ụgbẹyị ọkịla ọlẹ kahị ka bwu chị ọngọkịla mileji ri ọ-ka họ ká ọngọọwa ka họ ọhọbịrị. Ányị ahị tị́ ka bwu họ ịnyị myị́? Kụ irya ịlẹ wẹẹ. Ọngọlẹ kahị kaa jẹ́ ịBayịbụụ ta ọhẹ ri ọngọ kaa nwụ ere kpere ene-ene. Ọ maga nya ịlẹhị-ịlẹhị gbee ene kọ jẹ́-ẹ hwabwọ. Ịnyịnyị, ọ wẹ ka jẹ́ nyori ọ baba nyọka hwabwọ la ọ-nwa ere gbanggbang. Ọ ya ọhịhị nyamwụ da yẹẹyẹẹ, ọọwa lẹ, ọ hu enyi Ohe ẹẹ. Nyọlẹ kọ nọ chẹẹ, ọọnahị ọlẹng ọhẹ diroo ẹpwa wẹ ẹpwa nyamwụ. Ọọwa lẹ, ọ hu ere ọnyọọngịrị họọ nyị nwa mẹ lẹlẹ. Ọ juwa byoo yẹkẹẹ, “À ri ọngịnyị nya Ohe lẹẹlẹẹ lẹ; olegu ịgọgọ nya iJihova tị juwa balang. Ugbe nya olegu ịgọgọ ọhẹ ri ịlọng o-wu kpa. Kori ká jụ ịlọng wu kpa lẹ aalẹ, à ka jẹ́-ẹ nwa ere ọnyọọngịrị meme labwọ lẹ.” Ọ ka tịpyọ lụmẹ kaka kpoye kori ká ọọnahị onyeewe ọwẹ á ke ụrụ wo ẹla ọmẹjẹ ọtịpyọ ọwẹ kọ chị abwọ kpa ẹpwụ nya ere ọ-nwa ka kpoye myịmyị!

14. Ányị ọjịra-jịra nya Angịnyị nya ỊKịrayịsị à tị́ kaa bwu dahị ụbwọ nyọka kpa ẹla ọlụpwụ nya Ala iFilipayị 1:10 họ ụkụrwọ?

¹⁴ Ọjịra-jịra nya Angịnyị nya ịKịrayịsị kaa dahị ụbwọ nyọka kpa ẹla ọlẹpwụ nya ụpwụ nya Ala iFilipayị 1:10 họ ụkụrwọ a-agbẹyị lụmẹ-lụmẹ. Họhẹ-họhẹ, ang ịlẹ kahị kaa jẹ́ ọọjịra-jịra kaa kpụhị ịtịya nya ang ịlẹ kị baba gụgụ wuu a-ahị nya iJihova. Oheeye, ahị kaa jẹ́ ang u-uhye nya abwọlẹ kahị ka bwu kpa ẹla ọlẹ kahị wẹẹ jẹ́ họ ụkụrwọ, chajị kahị  ka la charị-charị. Ọhata, ahị kaa ye ọhụ ojuju nyọka ‘la ọháha ẹ-ẹga nya awụlẹ bala ọ-ka họ ụkụrwọ ọnyịịla.’ (Hib. 10:24, 25) Ụka myị́ ụka kahị juwa ye ọhụ ojuju bwu ẹga nya aanahị, ịnyịnyị ọháha nyahị ẹ-ẹga nya Ohe Oluhye bala aanahị à kaa la ọngịrị gụ ọwọwa lẹ. Ụka kahị la ọháha ha iJihova bala aanahị bwu ẹpwụ nya ọkịlẹtụ, ahị ka maga nya ịlẹhị-ịlẹhị nyọka chị aanahị mileji ka.

15. Ịyẹ à tị́ ri etu nyọka “juwa nwụ́ ugbe nya abwẹla ọnyịịla”?

¹⁵ ỊPọlụ raabwọ nya ịlẹhị-ịlẹhị ká ala iFilipayị ka kịnyaa “juwa nwụ́ ugbe nya abwẹla ọnyịịla.” (Filip. 1:11) “Ugbe nya abwẹla ọnyịịla” ịhyẹ ri ọ-ka la ọháha ẹ-ẹga nya iJihova bala angịnyị nyamwụ. Ịnyịnyị, o ri ọ-ka ya ẹla u-uhye nya ọmyịmyị nyahị ẹ-ẹga nya iJisọsị dodehe ju angịkịla bala ẹhị ọrịrịị-rịrị nyahị. Ụpwụ nya Ala iFilipayị 2:15 ya ahị nyị ka “wuru lala ahịgboo ha alodehe.” Omyi ẹla ọwẹ kpụhị ịtịya nya ụka ọlẹ ká iJisọsị wụrụ angịjụgbẹyị nyamwụ nya “otinika o-hu ahịgboo ha ọhịhị nya alodehe.” (Mat. 5:14-16) Ọ myịmyị byi angịjụgbẹyị nyamwụ nyị ‘họ ká angịnyị nyị wẹ ka ri angịjụgbẹyị’ nyọwa. Ọ myịmyị byaa yẹkẹẹ: “Anụ ka ri alibeenu nyam . . . ka ọbaba nya odehe ọlẹ wuu.” (Mat. 28:18-20; Ụkụr. 1:8) Lẹ, ahị kaa nwụ́ “ugbe nya abwẹla ọnyịịla” ụka kahị kpa ọngịrị nyahị wuu họ ụkụrwọ ọwẹ, kọ ju apyobwuna gụgụ wuu.

16. Ányị ụpwụ nya Ala iFilipayị 1:12-14 à tị́ mẹjẹ nyori ahị ka jẹ́-ẹ hụ́ lala ahịgboo ẹ-ẹpwụ nya iwe ahụrụ olujwo? (Yẹ ifoto ọla ẹbẹ nya ọgbanye.)

¹⁶ Ẹ-ẹpwụ nya iwe-ahụrụ ọnyị myị́ ọnyị kahị ji, ahị ka jẹ́-ẹ hụ́ lala ahịgboo. Ụka ọhẹ, ang ịlẹ kị ka wuhi kpa myị́ la ọ-kpa ẹrụ ọnyịịla pyẹ, ka ya iwe hahị gụ ọọwa nyọka ya ẹrụ ọnyịịla. Ọ-chụ pwokwita, ị wụ ịPọlụ ju ube i-iRom ụka kọ da ileta ta ala iFilipayị. Nanana nyori ị woo  ju agba, ọọwa á woo kpa la ọ-ya ẹrụ ọnyịịla ju alịdanggeri ịlẹ kị wẹẹ gboo bala angịlẹ kị jwoo ụga ka. ỊPọlụ ya ẹrụ ọnyịịla la ila ọchịchị ẹ-ẹpwụ nya iwe-ahụrụ ọwẹ, ọọwa tị du ká aanamwụ la ahị ọdahile bala ugbodu ojuju nyọka ‘ya ẹrụ ọnyịịla nya Ohe Oluhye pyẹ la uhi ojuju ka.’—Wa Ala iFilipayị 1:12-14; 4:22.

17. Ányị aanahị ịhyẹ loyi nyahị ọlẹ à tị́ bwu kịnyaa juwa nwụ́ ugbe ẹ-ẹpwụ nya iwe-ahụrụ olujwo?

¹⁷ Aanahị lụmẹ-lụmẹ kaa mẹ ugbodu ojuju jẹ lala ịPọlụ. Ị juwa ẹ-ẹpwụma ịlẹ kị ka jẹ́-ẹ ya ẹla nya Ohe ẹ-ẹpwụ nya alụma lee o-bwu ẹpwa ka ẹpwa ka. Lẹ, ị kaa kpa agbẹyị ịkịla ya ẹrụ ọnyịịla. (Mat. 10:16-20) Ẹ-ẹpwụma ọhẹ ọlịnyị, ọngọ kpẹhị rịrị isekut ọhẹ byi aanahị nyori, ọngọngọọngụ nyaa nyị maga nyọka ya ẹrụ ọnyịịla ju alugbiyegu nyamwụ, aloye ẹpwa nyamwụ, alube-ụpwụ nyamwụ, alụkụrwọ nyamwụ, bala angịlẹ kọ jẹ́. Ẹ-ẹpwụ nya ẹka imiiye, ọjịra-jịra ịlẹpwụ nya isekut ọwẹ nwà nya ịlẹhị-ịlẹhị. Ọhẹka, ahị la iwe nyọka ya ẹla nya Ohe jaabwọ kọ háahị ẹ-ẹpwụma ọlẹ kahị ji. Ma, ahị ka jẹ́-ẹ jẹ́ ẹla o-ju apyobwuna ọhẹ bwu ẹga nya aanahị ịwẹ. Mwahị nya agbẹyị ịlẹ ká ka jẹ́-ẹ bwu kpa ọngịrị nyang wuu ya ẹrụ ọnyịịla dodehe, la ahị ọdahile nyori iJihova ka ya ọngịrị hang nyọka kịnyaa juwa ya ẹrụ ọnyịịla ụka kọ dọmwụ lujwo hang nyọka họ ịnyị.—Filip. 2:13.

18. Ẹlịyẹ à tị́ ka ri eje ọchịchị nyahị?

¹⁸ Ụka ọlẹ kahị ji lẹẹ kpangga à baba kahị ka cheje nyọka kpa ẹla ọmẹjẹ ọlẹpwụ nya ụpwụ ọlẹ ká ịPọlụ da du ta ala iFilipayị họ ụkụrwọ lẹ. Ahị baba nyọka chụ ang ọlẹ kọ chịla-chịla gụgụ wuu, la charị-charị, maga nyọka chị angịkịla mileji ka, bala ọ-nwụ́ egbe nya abwẹla ọnyịịla. Kori kahị họ ịnyị aalẹ, ọháha nyahị ka nwà kịlahị-ịlahị bala ọ-kpa ogbo wẹ ẹga nya iJihova, Adịda nya ọháha.