1-3. Ịyẹ tị́ du ká iwe-ahụrụ nya angịlẹ kị kaa kpa ụka nyaa wuu họ ụkụrwọ ha iJihova kaa yẹda ụka ọhẹ?

ỌỌNAHỊ Robert bala Mary Jo yẹkẹẹ, “Ụka ọlẹ kahị họ ẹka iwo imiiye kụrụ okpokpo (21) kpá ẹ-ẹpwụ nya ụkụrwọ nya ọ-kpa ẹrụ ọnyịịla pyẹ ka ẹpwụma ịkịla, adahị bala ịnahị ahị angị imimiiye dọmwụ nyọka jụ́ ẹdụrụ. Ịlẹhị lẹ, ahị chị ọkẹkẹnị nyọka kpẹhị rịraa. Ma, ọkịlẹtụ kpụhị enyi nyọka rụ bwu ẹga ọlẹ kọ kpụhị ịpyọ yẹẹyẹẹ.”

² William bala Terrie tị yẹkẹẹ, “Ahị jida ụka ọlẹ kahị jẹ́ nyori áhị ka jẹ́-ẹ tịrẹkpẹ ka ụkụrwọ nyahị myịmyị kaka ọọlajị nya ịnyịrọ ọla ogogo nwà ka. Ahị ọdahile nyahị nyọka họ ụkụrwọ nya iJihova ẹ-ẹpwụma ọkịla á chịkpẹẹ myị́ kaka.”

³ Aleksey ọwa yẹkẹẹ, “Ahị jẹ́ nyori, angị tụ́ụhị pyịpyị wẹẹ tịtọ nyọka tụ́ egbeju-ẹpwa ọlẹ kahị kaa họ ụkụrwọ ku. Ma, ụka ọlẹ kị họ ịnyị kahị rụ bwu ụwa lẹ, ejiri wuhi nyịlẹhị-ịlẹhị.”

4. Ịtọ ẹla iyina ahị tị́ ka kụ́ ẹhị yẹ a-ang ọjẹ́jẹ ọlẹ?

⁴ Myị́myị́, ị kaa ya aanahị ịhyẹ ịlẹ kị kaa kpa ụka nyaa wuu họ ụkụrwọ ha iJihova, tụ́ angịlẹ kị juwa ị-ịBẹtẹlụ du ka ẹga ọkịla ụka ọhẹ ịnyịnyị. * Ọ kaa lujwo nyịlẹhị-ịlẹhị ha aanahị ilikẹjẹ nyahị ịwẹ nyọka tụụbwọ hi ụkụrwọ ọlẹ kọ kpaa ịpyọ yẹẹyẹẹ ene lẹ. Ịyẹ à tị́ ka jẹ́-ẹ daa ụbwọ bọhụ ẹ-ẹpwụ nya ọyẹda ọlịịwẹ? Ányị a tị́ ka bwu daa ụbwọ myị́? Ọwẹwẹ nya ịtọ ẹla ịwẹ ka jẹ́-ẹ dahị wuu ụbwọ nyọka bọhụ ụka ká iwe-ahụrụ nyahị á yẹda ịnyịnyị.

5. Ẹlịyẹ ụkụrwọ nyahị ọyẹda à tị́ ka họ ẹ-ẹga nyahị myị́?

⁵ Kori ká ụkụrwọ nyahị á ri ọ-kpa ẹrụ ọnyịịla pyẹ ẹ-ẹga ọkịla lee ahị juwa ị-ịBẹtẹlụ wẹwẹ, ẹga ọlẹ kahị ji lee angịnyị ịlụwa ka háahị yẹẹyẹẹ myị́. Lẹ, ọ chịkpẹẹ ká ọkịlẹtụ ka kpụhị enyi kori kị yahị du ka ẹga ọkịla. Iwoo nya aanahị ịlụwa ka wuhi lee ahị ka juwa chị uko chajị nyaa myị́, ọgụgụ wuu kori kahị rụ bwu ẹga ọọwa ọọlajị nya ọtụpyịpyị. (Mat. 10:23; 2 Kọr. 11:28, 29) Myịmyị, ọ kaa lujwo yẹẹyẹẹ nyọka rụ ka ẹga onyeewe chajị ọhọhọ ọlụwa ka datị hi ọlẹ kahị jẹ́ ene-ene. Ọ ka lahị ịnyị myị́ kori kahị dọmwụ tịrẹkpẹ ka ẹga ọlẹ kahị bwu ene-ene. Robert bala Mary Jo yẹkẹẹ: “Ịhọhọ nya alịnyahị bala ọ-kpa ẹrụ ọnyịịla pyẹ la oja nyahị rihi onyeewe-onyeewe. Ahị lịlọhị lala angga ẹ-ẹpwụma nyịlọhị chajị nyọlẹ kahị juwa ẹ-ẹga ọkịla tata lẹ.” Aanahị ịhyẹ ịlẹ ká ụkụrwọ nyaa yẹda ka la akama ẹ-ẹga nya ẹla nya okpoko myị́ ịnyịnyị. Ị ka chị uko, juhi lee ọ-la ọkịlẹtụ ọ-kpụ enyi myị́. Ịyẹ tị́ ka daa ụbwọ?

6. Ányị ahị tị́ ka bwu kịnyaa juwa tụ́ ju iJihova chwẹẹ?

⁶ Kịnyaa juwa tụ́ ju iJihova chwẹẹ. (Jem. 4:⁠8) Ányị ahị tị́ ka bwu họ ịnyị? Bwula ọ-dahịhilọọ nya ọngọ “kaa wo abwọ ọrịrị nyahị.” (Eje. 65:⁠2) Ụpwụ nya Eje Ọnyịịla 62:8 yẹkẹẹ, ‘Anụ ya akama nyanụ wuu joo.’ IJihova ka jẹ́-ẹ ‘họ ang hahị gụ abwọlẹ kahị kaa bịlọọ . . . lee ọ-họ gụ abwọlẹ kahị kaa me irya ẹ-ẹpwụ nyahị kaka ba.” (Efe. 3:20) Ọ́ kaa họ ang hahị ba ọ-ọlẹ kahị bịlọọ ẹ-ẹpwụ nya abwọ ọrịrị kem ka. IJihova ka gbahị kpehe bwu ẹpwụ nya akama myị́, ụ-ụgbẹyị ọlẹ kahị dọmwụ yahị me lee ọ-kụ irya kpongkpong ka.

7. (a) Ịyẹ à tị́ ka dahị ụbwọ nyọka kịnyaa juwa tụ́ ju iJihova chwẹẹ? (b) Jaabwọ ká ụpwụ nya Ala iHiburu 6:10-12 mẹjẹ, apyobwuna oyina ahị tị́ ka ye kori kahị tụ ẹta kẹkpẹ ẹ-ẹpwụ nya ịgba ọgbagba nya iJihova ka?

⁷ Wa Ụpwụ Ịgọgọ ẹnụ myị́ ẹnụ bala ọ-kụ irya jwoo kpori-kpori chajị nyọka kịnyaa juwa tụ́ ju iJihova chwẹẹ. Ọọnahị ọhẹ ọlẹ kọ kaa kpa ẹrụ ọnyịịla pyẹ ẹ-ẹpwụma ọkịla ene-ene yẹkẹẹ: “Kịnyaa juwa jẹ́ ang nya ugbiyegu nyang bala ọ-nwụlanọ nya ọjịra-jịra ụka myị́ ụka, jaabwọ á kaa họ ụka ọlẹ ká juwa ụkụrwọ nyang olene-ene.” Myịmyị kịnyaa juwa kpa ẹrụ ọnyịịla pyẹ jaabwọ á ka jụ họ myị́ kaka ba, ọọjịra-jịra nyang onyeewe. IJihova kpịtịya nya angịlẹ wuu kị tụ ẹta kẹkpẹ ẹ-ẹpwụ nya ịgba ọgbagba nyamwụ ka, kori kị dọmwụ jụ họ jaabwọ kị kaa họ ene-ene kaka wẹwẹ.—⁠Wa Ala iHiburu 6:10-12.

8. Ányị ẹla ọlụpwụ nya 1 ịJọn 2:15-17, à tị́ ka bwu dang ụbwọ nyọka hu ọhịhị nyang hukee?

 ⁸ Hu ọhịhị nyang hukee. A ya ẹga da ká olo nya ịmahị omeme u-uhye nya odehe nya Olegu Onyobyi ọlẹ a hung abwọ hi ịgba ọgbagba ha iJihova ka. (Mat. 13:22) A ke ụrụ wo ẹla nya angịlẹ kị kaa gbịgba ha iJihova ka lẹ ka, lee aligu bala alugbiyegu nyang ịlẹ kị ka jung ọhụ nyọka ku okpoko ka. (Wa 1 ịJọn 2:15-17.) Dahịhile iJihova, ọngọlẹ kọ myị ọnụ nyọka họ ịbaba nyahị wuu hahị ẹ-ẹga nya ang nya olegu, irya omeme bala ang nya ugbinyịrọ, ‘lụka ọlẹ kọ baba.’—⁠Hib. 4:16; 13:5, 6.

9. Ịyẹ tị́ du kọ baba nyọka cheji ba hi uri ọkpakpa, jaabwọ ká ụpwụ nya Etu 22:3, 7 mẹjẹ? (b) Ịyẹ tị́ ka dahị ụbwọ nyọka cheje ọnyịịla?

⁹ Cheji ba hi uri ọkpakpa. (Wa Etu 22:3, 7.) Ọ-mwụ rụ ka ẹga ọkịla kaa bịrị ọngịnyị okpoko yẹẹyẹẹ ụka ọhẹ, lẹ ọ chịkpẹẹ nyọka kpa uri ụka ọlịnyị myị́. Nyọka chụ ẹla nya uri ọkpakpa hi, maga ká cheji ba hi ọ-kpịla okpoko ka ra ang ịlẹ kị baba hang lụmẹ ka. Ọ kaa lujwo nyọka jẹ́ jaabwọ áhị ka kpịla okpoko kaka ba, ụka kahị juwa ẹ-ẹpwụ nya iwe-ahụrụ olujwo lala ụka ká ọngọhẹ á jụ ẹdụrụ bwu ugbiyegu nyahị. Ẹ-ẹpwụ nya iwe-ahụrụ ọlịịwẹ, kpịtịya nyori ‘abwọ ọrịrị ha Ohe Oluhye bala ọ-juwa bịlọọ bịlẹ’ ka dang ụbwọ nyọka cheje ọnyịịla. IJihova ịnyịnyị tị ka wẹ abwọ ọrịrị nyang bwula ọ-ya okpunyi ọlẹ kọ ka ‘wu ọkịlẹtụ bala irya ọlẹpwụ nyang wuu kpa yẹẹyẹẹ’ hang. Ọọwa ka dang ụbwọ nyọka jẹ́ ẹla ọlẹ kọ chịla ká ka họ.—⁠Filip. 4:6, 7; 1 Pit. 5:⁠7.

10. Ányị ahị tị́ ka bwu la aligu inyeewe?

¹⁰ Yẹjula aligu ịnyịịla. Ya ẹla ọlọkịlẹtụ nyang ju aligu nyang ịlẹ kị jung chwẹẹ bala ọ-jaa oja u-uhye nya ang ịlẹ kị họ tang lụka ọkẹkpẹ, ọgụgụụgụ ri angịlẹ kị ji ẹpwụ nya iwe-ahụrụ ụma nyang ụka ọhẹ lẹ. Kori ká họ ịnyị, ọ ka dang ụbwọ la okpunyi nya ọkịlẹtụ. (Ọngọ. 4:9, 10) Aligu nyang ịlẹ ká la ẹ-ẹga ọlẹ ká ji ene-ene ri aligu nyang wẹẹ. Ọlẹẹlẹẹ ká tị ji ẹga onyeewe wẹẹ, à baba nya aligu inyeewe ịnyịnyị. Tị kpịtịya nyori, kori á ka la oligu aalẹ, à baba nyọka họ ẹla lala oligu ịnyịnyị. Ányị a tị́ ka bwu la aligu inyeewe? Jaa oja u-uhye nya ẹla ịnyịịla ịlẹ kị họ tang ẹ-ẹpwụ nya ụkụrwọ nya iJihova chajị kị ka yẹ ọkẹkẹnị ọlẹ ká ye bwu ụwa. Ọ ri ịnyịlẹhị, angịhyẹ ọọjịra-jịra á ka jẹ́ ang odudu ká ọ-kpa ọhịhị nyang wuu họ ụkụrwọ nya iJihova háng lụmẹ ka, ma ọ ka há angịkịla nyọka jẹ́ gụ ọwọwa, lẹ ị ka tịtọ nyọka ri aligu nyang. Tị dụmwọ-dụmwọ ká ya ẹla kpoye u-uhye nya ịlọng bala ang ịlẹ ká họ ha iJihova, lee ang ịlẹ kị kpụng ọkịlẹtụ enyi ka.

11. Ẹlịyẹ a tị́ ka họ nyọka kịnyaa juwa ye ọkẹkẹnị ẹ-ẹpwụ nya awụlẹ oyeye nyang?

¹¹ Kori ká tụụbwọ hi ụkụrwọ nyang olene chajị ahụ nyang lee ọrụng jụ ẹdụrụ, a kpọọ abị ka. Kori kọ tị ri ahụ ayịdang ká jụ ẹdụrụ dudu kanụ rụ bẹẹ? A kpụ ịlọng abị lee ọ-mẹ irya nyori à  họ ahụ nyang lee ọrụng ẹla ọtịpyọ ka. Kpịtịya nyori anụ ri “ọngọ ookpokpo,” anụ tị chị iJihova ehe nyori anụ nyị ka kpahị ju awụlẹ ẹ-ẹpwụ nya iwe-ahụrụ ọnyị myị́ ọnyị. (Mat. 19:5, 6) Kori kanụ tị rụ hi ụkụrwọ nyanụ chajị nya ọnyị ọmama, họ ká ọnyị nyanụ ọọwa a jẹ́ nyori, o ju apyobwuna hanụ yẹẹyẹẹ gụ ụkụrwọ ọlẹ kanụ pẹhi. Byi ọnyị nyanụ ụka myị́ ụka nyori o ri “ang-ahị” o-bwu ẹga nya Ohe Oluhye. (Eje. 127:3-5) Ịnyịnyị, joo oja nya ang ịnyịịla-ịnyịịla ịlẹ kị họ tanụ ẹ-ẹpwụ nya ụkụrwọ nya iJihova. Kori ká họ ịnyị, ọ ka da ọnyị nyang ụbwọ nyọka kpa ọhịhị nyamwụ wuu họ ụkụrwọ nya iJihova ọlẹ kọ myị̀ la ọkẹkẹnị, jaabwọ ká họ.

12. (a) Ányị ahị tị ka bwu da angịlẹ kị kaa kpa ụka nyaa wuu họ ụkụrwọ ha iJihova ụbwọ chajị kị ka kịnyaa la ụkụrwọ ọọwa? (b) Ányị ahị tị́ ka bwu daa ụbwọ ụka ká iwe-ahụrụ nyaa á yẹda?

¹² Ọ kpịpyọ lụmẹ nyori, ọjịra-jịra lụmẹ-lụmẹ bala aanahị ịnyịnyị kaa maga nyịlẹhị-ịlẹhị nyọka da aanahị ịlẹ kị kaa kpa ụka nyaa wuu họ ụkụrwọ nya iJihova ụbwọ chajị kị ka jẹ́-ẹ kịnyaa la ụkụrwọ ọọwa. Ị kaa họ ịnyị bwula ọ-jwaa ọhụ nyọka kịnyaa la ụkụrwọ nyaa, ọ-ya okpoko lee ang-abwọ ịkịla ịlẹ kị baba haa, lee ọ-daa ụbwọ kpẹhị rịrị adaa bala ịnaa ịlẹ kị ji lụrụ hyaa. (Gal. 6:⁠2) Kori kị ya angịlẹ kị kaa kpa ụka nyaa wuu họ ụkụrwọ nya iJihova du wẹ ọjịra-jịra nyang ụka ká ụkụrwọ nyaa á yẹda, a me irya nyori ị họ ẹla ọhẹ tịpyọ lee ụkụrwọ ị jẹ́ họ ka, à du kị yaa du ka ẹga ọkịla lẹ ka. * Ọkọkọ nyọọwa, daa ụbwọ chajị kị ka jẹ́-ẹ bọhụ ẹ-ẹpwụ nya ọyẹda ọọwa myị́. Daa ọwụraba bwu ọkịlẹtụ nyang bala ọ-jaa obe nya ụkụrwọ ọlẹ kị họ, kori kị dọmwụ jẹ́ họ jaabwọ kị kaa họ ene-ene kaka ọọlajị nya ịnyịrọ ọ-la gogo nwà  ka. Maga ká tụ́ jwaa chwẹẹ, ká ye apyobwuna bwu ẹla ọjẹ́jẹ nyaa, ang ọlẹ kị mẹjaa ụkụrwọ nyaa bala ẹla ọlẹ kị chịpwụrụ bwu ẹ-ẹpwụ nya ọhịhị.

13. Ányị ahị tị́ ka jẹ́-ẹ bwu da angịlẹ ká ụkụrwọ nyaa yẹda ụbwọ?

¹³ Ụka nya ọgbanyẹ, angịlẹ ká ụkụrwọ nyaa yẹda ka baba nya ụbwọ ọdada nyang ẹ-ẹga nya ẹpwa ọmwahị, jaabwọ kị ka bwu ka ẹga ọhẹ bala ẹga ọkịla, ụkụrwọ ọmwahị bala ang ịkịla ịlẹ kị baba. Ọhẹka, ị ka baba nya ụbwọ ọdada ẹ-ẹga nya ẹla ịkịla lala ẹla nya ẹpwa ọnyẹnyẹ ịnyịnyị myị́. Ang ọlẹ kọ tị ka baba haa gụgụ wuu ri, ọ-ka maga nyọka jẹ́ jaabwọ ká iwe-ahụrụ nyaa laa. Ọhẹka, ịwa lee ọngọhẹ bwu ugbiyegu nyaa á la ịnyịrọ ogogo nwà kaka, lee ọngịnyị nyaa ọhẹ gbu hyaa. * Ọ tị chịkpẹẹ kị ka la ọkịlẹtụ ọ-kpụ enyi ịnyịnyị myị́ ọọlajị nya iwoo nya aligu nyaa ịlẹ kị la ene-ene, kori kị ya bwu ọnụ nyaa ka wẹwẹ. Ọ ka tata pyịnyẹng ene kị ka jẹ́-ẹ wu ịlaa kpa ọlam-ọlam ẹ-ẹpwụ nya iwe-ahụrụ ilujwo ịlịịwẹ myị́.

14. Ányị ala ọjịra-jịra à tị́ bwu da ọọnahị ọnyang ọhẹ ụbwọ nyọka ye ọkẹkẹnị ẹ-ẹga onyeewe?

¹⁴ Kori kahị kpa ẹrụ ọnyịịla pyẹ balaa, bala ọ-ya ọgụ-ẹpẹtẹ ọnyịịla deeji haa, ọọwa ka jẹ́-ẹ daa ụbwọ nyọka bọhụ myị́. Ọọnahị ọnyang ọhẹ ọlẹ kọ kaa kpa ẹrụ ọnyịịla pyẹ ẹ-ẹpwụma ọkịla la ẹka lụmẹ-lụmẹ kẹkpẹ yẹkẹẹ: “Ẹ-ẹga ọlẹ kam ji ene-ene, m̀ kaa mẹ ịBayịbụụ jẹ angịnyị ẹnụ myị́ ẹnụ. Ma, ẹ-ẹga onyeewe ọlẹ kam ji lẹẹlẹẹ, o lujwo nyọka dọmwụ ye iwe wa ịBayịbụụ ju ọngịnyị lee ọ-mẹ ifim jẹ ẹ-ẹrụ ọnyịịla ọ-kpa pyẹ. Aanahị ịla ọjịra-jịra tị kaa kpam bịlaa ka ọmwẹẹkpẹ ka bala ịBayịbụụ ọmẹjẹ nyaa. Ụka kam yẹ ọmyịmyị nya aanahị ịwẹ bala abwọlẹ kị la ila ọchịchị ẹ-ẹga nya ịBayịbụụ ọ-mẹjẹ angịnyị, ọọwa dam ụbwọ nyọka la irya ọnyịịla ẹ-ẹga nya aloye ọwẹ. M̀ jẹ́ jaabwọ ḿ ka bwu dọmwụ nya ẹla oyaya bala angịnyị o-oye ọwẹ. Ẹla ịwẹ wuu dam ụbwọ nyọka chị ọkẹkẹnị myịmyị.”

15. Ányị à tị́ ka bwu họ hiigu ẹ-ẹga onyeewe nyang myị́?

¹⁵ À ka jẹ́-ẹ họ hiigu ẹ-ẹga onyeewe nyang. A  me irya nyori ụkụrwọ nyang ọlẹ á kaa họ, à há ka lee o-ju apyobwuna ka, dudu kị yang du ka ẹga ọkịla lẹ ka. Kụ irya nya agbẹyị ịdatị-ịdatị ịlẹ ká iJihova wẹẹ dang ụbwọ lẹẹlẹẹ, ká kịnyaa juwa kpa ẹrụ ọnyịịla pyẹ. Ba ọgụ-ẹpẹtẹ nya angịnyị nya ịKịrayịsị iloyi nya ọgbanyẹ jẹ. Ẹga myị́ ẹga ọlẹ kị ji, ị kịnyaa “juwa kpa ẹla nya Ohe Oluhye ya dodehe je angịnyị.” (Ụkụr. 8:1, 4) Kori ká kịnyaa juwa kpa ẹrụ ọnyịịla pyẹ, à ka ye apyobwuna nyịlẹhị-ịlẹhi. Ọ-chụ pwokwita, aanahị ịhyẹ ịlẹ kị kaa ye ịlahị nya ụgbẹyị, ká angịkpeji kwaa bwu ẹpwụma ọhẹ, rụ ka ẹga ọkịla ọlẹ ká ọbaba ji la òja nyaa ịnyịnyị. Ẹ-ẹpwụ nya ọya ịmanyị-ịmanyị, angịnyị lụmẹ-lụmẹ yẹjula ebwo nya ọtụgụrụ onyeewe ọwẹ la òja ọlẹ ká aanahị ịwẹ kaa kpa ya ẹla nya Ohe.

16. Ányị a tị́ ka bwu ye ọkẹkẹnị ẹ-ẹpwụ nya ụkụrwọ onyeewe nyang?

¹⁶ ‘Ọkẹkẹnị ọlẹ ká iJihova ya hang ka jung ọngịrị.’ (Neh. 8:10.) Ọkẹkẹnị nyahị ọgụgụ wuu chịla kọ ka bwu ẹga nya iJihova, ẹ-ẹga nya ụkụrwọ ọlẹ kọ ya hahị ka, jaabwọ myị́ abwọ ká ụkụrwọ ọọwa á háahị kaka ba. Lẹ, kori kahị ka ye ọkẹkẹnị aalẹ, ahị baba nyọka tụ́ ju iJihova chwẹẹ bala ọ-dahịhiloo nyọka ya ẹla ọjẹ́jẹ hahị, kpahị ụgbẹyị, bala ọ-dahị ụbwọ. Kpịtịya nyori ụkụrwọ nyang onyogo háng, chajị à kaa maga nyọka da angị ịlụwa ụbwọ ịnyị. Kori ká maga nyọka họ ụkụrwọ nyang onyeewe yẹẹyẹẹ, iJihova ka dang ụbwọ chajị ká ụkụrwọ ọọwa ka háng ịnyịnyị.—⁠Ọngọ. 7:⁠10.

17. Ẹlịyẹ ahị tị́ baba nyọka kpịtịya u-uhye nya ụkụrwọ ọlẹ kahị wẹẹ họ ha iJihova lẹẹlẹẹ?

¹⁷ Kpịtịya nyori ịgba ọgbagba nyahị ha iJihova ri ẹla o-gboyi myị́ oyi, ma ụkụrwọ ọlẹ kahị wẹẹ họ họọ lẹẹlẹẹ á tị ka lịnyị ka. Ọhẹka, ụkụrwọ ọlẹ kahị wẹẹ họ ha iJihova alẹ, ahị ka họ odehe onyeewe ka. Ọ ka yẹda myị́. Aleksey, kahị ya ẹla chajị nyamwụ bwu ọmwụ ọdada ya nyori iwe-ahụrụ nya ọwa ọlẹ kọ yẹda, nyị nwụla ọwa nọ gbe ọyẹda ọlịlahị. Ọ yẹkẹẹ: “M̀ jẹ́ ene-ene nyori iJihova ji ịnyịlẹhị bala o-ri odehe onyeewe juwa ka warị wẹẹ. Ọ tị kaa lam lala o-ri, ị ji lụrụ hwẹẹ. Ma, lẹẹlẹẹ lẹ, m̀ ju iJihova chwẹẹ gụ ọwọwa, ọ tị lam lala o-ri odehe onyeewe á ji lụrụ kaka.” (Ụkụr. 2:25) Lẹ, ẹ-ẹpwụ nya ụkụrwọ nya iJihova ọnyị myị́ ọnyị kahị juwa họ, ahị kịnyaa juwa tụ́ jwoo chwẹẹ. Ọ́ ka tụụbwọ hịịhị ẹnẹnẹhẹ ka, ma ẹ-ẹga myị́ ẹga kahị ji, ọ ka dahị ụbwọ nyọka ye ọkẹkẹnị ẹ-ẹpwụ nya ụkụrwọ ọnyị myị́ ọnyị ọlẹ kahị ju họ họọ.—⁠Ayị. 41:⁠13.