1-2. Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

ÁNYỊ ọ tị́ kaa lang ụka ká ịngịhyẹ ọlẹ kọ bang ba á wung ọyị lụka ọlẹ ká yẹhị rịrị gboo ka? À ka chuko? Ọhẹka ọ ka lang jaabwọ ká ụpwụ nya Etu 13:12 ya: “Ọ-ka da ẹhị ọrịrịị-rịrị nya ọngịnyị giri-giri kaa chị ọkịlẹtụ pyẹpyẹ.” Ma ányị ọ tị́ kaa lang ụka ká wo nyori ịngịhyẹ ọkpọnchị nya-à du ká ang ọọwa nyị wung ọyị lụka ọlẹ ká yahị guru gboo ka lẹ? Kori kọ lịnyị, ọhẹka à ka dọhụ pịlẹ bala ọ-nwụlanọ nyọka godayị.

² A-ang ọjẹ́jẹ ọlẹ, ahị ka kụ ẹhị yẹ ẹla ọmẹjẹ ịhyẹ ịlẹpwụ nya ịBayịbụụ ịlẹ kị ka dahị ụbwọ nyọka la olegu nya ‘o-godayị gbe’ ụka ká Ohe ka họ ẹla. (May. 7:7) Ọọwa lẹ, ahị ka kụ ẹhị yẹ iwe-ahụrụ imiiye ịlẹ kahị baba nyọka dọhụ pịlẹ godayị gbe iJihova kọ ka họ ẹla lẹlẹ. Ohyẹẹkpẹ-ẹkpẹ, ahị ka kụ ẹhị yẹ ahị ọwawa ịlẹ kị juwa gbe angịlẹ kị nwụlanọ nyọka godayị gbe iJihova.

3. Ẹlịyẹ ụpwụ nya Etu 13:11 à tị́ mẹjẹ́ẹhị?

³ Ụpwụ nya Etu 13:11 mẹ ang odudu kahị baba nyọka dọhụ pịlẹ jẹ́ẹhị. O yẹkẹẹ: “Ụdụ ọkpụkpụ lụnyẹ-lụnyẹ kaa ta eji ahyaahị, ụdụ ọ-kpụ dụmwọ-dụmwọ bwula ụkụrwọ ọ-họ myị kaa nwa kịlahị-ịlahị.” Ẹlịyẹ ahị tị́ jẹ́ bwu ọgba ọwẹ? Ọngọ jẹ́ ẹla kaa kpẹhị chịng họ ang dụmwọ-dụmwọ, ocheju nyamwụ tị kaa hiigu ịnyịnyị.

4. Ẹlịyẹ ụpwụ nya Etu 4:18 à tị́ mẹjẹ?

⁴ Ụpwụ nya Etu 4:18 byihi nyori “ụgbẹyị nya ọlabwẹla ọnyịịla la jaabwọ ká ẹnụ kaa beeji, juwa há hwooo gụ ọọwa-ọọwa gbee ká ahị ka pyẹ gbodoo.” Ọgba ọwẹ mẹjẹ nyori iJihova kaa  mẹ irya nyamwụ jẹ angịnyị nyamwụ dụmwọ-dụmwọ. Ma, ọgba ọwẹ ka jẹ́-ẹ dahị ụbwọ nyọka jẹ́ jaabwọ ká ọngịnyị nya ịKịrayịsị kaa yẹ ọhịhị nyamwụ da bala ọ-tụ́ ju iJihova chwẹẹ gụ ọwọwa ịnyịnyị. Ọngịnyị-ị́ jẹ́-ẹ tụ́ ju iJihova chwẹẹ lodu gbe ụtụrụ ka, ọọ họ ịnyị dụmwọ-dụmwọ ịnyị. Kori kahị jẹ́ Omyi Ẹla nya Ohe rige-rige bala ọ-kpa ẹla ọlẹ kahị jẹ́ bwu ụwa bala ogu nyamwụ họ ụkụrwọ, ahị ka dọmwụ nyọka la abwụma ụma nya ịKịrayịsị dụmwọ-dụmwọ. Ahị ka jẹ́ Ohe gụ ọwọwa ịnyịnyị. Kụ ẹhị yẹ abwọlẹ ká iJisọsị chụ ẹlẹwẹ pwoku wẹẹ.

5. Ẹlịyẹ iJisọsị à tị́ chụ ọngịnyị ọyẹda pyịnyẹng-pyịnyẹng ka pwoku?

⁵ IJisọsị chụ ẹla pwokwita nyọka mẹjẹ nyori ẹrụ ọnyịịla nya Ịpyị-Adịrahụ ọlẹ kahị wẹẹ mẹjẹ nyị lala ẹjẹ ọ-pyịnyẹng ọhẹ ọlẹ kọ ka nwà dụmwọ-dụmwọ ẹ-ẹpwụ nya angị la ọkịlẹtụ ọnyịịla. O yẹkẹẹ: “Ajẹ ịlẹ kọ ya hụ ẹ-ẹrụ bwu kpehe, juwa nwa ịnyịnyịịnyị. . . . Ma, ọlẹrụ ọọwa ayịdang á tị jẹ́ jaabwọ kọ la kọ du ká ajẹ ịlẹrụ nyamwụ ịịwa juwa nwa ịnyị kpong-kpong ka. Chajị ọpyị ọlẹ kọ ya ajẹ ịịwa hụ, a wẹẹ kpaa nwa, gbee kị gu apwụ, nwụ́ egbe, gbee ká egbe nyaa ịịwa ri ịtụka-ịtụka wuu lẹ.” (Mak. 4:27, 28) Etu nya ẹla ọlẹ ká iJisọsị ya tị́ ri ányị? Ọ wẹẹ ya nyori jaabwọ ká okoji kaa bwu dụmwọ-dụmwọ wẹẹ, ịnyị ọngịnyị ọlẹ kọ ye ẹlịlẹhị myị à kaa yẹda dụmwọ-dụmwọ ịnyịnyị lẹ. Ọ-chụ pwokwita, jaabwọ ká angịlẹ kahị kaa mẹ ịBayịbụụ jẹ wẹẹ tụ́ ju iJihova chwẹẹ, ịnyịnyị ahị kaa yẹ jaabwọ kị wẹẹ yẹ abwẹla nyaa da ka ọnyịịla lẹ. (Efe. 4:22-24) Ma, ahị ka kpịtịya pyii nyori iJihova à kaa kpa ẹjẹ ochiche ọwẹ nwà lẹ.​—1 Kọr. 3:7.

6-7. Ẹlịyẹ ahị tị́ jẹ́ bwu ụgbẹyị ọlẹ ká iJihova bwu họ odehe?

⁶ Ang myị́ ang ọlẹ ká iJihova á ka họ, ọ kaa dọhụ pịlẹ kpa họọ bala ọ-kpa ụka ọlẹ kọ baba họ ang ọọwa. Ọ kaa họ ịnyị chajị nyọka ya ogbo ha ẹnyị nyamwụ bala ọ-ka da angịkịla ụbwọ. Ọ-chụ pwokwita, kụ ẹhị yẹ abwọlẹ ká iJihova họ odehe ọlẹ dụmwọ-dụmwọ nyọka ya ha angịnyị ehe kụ wẹẹ.

⁷ Ụka ká ịBayịbụụ wẹẹ chabwọ jaabwọ ká  iJihova bwu họ odehe, o ya nyori nyị me “ẹpwụ ojuju” nyamwụ, nyị ya “ịtachị” woo kpa bala ọ-ya “ẹjwọ ọlọtụpịrịhyo” wu eji. (Job. 38:5, 6) Ọ dọmwụ myịmyị dọhụ pịlẹ kụ ẹhị yẹ ụkụrwọ nyamwụ. (Ọmwụ. 1:10, 12) Kụ irya jaabwọ kọ la alegu-ẹrụ ụka kị wẹẹ yẹ ang onyeewe ọnyọnyọọnyị ọlẹ ká iJihova họ wẹẹ. Ẹla ọwẹ ka kpaa ịpyọ lụmẹ! Chajị nya ọọwa lẹ, ị dọmwụ nyọka “da iwuru nya ọkẹkẹnị.” (Job. 38:7) Ẹlịyẹ ahị tị́ jẹ́? IJihova kpa ẹka ụnọ ịmanyị tị́ họ odehe, ịdịchụ, bala ang ihihi wuu, ma ụka ọlẹ kọ mwụụrụ yẹ ang ịlẹ kọ họ wuu, ọ ya nyị hiigu lụmẹ.​—Ọmwụ. 1:31.

8. Ẹlịyẹ ahị tị́ wẹẹ ka kụ ẹhị yẹ lẹẹlẹẹ?

⁸ Ọ-chụ pwokwita ịwẹ mẹjẹ́ẹhị nyori ẹla lụmẹ-lụmẹ jị kahị ka jẹ́ bwu Omyi Ẹla nya Ohe Oluhye u-uhye nya ang odudu kahị baba nyọka dọhụ pịlẹ. Ọlẹẹlẹẹ, ahị ka kụ ẹhị yẹ iwe-ahụrụ imiiye ịhyẹ ịlẹ kahị ka nwụlanọ nyọka godayị gbe iJihova pyii.

9. Ẹ-ẹpwụ nya iwe-ahụrụ oyina ahị tị́ baba nyọka godayị gbe iJihova?

⁹ Ahị ka baba nyọka godayị gbe ọwẹwẹ nya abwọ ọrịrị nyahị myị́. Ụka kahị raabwọ bịlẹ ụbwọ ọdada nyọka bọhụ myị́ ẹ-ẹpwụ nya akama ọhẹ lee ọ-bịlẹ ụbwọ ọdada nyọka hwabwọ la ọ-họ ịngịhyẹ ọlẹ kọ wụ́ iJihova ẹjẹ, ahị ka me irya myị́ nyori iJihova nyị họ atịmẹ la ọ-wẹẹhị abwọ ọrịrị nyahị. Ịyẹ tị́ du ká iJihova kaa wẹ abwọ ọrịrị wuu i-ijata ka?

10. Ịyẹ tị́ du kahị baba nyọka dọhụ pịlẹ gbe ụka ká iJihova ka wẹ abwọ ọrịrị nyahị?

¹⁰ IJihova kaa ke ụrụ kpẹnẹẹ wo la abwọ ọrịrị nyahị. (Eje. 65:2) Ọ yẹ abwọ ọrịrị o-bwu ọkịlẹtụ nyahị lala ang ẹjẹẹ nya ọmyịmyị nyahị. (Hib. 11:6) Ụka kahị raabwọ ha iJihova nyọka dahị ụbwọ họ ẹla kpọọ ịpyọ, ọ kaa tịtọ nyọka yẹ jaabwọ kahị nwụlanọ kaka ba nyọka maga chajị kahị ka họ ẹla olirya nyamwụ. (1 Jọn. 3:22) Lẹ ahị ka baba nyọka dọhụ pịlẹ bala ọ-họ ẹla ba abwọ ọrịrị nyahị jẹ ụka kahị juwa maga nyọka kụrụ abwẹla ọtịpyọ lee ọdẹwụ-dẹwụ ọhẹ. IJisọsị dahị ụbwọ nyọka jẹ́ nyori Ohe nyị́ kaa wẹ abwọ ọrịrị nyahị wuu i-ijata ka. O yẹkẹẹ: “Anụ juwa bịlẹ ang ka ẹpwụtụbwọ nya Ohe Oluhye mẹ! Ohe Oluhye ka ya ang ọọwa hanụ. Anụ juwa tịtọ nya ang ka ẹpwụtụbwọ nya Ohe Oluhye mẹ! Ohe Oluhye ka họ kanụ ka yẹ ang ọọwa lẹ. Anụ yụbwọ kpụ ọnụ ụgbẹyị ịnyịnyịịnyị mẹ! Ohe Oluhye ka wụrụ ọnụ ụgbẹyị ọọwa hanụ lẹ. Chajị ọng myị́ ọng ọlẹ kọ juwa bịlẹ ang, ọngọọwa, ị kaa ya ang ọọwa ha lẹ. Ọng myị́ ọng ọlẹ kọ tị juwa tịtọ nya ang, ọngọọwa a kaa yẹ ang ọlẹ kọ juwa tịtọ ịnyịnyị lẹ. Ọng myị́ ọng ọlẹ kọ tị juwa yụbwọ kpụ ọnụ ụgbẹyị nya ube, ọngọọwa ụgbẹyị ọọwa a kaa wụrụ ha ịnyịnyị lẹ.” (Mat. 7:7, 8) Kori kahị kpa ẹla ọwẹ họ ụkụrwọ, kahị “gbeji giri-giri kịlahị-ịlahị ẹ-ẹpwụ nya abwọ ọrịrị,” ahị ka jẹ́ myị̀myị̀ nyori Adahị olepwoohe wo lahị, ọ tị ka wẹ abwọ ọrịrị nyahị.​—Kol. 4:2.

11. Ányị ụpwụ nya Ala iHiburu 4:16 à tị́ ka dahị ụbwọ ụka kọ lala o-ri Ohe nyị́ wẹẹhị abwọ ọrịrị nyahị i-ijata ka?

¹¹ Ịlẹhị lẹ, ọ ka lahị lala o-ri iJihova nyị họ atịmẹ nyọka wẹẹhị abwọ ọrịrị nyahị myị́, ma ọ chehe nyọka wẹẹhị “lụka ọbaba” lee ụka ọlẹ kọ chịla. (Wa Ala iHiburu 4:16.) Ịnyị à du kahị ka kpụ iJihova abyị ẹnẹnẹhẹ ka kori ká ẹla-á họ jaabwọ kahị yahị guru ka lẹ. Ọ-chụ pwokwita, iru nya angịnyị kaa raabwọ ẹ-ẹpwụ nya ẹka lụmẹ-lụmẹ ká Ịpyị-Adịrahụ nya Ohe ka ta odehe onyobyi ọlẹ ayịreji lẹ. IJisọsị dọmwụ ya ahị nyị raabwọ chajị nyamwụ. (Mat. 6:10) Ma, ọ ka ri ẹla nya uchi kahị họ kori ká ọmyịmyị nyahị-ị́ gụụhị byi chajị nyọlẹ ká ocheju nya odehe warị ụka ọlẹ ká angịnyị ehe yahị mẹ ka! (Hab. 2:3; Mat. 24:44) Ọ há nyọka kịnyaa la o-godayị  gbe iJihova bala ọ-raabwọ họọ la ọmyịmyi nyori ọ ka wẹẹhị. Ocheju ja warị lụka ọlẹ kọ pwoku kpangga, chajị iJihova chụ ‘ẹnụtụrụ bala awa’ ọlẹ kọ ka pweeji lẹ. Ụka ọọwa à tị ka chịla ha ọng myị́ ọng wuu lẹlẹ.​—Mat. 24:36; 2 Pit. 3:15.

12. Ụka oyina ọ tị́ ka lahị ujwo gụgụụgụ nyọka dọhụ pịlẹ?

¹² Ahị ka baba nyọka dọhụ pịlẹ bala ọ-bọhụ ẹ-ẹpwụ nya ẹla ọkịrọrọ myị́. Odehe ọlẹ, alẹng kaa kpa anyang lụbwọ ọngịrị, anyang kaa kpa alẹng lụbwọ ọngịrị ịnyịnyị. Angịnyị-ị́ kaa kpa angịlẹ ká ugbinyịrọ nyaa datị hi awụlẹ hiigu ka, tụ́ angịlẹ kị kaa ya òja ọkịla lee o-bwu ẹpwụma ọkịla. Ị kaa kpa angịlẹ ká ang họ ị-ịnyịrọ lee ịmachị nmaa-nmaa. Ị họ anchẹ nya iJihova lụmẹ-lụmẹ ẹla ọkịrọrọ chajị nya ẹla ọlẹ kị myị ju bwu ịBayịbụụ. Ụka ká angịnyị-ị́ jẹ́ kpahị ka, ahị ka kpịtịya nya omyi ẹla nya iJisọsị. O yẹkẹẹ: “Ọng myị́ ọng ọlẹ kọ ka kpa ugbodu ojuju nyamwụ pwụ ọbaba lẹ aalẹ, ọngọọwa a ka wu ọchịda nya Ohe Oluhye ọyị lụka ohyẹẹkpẹ lẹlẹ.” (Mat. 24:13) Ma, ányị a tị́ ka họ kori ká jẹ́ nyori ọngọhẹ ọọjịra-jịra họ ọhọbịrị ọtụka? Ụka ká angịgbahị á jẹ́ ẹla ọọwa, à ka dọhụ pịlẹ bala ọ-dahịhile nyori ị ka kpẹhị rịrị ẹla ọọwa ụ-ụgbẹyị ọlẹ ká iJihova tịtọ? Ẹlịyẹ angịgbahị à tị́ ka họ myị́ ụka ká ọngịnyị-ị́ họ ọhọbịrị ọtụka?

13. Ẹlịyẹ iJihova à tị́ tịtọ ká angịgbahị ka họ ụka ká ọngịnyị-ị́ họ ọhọbịrị ọtụka?

¹³ Ụka ká angịgbahị-ị́ jẹ́ nyori ọngọhẹ ọọjịra-jịra nyị họ ọhọbịrị ọtụka, ị kaa raabwọ bịlẹ ‘ẹla ọjẹ́jẹ o-bwu ẹga nya Ohe’ chajị kị ka yẹ iwe-ahụrụ ọwẹ jaabwọ ká iJihova yọọ. (Jem. 3:17) Irya ọlẹ kị la ri ọ-ka “kpa ọlọhọbịrị tịrẹkpẹ bwu ụgbẹyị nya ahị ọhụhụ nyamwụ” kori kọ chịkpẹẹ. (Jem. 5:19, 20) Ị myịmyị tịtọ nyọka họ ang myị́ ang ọlẹ kị ka jụ họ myị́ chajị ká ọjịra-jịra ka la charị-charị bala ọ-ka kpụ́ angịlẹ ká ẹla ọọwa jụ ẹjẹ. (2 Kọr. 1:3, 4) Ụka ká angịgbahị-ị́ jẹ́ nyori ọngịnyị nyị họ ọhọbịrị ọtụka, ị kaa maga nyọka jẹ́ jaabwọ ká ẹla ọọwa la kpangga. Ọọwa tị ka ye ụka chẹẹ myị́. Ụka kị họ ịnyị kpá, ị kaa raabwọ bala ọ-yalibyi la ọngọọwa bwu Ụpwụ Ịgọgọ bala nwọọ rịrị “ẹ-ẹpwụ nya ahyẹẹrwẹrwa” lee pwụ ụbẹẹtụ ọlẹ kọ chịla. (Jer. 30:11) Nanana nyori angịgbahị-ị́ kaa họ atịmẹ ka, ị́ kaa chagaga ka cheje ka ịnyịnyị. Ụka ká angịgbahị-ị́ kpa ẹla ọlẹ ká iJihova ya họ ụkụrwọ, ọjịra-jịra lẹpwụ-lẹpwụ kaa ye apyobwuna. Ma, kori ká angịgbahị-ị́ dọmwụ họ ẹla ụ-ụgbẹyị ọwẹ  wẹwẹ, ẹla ọlẹ ká ọlọhọbịrị ọwẹ họ ka jụ́ angịlẹ kọ họ pyị́ myị́ wẹẹ. Kori kọ lịnyị ẹ-ẹga nyang, ányị a tị́ ka bwu chụ ajụjụ ọọwa hi?

14. Ọgụ-ẹpẹtẹ nya owo à tị́ ka kpụng ẹjẹ ụka ká ọọnahị ọhẹ-ẹ́ họ ẹla wụng ẹjẹ?

¹⁴ Ọngọhẹ họ ẹla jụng ọtụka-ọtụka ẹnẹnẹhẹ lẹ? Ọ dọmwụ ka ri ọnchẹ nya iJihova ọkịla myị́. Ọgụ-ẹpẹtẹ ịnyịịla-ịnyịịla juwa ẹ-ẹpwụ nya ịBayịbụụ ịlẹ kị ka dahị ụbwọ nyọka dọhụ pịlẹ gbe iJihova kọ ka nwụ ẹla ọkịrọrọ rịrị. Ọ-chụ pwokwita, nanana nyori iJosẹfụ yẹ akama to ọkịrọrọ ẹ-ẹpwụtụbwọ nya aanamwụ, ọ́ yẹga da ọhọbịrị nyaa yọọ da ka ri ọngọ ju agbama ka. Ọkọkọ nya ọọwa lẹ, ọ maga nyọka họ ang ọlẹ kọ ka jụ họ myị́ nyọka gbịgba ha iJihova. IJihova tị wahị kụrwọọ chajị nya ọhụ ọ-da pịlẹ bala ọhụ ọbaba nyamwụ. (Ọmwụ. 39:21) Lụka ohyẹẹkpẹ, iJosẹfụ jẹ́ hịnyọhi angịlẹ kị họọ ẹla ọkịrọrọ, iJihova tị wahị kụrwọọ ịnyịnyị. (Ọmwụ. 45:5) Lala iJosẹfụ, ahị kaa yé ẹjẹ ọkpụ́kpụ ụka kahị tụ́ ju iJihova chwẹẹ bala ọ-dọhụ pịlẹ gboo kọ ka nwụ ẹla ọkịrọrọ rịrị lụka ọlẹ kọ pwoku.​—Eje. 7:17; 73:28.

15. Ịyẹ à tị́ da ọọnahị ọnyang ọhẹ ụbwọ nyọka bọhụ ẹ-ẹpwụ nya ẹla ọkịrọrọ bala o-yé okpunyi?

¹⁵ Ẹlịlẹhị ri, ẹ-ẹla ọkịrọrọ wuu à kaa la ọngịrị lala ịnya iJosẹfụ ka, ma ọ kaa jụụhị kori ká ọngịnyị-ị́ jẹ́ kpahị ka ụ-ụgbẹyị ọhẹ lee ọkịla. Kori kahị la akama bala ọngịnyị, kori kọ dọmwụ ri ọngọ kaa gbịgba ha iJihova ka wẹwẹ, ahị ka yé apyobwuna kori kahị kpa ẹla ọmẹjẹ ọlẹpwụ nya ịBayịbụụ họ ụkụrwọ. (Filip. 2:3,4) Ahị kụ ẹhị yẹ ọ-chụ pwokwita ọhẹ wẹẹ. Ọ jụ ọọnahị ọnyang ọhẹ lụmẹ nyọlẹ ká ọngọhẹ ọ-ọlụkụrwọ nyamwụ ya ẹla ọtịpyọ rwọọ bala o-me ọnọọkịla bọọ. Ọkọkọ nyọka họ ẹla la agaga, ọọnahị ọọwa kụ irya ju ọgụ-ẹpẹtẹ nya iJisọsị. Ụka ká angịnyị do iJisọsị, ó daa tịrẹkpẹ ka. (1 Pit. 2:21, 23) Chajị nya ọọwa lẹ, ọọnahị ọwẹ cheje nyọka ya abwẹbwẹhẹ u-uhye nya ẹla ọọwa ka. Nyọlẹ kọ nọ chẹẹ, ọ wẹ ka jẹ́ nyori ọngọọwa nyị jụ ẹdụrụ ọnyọọngịrị ọhẹ juwa bala ọ-la olo nya ọkịlẹtụ chajị nya ọọwa. Lẹ, ọọnahị ya nyori ọhẹka ẹ-ẹla ọlẹ nyị́ tịtọ nyọka ya nya-à wẹ ka. Ọ chị ọkẹkẹnị gụgụụgụ chajị nyọlẹ kọ dọhụ pịlẹ bala ọ-bọhụ ẹ-ẹpwụ nya iwe-ahụrụ ọwẹ, bala o-yé okpunyi ịnyịnyị.

16. Ịyẹ à tị́ ka jẹ́-ẹ kpụng ẹjẹ kori ká juwa chịpwụrụ bwu ẹpwụ nya ẹla ọkịrọrọ? (1 iPita 3:12)

¹⁶ Kori ká juwa yẹ akama chajị nya ẹla ọkịrọrọ lee ọọlajị nya ẹla ọkịla, kpịtịya nyori  iJihova kaa ju “angị la ọkịlẹtụ ọ-kpụ enyi” chwẹẹ. (Eje. 34:18) À họ́ọ chajị nyọlẹ ká dọhụ pịlẹ bala ọ-pẹhi akama nyang wuu jwoo ụ-ụbwọ. (Eje. 55:22) Ọwa-à ri Ọngọleje nya odehe wuu lẹ. Ọ yẹ ang myị́ ang wuu. (Wa 1 iPita 3:12.) Kori ká juwa chịpwụrụ bwu ẹpwụ nya akama ịlẹ ká ka jẹ́-ẹ cheju myị́ lịlọng ka, kpịtịya nyori à baba nyọka godayị gbe iJihova?

17. Ẹlịyẹ iJihova à tị́ chehe nyọka họ ụ-ụpwụ nya Ayịsaya 30:18?

¹⁷ Lụka o-kpii, Adahị olepwoohe ka wahị kụrụụhị bwula Ịpyị-Adịrahụ nyamwụ. Ayịsaya 30:18 yẹkẹẹ: “[IJihova] wẹẹ godayị nyọka mẹ ọháha nyamwụ jẹẹnụ bala ọ-ka yẹnụ ahyẹẹrwẹrwa. [IJihova] ri Ohe Oluhye ọ-họ ẹla ọkpakpa. Ịnya angịlẹ kị dahịhiloo há haa lẹ.” Angịlẹ kị dahịhiloo lee o-godayị gboo ka yé ahị ọwawa lụmẹ-lụmẹ lẹẹlẹẹ bala ẹ-ẹpwụ nya odehe onyeewe.

18. Ahị ọwawa iyina à tị́ juwa gbehi?

¹⁸ Ụka ká angịnyị nya Ohe-é ju ka odehe onyeewe lẹ, ị́ ka la akama ịlẹ kị jam la alẹ ẹnẹnẹhẹ kaka. Ẹla ọkịrọrọ bala ajụjụ-ụ́ ka ji kaka. (Ọwụ. 21:4) Áhị ka chuko u-uhye nya ịbaba nyahị kaka, chajị ang ịlẹ kahị baba wuu ka juwa, kpụ ị ka nwà ọng myị́ ọng lẹ. (Eje. 72:16; Ayị. 54:13) Ahị ọwawa ọtụka à wẹ lẹ!

19. Ịyẹ iJihova à tị́ wẹẹ nwụlahị nọ gbe dụmwọ-dụmwọ?

¹⁹ IJihova wẹẹ nwụlahị nọ lẹẹlẹẹ nyọka hịhị e-ekpeleji nya eji ọkpakpa nyamwụ bwula ọ-dahị ụbwọ nyọka kụrụ abwẹla ịtịpyọ bala ọ-ka la abwẹla ịnyịịla ịlẹ kị kpọọ ịpyọ. Ọkịlẹtụ a kpụng enyi, ká ba la ọ-gbịgba ha iJihova ka. Ọhịhị ọlẹ kọ há gụ ọlẹ juwa ụ-ụgbẹyị ja warị! Nyọlẹ kahị wẹẹ yẹhị rịrị gbe ụka ọnyịịla ọwẹ, ahị chị ọkẹkẹnị jaabwọ kahị wẹẹ godayị gbe ụka ká iJihova ka họ ang ịlẹ kọ chehe jịra mẹ!