1. Ányị angịnyị lụmẹ-lụmẹ à tị́ wẹẹ maga nyọka họ ụkụrwọ ha iJihova gụ ọwọwa ẹ-ẹpwụ nya ịgba ọgbagba nyamwụ?

 AHỊ la ụkụrwọ lụmẹ-lụmẹ nyọka họ jaabwọ ká ocheju nya odehe ọlẹ wẹẹ ju chwẹẹ. (Mat. 24:14; Luk 10:2; 1 Pit. 5:2) Ahị wuu tịtọ nyọka họ ụkụrwọ ha iJihova jaabwọ kahị ka jụ họ ka ba myị́. Angịnyị lụmẹ-lụmẹ pyẹ ụkụrwọ nya ẹrụ ọnyịịla ọ-kpa pyẹ nyaa maa gụ ọwọwa. Angịhyẹ tịtọ nyọka ye ịlahị nya ụgbẹyị. Angịkịla tịtọ nyọka họ ụkụrwọ ị-ịBẹtẹlụ lee ọ-la ụbwọ ẹ-ẹpwụ nya ụkụrwọ nya ebe nya ẹla nya Ohe Oluhye ịnwụ́nwụ́. Iru nya aanahị alẹng tị wẹẹ họ ụkụrwọ jahị da ọ-ka ri ọngọmyẹrụ lee ọngọgbahị nya ọjịra-jịra. (1 Tim. 3:1, 8) Ọ kpụ iJihova ịpyọ nya ịlẹhị-ịlẹhị nyọka yẹ jaabwọ ká angịnyị nyamwụ wẹẹ tịtọ nyọka myị ẹrụ họọ bwu ẹpwụ ọkịlẹtụ!​—Eje. 110:3; Ayị. 6:8.

2. Ányị ọ tị ka lahị myị́ kori kahị jẹ́ wu ang ịhyẹ ịlẹ kahị chị nọ ha ịlọhị ẹ-ẹpwụ nya ịgba ọgbagba nya iJihova ọyị ka?

² Olegu ka chị́ịhị pyẹpyẹ myị́, kori ká ụka á chịpwụrụ kam chẹẹ, kahị tị jẹ́ wu ang ịhyẹ ịlẹ kahị chị nọ ha ịlọhị ẹ-ẹpwụ nya ịgba ọgbagba nya iJihova ọyị myị́ ka. Lee ọkịlẹtụ ka kpụhị enyi myị́, kori kahị jẹ́ họ ịngịhyẹ ẹ-ẹpwụ nya ogu nya iJihova ka ọọlaji nyori ahị ri angịgbahị lẹ lee chajị nya iwe-ahụrụ ọkịla ọhẹ. (Etu 13:12) Ịnyị ọ la ẹ-ẹga nya Melissa lẹ. * Ọ ka họ́ọ nyọka họ ụkụrwọ ị-ịBẹtẹlụ lee ọ-ka Ube-ụpwụ nya Angị Kaa Kpa Ẹrụ Ọnyịịla Pyẹ, ma ọ yẹkẹẹ: “M̀ ri ọngọgbahị kpoye nyọka jé-ẹ họ ang ịwẹ lẹ. Ụka ọhẹ, ọkịlẹtụ kaa kpụm enyi.”

3. Ịyẹ angịhyẹ à tị́ baba nyọka họ ene kị ka jẹ́-ẹ la ụkụrwọ ịhyẹ?

³ Anjwo ikolobya bala ịyẹẹnọ ịhyẹ ịlẹ kị la ogogo baba nyọka nwànwà o-olegu bala ọ-mẹ abwẹla ịhyẹ jẹ ene kị ka jẹ́-ẹ ya ụkụrwọ ịkịla ịhyẹ haa nyọka họ. Ịnyịnyị, angịhyẹ juwa kị jẹ́ ang yẹẹyẹẹ,  jẹ́-ẹ chị eje nya ẹla hyaa bala ọ-nwụlanọ nyọka họ ụkụrwọ, ma ọhẹka ị baba nyọka jẹ́ jaabwọ kị ka bwu mẹ ugbodu ojuju jẹ gụ ọwọwa, họ ụkụrwọ nyaa yẹẹyẹẹ, bala ọ-ma ihi ojuju jẹ ẹ-ẹga nya angịkịla. Kori ká ya irya nyang nọ ọọ-ka nwụ́ abwẹla ịhyẹ ịlẹ ká baba, ọhẹka ị ka ya ụkụrwọ ịhyẹ hang lụka ọlẹ ká yahị me ka. Kụ ẹhị ya oja nya Nick wẹẹ. Ụka kọ gu ẹka 20, ọkịlẹtụ kpọọ enyi nyịlẹhị-ịlẹhị nyọlẹ kị hwoo nya ọngọmyẹrụ ka. Ọ yẹkẹẹ, “Ọ lam lala o-ri m̀ họ ẹla ọtịpyọ ọhẹ.” Ma abwọ á chị Nick pyẹpyẹ ka. Ọ họ ụkụrwọ ọlẹ kọ ka jụ họ myị́ ọọjịra-jịra bala ẹrụ ọnyịịla ọ-kpa pyẹ. Lẹẹlẹẹ, ọ ri ọngọhẹ nya Angị Kpẹhị Rịrị Egbeju Ẹpwa lẹ.

4. ḷyẹ ahị tị́ ka kụ ẹhị yẹ a-ang ọjẹ́jẹ ọlẹ?

⁴ Ọkịlẹtụ juwa kpụng enyi ọọlajị nyori á jẹ́ wu ang ịhyẹ ịlẹ ka chị nọ ha ịlọng ẹ-ẹpwụ nya ịgba ọgbagba nya iJihova ọyị lẹka? Kori kọ lịnyị aalẹ, raabwọ ha iJihova, ká ya joo jaabwọ kọ lang. (Eje. 37:5-7) Ọ-da ọọwa u-uhye, tọ aanahị alẹng ịlẹ kị nwànwà o-olegu wo nya ang ọlẹ á ka jẹ́-ẹ họ nyọka nwà kịlahị ẹ-ẹpwụ nya ịgba ọgbagba nyang ha iJihova, ká maga nyọka kpa ẹla ọmẹjẹ nyaa ọọwa họ ụkụrwọ. Kori ká họ ịnyị, à ka la iwe-ahụrụ ọlẹ ká wẹẹ tịtọ lee o-wu ang ọlẹ ká wẹẹ ku ọyị. Ma lala Melissa, ọlẹ kahị ya ẹla rụ́ lẹẹ ene, ọhẹka á ka jẹ́-ẹ họ ang ọlẹ ká wẹẹ tịtọ nyọka họ ha iJihova kaka. Ịyẹ a tị́ ka jẹ́-ẹ họ nyọka kịnyaa la o-yé ọkẹkẹnị? Nyọka wẹ ịtọ ẹla ọwe, ang ọjẹ́jẹ ọlẹ ka ya ẹla u-uhye nya (1) ang ọlẹ kọ ka ya ọkẹkẹnị hang, (2) abwọlẹ á ka bwu yé ọkẹkẹnị gụ ọwọwa, bala (3) ang ịlẹ á ka jẹ́-ẹ họ nyọka ya ọkẹkẹnị hang gụ ọwọwa.

5. Nyọka yé ọkẹkẹnị, ịyẹ ahị tị́ ka ya irya nyahị nọ? (Ọngọlirya 6:9)

⁵ Ụpwụ nya Ọngọlirya 6:9 ya ang ọlẹ kọ ka dahị ụbwọ nyọka yé ọkẹkẹnị. (Wọọ.) Ang kaa myị̀ ọngịnyị lẹhị kori kọ ya irya nyamwụ nọ ẹ-ẹga nya “ang ọlẹ [kọ] la ji ụbwọ,” ang lala iwe-ahụrụ ọlẹ kọ ji lẹẹlẹẹ. Ma, ang á kaa nwà ọngọlẹ kọ juwa tịtọ nya ang ọlẹ kọ mọọ ma, kọ tị́ ka la ang ọọwa myị́ ẹnẹnẹhẹ ka lẹ ka. Lẹ, ẹlịyẹ ahị tị́ ka jẹ́ bwu ọọwa? Nyọka yé ọkẹkẹnị, ahị baba nyọka ya irya nyahị nọ ẹ-ẹga ang ọlẹ kahị la ọkọkọ nyọka ya nọ u-uhye nya ang ọlẹ kahị ka jụ la ka.

6. Oja ọ-chụ pwokwita oyina ahị tị́ wẹẹ ka kụ ẹhị yẹ? Ẹlịyẹ ahị tị́ wẹẹ ka jẹ́ bwu ụwa?

⁶ Ọ chịkpẹẹ ká ang ọlẹ ká la juwa ene-ene lẹ ka nwang? Angịnyị lụmẹ-lụmẹ ya nyori nyị́ chịkpẹẹ ka, chajị ọ kaa háahị nyọka juwa họ ang inyeewe-inyeewe. Ma, ọ chịkpẹẹ ọ ka jẹ́-ẹ lịnyị. Ahị ka jẹ́-ẹ yé ọkẹkẹnị ẹ-ẹpwụ nya ang ịlẹ kahị la ji ụbwọ lẹẹlẹẹ” ịnyịlẹhị. Ányị ahị tị́ ka bwu họ ịnyị? Nyọka jẹ́, ahị kụ ẹhị yẹ oja ọ-chụ pwokwita nya iJisọsị u-uhye nya okpoko ọlẹ ká ọlẹng ọhẹ ya ha anchẹ nyamwụ ụ-ụwa ụ-ụpwụ nya ịMatiyu 25:14-30 wẹẹ. Ahị ka jẹ́ ang u-uhye nya abwọle kahị ka bwu yé ọkẹkẹnị bala ọ-dọmwụ chị ọkẹkẹnị gụ ọwọwa ẹ-ẹpwụ nya ahị ọwawa ịlẹ kahị la lẹẹlẹẹ.

7. Joja ọlẹ ká iJisọsị kpa chụ ẹla pwokwita wẹẹ?

⁷ Ẹ-ẹpwụ nya oja ọ-chụ pwokwita ọwẹ, ọlẹng ọhẹ tịtọ kọ ka ka anyị. Ene kọ ka rụ, ọ wụrụ anchẹ nyamwụ, lẹ ọ ya okpoko ha ọngọngọọngu nyaa kị ka kpa dọhị lẹlẹ. * Ọlẹng ọwẹ jẹ́ nyori ẹla ọjẹ́jẹ nya anchẹ nyamwụ ịwẹ nyị datị-datị, lẹ ọ hu ụnọ nya okpoko ịrụ ha ọnchẹ ọhẹ, ọ hu ụnọ imiiye ha ọnchẹ ọkịla, ọọwa lẹ, ọ hu ụnọ ookpokpo ha ọnchẹ ọhata lẹlẹ. Anchẹ imiiye nya ọgbanyẹ ịwẹ kpa okpoko ọlẹ kị ya jwaa ụ-ụbwọ dọhị yẹẹyẹẹ chajị nyọka yé apyobwuna ha ayịbaa. Ma, ọnchẹ ọhata ọwa á kpa okpoko ọlẹ kị ya họọ wẹ họ ịngịngịhyẹ ka. Chajị nyọọwa, ayịbamwụ kwoo hi ụkụrwọ.

8. Ịye tị́ du ká ọnchẹ ọhọhẹ ọla oja ọwẹ ka chị ọkẹkẹnị yẹẹyẹẹ?

 ⁸ Ọ ka kpa ọnchẹ ọhọhẹ ịpyọ yẹẹyẹẹ nyọlẹ ká ayịbamwụ ya ụnọ nya okpoko ịrụ họọ. Okpoko ọtụka-ọtụka à wẹ lẹ, ọ tị mẹjẹ jaabwọ ká ayịbamwụ dahịhiloo kaka ba! Ma, ọnchẹ oheeye ọọwa tị bẹẹ? Ọkịlẹtụ ka kpọọ enyi ịnọ nyọlẹ kị ya okpoko họọ lala ọnchẹ nya ọgbanyẹ ka. Ma anyị ọ tị́ họ?

9. Ẹlịyẹ ọnchẹ oheeye ọwẹ à tị́ họ ka? (ỊMatiyu 25:22, 23)

⁹ Wa ịMatiyu 25:22, 23. IJisọsị-ị́ ya nyori ọnchẹ oheeye ọwẹ nyị wẹẹjẹ nyịlẹhị-ịlẹhị bala o-ju agbama chajị nyọlẹ kị ya ụnọ nya okpoko imiiye họọ kem ka. Ịnyịnyị, iJisọsị-ị́ ya nyori ọnchẹ ọwẹ nyị juwa mwala ya ka, lala: ‘Ịyẹ tị́ du ká ayịbam ka ya okpoko ham weji gụ? M̀ kaa họ ụkụrwọ yẹẹyẹẹ lala ọnchẹ ọlẹ kọ ya ụnọ nya okpoko ịrụ ha wẹ! Kori ká ụkụrwọ nyam á myọọ lẹhị kaka lẹ aalẹ, m̀ ka kpa ụnọ nya okpoko imiiye ọlẹ kọ ya ham wẹ kaka chị ụjẹ ju eji, kam ka rụ kaka họ ụkụrwọ nyịlọm lẹ.’

10. Ịyẹ ọnchẹ oheeye à tị́ kpa okpoko ọlẹ kị ya họọ họ?

¹⁰ Lala ọnchẹ ọhọhẹ, ọnchẹ oheeye ọwẹ jẹ́ nyori ụkụrwọ ọlẹ ká ayịbamwụ ya jwoo ụ-ụbwọ wẹ nyị baba yẹẹyẹẹ, bala ọ-họ ụkụrwọ yẹẹyẹẹ ha ayịbamwụ. Chajị nyọọwa, ọ yé apyobwuna ta ọmwụ nya okpoko ọlẹ ká ayịbamwụ ya họọ meme. Ayịbamwụ nwọọ uri u-uhye nya ụkụrwọ ọ-jụ họ yẹẹyẹẹ nyamwụ. Ayịbamwụ á chị ọkẹkẹnị kem ka, ọ mịla oja họọ bala ọ-ya ụkụrwọ ọ-gụ ọọwa gụ họọ!

11. Ányị ahị tị́ ka bwu yé ọkẹkẹnị gụ ọwọwa?

¹¹ Ịnyịnyị, ahị ka yé ọkẹkẹnị gụ ọwọwa bwula ọ-họ ụkụrwọ ọnyị myị́ ọnyị ọlẹ kị ya hahị nyị họ ẹ-ẹpwụ nya ịgba ọgbagba nya iJihova yẹẹyẹẹ jaabwọ kahị ka jụ họ kaka ba myị́. Kpa  ọngịrị nyang wuu ya ẹla nya Ohe bala ọ-họ ụkụrwọ yẹẹyẹẹ ọọjịra-jịra. (Ụkụr. 18:5; Hib. 10:24, 25) Nwụlanọ yẹẹyẹẹ gbe ọjịra-jịra chajị ká ka jẹ́-ẹ wẹ ịtọ ẹla ụ-ụgbẹyị ọlẹ kọ ka jẹ́-ẹ ju angịnyị ọhụ. Hu ụpa ọnyị myị́ ọnyị ọlẹ kị ya hang nyọka họ ọọjịra-jịra ọlẹpwụ nya epwihi nya ang ọlẹ kọ baba yẹẹyẹẹ. Kori kị ya ahụ nyị dụbwọ họ ụkụrwọ ọhẹ ọọjịra-jịra, maga ká họọ lụka bala ọ-họ kị ka jẹ́-ẹ dahịhileng. A yẹhi da ụkụrwọ ọlẹlẹhẹ ọlẹ kị ya hang bwee lala o-ri nyị́ baba nya ahụ ọ-ka bịrị ụka jwoo ka lẹ ka. Maga nyọka nwà kịlahị-ịlahị ẹ-ẹpwụ nya ụkụrwọ nyang. (Etu 22:29) Jaabwọ ká wẹẹ họ ụkụrwọ ha iJihova yẹẹyẹẹ, ịnyịnyị a ka nwà kịlahị hyaa ẹ-ẹpwụ nya ang nya olegu bala o-yé ọkẹkẹnị gụ ọwọwa lẹ. (Gal. 6:4) Ịnyịnyị, ọ ka chịng kpẹẹ nyọka chị ọkẹkẹnị bala angịkịla ụka kị la iwe-ahụrụ ọhẹ ọlẹ káahụ ayịdang tịtọ​—Rom. 12:15; Gal. 5:26.

12. Ịyẹ à tị́ da Melissa bala Nick ụbwọ nyọka yé ọkẹkẹnị gụ ọwọwa?

¹² À kpịtịya nya Melissa ọlẹ kọ tịtọ nyọka họ ụkụrwọ ị-ịBẹtẹlụ lee ọ-ka Ube-ụpwụ nya Angị Kpa Ẹrụ Ọnyịịla Pyẹ wẹẹ? Nanana nyori ọoọwa á chịkpẹẹ họọ ka, ọ yẹkẹẹ: “M̀ maga nyọka họ ọlẹ ḿ ka jụ họ myị́ ẹ-ẹpwụ nya ịlahị nya ụgbẹyị oyeye nyam bala ọ-kpa ẹrụ ọnyịịla pyẹ a-agbẹyị ịdatị-datị. Ọọwa ya ọkẹkẹnị ọtụka-ọtụka ham.” Ányị Nick à tị́ bwu bọhụ myị́ ẹ-ẹpwụ nya ọkịlẹtụ ọ-kpụ enyi ụka ọlẹ kị hwoo nya ọngọmyẹrụ ka? Ọ yẹkẹẹ: “M̀ ya irya nyam nọ a-ang ịlẹ kam ka jẹ́-ẹ họ, lala ọ-kpa ẹrụ ọnyịịla pyẹ bala ọ-wẹ ịtọ ẹla o-ju angịnyị ọhụ ọọjịra-jịra. Ịnyịnyị, m̀ yụbwọ ju ụpwụ ẹ-ẹpwụ nyọka họ ụkụrwọ ị-ịBẹtẹlụ, ị tị yem ẹka ọ-ba ọọwa ba.”

13. Ịyẹ à tị́ ka họ kori kahị họ ụkụrwọ ọlẹ kahị la lẹẹlẹẹ yẹẹyẹẹ? (Ọngọlirya 2:24)

¹³ Kori ká họ ụkụrwọ ọlẹ ká la lẹẹlẹẹ yẹẹyẹẹ, ị ka ya ụkụrwọ ọ-gụ ọọwa gụ hang ị-ịlahị? Ọ ka lịnyị myị́, jaabwọ kọ la ẹ-ẹga nya Nick. Ma kori kọ dọmwụ lịnyị ka wẹwẹ, lala Melissa, à ka jẹ́-ẹ yé ọkẹkẹnị gụ ọwọwa, bala ọ-chị ọkẹkẹnị ẹ-ẹpwụ nya ang ọlẹ ká jẹ́ wẹẹ họ ha iJihova. (Wa Ọngọlirya 2:24.) Ịnyịnyị, à ka yé ọkẹkẹnị ọtụka-ọtụka nya ọ-jẹ́ nyori à wẹẹ họ ẹla kpụ Ayịbaba nyahị, iJisọsị ịKịrayịsị ịpyọ.

14. Ẹlịyẹ ahị tị́ ka kpa i-irya ụka myị́ ụka ẹ-ẹga nya ang ịlẹ kahị chị nọ ha ịlọhị nyọka họ ha iJihova?

¹⁴ Ọ-ya irya nyahị nọ ẹ-ẹga nya ụkụrwọ ọlẹ kahị la lẹẹlẹẹ mẹjẹ nyori ahị ka hwabwọ la ọ-mwahị nya agbẹyị inyeewe ịlẹ kahị ka jẹ́-ẹ bwu họ ụkụrwọ ha iJihova gụ ọwọwa? Ehe! Ahị ka jẹ́-ẹ hu ang ịlẹ kị ka dahị ụbwọ nyọka ri angị jẹ́-ẹ kpa ẹrụ ọnyịịla pye yẹẹyẹẹ bala ọ-mẹ ang jẹ nọ ha ịlọhị nyọka họ. Ahị ka jẹ́-ẹ họ ang ịịwa myị́, kori kahị ya irya nyahị nọ ọọ-ka da angịkịla ụbwọ ọkọko nyọka ya irya nọ u-uhye nyịlọhị.​—Etu 11:2; Ụkụr. 20:35.

15. Ang iyina a tị́ jẹ́-ẹ họ nyọka yé ọkẹkẹnị gụ ọwọwa?

¹⁵ Ang iyina a tị́ ka jẹ́-ẹ họ myị́? Raabwọ ha iJihova kọ ka dang ụbwọ nyọka jẹ́ ang ịlẹ á ka jụ họ myị́. (Etu 16:3; Jem. 1:5) À ka jẹ́-ẹ maga nyọka họ ọhẹ lẹpwụ nya ang ịlẹ kị gu ẹnyị  ọ-ọgba ọhọhẹ nya ang ọjẹ́jẹ ọlẹ, kọ ri ọ-ka chịchịịchị ye ịlahị nya ụgbẹyị lee o-ye ịlahị nya ụgbẹyị kpụrụrụ, ọ-họ ụkụrwọ ị-ịBẹtẹlụ, lee ọ-la ụbwọ ẹ-ẹpwụ nya ụkụrwọ nya ebe nya ẹla nya Ohe Oluhye ịnwụ́nwụ́? Lee ọhẹka à ka jẹ́-ẹ jẹ́ òja ọkịla lee ọ-rụ ka ọpyị ọkịla kaka kpa ẹrụ ọnyịịla pyẹ u-ụwa myị́. À ka jẹ́-ẹ jẹ́ ang gụ ọwọwa u-uhye nya ang ịhyẹ ịlẹ kahị gu ẹnyị wẹ bwula ọ-yẹ egbeju nya ẹla 10 nya ụpwụ nya Organized to Do Jehovah’s Will bala o-ya ẹla bala angịgbahị nya ọjịra-jịra nyang. * Jaabwọ ká wẹẹ maga nyọka wu ang ịwẹ ọyị, angịkịla ka  yẹ nyori à juwa nwà kịlahị-ịlahị, ọkẹkẹnị nyang tị ka gụ ọwọwa.

16. Ịyẹ a tị́ ka jẹ́-ẹ họ kori ka jẹ́ wu ang ọhẹ ọlẹ ká chị nọ ha ịlọng ọyị lẹẹlẹẹ ka?

¹⁶ Ma, kori kọ chịkpẹẹ hang lẹẹlẹẹ nyọka họ ang ọhẹ lẹpwụ nya ịlẹ kahị gu ẹnyị wẹ ka bẹẹ? Maga nyọka họ ang ọkịla ọhẹ ọlẹ ká jẹ́ nyori à ka jụ́ họ myị́. Kụ ẹhị yẹ ang ịhyẹ ịlẹ á ka jẹ́-ẹ họ lẹẹ wẹẹ.

17. Jaabwọ ká ụ-ụpwụ nya 1 iTimoti 4:13, 15 ya, ányị ọọnahị ọlẹng à tị́ ka jẹ́-ẹ họ ụkụrwọ jahị da ọ-ka ri ọngọmẹjẹ ọlam-ọlam?

¹⁷ Wa 1 iTimoti 4:13, 15. Kori ká ri ọọnahị ọlẹng ọlẹ ká hu ẹnyị Ohe lẹ, à ka jẹ́-ẹ họ ụkụrwọ jahị da ọ-ka nwà kịlahị-ịlahị ẹ-ẹpwu nya ẹla oyaya bala ang ọmẹjẹ nyang. Ịyẹ tị́ du? Chajị ahụ ọ-yẹhị ju ụkụrwọ nya ụpwụ ọwawa, ẹla oyaya, bala ang ọmẹjẹ ka ri ahị ọwawa ha angị wẹẹ ke ụrụ lang. Lẹ, maga ká hu nọ ha ịlọng nyọka jẹ́ ang bwu egbeju ọnyọnyọọnyị ụ-ụpwụ nya Họ Ụkụrwọ nya Ụpwụ Ọwawa Bala Ang Ọmẹjẹ bala ọ-kpa họ ụkụrwọ. Hu egbeju ookpokpo-ookpokpo nọ nyọka jẹ́ ang u-uhye nyamwụ, kpa ma họ yẹẹyẹẹ ju ịlọng ẹ-ẹpwa, bala ọ-maga nyọka kpa họ ụkụrwọ ẹ-ẹpwụ nya ụpa nya ẹla oyaya ọlẹ kị ya hang nyị họ. Wo irya nya ọngọ ju angị la ụpa irya lee ọngọgbahị nya ọjịra-jịra “ọlẹ kọ jẹ́-ẹ ya ẹla bala ọ-mẹ ang jẹ yẹẹyẹẹ.” * (1 Tim. 5:17) A ya irya nyang nọ ọọ-ka jẹ́ jaabwọ ọlẹ á ka kpa ẹhị nya ẹla ịwẹ họ ụkụrwọ kem ka, ma da angị wẹẹ ke ụrụ lang ụbwọ nyọka ju ọmyịmyi nyaa ọngịrị ịnyịnyị lee o-gwaa gbịla nyọka họ ẹla ọhẹ. Bwula ọ-ho ịnyị, ahụ bala ịwa ka yé ọkẹkẹnị gụ ọwọwa.

18. Ịyẹ à tị́ ka dahị ụbwọ nyọka jẹ́-ẹ họ ụkụrwọ nya ẹrụ ọnyịịla ọ-kpa pyẹ yẹẹyẹẹ gụ ọwọwa?

¹⁸ Ahị wuu la ụkụrwọ nyọka kpa ẹrụ ọnyịịla pyẹ bala ọ-họ ká angịkịla ka ri angịjụgbẹyị.  (Mat. 28:19, 20; Rom. 10:14) Ọ ka háng nyọka ka jẹ́-ẹ họ ụkụrwọ ọbaba yẹẹyẹẹ ọwẹ gụ ọwọwa? Jẹ́ ụpwụ nya Ang Ọmẹjẹ, ká chị nọ ha ịlọng ang ọlẹ kọ ka dang ụbwọ kpa ẹla ọlẹ ká jẹ́ họ ụkụrwọ. Ịnyịnyị, à ka jẹ́-ẹ yé ẹla ịlẹ kị ka jẹ́-ẹ dang ụbwọ bwu Ụpwụ ọ-Kpa Jẹ́ Ang nya Ọhịhị Bala Ụkụrwọ Nyahị Ahị Angịnyị nya ỊKịrayịsị bala ifim nya ụgbẹyị ọlẹ áhị ka bwu ya ẹla ịlẹ kị kaa mẹjẹ ọọjịra-jịra nyahị ọlẹpwụ nya epwihi. Maga nya agbẹyị ịdatị-ịdatị nyọka jẹ́ ọlẹ kọ ka họ ụkụrwọ hang. Bwula ọ-kpa irya ị-gba kpehe ịwẹ họ ụkụrwọ, à ka ri ọngọ jẹ́-ẹ kpa ẹrụ ọnyịịla pyẹ bala ọ-mẹ ang jẹ yẹẹyẹẹ, ọọwa tị ka ya ọkẹkẹnị hang gụ ọwọwa.​—2 Tim. 4:5.

19. Ányị a tị́ ka bwu nwụ́ abwẹla nya Ọngịnyị nya ịKịrayịsị oriri?

¹⁹ Ụka ká juwa chị nọ ha ịlọng ang ịlẹ á ka họ, a deeri nya ọlẹ kọ baba gụgụ wuu ka​—ọ-ka nwụ́ abwẹla nya Ọngịnyị nya ịKịrayịsị oriri. (Gal. 5:22, 23; Kol. 3:12; 2 Pit. 1:5-8) Ányị a tị́ ka bwu dọmwụ? Ọ-chụ pwokwita, ọhẹka à tịtọ nyọka nwụ́ ọmyịmyị ọnyọọngịrị. À ka jẹ́-ẹ wa egbeju nya ẹla ịlapwụ nyahị ịlẹ kị ya ẹla u-uhye nya abwọlẹ áhị ka bwu ju ọmyịmyị nyahị ọngịrị. Ịnyịnyị à ka yé apyobwuna bwula ọ-ya ụpa ịhyẹ nya ifim nya JW Broadcasting^® ịlẹ kị mẹjẹ jaabwọ ká aanahị alẹng bala anyang mẹ ọmyịmyị ọnyọọngịrị jẹ nyọlẹ kị juwa chịpwụrụ bwu ẹpwụ nya ịmayẹ ịdatị-datị. Kụ ẹhị yẹ abwọlẹ á ka bwu gbịla ọgụ-ẹpẹtẹ nya ọmyịmyị nyaa ẹ-ẹpwụ nya ọhịhị nyang.

20. Ányị ahị tị́ ka bwu yé ọkẹkẹnị gụ ọwọwa bala ọ-ka cheji ba hi irya ọtịpyọ ọlẹ kahị ka la myị́ chajị nya ọ-jẹ́ họ jaabwọ kahị tịtọ ka?

²⁰ Ịwẹẹ ọdada á juwa ka, ọ há ọng myị́ ọng nyahị wuu nyọka họ ụkụrwọ ha iJihova gụ ọlẹ kahị wẹẹ họ lẹẹlẹẹ. Ụ-ụwa odehe onyeewe, ahị ka jẹ́-ẹ họ ụkụrwọ họọ pwụ ọbaba. Gbee ka da ụka ọọwa, kori kahị họ ọlẹ áhị ka jụ họ myị́ lẹẹlẹẹ, ahị ka yé ọkẹkẹnị gụ ọwọwa bala o-cheji ba hi irya ọtịpyọ ọlẹ kahị ka la myị́ chajị nya ọ-jẹ́ họ jaabwọ kahị tịtọ ka. Ọlẹ kọ tị baba gụgụ wuu ri, ahị ka kpa ihi bala ogbo kịla iJihova “Ohe nya ọkẹkẹnị” nyahị. (1 Tim. 1:11, NW ) Lẹ, ahị yé ọkẹkẹnị ẹ-ẹpwụ nya ang ịlẹ kahị jẹ́ wẹẹ họ ha iJihova mẹ!