1. Ịyẹ iJihova à tị́ họ hang?

ÁNYỊ a tị́ bwu wẹ ka ri ọngọhẹ nya Alibeenu nya iJihova? Ọhọhẹ, à wo oja nya “ẹrụ ọnyịịla.” Ọhẹka, à wo oja ọọwa bwu ẹga nya adang bala ịnang, ọngọhẹ ọ-ọlụkụrwọ nyang lee alube-ụpwụ nyang, lee ụka ká Alibeenu nya iJihova wẹẹ ya ẹla nya Ohe kị pwụ ẹpwa nyang. (Mak. 13:10) Ọọwa lẹ, ọngọhẹ à bịrị ụka yẹẹyẹẹ juwa maga nyọka mẹ ịBayịbụụ jẹ́ng lẹlẹ. Lụka nya ang ọjẹ́jẹ ọọwa, à wẹ ka la ọháha ẹ-ẹga nya iJihova bala ọ-jẹ́ nyori ahụ nyị họ́ọ ịnyịnyị. IJihova à wụrụng wẹ ẹpwụ nya ẹlịlẹhị lẹ, ọlẹẹlẹẹ ká tị ri ọngọjụgbẹyị nya ịKịrayịsị wẹẹ, à la ahị ọ-dahile nyọka hịhị gboyi myị́ oyi lẹ. (Jọn. 6:44) Ịwẹẹ ọdada á juwa ka, ọ myịng lẹhị nyọlẹ ká iJihova gu ọngọhẹ gbịla nyọka mẹ ẹlịlẹhị jẹ́ng bala ọlẹ Kọ yeng myị ka ri ọngọhẹ nya anchẹ nyamwụ.

2. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

² Nyọlẹ kahị jẹ́ ẹlịlẹhị lẹ wẹẹ, ahị la iwe nyọka da angịkịla ụbwọ kị ka wẹ ka julahị ụ-ụgbẹyị nya ọhịhị. Ọ kaa chịhị kpẹẹ nyọka ya ẹla nya Ohe bwu ẹpwa ka ẹpwa, ma ọ tị ka lahị ujwo nyọka tọ ọngịnyị wo kori kọ tịtọ nyọka jẹ́ ịBayịbụụ balahị lee ahị ọ-ka dọmwụ nya ịBayịbụụ ọjẹ́jẹ bala ọngọọwa myị́. Ịnyị ọ kaa lang lẹ? Ó ri ịnyị aalẹ, ọhẹka irya ọ-gba kpehe ịlẹpwụ nya ang ọjẹ́jẹ ọlẹ ka dang ụbwọ. Ahị ka ya ẹla u-uhye nya ang ọlẹ kọ kaa guhị gbịla nyọka da angịnyị ụbwọ wẹ ka ri angịjụgbẹyị. Ahị ka myịmyị-ị̀ kụ ẹhị yẹ abwọlẹ kahị ka bwu kụrụ akama ịlẹ kị ka wuhi kpa la ọ-ka mẹ ịBayịbụụ jẹ ọngịnyị myị́. Nyọka dọmwụ, ahị kụ ẹhị yẹ ang odudu ọlẹ kahị ka ya ẹrụ ọnyịịla je angịnyị bala ọ-ka mẹ ang jáa pyii ịnyịnyị wẹẹ.

3. Ịyẹ tị́ du kahị kaa ya ẹla nya Ohe?

³ Ụka ká iJisọsị jam odehe ọlẹ, ọ ya ụkụrwọ ọlẹ kọ la apa imiiye ha angịjụgbẹyị nyamwụ. Họhẹ, o byaa nyị ya ẹrụ ọnyịịla nya Ịpyị-Adịrahụ je angịnyị, ọ tị mẹ abwọlẹ kị ka bwu họ ụkụrwọ ọwẹ jáa ịnyịnyị. (Mat. 10:7; Luk. 8:1) Ọ-chụ pwokwita, iJisọsị mẹ abwọlẹ kị ka họ jáa ụka ká angịnyị á ke ụrụ wọ la ẹla nya Ịpyị-Adịrahụ bala ụka kị myị ke ụrụ ka. (Luk. 9:2-5) Ọ myị́myị́ ya jaabwọ kị ka kpa ẹrụ ọnyịịla ọwẹ pyẹ hwẹẹ kaka ba nyọlẹ ko ya nyori nyị ka ri “ang nya ibeenu ha alepwoja myị́ epwoja wuu.” (Mat. 24:14; Ụkụr. 1:8) Kori ká angịnyị-ị́ myị ke ụrụ wọ la ẹla ọọwa lee ị́ myị ke ụrụ wẹwẹ ka, angịjụgbẹyị nya iJisọsị la ụkụrwọ nyọka ya ẹla nya Ịpyị-Adịrahụ nya Ohe Oluhye bala ang ọlẹ kọ ka họ je angịnyị.

4. Jaabwọ ká ụpwụ nya ịMatiyu 28:18-20 ya, ịyẹ ahị tị́ ka họ dala o-ya ẹla nya Ịpyị-Adịrahụ?

⁴ Ịyẹ à tị́ ri ụpa oheeye nya ụkụrwọ ọlẹ ká iJisọsị ya ha angịjụgbẹyị nyamwụ? O byi angịlẹ kị wẹẹ bọọ jẹ nyị mẹ ang jẹ angịnyị kị ka kpa ehile nyamwụ wuu họ ụkụrwọ. Ma ụkụrwọ nya ẹrụ ọnyịịla ọ-kpa pyẹ bala ang ọmẹjẹ ri ịnya angịjụgbẹyị nya iJisọsị ịla oyi ọhọhẹ kem jaabwọ ká angịhyẹ kaa ya? Ehe, iJisọsị mẹjẹ nyori ụkụrwọ o-ju apyobwuna ọwẹ nyị ka kịnyaa da ụka nyahị, dọmwụ “gbee pwụ ọbaba nya odehe ọlẹ.” (Wa ịMatiyu 28:18-20.) Ọ lala o-ri ụka ọlẹ ká iJisọsị hu ta angịjụgbẹyị nyamwụ ịlẹ kị ju iru kpoye nya ohu ịrụ (500) ọ ya ụkụrwọ ọwẹ haa lẹ. (1 Kọr. 15:6) Ẹ-ẹpwụ nya ẹla ọlẹ ká iJisọsị wụrụ mẹjẹ ịJọn, ọ myịmyị họ kọ la gede-gede nyori ọ tịtọ ká angịjụgbẹyị nyamwụ wuu ka da angịkịla ụbwọ nyọka jẹ́ ang u-uhye nya iJihova.​—Ọwụ. 22:17.

5. Jaabwọ ká ụpwụ nya 1 Ala ịKọrịntị 3:6-9 ya, ẹlịyẹ ịPọlụ à tị́ chụ pwoku kọ mẹjẹ nyori ẹla nya Ohe oyaya bala ang ọmẹjẹ da ori wu awụlẹ?

⁵ Ọlẹrụ ịPọlụ chụ ụkụrwọ nya ọ-họ ká angịnyị ka ri angịjụgbẹyị kaka pwoku abwọlẹ kị kaa ya ugbe nya ang tọ. Ọ mẹjẹ nyori ụkụrwọ nyahị á ba ọọ-ka ya egbe nya ang tọ ị-ịwẹ kem ka. Ọ kpa ala ịKọrịntị ịtịya yẹkẹẹ: “Ohe Oluhye dum ẹrụ warị kaka ya ugbe nya ẹrụ ọnyịịla nyamwụ tọ ẹpwarịrị nyanụ ene kọọ du Apolosi warị kaka da enyi jwoo. . . . Anụ ayịdang a tị ri ẹrụ nya Ohe Oluhye ọlẹ ko duuhi ẹrụ kaka tọ ugbe ụ-ụwa lẹlẹ.” (Wa 1 Ala ịKọrịntị 3:6-9.) Ahị ri angị họ ụkụrwọ ịlẹpwụ nya “ẹrụ nya Ohe Oluhye.” Lẹ ahị kaa ya ugbe nya ang tọ bwula o-ya ẹla nya Ohe je angịnyị bala ọ-da enyi ju ang ọọwa ụka kahị mẹ ang jẹ angịịwa. (Jọn. 4:35) Ma ahị tị jẹ́ ịnyịnyị nyori Ohe Oluhye à ri ọngọlẹ kọ wẹẹ kpa ang ọọwa nwà bwula ọ-wụrụ angịnyị wẹ ẹga nyamwụ lẹ.

6. Ụka kahị ja mẹ ang jẹ angịnyị, ịyẹ ahị tị́ ka daa ụbwọ nyọka họ pyii?

⁶ Ahị wẹẹ mwahị nya angịlẹ kị “chịla-chịla nyọka la ọhịhị ọmyịmyị-ka.” (Ụkụr. 13:48, NW ) Nyọka da angị ịlịnyị ụbwọ wẹ ka ri angịjụgbẹyị, o ri o-pyii kahị ka daa ụbwọ nyọka (1) wo etu nya ẹla ọlẹ kị wẹẹ jẹ́ bwu ịBayịbụụ, (2) myị ju ẹla ọọwa bala (3) ọ-kpa ẹla ọọwa họ ụkụrwọ. (Jọn. 17:3; Kol. 2:6, 7; 1 Tẹs. 2:13) Ọng myị́ ọng ẹ-ẹpwụ nya ọjịra-jịra ka jẹ́-ẹ da angịlẹ kị wẹẹ jẹ́ ịBayịbụụ ụbwọ bwula ọ-mẹ ọháha jẹ ẹ-ẹga nyaa bala ọ-daa ọwụraba ụka kị wẹ ọjịra-jịra. (Jọn. 13:35) Ọngọlẹ kọ wẹẹ mẹ ịBayịbụụ jẹ ọngịnyị ka bịrị ụka bala ọngịrị yẹẹyẹẹ myị́ nyọka dọọ ụbwọ kọ ka tụụbwọ hi ang ịlẹ kọ myị ju bala abwẹla ịlẹ kị bọọ ahị ene. (2 Kọr. 10:4, 5) Ọ ka pwụ ọya lụmẹ-lụmẹ myị́ ene nyọka jẹ́-ẹ da ọngịnyị ụbwọ yẹ ọhịhị nyamwụ da pwụ ụbẹẹtụ ọlẹ kọ ka nwa nyọka hụ enyi Ohe. Ma ọyẹda ọlịnyị tị ju apyobwuna yẹẹyẹẹ.

7. Ịyẹ à tị́ kaa guhị gbịla nyọka ya ẹla nya Ohe je angịnyị bala ọ-mẹ ang jáa kị ka ri angịjụgbẹyị?

⁷ Ịyẹ tị́ du kahị kaa ya ẹla nya Ohe je angịnyị bala ọ-mẹ ang jáa kị ka ri angịjụgbẹyị? Ọhọhẹ,  chajị iJihova háahị. Kori ká ju ihi nya ehile nyọka ya ẹla nya Ohe bala ọ-họ ká angịkịla ka ri angịjụgbẹyị la ọngịrị nyang wuu aalẹ, à wẹẹ mẹjẹ nyori à la ọháha ẹ-ẹga nya Ohe Oluhye. (1 Jọn. 5:3) Kụ irya nya ẹla ọlẹ wẹẹ: Ọháha ọlẹ ká la ẹ-ẹga nya iJihova gung gbịla nyọka ya ẹla nya Ohe bwu ẹpwa ka ẹpwa ene-ene lẹ. Ọ chịkpẹẹ lụmẹ nyọka ju ihi nya ehile ọwẹ? Ọ́ chịkpẹẹ lụmẹ ka. Ụka ọlẹ ká kpehe nya ẹla Ohe oyaya ụka ọhọhẹ, à chuko? Ee! Ma à tị jẹ́ nyori ụkụrwọ ọlẹ ká iJisọsị tịtọ ká ka họ à wẹ ẹẹ, lẹ à ju ihi nya ehile ọwẹ. Nyọlẹ ká tị kịnyaa la o-ya ẹla nya Ohe kịlahị, ọ wẹẹ chịng kpẹẹ gụ olene. Ma ẹla nya ịBayịbụụ ọmẹjẹ ọngịnyị tị bẹẹ? À kaa juhi kori ká kụ irya u-uhye nya ọọwa? Ọ ka lịnyị myị́. Ma kori ká raabwọ ha iJihova, bịlọọ nyọka dang ụbwọ la ugbodu ojuju, ká tị ya ẹla nya ịBayịbụụ ọjẹ́jẹ ta ọngịnyị ịnyịnyị aalẹ, ọ ka dang ụbwọ la irya nyọka họ ká angịnyị ka ri angịjụgbẹyị.

8. Jaabwọ ká ụpwụ nya ịMakị 6:34 ya, ang ọkịla oyina à tị́ ka guhị gbịla nyọka mẹ ang jẹ angịkịla?

⁸ Oheeye, ọháha ọlẹ kahị la ẹ-ẹga nya angịnyị kaa guhị gbịla nyọka mẹ ẹlịlẹhị jáa. Ụka ọhẹ juwa ká ịnyịrọ chị iJisọsị bala angịjụgbẹyị nyamwụ pyẹpyẹ ọọlajị nyọlẹ kị họ ụkụrwọ nya ẹla Ohe oyaya yẹẹyẹẹ. Ị baba nya ẹga ọhẹ kị ka mwịịnyọ, ma iru nya angịnyị tị baa ka ụwa. Angịịwa la iJisọsị ahyẹẹrwẹrwa lẹ, ọ dọmwụ nyọka mẹ “ang lụmẹ-lụmẹ” jáa lẹlẹ. (Wa ịMakị 6:34.) Ọ gba ọngịrị nyamwụ kpehe wuu ụka ọwẹ. Ịyẹ à tị́ du? IJisọsị ya ịlọmwụ juwa ẹ-ẹpwụ nya iwe-ahụrụ nya aliru ịwẹ. Ọ yẹ jaabwọ kị wẹẹ yẹ akama kaka ba​—abwọle kị baba nya ẹhị ọrịrịị-rịrị kaka ba​—lẹ ọ tịtọ nyọka daa ụbwọ. Angịnyị ji ẹpwụ nya iwe-ahụrụ ọlịnyị alẹ. A myị ká abwọlẹ kị la ẹ-ẹhị a pịrịng ju ka. Ị lala ịkpịlọ ịlẹ kị byi, kị la ọngọgbikpịlọ ọlẹ kọ ka kpaa ụgbẹyị ka. Ọlẹrụ ịPọlụ chabwọ nya angịnyị ịlịnyị lala angịlẹ kị jẹ́ Ohe ka bala ọ-la ẹhị ọrịrịị-rịrị ka. (Efe. 2:12) Ị juwa dịrẹ “ụgbẹyị [ọlẹ kọ da] ka ẹpwụ nya ayịreji ọtata”! (Mat. 7:13, NW ) Ụka kahị kụ irya u-uhye nya abwọlẹ ká aloye nyahị baba nyọka jẹ́ Ohe Oluhye kaka ba, ọháha bala ahyẹẹrwẹrwa ka guhị gbịla nyọka daa ụbwọ. Ụgbẹyị ọlẹ kọ tị há gụ wuu kahị ka jẹ́-ẹ daa ụbwọ ri ọ-ka tịtọ nyọka mẹ ịBayịbụụ jáa.

9. Jaabwọ ká ụpwụ nya Ala iFilipayị 2:13 ya, ányị iJihova à tị́ ka jẹ́-ẹ dang ụbwọ?

⁹ Ọhẹka à wẹẹ juhi nyọka mẹ ịBayịbụụ jẹ ọngịnyị chajị nyọlẹ ká jẹ́ nyori à ka baba nya ụka yẹẹyẹẹ nyọka nwụla ang ọjẹ́jẹ ọọwa nọ. Kori kọ lang ịnyị aalẹ, ya ẹla ọla ọkịlẹtụ nyang je iJihova mẹ. Bịlọọ kọ dang ụbwọ ká ka la irya nyọka yé ọngịnyị ọlẹ ká ka mẹ ịBayịbụụ jẹ. (Wa Ala iFilipayị 2:13.) Ọlẹrụ ịJọn họ kahị jẹ́ myị̀myị̀ nyori Ohe nyị kaa wẹ abwọ ọrịrị ọlẹ kọ pwoku irya nyamwụ. (1 Jọn. 5:14, 15) Lẹ jẹ́ myị̀myị̀ nyori iJihova ka dang ụbwọ la irya nyọka mẹ ang jẹ angịkịla kị ka ri angịjụgbẹyị.

10-11. Ịyẹ à tị́ ka wuhi kpa la ọ-ka mẹ ịBayịbụụ jẹ ọngịnyị myị́?

¹⁰ Ahị hu ụkụrwọ nya ang ọmẹjẹ ọlẹ kị ya juhi ụbwọ nya ang ọkpọnchị, nanana nyori ahị ka gbachị akama ịlẹ kị ka du kahị ka jẹ́-ẹ họ ká angịnyị ka ri angịjụgbẹyị jaabwọ kahị tịtọ ka myị́. Ahị kụ ẹhị yẹ ịhyẹ lẹpwụ nya akama ịịwa bala abwọlẹ kahị ka bwu kụrwaa myị́ wẹẹ.

¹¹ Iwe-ahụrụ nyahị ka wuhị kpa myị́. Ọ-chụ pwokwita ri aanahị ịhyẹ ịlẹ kị ri angịgbahị lẹ lee kị la ịnyịrọ ogogo nwà ka. À juwa ẹ-ẹpwụ nya iwe-ahụrụ ọlịịwẹ? Ó ri ịnyị aalẹ, kụ ẹhị yẹ ẹla ọhẹ ọlẹ kahị jẹ́ ụka ká ẹdụrụ nya COVID-19 bene lẹẹ wẹẹ. Ahị wẹ ka jẹ́ nyori ahị ka jẹ́-ẹ mẹ ịBayịbụụ jẹ ọngịnyị bwu ifon nyahị lee ang abwọ ị-kpa ila họ ụkụrwọ ịkịla myị́! Lẹ à ka jẹ́-ẹ hụhụ ẹ-ẹpwa nya ịlọng chwee dọmwụ nya ịBayịbụụ ọ-mẹjẹ ọngịnyị bala ọ-kịnyaa la ang ọjẹ́jẹ ọọwa myị́. Apyobwuna ọkịla tị juwa. Angịhyẹ kaa tịtọ nyọka jẹ́ ịBayịbụụ, ma ị́ tị kaa ji ẹpwa lụka ọlẹ  ká aanahị kaa kpa ẹrụ ọnyịịla pyẹ ka. Ma ọhẹka ị ka ji ẹpwa lụka nya ụtụrụ lee alobyi myị́. À ka hi ịlọng ụbwọ nyọka mẹ ịBayịbụụ jẹ ọngịnyị ụka ọlịnyị myị́? IJisọsị mẹ ang jẹ iNikodimọsị la odu, ko ri ụka ọlẹ kọ há iNikodimọsị gụ.​—Jọn. 3:1, 2.

12. Ịyẹ à tị́ ka ya ahị ọdahile hahị nyori ahị ka jẹ́-ẹ mẹ ang jẹ yẹẹyẹẹ myị́ wẹẹ?

¹² Ahị ka me irya nyori áhị ka jẹ́-ẹ mẹ ịBayịbụụ jẹ ọngịnyị ka myị́. Ọhẹka ọ ka lahị lala ahị nyị baba nyọka jẹ́ abwọlẹ kị kaa mẹ ang jẹ gụ́ ọọwa ene kahị ka mẹ ịBayịbụụ jẹ ọngịnyị wẹẹ. Kori kọ lang ịịwẹ aalẹ, kụ ẹhị yẹ ang ịta ịlẹ kị ka dang ụbwọ nyọka dahịhile ịlọng lẹẹ wẹẹ. Ọhọhẹ, iJihova à yẹng lala ọngọlẹ kọ nwà nyọka mẹ ang jẹ angịkịla lẹ. (2 Kọr. 3:5) Oheeye, iJisọsị ko ri ọngọlẹ kị ya “ọngịrị myị́ ọngịrị olepwoohe bala ọla odehe wuu” ju ụ-ụbwọ à bying nyị mẹ ang jẹ lẹ. (Mat. 28:18) Ọhata ri, à ka jẹ́-ẹ kpụnịrọ angịkịla nyọka dang ụbwọ. IJisọsị kpụnịrọ ẹla ọlẹ ká Adamwụ mẹjọ́ọ nyọka ya, à ka jẹ́-ẹ họ ịnyị ịnyịnyị. (Jọn. 8:28; 12:49) Da ọọwa u-uhye, à ka jẹ́-ẹ byi ọngọ kpịlahị nya ebwo nya ẹrụ ọnyịịla ọ-kpa pyẹ ọlẹ ká ji, ọngọ ye ịlahị nya ụgbẹyị lee ọọnahị ọkịla ọlẹ kọ jẹ́ ẹhị nya ụkụrwọ ọwẹ nyị da ọwa ụbwọ dọmwụ nya ịBayịbụụ ọ-mẹjẹ ọngịnyị myị́. Ụgbẹyị ọhẹ ọlẹ ká ka jẹ́-ẹ bwu mẹ ang jẹ gụ olene ri ọ-ka ba aanahị ịlẹ kị jẹ́-ẹ mẹ ang jẹ yẹẹyẹẹ kaka mẹ ịBayịbụụ jẹ ọngịnyị nyaa.

13. Ịyẹ tị́ du kahị ka myị ọnụ nyọka mẹ ang jẹ ụ-ụgbẹyị onyeewe?

¹³ Ọ ka lahị ujwo nyọka kpa ijẹẹhị bala ang-abwọ inyeewe họ ụkụrwọ myị́. Ụgbẹyị ọlẹ kahị kaa bwu mẹ ịBayịbụụ jẹ angịnyị yẹda lẹẹlẹẹ lẹ. Ụpwụ ọlẹ kahị kaa kpa mẹ ang jẹ angịnyị kpangga lẹẹlẹẹ, ko ri Chị Ọkẹkẹnị Gboyi Myị́ Oyi!, baba nyahị ọ-ka nwụla ang ọmẹjẹ nọ bala ọ-mọ́ọ jẹ ụ-ụgbẹyị ọdatị hi abwọlẹ kahị kaa họ lụka ọkẹkpẹ lẹ. Ụpwụ ọwawa á ka lụmẹ kaka, ẹla o-ya lawụlẹ bala ọngọlẹ ká wẹẹ jẹ́ ang ta à gụ lẹẹlẹẹ ẹẹ. Ụka nya ang ọmẹjẹ, ahị ka kpa ifim bala ang-abwọ ịkịla ịla ịwẹbsayịtị bala JW Library^® họ ụkụrwọ gụ́ ọọwa. Kori ká jẹ́-ẹ kpa ang-abwọ ịwẹ họ ụkụrwọ nwà ka, ya je ọngọhẹ ọlẹ kọ jẹ́-ẹ kpaa họ ụkụrwọ nyọka dang ụbwọ bwula ọ-máa jẹ́ng. Ẹla kaa báahị ahị angịnyị ehe ahị. Ọ́ kaa chịkpẹẹ lụmẹ hahị nyọka yẹ ba ụgbẹyị onyeewe ọlẹ kị kaa bwu họ ang jẹ ka. Ma bwula ụbwọ ọdada nya iJihova bala ịnya aanahị, ọ ka chịng kpẹẹ la ọ-ka jẹ́ ụgbẹyị onyeewe ọwẹ bala ọ-dọmwụ kpụng ịpyọ nyọka mẹ ang jẹ angịnyị. Ọ ka la jaabwọ ká ọọnahị ọhẹ kọ kaa ye ịlahị nya ụgbẹyị ya nyori ụgbẹyị ọ-kpa mẹ ang jẹ onyeewe ọwẹ nyị “kpịpyọ ha ọngọ wẹẹ jẹ́ ang tụ́ ọngọmẹjẹ.”

14. Ẹlịyẹ ahị tị́ ka kpịtịya kori kahị kaa ya ẹla nya Ohe ẹ-ẹga ọlẹ ká angịnyị kaa ke ụrụ ka? Ányị ụpwụ nya 1 Ala ịKọrịntị 3:6, 7 à tị́ ka jẹ́-ẹ juhi ọhụ?

¹⁴ Ahị ka juwa o-oye nya ẹga ọlẹ kọ kaa lujwo nyọka dọmwụ nya ịBayịbụụ ọmẹjẹ myị́. Ẹla ọlẹ kahị kaa ya á kaa kpụ angịhyẹ ịpyọ ka lee ọ-dọmwụ waa ẹjẹ. Ịyẹ à tị́ ka dahị ụbwọ nyọka ya ẹhị rịrị nyori angịlịnyị ka jẹ́-ẹ ye ẹla nya ịBayịbụụ myị myị́ wẹẹ? Kpịtịya nyori iwe-ahụrụ nya angịnyị kaa yẹda lụka ọ-kpahị ju ka ẹ-ẹpwụ nya odehe ọtịpyọ ọlẹ, lẹ angịlẹ ká ẹla nyahị kaa kpaa ịpyọ ene-ene ka kà wẹ ka jẹ́ nyori ịwa nyị baba nya Ohe ọ-ka kpaa ụgbẹyị ẹ-ẹpwụ nya ọhịhị myị́. (Mat. 5:3) Angịhyẹ ịlẹ kị kaa pwa la ọ-ka ye apwụ nyahị ene-ene ka myị ọnụ nya ịBayịbụụ ọjẹ́jẹ ugbẹnyị myị́. Ahị tị jẹ́ ịnyịnyị nyori iJihova à ri Ayịdọlẹrụ lẹ. (Mat. 9:38) Ọ tịtọ kahị ka kịnyaa la ọ-ya ugbe nya ang tọ bala ọ-kpa enyi jwọọ, ma ọwa-à ri Ọngọlẹ kọ kaa kpọọ nwà lẹ. (1 Kọr. 3:6, 7) Ọ tị kpịpyọ yẹẹyẹẹ nyọka kpịtịya nyori iJihova kaa wahị kụrụụhị chajị nyọlẹ kahị wẹẹ maga nyọka da angịnyị ụbwọ ịnyị, a-abwọlẹ kahị ya apwụ ha angịnyị ju iru kaka ba lee ọ-mẹ ang jẹ kaka ba ka! *

15. Ányị ọ tị́ kaa la iJihova ụka ká ọngịnyị á myị ọnụ nyọka jẹ́ ịBayịbụụ bala ọ-kpa ẹla ọlẹ kọ wẹẹ jẹ́ họ ụkụrwọ?

¹⁵ IJihova kaa chị ọkẹkẹnị ụka ká ọngịnyị á ye ẹlịlẹhị myị bala ọ-mẹ ẹlịlẹhị ọọwa jẹ angịkịla. (Etu 23:15, 16) IJihova ka chị ọkẹkẹnị yẹẹyẹẹ nyọlẹ kọ yẹ ká angịnyị nyamwụ wẹẹ ya ẹla nya Ohe bala ọ-mẹ ang jẹ la ila ọchịchị alẹ! Ọ-chụ pwokwita, nanana nyọlẹ ká ẹdụrụ ọtụka ọlẹ bene odehe wuu, lẹka nya 2020 ahị mẹ ang jẹ angịnyị angị uku irwiye, da ụnọ ohu irwiye kụrụ ịrụ, da ohu irwiye, da iwo ịrwọnyẹ kụrụ ịrụ (7,705,765). Ọọwa da angịnyị angị ụnọ ohu imiiye, da ụnọ iwo ine kụrụ ookpokpo, da ohu ihikichu, da iwo ihikichu kụrụ ine (241,994) ụbwọ nyọka hu ịlaa ju iJihova ụ-ụbwọ bala o-hu enyi Ohe. Angịjụgbẹyị inyeewe ịwẹ ịnyịnyị tị kaa mẹ ịBayịbụụ jẹ angịkịla kị ka ri angịjụgbẹyị ịnyịnyị. (Luk. 6:40) Ịwẹẹ ọdada á juwa ka, iJihova kaa chị ọkẹkẹnị balahị ụka kahị ya ụbwọ ju ụkụrwọ nya ọ-họ ká angịkịla ka ri angịjụgbẹyị ẹ-ẹpwụ.

16. Ang ọnyịịla oyina ahị tị́ ka hu nọ nyọka họ myị́?

¹⁶ Ọ-họ ká angịkịla ka ri angịjụgbẹyị ri ụkụrwọ ọtụka, ma bwula ụbwọ ọdada nya iJihova ahị ka họ ụpa nyahị ẹ-ẹpwụ nya ọ-mẹ ang jẹ angị inyeewe nyọka la ọháha ẹ-ẹga nya Adahị olepwoohe myị́. Ahị ka hu nọ ha ịlọhị nyọka mẹ ịBayịbụụ jẹ ọngịnyị kori ko ri ọngọ ookpokpo wẹwẹ myị́? Kori kahị kpa iwe ọnyị myị́ ọnyị wụrụ angịlẹ kahị kaa tọ nyọka jẹ́ ịBayịbụụ balahị, ang ọlẹ kọ ka họ ka lahị ẹbyẹbyị myị́. Ahị jẹ́ myị̀myị̀ nyori iJihova ka wahị kụrụ aga ọmama nyahị.

17. Ányị ọ tị́ ka lahị kori kahị jẹ́ mẹ ịBayịbụụ jẹ ọngịnyị?

¹⁷ O ri ihi ọtụka hahị nyọlẹ kahị la iwe nyọka ya ẹla nya Ohe bala ọ-mẹ ẹlịlẹhị jẹ angịkịla! Ụkụrwọ ọwẹ dudu kahị kaa chị ọkẹkẹnị ọlam-ọlam. Ọlẹrụ ịPọlụ, kọ da angịnyị lụmẹ-lụme ị-ịTẹsalonika ụbwọ wẹ ka ri angịjụgbẹyị, ya jaabwọ kọ lọọ i-irya yẹkẹẹ: “Ẹhị ọrịrịị-rịrị nyahị wuu bala ọkẹkẹnị ọchịchị nyahị bala okpo ọ-kụrụ egbeju ọ-ka kpa ya ụya ju ẹ-ẹpwụ nya ogu ọchịchị ị-ịlahị nya Ọngọlahị iJisọsị lụka ọlẹ kọ ka warị, a ri anụ ayịdang la ịlọnụ lẹlẹ. Chajị, anụ la ịlọnụ a tọchị ri ang ọ-kpa yaya ju bala ọkẹkẹnị ọtụka ọchịchị nyahị lẹlẹ.” (1 Tẹs. 2:19, 20; Ụkụr. 17:1-4) Ọ la aanahị lụmẹ-lụmẹ ịnyị alẹ. Ọọnahị ọnyang ọhẹ juwa ká ẹnyị nyamwụ ri Stéphanie. Ọwa bala ọrụmwụ da angịnyị lụmẹ-lụmẹ ụbwọ nwà ka hu enyi Ohe lẹ. O yẹkẹẹ: “Ọkẹkẹnị ọtụka ọhẹ á ji gụ ọ-ka da angịnyị ụbwọ nyọka hu ịlaa ju iJihova ụ-ụbwọ kaka.”