IJihova tịtọ ká angị imiiye ịlẹ kị ye awụlẹ ka chị ọkẹkẹnị bala ọ-ka yé ịpyọ ọkpụkpụ bwu ẹpwụ nya ọ-yẹ jula awụlẹ nyaa pyịyọọ. (Mat. 19:4-6) Kori ká tịtọ nyọka ye ahụ lee ọ-rwọrụ, ányị a tị́ ka bwu yé ahụ lee ọrụ ọnyịịla? IJihova kọ ri Ọngọ họhị jẹ́ ụgbẹyị ọlẹ ká angịnyị ka bwu ye awụlẹ ká awụlẹ oyeye nyaa ka hiigu. Chajị nya ọọwa lẹ, kori ká kpa itiwe nya ehile ịlẹ kọ ya hahị họ ụkụrwọ, ocheju nyamwụ ka há hang yẹẹyẹẹ. Kụ ẹhị yẹ itiwe nya ehile ịhyẹ lẹpwụ nyaa lẹẹ wẹẹ.

Họhẹ-họhẹ, ahị baba nyọka jẹ́ ịlọhị: “Ọkịlẹtụ nya ọngịnyị ehe à ju ọ-dahịhile-ka gụ ang wuu lẹ. Ọ byịbyị ka ịnwanị.” (Jer. 17:9) Ụka ká ọngịnyị á ja maga nyọka yé ọngọlẹ kọ ka ye lee ọ-rụrwọ, ọkịlẹtụ nyamwụ kaa pwọ pịlọọ ju ọngọọwa i-ijata dudu ká ọngịnyị jẹ́-ẹ kụ irya nya ẹla rige-rige ka. Kori ká angịnyị á chụ nyọka ye awụlẹ ọọlajị nya irya ọlẹ kị la u-uhye nya awụlẹ kem, ị kaa chị ijẹma ụka ohyẹẹkpẹ. (Etu 28:26) Ịnyị à dudu kọ há ká angị imiiye ịịwa ka ya irya nyaa je awụlẹ i-ijata ụka kị wẹẹ dọmwụ nyọka jẹ́ awụlẹ wẹẹ lee ọ-ka chị awụlẹ ehe ene kị ka jẹ́ awụlẹ ọlam-ọlam kaka lẹlẹ.

Etu 22:3 yẹkẹẹ: “Ọngọ jẹ ẹla-á yẹ akama kọ juwa wẹ, ọọ myẹbee hyọọ, oluchi tị ka yahị dọọ pwururu kele, ọ tịị chị ijẹma ụka ohyẹẹkpẹ.” Ịyẹ tị́ du kọ ka la uhi-uhi myị́ nya ọngịnyị ọ-ka mwahị nya ahụ lee ọrụ ka ẹpwụ nya intanẹtị? Ọ jụjụ lụmẹ nyori angịhyẹ tọ angịnyị intanẹtị ịlịnyị kpụ ị taaha nya awụlẹ, ma ụka ohyẹẹkpẹ ị wẹ ka yẹ nyori ọngọọwa wẹẹ kpaa họ ịnyi. Ịnyịnyị angịnyị ịtịpyọ kaa yịlaa kpịbaa nyọka pịrị angịnyị okpoko ri. Ụka ọhẹ, angịlẹ kị kaa kpịbaa họ uguru nya ẹla ọlịnyị kaa ya nyori ịwa nyị ri Alibeenu nya iJihova.

Kụ irya nya ang ọtịpyọ ọkịla ọlẹ kọ ka jẹ́-ẹ họ myị́ lẹẹ wẹẹ. Intanẹtị ịlịnyị kaa kpa ụgbẹyị nya ang ọ-kụ achụ họ ụkụrwọ nyọka jẹ́ angịnyị ịlẹ kị ka pwoku awụlẹ. Ma, ang ẹjẹẹ ọhẹ-ẹ́ ji nyori ijẹẹhị ịịwa kaa họ ụkụrwọ ịnyịlẹhị ka. Ọ ka há nyọka dahịhile ijẹẹhị nya ọngịnyị ehe u-uhye nya ọ-họ ká ang o-ju apyobwuna lala awụlẹ oyeye ka hiigu? Ahị dọmwụ ka jẹ́-ẹ chụ ijẹẹhị ọ-kpa kụ ang achụ nya ọngịnyị ehe kaka pwoku ẹla ọmẹjẹ nya ịBayịbụụ?​—Etu 1:7; 3:5-7.

Ụpwụ nya Etu 14:15 yẹkẹẹ: “Ọngọ jẹ ẹla ka kaa ye ẹla myị ẹla myị, ọngọ jẹ ẹla tị kaa kụ irya ju ọgụ ẹpẹtẹ ọlẹ kọ ka hu.” Ene á ka jẹ́-ẹ ya nyori ọwa nyị ka ye ọngịnyị lee ọ-rụrwọọ, à baba nyọka jẹ́ ọngọọwa yẹẹyẹẹ. Kori kọ tị ri intanẹtị kanụ tọ awụlẹ, ọọwa ka lujwo. Kori kanụ dọmwụ  jẹ́ ẹla oluhye nya awụlẹ ọlẹ ká ọng myị́ ọng da ju ụ-ụwa lee kori kanụ kaa bịrị ụka joja ụ-ụwa, à ka jẹ́-ẹ ya nyori ọwa nyị jẹ́ ọngọọwa ịnyịlẹhị? Ejiri kaa wu angịhyẹ ịlẹ kị me nyori ịwa nyị yé ọlịkẹjẹ nya ịwa lẹ ụka kị tọ awụlẹ a-ahịchịng.

Ọngọ da ụpwụ nya Eje Ọnyịịla yẹkẹẹ: “Ḿm̀ ji ogu ta aluguru-ẹla ka. Ḿ bá ịngịhyẹ bá la ta alahị imiiye ka.” (Eje. 26:4) Angịnyị lụmẹ-lụmẹ kaa me nyori nyị́ tịpyọ nya ọngịnyị ọ-ka me ọnọọkịla ju ẹ-ẹpwụ nya ẹla ịlẹ kọ kaa da u-uhye nya ịlọmwụ intanẹtị chajị nya angịkịla ọ-ka mọọma ka. Ị ka ya abwẹla nyaa ọlam-ọlam kpịbaa lee ọ-hwabwọ la ọ-mọ́ọ jẹ ụka kị ja ya ịlaa dodehe ẹ-ẹpwụ nya intanẹtị. Angịhyẹ ka ya ịlaa dodehe nyori ịwa nyị ri Alibeenu nya iJihova myị́, ma ị ri Angịnyị nya ịKịrayịsị ịlẹ kị hụ enyi Ohe ịlẹhị lẹẹ? Ị la gbẹgbịlẹ ẹ-ẹpwụ nya ang nya olegu? Ịwa lịlaa ri igu ọlam-ọlam bala iJihova? Ị la ẹnyị ọnyịịla ọọjịra-jịra? Ị ri ọgụ-ẹpẹtẹ ọtịpyọ? Lee o-ji balaa tị́ ka ri o-ji “ogu ta aluguru-ẹla”? (1 Kọr. 15:33; 2 Tim. 2:20, 21) Ị lịlaa nyọka ye ahu lee ọ-rwọrụ ụ-ụgbẹyị ọlẹ ká ịBayịbụụ myị ọnụ ju? À baba nyọka jẹ́ ẹla ịwẹ, ma kori ká wo ẹla bwu ẹga nya Alibeenu nya iJihova ịkịla ịlẹ kị jẹ́ ọngọọwa yẹẹyẹẹ ka, ọ ka lujwo nyọka jẹ́. (Etu 15:22) Ọngọlẹ kọ ri ọnchẹ nya iJihova nyịlẹhị á dọmwụ ka kụ irya nya “ọ-yẹ ju lawụlẹ” bala ọngọ jẹ́ Ohe ka lẹ ka.​—2 Kọr. 6:14; 1 Kọr. 7:39.

Kori ká kụ ẹhị yẹ akama ịlẹ ká ọngịnyị ka la myị́ bwula ọ-kpa intanẹtị mwahị nya ahụ lee ọrụ, à ka yẹ nyori agbẹyị ịkịla ji kị há bala ọ-la ihi gụ nyọka kpa mwahị nya ọngịnyị ọlẹ ká ka jẹ́-ẹ ye lee ọ-rụrwọ. Ányị a tị́ ka bwu gbachị ọngịnyị ọlẹ á ka jẹ́-ẹ ye lee ọ-rụrwọ? Ụka ká alụma jẹ́-ẹ tụ́ guru wẹẹ lẹ, Alibeenu nya iJihova jẹ́-ẹ gbachị ọngịnyị ụka kahị ka ọjịra-jịra nya epwihi-epwihi, ọjịra-jịra ọtụka, ịnya isekut bala otuguru ụma ịkịla ịlẹ kahị kaa la.

Ụka ká otuguru nya alụma ịlịịwẹ á jẹ́ chịkpẹẹ ka lala ụka nya ẹdụrụ nya COVID-19 ọlẹ, ahị kaa ka ọjịra-jịra bwula ang abwọ nya ichene, ọọwa tị kaa ya iwe hahị nyọka jẹ́ aanahị ịkịla ịlẹ kị ye ahụ lee ọ-rwọrụ lẹka  . À ka jẹ́-ẹ yẹ jaabwọ kị kaa họ ụpa nyaa bala abwọ kị kaa ya ọmyịmyị nyaa dodehe bwula ọ-wẹ ịtọ ẹla ọọjịra-jịra. (1 Tim. 6:11, 12) Anụ dọmwụ ka jẹ́-ẹ ya ẹla bala awụlẹ ẹ-ẹga ọlẹ kị kaa hu akpẹ ụ-ụwa ụka ká ọjịra-jịra á cheju kpá myị́. Kori kanụ yẹ jula Alibeenu nya iJihova ịkịla lawụlẹ i-iwe-ahụrụ ịdatị-datị bwula ang abwọ nya ichẹnẹ ịlịịwẹ, à ka yẹ jaabwọ ká ọngọọwa kaa họ ẹla ẹ-ẹga nya angịkịla, ọọwa ka ya abwẹla nya ọngọọwa dodehe gede-gede. (1 Pit. 3:4) Jaabwọ kanụ wẹẹ jẹ́ awụlẹ dụmwọ-dụmwọ, à ka jẹ́-ẹ yẹ kori ká ang ọlẹ kanụ tịtọ nyọka họ á la ookpokpo lee kori káanụ angị imiiye á pwoku awụlẹ.

Ụka ká ọngịnyị á mwahị nya ahụ lee ọrụ a-agbẹyị ịlẹ ká ịBayịbụụ myị ọnụ ju, ọ ka dudu ká awụlẹ oyeye nyaa ka ju ọkẹkẹnị ẹ-ẹpwụ. Ọ la jaabwọ ká ụpwụ nya Etu yẹkẹẹ: “ Ọngọ ye ahụ ye [lee o-ye ọrụ rwọ], ye ang ọnyịịla, ọnahị ọwẹ bwu ẹga nya [iJihova].”​—Etu 18:22.