ỊPọlụ da yẹkẹẹ: “Am lẹ, m tị jẹ́ gede-gede yẹkẹẹ, ẹ-ẹga ká ehile nya iMosisi ji lẹ, m ta iri kpini-kpini lala am nyaa gbugbu lẹ. Chajị ijata ojiji nya ehile ọọwa kpangga, a họ kam jẹ́ igu ogbugbu nyam ọọwa ẹ-ẹga nya ehile nya iMosisi lẹ.”​—Gal. 2:19.

Ẹla ọlẹ ká ịPọlụ da dori wu ẹhị nya ẹla ọkpọnchị ọhẹ ọlẹ kọ wẹẹ tịtọ nyọka wụlẹ je ala ọjịra-jịra nya ịGalatịya olekpeleji nya eji ọkpakpa nya ala iRom. Angịmẹjẹ nya ọnọọkịla kpa Angịnyị nya ịKịrayịsị ịlụwa ịhyẹ hwahị. Angịlịnyị kaa mẹjẹ nyori, kori ká ọngịnyị nyị́ ka chịda aalẹ, nyị ka kpa ehile nya iMosisi pyii, ọgụgụụgụ ẹ-ẹga nya ụwụwụ ọdada. ỊPọlụ tị jẹ́ nyori Ohe-é tịtọ ká angịnyị nyamwu ka da ụwụwụ pyiipyii ka. O ya ẹla ụ-ụgbẹyị ọlẹ kọ ka waa ẹpwụ, ọ họ ị jẹ́ nyori ẹla ọmẹjẹ ọwẹ nyị ri ọnọọkịla, bala o-ju ọmyịmyị nya aanamwụ ịwẹ ọngịrị ẹ-ẹga nya iya ọkịlaakịla nya iJisọsị ịKịrayịsị.​—Gal. 2:4; 5:2.

ỊBayịbụụ mẹjẹ kpụrụrụ nyori ụka ká ọngịnyị á gbụ lẹ, nyịị jẹ́ ịngịngịhyẹ ọlẹ kọ ja họ dagaga jwoo lee ang ịịwa o-gwoo abwẹbwẹhẹ kaka. (Ọngọ. 9:5) Etu nyọlẹ ká ịPọlụ ya nyori ọwa nyị ‘gbu ẹ-ẹga nya ehile’ ri, Ehile nya iMosisi á lọngịrị ọhẹ-lọhẹ u-uhye nyamwụ kaka. Ọkọkọ nyọọwa lẹ, ịPọlụ jẹ́ myị̀myị̀ nyori ọwa nyị “juwa hịhị ha Ohe Oluhye” bwula ọmyịmyị nyamwụ u-uhye nya iya ọkịlaakịla nya iJisọsị.

“Ehile” à yẹ iwe-ahụrụ nya ịPọlụ da lẹ. Ụgbẹyị oyina tị́? O ya nyori “i-ihi nya ehile ịịwa ojuju à kaa họ ká ọngịnyị ehe kaa ri ọlabwẹla ọnyịịla ị-ịlahị nya Ohe Oluhye ka. Kẹnẹ-kẹnẹ, bwula ọkịlẹtụ o-hu ha iJisọsị ịKịrayịsị lẹpwụ-lẹpwụ” mẹ ịnyị. (Gal. 2:16) Ọ lịnyị odu lẹ, ehile họ ụkụrwọ ọkpọnchị ọhẹ. ỊPọlụ da ụkụrwọ ọọwa wụlẹ ju ala ịGaletiya: “Ohe Oluhye ya ehile nyamwụ ọọwa ha ọngịnyị ehe, chajị kị ka jẹ́-ẹ bwula ọọwa jẹ́ ang ọlẹ kọ ri ang onyobyi ọhọhọ ị-ịlahị nya Ohe Oluhye datị. Ohe Oluhye hu ehile nọ haa kịnọọ, gbee pwụ ụka ọlẹ ká ugbe ọlẹpwụ nya Ebiraham ọlẹ ká Ohe Oluhye myị ọnụ họọ ene-ene, ka warị.” (Gal. 3:19) Ee, Ehile họ ọ la gbagbịla nyori angịnyị ehe ịlẹ kị la kpẹẹkpẹẹ ka, kị ri alịhọbịrị, á ka jẹ́-ẹ kpa ehile kpẹẹkpẹẹ myị́ ka. Lẹ ị baba nya iya ọkịlaakịla ọkpẹẹkpẹẹ ọlẹ kọ ka ri ohyẹẹkpẹ. Lẹ, ehile họ ká angịnyị ka jẹ́ nyori ịKịrayịsị à ri “ugbe” ọlẹ ká Ohe chehe lẹ. Kori ká ọngịnyị á la ọmyịmyị ẹ-ẹga nya iJisọsị ịKịrayịsị, Ohe ka wa ọngọọwa nya ọlabwẹla ọnyịịla. (Gal. 3:24) ỊPọlụ jẹ́ ya ịnyị chajị bwula Ehile, ọ wẹ ka ye iJisọsị myị bala ọ-la ọmyịmyị ẹ-ẹga nyamwụ lẹ. Bwụ ụka ọwẹ kịlahị, o ‘gbu ẹ-ẹga nya Ehile’ ma ọ tị “hịhị ha Ohe Oluhye.” Ehile-é la ọngịrị u-uhye nyamwụ kaka, Ohe mẹ ịnyị.

ỊPọlụ ya ẹla ọlịnyịịnyị ụ-ụpwụ ọlẹ kọ da du ta ala iRom. O yẹkẹẹ: “Anụ anyadam ẹ-ẹpwụ nya ịKịrayịsị, anụ ayịdang tịtị gbu ẹ-ẹga ká ehile ji bwula igu nya ịKịrayịsị ọlẹ kanụ gbu ịnyịnyị tọọ lẹ. . . . Ma, lẹẹlẹẹ lẹ, ahị tị gbocho bwu ẹpwụ nya ehile ọọwa lẹ. Chajị, ahị gbugbu ẹ-ẹga nya ehile ọọwa ọlẹ kọ wuhi ju agba ene-ene lẹ.” (Rom. 7:4, 6) Ọ-ọngịnyị ọ-ka gbu chajị nya uguru-ẹla ọ-họ ba Ehile, ịPọlụ à wẹẹ ya ẹla rụ́ ẹ-ẹgẹwẹ bala Ala ịGaletiya 2:19 ka. Ma, ọ wẹẹ ya ẹla u-uhye nya ọngịnyị ọ-ka lịlọmwụ ịnyị. Ehile nya iMosisi á la ọngịrị u-uhye nyamwụ bala angịkịla ị-lala ọwọwa kaka. Ọmyịmyị ọlala u-uhye nya iya ọkịlaakịla nya ịKịrayịsị gbaa kpehe lẹ.