1. Ịyẹ iJihova à tị́ họ ha ọngọngọọngụ nyahị?

IJIHOVA à gbile ọngọngọọngụ nyahị ba ịlọmwụ lẹ. (Jọn. 6:44) Kụ irya ju etu nya ẹla ọwẹ wẹẹ. Nyọlẹ ká iJihova wụla uku-ụnọ ịmanyị tị́ nya angịnyị ilodehe ọlẹ yẹ, ọ yẹ ang ọnyịịla ọhẹ ẹ-ẹga nyang, ko ri ọkịlẹtụ ọlam ọlẹ kọ ka jẹ́-ẹ la ọháha ẹ-ẹga nyamwụ. (1 Ego. 28:9) IJihova jẹ́ng tụ́ odehe tụ́ ẹpwụ, à tị họ́ọ ịnyịnyị. Ọwẹ ri ẹjẹ ọkpụkpụ hahị yẹẹyẹẹ!

2. Ányị iJisọsị à tị́ dahị ụbwọ nyọka jẹ́ abwọlẹ ká iJihova la ọháha ẹ-ẹga nya ọngọngọọngụ nyahị kaka ba?

² IJihova kaa kpahị jung yẹẹyẹẹ, ịnyịnyị ọ tị kaa kpahị ju aanahị alẹng bala anyang ịlẹpwụ nya ọjịra-jịra wuu lẹ. Nyọka dahị ụbwọ wo etu nya ẹla ọwẹ, iJisọsị chụ iJihova kaka pwoku ọngọgbikpịlọ. Kori ká ọkpịlọ ookpokpo bwu ẹpwụ nya ohu (100) á hwahị bwu ẹpwụ nya ogu nya ịkịla, ịyẹ ọngọgbikpịlọ ọọwa à tị́ ka họ? Ọ ka “tụụbwọ hi ịkpịlọ iwo ihikichu kụrụ ihikichu ihihi ụ-ụwa u-uhye nya ọgbọdọ, ọwa ayịdang ka rụ kele kaka pịlahị nya ọkpịlọ obyibyi ookpokpo ọọwa.” Ụka ká ọngọgbikpịlọ ọọwa á yẹ ọkpịlọ ọọwa, ọ́ ka ju agbama tọọ ka. Ọ ka chị ọkẹkẹnị. Egbeju nya ẹla tị́ ri ányị? Ọkpịlọ ọnyị myị́ ọnyị ju apyobwuna ha iJihova. IJisọsị yẹkẹẹ: ‘Ó ri irya nya Ohe Oluhye ayịdang ká ọngọngọhẹ lẹpwarịrị nya angịnyị nyamwụ ịlala anjwo ichiche ịwẹ ka ta ayịreji kpong-kpong ka.’​—Mat. 18:12-14.

3. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

³ Áhị tịto nyọka ju ọmwụ nya ọkịlẹtụ okpenyi ha aanahị alẹng bala anyang ẹnẹnẹhẹ ka. Ányị ahị tị́ ka họ kahị ka chị angịkịla mileji ka? Ịyẹ ahị tị́ ka họ ụka ká ọngịnyị á họ ẹla wụụhị ẹjẹ? Ahị ka wẹ ịtọ ẹla ịwẹ ẹ-ẹpwụ nya ang ọjẹ́jẹ ọlẹ. Ma nyọka dọmwụ, ahị jẹ́ ang gụ ọọwa u-uhye nya angịlẹ kị ri “anjwo ichiche” ịlẹ ká ụpwụ nya ịMatiyu egbeju 18 ya ẹla rụ wẹẹ.

4. Owo anyị à tị́ ri “anjwo ichiche ịwẹ”?

⁴ “Anjwo ichiche ịwẹ” ri angịjụgbẹyị nya iJisọsị wuu, ẹka ọnyị myị́ ọnyị kị gu. Jaabwọ myị́ abwọ ká ẹka nyaa á la, ị lala anjwo “ichiche” ọọlajị nyọlẹ kị kaa myị ọnụ nyọka wo ọmẹjẹ nya iJisọsị. (Mat. 18:3) Ịlẹhị lẹ, ị bwu ẹpwụma bala epweji ịdatị-datị, abwẹla nyaa tị datị-datị ịnyịnyị, ma ịwa wuu la ọmyịmyị ẹ-ẹga nya ịKịrayịsị. Ịwa ịnyịnyị tị há ịKịrayịsị yẹẹyẹẹ.​—Mat. 18:6; Jọn. 1:12.

5. Ányị ọ tị́ị̀ la iJihova ụka ká ọngịnyị á chị ọngọhẹ nya angịnyị nyamwụ keji lee ọ-haa ẹla ọjụjụ?

⁵ Angịlẹ kị ri “anjwo ichiche ịwẹ” ri alikẹjẹ nya iJihova. Nyọka jẹ́ jaabwọ ọlẹ kọ kaa lọọ, kụ irya nya abwọlẹ ká ẹla nya anjwo kaa lahị wẹẹ. Ị ri alikẹjẹ nyahị. Ahị kaa tịtọ nyọka chewu kaa chajị ị́ la ọngịrị, jẹ́ ijẹẹhị, bala ọ-la ẹla ọjẹ́jẹ lala angịgbahị lẹka. Ẹlịlẹhị ri, ọ́ kaa háahị nyọka yẹ ká ọngọngọhẹ ja kpa ọngọkịla yẹ akama ka, ma ahị tị kaa wẹẹjẹ lee o-ju agbama ụka kahị yẹ kị ja kpa onjwo yẹ akama. Ụ-ụgbẹyị ọlịnyịịnyị, iJihova tịtọ nyọka chewu keehi. Ọ kaa wẹẹjẹ lee o-ju agbama ụka kọ yẹ ká ọngịnyị á chị ọngọhẹ lẹpwụ nya angịnyị Nyamwụ keji lee ọ-haa ẹla ọjụjụ!​—Ayị. 63:9; Mak. 9:42.

6. Jaabwọ ká ụpwụ nya 1 Ala ịKọrịntị 1:26-29 ya, ányị alodehe à tị́ kaa yẹ angịjụgbẹyị nya iJisọsị?

⁶ Ụgbẹyị ọkịla oyina angịjụgbẹyị nya iJisọsị à tị́ lala “anjwo ichiche”? Angịnyị ịlanyị alodehe à tị́ kaa yẹ nya angị ju apyobwuna? Alụdụ, alẹnyị, bala angị kpa ọngịrị ụ-ụbwọ ịnyị. Ma angịjụgbẹyị nya iJisọsị á tị ri angị lịnyị ka. Lẹ alodehe kaa yaa lala “anjwo ichiche” ị-pyịnyẹng ịlẹ kị ju apyobwuna ka. (Wa 1 Ala ịKọrịntị 1:26-29.) Ma iJihova á tị yaa ụ-ụgbẹyị ọlịnyị ka.

7. Irya ọlanyị iJihova à tị́ tịtọ kahị ka la ẹ-ẹga nya aanahị alẹng bala anyang?

⁷ IJihova la ọháha ẹ-ẹga nya anchẹ nyamwụ wuu,  tụ́ angịlẹ kị kaa gbịgba họọ ẹ-ẹpwụ nya ẹka lụmẹ-lụmẹ lẹ bala angịlẹ kị ri angị inyeewe ẹ-ẹpwụ nya ẹlịlẹhị. Aanahị alẹng bala anyang wuu ju apyobwuna ha iJihova, lẹ ọ baba kị ka ju apyobwuna hahị ịnyịnyị. Ahị tịtọ nyọka “la ọháha ọgẹnẹ-gẹnẹ ẹ-ẹga nya anyadịda wuu ẹ-ẹpwụ nya ịKịrayịsị,” a-angị ịmanyị-ịmanyị nyaa kem ka. (1 Pit. 2:17) Ọ chịla kahị ka myị ọnụ nyọka chewu kaa bala ọ-kpẹhị rịraa. Kori kahị jẹ́ nyori ahị họ ọngọhẹ ẹla ọtịpyọ lee ọ-họ ẹla wọọ ẹjẹ, áhị ka hu ẹla ọọwa ujiji la irya nyori ọngọọwa nyị baba nyọka hịnyọhi bala o-deeri hi ẹla ọọwa ị-ịwẹ lẹ ka. Ịyẹ à tị́ ka du ká ọngịnyị ka wẹẹjẹ myị́? Chajị nya ụgbẹyị ọlẹ kị kpa aanahị ịhyẹ nwà, ị kaa me irya nyori ịwa nyị́ lala angịkịla ka myị́. Angịkịla tị ri angị inyeewe ẹ-ẹpwụ nya ẹlịlẹhị wẹẹ; ị́ jẹ́ nyori nyị baba nyọka hịnyọhi ha angịnyị ụka ká ẹla ọtịpyọ á gwaa gụ họ lẹka. Jaabwọ myị́ abwọ ká ẹla ọọwa á la, ahị baba nyọka họ ká okpunyi ka ji. Ịnyịnyị-ịnyịnyị, ọngọlẹ kọ kaa wẹẹjẹ tọ angịkịla hyaa-hyaa baba nyọka jẹ́ nyori abwẹla ọtịpyọ ọlẹ kọ baba nyọka nwụhọ à wẹ lẹ. Ọ baba nyọka họ ịnyị chajị nya okpunyi nya ịlọmwụ bala ọ-ka jẹ́-ẹ yẹjula angịkịla.

8. Abwẹla oyina angịnyị ịlụka nya iJisọsị à tị́ la kọ chị wu angịjụgbẹyị nyamwụ?

⁸ Ịyẹ à tị́ gu iJisọsị gbịla nyọka ya ẹla u-uhye nya “anjwo ichiche ịwẹ”? Angịjụgbẹyị nyamwụ tọọ ịtọ ẹla ọhẹ yẹkẹẹ: “O-owo a tị ka ri ọngọ ọtụka gụgụ wuu ụ-ụwa ị-ịpyị-adịrahụ nya epwoohe?” (Mat. 18:1) Iru nya ala iJuu ịlụka ọlaa kaa tịtọ ká angịkịla ka yaa nya angịtụka. Ọlẹng ọhẹ kọ jẹ́ ang yẹẹyẹẹ yẹkẹẹ: “Angịkịla ọ-ka ya ihi haa bala ọ-ka rú ohi à baba ha angịnyị gụgụ ẹ-ẹpwụ nya ọhịhị lẹ.”

9. Ịyẹ angịjụgbẹyị nya iJisọsị à tị́ baba nyọka họ?

⁹ IJisọsị jẹ́ nyori angịjụgbẹyị nyamwụ nyị ka maga nyịlẹhị-ịlẹhị ene kị ka jẹ́-ẹ gba olegu nya awụlẹ ọ-chị ọnụ ọlẹ kọ ri ọhọhọ nya ala iJuu hi ọkịlẹtụ nyaa. Ọ byaa yẹkẹẹ: “Ọngọlẹ kọọwa ayịdang á tịtọ kọ ka ri ọngọtụka ọ-gụụnụ anụ  angịkịla wuu lẹ aale, ọngọọwa a kpa ịlọmwụ keji lala, ọwa nyaa ri onjwo nyanụ anụ angị ihihi wuu mẹ. Ọngọlẹ kọ tị tịtọ kọọwa ayịdang a ka ri olegbeju nyanụ anụ angị ihihi wuu lẹ aalẹ, ọngọọwa a nwụlanọ kọ ka myịnụ anụ angị ihihi ẹrụ lala ọwa nyaa ri ọnchẹ nyanụ ịnyịnyị mẹ.” (Luk. 22:26) Ahị ka kpa ịlọhị lala “onjwo” bwula ‘ọ-wa angịkịla nyahị nya angị họ hiigu gụ’ ịlọhị. (Filip. 2:3) Jaabwọ kahị wẹẹ la abwẹla ọlịnyị gụ olene, ịnyịnyị ahị ka chị angịkịla keji gbuu ka lẹ.

10. Ẹla oyina ịPọlụ à tị́ ya kahị baba nyọka kpa họ ụkụrwọ?

¹⁰ Aanahị alẹng bala anyang gụụhị ụ-ụgbẹyị ọhẹ lee ọkịla. Ọ kaa chịkpẹẹ nyọka yẹ ịnyị kori kahị ya ẹhị rịrị u-uhye nya abwẹla ịnyịịla nyaa. Ahị ka ye ẹla ọlẹ ká ọlẹrụ ịPọlụ byi ala ịKọrịntị myị ka ọkịlẹtụ. Ọ yẹkẹẹ: “Oowo a tị́ huunu ka uhye gidogbo gụ angịkịla ene? Ịngịngịhyẹ juwa ọlẹ kanụ la, kanụ ye ang ọọwa bwu ẹga nya Ohe Oluhye ene ka? Ee lẹ, ó-ri Ohe Oluhye ko hu ang ọọwa hanụ lẹ, ịịyẹ a tị́ ri apyobwuna ẹ-ẹpwụ nya ọ-juwa kpa ang ọọwa chị ogu tịtị mẹ?” (1 Kọr. 4:7) Lẹ ahị-ị́ tịtọ nyọka họ ká angịkịla ka maahị ma lee ọ-yẹhị lala ahị nyaa gụ angịkịla ẹnẹnẹhẹ ka. Ọ-chụ pwokwita, ọọnahị ọlẹng ọlẹ kọ jẹ́-ẹ mẹ ang jẹ ị-ịlahị nya ọjịra-jịra yẹẹyẹẹ lee ọọnahị ọnyang ọlẹ kọ jẹ́-ẹ dọmwụ nya ịBayịbụụ ọ-mẹjẹ ọngịnyị yẹẹyẹẹ ka ya ogbo ha iJihova ụka myị́ ụka u-uhye nya ọọwa.

11. Ẹlịyẹ iJisọsị à tị́ mẹjẹ́ẹhị bwula oja ọ-chụ kpịta nya adịrahụ ọhẹ bala ọnchẹ nyamwụ?

¹¹ Ahyaahị nyọlẹ ká iJisọsị da angịjụgbẹyị nyamwụ ọna u-uhye nyọka chị angịkịla keji ka kpá, ọ joja ọ-chụ kpịta ọhẹ u-uhye nya adịrahụ ọhẹ bala ọnchẹ nyamwụ. Adịrahụ ọọwa pẹhi uri ọtụka ọlẹ ká ọnchẹ ọọwa á ka jụ nwụ myị́ ẹnẹnẹhẹ ka ga họọ. Ọ tị nọ pyịnyẹng, ọnchẹ ọọwa á tị myị ọnụ nyọka pẹhi uri ochiche ọlẹ ká ọnchẹ ọọnamwụ kpọọ ka. Ụka ohyẹẹkpẹ, adịrahụ wu ọnchẹ ọlẹ kọ myị yẹ ahyẹẹrwẹrwa ka wẹ ju ka ube nya agba. Ẹlịyẹ ahị tị́ jẹ́ bwu oja ọwẹ? IJisọsị yẹkẹẹ: “Ịnyịnyị-ịnyịnyị, Adam ọlẹ kọ juwa e-epwoohe a ka họ ẹ-ẹga nyanụ lẹlẹ. Ko ri ká ọng myị́ ọng lẹpwarịrị nyanụ á juwa kpa ọkịlẹtụ ọgbagbịla hịnyọhi angịnyị angịkịla aananụ . . . kaka lẹlẹ.”​—Mat. 18:21-35.

12. Kori kahị pwa la ọ-ka hịnyọhi, ányị ọọwa à tị́ kaa gu angịkịla?

¹² Ẹla ọlẹ ká ọnchẹ ọwẹ họ kpa ọjụjụ wẹ ịlọmwụ bala angịkịla ịnyịnyị. Ọhọhẹ, ọ́ la ọkịlẹtụ nya ahyẹẹrwẹrwa ka du kọ họ ọnchẹ ọọnamwụ ẹla bwula ọ-kpọọ “kaka ju agba pwụ ụka ọlẹ ká ọnchẹ ọwẹ ka nwọọ uri nyamwụ kpa.” Oheeye, ọ họ ẹla ọ-jụ anchẹ ịkịla ịlẹ kị wẹẹ yọyị nya ẹla ọlẹ kọ họ-ọ̀ wẹ. Ụka ká “anchẹ ịkịla nya adịrahụ ọwẹ yẹ ụma nya ang ọlẹ ká ọnchẹ nya ọgbanyẹ ọọwa họ ẹ-ẹga nya ọnchẹ oheeye ọọnamwụ ọwẹ lẹ, ọ chaa ịwa wuu ẹpwụ lụmẹ kaka kpoye.” Ụ-ụgbẹyị ọlịnyịịnyị, abwẹla nyahị kaa gu angịkịla. Kori ká ọngịnyị á họ ẹla wụụhị ẹjẹ kahị pwa la ọ-ka hịnyọhi, ịyẹ à tị́ ka họ myị́? Ọhọhẹ, ahị họọ ẹla ọjụjụ chajị nyọlẹ kahị hịnyọhi họọ ka, ọhẹka ahị tị ka chebwo hi ọngọọwa lee ọ-ba la ọ-mẹ ọháha jẹ ọngọọwa ịnyịnyị. Oheeye, ala ọjịra-jịra á ka dagba ka ọọlajị nyọlẹ kahị họ okpunyi bala ọngọọwa ka.

13. Ẹla olẹ kọ họ ta ọọnahị ọhẹ kọ kaa ye ịlahị nya ụgbẹyị tị́ mẹ ẹlịyẹ jẹng?

¹³ Ụka kahị hịnyọhi ha aanahị alẹng bala anyang, ahị la ịlọhị kaa ye apyobwuna bala ịwa ịnyịnyị. Ọ lịnyị ẹ-ẹga nya ọọnahị ọnyang ọhẹ kahị wẹẹ ka wụrụ nyị Crystal. Ọọnahị ọnyang ọhẹ ẹ-ẹpwụ nya ọjịra-jịra họ ẹla wọọ ẹjẹ. Crystal yẹkẹẹ: “Ọnụ ọwọọwọọ nyamwụ kaa kọm lala ẹma ụka ọhẹ. Ḿ dọmwụ kaa tịtọ nyọka bajẹ balọọ kpehe nya ẹrụ ọnyịịla ọ-kpa pyẹ ka. Ila ọchịchị bala ọkẹkẹnị nyam dọmwụ nyọka pwuru weji.” Ẹ-ẹga nya Crystal lẹ, ọ la ang odudu kọ wẹẹ wẹẹjẹ. Ma ọ́ tị kịnyaa la ẹjẹ ọwụwụ ta ọọnahị ọọwa lee ọ-kụ irya u-uhye nya ịlọmwụ  kem ka. Ọ kpa ịlọmwụ keji bala ọ-kpa ẹla ọmẹjẹ ọlẹpwụ nya ịBayịbụụ ọhẹ kị gba kpehe ẹ-ẹpwụ nya Ẹpwang ọ-Kụ Gbeji nya ahyẹẹnụ 15 nya Ọya Okiriwo nya 1999 họ ụkụrwọ. Egbeju nya ang ọjẹ́jẹ ọọwa ri: “Forgive From Your Heart.” Ọ hịnyọhi ha ọọnamwụ ọọwa. Crystal yẹkẹẹ: “M̀ jẹ́ ugbẹnyị nyori ahị wuu wẹẹ ma uya nyọka yẹ abwẹla onyeewe da kụrụ, iJihova tị kaa hịnyọhi hahị ẹnụ myị́ ẹnụ wuu. Ọ lam lala o-ri nyị hiri olo ọtụka-ọtụka ọhẹ him e-egbeju. M̀ ye ọkẹkẹnị nyam tịrẹkpẹ ugbẹnyị lẹ.”

14. Jaabwọ ká ụpwụ nya ịMatiyu 18:21, 22 ya, akama oyina ọlẹrụ iPita à tị́ ka la myị́? Ẹlịyẹ a tị́ jẹ́ bwu ẹpwụ nya ẹla ọwẹwẹ nya iJisọsị?

¹⁴ Ahị jẹ́ nyori ọ baba kahị ka hịnyọhi; ọọwa à ri ẹla ọlẹ kọ chịla kahị ka họ lẹ. Ma ọ tị ka lahị ujwo la ọ-ka họ ịnyị myị́. Ọ ka la ọlẹrụ ịPita ịnyịnyị ụka ọhẹ bala ụka ọkịla myị́. (Wa ịMatiyu 18:21, 22.) Ịyẹ à tị́ ka dahị ụbwọ? Ọhọhẹ, kụ irya u-uhye nya abwọlẹ ká iJihova hịnyọhi hang kaka ba. (Mat. 18:32, 33) Ahị-ị́ họ ẹla kpụ ọ ka hịnyọhi hahị ka, ma ọ tị hịnyọhi hahị gbagbịla. (Eje. 103:8-10) Chajị nyọọwa lẹ, “ọ chịla kahị tịtị ka la ọháha ẹ-ẹga nya awụlẹ ịnyịnyị.” Lẹ ọ-hịnyọhi ri opyii. Uri ahị kpa ẹ-ẹga nya aanahị alẹng bala anyang nyọka hịnyọhi haa lẹ. (1 Jọn. 4:11) Oheeye, kụ irya u-uhye nya ang ọlẹ kọ kaa họ ụka kahị hịnyọhi. Ahị ka da ọngọlẹ kọ họ ẹla wụụhị ẹjẹ ụbwọ myị́, ọjịra-jịra ka yẹjula awụlẹ, ahị ka chewu ke igu oriri nyahị bala iJihova, bala o-hiri olo hi egbeju nyahị. (2 Kọr. 2:7; Kol. 3:14) Ohyẹẹkpẹ-ẹkpẹ, raabwọ ha Ọngọlẹ kọ wẹẹ bying ahụ nyị hịnyọhị. A myị ká Olegu Onyobyi a bịrị okpunyi ọlẹ ko ji arịrị nyang bala aanahị ịkịla ka. (Efe. 4:26, 27) Ahị baba nya ụbwọ ọdada nya iJihova kori kahị ka kpụ ẹpwụ nya ụ́nya nya Olegu Onyobyi ka.

15. Jaabwọ ká ụpwụ nya Ala iKolosi 3:13 ya, ịyẹ ahị tị́ ka jẹ́-ẹ họ kori ká ẹla nya ọọnahị ọhẹ á wụụhị ẹjẹ ụgbẹyị ọlẹ kahị jẹ́ nyẹẹkpẹ da myị́ ka?

¹⁵ Ọ́ tị ri ká ọọnahị ọhẹ-ẹ́ họ ẹla ọlẹ kọ hing ọnụ yẹẹyẹẹ bẹẹ? Ịyẹ a tị́ ka họ? Maga  nyịlẹhị-lẹhị nyọka họ okpunyi. Raabwọ ha iJihova bwu ọkịlẹtụ nyang. Bịlọọ kọ wahị kụrụ ọngọlẹ kọ họ ẹla wụng ẹjẹ-ẹ̀ wẹ bala ọ-dang ụbwọ nyọka yẹ abwẹla ịnyịịla ịlẹ ká ọngọọwa la, kị ri abwẹla ịlẹ kị há iJihova u-uhye nya ọngọọwa. (Luk. 6:28) Kori ká jẹ́ nyẹẹkpẹ da ẹla ọọwa myị́ ka aalẹ, maga ká kụ irya u-uhye nya abwọlẹ á ka bwu ya ẹla balọọ. Ọ kaa há yẹẹyẹẹ ụka myị́ ụka nyọka kụ irya nyori ọọnahị ọọwa á tọchị nyọka họhị ẹla ọtịpyọ ka. (Mat. 5:23, 24; 1 Kọr. 13:7) Ụka ká ja ya ẹla bala ọngọọwa, yọọ nyori ọ la irya ọnyịịla. Ọ́ tị ri kọ tịtọ nyọka họ okpunyi ka bẹẹ? “Juwa la ugbodu ojuju onyudiyo” ẹ-ẹga nya ọngọọwa. Abwọ a chịng pyẹpyẹ ẹ-ẹga nya ọọnang ọọwa ka. (Wa Ala iKolosi 3:13.) Ọlẹ kọ tị baba gụ wuu ri, a kpa ẹla ẹ-ẹpwụ ẹnẹnẹhẹ ka, chajị ọọwa ka bịrị igu oriri nyang bala iJihova. A ya iwe da ká ịngịngịhyẹ a chịng keji ẹnẹnẹhẹ ka. Bwula ọ-họ ịnyị, à mẹjẹ nyori iJihova hang gụ́ ang ọkịla ọhẹ-lọhẹ wuu lẹ.​—Eje. 119:165.

16. Ụkụrwọ oyina ọng myị́ ọng nyahị à tị́ la?

¹⁶ Ọ myịhị lẹhị nyori ahị bala aanahị jẹ́-ẹ gbịgba ha iJihova lawụlẹ lala ‘ịkpịlọ ịlẹ kị yẹjula awụlẹ’ e-ekpeleji nya “ọngọgbikpịlọ ookpokpo”! (Jọn. 10:16) Ụpwụ nya Organized to Do Jehovah’s Will, ya ẹ-ẹbẹ 165 yẹkẹẹ: “Nyọlẹ ká kaa ye apyobwuna bwu ẹpwụ nya ọ-yẹjula awụlẹ ọwẹ wẹẹ, à la ụkụrwọ nyọka kpọọ kịlahị.” Lẹ, ahị baba nyọka “mẹjẹ ịlọhị nyọka yẹ aanahị alẹng bala anyang jaabwọ ká iJihova kaa yaa.” Ẹ-ẹga nya iJihova lẹ, ahị wuu ri “anjwo ichiche” ịlẹ kị ju apyobwuna. Ịnyị a kaa yẹ aanang alẹng bala anyang lẹẹ? IJihova jẹ́ ang myị́ ang ọlẹ ká wẹẹ họ nyọka daa ụbwọ bala ọ-kpahị jwaa, ọ tị kaa myọọ lẹhị ịnyịnyị.​—Mat. 10:42.

17. Ẹlịyẹ ahị tị́ cheje nyọka họ?

¹⁷ Aanahị ịla ọjịra-jịra háahị. Lẹ ahị cheje nyori “ahị́ ka ri angị ka họ ká angịkịla ka chị ụchụụ mileji bwula ọhọbịrị ọhọhọ ka lee ọ-ka ri ang oku iwe ụ-ụgbẹyị ha anyadahị ịkịla ẹ-ẹpwụ nya ịKịrayịsị kpong-kpong” ka. (Rom. 14:13) Ahị yẹ aanahị alẹng bala anyang lala angịlẹ kị gụụhị, ahị tị tịtọ nyọka hịnyọhi haa bwu ọkịlẹtụ nyahị ịnyịnyị. Ahị ya iwe da ká angịkịla a chịhị keji ẹnẹnẹhẹ ka. Ọkọkọ nya ọọwa, ahị chụ nyọka “rụnyẹ ba ụgbẹyị nya okpunyi ọhọhọ ẹ-ẹpwarịrị nya awụlẹ bala ọ-ka juwa họ kahị ka juwa kpa ọmyịmyị ọlala nya awụlẹ wule ka ịlahị-ịlahị kem mẹ.”​—Rom. 14:19.