ANG ỌJẸ́JẸ 22
Da Angịlẹ Á kaa Mẹ ỊBayịbụụ Jẹ Ụbwọ Nyọka Ri Angịjụgbẹyị
“Ọng myị́ ọng lẹpwụ nyanụ a kele kaka hụ enyi Ohe.”—ỤKỤR. 2:38.
EJE 72 Making Known the Kingdom Truth
ẸHỊ NYA ẸLA *
1. Ẹlịyẹ angịjụgbẹyị nya iJisọsị à tị́ byi iru nya angịlẹ kị wẹ iJerusalẹm nyị họ?
IRU nya angịnyị wẹ ka jịra i-iJerusalẹm. Alẹng bala anyang ịịwa bwu ẹpwụma ịdatị-datị bala ọ-kaa ya òja ịdatị-datị ịnyịnyị. Ang ọ-la ẹbyẹbyị ọhẹ họ ẹnụmwụ ọọwa. Lụka o-bwagaga lẹ, ala iJuu ịhyẹ à dọmwụ nyọka ya òja nya angga ịlẹ kị warị wẹ lẹlẹ! Ẹla ọọwa la aliru ịwẹ ẹbyẹbyị, ma ẹla ọlẹ ká ala iJuu ịịwa wẹẹ ya taa bala ọlẹ ká ọlẹrụ iPita ya ta aliru ịwẹ wuu à la ẹbyẹbyị gụ wẹẹ lẹ. Aliru ịịwa wẹ ka jẹ́ nyori ịwa nyị ka jẹ́-ẹ chịda myị bwula ọ-la ọmyịmyị ẹ-ẹga nya iJisọsị ịKịrayịsị. Ẹla ọọwa gu aliru ịwẹ ọ-ọkịlẹtụ yẹẹyẹẹ. Ẹla ọọwa gwaa ọ-ọkịlẹtụ gbee kịị tọ wo yẹkẹẹ: “Ányanyị, ahị tị́ ka họ lẹẹ mẹ?” IPita wẹ byaa yẹkẹẹ: “Ọng myị́ ọng lẹpwụ nyanụ à kele kaka hụ enyi Ohe” mẹ.—Ụkụr. 2:37, 38.
Ọọnahị ọhẹ, ká ahụ nyamwụ bajẹ balọọ, wẹẹ jẹ́ ịBayịbụụ bala okolobya ọhẹ kọ kpa ụpwụ nya Chị Ọkẹkẹnị Gboyi Myị́ Oyi! (Yẹ ọgba 2)
2. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ? (Yẹ ifoto ọla ẹbẹ nya ọgbanyẹ.)
2 Ẹla ọlẹ kọ họ ba ọọwa ba la ẹbyẹbyị yẹẹyẹẹ. Angịnyị lala ụnọ ịta (3,000) hụ enyi Ohe ẹnụmwụ ọwẹ, kpụ ị wẹ ka ri angịjụgbẹyị nya ịKịrayịsị. Ọwẹ à ri ọmwụ ọdada nya ụkụrwọ nya ọ-họ ká angịnyị ka ri angịjụgbẹyị ọlẹ ká iJisọsị ya ha angịlẹ kị wẹẹ bọọ jẹ nyọka họ lẹlẹ. Angịlẹ kị wẹẹ bọọ jẹ wẹẹ họ ụkụrwọ ọwẹ daalẹ wẹẹ. Lụka nyahị ọlẹ, áhị ka jẹ́-ẹ ya ẹla bala ọngịnyị ẹ-ẹpwụ nya awa ịmanyị-ịmanyị, ọ ka nwụlanọ nyọka hụ enyi Ohe i-ijata ka. Ọ ka la ọya ịmanyị-ịmanyị lee ẹka lee ọ-dọmwụ kpoye nya ọọwa ene ká ọngọlẹ kahị wẹẹ jẹ́ ịBayịbụụ ta ka nwụlanọ nyọka hụ enyi Ohe myị́. Ọ-họ ká angịnyị ka ri angịjụgbẹyị ju ụkụrwọ ọtụka ẹ-ẹpwụ. À ka jẹ́ ịnyị kori á ja mẹ ịBayịbụụ jẹ ọngọhẹ lẹẹlẹẹ. Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ang ọlẹ á ka jẹ́-ẹ họ nyọka da ọngọlẹ á kaa mẹ ịBayịbụụ jẹ ụbwọ nyọka nwà ka ri ọngọjụgbẹyị ọlẹ kọ hụ enyi Ohe.
DA ỌNGỌLẸ KÁ WẸẸ MẸ ỊBAYỊBỤỤ JẸ ỤBWỌ NYỌKA KPA ẸLA ỌLẸ KỌ WẸẸ JẸ́ HỌ ỤKỤRWỌ
3. Jaabwọ ká ụpwụ nya ịMatiyu 28:19, 20 ya, ẹlịyẹ ọngọlẹ kahị wẹẹ mẹ ịBayịbụụ jẹ à tị́ ka họ pyii ene kọ ka jẹ́-ẹ nwa ka hụ enyi Ohe?
3 Ene nyọka jẹ́-ẹ hụ enyi Ohe, ọngọlẹ kọ wẹẹ jẹ́ ịBayịbụụ baba nyọka kpa ẹla ọlẹ ká ịBayịbụụ mẹjẹ họ ụkụrwọ. (Wa ịMatiyu 28:19, 20.) Ụka ká ọngọlẹ kahị kaa mẹ ịBayịbụụ jẹ á kpa ẹla ọlẹ kọ wẹẹ jẹ́ họ ụkụrwọ, ọ ka lala “ọlẹng ọ-jẹ́ ẹla” ọlẹpwụ nya oja nya iJisọsị ọlẹ kọ be aya kpori-kpori u-uhye nya ẹjwọ ene kọọ me ube. (Mat. 7:24, 25; Luk. 6:47, 48) Ányị ahị tị́ ka bwu da ọngọlẹ kahị kaa mẹ ịBayịbụụ jẹ ụbwọ nyọka kpa ẹla ọlẹ kọ wẹẹ jẹ́ họ ụkụrwọ? Ahị kụ ẹhị yẹ ang ịta ịlẹ kahị ka jẹ́-ẹ họ myị́ wẹẹ.
4. Ányị ahị tị́ ka bwu da ọngọlẹ kahị wẹẹ mẹ ịBayịbụụ jẹ ụbwọ nyọka nwa kịlahị ka hụ enyi Ohe? (Yẹ akpa ọlẹ ko ri “ Da Ọngọlẹ ká Wẹẹ mẹ ịBayịbụụ jẹ Ụbwọ Nyọka Kụ Ịrya nya Ang ọlẹ Ọ́ ka họ bala o-Waa Ọyị.”)
4 Da ọngọlẹ á kaa mẹ ịBayịbụụ jẹ ụbwọ nyọka kụ irya nya ang ịlẹ kọ ka họ. Ịyẹ tị́ du á ka họ ịnyị? Kụ ẹhị yẹ ọ-chụ pwokwita ọlẹ wẹẹ: Kori ká ja jẹdịyẹ ka ẹga ọlụrụ, à kaa kụ irya nya ẹga lala ọba lee ọmwụ nya okoji ọlẹ á ka chị dayị nyọka mwịịnyọ. Ọọwa lẹ, ụgbẹyị à kaa lang ụrụ kpoye kaka lẹlẹ. Ịnyịnyị-ịnyịnyị, ụka ká ọngọlẹ kọ wẹẹ jẹ́ ịBayịbụụ á hu ang ichiche-ichiche ịhyẹ nọ ha ịlọmwụ nyọka họ, kọ tị waa ọyị myị́, ọ ka jẹ́ nyori ọwa nyị ka wu ịnya enyi Ohe ọhụhụ ọyị myị́ ịnyịnyị. Kpa akpa ọlẹ kọ ri “Ụkụrwọ Ọlẹ Á ka Họ” ọlẹpwụ nya ụpwụ nya Chị Ọkẹkẹnị Gboyi Myị́ Oyi! da ọngọlẹ ká wẹẹ mẹ ịBayịbụụ jẹ ụbwọ nyọka nwà ka ịlahị. Lụka nya ocheju nya ang ọjẹ́jẹ ọnyị myị́ ọnyị, ya ẹla u-uhye nya abwọlẹ ká ụpa ọwẹ ka dọọ ụbwọ nyọka kpa ẹla ọlẹ kọ jẹ́-ẹ wẹ họ ụkụrwọ. Ọ́ tị ri ká ụkụrwọ ọkịla ọhẹ-ẹ́ juwa ká tịtọ ká ọngọlẹ á wẹẹ mẹ ịBayịbụụ jẹ ka họ aalẹ, dọọ ba ang ẹ-ẹga ọlẹ kọ ri “Ọkịla.” Kpa ụpa nya ụpwụ ọwẹ kụ ẹhị yẹ ang ịlẹ ká ọngọ wẹẹ jẹ́ ịBayịbụụ ka jẹ́-ẹ chị nọ ha ịlọmwụ la ụka o-kpii bala ịlẹ kị ka baba nya ụka chẹẹ.
5. Jaabwọ kị da ju ụ-ụpwụ nya ịMakị 10:17-22, ẹlịyẹ iJisọsị à tị byi ọlẹng ọkpụdụ ọhẹ nyị họ? Ịyẹ à tị́ du?
5 Da ọngọlẹ ká wẹẹ mẹ ịBayịbụụ jẹ ụbwọ nyọka yẹ ọhịhị nyamwụ da kori kọ lujwo wẹwẹ. (Wa ịMakị 10:17-22.) IJisọsị jẹ́ nyori nyị ka lujwo ha ọlụdụ nyọka go ang ịlala nyamwụ wuu ra. (Mak. 10:23) Ma, iJisọsị tị byi ọlẹng ọwẹ nyị yẹ ọhịhị nyamwụ da ụ-ụgbẹyị ọtụka ọwẹ. Ịyẹ à tị́ du? Chajị iJisọsị la ọháha ẹ-ẹga nyamwụ. Ụka ọhẹ, áhị kaa ju ọngọlẹ kahị wẹẹ mẹ ịBayịbụụ jẹ ọhụ nyọka kpa ẹla ọlẹ kọ wẹẹ jẹ́ họ ụkụrwọ ka chajị ahị me irya nyori ọ́ nwụlanọ nyọka yẹda ụ-ụgbẹyị ọlẹ kọ baba lẹka. Ọ ka tata myị́ nya ọngịnyị ọ-ka pwọ abwẹla onyogo deeji bala ọ-ka hu onyeewe kụrụ. (Kol. 3:9, 10) Ma jaabwọ ká ya ẹla u-uhye nya ọọwa balọọ hyaa, ịnyịnyị ọ ka dọmwụ nyọka yẹda hyaa lẹ. Bwula o-ya ẹla u-uhye nya ọọwa, à mẹjẹ nyori à kpahị jwọọ.—Eje. 141:5; Etu 27:17.
6. Ịyẹ tị du kahị ka tọ ịtọ ẹla u-uhye nya irya nya ọngọlẹ kahị wẹẹ jẹ́ ịBayịbụụ ta?
6 Ọ baba nya ahị ọ-ka tọ ọngọlẹ kahị wẹẹ mẹ ịBayịbụụ jẹ ịtọ ẹla ịlẹ kọ ka ya irya nyamwụ u-uhye nya ang ọlẹ kọ wẹẹ jẹ́. Ọọwa ka dang ụbwọ nyọka jẹ́ ẹla ịlẹ kọ wo etu nyaa bala ịlẹ kọ myị ju. Kori ká họ ịnyị ụka myị́ ụka, ọ ka chịng kpẹẹ nyọka ya ẹla u-uhye nya ang ịlẹ kị ka lọọ ujwo la ọ-ye myị ị-ịlahị. Ụpwụ nya Chị Ọkẹkẹnị Gboyi Myị́ Oyi! la ịtọ ẹla ụma ịlịnyị lụmẹ-lụmẹ. Ọ-chụ pwokwita, ang ọjẹ́jẹ 4 tọ wo yẹkẹẹ: “Ányị a tị́ me irya kọ kaa la iJihova ụka kahị wụrụ ẹnyị nyamwụ?” Ang ọjẹ́jẹ 9 tọ wo yẹkẹẹ: “Ang iyina à tị́ ka háng nyọka raabwọ chajị nyaa?” Ụka nya ọgbanyẹ, ọ ka la ọngọlẹ ká wẹẹ jẹ́ ịBayịbụụ ta ujwo nyọka wẹ ịtọ ẹla ịwẹ myị́. À ka jẹ́-ẹ dọọ ụbwọ nyọka kụ irya u-uhye nya ụpwụ ịgọgọ bala ifoto ịlẹpwụ nya ụpwụ ọwẹ myị́.
7. Ányị ahị tị́ ka jẹ́-ẹ kpa oja nya ẹla ịlẹ kị họ a-ahịchịng họ ụkụrwọ yẹẹyẹẹ?
7 Ụka ká ọngọlẹ á wẹẹ jẹ́ ịBayịbụụ ta á wo etu nya ang ọlẹ kọ baba nyọka họ lẹ aalẹ, kpa oja nya ẹla ịlẹ kọ họ aahịchịng jwọọ ọhụ nyọka họ ang ọọwa mẹ. Ọ-chụ pwokwita, kori kọ lọọ ujwo nyọka wẹ ọjịra-jịra ụka myị́ ụka, à ka mẹ ifim ọlẹ ko ri IJihova Kpahị Jum jọọ myị́. O juwa a-ang ọjẹ́jẹ 14 ụpa ọlẹ ko ri “Jẹ́ Ang Ịlẹ Dọọ u-Uhye.” Ẹ-ẹpwụ nya ang ọjẹ́jẹ ịhyẹ bala ịkịla ịlẹpwụ nya ụpwụ nya Chị Ọkẹkẹnị Gboyi Myị́ Oyi!, à ka yẹ oja ịlịnyị ụpa ọlẹ ko ri “Jẹ́ Gụ Ọọwa” lee “Jẹ́ Ang Ịlẹ Dọọ u-Uhye.” * Tị dụmwọ-dụmwọ ká chụ ọngọlẹ ká wẹẹ jẹ́ ịBayịbụụ ta kaka pwoku ọngọkịla bwula o-ya nyori, “kori ká ọngọwẹ á họọ myị́ aalẹ, à ka họọ myị́ ịnyịnyị” ka. Ọkọkọ nya ọọwa, ba kọọwa à ya ịnyị la ịlọmwụ. Ya ẹla u-uhye nya ịngịhyẹ lee ọkịla ọlẹ kọ da ọngọ ọlẹpwụ nya ifim ọọwa ụbwọ nyọka kpa ẹla ọlẹ ká ịBayịbụụ mẹjẹ họ ụkụrwọ. Ọhẹka à ka gu ẹnyị nya ụpwụ ịgọgọ ọkpọnchị ọhẹ lee ịngịhyẹ ọlẹ kọ họ kpanggaa myị́. Ụka myị́ ụka kọ chịkpẹẹ, ya ẹla u-uhye nya abwọlẹ ká iJihova da ọngọọwa ụbwọ.
8. Ányị ahị tị́ ka da ọngọlẹ kahị kaa mẹ ịBayịbụụ jẹ ụbwọ nyọka la ọháha ẹ-ẹga nya iJihova?
8 Da ọngọlẹ á kaa mẹ ịBayịbụụ jẹ ụbwọ nyọka la ọháha ẹ-ẹga nya iJihova. Ányị a tị́ ka bwu họ ịnyị? Mwahị nya iwe ọlẹ á ka bwu kpọọ irya ka ẹga nya abwụma ịlẹ ká iJihova la. Dọọ ụbwọ kọ jẹ́ nyori iJihova ri Ohe ọlẹ kọ kaa chị ọkẹkẹnị bala ọ-kaa da angịlẹ kị la ọháha ẹ-ẹga nyamwụ ụbwọ. (1 Tim. 1:11; Hib. 11:6) Mẹjẹ ọngọlẹ ká wẹẹ mẹ ịBayịbụụ jẹ nyori ọ ka ye apyobwuna bwula ọ-kpa ẹla ọlẹ kọ wẹẹ jẹ́ họ ụkụrwọ, ká wụlẹ joo nyori apyobwuna ịịwa mẹjẹ nyori Ohe la ọháha ẹ-ẹga nyamwụ. (Ayị. 48:17, 18) Jaabwọ ká ọháha ọlẹ ká ọngọọwa la ẹ-ẹga nya iJihova wẹẹ la kpori-kpori gụ ọọwa, ịnyịnyị ọ ka nwụlanọ gụ ọọwa nyọka nwụ̀ ọhịhị nyamwụ họ ẹ-ẹga ọlẹ kọ baba lẹ.—1 Jọn. 5:3.
YA ỌNGỌLẸ KÁ KAA MẸ ỊBAYỊBỤỤ JẸ JE AANAHỊ ỊKỊLA
9. Jaabwọ ká ụpwụ nya ịMakị 10:29, 30 ya, ịyẹ à tị́ ká ka da ọngịnyị ụbwọ nyọka tụụbwọ hi ịngịhyẹ nyọka jẹ́-ẹ hụ enyi Ohe?
9 Nyọka jẹ́-ẹ nwà ka hụ enyi Ohe, ọngọlẹ kọ wẹẹ jẹ́ ịBayịbụụ ka baba nyọka tụụbwọ hi ịngịhyẹ bala ọkịla ene. Lala ọlẹng ọkpụdụ ọlẹ kahị ya ẹla rụ́ lalẹ kẹkpẹ, angịhyẹ nyaa ka baba nyọka tụụbwọ hi ang ụdụ nyaa ịhyẹ myị́. Kori ká ụkụrwọ ọlẹ kị kaa họ á pwoku itiwe nya ehile ịlẹpwụ nya ịBayịbụụ ka, ị ka baba nyọka mwahị nya ụkụwọ ọkịla myị́. Iru nyaa ka baba nyọka tụụbwọ hi aligu ịlẹ kị la ọháha ẹ-ẹga nya iJihova ka myị́. Alugbiyegu nya angịkịla tị ka nyẹẹkpẹ daa ọọlajị nyọlẹ ká Alibeenu nya iJihova á háa ka myị́. IJisọsị ya nyori nyị ka lujwo ha angịhyẹ nyọka tụụbwọ hi ang ịlịnyị myị́. Ọ tị myị onụ nyori angịlẹ kịị nyị bọọ jẹ nyị́ ka chị ijẹma ka. Ọkọkọ nya ọọwa, ị ka ye ahị ọwawa bwula ọ-la ugbiyegu nya olegu ọlẹ kọ la ọháha. (Wa ịMakị 10:29, 30.) Ányị a tị́ ka bwu da ọngọlẹ á kaa mẹ ịBayịbụụ jẹ ụbwọ nyọka ye apyobwuna bwu ẹpwụ nya āhị ọnyịịla ọwẹ?
10. Ẹlịyẹ a tị́ jẹ́ bwu ẹpwụ nya ẹla ọlẹ ká Manuel ya?
10 Ri oligu bala ọngọlẹ á kaa mẹ ịBayịbụụ jẹ. Ọ baba nya ahụ ọ-ka mẹjẹ ọngọlẹ á kaa mẹ ịBayịbụụ jẹ nyori à kpahị jwoo. Ịyẹ à tị́ du? Wo ẹla ọlẹ ká Manuel kọ kụ Mexico ya lẹẹ. Ọ kpịtịya nya ụka ọlẹ kị kaa mẹ ịBayịbụụ jọ́ọ wẹẹ, lẹ ọ yẹkẹẹ: “Ọngọ mẹ ang jẹ́m kaa tọ wo nya iwe-ahụrụ nyam ụka myị́ ụka ene kahị ka dọmwụ nya ịBayịbụụ ọjẹ́jẹ. Ọ dam ụbwọ nyọka kpa ọkịlẹtụ weji bala ọ-ka ya ẹla ịkịla ịlẹ kị juwa ọ-ọkịlẹtụ nyam. M̀ yẹ nyori ọ kpahị jum ịnyịlẹhị.”
11. Ányị angịlẹ kahị kaa mẹ ịBayịbụụ jẹ à tị́ ka ye apyobwuna bwula ọ-bịrị ụka balahị myị́?
11 Bịrị ụka nyang bala angịlẹ á kaa jẹ́ ịBayịbụụ ta, jaabwọ ká iJisọsị kaa họ ẹ-ẹga nya angịlẹ kị kaa bọọ jẹ. (Jọn. 3:22) Kori ká ọngọlẹ ká wẹẹ mẹ ịBayịbụụ jẹ á ja yẹ ọhịhị nyamwụ da, à ka wụrọọ wẹ ẹpwa nyang nyọka nwà enyi lee o-ri ang lee ọ-ka yẹ ifim nya broadcasts nya ọya-ọya nyahị ọhẹ lawụlẹ myị́. Ọ dọmwụ ka myọọ lẹhị yẹẹyẹẹ kori ká wụrọọ ụka ká aligu bala alugbiyegu nyamwụ á ja họ ang lala ẹka, chajị ọ ka lịlọmwụ nwee ụka ọlịịwe. Kazibwe kọ kụ Uganda yẹkẹẹ: “M̀ me irya m̀ kaa jẹ́ ang chajị nya iJihova yẹẹyẹẹ ụka kam ja bịrị ụka bala ọngọ mẹ ịBayịbụụ jẹm lala ụka kahị ja jẹ́ ịBayịbụụ lawụlẹ ịnyịnyị. M̀ yẹ jaabwọ ká iJihova kaa kpahị ju angịnyị nyamwụ bala abwọlẹ kị kaa chị ọkẹkẹnị kaka ba ịnyịnyị. Ang ọlẹ kam tịtọ ẹ-ẹpwụ nya ọhịhị nyam à wẹ lẹ.”
Kori ká kpa aanahị ịdatị-datị ba ịlọng kaka jẹ́ ịBayịbụụ bala ọngịnyị, ọ kaa chọọ kpẹẹ la ọ-ka wẹ ọjịra-jịra (Yẹ ọgba 12) *
12. Ịyẹ tị́ du kahị ka kpa aanahị ịdatị-datị ba ịlọhị kaka mẹ ang jẹ?
12 Kpa aanahị ịdatị-datị ba ịlọng kaka mẹ ang jọ́ọ. Ụka ọhẹ, ọ ka ka lahị lala o-ri nyị ka chịkpẹẹ gụ nyọka jẹ ụbwọọhị lee ọ-kpa ọngọ ookpokpo ọhẹ kem ba ịlọhị pyịyọọ myị́. Ịlẹhị lẹ, ọ-họ ịnyị ka chịhị kpẹẹ myị́, ma ọngọlẹ kahị wẹẹ mẹ ịBayịbụụ jẹ ka ye apyobwuna gụ kori kahị kaa kpa aanahị ịdatị-datị ba ịlọhị kaka jẹ́ ang balọọ ụka ọhẹ bala ụka ọkịla. Dmitrii kọ kụ Moldova yẹkẹẹ: “Ọng myị́ ọng ọlẹ kọ ba ọngọ mẹ ang jẹ́m warị kaa da ẹla wụlẹ ụ-ụgbẹyị ọ-kpịpyọ. Ọọwa kaa dam ụbwọ nyọka jẹ́-ẹ kpa ang ọlẹ kam wẹẹ jẹ́ họ ụkụrwọ ụ-ụgbẹyị ọkịla. Ḿ ju oyi gbuu ẹnụ nya ọgbanyẹ ọlẹ kam ka ọjịra-jịra kaka ịnyịnyị, chajị m̀ yẹ aanahị alẹng bala anyang ịwẹ wuu ụka ọhẹ lẹ.”
13. Ịyẹ tị́ du kahị ka da ọngọlẹ kahị kaa mẹ ịBayịbụụ jẹ ụbwọ nyọka wẹ ọjịra-jịra pyii?
13 Da ọngọlẹ á kaa mẹ ang jẹ ụbwọ nyọka wẹ ọjịra-jịra. Ịyẹ à tị́ du? Chajị iJihova à ya angị gbịgba họọ nyị ka tụ guru lẹ; o ri ụpa nya ịgba ọgbagba nyahị. (Hib. 10:24, 25) Ọ-da ọọwa u-uhye, aanahị alẹng bala anyang ri alugbiyegu nyahị ịnyịnyị. Ụka kahị juwa ọọjịra-jịra lawụlẹ, ọọ lala ahị nyị juwa ẹ-ẹpwa ja ri ang oriri ọnyịịla-ọnyịịla lawụlẹ. Kori ká da ọngọlẹ á kaa mẹ ịBayịbụụ jẹ ụbwọ nyọka wẹ ọjịra-jịra aalẹ, à wẹẹ dọọ ụbwọ nyọka hụ ẹta ẹdịyẹ ọkpọnchị ọhẹ jahị da enyi Ohe ọhụhụ lẹ. Ma, ẹta ẹdịyẹ ọwẹ tị ka lọọ ujwo la ọ-ka huhu myị́. Ányị ụpwụ nya Chị Ọkẹkẹnị Gboyi Myị́ Oyi! à tị́ ka jẹ́-ẹ da ọngọlẹ á kaa mẹ ịBayịbụụ jẹ ụbwọ nyọka kụrụ akama ịlẹ kị ka woo kpa la ọ-wẹ ojịra-jịra myị́?
14. Ányị ahị tị́ ka bwu gu ọngọlẹ kahị kaa mẹ ịBayịbụụ jẹ gbịla nyọka wẹ ọjịra-jịra?
14 Ba ẹla ọlẹpwụ nya ang ọjẹ́jẹ 10 nya ụpwụ nya Chị Ọkẹkẹnị Gboyi Myị́ Oyi! jẹ nyọka dang ụbwọ gu ọngọlẹ ká wẹẹ mẹ ịBayịbụụ jẹ gbịla. Ene kị lẹẹ họ ụpwụ ọwẹ kpá, ị byi aanahị ịhyẹ nyị kpa ang ọjẹ́jẹ ọwẹ da angịlẹ kị kaa mẹ ịBayịbụụ jẹ ụbwọ yẹ wẹẹ. I ya nyori nyị họ ụkụrwọ yẹẹyẹẹ bala ọ-daa ụbwọ nyọka myị-ị̀ wẹ ọjịra-jịra ịnyịnyị. Ọọwa á tị ri à ka dayị gbee ká ka pwụ ang ọjẹ́jẹ 10 ene nyọka wụrụ ọngọlẹ á kaa mẹ ịBayịbụụ jẹ wẹ ọjịra-jịra nyahị ka. Wụrọọ i-ijata ká kịnyaa la ọ-ka kpọọ ịtịya ụka myị́ ụka. Angịlẹ kahị kaa mẹ ịBayịbụụ jẹ la akama nya ịlaa datị-datị. Lẹ maga ká jẹ́ ang ịlẹ ki ri ịbaba ọngọngọọng nyaa, bala ọ-ka yẹ kori á ka jẹ́-ẹ dụbwọ ụ-ụgbẹyị ọlẹ kọ baba. Ọkịlẹtụ a kpụng enyi kori kị bịrị ụka ene kị ka wẹ ọjịra-jịra ka. Ju ugbodu, ma tị kịnyaa la ọ-wụraa.
DA ỌNGỌLẸ Á KAA MẸ ỊBAYỊBỤỤ JẸ ỤBWỌ NYỌKA JUHI KA
15. Uhi nya ẹlịyẹ ọngọlẹ kahị kaa mẹ ịBayịbụụ jẹ à tị́ ka ju myị́?
15 À kpịtịya nyori à juhi ụka ọhẹ pyịnyẹng nyọka ri ọngọhẹ nya Alibeenu nya iJihova lẹ wẹẹ? Ọhẹka ọ lang lala o-ri ahụ nyị́ ka jẹ́-ẹ kpa ẹrụ ọnyịịla pyẹ bwu ẹpwa ka ẹpwa myị́ ẹnẹnẹhẹ ka. Lee ọhẹka à juhi nyori alugbiyegu lee aligu nyang nyị ka tụng pyịpyị myị́. O ri ịnyị aalẹ, à ka jẹ́ jaabwọ kọ la ọngọlẹ ká wẹẹ mẹ ịBayịbụụ jẹ. IJisọsị dọmwụ ya nyori angịhyẹ nyị ka juhi ọlịnyị myị́. Ma, ọ tị byi angịjụgbẹyị nyamwụ nyị myị ká uhi ojuju nyị hwaa abwọ la ọ-gbịgba ha iJihova ka. (Mat. 10:16, 17, 27, 28) Ányị iJisọsị à tị́ da angịjụgbẹyị nyamwụ ụbwọ nyọka juhi ka? Ányị ahụ à tị́ ka jẹ́-ẹ dịrẹ ọgụ-ẹpẹtẹ nyamwụ?
16. Ányị ahị tị́ ka bwu mẹjẹ ọngọlẹ kahị kaa mẹ ịBayịbụụ jẹ nyọka ya ẹla ọlẹ kọ wẹẹ jẹ́ je angịkịla?
16 Mẹjọọ dụmwọ-dụmwọ nyọka ya ọmyịmyị nyamwụ je angịkịla. Angịjụgbẹyị nya iJisọsị ka juhi ụka ọlẹ kọ daa ẹrụ kaka ya ẹla nya Ohe myị́. Ma iJisọsị tị daa ụbwọ bwula ọ-ya ẹga ọlẹ kị ka ya ẹla nya Ohe haa bala ẹla ọlẹ kị ka ya. (Mat. 10:5-7) Ányị a tị́ ka bwu gbịla iJisọsị? Da ọngọlẹ á kaa mẹ ịBayịbụụ jẹ ụbwọ nyọka jẹ́ ẹga ọlẹ kọ ka jẹ́-ẹ ya ẹla nya Ohe myị́. Ọ-chụ pwokwita, tọọ wo kori kọ jẹ́ ọngọhẹ ọlẹ kọ ka ye apyobwuna bwu ẹpwụ nya ẹlịlẹhị ọhẹ ọlẹ ká ịBayịbụụ mẹjẹ kpangga. Ọọwa lẹ a dọọ ụbwọ nyọka nwụla ẹla ọlẹ kọ ka ya nọ bwula ọ-mẹ ụgbẹyị ohukee ọlẹ kọ ka ya ẹlịlẹhị ọọwa je angịkịla jọ́ọ lẹlẹ. Ụka kọ pwoku, à ka jẹ́-ẹ kpa ụbẹẹtụ nya ụpwụ nya Chị Ọkẹkẹnị Gboyi Myị́ Oyi! ịlẹ kị ri “Angịhyẹ kaa ya Yẹkẹẹ” bala “Ọngịnyị Ka Tọng Wo Myị́” dọọ ụbwọ nyọka nwụlanọ myị́. Ụka ká ja họ ịnyị, ya ẹhị rịrị ọọ-ka da ọngọlẹ ká wẹẹ mẹ ịBayịbụụ jẹ ụbwọ nyọka jẹ́-ẹ kpa ịBayịbụụ wẹ iṭọ ẹla ụ-ụgbẹyị ọchịkpẹẹ bala ọdụmwọ.
17. Ányị ahị tị ka kpa ẹla ọla ụpwụ nya ịMatiyu 10:19, 20, 29-31 da ọngọlẹ kahị kaa mẹ ịBayịbụụ jẹ ụbwọ nyọka dahịhile iJihova?
17 Da ọngọlẹ á kaa mẹ ịBayịbụụ jẹ ụbwọ nyọka dahịhile iJihova. IJisọsị ya ọ-jẹ́ myị̀myị̀ ha angịjụgbẹyị nyamwụ nyori iJihova nyị ka daa ụbwọ chajị Ọ la ọháha ẹ-ẹga nyaa. (Wa ịMatiyu 10:19, 20, 29-31.) Kpụ ọngọlẹ á kaa mẹ ịBayịbụụ jẹ ịtịya nyori iJihova ka dọọ ụbwọ ịnyịnyị. À ka jẹ́-ẹ dọọ ụbwọ nyọka kpụnịrọ iJihova bwula ọ-raabwọ balọọ u-uhye nya ang ịlẹ kọ hu nọ ha ịlọmwụ. Franciszek kọ kụ Poland yẹkẹẹ: “Ọngọ mẹ ang jẹm kaa gu ẹnyị nya ang ịlẹ kam chụ nọ ha ịlọm nyọka họ ẹ-ẹpwụ nya abwọ ọrịrị nyamwụ. Ụka kam yẹ jaabwọ ká iJihova wẹ abwọ ọriri nyamwụ, m̀ dọmwụ nyọka raabwọ i-ijata ịnyịnyị. M̀ yẹ jẹ́ nyori iJihova dam ụbwọ ụka kam baba nyọka ye ahyẹẹnụ ịhyẹ bwu ọlụkụrwọ nyam onyeewe nyọka ka ọjịra-jịra ọtụka bala ọjịra-jịra nya epwihi-epwihi.”
18. Ányị ụkụrwọ nya ang ọmẹjẹ ọlẹ ká angịnyị nya ịKịrayịsị wẹẹ họ à tị́ la iJihova?
18 IJihova kaa kpahị ju angịlẹ kahị kaa mẹ ịBayịbụụ jẹ yẹẹyẹẹ. Ọ jẹ́ jaabwọ ká Angịnyị nya ịKịrayịsị kaa maga nyịlẹhị-ịlẹhị nyọka da angịkịla ụbwọ nyọka tụ jwọọ chwẹẹ, ẹla nyaa ọọwa tị họ́ọ ịnyịnyị. (Ayị. 52:7) Kori ká ja mẹ ịBayịbụụ jẹ ọngọhẹ lẹẹlẹẹ wẹwẹ ka, à ka jẹ́-ẹ da angịlẹ kị wẹẹ jẹ́ ịBayịbụụ ụbwọ nyọka nwà ka hụ enyi Ohe bwula ọ-bajẹ bala angịkịla kaka mẹ ịBayịbụụ jẹ ọngịnyị nyaa.
EJE 60 It Means Their Life
^ par. 5 Ang ọjẹ́jẹ ọlẹ ka wụla abwọlẹ ká iJisọsị da angịnyị ụbwọ nyọka wẹ ka ri angịjụgbẹyị nyamwụ yẹ bala abwọlẹ kahị ka gbịlọọ. Ọ ka myịmyị-ị ya ẹla u-uhye nya abwọlẹ kahị ka kpa ụpwụ onyeewe nya Chị Ọkẹkẹnị Gboyi Myị́ Oyi! họ ụkụrwọ. Ị họ ụpwụ ọwẹ nyọka da angịlẹ kahị kaa mẹ ịBayịbụụ jẹ ụbwọ nyọka nwà ka hụ enyi Ohe.
^ par. 7 À ka ye oja nya ẹla ịlẹ kị họ a-ahịchịng ẹ-ẹpwụ nya (1) the Research Guide for Jehovah’s Witnesses e-ekpeleji nya “The Bible,” ẹga ọlẹ ko ri “Practical Value,” bala “‘The Bible Changes Lives’ (ịlẹ kịị ji ẹpwụ nya Ẹpwang ọ-Kụ Gbeji)” lee (2) ụpa nya media ọla JW Library e-ekpeleji nya “Interviews and Experiences.”
^ par. 62 ABWỌ ỌCHỊCHỊ NYA IFOTO: Ọọnahị ọhẹ, ká ahụ nyamwụ kpọọ chị, wẹẹ jẹ́ ịBayịbụụ bala okolobya ọhẹ. Ụka ọkịla, ọ kpa aanahị ịkịla ba ịlọmwụ ụka nya ang ọjẹ́jẹ ọọwa.
