1. Ịyẹ tị́ du ká anchẹ nya iJihova ka lịlaa nwee ụka ọhẹ?

AHỊ wuu kaa lịlọhị nwee ụka ọhẹ. Ịnya angịhyẹ á kaa tata ka. Ịnya angịkịla tị kaa tata. Ahị ka lịlọhị nwee kori ká angịnyị á dọmwụ juwa balahị myị́. Ọ kaa la angịhyẹ ujwo nyọka la aligu ọọjịra-jịra onyeewe nyaa. Angịkịla bwu ugbiyegu ịlẹ kị kaa họ ang yẹẹyẹẹ lawụlẹ, lẹ ị kaa lịlaa nwee ụka kị mwụ́ rụ hwẹẹ hi ugbiyegu nyaa. Angịkịla lẹ, iwoo nya ọngịnyị nyaa ọlẹ ko gbu hyaa juwa waa. Angịnyị nya ịKịrayịsị ịhyẹ juwa kị lịlaa nwee ụka ká alugbeyigu nyaa ịlẹ kị ri Alibeenu nya iJihova ka á pwaa arwarụ lee ụka kị taa pyịpyị, ọgụgụụgụ kori kị ri angị inyeewe ẹ-ẹlịlẹhị.

2. Ịtọ ẹla iyina ahị tị́ ka ye ọwẹwẹ nyaa?

² IJihova jẹ́ ang myị́ ang u-uhye nyahị. Ọ jẹ́ ụka kahị lịlọhị nwee, ọ tị kaa tịtọ nyọka dahị ụbwọ. Ányị iJihova à tịị dahị ụbwọ? Ịyẹ ahị tị́ ka jẹ́-ẹ họ nyọka da ịlọhị ụbwọ? Ịyẹ ahị tị́ ka jẹ́-ẹ họ nyọka da angịkịla ịla ọjịra-jịra ịlẹ kị lịlaa nwee ụbwọ? Ahị kụ ẹhị yẹ ọwẹwẹ nya ịtọ ẹla ịwẹ wẹẹ.

3. Ányị iJihova à tị́ bwu mẹjẹ nyori ọ kpahị ju Ịlayịja?

³ IJihova tịtọ ká anchẹ nyamwụ wuu ka chị ọkẹkẹnị. O ju ọngọngọọngụ nyahị chwẹẹ, ọ tị kaa jẹ́ ụka kahị la ọkịlẹtụ okpenyi. (Eje. 145:18, 19) Kụ irya jaabwọ ká iJihova kpahị ju ọlọmwụ Ịlayịja wẹẹ. Ọlẹng ọ-chịla o-hu ọkịlẹtụ ha ọwẹ hịhị lụka olujwo ọ-ọpyị nya Isirẹlụ. Angịlẹ ká iJihova há ka, kị tị kpa ọngịrị ụ-ụbwọ ọ-ọpyị nya Isirẹlụ, kaa tụ́ angịlẹ kị kaa gbịgba iJihova pyịpyị. Angịịwa tị tịtọ nyọka nwụ Ịlayịja gụgụụgụ. (1 Ịdị. 19:1, 2) Ịnyịnyị, Ịlayịja me nyori ọwa kem à hi  ri ọlọmwụ ọlẹ kọ kaa gbịgba ha iJihova lẹ. Ọọwa tị ka kpọọ ọkịlẹtụ enyi gụ ọwọwa. (1 Ịdị. 19:10) IJihova họ ịngịhyẹ ahyaahị nyọka da Ịlayịja ụbwọ. IJihova du olegu-ẹrụ nyamwụ ka kpụ Ịlayịja ịtịya nyori ọ́ lụbwọọmwụ ka, iru nya ala Isirẹlụ ịkịla juwa ịlẹ kị kaa gbịgba ha iJihova bwu ọkịlẹtụ wẹẹ!​—1 Ịdị. 19:5, 18.

4. Ányị ụpwụ nya ịMakị 10:29, 30 à tị́ mẹjẹ jaabwọ ká iJihova kaa kpahị ju anchẹ nyamwụ ịlẹ ká alugbiyegu bala aligu nyaa kaa dụbwọ ka?

⁴ IJihova jẹ́ nyori ụka kahị cheje nyọka gbịgba họọ, iru nyahị tụụbwọ hi ang ịtụka-ịtụka beji. Ang ọhẹ bwu ẹpwụ nyaa ka ri ụbwọ ọdada nya alugbiyegu bala aligu nyahị ịlẹ kị kaa gbịgba ha iJihova ka. Ọhẹka ọọlajị nya uko ọchịchị à du ká ọlẹrụ iPita tọ iJisọsị ịtọ ẹla ọlẹ wo lẹ: “Ahị ayịdang tụụbwọ hi ang myị́ ang nyahị wuu, ahị bang jẹ lẹ. Ee lẹ, ịịyẹ ahị tị́ ka la ku ọmwakpa nyaa lẹẹ mẹ?” (Mat. 19:27) IJisọsị chị angịjụgbẹyị nyamwụ ehe nyori nyị ka la ugbiyegu nya olegu ọtụka-ọtụka. (Wa ịMakị 10:29, 30.) IJihova kọ ri olegbeju nya ugbiyegu nya olegu nyahị tị chehe nyori ọwa nyị ka da angịlẹ kị tịtọ nyọka gbịgba họọ ụbwọ. (Eje. 9:10) Kụ ẹhị yẹ ịngịhyẹ ọlẹ á ka jẹ́-ẹ họ nyọka ye ụbwọ ọdada nya iJihova ụka ká lịlọng nwee wẹẹ.

5. Ịyẹ tị́ du kọ há nyọka kụ irya u-uhye nya abwọlẹ ká iJihova wẹẹ dang ụbwọ?

⁵ Kụ irya u-uhye nya abwọlẹ ká iJihova wẹẹ dang ụbwọ. (Eje. 55:22) Ọọwa ka dang ụbwọ nyọka jẹ́ nyori á lụbwọng ka. Ọọnahị ọnyang ọhẹ juwa ká ẹnyị nyamwụ ri Carol, * ọ́ rwọrụ ka, ọngọngọhẹ ugbiyegu nyamwụ-ụ́ tị jam ẹ-ẹlịlẹhị ka. O yẹkẹẹ: “Ụka kam kụ irya u-uhye nya abwọlẹ ká iJihova dam ụbwọ nyọka bọhụ ụka olujwo, ọọwa du kam kaa jẹ́ nyori ḿ lụbwọm ka. O du kam kaa jẹ́ myị̀myị̀ nyori iJihova ka dam ụbwọ ị-ịlahị ịnyịnyị.”

6. Ányị ụpwụ nya 1 iPita 5:9, 10 à tị́ ka jẹ́-ẹ ju angịlẹ kị kaa lịlaa nwee ọhụ?

⁶ Kụ irya u-uhye nya abwọlẹ ká iJihova wẹẹ da aanahị ịlẹ kị lịlaa nwee ụbwọ. (Wa 1 iPita 5:9, 10.) Ọọnahị Hiroshi, kọọwa kem à  jẹ́ ẹlịlẹhị ugbiyegu nyamwụ ẹ-ẹpwụ nya ẹka ịmanyị tị́ lẹ, yẹkẹẹ: “Ọọjịra-jịra, ọ kaa chịkpẹẹ nyọka yẹ nyori ọng myị́ ọng wuu la akama. Ahị jẹ́ nyori ahị wuu wẹẹ maga la ọngịrị nyahị wuu nyọka gbịgba ha iJihova, ọọwa tị kaa juhi ahị angịlẹ ká ugbiyegu nyahị jam ẹ-ẹlịlẹhị ka ọhụ.”

7. Ányị abwọ ọrịrị à tị́ kaa dang ụbwọ?

⁷ Kịnyaa la ang nya olegu ọhọhọ. À ka ya je iJihova jaabwọ ká ẹla lang ọ-ọkịlẹtụ kpangga pyii. (1 Pit. 5:7) Ọọnahị ọnyang ochiche ọhẹ juwa ká ẹnyị nyamwụ ri Massiel. Ụka kọ cheje nyọka gbịgba ha iJihova, ọ lịlọmwụ nwee chajị ugbiyegu nyamwụ-ụ́ kaa gbigba ha iJihova ka. O yẹkẹẹ: “Ịngịhyẹ ọlẹ kọ dam ụbwọ gụgụụgụ nyọka bọhụ ụka kam lịlọm nwee ri abwọ ọrịrị ha iJihova bwu ọkịlẹtụ. O ri Adịda nyam ịnyịlẹhị, m̀ tị kaa raabwọ hoo ụka lụmẹ-lụmẹ ẹ-ẹpwụ nya ahyẹẹnụ nyọka ya ẹla ọlọkịlẹtụ nyam joo.”

8. Ányị ọ-wa Omyi Ẹla nya Ohe Oluhye bala ọ-kụ irya jwoo kpori-kpori à tị́ kaa dang ụbwọ?

⁸ Wa Omyi Ẹla nya Ohe Oluhye ụka myị́ ụka, kụ irya kpori-kpori ju ụpa ịlẹ kị mẹjẹ nyori à há iJihova. Bianca ri ọọnahị ọnyang ọhẹ ọlẹ ká alugbiyegu nyamwụ kaa ya ẹla ịlẹ kị ka kpọọ ọkịlẹtụ enyi. O yẹkẹẹ: “Ọ-wa oja nya angịnyị ịla ịBayịbụụ bala ịnya ọhịhị nya anchẹ nya iJihova ịlẹ kị chịpwụrụ bwu ẹpwụ nya iwe-ahụrụ ọlịịwẹ dam ụbwọ yẹẹyẹẹ.” Angịnyị nya ịKịrayịsị ịhyẹ kaa kpa ụpwụ ịgọgọ ịlẹ kị kaa kpaa ẹjẹ yẹẹyẹẹ ọ-ọkịlẹtụ, lala ụpwụ nya Eje Ọnyịịla 27:10 bala Ayịsaya 41:10. Angịkịla kaa ke ụrụ wo la ẹla ọ-kịla ju ụka kị juwa nwụlanọ gbe ọjịra-jịra lee ụka nya ịBayịbụụ ọwawa nyaa. I ya nyori ọọwa nyịị du kịị lịlaa nwee ka.

9. Ányị ọjịra-jịra ọkaka à tị́ kaa dang ụbwọ?

⁹ Maga nyịlẹhị-ịlẹhị nyọka ka ọjịra-jịra ụka myị́ ụka. Ang ọlẹ kị kaa mẹjẹ ụ-ụwa ka jung ọhụ, à tị ka jẹ́ aanang gụ ọwọwa. (Hib. 10:24, 25) Massiel kahị ya ẹla nyamwụ wẹ ịnịịnọ yẹkẹẹ: “Nanana nyori m̀ kaa ju oyi, m̀ cheje nyọka ka ọjịra-jịra ọnyị myị́ ọnyị bala ọ-wẹ ịtọ ẹla ụ-ụwa. Ọọwa du kam yẹ ịlọm lala ụpa nya ọjịra-jịra.”

10. Ịyẹ tị́ du kahị baba nyọka ri igu bala aanahị alẹng bala anyang?

¹⁰ Ri igu bala Angịnyị nya ịKịrayịsị ịkịla. Mwahị nya aligu bwu ọjịra-jịra ịlẹ ká ka jẹ́-ẹ jẹ́ ang bwu ẹga nyaa. Ị ka jẹ́-ẹ ri ọgbahị nyang lee o-ri anjwo nyang, lee ọ-dọmwụ bwu ẹga ọkịla myị́. ỊBayịbụụ kpụhị ịtịya nyori “ọgbahị à jẹ ẹla okpori-kpori lẹ.” (Job. 12:12) Angigbahị ịnyịnyị tị ka jẹ́-ẹ jẹ́ ang bwu ẹga nya anjwo ịla ọjịra-jịra. IJonatan ri ọgbahị nya iDevidi hwẹẹ, ọọwa á tị du ki ri aligu ilikẹjẹ nya awụlẹ ka lẹ ka. (1 Sam. 18:1) IDevidi  bala iJonatan dawụlẹ ụbwọ nyọka gbịgba ha iJihova ẹ-ẹpwụ nya iwe-ahụrụ ilujwo lụmẹ-lụmẹ. (1 Sam. 23:16-18) Irina, ọọnahị ọnyang ọhẹ ọlẹ kọọwa kem à ri Olibeenu nya iJihova bwu ugbiyegu nyamwụ yẹkẹẹ, “Aanahị alẹng bala anyang ka jẹ́-ẹ lala adahị bala ịnahị bala anyịnahị ịnyịlẹhị. IJihova ka jẹ́-ẹ kpaa dahị ụbwọ ụka kahị baba nyamwụ.”

11. Ịyẹ a tị́ ka họ nyọka la aligu nyịlẹhị?

¹¹ Ọ-la aligu inyeewe-é ka chịkpẹẹ ka, ọgụgụụgụ kori ká kaa ju oyi. Ratna, ọọnahị ọnyang ọhẹ ọlẹ kọ kaa ju oyi, kọ tị jẹ́ ẹlịlẹhị nanana nyori ị kaa tọọ pyịpyị, yẹkẹẹ, “M̀ wẹ ka yẹ nyori m̀ baba nya ụbwọ ọdada nya ugbiyegu nya olegu nyam.” Ọ ka lujwo nyọka ya ẹla olirya nyang je ọngọkịla myị́, ma ẹla oyaya ọgbadaa ọlịịwẹ ka du kaahụ bala ọngịnyị ka ri aligu nyịlẹhị. Aligu nyang tịtọ nyọka jung ọhụ bala ọ-dang ụbwọ, ma ị baba nyahụ ọ-ka ya jaa jaabwọ kị ka bwu họ ịnyị.

12. Ányị ẹrụ ọnyịịla ọ-kpa pyẹ à tị́ ka jẹ́-ẹ dang ụbwọ la aligu ịnyịịla?

¹² Ụgbẹyị ọlẹ kọ há gụ wuu nyọka la aligu ri o-bwula ọ-kpa ẹrụ ọnyịịla pyẹ bala Angịnyị nya ịKịrayịsị ịkịla. Carol kahị wo ẹla nyamwụ wẹ ịnịịno yẹkẹẹ: “M̀ la aligu ịnyịịla lụmẹ-lụmẹ bwula ọ-bịrị ụka bala aanahị anyang ẹ-ẹrụ ọnyịịla ọ-kpa pyẹ bala akụrwọ nya iJihova ịkịla. IJihova tị kpa aligu nyam ịwẹ dam ụbwọ ẹ-ẹpwụ nya ẹka lụmẹ-lụmẹ lẹ.” Ọ kaa há yẹẹyẹẹ ụka kahị ri igu ta Angịnyị nya ịKịrayịsị ịkịla. IJihova kaa kpa aligu ịlịịwẹ jung ọhụ ụka ká la ọkịlẹtụ okpenyi, ọ-chụ pwokwita ri ụka ká lịlọng nwee.​—Etu 17:17.

13. Ụkụrwọ oyina ọng myị́ ọng ọọjịra-jịra à tị́ la?

¹³ O ri ụkụrwọ nya ọng myị́ ọng ọọjịra-jịra nyọka họ kọ ka ri ẹga nya okpunyi bala ọ-ka mẹ ọháha jẹ ẹ-ẹga nya ọng myị́ ọng chajị ká ọngọngọhẹ ka me irya nyori nyị deeri hi ọwa ka. (Jọn. 13:35) Ẹla ọlẹ kahị ya bala ọhọhọ kaa ju angịkịla ọhụ nyịlẹhị-ịlẹhị! Wo ẹla ọlẹ ká ọọnahị ọnyang ọhẹ ya lẹẹ: “Ụka ọlẹ kam jẹ́ ẹlịlẹhị, aanahị ịla ọjịra-jịra wẹ ka ri ugbiyegu nyam. Ó ri ụbwọ ọdada nya aanahị ka ịnọ, ḿ ka jẹ́-ẹ ri ọngọhẹ nya Alibeenu nya iJihova ka.” Ịyẹ a tị́ ka jẹ́-ẹ họ nyọka da angịlẹ ká alugbiyegu nyaa á jẹ́ ẹlịlẹhị ka ụbwọ nyọka jẹ́ nyori ị ri ụpa nya ọjịra-jịra?

14. Ịyẹ a tị́ ka jẹ́-ẹ họ nyọka ri igu ta angị inyeewe?

¹⁴ Maga ká wu angịnyị igu. Ahị ka jẹ́-ẹ dọmwụ bwula ọ-da angị inyeewe ọwụraba bwu ọkịlẹtụ wẹ ọjịra-jịra. (Rom. 15:7) Ọ́ tị ka ba ọ-ọnụ ọ-da chaa kem ka, ahị baba nyọka ju igu oriri nyahị ọngịrị ịnyịnyị jaabwọ ká ụka wẹẹ chịpwụrụ. Lẹ, họ ẹla dụmwọ ẹ-ẹga nya angị inyeewe, ká mẹjáa nyori à kpahị jwaa. Maga nyọka jẹ́ akama ịlẹ kị wẹẹ chịpwụrụ bwu, la ọ-tịtọ ẹla ịlẹ kị ka hu oyoyi jwaa ka. Ọ ka la angịhyẹ ujwo nyọka ya ẹla olirya nyaa jeng, lẹ dụmwọ-dụmwọ ká taa gbaagbaa nyọka ya ẹla ka. Ọkọkọ nyọọwa, kpa ẹla ọjẹ́jẹ taa ịtọ ẹla ịlẹ kị ka gba irya nyaa kpehe, ká ke ụrụ kpẹnẹẹ wo la ọwẹwẹ nyaa. Ọ-chụ pwokwita, à ka jẹ́-ẹ taa wo jaabwọ kị bwu jẹ́ ẹlịlẹhị.

15. Ányị aanahị ịlẹ kị ya ẹta yeji yẹẹyẹẹ ẹ-ẹlịlẹhị à tị́ ka jẹ́-ẹ da angịkịla ụbwọ?

¹⁵ Ọmyịmyị nya ọng myị́ ọng ọọjịra-jịra kaa la ọngịrị kori kahị mẹjẹ nyori ahị kpahị ju awụlẹ. Ọ kaa lịnyị gụgụụgụ ụka ká angịgbahị bala angịkịla ịlẹ kị yẹta yeji yẹẹyẹẹ ẹ-ẹlịlẹhị á họ ịnyị. Melissa, ká ịnamwụ ụbwọọmwụ à kpọọ nwà ẹ-ẹlịlẹhị yẹkẹẹ: “Ẹla nya aanahị ịlẹ kịị kpam lala ọnyị nyịlaa ẹ-ẹpwụ nya ẹka ịwẹ myịm lẹhị lụmẹ. Ị kaa bịrị ụka balam bala ọ-kpahị jum. Ụka myị́ ụka kam baba nyọka  ya ẹla bala ọngịnyị, m̀ kaa ye ọngọhẹ ọlẹ kọ ka ke ụrụ.” Ọọnahị ọlẹng ọhẹ ká ẹnyị nyamwụ ri Mauricio, la ọkịlẹtụ okpenyi bala ọ-lịlọmwụ nwee nyọlẹ ká ọngọlẹ kọ jẹ́ ịBayịbụụ balọọ rụ hi ẹlịlẹhị. O yẹkẹẹ: “Angịgbahị nya ọjịra-jịra mẹjẹ́m nyori ị kpahị jum, ọọwa tị dam ụbwọ yẹẹyẹẹ. Ị kaa ya ẹla balam yẹẹyẹẹ. Ị kaa kpa ẹrụ ọnyịịla pyẹ balam, ya ẹla ọlẹ kị jẹ́ bwu ịBayịbụụ ọjẹ́jẹ nyịlaa jem, bala ọ-kọ ayịlọ balam.” Melissa bala Mauricio kaa kpa ụka nyaa wuu họ ụkụrwọ nya iJihova lẹẹlẹẹ.

16-17. Ang ịkịla iyina ahị tị́ ka jẹ́-ẹ họ nyọka da angịkịla ụbwọ?

¹⁶ Da angịkịla ụbwọ. (Gal. 6:10) Leo, ko ri ọngọ kpa ẹrụ ọnyịịla pyẹ ẹ-ẹpwụma ọkịla, kọ ji hwee hi ugbiyegu nyamwụ yẹkẹẹ: “Ụka lụmẹ-lụmẹ, ang ọlẹ ká baba ri ọngịnyị ọ-ka họng ọnahị ọ-pyịnyẹng ọhẹ ụka ọlẹ ká baba nyamwụ. M̀ kpịtịya nya ẹnẹhẹ kam keji la ang ọrụnyẹ nyam. Ụka kam ka pwụ ẹpwa wẹẹ, ịnyịrọ chịm pyẹpyẹ wuu lẹ. Ọọwa lẹ, ahụ bala ọrụ ọhẹ à wụrụm ka ẹpwa nyaa ka ri ang lẹlẹ. Ḿ kpịtịya nya ang ọlẹ kahị ri kpangga kaka, ma m̀ kpịtịya jaabwọ kị ke ụrụ wo lam kpẹnẹẹ. Ụka ohyẹẹkpẹ, ịnyịrọ pwọọm kpuru.”

¹⁷ Ịngịhyẹ ọlẹ kọ du ká ọhụhụ lala ọjịra-jịra nya isekut bala ọjịra-jịra ọtụka kaa kpụhị ịpyọ ri ọlajị nyọlẹ kahị jẹ́-ẹ to aanahị bala o-ya ẹla lawụlẹ u-uhye nya ang ịlẹ kahị jẹ́. Ma, Carol kahị ya ẹla rụ́ wẹ ịnịịnọ yẹkẹẹ, “Ụka nya ọjịra-jịra nya isekut bala ọjịra-jịra ọtụka kaa lam ujwo kaka kpoye.” Ịyẹ tị́ du kọ ya ịnyị? O yẹkẹẹ, “Nanana nyori aanahị alẹng bala anyang juwa lala ohu ịmanyị tị́ lee ụnọ ịmanyị tị́ dọmwụ, iru nyaa kaa juwa bala ugbiyegu nyaa bala ọ-dọmwụ kaa hụhụ lawụlẹ. Am lẹ, ụka kam yaa, m̀ kaa lịlọm nwee datị.” Ọ kaa la angịkịla ujwo nyọka ka ọjịra-jịra ịlịịwẹ ụka ká ahụ nyaa lee ọrwaa-á gbu hyaa. À jẹ́ ọngọhẹ ọlẹ kọ la akama ụma ịlịịwẹ? À ka jẹ́-ẹ wụrọọ kọ ka wẹ ka jula ugbiyegu nyang ụka nya ọhụhụ ọkịla ọlịnyị?

18. Ányị ahị tị́ ka kpa ụpwụ nya 2 Ala ịKọrịntị 6:11-13 họ ụkụrwọ ụka kahị ja họ angịkịla ụga?

¹⁸ Bịrị ụka lawụlẹ. Maga nyọka bịrị ụka bala aanahị alẹng bala anyang ịdatị-datị, ọgụgụụgụ ri angịlẹ kị ka lịlaa nwee myị́. Ahị tịtọ  nyọka “wụrụ ọkịlẹtụ [nyahị] wuu da gbadaa,” ọgụgụụgụ ẹ-ẹga nya angị ịlịnyị. (Wa 2 Ala ịKọrịntị 6:11-13.) Melissa kahị ya ẹla nyamwụ wẹ ịnịịnọ yẹkẹẹ: “Ahị kaa chị ọkẹkẹnị yẹẹyẹẹ ụka ká aanahị-ị́ wụrụụhị wẹ ẹpwa nyaa kaka bịrị ụka bala ugbiyegu nyaa bala ọ-ka anyị lawụlẹ.” Ọngọhẹ juwa ọọjịra-jịra nyang ọlẹ ká ka jẹ́-ẹ họ ụga?

19. Ụka oyina ọ-bịrị ụka bala aanahị à tị́ kaa dụbwọ gụgụụgụ?

¹⁹ Ụka ọhẹ ji kọ ka kpụ aanahị ịpyọ gụgụụgụ kori kahị bịrị ụka balaa. Ọ ka la angịhyẹ ujwo nyọka juwa bala ugbiyegu nyaa ịlẹ kị jẹ́ ẹlịlẹhị ka ụka nya ẹka bala ịhọhọ ịkịla nyaa. Ahyẹẹnụ ịhyẹ tị ka ji ká ọkịlẹtụ ka kpụ angịkịla enyi datị myị́, lala ahyẹẹnụ nya ịtịya ọkpụkpụ nya ọngịnyị nyaa ọhẹ ọlẹ kọ gbu hyaa. Ụka kahị maga nyọka bịrị ụka bala aanahị ịlẹ kị la akama ịlịịwẹ, ahị wẹẹ mẹjẹ nyori ahị ‘kpahị jwaa yẹẹyẹẹ.’​—Filip. 2:20.

20. Ányị ẹla ọlẹ ká iJisọsị ya ụ-ụpwụ nya ịMatiyu 12:48-50 à tị́ ka dahị ụbwọ ụka kahị lịlọhị nwee?

²⁰ Ang lụmẹ-lụmẹ ka du ká Ọngịnyị nya ịKịrayịsị ka lịlọmwụ nwee myị́. Ma, áhị ka deeri nyori iJihova jẹ́ jaabwọ kọ wẹẹ lahị ọ-ọkịlẹtụ ka. Ọ kaa ya ang ịlẹ kahị baba hahị. Ọ tị kaa họ ịnyị bwula aanahị ụka lụmẹ-lụmẹ. (Wa ịMatiyu 12:48-50.) Ahị ịnyịnyị tị ka jẹ́-ẹ mẹjẹ iJihova nyori ẹla nya ọjịra-jịra myịhị lẹhị bwula ọ-maga nyọka da aanahị ụbwọ. Jaabwọ myị́ abwọ kọ kaa lahị ụka ọhẹ, ahị jẹ́ nyori áhị lụbwọọhị ka chajị iJihova jam balahị!