1-2. (a) Jaabwọ ká ụpwụ nya Etu 16:31 ya, ányị ahi tị́ ka yẹ angịgbahị ịlẹ kị godayị giri-giri? (b) Ịtọ ẹla iyina ahị tị́ ka wẹ ẹ-ẹpwụ nya ang ọjẹ́jẹ ọlẹ?

ẸGA ọ-há ụ́hị ọhẹ ọlẹ ká angịnyị kaa taaha ka juwa ẹ-ẹga ọlẹ kị wụrụ nya Arkansas, U.S.A. Angịnyị ka yẹ ẹjwọ o-ju apyobwuna ị-ịpyị gede-gede ẹ-ẹga ọwa myị́. Ma, ị́ pwo ajwọ i-ju apyobwuna ịịwa kpụ ị ka jẹ́-ẹ kpa họ ang lala ịjang lẹka. Chajị nya ọọwa, iru nya angịnyị ịlẹ kị yẹ ajwọ ịịwa á kaa jẹ́ ang ọlẹ kị wẹẹ yẹ ka, dudu kị kaa chịpwụrụ wẹ ang ọnyịịla ọwẹ wẹ rụ kam.

² Jaabwọ ká ẹjwọ ịwẹ la, aanahị alẹng bala anyang ịlẹ kị ri angịgbahị ju apyobwuna yẹẹyẹẹ. Omyi Ẹla nya Ohe chabwọ nya inyi iwuru nyaa lala okpo nya adịrahụ. (Wa Etu 16:31; 20:29) Ma, ọ ka chịkpẹẹ la ọ-ya ẹhị hwo angịgbahị ịwẹ hwo myị́. Ụka ká anjwo á jẹ́ nyori angịgbahị ịwẹ nyị ju apyobwuna, ị kaa yé ang ọlẹ kọ kpụ ịnya gụ́ ụdụ ọlam-ọlam. Ẹ-ẹpwụ nya ang ọjẹ́jẹ ọlẹ, ahị ka wẹ ịtọ ẹla ịta ịlẹ: Ịyẹ tị́ du ká iJihova kaa yẹ angịgbahị lala angị ju apyobwuna? Ịyẹ tị́ du ká angịgbahị ịwẹ ju apyobwuna ha ogu nya iJihova? Ịyẹ ahị tị́ ka họ nyọka yé apyobwuna yẹẹyẹẹ bwu ọgụ-ẹpẹtẹ nyaa?

3. Jaabwọ ká ụpwụ nya Eje Ọnyịịla 92:12-15 ya, ịyẹ tị́ du ká angịgbahị ịlẹ kị godayị giri-giri kaa há iJihova yẹẹyẹẹ?

³ Angịgbahị ịlẹ kị godayị giri-giri kaa há iJihova Ohe Oluhye yẹẹyẹẹ. Ọ jẹ́ ụma nya angịnyị ịlẹ kị ri ọ-ọkịlẹtụ, abwẹla ịnyịịla nyaa tị kaa myọọ lẹhị ịnyịnyị. Ọ kaa chị ọkẹkẹnị ụka ká angịgbahị ịwẹ á kpa ẹla ọlẹ kị jẹ́ ẹ-ẹpwụ nya ẹka lụmẹ-lụmẹ ịlẹ kị kaa gbịgba họọ, da angịlẹ kị ri anjwo gwaa ụbwọ. (Job. 12:12; Etu 1:1-4) Ọhụ ọbaba nyaa myị̀ iJihova lẹhị ịnyịnyị. (Mal. 3: 16) Ọhịhị á chịkpẹẹ haa lụmẹ ka; ma, ị tị kịnyaa la ọmyịmyị ọnyọọngịrị ẹ-ẹga nya iJihova. Ẹhị ọrịrịị-rịrị nya ijuju ọlẹ kị la wẹẹ la ọngịrị gụ́ abwọlẹ kọ la ụka ọlẹ kị jẹ́ ẹlịlẹhị. Ị tị há iJihova chajị ị wẹẹ kịnyaa la ọ-ya ẹnyị nyamwụ dodehe nyọlẹ kị dọmwụ “chị ụchẹ chị kpá” lẹ.​—Wa Eje Ọnyịịla 92:12-15.

4. Ẹlịyẹ à tị́ ka kpụ́ aanahị alẹng bala anyang ịlẹ kị ri angịgbahị ẹjẹ?

⁴ Kori ká ja ri ọngọgbahị chẹẹ lẹ aalẹ, jẹ́ myị̀myị̀ nyori iJihova kpịtịya nya ụkụrwọ ọlẹ ká họ la ụka ọkẹkpẹ. (Hib. 6:10) À da ụkụrwọ nya ẹrụ ọnyịịla ọ-kpa pyẹ ụbwọ la ila ọchịchị ụka ọhẹ lẹ, ọọwa tị du ká Adahị olepwoohe chị ọkẹkẹnị. À bọhụ ẹ-ẹpwụ nya akama, tụ́ ịlẹ kị dọmwụ ka kpụng ọkịlẹtụ enyi myị́. À ju ihi nya ehile ịkpẹẹkpẹẹ ịlẹpwụ nya ịBayịbụụ bala ọ-chẹkpe jwaa, à ye ụkụrwọ ọ-la ilo ju ụbwọ ẹ-ẹpwụ nya ogu nya iJihova, bala ọ-mẹ ang jẹ angịkịla. À họ jaabwọ ká ka họ ba myị́ nyọka ba ọyẹda ịlẹ kị kaa wẹ ẹ-ẹpwụ nya ogu nya iJihova ụka myị́ ụka jẹ. À da angịkịla ụbwọ bala ọ-jwaa ọhụ nyọka họ ụkụrwọ nya iJihova la ọhịhị nyaa wuu. À há iJihova Ohe Oluhye yẹẹyẹẹ nyọlẹ ká godayị giri-giri họọ. Ọ myị ọnụ nyori ọwa nyị́ “ka nyẹẹkpẹ da angịnyị ịkpẹẹkpẹẹ nyamwụ ka”! (Eje. 37:28) Ọ ya ahị ọdahile hang yẹkẹẹ: “M̀ ka kpẹhị rịrịịnụ gbee kanụ ka ri angịgbahị bwu inyi inyiiwuru.” (Ayị. 46:4) Lẹ, a me irya nyori ọlẹ ká ri ọngọgbahị lẹ wẹẹ, á baba ha ogu nya iJihova kaka lẹ ka. À ju apyobwuna yẹẹyẹẹ!

5. Ẹla oyina angịgbahị à tị́ ka kpịtịya?

⁵ Angịlẹ kị ri angịgbahị kaa dụbwọ a-agbẹyị lụmẹ-lụmẹ. Ịlẹhị lẹ, ị́ ka la ọngịrị ọlẹ kị la ene-ene kaka, ma ẹla ịlẹ kị ya ẹhị yẹ ẹ-ẹpwụ nya ẹka lụmẹ-lụmẹ dudu kị la ẹla ọjẹ́jẹ yẹẹyẹẹ. IJihova ka jẹ́-ẹ kịnyaa la ọ-kpaa họ ụkụrwọ a-agbẹyị ịdatị-datị, jaabwọ kahị wẹẹ ka yẹ ẹ-ẹpwụ nya ọ-chụ pwokwita ịlụka onyogo bala ịla ụka nyahị.

6-7. Ya ọ-chụ pwokwita nya angị ịlụka nya ịBayịbụụ ịhyẹ ịlẹ kị yé ahị ọwawa ọọlajị nyọlẹ kị gbịgba ha Ohe la ọkịlẹtụ nyaa wuu wẹẹ.

⁶ Ẹ-ẹpwụ nya ịBayịbụụ, ahị ka yé ọ-chụ pwokwita ịnyịịla-ịnyịịla nya angị la ọmyịmyị ịlẹ kị họ ụkụrwọ nya iJihova la ila ọchịchị gbee kịị chị okwirichi. Ọ-chụ pwokwita ọhẹ ri  iMosisi, kọ gu ẹka lala 80 lụka kọ dọmwụ nyọka họ ụkụrwọ lala ọlọmwụ bala ọngọ ku ọmwakpa nya iJihova ẹ-ẹga nya ẹpwụma nya Isirẹlụ. Ụka ọlẹ kọ lala o-ri ịDanẹlụ nyị gu ẹka 90 da uhye myị́ lẹ, iJihova kaa kpọọ họ ụkụrwọ lala ọlọmwụ wẹẹ. Ọ tị lala o-ri ọlẹrụ ịJọn nyị gu ẹka lala 90 da uhye la ụka ọlẹ ká Ohe ya olegu nyamwụ họọ nyọka da ụpwụ nya Ọwụrụụ-wụrụ.

⁷ Iru nya angị la ọmyịmyị ịkịla juwa kị ru ohi lee angịnyị ọ-jáa lụmẹ ka, lẹ ọ ka chịkpẹẹ ká angịnyị ka yẹhị hwaa hwo myị́. Ma, iJihova tị jáa, ọ tị ka nwaa uri nyọlẹ kị dayị giri-giri họọ. Ọ-chụ pwokwita, iSimyọn ri “ọngọ kaa họ ehile nya Ohe Oluhye jịra kpẹẹkpẹẹ” bala o-ri “ọlabwẹla ọnyịịla.” ỊBayịbụụ á ya ẹla u-uhye nyamwụ lụmẹ ka, ma iJihova jẹ́ ụma nya ọngịnyị ọlẹ ko ri, kpụ ọ dọmwụ ya ihi họọ nyọka yẹ iJisọsị ụka kị kpọọ ụ-ụbwọ bala ọ-ka yọmwụ u-uhye nya iJisọsị bala ịnamwụ. (Luk. 2:22, 25-35) Ịnyịnyị, kụ irya nya Ana ahụ-ogu ọlẹ kọ ri ọlọmwụ wẹẹ. Ọ gu ẹka 84 lẹ, ọ́ tị kaa “chịda la ọ-ka ube ịgọgọ kpong-kpong ka.” IJihova wahị kụrwọọ nyọlẹ kọ kaa “ka ọjịra-jịra” ụka myị́ ụka, dudu kọ jẹ́ yẹ iJisọsị ụka ọhẹ nyọlẹ kị kpọọ ụ-ụbwọ wẹ ube ịgọgọ. ISimyọn bala Ana ju apyobwuna ha iJihova yẹẹyẹẹ.​—Luk. 2:36-38, NW.

8-9. Ányị angịlẹ kị ri ahụ-ogu à tịị kịnyaa la ọ-da ụbwọ?

⁸ Lụka nyahị ọlẹ, iru nya angịgbahị ịlẹ kị godayị giri-giri ha iJihova ri ọgụ-ẹpẹtẹ ọnyịịla ha angịlẹ kị ri anjwo. Kụ irya nya oja nya Ọọnahị Lois Didur wẹẹ. Nyọlẹ kọ gu ẹka 21 ọ dọmwụ nyọka kpa ẹrụ ọnyịịla pyẹ la ụka nyamwụ wuu ụ-ụwa ịị Canada. Ẹ-ẹkpẹ nya ọọwa, ọwa bala John ọrụmwụ kaa họ ụkụrwọ nya ọ-wụla aanahị yẹ ẹ-ẹpwụ nya ẹka lụmẹ-lụmẹ. Ị họ ụkụrwọ ị-ịBẹtẹlụ ọla Canada kpoye nya ẹka 20. Ụka ká Lois gu ẹka 58, ị wụrọọ bala John ọrụmwụ nyọka họ ụkụrwọ ọhẹ ịị Ukraine. Ányị ị tị́ ka họ? Ị ka kụ irya nyori ịwa nyị chị okwirichi kpoye nyọka dụbwọ ẹ-ẹpwụma ọkịla lẹ? Nyọlẹ kị ye ụkụrwọ ọọwa myị́, John wẹ ka ri ọngọhẹ nya Angị kpẹhị Rịrị Egbeju-ẹpwa ụ-ụwa. John gbu nyọlẹ kị họ ẹka irwiye ụ-ụwa kpá, Lois tị cheje nyọka kịnyaa la ụkụrwọ ọlẹ kị ya họọ ụ-ụwa. Lois gu ẹka 81 lẹẹlẹẹ lẹ. Ọ kaa kịnyaa la ọ-họ ụkụrwọ nya iJihova la ila ọchịchị ị-ịBẹtẹlụ ọla Ukraine, ọ tị há aanahị ịlụwa yẹẹyẹẹ.

⁹ Ụkụrwọ nya angịlẹ ki ri ahụ-ogu lala Lois á ka dodehe lala ụka ká ọrwaa ji lahị ka myị́, ma apyobwuna nyaa á chụhi ka. IJihova la ọháha ẹ-ẹga nya aanahị ịlẹ kị họ ụkụrwọ bala ọrwaa ẹ-ẹpwụ nya ẹka lụmẹ-lụmẹ, kị tị wẹẹ họ ụkụrwọ nya iJihova la ila ọchịchị kịnyaa wẹẹ. (1 Tim. 5:3) Datị hi ọọwa, ị kaa ju angịlẹ kị ri anjwo ọhụ yẹẹyẹẹ ịnyịnyị.

10. Ọgụ-ẹpẹtẹ ọnyịịla oyina Tony à tị́ ya deeji?

¹⁰ Iru nya aanahị ịlẹ kị juwa ẹ-ẹga ọlẹ kị kaa kpẹhị rịrị angịgbahị ju apyobwuna yẹẹyẹẹ ịnyịnyị. Ọ-chụ pwokwita, ọọnahị ọlẹng ọhẹ ká ẹnyị nyamwụ ri Tony juwa ẹ-ẹga ọlịnyị. Ọ hụ enyi Ohe ịị Pennsylvania, U.S.A., la Ọya  Ọhaneku 1942 ụka kọ gu ẹka 20. Nyọlẹ kọ nọ pyịnyẹng, alegbeju byoo nyị ka ri isoja. Nyọlẹ kọ pwa la ọ-ka họ ịnyị, ị woo ju agba ẹ-ẹpwụ nya ẹka imiiye bẹhya. Ọwa bala Hilda ahụ nyamwụ kpa anyị nyaa imiiye nwà ẹ-ẹpwụ nya ẹlịlẹhị. La ẹka lụmẹ-lụmẹ, Tony ri ọngọ kpịlahị nya angịgbahị nya ọjịra-jịra ẹ-ẹpwụ nya ọjịra-jịra ịta bala ọngọ kpẹhị rịrị ọjịra-jịra nya isekut. Ọ kaa ka ube nya agba kaka kpịlahị nya ọjịra-jịra bala ọ-mẹ ịBayịbụụ jẹ angịnyị ụ-ụwa. Ụka ká Tony dọmwụ gu ẹka 98, ọ́ kaa mwụ́ ịnyọ la ụkụrwọ nya iJihova ka. Ọ kịnyaa la ọ-gba ọngịrị nyamwụ kpehe ẹ-ẹpwụ nya ịgba ọgbagba nya iJihova bala ọ-kaa yẹ jula ọjịra-jịra ọlẹ kọ ji ẹ-ẹpwụ nya ụkụrwọ nya iJihova!

11. Ányị ahị tị́ ka mẹjẹ nyori ahị jẹ́ apyobwuna nya angịlẹ kị juwa ẹ-ẹga ọlẹ kị kaa kpẹhị rịrị angịgbahị?

¹¹ Ányị ahị tị́ ka bwu chị ihi ju aanahị ịgbahị ịlẹ kị juwa ẹ-ẹga ọlẹ kị kaa kpẹhị rịrị angịgbahị? Ụka myị́ ụka kọ chịkpẹẹ, angịgbahị nya ọjịra-jịra ka daa ụbwọ nyọka ka ọjịra-jịra lee ọ-ka ke ụrụ wo ẹla ọlụwa bala ọ-ka kpa ẹrụ ọnyịịla pyẹ jaabwọ kị ka họ ba myị́. Ahị ka jẹ́-ẹ mẹjẹ nyori ahị lịlọhị kpaa i-irya bwula ọ-jwaa ụga lee ọ-wụraa la ang-abwọ nya ichẹnẹ ịlẹ kị jẹ́-ẹ kpa yẹ awụlẹ. Ahị tịtọ nyọka kpịtịya nya angịgbahị, ọgụgụụgụ angịlẹ kị ji lụrụ hi ọjịra-jịra nyaa ẹ-ẹga ọ-kpẹhị rịrị angịgbahị. Ahị baba nyọka yẹhị reeji yẹẹyẹẹ chajị kahị ka deeri hi angịgbahị ịwẹ ka. Ọ ka la angịhyẹ nyaa ujwo lee o-me irya nyori nyị́ pwoku nyọka ya ẹla oluhye nyaa je angịkịla ka myị́. Ma ahị ka yé apyobwuna yẹẹyẹẹ kori kahị hi ụka taa ịtọ ẹla bala o-ke ụrụ wo abwọlẹ kị wẹẹ joja jehi u-uhye nya ọkẹkẹnị ọlẹ kị la ẹ-ẹpwụ nya ogu nya iJihova.

12. Ụma nya aanahị alẹng bala anyang iyina ahị tị́ ka la ẹ-ẹpwụ nya ọjịra-jịra nyahị myị́?

¹² Ọ ka lahị ẹbyẹbyị myị́ nyọka jẹ́ nyori angịgbahị ịlẹ kị godayị giri-giri juwa ẹ-ẹpwụ nya ọjịra-jịra nyahị. Ọọnahị ọnyang ọhẹ ká ẹnyị nyamwụ ri Harriette gbịgba ha iJihova la ọkịlẹtụ nyamwụ wuu ẹ-ẹpwụ nya ẹka lụmẹ-lụmẹ ọọjịra-jịra nyamwụ ụ-ụwa ịị New Jersey, U.S.A. Ọọwa lẹ, ọ tị mwụ́ bwu ụwa kaka kụ ta ọnyị nyamwụ ọnyang lẹlẹ. Nyọlẹ ká aanahị ịla ọjịra-jịra onyeewe maga nyọka jẹ́ ọọnahị ọwẹ, ị yẹ nyori nyị ri ang ụdụ. Ọ jwaa ọhụ bwula oja nya abwọlẹ ká ẹrụ ọnyịịla ọ-kpa pyẹ la ụka nya ọgbanyẹ ọlẹ kọ jẹ́ ẹlịlẹhị, kẹkpẹ la ịngịhyẹ nya 1920. Ụka ọọwa lẹ, ọ kaa kpa ang ọ-hụ ọnụ ba ịlọmwụ ụka kọ ja kpehe nya ẹla Ohe chajị ị kaa woo ju agba myị́. Ọ tị bịrị epwihi ookpokpo u-ube nya agba ụka imimiiye la 1933 ịlẹhị. Ọrụmwụ á ri Olibeenu nya iJihova ka, ma ọ tị kaa dọọ ụbwọ. Ụka ọlẹ kọ juwa u-ube nya agba, ọrụmwụ à kaa kpẹhị rịrị anjwo ịta-ịta nyaa lẹ. Ahị chịla nyọka ju ihi nya aanahị ịgbahị ịlẹ kị gbịgba ha iJihova yẹẹyẹẹ lala Harriette ịnyịlẹhị!

13. Ẹlịyẹ ahị tị́ jẹ́ u-uhye nya apyobwuna nya angịgbahị ẹ-ẹpwụ nya ogu nya iJihova?

¹³ Aanahị alẹng bala anyang ịlẹ kị ri angịgbahị ju apyobwuna ha iJihova bala ogu nyamwụ. Ị yẹ jaabwọ ká iJihova wahị kụrụ ogu nyamwụ bala ịwa lịlaa a-agbẹyị lụmẹ-lụmẹ. Ị jẹ́ ẹla o-ju apyobwuna bwu ẹpwụ nya ụchụụ ọlẹ kị chị ụka ọhẹ lẹ. Yaa lala “ẹmwụ nya ẹla ọjẹjẹ,” ká jẹ́ ang bwu ẹga nyaa. (Etu 18:4) Kori ká maga nyọka jáa, ọmyịmyị nyang ka la ọngịrị, à ka jẹ́ ang ọhẹ lee ọkịla bwu ẹga nyaa!

14. Ịyẹ ụpwụ nya Ehile Ọmada 32:7 à tị́ ju anjwo ọhụ nyọka họ?

¹⁴ Hu ẹta ẹdịyẹ nyọka ya ẹla bala angịgbahị ịwẹ. (Wa Ehile Ọmada 32:7.) Ịlẹhị lẹ, ugbẹhị nyaa á kaa yọyị chịra-chịra kaka myị́, ị́ ka jẹ́-ẹ họ ang la agaga nwà kaka myị́, ẹla oyaya nyaa á ka la kpịra-kpịra kaka myị́, ma ị tị ri onjwo  ẹ-ẹpwụ nya ọkịlẹtụ nyaa, bala ọ-la “ẹnyị ọnyịịla” ẹ-ẹga nya iJihova. (Ọngọ. 7:1) Kpịtịya nya ang odudu ọlẹ kị ju apyobwuna ha iJihova. Kịnyaa la ọ-jwaa ihi. Maga ká họ lala Ịlayịcha. Ọ ya ọnụ rịrị ọọ-ka ji bala Ịlayịja la ahyẹẹnụ ohyẹẹkpẹ ọlẹ kị la bala awụlẹ. Ịlayịcha ya ụka ịta-ịta yẹkẹẹ: “Ḿ ka tụ hing ka.”​—2 Ịdị. 2:2, 4, 6.

15. Ịtọ ẹla iyina ahị tị́ ka tọ angịgbahị myị́?

¹⁵ Mẹjẹ nyori à la irya ọlam ẹ-ẹga nya angịgbahị bwula ọ-taa ịtọ ẹla wọ kpẹnẹẹ. (Etu 1:5; 20:5; 1 Tim. 5:1, 2) Tọ ịtọ ẹla lala ịlẹ: “Ụka ká ri onjwo, ịyẹ à tị́ du ká jẹ́ myị̀myị̀ nyori ẹlịlẹhị à wẹ ká jẹ́ lẹ?” “Ányị ẹla ịlẹ kị họ tang à tị́ dang ụbwọ nyọka tụ́ ju iJihova chwẹẹ gụ́ ọọwa?” “Ịyẹ à tị́ dang ụbwọ nyọka kịnyaa la ọ-ka chị ọkẹkẹnị ẹ-ẹpwụ nya ụkụrwọ nya iJihova?” (1 Tim. 6:6-8) Ọọwa lẹ, a ke ụrụ ụka kị ja joja nyaa lẹlẹ.

16. Ányị ọngọgbahị bala onjwo à tị́ ka yé apyobwuna bwu ẹga nya awụlẹ bwula ọ-ya ẹla lawụlẹ?

¹⁶ Ụka ká ọngọlẹ kọ ri ọngọgbahị bala onjwo á ja ya ẹla bala awụlẹ, ịwa wuu kaa yé apyobwuna. (Rom. 1:12) Anụ anjwo ka jẹ́ myị̀myị̀ gụ́ olene nyori iJihova kaa kpahị ju angịnyị nyamwụ, ọngọgbahị ọọwa tị ka jẹ́ nyori nyị kaa ya ihi ha ọwa ịnyịnyị. Ọ ka kpọọ ịpyọ la ọ-ka ya jeng jaabwọ ọlẹ kọ yé ahị ọwawa bwu ẹga nya iJihova.

17. Ịyẹ tị́ du kahị ka jẹ́-ẹ ya nyori angịgbahị kaa hụ́hị gụ́ olene jaabwọ ká ẹka wẹẹ chịpwụrụ?

¹⁷ Ụ́hị ọla ẹhị kaa pwuru jaabwọ ká ọngịnyị wẹẹ ri ọngọgbahị, ma angịlẹ kị godayị giri-giri ha iJihova kaa hụ́hị gụ́ olene ẹ-ẹga nyamwụ jaabwọ ká ẹka ọnyị myị́ ọnyị wẹẹ chịpwụrụ. (1 Tẹs. 1:2, 3) Ịyẹ tị́ du ká ẹla ọwẹ ri ịnyịlẹhị? Chajị ẹ-ẹpwụ nya ẹka lụmẹ, ị ya ẹga da ha olegu nya Ohe Oluhye nyọka mẹ ang jáa bala ọ-daa ụbwọ nyọka nwụ́ abwụma ịnyịịla. Jaabwọ kahị wẹẹ jẹ́ aanahị alẹng bala anyang ịlẹ kị ri angịgbahị gụ́ olene, kahị wẹẹ jwaa ihi bala ọ-jẹ́ ang bwu ẹga nyaa gụ́ olene, ịnyịnyị ahị ka jẹ́ nyori ị ju apyobwuna nya ịlẹhị-ịlẹhị lẹ!

18. Ẹlịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọkịla?

¹⁸ Ụ-ụka ká anjwo á jẹ́ apyobwuna nya angịgbahị kem ọjịra-jịra á kaa la giri-giri ka, ọ kaa lịnyị ụka ká angịgbahị á jẹ́ apyobwuna nya anjwo ịnyịnyị. Ẹ-ẹpwụ nya ang ọjẹ́jẹ ọkịla, ahị ka ya ẹla u-uhye nya abwọlẹ ká angịgbahị ka bwu jẹ́ apyobwuna nya angịlẹ kị ri anjwo ẹ-ẹpwụ nya ọjịra-jịra.