Ịtọ Ẹla Bwu Ẹga nya Angị Wa Apwụ Nyahị
Ịyẹ tị́ du ká iJisọsị ya ẹla bwu ụpwụ nya Eje Ọnyịịla 22:1 ene kọọ gbu?
Jaabwọ kị da ju ụ-ụpwụ nya ịMatiyu 27:46, ọhẹ la ẹpwụ nya ẹla ịlẹ ká iJisọsị ya ene koo gbu ri yẹkẹẹ: “Ohe Oluhye nyam, Ohe Oluhye nyam, ịyẹ a tị́ du ká juwa ji ẹkpẹ dam ịnyị?” Bwula o-ya ẹla ọwẹ, iJisọsị wẹẹ họ omyi ẹla nya iDevidi ọlẹ kị da ju ụ-ụpwụ nya Eje Ọnyịịla 22:1 jịra. (Mak. 15:34) Ọ ka tịpyọ kori kahị ya nyori iJisọsị nyị ya ẹla ọwẹ ọọlajị nyori ọ́ dahịhile iJihova ka lee o-ya nyori ọmyịmyị ọlẹ kọ la ẹ-ẹga nya Ohe nyị gwọọ myị lụka o-kpii ọwẹ. IJisọsị jẹ́ ang odudu kọ baba nyọka gbu, ọ tị nwụlanọ nyọka họ ịnyi. (Mat. 16:21; 20:28) Ọ jẹ́ ịnyịnyị nyori ụka nya igu nyamwụ, iJihova nyị́ ka “chewu koo” ka. (Job. 1:10) Lẹ iJihova hwabwọ la o-chewu ke iJisọsị, chajị ká iJisọsị ka jẹ́-ẹ mẹjẹ nyori ọwa nyị ka godayị ẹ-ẹpwụ nya ọmyịmyị pwụ́ ọbaba jaabwọ myị́ abwọ ká igu nyamwụ ka lujwo họọ kaka ba.—Mak. 14:35, 36.
Ịyẹ à tị́ tịtị du ká iJisọsị ya ẹla ọlụpwụ nya Eje Ọnyịịla ọwẹ? Ịlẹhị lẹ, áhị jẹ́ kpangga ka, ma ahị kụ ẹhị yẹ ang ịlẹ kị ka du myị́ wẹẹ. *
Nyọlẹ ká iJisọsị ya ẹla ọwẹ, ọhẹka ọ wẹẹ mẹjẹ nyori iJihova nyị́ ka chọọ da bwu igu ogbugbu ọwẹ ka ịnyị. IJisọsị chịla nyọka nwuri nya ọ-ra kpehe ọwẹ la iJihova ọ-dọọ ụbwọ ka. O ri ọngịnyị ehe chọnụ, ọ tị baba nyọka “gbu wọnụ [nya ọng myị́ ọng] ju.”—Hib. 2:9.
Nyọlẹ ká iJisọsị ya ẹla ịmanyị-ịmanyị bwu eje ọnyịịla ọwẹ, ọhẹka ọ tịtọ ká angịkịla ka kụ irya Eje. 22:7, 8, 15, 16, 18, 24) Ịnyịnyị, ọgba ohyẹẹkpẹ nya eje ọwẹ ya ogbo ha iJihova bala ọ-wụrwọọ nya Adịrahụ nya odehe wuu.—Eje. 22:27-31.
nya eje ọọwa ịnyị. Lụka onyogo, iru nya ala iJuu kaa kpa ụpa nya eje ọnyịịla lụmẹ-lụmẹ e-egbeju. Ọlẹ kị wo ọgba ookpokpo bwu ụwa wẹẹ, irya ka kpaa ka ẹga nya eje ọọwa lẹpwụ-lẹpwụ. Ó ri ẹlẹwẹ ká iJisọsị á kpa i-irya aalẹ, ọ ka da alebẹkpẹ nyamwụ ụbwọ nyọka kpịtịya nya iru nya ọmwụ ọyẹyẹ ịlẹpwụ nya eje ọwẹ ịlẹ kị ya ẹla u-uhye nya iwe-ahụru ịlẹ kị dagaga ju igu nyamwụ. (Nyọlẹ ká iJisọsị ya ẹla nya iDevidi ọwẹ, ọ wẹẹ mẹjẹ nyori ị wẹẹ ka nwọọ ododu. Ene kịị nwụ iJisọsị, ala ịkọọṭụ ọgbẹgbịlẹ lọọ eje ụ-ụgbẹyị ọlẹ kọ pwoku ehile ka bala o-ya eje woo nyori nyị ya ẹla onyobyi ba Ohe Oluhye. (Mat. 26:65, 66) Angịleje tụ́ guru ahyaahị la epwodu, ọọwa lẹ, ị ya eje ọọwa woo la ọ-dịrẹ ẹla ọọwa jaabwọ ká ehile ya kaka lẹlẹ. (Mat. 26:59; Mak. 14:56-59) Nyọlẹ ká iJisọsị tọ wo yẹkẹẹ, “Ohe Oluhye nyam, Ohe Oluhye nyam, ịyẹ a tị́ du ká juwa ji ẹkpẹ dam ịnyị?” ọhẹka ọ wẹẹ họ ká angịnyị ka jé nyori ọ́ ho ẹlẹhẹ kpụ igu ka.
Ọhẹka iJisọsị wẹẹ kpụ angịkịla ịtịya nyori, ọlẹ ká iDevidi yẹ akama lẹ, ọọwa á mẹjẹ nyori ẹla nyamwụ wụ́ iJihova ẹjẹ ka. Ịtọ ẹla nya iDevidi á mẹjẹ nyori ọ́ la ọmyịmyị ka lẹ ka. Nyọlẹ kọ tịtọ ẹla ọwẹ kpá, o ya nyori ọwa nyị dahịhile ọngịrị nya ọchịda nya iJihova, iJihova tị kịnyaa la ọ-wahị kụrwọọ. (Eje. 22:23, 24, 27) Ịnyịnyị-ịnyịnyị, nanana nyori iJisọsị “Ọnyị nya iDevidi” juwa yẹ akama u-uhye nya okoji ụka ọwẹ, ọọwa á mẹjẹ nyori iJihova á yoo myị ka lẹ ka.—Mat. 21:9.
Ọhẹka iJisọsị wẹẹ bida nyịlẹhị-ịlẹhị chajị nyọlẹ ká iJihova hwabwọ la o-chewu koo chajị kọ ka jẹ́-ẹ mẹjẹ nyori o godayị giri-giri. Ó ri irya nya iJihova ká Ọnyị nyamwụ ka yẹ akama bala o-gbu igu ịnọ ka. Ọnyị nyamwụ baba nyọka yẹ akama bala ọ-ka gbu ọọlajị nyọlẹ ká Adam bala Iivu la egbeju ọngịrị ịnyị. IJisọsị á họ ẹlẹhẹ ọtịpyọ ka, ma ọ baba nyọka yẹ akama bala o-gbu igu chajị kọ ka jẹ́-ẹ wẹ ịtọ ẹla ịlẹ ká Olegu Onyobyi gba kpehe bala ọ-ra ang ọlẹ ká ọngịnyị ehe ya byi tịrẹkpẹ. (Mak. 8:31; 1 Pit. 2:21-24) Ẹlẹwẹ-ẹ́ ka jẹ́-ẹ chịkpẹẹ ka, kẹnẹ-kẹnẹ kori ká iJihova á hwabwọ la o-chewu ke iJisọsị pyịnyẹng lụka ọhọhẹ ọ-ọhịhị nyamwụ lẹ mẹ ịnyị.
Ọhẹka, iJisọsị wẹẹ maga nyọka da alabẹkpẹ nyamwụ ụbwọ nyọka ya irya nọ u-uhye nya ang odudu ká iJihova ya iwe da họọ nyọka gbu igu ụma ọlịịwẹ ịnyị. * IJisọsị jẹ́ nyori igu ọlẹ kọ wẹẹ ka gbu lala oluguru-ẹla u-uhye nya okoji ka chị angịnyị lụmẹ-lụmẹ mileji. (1 Kọr. 1:23) Kori ká alabẹkpẹ nyamwụ á ya irya nọ ẹ-ẹga nya ang odudu kọ gbu, ị ka jẹ́ ọbaba nya igu nyamwụ. (Gal. 3:13, 14) Ọọwa ka du kị ka yọọ lala ọngọchịda ọkọkọ nya oluguru-ẹla.
Irya ọnyị myị́ ọnyị ká iJisọsị á la kpa ya ẹla ọwẹ, ọ jẹ́ nyori akama ọlẹ kọ wẹẹ chịpwụrụ bwu nyị ri irya nya iJihova ẹ-ẹga nyamwụ. Nyọlẹ ká iJisọsị ya ẹla ọla eje ọwẹ kpá bwaa, o yẹkẹẹ: “Ọ myị́ lẹ!” lee ọ họ jịra lẹ! (Jọn. 19:30; Luk. 22:37) Ee, ọlẹ ká iJihova hwabwọ la o-chewu koo lụka o-kpii ọwẹ, ọọwa ya iwe da ha iJisọsị nyọka họ ẹla ọlẹ kị doo ẹrụ we odehe kaka họ wuu jịra. Ọ myịmyị ya iwe da họọ nyọka họ ang myị́ ang ọlẹ kị da chajị nyamwụ ẹ-ẹpwụ nya “Ụpwụ Ịgọgọ bwu ụka nya iMosisi bala alọmwụ inyogo nya Ohe Oluhye wuu bala ịlẹ kị da ụ-ụpwụ nya Eje Ọnyịịla” jịra.—Luk. 24:44.
^ par. 2 Yẹ ọgba 9 bala 10 nya ang ọjẹ́jẹ ọlẹ ko ri “Ẹla Ọlẹ Kahị ka Jẹ́ Bwu Ẹla Ohyẹẹkpẹ nya iJisọsị” ẹ-ẹpwụ nya ụpwụ ọlẹ.
^ par. 4 Ụka nya ẹrụ ọnyịịla ọ-kpa pyẹ nya iJisọsị, ẹ-ẹla myị́ ẹla lee ịtọ ẹla myị́ ịtọ ẹla ịlẹ kọ tọ à kaa mẹ irya nyamwụ ọwa ayịdang jẹ ka. Ọ kaa họ ịnyị chajị nyọka wo ẹla olirya nya alabẹkpẹ nyamwụ ụka ọhẹ.—Mak. 7:24-27; Jọn. 6:1-5; yẹ Ẹpwang ọ-Kụ Gbeji nya ahyẹẹnụ 15 nya Ọya Okiriwo, 2010, ẹbẹ. 4-5.