1-2. Ịyẹ à tị́ ri etu nya ọ-ra kpehe? Ịyẹ tị́ du kahị baba nyamwụ?

ỤKA ká Adam ko ri ọlẹng ọkpẹẹkpẹẹ họ ọhọbịrị, iwe nyọka hịhị gboyi myị́ oyi gwọọ byi. Ọ́ tị ba ẹ-ẹga nyamwụ kem ka, o gu anyị ịlẹ kọ ka ma ị-ịlahị ịnyịnyị. Adam-ḿ ka jẹ́-ẹ ye ọnụ ya u-uhye nya ẹla ọlẹ kọ họ ka. Ọ tọchị-tọchị họ ọhọbịrị. Anyị nyamwụ tị bẹẹ? Ị́ lụbwọ ẹ-ẹpwụ nya ọhọbịrị nya Adam ka. (Rom. 5:​12, 14) Adam chịla kọ ka gbu ọọlaji nya ẹla ọlẹ kọ họ. Ma, iJihova ka jẹ́-ẹ họ abwẹhẹ chajị ká anyị nyamwụ ka hịhị gboyi myị́ oyi? Ee! Ahyaahị nyọlẹ ká Adam họ ọhọbịrị, iJihova dọmwụ nyọka mẹjẹ jaabwọ kọ ka bwu gba uku ịmányị tị́ nya anyị nya Adam kpehe bwu ẹpwụ nya ọhọbịrị bala igu. (Ọmwụ. 3:15) Ụka ọlẹ ká iJihova hu nọ á họ, ọ ka ya Ọnyị nyamwụ du warị bwu epwoohe ka ‘hu ọhịhị nyamwụ kịla iya, chajị ká iru nya angịnyị ka jẹ́-ẹ bwula ọọwa la ọchịda nya Ohe Oluhye.’​—Mak. 10:45; Jọn. 6:51.

² Ịyẹ à tị́ ri ọ-ra kpehe? Ụka kị kpa ya ẹla ụpa nya Ụpwụ Ịgọgọ ọlẹ kị da la òja nya iGiriki, etu nyamwụ ri uri ọlẹ ká iJisọsị nwụ̀ nyọka ra ang ọlẹ ká Adam ya byi tịrẹkpẹ. (1 Kọr. 15:22) Ịyẹ tị́ du kahị baba nya ọ-ra kpehe? Chajị iJihova ya ẹ-ẹpwụ nya Ehile ịlẹ kọ ya ha angịnyị nyamwụ u-uhye nya eje ọkpakpa ọlala nyori nyị ka ya ọhịhị kwiwa nya ọhịhị. (Ehe. 21:​23, 24) Adam ya ọhịhị ọkpẹẹkpẹẹ nyamwụ byi. IJisọsị hu ọhịhị ọkpẹẹkpẹẹ nyamwụ ha, chajị ká eje ọkpẹẹkpẹẹ ọlala nya Ohe Oluhye ka họ jịra. (Rom. 5:17) Ọọwa lẹ, ọ wẹ ka ri “Adịda o-gbe oyi myị oyi” nya angịlẹ wuu kị la ọmyịmyị u-uhye nya ọ-ra kpehe lẹlẹ.​—Ayị. 9:6; Rom. 3:​23, 24.

3. Jaabwọ ká ụpwụ nya ịJọn 14:31 bala 15:13 mẹjẹ, ịyẹ tị́ du ká iJisọsị myị ọnụ nyọka hu ọhịhị ọkpẹẹkpẹẹ nyamwụ kiliya?

³ IJisọsị myị ọnụ nyọka hu ọhịhị nyamwụ kiliya chajị nya  ọháha ọtụka ọlẹ kọ la ẹ-ẹga nya Adamwụ olepwoohe bala ahị ịnyịnyị. (Wa ịJọn 14:31; 15:13.) Ọháha ọọwa gwoo gbịla nyọka godayị giri-giri pwụ́ ocheju bala ọ-họ irya nya Adamwụ jịra. IJisọsị họ ịnyị bwula ọ-yụbwọ chị ọmyịmyị nyamwụ gogo gbee ka pwụ́ igu. Ọọwa du ká irya ọlẹ ká iJihova la ẹ-ẹga nya angịnyị ehe bala odehe ọlẹ bwu ọmwụ ọdada ka wẹ ka họ jịra. A-ang ọjẹ́jẹ ọlẹ, ahị ka ya ẹla u-uhye nya ang odudu ká Ohe Oluhye ya ẹga da ká iJisọsị yẹ akama nyịlẹhị-ịlẹhị ene kọọ gbu. Ahị ka myịmyị-ị̀ kụ ẹhị yẹ ọgụ-ẹpẹtẹ nya ọngọhẹ nya angị da ịBayịbụụ ọlẹ ká āhị nya ọ-ra kpehe myọọ lẹhị yẹẹyẹẹ. Ohyẹẹkpẹ-ẹkpẹ, ahị ka ya ẹla u-uhye nya abwọlẹ kahị ka bwu mẹjẹ nyori ọ-ra kpehe myịhị lẹhị bala ọ-mẹjẹ gụ ọwọwa nyori iya ọkịlaakịla ọlẹ ká iJihova bala iJisọsị họ chịkpẹẹ hahị nyị myịhị lẹhị.

4. Chabwọ nya abwọlẹ ká iJisọsị bwu gbu wẹẹ.

⁴ Kụ irya nya ang ịlẹ kị họ ọ-ọhịhị nya iJisọsị ene kịị nwọọ wẹẹ. Nanana nyori ọ ka jẹ́-ẹ bịlẹ ụbwọ ọdada nya iru nya alegu-ẹrụ kị ka chewu koo myị́, ọ́ họ ịnyị ka. Ọkọkọ nyọọwa, ọ ya ẹga da isoja nya ala iRom woo bala o-nyoo enyiri nyịlẹhị-ịlẹhị. (Mat. 26:​52-54; Jọn. 18:3; 19:1) Ị nyoo la ugboji ọlẹ kọ chọọ ẹbẹ myị́ ịnyịrọ-ịnyịrọ. Ị myịmyị byoo nyị hu okoji olilo nmọndọọ kpa ẹ-ẹkpẹ nyamwụ ọlẹ kọ wẹẹ da ịwọ. IJisọsị maga nyọka hwoo kpa ka ẹga kị wẹẹ ka nwọọ, ma nyọlẹ kọ nọ pyịnyẹng isoja nya ala iRom ịwẹ byi ọngọkịla nyị ye kpa tọọ. (Mat. 27:32) Ụka ọlẹ kị kpa iJisọsị pwụ ẹga kị wẹẹ ka nwọọ, isoja ịwẹ gwoo iloo a-abwọ bala ata ba okoji. Ịnyịrọ nyamwụ gu ene ẹ-ẹga ọlẹ kị gwoo iloo ọọlaji nya ọnmọọ ọlala nyamwụ. Ịnamwụ bala aligu nyamwụ juwa jida bala ọ-bida, ma alegbeju nya ala iJuu tị juwa kpọọ họ. (Luk. 23:​32-38; Jọn. 19:25) IJisọsị yẹ akama ẹ-ẹpwụ nya awa lụmẹ-lụmẹ. O lujwo họọ nyịlẹhị-ịlẹhị nyọka da ịhụ chajị abwọlẹ kị yọọ nọ dudu kọ ka chị ịhụ ta. IJisọsị jẹ́ nyori ọwa nyị godayị giri-giri, lẹ ene kọ lẹẹ gbu, ọ raabwọ ohyẹẹkpẹ-ẹkpẹ nyamwụ ha iJihova. O hiri egbeju nyamwụ kpẹẹ lẹ, ọ chị ẹjẹ lẹlẹ. (Mak. 15:37; Luk. 23:46; Jọn. 10:​17, 18; 19:30) Ụgbẹyị otolujwo bala ọla oyoyi ọlẹ ká ọngịnyị ka bwu gbu dụmwọ-dụmwọ à wẹ ịnyịlẹhị lẹ!

5. Ẹ-ẹga nya iJisọsị, ẹlịyẹ à tị́ jwọọ gụ abwụma ọlẹ kị bwu nwọọ?

⁵ Ẹ-ẹga nya iJisọsị lẹ, a-abwụma ọlẹ kị wẹẹ ka bwu nwọọ à ri ẹla ọlẹ kọ jwọọ gụgụụgụ ka. Ẹla ọlẹ kị chị bọọ ko dudu kị wẹẹ ka nwọọ à kpọọ ọkịlẹtụ enyi gụ lẹ. Ị chị ẹla bọọ nyori nyị ri ọngọ hu ẹpẹpẹ ju Ohe​—ko ri ọngọlẹ kọ kaa ju ihi nya Ohe lee ẹnyị nyamwụ ka. (Mat. 26:​64-66) Irya nya ẹla ọlẹ kị chị ba iJisọsị wẹ bịrọọ ọkịlẹtụ kpoye-kpoye du kọ wẹẹ ya ẹhị rịrị nyori Adamwụ nyị́ ka myị ọọ chịpwụrụ bwu ẹpwụ nya oyoyi ọwẹ kpong-kpong ka. (Mat. 26:​38, 39, 42) Ịyẹ à tị́ du ká iJihova ya iwe da ká Ọnyị olikẹjẹ nyamwụ yẹ akama gbee koo gbu? Ahị kụ ẹhị yẹ ang odudu ịta wẹẹ.

6. Ịyẹ tị́ du kọ baba nyori ị ka gu iJisọsị iloo ba okoji?

⁶ Ọhọhẹ, ọ baba nyori ị ka gu iJisọsị iloo ba okoji chajị ká ala iJuu ka lịlaa bwu ẹpwụ nya ọlọ owuwu ụma ọhẹ. (Gal. 3:​10, 13) Ọlọ ọọwa ji uhye nyaa chajị ị myị ọnụ ịnọ nyọka ju ihi nya ehile nya Ohe Oluhye, ị́ tị ju ihi nyamwụ ka. Chajị nya ọọwa, ọlọ wẹ ka juwa u-uhye nyaa kaka ba eje nya igu ọlẹ ko waa chajị nyọlẹ kị ri anyị nya Adam. (Rom. 5:12) Ehile ọlẹ ká Ohe ya ha Ala Isirẹlụ ya nyori nyị ka nwụ ọngọlẹ kịị nyị họ ọhọbịrị ọ-kpụ igu. Ụka kọ gbu kpá, ị ka ya ogu nyamwụ chọpịla u-uhye nya okoji myị́. * (Ehile. 21:​22, 23;  27:26) Chajị nyọlẹ kị gu iJisọsị iloo ba okoji wẹẹ, ala iJuu ka jẹ́-ẹ la ọ-gba kpehe bwu ẹpwụ nya ọlọ ọwẹ myị́ lẹ. Iya ọkịlaakịla nyamwụ tị ka jẹ́-ẹ daa ụbwọ myị́ ịnyịnyị lẹ, nanana nyori ị́ yoo myị ka.

7. Ịyẹ à tị́ ri ang oheeye ọlẹ kọ dudu ká iJihova ya iwe da ha Ọnyị nyamwụ nyọka yẹ akama?

⁷ Kụ ẹhị yẹ ang oheeye ọlẹ ko dudu ká iJihova ya iwe da ká Ọnyị nyamwụ ka yẹ akama wẹẹ. Ọ wẹẹ mẹ ang jẹ iJisọsị gbe ụkụrwọ nya Olegbeju Ọgbahị Ọkiliya ọlẹ kọ wẹẹ ka ya họọ ị-ịlahị. IJisọsị yẹ lịlọmwụ jaabwọ kọ kaa la nyaa-nyaa nyọka ju ihi nya Ohe ẹ-ẹpwụ nya ịmayẹ ilujwo. Ọ yẹ myọọ lụmẹ gbee kọọ raabwọ nya ụbwọ ọdada “la egbejida ẹ-ẹhị la lomyi o-gboo.” Chajị nyọlẹ ká iJisọsị chịpwụrụ bwu ẹpwụ nya ịmayẹ ịlịịwẹ wẹẹ, ọ jẹ́ ọbaba nyahị, ọ tị ka jẹ́-ẹ dahị ụbwọ ụka kahị “ji ẹpwụ nya ọmayẹ ọlịnyịnyị.” Ahị chị ọkẹkẹnị yẹẹyẹẹ nyọlẹ ká iJihova chụ “ụma nya ọngịnyị ọlẹ kọ kaa yẹ ahyẹrwẹrwa u-uhye nya ọdẹwụ ọdẹwụ nyahị” nyọka ri Olegbeju Ọgbahị Ọkiliya nyahị!​—Hib. 2:​17, 18; 4:​14-16; 5:​7-10.

8. Ịyẹ à tị́ ri ang ọhata ọlẹ ko dudu ká Ohe ya iwe da nyọka ma iJisọsị yẹ la ọngịrị-ọngịrị pwụ ọlịịwẹ?

⁸ Ọhata, iJihova ya iwe da ha Ọnyị nyamwụ nyọka yẹ akama nyịlẹhị-ịlẹhị chajị nyọka wẹ ịtọ ẹla ọkpọnchị ọhẹ: Angịnyị ehe ka jẹ́-ẹ mẹjẹ nyori ọwa nyị ka gbịgba ha iJihova la ọngịri nyọwa wuu myị́ tụ́ ụka ko ji ẹpwụ nya ọmayẹ ọnyọọngịrị? Olegu Onyobyi ya nyị ehe! O ya nyori angịnyị ehe nyị kaa gbịgba ha iJihova chajị nya ang ọlẹ kị kaa ye bwu ẹga nyamwụ kem ịnyị. Ọ́ tị myị nyori nyị la ọháha ẹ-ẹga nya Ohe Oluhye ka, lala Adam. (Job. 1:​9-11; 2:​4, 5) Ma nyọle ká iJihova tị dahịhile nyori Ọnyị nyamwụ nyị́ ka jẹkpẹ dọọ ka wẹẹ, ọ ya iwe da kị ka mẹ iJisọsị yẹ pwu ụbẹẹtụ ọlẹ ká ọngịnyị ehe ka jẹ́-ẹ bọhụ ba myị́. IJisọsị godayị giri-giri ha iJihova dudu kọ jẹ́ mẹjẹ nyori Olegu Onyobyi ri ọlọnọọkịla ịlẹhị.

9. Ọgụ-ẹpẹtẹ oyina ọlẹrụ ịJọn à tị́ ya deeji hahị?

⁹ Ọmẹjẹ nya ọ-ra kpehe ọwẹ ju ọmyịmyị nya iru nya Angịnyị nya ịKịrayịsị ọngịrị lẹ. Ị kịnyaa la ọ-kpa ẹrụ ọnyịịla pyẹ ẹ-ẹpwụ nya ọtụpyịpyị bala ọ-bọhụ ẹ-ẹpwụ nya ịmayẹ ịdatị-datị gbee kịị ri angịgbahị. Kụ ẹhị yẹ ọgụ-ẹpẹtẹ nya ọlẹrụ ịJọn wẹẹ. Ọ ya ẹlịlẹhị u-uhye nya ịKịrayịsị bala āhị nya ọ-ra kpehe dodehe lala ẹka iwo ịrwọnyẹ. O hi pyịnyẹng kọ ka gu ẹka ohu lẹ, angịkpeji nya iRom tị yọọ lala ọngọ ka ju ọmwụ ẹla haa, dudu kị kwoo rụ ka ọpyị nya ịPatimosi. Ịyẹ ọ tị́ họ tịpyọ? “Ẹrụ ọnyịịla nya Ohe Oluhye ọ-kpa ya pyẹ bala ibeenu oriri chajị nya ẹnyị nya iJisọsị” kem ịnyị. (Ọwụ. 1:9) Ọgụ-ẹpẹtẹ ọnyịịla nya ọmyịmyị bala ọhụ ọbaba à wẹ lẹ!

10. Ányị apwụ ịlẹ ká ịJọn da à tị́ mẹjẹ nyori āhị nya ọ-ra kpehe myọọ lẹhị?

¹⁰ Ẹ-ẹpwụ nya ụpa nya ịBayịbụụ ịlẹ ká ịJọn da, ọ ya jaabwọ ká iJisọsị họ́ọ kaka ba bala abwọlẹ ká āhị nya ọ-ra kpehe myọọ lẹhị ịnyịnyị. O ya ẹla gụ ụka ohu u-uhye nya ọ-ra kpehe lee ang ịnyịịla ịlẹ kọ họ chịkpẹẹ. Ọ-chụ pwokwita, ịJọn da yẹkẹẹ: “Ọ́ . . . ri ká ọngọhẹ nyanụ a chabwọ kpụ ẹpwụ nya ọhọbịrị ọhọhọ aalẹ, ahị la iJisọsị ịKịrayịsị ọlabwẹla ọnyịịla ọlẹ kọ juwa i-ijata nya Ohe Oluhye Adahị juwa bịlọọ wọnụ nyahị ju, ụka wuu.” (1 Jọn. 2:​1, 2) Ụpwụ ọdada nya ịJọn ya ẹla yẹẹyẹẹ ịnyịnyị u-uhye nya “ibeenu nya ẹla nya ịlẹhị nya ịKịrayịsị oriri dodehe.” (Ọwụ. 19:10) Ọ la gbagbịla nyori āhị nya ọ-ra kpehe myị ịJọn lẹhị yẹẹyẹẹ. Ányị ahị à tị́ ka mẹjẹ nyori ọ myịhị lẹhị ịnyịnyị?

11. Ịyẹ à tị́ ka dahị ụbwọ nyọka kụrụ ọmayẹ?

¹¹ Pwa ju ọmayẹ nyọka họ ọhọbịrị. Kori ká ọ-ra kpehe á myịhị lẹhị, áhị ka la irya ọlẹ  ka: ‘Ḿ baba nyọka maga abwẹhẹ ụka kam la ọmayẹ kaka. Kori kam họ ọhọbịrị, m̀ ka jẹ́-ẹ bịlẹ ọhịnyọhi.’ Ọkọkọ nyọọwa lẹ, ụka kahị la ọmayẹ nyọka họ ang ọtịpyọ, ahị ka yẹkẹẹ: ‘Ehe! Nyọlẹ ká iJihova bala iJisọsị họ ang ọtụka ọwẹ ham, ḿ ka jẹ́-ẹ họ ang ọtịpyọ ọlịịwẹ ka?’ U-uhye nyọọwa, ahị ka jẹ́-ẹ bịlẹ iJihova kọ ka ya ọngịrị hahị, yẹkẹẹ: ‘A myị kam chabwọ kpẹpwụ nya ọmayẹ ka.’​—Mat. 6:13.

12. Ányị ahị tị́ ka kpa ẹla ọlụpwụ nya 1 ịJọn 3:​16-18 họ ụkụrwọ?

¹² Aanang alẹng bala anyang a háng. Ahị kaa mẹjẹ nyori āhị nya ọ-ra kpehe myịhị lẹhị ụka kahị la ọháha ọlịnyị. Ịyẹ tị́ du? Chajị iJisọsị á hu ọhịhị nyamwụ ha chajị nyahị kem ka, o hwoo ha chajị nya aanahị ịnyịnyị. IJisọsị nwụlanọ nyọka gbu chajị nyaa, lẹ ọ la gbagbịla nyori ị họ́ọ yẹẹyẹẹ ịnyịnyị. (Wa 1 ịJọn 3:​16-18.) Ahị ka mẹjẹ nyori aanahị alẹng bala anyang háahị bwula ụgbẹyị ọlẹ kahị kaa kpaa. (Efe. 4:​29, 31–5:2) Ọ-chụ pwokwita, ahị kaa daa ụbwọ ụka kị jụ ẹdụrụ lee ụka kị juwa bọhụ ẹ-ẹpwụ nya ịmayẹ, tụ́ ụka nya ayịreji obwagaga. Ma ányị ahị tị́ ka họ ụka ká ọọnahị á họ ẹlẹhẹ lee o-ya ẹlẹhẹ ọlẹ kọ wụ́ụhị ẹjẹ?

13. Ịyẹ tị́ du kahị ka ri angị hịnyọhi?

¹³ Ọ kaa lang ujwo ụka ọhẹ nyọka hịnyọhi ha aanang? (Liv. 19:18) Ọ́ lịnyị aalẹ, à kpa ẹla ọlẹ họ ụkụrwọ: “Kanụ juwa la ugbodu ojuju onyudiyo ẹ-ẹga nya awụlẹ mẹ. Ó ri ká angịhyẹ lẹpwụ nyanụ á họ ẹla o-hi awụlẹ ọnụ juwa aalẹ, anụ́-ụ juwa la ọhịnyọhi hawụlẹ mẹ. Chajị jaabwọ ká Ọngọlahị ayịdang hịnyọhi ịhọbịrị ịhọhọ nyanụ hanụ wẹẹ, ịnyịnyị, anụ tịtị ka juwa hịnyọhi ọhọbịrị nya awụlẹ ha awụlẹ pyii lẹlẹ.” (Kol. 3:13) Ụka myị́ ụka kahị hịnyọhi ha ọọnahị ọlẹng lee ọnyang ọhẹ, ahị wẹẹ mẹjẹ Adahị olepwoohe nyori āhị nya ọ-ra kpehe nyị myịhị lẹhị. Ányị ahị tị́ ka họ ká āhị o-bwu ẹga nya Ohe ọwẹ ka myịhị lẹhị gụ ọwọwa?

14. Ịyẹ ọkịla ahị tị́ ka jẹ́-ẹ họ ká ọ-ra kpehe ka myịhị lẹhị gụ ọọwa?

¹⁴ Ji iJihova obe u-uhye nya ọ-ra kpehe. Joanna, ko gu ẹka 83 bwu India yẹkẹẹ, “M̀ me irya ọ baba kam ka ya ẹla u-uhye nya āhị nya ọ-ra kpehe ẹnụ myị́ ẹnụ ẹ-ẹpwụ nya abwọ ọrịrị nyam, bala o-ji iJihova obe chajị nyamwụ.” Ẹ-ẹpwụ nya abwọ ọrịrị nyịlọng ẹnụ myị́ ẹnụ, ya ẹla ọtịpyọ ọlẹ ká họ ju iJihova, ká bịlọọ kọ hịnyọhi hang. Kori ká họ ọhọbịrị ọtụka, à ka baba nya ụbwọ ọdada nya angịgbahị nya ọjịra-jịra. Ị ka ke ụrụ wo lang bala ọ-nwụng rịrị la  Omyi Ẹla nya Ohe Oluhye. Ị ka raabwọ balang bala ọ-bịlẹ iJihova kọ ka kpa iya ọkịlaakịla nya iJisọsị họ ụkụrwọ u-uhye nyang chajị ká ka ‘la uda ọhọhọ’ nya olegu.​—Jem. 5:​14-16.

15. Ịyẹ tị́ du kahị ka kpa ụka nyahị wa ụpwụ u-uhye nya ọ-ra kpehe bala ọ-kụ irya jwoo kpori-kpori?

¹⁵ Kụ irya kpori-kpori ju ọ-ra kpehe. Ọọnahị Rajamani kọ gu ẹka 73 yẹkẹẹ, “Ụka myị́ ụka kam wa ụpwụ u-uhye nya akama nya iJisọsị, egbejida kaa nyà bwu ẹhị nyam.” Ọ ka jụng ahụ ịnyịnyị myị́ kori ká kụ irya u-uhye nya akama ọtụka ọlẹ ká Ọnyị nya Ohe yẹ. Ma, jaabwọ ká wẹẹ kụ irya ju iya ọkịlaakịla nyamwụ, ịnyịnyị ọwa bala Adamwụ à ka háng gụ ọwọwa lẹlẹ. Nyọka dang ụbwọ kụ irya kpori-kpori ju ọ-ra kpehe, à ka jẹ́-ẹ hwoo nya egbeju nya ang ọjẹ́jẹ okpori-kpori nyang myị́.

16. Ányị ọ-mẹ ang jẹ angịkịla u-uhye nya ọ-ra kpehe à tị́ ka dahị ụbwọ? (Yẹ ifoto ọla ẹbẹ nya ọgbanyẹ.)

¹⁶ Mẹ ang jẹ angịkịla u-uhye nya ọ-ra kpehe. Ụka myị́ ụka kahị ya ẹla u-uhye nya ọ-ra kpehe ju angịkịla, ọ kaa myịhị lẹhị gụ ọwọwa. Ahị la ang-abwọ ịlẹ kahị ka jẹ́-ẹ kpa mẹ ang jẹ angịnyị u-uhye nya ang odudu ká iJisọsị baba nyọka gbu chajị nyahị. Ọ-chụ pwokwita, ahị ka jẹ́-ẹ kpa ang ọjẹ́jẹ 4 nya ụpwụ nya Oja Ọnyịịla o-Bwu Ẹga nya Ohe Oluhye! mẹ ang jẹ myị́. Egbeju nyamwụ ri, “Owo IJisọsị ỊKịrayịsị À Tị́ Ri?” Lee ahị ka jẹ́-ẹ dụbwọ ka egbeju 5 nya What Can the Bible Teach Us? ọlẹ ko ri “The Ransom​—God’s Greatest Gift.” Ẹka ọnyị myị́ ọnyị, ahị tị kaa họ ká ọ-ra kpehe ka myịhị lẹhị gụ ọwọwa bwula ọ-ka ọ-Họ Kpa Kpịtịya nya Igu nya iJisọsị bala ọ-wụrụ angịkịla warị la ila ọchịchị. IJihova ya ihi ọtụka-ọtụka hahị nyọka mẹ ang jẹ angịkịla u-uhye nya Ọnyị nyamwụ!

17. Ịyẹ tị́ du ká ọ-ra kpehe à ri āhị ọgụgụ wuu ọlẹ ká Ohe ya ha angịnyị ehe?

¹⁷ Ang lụmẹ-lụmẹ ji ịlẹ kị du ká ọ-ra kpehe ka myịhị lẹhị lẹẹlẹẹ bala o-gboyi myị́ oyi. Chajị nya ọ-ra kpehe, ahị ka jẹ́-ẹ ri igu bala iJihova nanana nyori áhị la kpẹẹkpẹẹ ka. Chajị nya ọ-ra kpehe, ụkụrwọ nya Olegu Onyobyi ka ta ayịreji gboyi myị́ oyi. (1 Jọn. 3:8) Chajị nya ọ-ra kpehe, irya ọlẹ ká iJihova la kpa họ odehe ọlẹ ka họ jịra. Odehe lẹpwụ-lẹpwụ ka ri ịparadayịsị. Ọng myị́ ọng ọlẹ ká tọ ka ri ọngịnyị ọlẹ ká iJihova há, kọ tị kaa gbịgba họọ. Lẹ ẹnụ myị́ ẹnụ, ahị mwahị nya agbẹyị ịlẹ kahị ka jẹ́-ẹ bwu mẹjẹ nyori āhị nya ọ-ra kpehe, ko ri āhị ọgụgụ wuu ọlẹ ká Ohe ya ha angịnyị ehe, nyị myịhị lẹhị mẹ!