1. Ihi oyina ahị tị́ la?

O RI ihi ọtụka-ọtụka hahị nyọka ri ụpa nya ọjịra-jịra nya iJihova! Ahị jam ẹ-ẹpwụ nya ịParadayịsị nya olegu ọlẹ kọ myị̀ la angịnyị nya okpunyi bala ọkẹkẹnị. Ịyẹ à tị́ ri ụkụrwọ nyang ahụ ẹ-ẹpwụ nya ọjịra-jịra?

2. Ọ-chụ pwoku oyina à tị́ ji ẹ-ẹpwụ nya apwụ ịhyẹ ịlẹ ká ịPọlụ da?

² Ahị ka jẹ́ ang lụmẹ-lụmẹ u-uhye nya ụkụrwọ ọlẹ kahị la ọọjịra-jịra bwu ẹpwụ nya ẹla ọ-chụ pwokwita ọlẹ ká ọlẹrụ ịPọlụ ya ẹla rụ ẹ-ẹpwu nya ileta ịhyẹ ịlẹ kọ da. Ẹ-ẹpwụ nya ileta ọnyọnyọọnyị lẹpwụ nyaa wuu, ịPọlụ chụ ọjịra-jịra kaka me ugbinyịrọ nya ọngịnyị ehe. Ọ myịmyị chụ ọngọngọọngụ ọọjịra-jịra kaka pwoku ẹga nya ịnyịrọ.​—Rom. 12:4-8; 1 Kọr. 12:12-27; Efe. 4:16.

3. Ẹla ịta iyina ahị tị́ wẹẹ ka ya ẹla rụ a-ang ọjẹ́jẹ ọlẹ?

³ Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ẹla ịkpọnchị ịta ịlẹ kahị ka jẹ́ bwu ẹpwụ nya ọ-chụ pwokwita nya ịPọlụ ọwẹ. Họhẹ, ahị ka jẹ́ nyori ọngọngọọngụ nyahị la iwe * ọọjịra-jịra nya iJihova. Oheeye, ahị ka ya ẹla u-uhye nya ang ọlẹ kahị ka họ ụka kọ lahị nyaanyaa la ọ-ka jẹ́ iwe ọlẹ kọ ri ịnyahị ẹ-ẹpwụ nya ọjịra-jịra.  Ọhata, ahị ka ya ẹla u-uhye ang odudu ọlẹ kahị ka kịnyaa la ọ-kpa iwe ọlẹ kọ ri nyahị ẹ-ẹpwụ nya ọjịra-jịra nya Ohe Oluhye họ ụkụrwọ.

4. Ẹlịyẹ Ala iRom 12:4, 5 à tị́ mẹjẹ́ẹhị?

⁴ Ang ọhọhẹ ọlẹ kahị ka jẹ́ bwu ẹpwụ nya ọ-chụ pwokwita nya ịPọlụ ọwẹ ri ọngọngọọngụ nyahị la ụkụrwọ o-ju apyobwuna ugbiyegu nya iJihova. ỊPọlụ dọmwụ nya ọ-chụ pwokwita nyamwụ bwula o-yẹkẹẹ: “Jaabwọ ká ahị angịnyị ehe la ugbinyịrọ ookpokpo, ká ugbinyịrọ ọọwa tị la iru nya ẹga nya ịnyịrọ, ká ẹga nya ịnyịrọ ịịwa wuu tị la ụkụrwọ nya ịlaa la datị-datị wuu jịra wẹẹ, ịnyịnyị, ọ la hahị ahị angịnyị nya Ohe Oluhye lẹlẹ. Chajị, o ri nya ịlẹhị, ahị ju iru lụmẹ odu ịnyị, ahị wuu lala ubginyịrọ ookpokpo ẹ-ẹpwụ nya ịKịrayịsị. Lẹ, ahị wuu ri aanịna nya awụlẹ ẹ-ẹpwụ nya ịKịrayịsị Jaabwọ ká ẹga nya ugbinyịrọ nyahị ri aanịna nya awụlẹ ịnyịnyị.” (Rom. 12:4, 5) Ẹlịyẹ ịPọlụ à tị́ wẹẹ ya? Ọngọngọọngụ nyahị la ụkụrwọ datị-datị ka họ ẹ-ẹpwụ nya ọjịra-jịra, ma ahị wuu tị ju apyobwuna.

5. Ịyẹ iJihova à tị́ ya ha ọjịra-jịra?

⁵ Kori kị ya ẹla nya angịlẹ kị la ụkụrwọ ẹ-ẹpwụ nya ọjịra-jịra, irya nyang ka kpang ka ẹga nya angịgbahị nya ọjịra-jịra i-ijata myị́. (1 Tẹs. 5:12; Hib. 13:17) O ri nya ịlẹhị nyori bwula ịKịrayịsị, iJihova ya “ịhaha nyamwụ la datị-datị ga ha angịnyị ehe” ẹ-ẹpwụ nya ọjịra-jịra nyamwụ. (Efe. 4:8) “Ịhaha nyamwụ” ịịwa ku ọmwakpa nya Angị kpẹhị riri ogu, angịlẹ kị chụ nyọka daa ụbwọ, Angị kpẹhị rịrị egbeju-ẹpwa, angị kpẹhị rịrị isekut, angị kaa mẹ ang jẹ eebe-apwụ ị-la ogu nya iJihova, angịgbahị nya ọjịra-jịra, bala angịmyẹrụ. Olegu ịgọgọ ị kpa chụ aanahị alẹng ịwẹ wuu nyọka kpẹhị rịrị ịkpịlọ nya iJihova ịlẹ kị họọ lụmẹ bala ọ-ka ju ọjịra-jịra ọngịrị lẹ.​—1 Pit. 5:2, 3.

6. Jaabwọ ká 1 Ala ịTẹsalonika 2:6-8 mẹjẹ, ịyẹ aanahị ịlẹ ká olegu ịgọgọ chụ à tịị maga nyọka họ?

⁶ Olegu ịgọgọ à chụ aanahị alẹng nyọka họ ụkụrwọ ụma ịdatị-datị lẹ. Jaabwọ ká ẹga nya ịnyịrọ datị-datị, lala abwọ bala ata, kaa họ ụkụrwọ nyọka da ịnyịrọ lẹpwụ-lẹpwụ ụbwọ, aanahị alẹng ịlẹ ká olegu ịgọgọ chụ kaa họ ụkụrwọ yẹẹyẹẹ chajị ká ọjịra-jịra lẹpwụ-lẹpwụ ka ye apyobwuna. Ị́ kaa maga nyọka ye ogbo bwu ẹga nya angịnyị ka. Ọkọkọ nyọọwa lẹ, ị kaa maga nyọka kpa ọjịra-jịra wule bala ọ-ka ju aanaa alẹng bala anyang ọngịrị. (Wa 1 Ala ịTẹsalonika 2:6-8.) Ahị ji iJihova obe ọhọhọ chajị nya angịnyị i-hu ịlaa ha ịlẹ kị nwanwa ẹ-ẹpwụ nya ang nya olegu ịlịịwẹ!

7. Ahị ọwawa iyina angịlẹ kị kaa kpa ụka nyaa wuu họ ụkụrwọ ha iJihova à tị́ kaa ye?

⁷ Angịhyẹ ẹ-ẹpwụ nya ọjịra-jịra kà ri angịlẹ kị chụ nyọka kpa ẹrụ ọnyịịla pyẹ ẹ-ẹpwụma ọkịla, angị kpa ụka nyaa wuu ya ẹrụ ọnyịịla, lee angị ye ịlahị nya ụgbẹyị kpụrụrụ myị́. Aanahị alẹng bala anyang ịhyẹ ji odehe wuu kị hu ẹla Ohe o-yaya bala ọ-ka họ ká angịkịla ka ri angịjụgbẹyị nya ụkụrwọ ọlẹ kị kaa họ la ọhịhị nyaa wuu. Bwula ọọwa, ị jẹ́ da iru nya angịnyị ụbwọ wẹ ka ri angịjụgbẹyị nya ịKịrayịsị iJisọsị. Ịlẹhị lẹ, angịlẹ kị kaa kpa ụka nyaa wuu họ ụkụrwọ ha iJihova ịwẹ á ka la okpoko bala ang abwọ gbuu ka myị́, ma iJihova tị wahị kụraa a-agbẹyị ịkịla yẹẹyẹẹ. (Mak. 10:29, 30) Aanahị alẹng bala anyang ịwẹ háahị yẹẹyẹẹ, ọ tị myịhị lẹhị nyọlẹ kị ri ụpa nya ọjịra-jịra!

8. Ịyẹ tị́ du ká ọng myị́ ọng kọ kaa kpa ẹrụ ọnyịịla pyẹ ju apyobwuna ha iJihova?

⁸ Aanahị alẹng ịlẹ kị ya ụkụrwọ ju ụ-ụbwọ bala angịlẹ kị kaa kpa ụka nyaa wuu họ ụkụrwọ ha iJihova kem à la iwe ẹ-ẹpwụ nya ọjịra-jịra lẹẹ? Eheehe! Ọng myị́ ọng ọlẹ kọ kaa kpa ẹrụ ọnyịịla pyẹ ju apyobwuna ha iJihova bala ọjịra-jịra. (Rom. 10:15; 1 Kọr. 3:6-9) Ọ-họ ká angịkịla kà ri angịjụgbẹyị nya iJisọsị, Ayịbaba nyahị  ri ọhẹ lẹpwụ nya akụrwọ ịkpọnchị ịlẹ ká ọjịra-jịra kaa họ. (Mat. 28:19, 20; 1 Tim. 2:4) Angịlẹ wuu kị kaa kpa ẹrụ ọnyịịla pyẹ, ị hu enyi Ohe lẹ lee ị́ hu wẹwẹ lẹka, kaa maga nyọka hu ụkụrwọ ọwẹ kụ ịlahị.​—Mat. 24:14.

9. Ịyẹ tị́ du ká aanahị anyang ịla ọjịra-jịra háahị lụmẹ?

⁹ IJihova chị ihi ju aanahị anyang bwula ọ-ya ụkụrwọ ọlahịchịng haa ẹ-ẹpwụ nya ọjịra-jịra. Ụkụrwọ nya aanahị ịwẹ, ká angịhyẹ nyaa ri ịhụ, ịnịna, ịhụ-egu, tụ́ angịlẹ kị dọmwụ rụ ọrụ lẹka, myị iJihova lẹhị. Ụpwụ ịgọgọ kaa ya ẹla rụ anyang ịlẹ kị họ ẹla há Ohe Oluhye bwula ọmyịmyị ọnyọọngịrị. Ị daa ọlẹẹkwaa chajị nya ọgụ-ẹpẹtẹ ọnyịịla ọlẹ kị ya deeji ẹ-ẹga nya ẹla ọjẹ́jẹ, ọmyịmyị ọlala, ila ọchịchị, ugbodu ojuju, o-hu ha la ọkịlẹtụ ọgbagbịla bala ụkụrwọ ọnyịịla. (Luk. 8:2, 3; Ụkụr. 16:14, 15; Rom. 16:3, 6; Filip. 4:3; Hib. 11:11, 31, 35) Ahị ji iJihova obe ọhọhọ yẹẹyẹẹ nyọlẹ kahị la anyang ịlẹ kị la abwụma ịnyịịla ịlịịwẹ ọọjịra-jịra nyahị!

10. Ịyẹ tị́ du ká angịgbahị ịlẹpwụ nya ọjịra-jịra ju apyobwuna?

¹⁰ O ri ahị ọwawa ọtụka hahị yẹẹyẹẹ nyọlẹ kahị la angịgbahị lụmẹ-lụmẹ ẹ-ẹpwụ nya ọjịra-jịra ịnyịnyị. Ọọjịra-jịra ịhyẹ ahị la angịgbahị alẹng bala anyang ịlẹ kị chị ikwirichi lẹ, kị tị kpa ụka nyaa họ ụkụrwọ ha iJihova la ọhịhị nyaa wuu. Angịgbahị ịhyẹ ka ji kị wẹ ka jẹ́ ẹlịlẹhị kpangjẹ myị́. Iru nya angịhyẹ lẹpwụ nya angịgbahị ịwẹ kaa la akama nya ịnyịrọ ọ-la gogo-ka ọhẹ lee ọkịla ọlẹ kọ kaa ba okwirichi ọchịchị jẹ myị́. Ụkụrwọ ọlẹ kị ka jụ́ họ ẹ-ẹpwụ nya ọjịra-jịra bala ẹrụ ọnyịịla ọ-kpa pyẹ ka chụ hi ọọlajị nya akama ịịwa myị́. Kpọkpọọkpọ, angịgbahị ịwẹ kaa họ jaabwọ ọlẹ kị ka jụ họ ba myị́ ẹ-ẹpwụ nya ẹrụ ọnyịịla ọ-kpa pyẹ, bala ọ-kaa kpa ọngịrị ọlẹ kị la wuu ju angịkịla ọhụ bala ọ-mẹ ang jáa! Ahị tị kaa ye apyobwuna bwu ẹpwụ nya ẹla ọjẹ́jẹ nyaa. Ị chakpa la ihi-ihi ị-ịlahị nya iJihova bala ahị!​—Etu 16:31.

11-12. Ọhụ ojuju oyina ahụ à tị́ ye bwu ẹga nya anjwo ịlẹpwụ nya ọjịra-jịra?

¹¹ Kụ irya u-uhye nya anjwo ịnyịnyị wẹẹ. Ị kaa chịpwụrụ bwu ẹpwụ nya akama ịdatị-datị Jaabwọ kị wẹẹ nwà ẹ-ẹpwụ nya odehe nya Olegu Onyobyi ọlẹ kọ myị̀ la ọmẹjẹ nya ịnịịkịla nyamwụ. (1 Jọn. 5:19) Kpọkpọọkpọ, ọ kaa juhi wuu ọhụ ụka kahị yẹ anjwo ịwẹ kị juwa wẹ  ẹla ọọjịra-jịra, kị kpehe nya ẹla Ohe bala o-ya ọmyịmyị nyaa dodehe iiwe-ahụrụ ịkịla la o-juhi ka. Anjwo, anụ la iwe ọ-ju apyobwuna ẹ-ẹpwụ nya ọjịra-jịra nya iJihova ịnyịlẹhị!​—Eje. 8:2.

¹² Ma, ọ tị kaa la aanahị alẹng bala anyang ịhyẹ ujwo nyọka myị nyori ịwa nyị ju apyobwuna ẹ-ẹpwụ ọjịra-jịra. Ịyẹ à tị́ ka dahị ụbwọ nyọka jẹ́ nyori ọngọngọọngụ nyahị la iwe ẹ-ẹpwụ nya ọjịra-jịra? Ahị yẹ wẹẹ.

13-14. Ịyẹ tị́ du ká angịhyẹ kaa me nyori ịwa nyị́ kpụ ịngịhyẹ ọọjịra-jịra ka?

¹³ Ẹla oheeye ọlẹ kahị ka jẹ́ bwu ẹpwụ nya ọ-chụ pwokwita nya ịPọlụ ọwẹ kpa irya nyahị kà ẹga nya akama ọhẹ ọlẹ ká angịhyẹ kaa la alẹ. Ọ kaa la angịhyẹ ujwo nyọka myị nyori ịwa nyị ju apyobwuna ha ọjịra-jịra. ỊPọlụ da ụpwụ yẹkẹẹ: “Kori ká ẹta nya ọngịnyị ehe á yẹkẹẹ, ‘Am lẹ, ḿ tị́ ri ụbwọ kaka lẹlẹ, ḿ ri ẹga nya ugbinyịrọ nya ọngịnyị ehe kokoo!’ Ká ọọwa ka du ká ẹta á ka ri ẹga nya ịnyịrọ nyamwụ kaka, ịnyịlẹhị? Lee, ọ tị́ ri ká ụrụ nya ọngịnyị ehe á ka yẹkẹẹ, ‘Am lẹ, ḿ tị́ ri ugbẹhị kaka lẹlẹ, ḿ ri ẹga nya ịnyịrọ kokoo!’ Ká ọọwa ka du ká ụrụ ọọwa á ka ri ẹga nya ịnyịrọ nyamwụ kaka, ịnyịlẹhị?” (1 Kọr. 12:15, 16) Ẹlịyẹ ịPọlụ à tị́ wẹẹ mẹjẹ́ẹhị?

¹⁴ Kori ká chụ ịlọng ka me angịkịla ẹ-ẹpwụ nya ọjịra-jịra, à ka dọmwụ nyọka kụ irya nyori á kpụ ịngịhyẹ ka myị́. Angịhyẹ ẹ-ẹpwụ nya ọjịra-jịra ka la āhị nya ang ọ-jẹ́ mẹjẹ, ang ọ-nwụhọ kẹm-kẹm lee ẹjẹ ọ-kpụ ọngịnyị bala ọhụ ojuju myị́. Ọhẹka, ọ lang lala o-ri ahụ nyị́ jẹ́-ẹ họ ịnyị lala angịkịla ka. Ọwẹ mẹjẹ nyori à kpa ịlọng keji bala ọ-yẹ ịlọng meme labwọ. (Filip. 2:3) Tị dụmwọ-dụmwọ. Kori á kịnyaa la ọ-ka chụ ịlọng mẹ angịlẹ kị la āhị nya ọ-jẹ́ họ ang yẹẹyẹẹ gbee aalẹ, ọkịlẹtụ ka kpụng enyi. Ọ dọmwụ ka lang jaabwọ ká ịPọlụ ya, lala o-ri ahụ nyị́ ju apyobwuna ọọjịra-jịra kpong-kpong ka. Ịyẹ à tị́ ka dang ụbwọ á ka be bwu ẹpwụ nya irya ọlịnyị?

15. Jaabwọ ká ụpwụ nya 1 Ala ịKọrịntị 12:4-11 ya, ẹlịyẹ ahị tị́ ka jẹ́ u-uhye nya āhị ọlẹlẹhẹ ọlẹ kahị la?

¹⁵ Kụ irya nya ẹla ọlẹ wẹẹ: iJihova ya āhị nya olegu ịgọgọ nyamwụ ha angịnyị nya ịKịrayịsị ịla oyi nya ọgbanyẹ ụ-ụgbẹyị ọ-la ẹbyẹbyị, ma angịnyị nya ịKịrayịsị ịwẹ á ye āhị ụma ookpokpo ka. (Wa 1 Ala ịKọrịntị 12:4-11.) IJihova  ya āhị bala ang ọlẹ kị ka jụ họ haa datị-datị, ma ọngọngọọngụ nyaa tị ju apyobwuna. Alẹ, áhị la āhị nya ụkụrwọ ẹbyẹbyị nya olegu ịgọgọ ka. Ma ẹla ọlẹ kahị jẹ́ bwu ẹga ọwẹ ri yẹkẹẹ: Ahị wuu á ka la āhị ụma ookpokpo ka myị́, ma ahị wuu tị ju apyobwuna ha iJihova.

16. Ẹla oyina ịPọlụ à tị́ ya kahị baba nyọka kpa họ ụkụrwọ?

¹⁶ Ọkọkọ nyọka chụ ịlọhị ka me angịkịla ọọjịra-jịra, ahị baba nyọka kpa ẹla ọlẹ ká ọlẹrụ ịPọlụ ya họ ụkụrwọ: “Ọng myị́ ọng lẹpwarịrị nyanụ a juwa wụla ụma nya abwẹla ọhọhọ nya ịlọmwụ yẹ yẹẹyẹẹ ọgwọgwụ mẹ. Ó-ri ko juwa họ hiigu lẹ aalẹ, ọ ka juwa kpa ọ-jẹ́ họ hiigu nyamwụ ọọwa chị ogu [chị ọkẹkẹnị, NWT] la ịlọmwụ ịlọmwụ myị. Ma, ọngọọwa a tị juwa chị ụkụrwọ nya ịlọmwụ ọọwa kaka pwokwu ọhọhọ nya ọngọngọhẹ ọkịla kpong-kpong kaka.”​—Gal. 6:4.

17. Ányị ahị tị́ ka ye apyobwuna kori kahị ba ẹla ọlẹ ká ịPọlụ ya jẹ?

¹⁷ kori kahị ba ẹla ọlẹ ká ịPọlụ ya jẹ bala ọ-wụla ọhọhọ nya ịlọhị yẹ, ahị ka dọmwụ nyọka yẹ nyori ahị la āhị bala ọ-jẹ́ họ ang ịhyẹ ịlẹ ká angịkịla jẹ́-ẹ họ ka myị́. Ọ-chụ pwokwita, ọngọgbahị nya ọjịra-jịra ọhẹ á ka la āhị nya ọ-jẹ́ mẹ ang jẹ yẹẹyẹẹ ị-ịlahị nya ọjịra-jịra ka myị́, ma ọ tị ka la āhị nyọka họ ká angịkịla ka ri angịjụgbẹyị myị́. Lee ọ́ ka ri ọngọ jẹ́ nwụ ang họ kẹm-kẹm lala angịgbahị ịkịla ọọjịra-jịra nyamwụ ka myị́, ma ọ tị ka ri ọngọlẹ kọ la ọháha bala ọ-la dụmwọ yẹẹyẹẹ kpụ ọ kaa chị aanahị alẹng bala anyang kpẹẹ nyọka ya ẹla gbọọ kị ka ye ụbwọ ọdada bwu ẹpwụ nya ịBayịbụụ myị́. Lee ọ dọmwụ ka la ẹnyị ọnyịịla u-uhye nya ọ-kaa họ angịnyị ụga myị́. (Hib. 13:2, 16) Ụka kahị yẹ āhị ọlẹ kahị la gede-gede ịịwẹ, ahị ka la ang odudu ọlẹ kahị ka la ịlọhị ihi-ihi u-uhye nya ang ọlẹ kahị ka jẹ́-ẹ họ ha ọjịra-jịra. Ọọwa tị ka du kahị ka yẹ ijiiji nya aanahị ịlẹ kị la āhị ịlẹ kahị la ka lẹ ka.

18. Ányị ahị tị́ ka bwu ri ọngọ jẹ́ mẹ ang jẹ gụ olene?

¹⁸ Iwe ọnyị myị́ ọnyị ọlẹ kahị la ọọjịra-jịra, ahị wuu ka la irya nyọka nwa kịlahị ẹ-ẹpwụ nya ịgba ọgbagba nyahị bala āhị ọlẹ kahị la. Nyọka dahị ụbwọ kahị ka jẹ́-ẹ họ gụ olene, iJihova kaa mẹ ang jẹ́ẹhị yẹẹyẹẹ bwula ogu nyamwụ. Ọ-chụ pwokwita, ọọjịra-jịra ọla ẹpwarịrị nya epwihi, ahị kaa ye ang ọmẹjẹ u-uhye nya abwọlẹ kahị ka kpa ẹrụ ọnyịịla pyẹ yẹẹyẹẹ. À kaa maga nyọka kpa ẹla ọlẹ kahị kaa jẹ́ bwu ọjịra-jịra ịwẹ họ ụkụrwọ?

19. Ányị a tị́ ka bwu wu eje ọchịchị nyọka ka Ube-Ụpwụ nya Angị Kaa Kpa Ẹrụ Ọnyịịla Pyẹ ọyị myị́?

¹⁹ Iwe nya ang ọmẹjẹ ọkịla ọlẹ ko ji ri Ube-Ẹpwụ nya Angị Kaa Kpa Ẹrụ Ọnyịịla Pyẹ. Angịlẹ kị ka jẹ́-ẹ ka ube-ụpwụ ọwẹ ri aanahị ịlẹ kị gu ẹka 23 ka 65 kị tị kaa kpa ụka nyaa wuu họ ụkụrwụ ha iJihova. Ọ ka lang lala o-ri ahụ nyị́ ka jẹ́-ẹ wu ọya ọwẹ ọyị ẹnẹnẹhẹ ka myị́. Ma ọkọkọ nyọka gu ẹnyị nya ang ịlẹ ko du á ka jẹ́-ẹ ka myị́ ka, tụtụ gu ẹnyị nya ang ịlẹ ko du ká tịtọ nyọka ka. Ọọwa lẹ, a dọmwụ nyọka họ ụkụrwọ ụ-ụgbẹyị ọlẹ kọ ka dang ụbwọ nyọka yụbwọ ju ụpwụ ẹ-ẹpwụ nyọka ka lẹlẹ. Bwula ụbwọ ọdada nya iJihova bala ụkụrwọ ọ-họ la ọngịrị nyang wuu, à ka jụ ang ọlẹ ká me nyori nyị́ ka chịkpẹẹ ka họ myị́.

20. Ẹlịyẹ ahị tị́ ka jẹ́ bwu ụpwụ nya Ala iRom 12:6-8?

²⁰ Ẹla ọhata ọlẹ kahị ka jẹ́ bwu ẹpwụ nya ẹla ọ-chụ pwokwita nya ịPọlụ juwa ẹ-ẹpwụ nya ụpwụ nya Ala iRom 12:6-8. (Wọọ.) ỊPọlụ myịmyị ya ẹgẹwe nyori alọjịra-jịra nyị la āhị ịdatị-datị. Ma ugbẹnyị, ọ yọnụ rịrị u-uhye nyori ahị nyị kpa āhị ọnyị myị́ ọnyị ọlẹ kahị la ju ọjịra-jịra ọngịrị bala ọ-kpọọ wule.

21-22. Ẹla oyina ahị tị́ ka jẹ́ bwu ẹga nya Robert bala Felice?

²¹ Kụ irya nya ọọnahị ọhẹ ọlẹ ká ẹnyị nyamwụ ri Robert * wẹẹ. Nyọlẹ kị yọọ du ka ẹpwụma  ọkịla kaka họ ụkụrwọ kpa, ị kpọọ nyà ka họ ụkụrwọ ị-ịBẹtẹlụ ọla ẹpwụma nyamwụ. Nanana nyọlẹ kị ya nyori, ẹ-ẹla ọtịpyọ ọhẹ ọ họ à du kị yẹ ụkụrwọ nyamwụ da ka, o yẹkẹẹ: “Ẹ-ẹpwụ nya ọya ịmanyị tị ḿ chị ọkẹkẹnị ka chajị ọ lam lala o-ri am nyị mịleji lẹ. Ụka lụmẹ-lụmẹ kaa juwa kọọ lam lala o-ri am nyị hu abwọ la ụkụrwọ ọhọhọ ị-ịBẹtẹlụ mẹ.” Ányị ọ tị bwu ye ọkẹkẹnị nyamwụ tịrẹkpẹ? Ọngọgbahị nya ọjịra-jịra ọkịla ọhẹ kpọọ ịtịya nyori iJihova nyịị mẹ ang jẹ́ẹhị ẹ-ẹpwụ nya ụkụrwọ ọlẹ kọ ya hahị ene-ene chajị kọ ka jẹ́-ẹ kpahị họ ụkụrwọ ọlẹ kọ ya hahị lẹẹlẹẹ. Robert wẹ ka jẹ́ nyori ọ baba nyọka ba la ọ-yọyị ka ẹkpẹ kọ ka dọmwụ nyọka yẹhị rịrị ẹ-ẹga nya ang ọlẹ kọ ka jẹ́-ẹ họ myị́ lẹẹlẹẹ.

²² Ọọnahị Felice Episcopo chịpwụrụ bwu ẹpwụ nya iwe-ahụrụ ụma ọlịịwe. Ọwa bala ahụ nyamwụ họ kpá bwu ube-ụpwụ nya Gilead la ẹka nya 1956, lẹ ị họ ụkụrwọ nya ọ-wụla ala ọjịra-jịra yẹ ịị Bolivia lẹlẹ. Ị ma ọnyị la ẹka nya 1964. Felice yẹkẹẹ: “Ọ jụjụ hahị nyọka tụụbwọ hi ụkụrwọ ọwẹ jaabwọ ọlẹ kọ háahị kaka ba. Nyọka ya ịnyịlẹhị ọkịlẹtụ kpụm enyi u-uhye nya ẹla ọwẹ lala ẹka lẹpwụ-lẹpwụ. Ma bwula ụbwọ ọdada nya iJihova, m̀ yẹ ọkịlẹtụ nyam da, lẹ m kịnyaa la ụkụrwọ onyeewe nya o-ri adịda lẹlẹ.” Ọ lang lala Robert lee Felice? Ọkịlẹtụ juwa kpụng enyi chajị nyori á la iwe nyọka họ ụkụrwọ ọlẹ á kaa họ ene-ene ka? Ó ri ịnyị aalẹ, à ka chị ọkẹkẹnị gụ olene kori ká yọyị ka ẹga ọkịla bala ọ-ya irya nyang nọ u-uhye nya ang ọlẹ ká ka jẹ́-ẹ họ myị́ lẹẹlẹẹ ha iJihova bala aanahị. Kịnyaa la ụkụrwọ, ka juwa kpa āhị bala ang ịlẹ ká jẹ́-ẹ họ da angịkịla ụbwọ mẹ, a ka ye ọkẹkẹnị Jaabwọ ká wẹẹ kpa ọjịra-jịra wule.

23. Ẹlịyẹ ahị tị́ ka kpa ụka nyahị họ? Ẹlịyẹ ahị tị́ ka kụ ẹhị yẹ a-ang ọjẹ́jẹ ọkịla?

²³ Ọngọngọọngụ nyahị ju apyobwuna ha iJihova. Ọ tịtọ kahị ka ri ụpa nya ugbiyegu nyamwụ. Kori kahị juwa kpa ụka nyahị me irya u-uhye nya ang ọlẹ kahị ka họ nyọka kpa aanahị alẹng bala anyang wule bala ọ-họ ụkụrwọ yẹẹyẹẹ ká ụpa nyahị ka deeji ka, ọ ka du kọ ka lahị lala o-ri áhị ri ụpa nya ọjịra-jịra ka lẹ ka! Ma, ụgbẹyị ọlẹ kahị tị kaa yẹ angịkịla ọọjịra-jịra tị bẹẹ? Ányị ahị tị́ ka mẹjẹ nyori ẹla nyaa myịhị lẹhị? Ẹ-ẹpwụ nya ang ọjẹ́jẹ ọkịla, ahị ka ya ẹla u-uhye nya ẹla ọbaba ọwẹ.