1. Ẹlịyẹ iDevidi à tị́ ya u-uhye nya iJihova ọ-kpịlọmwụ keji?

AHỊ ka jẹ́-ẹ ya ịnyịlẹhị nyori iJihova ri ọngọ kpịlọmwụ keji? Ee, ahị ka jẹ́-ẹ ya ịnyị. IDevidi da ụpwụ yẹkẹẹ: “[IJihova,] ahụ à chewu kem bala ọ-chịm da lẹ. Ẹhị ọ-kpa rịrị nyang [ịlọng ọ-kpa keji, NWT] họ kam kpẹ̀hị.” (Eje. 18:35) Ụka ọlẹ ká iDevidi da ụpwụ ọwẹ, ọ chịkpẹẹ myị́ nyori o juwa kpịtịya nya ụka ọlẹ ká ịSamwẹlụ wẹ ẹpwa nya adamwụ nyọka ya ida wụ ọngọlẹ kọ ka ri adịrahụ nya ala iSirẹlụ ị-ịlahị. IDevidi à ri ọnyị ohyẹẹkpẹ ẹ-ẹpwụ nya anyị ineku lẹ, ọwa iJihova à tị chụ nyọka ku ọmwakpa nya Adịrahụ ịSọlụ lẹ.​—1 Sam. 16:1, 10-13.

2. Ẹlịyẹ ahị tị́ ka jẹ́ a-ang ọjẹ́jẹ ọlẹ?

² Ọ la gbagbịla nyori iDevidi ka myị ọnụ ju ẹla ọlẹ ká ụ-ụpwụ nya Eje Ọnyịịla 113 ya u-uhye nya iJihova yẹkẹẹ: “Ọ tịị hiri ẹhị kpẹẹ kaka yẹ uhye-ọgba bala odehe. Ọọ wule okpehika eji hi ịpyị, ọọ gba ọlẹbyahị kpehe . . . kpaa ka ju abwọ-ang ri ta ịdịrịhụ.” (Eje. 113:6-8) A-ang ọjẹ́jẹ ọlẹ, ahị ka jẹ́ ẹla ịkpọnchị ịhyẹ u-uhye nya ịlọhị ọ-kpa keji họhẹ-họhẹ bwula ọ-kụ ẹhị yẹ jaabwọ ká iJihova lịlọmwụ mẹ abwẹla ọwẹ jẹ. Lẹ, ahị ka myịmyị-ị̀ jẹ́ ang u-uhye nyịlọhị ọ-kpa keji gụ ọwọwa bwu ọgụ-ẹpẹtẹ nya Adịrahụ iDevidi, ọlọmwụ iDanẹlụ bala iJisọsị lẹlẹ.

3. Ányị iJihova à tịị họ ẹ-ẹga nyahị? Ọọwa tị́ mẹ ẹlịyẹ jẹ?

³ IJihova mẹjẹ nyori ọ kpịlọmwụ keji bwula abwọlẹ kọ kaa họ ẹ-ẹga nya angịnyị ehe ịlẹ kị la kpẹẹkpẹẹ ka. Ọ́ kaa ye ịgba ọgbagba nyahị myị kem ka, ọọ yẹhị lala aligu nyamwụ ịnyịnyị. (Eje. 25:14) IJihova họ chịkpẹẹ kahị ka jẹ́-ẹ ri oligu balọọ bwula ojene-jene ya Ọnyẹẹwẹ nyamwụ kiliya chajị nyahị. IJihova ri ọlahyẹẹrwẹrwa ịnyịlẹhị!

4. Ịyẹ iJihova à tị́ ya hahị? Ịyẹ tị́ du?

 ⁴ Kụ ẹhị yẹ ụgbẹyị ọkịla ọlẹ ká iJihova mẹjẹ nyori ọ kpịlọmwụ keji wẹẹ. Nyọlẹ kọọwa à ri ọngọ họ ang wuu, ọ ka jẹ́-ẹ họhị ụ-ụgbẹyị ọlẹ kahị ka la iwe nyọka chụ ang ọlẹ kahị tịtọ nyọka họ la ọhịhị nyahị ka myị́. Ma, ọ́ họ ịnyị ka. Ọ họhị la abwụma nyịlọmwụ bala o-ya iwe hahị nyọka chụ ang ọlẹ kahị ka họ. Nanana nyori ahị la hịnyẹẹ bala ọ-la dẹwụ-dẹwụ ị-ịlahị nya iJihova, eje ọchịchị nyahị baba họọ. Ọ tịtọ kahị ka chụ nyọka gbịgba họọ bwu ọkịlẹtụ nyahị chajị nya ọháha ọlẹ kahị la họọ bala ọ-jẹ́ apyobwuna nya o-ju ihi nya ehile nyamwụ. (Ehile. 10:12; Ayị. 48:17, 18) Ọ myịhị lẹhị lụmẹ nyọlẹ ká iJihova kpịlọmwụ keji ịịwẹ!

5. Ányị iJihova à tị́ bwu mẹjẹ́ẹhị nyọka kpịlọhị keji? (Yẹ ifoto ọla ẹbẹ nya ọgbanyẹ.)

⁵ IJihova mẹjẹ́ẹhị nyọka kpịlọhị keji bwula abwọlẹ kọ kaa họ ẹ-ẹga nyahị. IJihova à ri Ọngọlẹ kọ jẹ́ ẹla gụgụ wuu ẹẹ. Tị wẹẹ, ọ kaa ye ẹla olirya nya angịkịla myị. Ọ-chụ pwokwita, iJihova ya ẹga da ha Ọnyị nyamwụ nyọka dọọ ụbwọ họ ang ịkịla wuu. (Etu 8:27-30; Kol. 1:15, 16) Nanana nyori iJihova à ri agụgụ lẹ, ọọ ya ụkụrwọ ju angịkịla ụ-ụbwọ ịnyịnyị. Ọ-chụ pwokwita, ọ chụ iJisọsị nyọka ri Adịrahụ nya Ịpyị-Adịrahụ nyamwụ, Ọ tị ka ya ụkụrwọ ịhyẹ ha angịnyị angị 144,000 ịlẹ kị ka kpeji bala iJisọsị ịnyịnyị. (Luk. 12:32) IJihova mẹ ang jẹ iJisọsị nyọka ri Adịrahụ bala Olegbeju Okiliya. (Hib. 5:8, 9) Ọ myịmyị mẹ ang jẹ angịlẹ kị ka kpeji bala iJisọsị nyọka jẹ́-ẹ họ ụkụrwọ ọọwa ịnyịnyị, ma ọ́ ka maga nyọka yẹhị rịrị ang myị́ ang ọlẹ kị ka họ ka. Ọkọkọ nyọọwa, ọ dahịhile nyori ị ka họ irya nyamwụ.​—Ọwụ. 5:10.

6-7. Ẹlịyẹ ahị tị́ ka jẹ́ bwu ẹga nya Adahị olepwoohe u-uhye nya ọ-ya ụkụrwọ ju angịkịla ụ-ụbwọ?

⁶ Kori ká Adahị olepwoohe ọlẹ kọ baba nya ụbwọ ọdada bwu ẹga nya ọngọngọhẹ ka, á ya ụkụrwọ ju angịkịla ụ-ụbwọ aalẹ, ahị ịnyịnyị  baba nyọka họ ịnyị gụgụụgụ. Ọ-chụ pwokwita, à ri olegbeju nya ugbiyegu lee ọngọgbahị nya ọjịra-jịra? Ba ọgụ-ẹpẹtẹ nya iJihova jẹ bwula ọ-ya ụkụrwọ ha angịkịla họ, ká myịmyị cheji ba hi ọ-yẹhị rịrị ẹla myị́ ẹla u-uhye nya abwọlẹ kị ka họ ụkụrwọ ọọwa. Kori ká ba ọgụ-ẹpẹtẹ nya iJihova jẹ, ụkụrwọ ka kịlahị. À tị ka myịmyị-ị̀ mẹ ang jẹ angịkịla bala ọ-daa ụbwọ kị ka juhi ka gụ ọwọwa. (Ayị. 41:10) Ẹlịyẹ angịlẹ kị la ọngịrị ọhẹ lee ọkịla à tị́ ka myịmyị-ị̀ jẹ́ bwu ẹga nya iJihova?

⁷ ỊBayịbụụ mẹjẹ nyori iJihova kaa tịtọ nyọka wo irya nya alegu-ẹrụ nyamwụ. (1 Ịdị. 22:19-22) Adịda bala ịnịna, ányị anụ tị́ ka bwu ba ọgụ-ẹpẹtẹ nya iJihova jẹ? Ụka kọ pwoku, anụ tọ anyị nyanụ wo jaabwọ kị me irya ká ụkụrwọ ọhẹ ka bwu chịkpẹẹ la ọhọhọ myị́. Ụka kọ chịla, anụ ba ẹla ọlẹ kị gba kpehe jẹ.

8. Ányị iJihova à tị́ mẹ ugbodu ojuju jẹ ẹ-ẹga nya Ebiraham bala iSera?

⁸ Ụgbẹyị ọkịla ọlẹ ká iJihova mẹjẹ nyori ọ kpịlọmwụ keji ri, ọ kaa ju ugbodu. Ọ-chụ pwokwita, iJihova kaa ju ugbodu ụka ká anchẹ nyamwụ á tọọ ịtọ ẹla wo lihi-ihi u-uhye nya eje ọchịchị nyamwụ ọhẹ. Ọ ke ụrụ ụka ọlẹ ká Ebiraham wẹẹ ya nyori ọwa nyị́ me irya nyị pwoku ká iJihova ka to ịSọdọm bala iGomora ayịreji ka. (Ọmwụ. 18:22-33) Myịmyị kpịtịya jaabwọ ká iJihova họ ẹ-ẹga nya iSera ahụ nya Ebiraham wẹẹ. Ọ́ wẹẹjẹ lee o-ju agbama tọọ ụka ọlẹ kọ hụlọ ẹhụ ju ehe ọchịchị nya iJihova nyori nyị ka kpẹnyị lụka nya okwirichi ọchịchị nyamwụ ka. (Ọmwụ. 18:10-14) Ọkọkọ nyọọwa, ọ chị ihi ju iSera.

9. Ẹlịyẹ adịda, ịnịna bala angịgbahị nya ọjịra-jịra, à tị́ ka jẹ́ bwu ọgụ-ẹpẹtẹ nya iJihova?

⁹ Adịda, ịnịna bala angịgbahị nya ọjịra-jịra, ẹlịyẹ anụ tị́ ka jẹ́ bwu ọgụ-ẹpẹtẹ nya iJihova? Kụ ẹhị yẹ jaabwọ á kaa họ ụka ká anyị nyang lee ọngọhẹ ọọjịra-jịra á myị ọnụ ju eje ọchịchị nyang ka wẹẹ. À kaa byaa ahyaahị nyori ẹla nyaa nyị́ pwoku ka? Lee a tị́ kaa maga nyọka yẹ ẹla ọọwa jaabwọ kịịwa yọọ ịnyịnyị? Alugbiyegu bala alọjịra-jịra kaa ye apyobwuna ịnyịlẹhị ụka ká angị kpẹhị rịrị á gbịla iJihova. Ahị ya ẹla chẹẹ u-uhye nya ẹla ọlẹ kahị ka jẹ́ chajị nya ịlọhị ọ-kpa keji bwu ẹga nya iJihova lẹ. Lẹẹlẹẹ, ahị ka jẹ́ ang u-uhye nya ịlọhị ọ-kpa keji bwu ẹga nya angịkịla ịlẹpwụ nya ịBayịbụụ.

10. Ányị iJihova à tị́ bwu kpa ọgụ-ẹpẹtẹ nya angịkịla mẹ ẹla jẹ́ẹhị?

¹⁰ IJihova kọ ri Ọngọmẹjẹ Ọgụgụ Wuu, ya ọgụ-ẹpẹtẹ nya angịhyẹ hahị ẹ-ẹpwụ nya Omyi Ẹla nyamwụ chajị nyọka mẹ ẹla jẹ́ẹhị. (Ayị. 30:20, 21) Ahị kaa jẹ́ ang bwu oja ịlẹpwụ nya ịBayịbụụ u-uhye nya angịlẹ kị la abwẹla ịnyịịla ịlẹ kị kpụ Ohe Oluhye ịpyọ, tụ́ abwẹla nya ọngịnyị ọ-kpịlọmwụ keji. Ahị kaa jẹ́ ang ịnyịnyị bwu ọgụ-ẹpẹtẹ nya angịlẹ kị myị mẹ abwẹla ịnyịịla ịlịịwẹ jẹ ka.​—Eje. 37:37; 1 Kọr. 10:11.

11. Ẹlịyẹ ahị tị́ ka jẹ́ bwu ọgụ-ẹpẹtẹ ọtịpyọ nya ịSọlụ?

¹¹ Kụ irya u-uhye nya ẹla ọlẹ kọ họ ta Adịrahụ ịSọlụ wẹẹ. Bwu ọmwụ ọdada, ọ kaa kpịlọmwụ keji. Ụka ọlẹ kọ ri okolobya, ọ jẹ́ nyori ọ́ la ọngịrị nyọka họ ang myị́ ang kọ họ́ọ ka. Ọ́ dọmwụ myị ye ụkụrwọ ọlẹ kị ya họọ myị ahyaahị ka. (1 Sam. 9:21; 10:20-22) Ma, nyọlẹ ká ịSọlụ ri adịrahụ kpá bwaa, ọ wẹ ka la egbeju-ọngịrị bala ọ-họ ang ịlẹ kọ la ọngịrị nyọka họ ka. Ụka ọhẹ juwa kọ myị ju ugbodu godayị gbe ịSamwẹlụ ọlọmwụ ka. Ọkọkọ kọ ka dahịhile iJihova nyọka chaa da, ịSọlụ kiliya o-ru ila nanana nyori ọ́ la ọngịrị nyọka họ ịnyị ka. Chajị nyọọwa, iJihova á yoo myị ka. Ọ myịmyị pwọ ịSọlụ ọmwụ cheji hi adịrahụ oriri. (1 Sam. 13:8-14) Ahị ka mẹjẹ nyori ahị jẹ́ ẹla kori kahị jẹ́ ang bwu ọgụ-ẹpẹtẹ ọtịpyọ ọwẹ bala ọ-cheji ba hi ọ-ka họ ang ịlẹ kahị la ọngịrị nyọka họ ka.

12. Ányị ịDanẹlụ à tị́ mẹ ịlọmwụ ọ-kpa keji jẹ?

 ¹² Kụ ẹhị yẹ ọgụ-ẹpẹtẹ ọnyịịla nya ọlọmwụ ịDanẹlụ ọlẹ kọ datị gbanggbang hi ọgụ-ẹpẹtẹ ọtịpyọ nya ịSọlụ wẹẹ. Ẹ-ẹpwụ nya ọhịhị nyamwụ wuu, ịDanẹlụ kịnyaa la ọ-kpịlọmwụ keji. Ọ kaa bịlẹ iJihova kọ ka kpọọ ụgbẹyị ụka myị́ ụka. Ọ-chụ pwokwita, ụka ọlẹ ká iJihova kpọọ da ụlaa nya iNebukadinesa wụlẹ, ịDanẹlụ á chị ọgọm nyori ọwa nya-à dọọ wụlẹ la ọngịrị nyịlọwa lẹ ka. Ọkọkọ nyọọwa, ọ yogbo wuu ha iJihova. (Dan. 2:26-28) Ẹlịyẹ ahị tị́ ka jẹ́ bwu ẹlẹwẹ? Kori ká ẹla oyaya nyahị á kpụ aanahị ịpyọ lee kori kahị la oja ịnyịịla-ịnyịịla ịhyẹ ẹ-ẹrụ ọnyịịla ọ-kpa pyẹ, ahị ka yogbo wuu ha iJihova. Ahị ka myị ọnụ nyori kori ká iJihova á dahị ụbwọ ka ịnọ, áhị ka jẹ́-ẹ họ ang ịlịịwẹ wuu myị́ ka. (Filip. 4:13) Kori kahị họ ịnyị aalẹ, ahị wẹẹ ba ọgụ-ẹpẹtẹ ọnyịịla nya iJisọsị jẹ ịnyịnyị. Ụ-ụgbẹyị oyina tị́?

13. Ẹlịyẹ ahị tị́ jẹ́ bwu ẹga nya iJisọsị jaabwọ ká ụpwụ nya ịJọn 5:19, 30 mẹjẹ?

¹³ IJisọsị kpụnịrọ iJihova nanana nyori ọwa à ri ọnyị ọkpẹẹkpẹẹ nya Ohe Oluhye lẹ. (Wa ịJọn 5:19, 30.) Ọ́ maga nyọka ju ọngịrị ju bala Adamwụ olepwoohe ẹnẹnẹhẹ lẹka. Ala iFilipayị 2:6 ya jehi nyori iJisọsị nyị́ “hu ịlọmwụ hwaa kaka ta Ohe Oluhye meme ẹ-ẹpwụ nya ịngịngịhyẹ nyamwụ kpongkpong ka.” IJisọsị ri ọnyị o-hiri ịlọmwụ kpẹẹ, lẹ ọ jẹ́ nyori ọ́ la ọngịrị nyọka họ ang myị́ ang wuu ka. Ọ ju ihi nya ọngịrị nya Adamwụ.

14. Ányị iJisọsị à tị́ họ ụka ọlẹ kị byoo nyị họ ẹla ọlẹ kọ la ọngịrị nyọka họ ka?

¹⁴ Kụ irya nya ẹla ọlẹ ká iJisọsị họ ụka ọlẹ ká iJemsi, ịJọn bala ịnaa bịlẹ ang ọlẹ kọ la ọngịrị nyọka họ ka bwu ẹga nyamwụ wẹẹ. Ahyaahị, iJisọsị byaa nyori Adịdọwa olepwoohe kẹnẹ-kẹnẹ nya-à la ọngịrị nyọka chụ ọngọlẹ kọ ka hụhụ ụ-ụpwụriri lee ụpụpịla nyọwa ị-Ịpyị-Adịrahụ lẹ. (Mat. 20:20-23) IJisọsị mẹjẹ nyori ọ jẹ́ ẹga ọlẹ ká ọngịrị nyamwụ ba. Ọ họ ẹla ba o-oyi. Ọ́ họ ịngịngịhyẹ ọlẹ ká iJihova ya ọngịrị họọ nyọka họ ka ẹnẹnẹhẹ lẹka. (Jọn. 12:49) Ányị ahị tị́ ka bwu gbịla ọgụ-ẹpẹtẹ ọnyịịla nya iJisọsị?

15-16. Ányị ahị tị́ ka bwu kpa ẹla ọmẹjẹ ọla ịBayịbụụ ọlụpwụ nya 1 Ala ịKọrịntị 4:6 họ ụkụrwọ?

¹⁵ Ahị ka jẹ́-ẹ gbịla ọgụ-ẹpẹtẹ nya iJisọsị bwula ọ-kpa ẹla ọlụpwụ nya 1 Ala ịKọrịntị 4:6 họ ụkụrwọ. I byihi ụ-ụwa yẹkẹẹ: ‘Anụ juwa me irya ogidogbo kpoye nya ang ọlẹ kị da ụ-Ụpwụ Ịgọgọ kpong-kpong kaka.’ Lẹ ụka ká ọngịnyị á tịtọ kahị ka jwoo i-irya, áhị ka maga  nyọka gbiloo lagbụrụ ka ba ẹla olirya nyahị jẹ lee o-ya ẹla la ọ-kụ irya u-uhye nya ẹla ọọwa rige-rige ene ka lẹ ka. Ọkọkọ nyọọwa, ẹla ọmẹjẹ ọlẹpwụ nya ịBayịbụụ bala apwụ ị-da ịBayịbụụ wụlẹ nyahị ahị ka da ọngọọwa ụbwọ ka lẹ. Bwula ọ-họ ịnyị, ahị mẹjẹ nyori a-ang myị́ ang wuu ahị jẹ́ ka. Ahị myị́myị́ wẹẹ kpịlọhị keji ụka kahị họ ịnyị chajị ahị mẹjẹ nyori ẹla ọmẹjẹ nya iJihova há gụ ịnyahị ụka wuu.​—Ọwụ. 15:3, 4. 

¹⁶ Datị hi ọ-chị ihi ju iJihova, ang ịnyịịla ịkịla juwa ịnyịnyị ịlẹ kị du kahị ka kpịlọhị keji. Ányị ịlọhị ọ-kpa keji à tị́ ka kpa ọkẹkẹnị wahị bala ọ-dahị ụbwọ nyọka la okpunyi bala angịkịla? Ahị ka ya ẹla u-uhye nyọọwa lẹẹlẹẹ.

17. Ịyẹ tị́ du ká angị kpịlaa keji bala ọmẹjẹ nyori ị́ la ọngịrị nyọka họ ang wuu ka, kaa chị ọkẹkẹnị?

¹⁷ Ọ chịkpẹẹ nyori ahị ka ye ọḳekẹnị ụka kahị kpịlọhị keji bala ọ-mẹjẹ nyori áhị la ọngịrị nyọka họ ang myị́ ang wuu ka. Ịyẹ tị́ du? Chajị ụka kahị myị ọnụ nyori ang ịhyẹ ji ịlẹ kahị ka jẹ́-ẹ jụ họ myị́ ka, ụbwọ ọdada ọlẹ kahị ye bwu ẹga nya angịkịla kaa myịhị lẹhị. Ọ-chụ pwokwita, kụ irya u-uhye nya ụka ọlẹ ká iJisọsị họ alekpo iwo uda wẹẹ. Ọngọ ookpokpo lẹpwụ nyaa kem à tịrẹkpẹ kaka ji iJisọsị obe ọhọhọ nyọlẹ kọ họọ uda bwu ẹdụrụ onyobyi ọwẹ lẹ. Ẹdụrụ ọwẹ ri ang ọlẹ ká ọlẹng ọwẹ ka jẹ́-ẹ la uda ọhọhọ bwu lịlọmwụ myị́ ẹnẹnẹhẹ ka. Ọlẹng ọwẹ kpịlọmwụ keji, ọ jẹ́ nyori ọwa nyị́ ka jẹ́-ẹ họ ịlọwa uda myị́ ka. Lẹ, o ji iJisọsị obe ọhọhọ chajị nya ụbwọ ọdada ọwẹ bala ogwogbo ha Ohe Oluhye u-uhye nyọọwa ịnyịnyị.​—Luk. 17:11-19.

18. Ányị ịlọhị ọ-kpa keji à tịị dahị ụbwọ hụ la okpunyi bala angịkịla? (Ala iRom 12:10)

¹⁸ Angị kpịlaa keji kaa hụ la okpunyi bala angịkịla, ọ myịmyị chịkpẹẹ kị ka jẹ́-ẹ ri aligu la apatabwọ kiwa ka. Ịyẹ tị́ du? Ị kaa chị ọkẹkẹnị  nyọka myị ọnụ nyori angịkịla la abwẹla ịnyịịla bala ọ-dahịhilaa. Angị kpịlaa keji kaa chị ọkẹkẹnị ụka ká angịkịla á juwa nwà kịlahị ẹ-ẹpwụ nya ụkụrwọ ọnyị myị́ ọnyị ọlẹ kị ya haa. Ọ́ tị kaa laa ujwo nyọka mịloja ha angịlịnyị bala o-jwaa ihi ka.​—Wa Ala iRom 12:10.

19. Ọọlajị nya ịyẹ à tị́ du kahị ka cheji ba hi ịlọhị o-hu hwaa?

¹⁹ Angị hu ịlaa hwaa tị datị gbang-gbang, ọ kaa laa ujwo nyọka mịloja ha angịkịla. Ọkọkọ nyọọwa, ị kaa tịtọ ká angịkịla ka yogbo haa ịwa. Ọ kaa chịkpẹẹ ká angịlịnyị ka chụ ịlaa ka pwoku angịkịla bala ọ-maga nyọka há gụ angịkịla ịnyịnyị. Ọkọkọ kị ka mẹ ang jẹ́ angịkịla bala ọ-ya ụkụrwọ jwaa ụ-ụbwọ lẹ, angị hu ịlaa hwaa kaa tịtọ nyọka họ ang lịlaa chajị ị me irya nyori angịkịla nyị́ ka jẹ́-ẹ họ ang ọọwa lala ịwa ka. Ụka lụmẹ-lụmẹ, ọngọ hu ịlọmwụ hwaa kaa tịtọ kọ ka kụ ịlahị nya angịkịla. Ọ kaa yẹ ijiiji ụka ká angịkịla á jẹ́ họ ang gwọọ. (Gal. 5:26) Ọ kaa lujwo ha angịlịnyị nyọka ri igu bala angịkịla tata. Kori kahị yẹ nyori ahị la akama ọwẹ, ahị ka raabwọ nyịlẹhị-ịlẹhị bịlẹ iJihova kọ ka dahị ụbwọ “la ọ-nwụ ma nya ọkịlẹtụ” chajị ká abwẹla onyobyi ọwẹ ka yeji ọ-ọkịlẹtụ nyahị ka.​—Rom. 12:2.

20. Ịyẹ tị́ du kahị ka kpịlọhị keji bala ọ-jẹ́ nyori áhị la ọngịrị nyọka họ ang wuu ka?

²⁰ Ọgụ-ẹpẹtẹ nya iJihova myịhị lẹhị lụmẹ! Ahị yẹ jaabwọ kọ kpịlọmwụ keji bwula abwọlẹ kọọ kpa anchẹ nyamwụ, ahị tị tịtọ nyọka gbịlọọ ịnyịnyị. Ahị myịmyị tịtọ nyọka gbịla ọgụ-ẹpẹtẹ ịnyịịla nya angịlẹ kị kpịlaa keji gbịgba ha Ohe Oluhye ká oja nyaa juwa ị-ịBayịbụụ. Ahị kịnyaa la o-ya ihi bala ogbo ọlẹ kọ chịla nyọka ri ịnya iJihova họọ ụka myị́ ụka. (Ọwụ. 4:11) Kori kahị họ ang ịwẹ wuu, ahị ka ri oligu nya iJihova gboyi myị́ oyi chajị ọ la ọháha ẹ-ẹga nya angịlẹ kị kpịlaa keji bala ọ-jẹ́ nyori ị́ la ọngịrị nyọka họ ang wuu ka.