1. Ịyẹ tị́ du ká iJihova họ ang ịhịhị?

ỤKA ọhẹ ji ọlẹ ká iJihova la ụbwọọmwụ. Ọ́ tị lịlọmwụ nwee ka. IJihova á baba nya ọngọngọhẹ ene kọ ka chị ọkẹkẹnị ka. Ọ tị lịnyị kpá odu lẹ, iJihova tịtọ ká angịkịla ka hịhị bala o-ye ọkẹkẹnị. Ọháha gu iJihova gbịla nyọka dọmwụ nya ang ọhọhọ.​—Eje. 36:9; 1 Jọn. 4:19.

2. Ányị ọ tị́ la iJisọsị bala alegu-ẹrụ u-uhye nya ang ịlẹ ká iJihova họ?

² Ọhọhẹ, iJihova họ iJisọsị, Ọnyị nyamwụ. Ọọwa lẹ, “Ohe Oluhye a họ ang myị́ ang wuu,” tụ́ alegu-ẹrụ bwula Ọnyị nyamwụ lẹlẹ. (Kol. 1:16) IJisọsị chị ọkẹkẹnị yẹẹyẹẹ nyọlẹ kọ la iwe nyọka họ ụkụrwọ bala Adamwụ. (Etu 8:30) Alegu-ẹrụ tị chị ọkẹkẹnị ịnyịnyị. Ị juwa ụka ká iJihova bala iJisọsị ko ri Olegbeju nya ụkụrwọ nyamwụ, họ uhye-ọgba bala odehe. Ányị alegu-ẹrụ ịwẹ à tị́ họ? Ị “da iwuru nya ọkẹkẹnị” ụka ọlẹ ká Ohe họ odehe, ị tị kịnyaa la ọ-họ ịnyị jaabwọ kị wẹẹ yẹ ang myị́ ang ọlẹ ká iJihova họ wuu, ọgụgụụgụ ri angịnyị ehe. (Job. 38:7; Etu 8:31) Ang ọnyọnyọọnyị ọlẹ ká iJihova họ mẹ ọháha bala ẹla ọjẹ́jẹ nyamwụ jẹ.​—Eje. 104:24; Rom. 1:20.

3. Jaabwọ ká ụpwụ nya 1 Ala ịKọrịntị 15:21, 22 mẹjẹ, ịyẹ iya ọkịlaakịla nya iJisọsị à tị́ họ chịkpẹẹ?

³ IJihova tịtọ ká angịnyị ehe ka hịhị gboyi myị́ oyi ám̀ odehe ọhụ́hị-hụ́hị ọlẹ kọ họ. Ma, nyọlẹ ká Adam bala Iivu la egbeju ọngịrị ta Adaa wẹẹ, ị́ ka jẹ́-ẹ hịhị gboyi myị́ oyi kaka. Ịwa bala  anyị nyaa ka jẹ́-ẹ gbu pyii lẹ. (Rom. 5:12) Ányị iJihova à tị́ họ mẹ? O ya dodehe jaabwọ kọ ka bwu chị angịnyị ehe da ahyaahị. (Gen. 3:15) Ọ ka hu iJisọsị ọnyị nyamwụ kiliya chajị nyọka ra anyị nya Adam bala Iivu kpehe bwu ẹpwụtụbwọ nya ọhọbịrị bala igu. Bwula ọọwa, ọ ka jẹ́-ẹ ya ọhịhị ọmyịmyị-ka ha ọng myị́ ọng ọlẹ kọ chụ nyọka gbịgba họọ.​—Jọn. 3:16; Rom. 6:23; wa 1 Ala ịKọrịntị 15:21, 22.

4. Ịtọ ẹla iyina ahị tị́ ka kụ ẹhị yẹ a-ang ọjẹ́jẹ ọlẹ?

⁴ Ịtọ ẹla lụmẹ-lụmẹ ji kahị ka jẹ́-ẹ tọ wo u-uhye nya ehe ọlẹ ká Ohe chị nyọka wule egu eji. Ọ-chụ pwokwita, ányị owuleji bwula igu ọwẹ à tị́ ka la myị́? Ahị ka jẹ́ angịnyị nyahị ụka kị wuleji bwula igu? Ụgbẹyị oyina owuleji bwula igu à tị́ ka kpa ọkẹkẹnị wahị? Ẹlịyẹ owuleji bwula igu à tị́ mẹjẹ́ẹhị u-uhye nya ọháha, ẹla ọjẹ́jẹ, bala ugbodu ojuju nya iJihova? Ahị kụ ẹhị yẹ ịtọ ẹla ịwẹ wẹẹ.

5. Ịyẹ tị́ du kahị ka jẹ́-ẹ yẹhị rịrị nyori angịnyị wuu á ka wuleji bwula igu ụka ookpokpo ka?

⁵ Ụka ká iJihova á ka kpa iJisọsị ọnyị nyamwụ wule uku-uku nya angịnyị eji bwula igu, ahị ka jẹ́-ẹ yẹhị rịrị nyori ịwa wuu á ka wuleji ụka ookpokpo ka. Ịyẹ tị́ du? Chajị kori ká egu á wuleji bwula igu gbirim kaka myị̀ odehe kpọrịkọọ ụka ookpokpo, owúru-wùru ka ji. IJihova á tị kaa họ ịngịngịhyẹ nyamwụ wúru-wùru ka. Ọ jẹ́ nyori kori ká okpunyi á ka ji tụbwọ aalẹ, ang wuu chịla kọ ka la memeeme. (1 Kọr. 14:33) IJihova kpa ẹla ọjẹ́jẹ bala ugbodu ojuju họ ụkụrwọ ụka kọọwa bala iJisọsị wẹẹ họ odehe dụmwọ-dụmwọ chajị ká angịnyị ehe ka jẹ́-ẹ hịhị ám̀. IJisọsị ka mẹ abwụma ịwẹ jẹ ịnyịnyị ụka nya Eji Ọkpakpa Ọlẹpwụ nya Ẹka Ụnọ, kọ ka họ ụkụrwọ bala angịlẹ kị chịda bwu ẹwụ nya Amagẹdọn nyọka nwụla odehe nọ gbe angịlẹ kị ka wuleji bwula igu.

6. Jaabwọ ká ụpwụ nya Ụkụrwọ nya Alẹrụ 24:15 ya, owo anyị iJihova à tị́ wẹẹ ka wuleji bwula igu?

 ⁶ Ụgbẹyị ọkpọnchị ọlẹ ká angịlẹ kị chịda bwu Amagẹdọn ka jẹ́-ẹ dụbwọ kpẹhị rịrị angị wuleji bwula igu ri ọ-ka mẹ ang jáa u-uhye nya Ịpyị-Adịrahụ nya Ohe bala ang ọlẹ ká iJihova tịtọ bwu ẹga nyahị. Ịyẹ tị́ du? Chajị iru nya angịlẹ kị wẹẹ ka wuleji bwula igu ka juwa ẹ-ẹpwụ nya ebwo ọlẹ ká ịBayịbụụ wụrụ nya “alabwẹla onyobyi” lee alabwẹla ọtịpyọ. (Wa Ụkụrwọ nya Alẹrụ 24:15.) Ị ka baba nya ọ-nwụ ang lụmẹ-lụmẹ họ ọ-ọhịhị nyaa chajị kị ka ye apyobwuna bwu iya ọkịlaakịla nya ịKịrayịsị bala ọ-ka hịhị gboyi myị́ oyi. Kụ irya nya ụkụrwọ ọlẹ kọ juwa nyọka mẹ ang jẹ uku-uku nya angịnyị ịlẹ kị jẹ́ ịngịngịhyẹ u-uhye nya iJihova ka wẹẹ. Ọngọngọọngụ nyaa ka la ọngọmẹjẹ nyịlọmwụ jaabwọ kahị kaa mẹ ịBayịbụụ jẹ angịnyị alẹ? Ị ka gaa ka ọjịra-jịra ịdatị-datị kị ka mẹ ang jáa chajị kịịwa ayịdang ka mẹ ang jẹ angịlẹ kị ka wuleji bwula igu ẹ-ẹkpẹ nyaa? Áhị jẹ́ kpangga lẹka. Ma, ẹla ọlẹ kahị jẹ́ ri, la ocheju nya Eji Ọkpakpa nya ịKịrayịsị Ọlẹpwụ nya Ẹka Ụnọ lẹ, “odehe ọlẹ wuu ka myị̀ lẹla ọjẹjẹ nya [iJihova] pwẹẹpwẹẹ” lẹ. (Ayị. 11:9) Akụrwọ ịkpịpyọ-kpịpyọ ji kahị ka họ ẹ-ẹpwụ nya ẹka ụnọ ọwẹ!

7. Ịyẹ tị́ du ká angịnyị nya Ohe ka jẹ́ ahyẹẹrwẹrwa nya angị wuleji bwula igu ụka kị juwa mẹ ang jáa?

⁷ Ụka nya Eji Ọkpakpa nya ịKịrayịsị Ọlẹpwụ nya Ẹka Ụnọ, angịnyị nya iJihova wuu ka baba nyọka kịnyaa la ọ-yẹ ọhịhị nyaa da chajị kọ ka kpọọ ịpyọ. Lẹ, ịwa wuu ka jẹ́ ahyẹẹrwẹrwa nya angị wuleji bwula igu jaabwọ kị wẹẹ daa ụbwọ nyọka kụrụ irya bala imyi nya ang ọtịpyọ ọlẹ kọ kaa nwaa bala ọ-ka hịhị ba ehile nya iJihova jẹ. (1 Pit. 3:8) Angịlẹ kị wuleji bwula igu ka yẹ nyori angịnyị nya iJihova ri angị kpịlaa keji bala o-ri ịwa ịnyịnyị wẹẹ maga nyọka nwụ ọhịhị nyaa rịrị chajị ká ẹla nyaa ka kpụ iJihova ịpyọ wẹẹ. Ọọwa ka gwaa gbịla nyọka gbịgba ha iJihova bala angịnyị nyamwụ.​—Filip. 2:12.

8. Ịyẹ tị́ du kahị ka dahịhile nyori ahị ka jẹ́ aanahị bala aligu nyahị ụka kị wuleji bwula igu?

⁸ Ang lụmẹ-lụmẹ ji ịlẹ kị du kahị ka yẹhị rịrị nyori, angịlẹ kị ka da angị wuleji bwula igu ọwụraba ka jẹ́ angịnyị nyaa datị. Ọ-chụ pwokwita, chajị nya ụgbẹyị ọlẹ ká iJihova bwu wule angịnyị eji bwula igu lụka ọkẹkpẹ, ahị ka jẹ́-ẹ yẹhị rịrị nyori ọ ka ma angịịwa họ chajị kị ka la jaabwọ kị la ene-ene, ya ẹla bala ọ-kụ irya jaabwọ kị kaa họ ene nya igu nyaa. Kpịtịya nyori iJisọsị chụ igu ka pwoku une ọnọnọ bala ọ-chụ owuleji bwula igu ka pwoku ahị ọ-chị bwu une. (Mat. 9:18, 24; Jọn. 11:11-13) Ụka ká angịnyị á chahị bwu une, ị kaa la jaabwọ kị la ene kịị nune bala o-ya ẹla jaabwọ kị kaa ya ene-ene, bala ọ-kpịtịya nya ang ịlẹ kị kpịtịya ene kịị nune. Kụ irya nya ọ-chụ pwokwita nya ịLasarọsị wẹẹ. O gbu ri ahyẹẹnụ ine, lẹ ịnyịrọ nyamwụ dọmwụ nyọka mama lẹ. Ma, ụka ká iJisọsị wuloo eji bwula igu, aanamwụ jọ́ọ ahyaahị, ọwa ịnyịnyị tị kpịtịya nyaa.​—Jọn. 11:38-44; 12:1, 2.

9. Ịyẹ tị́ du ká angịlẹ kị gbu ka wuleji bwula igu la irya bala ịnyịrọ ọkpẹẹkpẹẹ ka?

⁹ IJihova chehe nyori ọngọngọhẹ ọlẹ kọ juwa e-ekpeleji nya eji ọkpakpa nya ịKịrayịsị nyị́ ka ya nyori ‘Ẹdụrụ jụm alẹ’ kaka. (Ayị. 33:24; Rom. 6:7) Lẹ, angịlẹ kị ka wuleji bwula igu ka la ịnyịrọ ọla gogo. Ma, ị́ ka la kpẹẹkpẹẹ ahyaahị ka. Kori kọ lịnyị ka, alugbiyegu bala aligu nyaa á ka jáa ka. Ọ lala o-ri angịnyị ehe wuu ka wẹ ka la kpẹẹkpẹẹ dụmwọ-dụmwọ ụka nya Eji Ọkpakpa nya ịKịrayịsị Ọlẹpwụ nya Ẹka Ụnọ ịnyị. Ụka ká ẹka ụnọ á chịpwụrụ kpá, iJisọsị à ka ya Ịpyị-Adịrahụ ju Adamwụ ụ-ụbwọ myịmyị lẹlẹ. Ụka ọwẹ lẹ, Ịpyị-Adịrahụ ka họ ang myị́ ang wuu ọlẹ ká iJihova tịtọ lẹ, tụ́ ọ-ka  họ ká angịnyị ehe ka la kpẹẹkpẹẹ.​—1 Kọr. 15:24-28; Ọwụ. 20:1-3.

10. Ányị ọ tị́ ka lang ụka ká angịnyị á wuleji bwula igu?

¹⁰ Kụ irya jaabwọ kọ ka la ụka ká ka dọnụ chị angịnyị nyang ịlẹ kị gbu myịmyị wẹẹ. Ọkẹkẹnị ọlụka ọwẹ ka kpang hụlọ ẹhụ lee ọ tị́ ka kpang jida nya ọkẹkẹnị? À ka mweje gwogo ha iJihova? Ahị jẹ́ myị̀myị̀ nyori à ka la ọháha okpori-kpori ha Adang ọlẹ kọ kaa kpahị jung bala Ọnyị ọ-la ọháha nyamwụ chajị nya āhị nya owuleji bwula igu.

11. Jaabwọ ká iJisọsị ya ụ-ụpwụ nya ịJọn 5:28, 29, ịyẹ à tị́ ka họ ta angịlẹ kị hịhị ba ehile nya Ohe Oluhye jẹ?

¹¹ Kụ irya nya ọkẹkẹnị ọlẹ ká angị wuleji bwula igu ka la jaabwọ kị wẹẹ pwọ ọngịnyị onyogo nyaa deeji bala ọ-hịhị ba ehile nya Ohe Oluhye jẹ wẹẹ. Angịlẹ kị yẹda ịnyị ka la owuleji bwula igu nya ọhịhị. Ma, iJihova á ka ya ẹga da ha angịlẹ kị pwa la ọyẹda nyọka kịnyaa la ọhịhị odehe onyeewe lee o-yi angịnyị uyawụ ụ-ụwa ka.​—Ayị. 65:20; wa ịJọn 5:28, 29.

12. Ụgbẹyị oyina iJihova à tị́ ka wahị kụrụ angịnyị ilodehe wuu?

¹² Ụka nya eji ọkpakpa nya Ịpyị-Adịrahụ nya Ohe, angịnyị nyamwụ wuu ka yẹ nyori ẹla ọlẹ ká ụpwụ nya Etu 10:22 ya nyị ri ẹlịlẹhị. Ụwa yẹkẹẹ: “Ahị ọwawa o-bwu ẹga nya [iJihova] kaa họ ká ọngịnyị kpụ ụdụ, ọ́ ju ijẹma ọchịchị ka.” Bwula ụbwọ ọdada nya olegu ịgọgọ, angịnyị nya Ohe Oluhye ka kpụdụ nya olegu, ọọwa ri, ị ka lala ịKịrayịsị gụ ọwọwa bala ọ-wẹ ka la kpẹẹkpẹẹ dụmwọ-dụmwọ. (Jọn. 13:15-17; Efe. 4:23, 24) Ahyẹẹnụ ọnyị myị́ ọnyị, ị ka la ogogo bala o-ri angịnyị ịnyịịla gụ ọwọwa. Ọhịhị ka chakpaa kpịpyọ ụka ọwẹ! (Job. 33:25) Ma, ányị ọ-kụ irya ju owuleji bwula igu à tị́ ka jẹ́-ẹ dang ụbwọ lẹẹlẹẹ?

13. Jaabwọ ká ụpwụ nya Eje Ọnyịịla 139:1-4 ya, ányị owuleji bwula igu à tị́ ka mẹjẹ jaabwọ ká iJihova jẹ́ẹhị kaka ba?

¹³ Jaabwọ kahị jẹ́ ene, ụka ká iJihova á wule angịnyị eji bwula igu, ị ka kpịtịya nya ang ọlẹ kị jẹ́ ene bala o-ri angịnyị ịlẹ kị ri ene. Kụ irya nya etu nya ẹlẹwẹ wẹẹ. À há iJihova gbee kọọ jẹ́ bala ọ-kpịtịya nya irya ọnyị myị́ ọnyị ọlẹ ka la, ẹla myị́ ẹla kaa ya bala ọ-họ. Lẹ, kori kọ wulung eji bwula igu, ọ ka chọọ kpẹẹ nyọka tịrị ẹla ọlẹ ká jẹ́, abwẹla nyang, bala ụma nya ọngịnyị ọlẹ ka ri ene-ene ẹkpẹ hang. Adịrahụ iDevidi jẹ́ nyori iJihova jẹ́ ọngọngọọngụ nyahị yẹẹyẹẹ. (Wa Eje Ọnyịịla 139:1-4.) Ányị ọ tị́ kaa lahị ụka kahị jẹ́ jaabwọ ká iJihova jẹ́ẹhị lụmẹ kaka ba?

14. Ányị ọ tị́ chịla nyọka lahị ụka kahị kụ irya jaabwọ ká iJihova jẹ́ẹhị kaka ba?

¹⁴ Kori kahị me irya nya abwọlẹ ká iJihova jẹ́ẹhị kaka ba, áhị ka chị uko juwa kụ irya nyori ọ kaa yẹ abyị-abyị nyahị ka. Ịyẹ tị́ du? Kpịtịya nyori ọ kaa kpahị juhi yẹẹyẹẹ. Ọ yẹhị wuu lala angị ju apyobwuna ụ-ụgbẹyị ọdatị-datị. Ọ jẹ́ ang ịlẹ kị họ ọ-ọhịhị nyahị dudu kahị ri ọngịnyị ụma ọlẹ kahị ri. Ẹlẹwẹ kpụ́ụhị ẹjẹ yẹẹyẹẹ! Ahị me irya nyori ahị la ụbwọọhị ẹnẹnẹhẹ ka. Ụka myị́ ụka ẹ-ẹpwụ nya ahyẹẹnụ ọnyị myị́ ọnyị, iJihova kaa ji oye nyahị bala ọ-tịtọ nyọka dahị ụbwọ.​—2 Ego. 16:9

15. Ányị owuleji bwula igu à tị́ mẹjẹ nyori iJihova la ẹla ọjẹ́jẹ?

¹⁵ Uhi nya igu ọ-chị ju ọngịnyị ri ang-ẹga ọtụka-ọtụka. Angịlẹ kị ji ekpeleji nya ọngịrị nya Olegu Onyobyi kaa kpa ang-ẹga ọwẹ họ ká aligu ka pịrị awụlẹ ha lee ọ-họ ká angịnyị ka họ ang ọlẹ kị jẹ́ nyị tịpyọ. Ma, ang-ẹga ọwẹ á la ọngịrị u-uhye nyahị ka. Ahị jẹ́  nyori, kori ká aluji nyahị á nwụhị nwụ wẹwẹ, iJihova ka ya ọhịhị hahị myịmyị. (Ọwụ. 2:10) Ahị jẹ́ nyori ịngịngịhyẹ ọlẹ kị họ á ka jẹ́-ẹ wuhi kpa la ọ-gbịgba ha iJihova kaka. (Rom. 8:35-39) IJihova mẹjẹ nyori ọ jẹ́ ẹla yẹẹyẹẹ bwula ọ-ya ẹhị ọrịrịị-rịrị nya owuleji bwula igu hahị! Bwulọọ, ọ nu Olegu Onyobyi ang-ẹga ọtụka-ọtụka nyamwụ ọlẹ kọ ri uhi nya igu o-chi juhi. Bwulọọ ịnyịnyị, ọ ya ang-ẹga nya ugbodu ojuju ọlẹ kọ la ọngịrị yẹẹyẹẹ hahị chajị kahị ka godayị giri-giri họọ.

16. Ịtọ ẹla iyina a tị́ baba nyọka tịlọng? Ányị ọwẹwẹ nyaa à tị́ ka dang ụbwọ nyọka jẹ́ jaabwọ ká dahịhile iJihova kaka ba?

¹⁶ Kori ká aluji nya iJihova á chanya nyọka nwụng, à ka dahịhile nyori ọ ka wulung eji bwula igu? Ányị a tị́ ka bwụ jẹ́ kori ká ka jwọọ họ myị́? Ụgbẹyị ọhẹ ri ọ-ka tịlọng wo, ‘Eje ichiche-ichiche ịlẹ kam kaa chị ẹnụ myị́ ẹnụ kaa mẹjẹ nyori m̀ dahịhile iJihova?’ (Luk. 16:10) Ịtọ ẹla ọkịla ri, ‘M̀ kaa kpa ụka bala okpoko nyam họ ụkụrwọ ụ-ụgbẹyị ọlẹ kọ mẹjẹ nyori m̀ dahịhile ehe ọchịchị nya iJihova nyọka họ ịbaba nyam ham kori kam hu Ịpyị-Adịrahụ nyamwụ kụ ịlahị?’ (Mat. 6:31-33) Kori ká ọwẹwẹ nya ịtọ ẹla ịwẹ á ri ee, aalẹ, à mẹjẹ nyori à dahịhile iJihova, à tị nwụlanọ gbe ọmayẹ ọnyị myị́ ọnyị kọ ka warị ị-ịlahị.​—Etu 3:5, 6.

17. (a) Ányị owuleji bwula igu à tị́ mẹjẹ nyori iJihova kaa ju ugbodu? (b) Ányị ahị tị́ ka bwu mẹjẹ nyori ugbodu ojuju nya iJihova myịhị lẹhị?

¹⁷ IJihova hu ahyẹẹnụ bala ụka ọlẹ kọ ka ta odehe onyobyi ọlẹ ayịreji nọ lẹ. (Mat. 24:36) Ọ́ chọọ kpákpakpa nyọka tọọ ayịreji ene nya ụka ọwẹ ka. Ọ charịnya nyọka wule egu eji, ọ tị ju ugbodu ịnyịnyị. (Job. 14:14, 15) Ọ wẹẹ dahị gbe ụka ọlẹ kọ pwoku nyọka wulaa eji bwula igu. (Jọn. 5:28) Ahị la ang odudu ká ugbodu ojuju nya iJihova ka myịhị lẹhị. Kụ irya wẹẹ: Chajị nyọlẹ ká iJihova ju ugbodu, angịnyị lụmẹ-lụmẹ, tụ́ụhị ahị ayịdang, la ụka nyọka “jẹ́-ẹ yẹ irya da.” (2 Pit. 3:9) IJihova tịtọ ká angịnyị lụmẹ-lụmẹ ka la iwe nya ọhịhị ọmyịmyị-ka. Lẹ, ahị mẹjẹ nyori ugbodu ojuju nyamwụ myịhị lẹhị mẹ. Ụ-ụgbẹyị oyina tị́? Bwula ọ-maga nyịlẹhị-ịlẹhị nyọka yẹ “angịlẹ kị chịla-chịla nyọka la ọhịhị ọmyịmyị-ka” bala ọ-daa ụbwọ kị ka la ọháha ẹ-ẹga nya iJihova bala ọ-gbịgba họọ. (Ụkụr. 13:48, NWT) Ọọwa lẹ, ịwa ịnyịnyị à ka ye apyobwuna bwu ugbodu ojuju nya iJihova lala ahị lẹlẹ.

18. Ịyẹ tị́ du kahị ka ju ugbodu bala angịkịla?

 ¹⁸ IJihova ka ju ugbodu godayị gbe ocheju nya ẹka ụnọ ene kọ ka yẹhị rịrị kahị ka la kpẹẹkpẹẹ. Gbee ka pwụ ụka ọwẹ, iJihova nwụlanọ nyọka hịnyọhi ịhọbịrị nyahị hahị. Lẹ, ahị ka ba ọgụ-ẹpẹtẹ nyamwụ jẹ bwula ọ-ya irya nyahị nọ ẹ-ẹga nya abwẹla ịnyịịla nya angịkịla bala o-ju ugbodu balaa. Kụ ẹhị yẹ ẹla ọ-chụ pwokwita nya ọọnahị ọlẹ ká ọrụmwụ dọmwụ nyọka jụ ẹdụrụ nya uko ọchịchị kpoye-kpoye bala o-hwabwọ la ọ-ka ọjịra-jịra wẹẹ. Ọ yẹkẹẹ, “Ẹlẹwẹ jụm lụmẹ. Ọhịhị nyahị yẹda kpịraka, áhị tị jẹ́ họ ang ọlẹ ká ugbiyegu nyahị la i-irya nyọka họ kaka.” Ọ lịnyị odu lẹ, ahụ nyamwụ ọ-la ọháha ọwẹ ju ugbodu bala ọrụmwụ. Ọ kpụnịrọ iJihova, abwọ-ọ́ tị chọọ pyẹpyẹ ka. Lala iJihova, ọ ya irya nyamwụ nọ u-uhye nya ang ịnyịịla nya ọrụmwụ. O yẹkẹẹ, “Ọrụm la abwụma ịnyịịla-ịnyịịla, ọ tị wẹẹ maga nyịlẹhị-ịlẹhị nyọka la ogogo dụmwọ-dụmwọ.” Ọ baba nyịlẹhị-ịlẹhị kahị ka ju ugbodu ta alugbiyegu bala alọjịra-jịra nyahị ịlẹ kị wẹẹ maga nyọka kụrụ akama ọhẹ lee ọkịla!

19. Ẹlịyẹ ahị tị́ ka cheje nyọka họ?

¹⁹ IJisọsị bala alegu-ẹrụ chị ọkẹkẹnị nyọlẹ ká Ohe Oluhye họ odehe bwaa. Ma, kụ irya jaabwọ kị ka chị ọkẹkẹnị kaka ba ụka ká odehe ka myị̀ la angịnyị ịkpẹẹkpẹẹ ịlẹ ká iJihova há, kị tị kaa gbịgba họọ wẹẹ. Kụ irya jaabwọ ọlẹ ká angịlẹ ká Ohe Oluhye chụ bwu odehe kaka kpeji ta ịKịrayịsị ka chị ọkẹkẹnị kaka ba ụka kị yẹ jaabwọ ká angịnyị ehe wẹẹ ye apyobwuna bwu ụkụrwọ nyaa wẹẹ. (Ọwụ. 4:4, 9-11; 5:9, 10) Yẹ ịlọng ká juwa hịhị ụka ká egbejida nya ọkẹkẹnị ka ku ọmwakpa nya egbejida nya ajụjụ, ká ẹdụrụ, ang ọjụjụ, bala igu á ka ji kaka wẹẹ. (Ọwụ. 21:4) Gbee ka pwụ ụka ọwẹ, cheje nyọka gbịla Adang ọlẹ kọ la ọháha, jẹ́ ẹla, bala ọ-kaa ju ugbodu. Kori ka họ ịnyị, à ka kịnyaa la ọ-chị ọkẹkẹnị ẹ-ẹpwụ nya ọmayẹ ọnyị myị́ ọnyị kọ wẹ chịng ọgụ. (Jem. 1:2-4) Ahị ji iJihova obe lụmẹ nyọlẹ kọ chịhị ehe nyori “owuleji bwula igu . . . juwa”!​—Ụkụr. 24:15.