1. Ẹlịyẹ iJisọsị à tị́ ya u-uhye nya ang-ụdụ ilepwoohe?

A-ANG ụdụ wuu ị jẹ́-ẹ yẹ lẹhị ka. Ẹlịlẹhị ri, ang-ụdụ ịlẹ kị ju apyobwuna gụ wuu lẹ, ọngịnyị ehe á jẹ́-ẹ yaa lẹhị ka. Ụka nya ang ọmẹjẹ oluhye nya ọgbọdọ, iJisọsị ya ẹla u-uhye nya ang-ụdụ ilepwoohe ịlẹ kị ju apyobwuna yẹẹyẹẹ gụ okpoko. Ọ myị́myị́ yẹkẹẹ: “Ẹga myị́ ẹga ọlẹ ká ụdụ nya ọngịnyị á ji lẹ, ụ-ụwa, irya nya ọkịlẹtụ nyamwụ, ọọwa ayịdang wuu a kaa ji ịnyịnyị lẹlẹ.” (Mat. 6:19-21) Kori ká ang á juhi apyobwuna, ahị ka maga nyọka la ang ọọwa. Ahị ka jẹ́-ẹ nwụla ang-ụdụ nyahị “nọ kele ka epwoohe” bwula ọ-la ẹnyị ọnyịịla ẹ-ẹga nya Ohe Oluhye. IJisọsị ya nyori ọngọngọhẹ nyị́ ka jẹ́-ẹ ta ang-ụdụ ịlịnyị ayịreji lee o-gaa yoyi myị́ ka.

2. (a) Jaabwọ ká ụpwụ nya 2 Ala ịKọrịntị 4:17, 18 mẹjẹ, ẹ-ẹga nya ịyẹ ịPọlụ à tị́ ya ahị nyị ya irya nyahị nọ? (b) Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

² Ọlẹrụ ịPọlụ juhi ọhụ nyori “ẹ-ẹga nya ang . . . ịlẹ ká ọngịnyị ehe á ka jẹ́-ẹ yẹ ẹ-ẹhị kaka, irya [nyahị nya-à ka] ji . . . lẹ.” (Wa 2 Ala ịKọrịntị 4:17, 18.) Ahị ọwawa ịlẹ kahị wẹẹ ka ye odehe onyeewe wuu juwa ẹ-ẹpwụ nya ang-ụdụ ịlẹ kahị jẹ́ yẹ ka ịnyịnyị. Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya ang-ụdụ ine ịhyẹ ịlẹ kahị jẹ́-ẹ yẹ lẹhị ka, kahị tị kaa ye apyobwuna bwu ẹga nyaa lẹẹlẹẹ. Ị ri igu oriri bala iJihova, āhị nya abwọ ọrịrị, ụbwọ ọdada nya olegu ịgọgọ nya Ohe Oluhye, bala ụbwọ ọdada ọlẹ kahị kaa ye bwu epwoohe ẹ-ẹpwụ nya ẹrụ ọnyịịla ọ-kpa pyẹ nyahị. Ahị ka myịmyị-ị̀ kụ ẹhị yẹ abwọlẹ kahị ka jẹ́-ẹ mẹjẹ nyori ang-ụdụ ịwẹ nyị myịhị lẹhị.

3. Ịyẹ à tị́ ri ang-ụdụ ọlẹ kahị jẹ́-ẹ yẹ lẹhị ka, kọ tị gụgụ wuu? Ịyẹ à tị́ du kọ chịkpẹẹ?

³ Ang ụdụ ọlẹ kahị jẹ́-ẹ yẹ lẹhị ka, kọ tị gụgụ wuu à ri igu oriri bala iJihova lẹ. (Eje. 25:14) Ọ chịkpẹẹ ká Ohe Oluhye kọ la ịgọgọ, ka ri igu bala angịnyị ehe ịlẹ kị la kpẹẹkpẹẹ ka? Ọ chịkpẹẹ, chajị iya ọkịlaakịla nya iJisọsị “tụ ibyi nya ọhọbịrị ọhọhọ nya alodehe” lẹ. (Jọn. 1:29) Ene ká iJisọsị dọmwụ wẹẹ gbu, iJihova jẹ́ nyori ọ ka godayị giri-giri pwụ igu kpụ̀ ọ ka jẹ́-ẹ chị angịnyị ehe da. Ịnyị à du kọ chịkpẹẹ ha Ohe Oluhye nyọka ri igu bala angịnyị ehe ịlẹ kị hịhị ene ká ịKịrayịsị gbu lẹ.—Rom. 3:25.

4. Gu ẹnyị nya angịhyẹ ịlẹ kị ri aligu nya Ohe Oluhye ene nya ụka ọlẹ kị ma iJisọsị wẹẹ.

⁴ Ahị kụ ẹhị yẹ ẹla nya angịnyị ịlẹ kị hịhị ene nya ịKịrayịsị kị tị ri aligu nya Ohe Oluhye wẹẹ. Ebiraham ri ọlẹng ọlẹ kọ la ọmyịmyị ọnyọọngịrị. Ụka ká Ebiraham gbu kpá gụ ẹka 1,000, iJihova wụrọọ nya “oligu nyam.” (Ayị. 41:8) Lẹ, igu ogbugbu á dọmwụ ka jẹ́-ẹ chị iJihova ebwo hi aligu ilikẹjẹ nyamwụ ka. I-irya nya iJihova lẹ, Ebiraham juwa hịhị wẹẹ. (Luk. 20:37, 38) Ọngọkịla ri iJobu. Ụka ká alegu-ẹrụ tụguru e-epwoohe, iJihova ya ẹla la ahị ọdahile u-uhye nya iJobu. IJihova ya nyori nyị “la kpẹẹkpẹẹ bala o-ri ọngịnyị ọnyịịla.” Ọ myịmyị yẹkẹẹ, “Ọọ ju ihi nyam bala ocheji ba ang onyobyi ọhọhọ.” (Job. 1:6-8) Ányị iJihova à tị́ yẹ ịDanẹlụ ọngọlẹ kọ họ ụkụrwọ họọ la ọmyịmyị lala ẹka iwo ineku, ọ-ọpyị ọlẹ ká angịnyị kaa gbịgba ha iJihova ka? Ụka ịta gbẹgbịlẹ, alegu-ẹrụ ya ahị ọdahile ha okwirichi ọwẹ nyori nyị “há Ohe Oluhye lụmẹ.” (Dan. 9:23; 10:11, 19) Ahị jẹ́ myị̀myị̀ nyori iJihova tịtọ nyọka wule aligu nyamwụ ịlẹ kị gbu eji bwula igu ịlẹhị.—Job. 14:15.

5. Ịyẹ ọngịnyị à tị́ baba nyọka họ kọ ka ri igu bala iJihova?

⁵ Angịnyị ehe ịkpẹẹkpẹẹ-ka ịmanyị à tị ri aligu nya iJihova alẹ? Uku-uku nya angịnyị ịnyị. Ahị jẹ́ ịnyị chajị iru nya alẹng, anyang, bala anjwo ichiche chị odehe ọnụ wẹẹ mẹjẹ bwula abwẹla nyaa nyori ị ri aligu nya iJihova ịnyịlẹhị. IJihova kaa “ri igu ta angị họ ang ọnyịịla.” (Etu 3:32) Igu oriri ọwẹ chịkpẹẹ myị́ chajị nya iya ọkịlaakịla nya iJisọsị. Chajị nya iya ọkịlaakịla ọọwa, ahị ka jẹ́-ẹ hu ịlọhị ju Ohe Oluhye ụ-ụbwọ bala o-hu enyi Ohe lẹ. Ụka kahị hu ọgụ-ẹpẹtẹ ịnyịịla ịwẹ lẹ aalẹ, ahị yẹjula uku-uku nya angịnyị nya ịKịrayịsị ịlẹ kị hu ịlaa ju Ohe Oluhye ụ-ụbwọ, kị tị “ri igu ta” ọngọlẹ kọ gụgụ wuu e-epwoohe bala odehe lẹ!

6. Ányị ahị tị́ ka bwu mẹjẹ nyori igu oriri bala iJihova myịhị lẹhị?

⁶ Ányị ahị tị́ ka bwu mẹjẹ nyori igu oriri bala iJihova myịhị lẹhị? Jaabwọ ká Ebiraham bala iJobu godayị giri-giri ẹ-ẹga nya iJihova gụ ẹka ohu, ahị ịnyịnyị ka godayị giri-giri ẹ-ẹga nya iJihova jaabwọ myị́ abwọ kahị gbịgba ha iJihova kaka ba ám̀ ẹ-ẹpwụ nya odehe nya Olegu Onyobyi ọlẹ lẹ. Lala ịDanẹlụ, igu oriri bala iJihova ka juhi apyobwuna gụ ọhịhị nyịlọhị. (Dan. 6:7, 10, 16, 22) Bwula ụbwọ ọdada nya iJihova, ahị ka jẹ́-ẹ bọhụ ẹ-ẹpwụ nya ọmayẹ ọnyị myị́ ọnyị ọlẹ kahị chịpwụrụ bwu chajị kahị ka jẹ́-ẹ kịnyaa ẹ-ẹpwụ nya igu oriri balọọ.—Filip. 4:13.

7. (a) Jaabwọ ká ụpwụ nya Etu 15:8 mẹjẹ, ányị abwọ ọrịrị nyahị à tị́ kaa la iJihova? (b) Ányị iJihova à tị́ kaa wẹ abwọ ọrịrị nyahị?

⁷ Ang-ụdụ ọkịla ọlẹ kahị jẹ́-ẹ yẹ lẹhị ka ri abwọ ọrịrị. Ọ kaa kpụ aligu ịpyọ nyọka ya ẹla olirya bala ẹla ọlẹpwụ nya ọkịlẹtụ nyaa ju awụlẹ. Ọ lịnyị ẹ-ẹga nya igu oriri nyahị bala iJihova? Ee! IJihova kaa ya ẹla tahị bwula Ụpwụ Ịgọgọ. Ẹ-ẹpwụ nyamwụ, ọ ya ẹla olirya nyamwụ jehi. Ahị kaa ya ẹla ta Ohe ẹ-ẹpwụ nya abwọ ọrịrị, bala o-ya ẹla olirya bala ọkịlẹtụ nyahị joo. Ọ kaa kpụ iJihova ịpyọ nyọka ke  ụrụ wo abwọ ọrịrị nyahị. (Wa Etu 15:8.) Chajị nyọlẹ ká iJihova ri Oligu ọlẹ kọ la ọháha, ọ́ kaa wo abwọ ọrịrị nyahị kem ka, ma ọ kaa wẹẹhị ịnyịnyị. Ụka ọhẹ, ọ kaa wẹẹhị ahyaahị. Ụka ọkịla, ahị ka baba nyọka juwa raabwọ u-uhye nya ẹla ọọwa lụka ọtata. Jaabwọ myị́ abwọ kọ la, ahị ka jẹ́-ẹ dahịhile nyori ọwẹwẹ nya abwọ ọrịrị nyahị ka wẹ lụka bala ụgbẹyị ọlẹ kọ pwoku. Ụka ọhẹ, a-abwọlẹ kahị yahị guru, Ohe à kaa wẹẹhị abwọ ọrịrị nyahị ka. Ọ-chụ pwokwita, ọkọkọ nyọka tụ akama nyahị ọọwa rụ, ọ ka ya ẹla ọjẹ́jẹ bala ọngịrị hahị nyọka “ju ugbodu” ẹ-ẹpwụ nyamwụ myị́.—1 Kọr. 10:13.

8. Ányị ahị tị́ ka bwu mẹjẹ nyori āhị nya abwọ ọrịrị myịhị lẹhị?

⁸ Ányị ahị tị́ ka bwu mẹjẹ nyori āhị ọtụka nya abwọ ọrịrị ọwẹ nyị myịhị lẹhị? Ahị ka mọọ jẹ bwula ọ-ka “raabwọ . . . ụka myị́ ụka wuu” jaabwọ ká iJihova byihi ahị nyị họ. (1 Tẹs. 5:17) IJihova á kaa byihi nyị raabwọ la agbụrụ ka. Ọkọkọ nyọọwa, ọ ya iwe da hahị nyọka họ ang ọlẹ kọ háahị bala o-juhi ọhụ nyị “raabwọ . . . ụka myị́ ụka.” (Rom. 12:12) Lẹ, ahị ka jẹ́-ẹ mẹjẹ nyori abwọ ọrịrị myịhị lẹhi bwula ọ-raabwọ ụka lụmẹ-lụmẹ ẹ-ẹpwụ nya ahyẹẹnụ. Áhị ka deeri nyọka ji iJihova obe bala o-gwogbo họọ ẹ-ẹpwụ nya abwọ ọrịrị nyahị ka.—Eje. 145:2, 3.

9. Ányị abwọ ọrịrị à tị́ la ọọnahị ọhẹ? Ányị ọ tị́ lang ahụ?

⁹ Jaabwọ kahị wẹẹ gbịgba ha iJihova bala ọ-yẹ jaabwọ kọ kaa wẹ abwọ ọrịrị nyahị, ịnyịnyị āhị nya abwọ ọrịrị à ka myịhị lẹhị gụ ọwọwa lẹ. Ọ-chụ pwokwita ri ọọnahị Chris kọ kaa ye ịlahị nya ụgbẹyị lala ẹka 47 kẹkpẹ lẹ. Ọ yẹkẹẹ, “Ọ kaa kpụm ịpyọ nyọka chahị lụtụrụ raabwọ ha iJihova pyịyọọ. O ri ang ọ-kpụ olegu nyii nyọka ya ẹla bala iJihova ụka ká ẹnụ nya ụtụrụ ọwẹ wẹẹ hụ myịrị-myịrị chị ụhị kụrụ ang myị́ ang wuu! Ọọwa kaa gum gbịla nyọka joo obe nya āhị ịlẹ kọ ya hahị wuu, tụ́ āhị nya abwọ ọrịrị. Ịnyịnyị, ụka kam raabwọ la ocheju nya ahyẹẹnụ, m̀ jẹ́-ẹ nune la ọkịlẹtụ ocheri-cheri.”

10. Ịyẹ tị́ du ká āhị nya olegu ịgọgọ ka myịhị lẹhị?

¹⁰ Āhị nya olegu ịgọgọ ri ang-āhị ọkịla ọlẹ kọ  ka myịhị lẹhị. IJisọsị juhi ọhụ nyori ahị nyị juwa raabwọ bịlẹ olegu ịgọgọ. (Luk. 11:9, 13) Bwula olegu ịgọgọ, iJihova kaa ya “ọngịrị . . . ọtụka” hahị. (2 Kọr. 4:7; Ụkụr. 1:8) Bwula ụbwọ ọdada nya olegu ịgọgọ, ahị ka jẹ́-ẹ bọhụ ẹ-ẹpwụ nya ọmayẹ ọnyị myị́ ọnyị ọlẹ kahị juwa chịpwụrụ bwu.

11. Ụgbẹyị oyina olegu ịgọgọ à tị́ ka jẹ́-ẹ dahị ụbwọ?

¹¹ Olegu ịgọgọ ka jẹ́-ẹ dahị ụbwọ nyọka họ ụkụrwọ ọlẹ ká Ohe Oluhye ya hahị. Olegu ịgọgọ ka jẹ́-ẹ dahị ụbwọ nyọka jẹ́-ẹ họ ụkụrwọ ọlẹ kahị jẹ́-ẹ họ ene-ene gụ ọwọwa. Ọ kaa dahị ụbwọ họ ụkụrwọ ọlẹ kahị la ọọjịra-jịra. Ang myị́ ang kahị họ ẹ-ẹpwụ nya ịgba ọgbagba nya Ohe Oluhye, á bwula ọngịrị nyahị ka, ma o-bwula ụbwọ ọdada nya olegu ịgọgọ nya Ohe Oluhye ịnyị.

12. Jaabwọ ká ụpwụ nya Eje Ọnyịịla 139:23, 24 mẹjẹ, ịyẹ ahị tị́ ka raabwọ ká olegu ịgọgọ ka dahị ụbwọ họ?

¹² Ụgbẹyị ọkịla ọlẹ kahị ka mẹjẹ nyori āhị nya olegu ịgọgọ myịhị lẹhị ri ọ-ka raabwọ kọ ka dahị ụbwọ jẹ́ kori kahị la irya ọtịpyọ lee kori ká imyi nya ang ọtịpyọ ọhẹ á juwa nwụhị. (Wa Eje Ọnyịịla 139:23, 24.) Kori kahị raabwọ ọlịnyị, iJihova ka jẹ́-ẹ dahị ụbwọ bwula olegu ịgọgọ nyamwụ nyọka jẹ́ irya ọtịpyọ lee imyi nya ang ọtịpyọ ọnyị kọ juwa nwụhị. Kori kahị tị jẹ́ kahị la akama ọlịịwẹ, ahị ka raabwọ ká olegu ịgọgọ nya Ohe ka ya ọngịrị hahị nyọka kụrụ irya ọtịpyọ ọlịnyị. Kori kahị họ ịnyị, ọ ka mẹjẹ nyori ahị cheje nyọka cheji ba hi ịngịngịhyẹ ọlẹ kọ ka du ká iJihova ka hwabwọ la ọ-dahị ụbwọ la olegu ịgọgọ nyamwụ.—Efe. 4:30.

13. Ányị ahị tị́ ka họ ká āhị nya olegu ịgọgọ ka myịhị lẹhị gụ ọwọwa?

¹³ Āhị nya olegu ịgọgọ ka myịhị lẹhị gụ ọwọwa kori kahị kụ irya u-uhye nya ang ọlẹ kọ wẹẹ họ lụka nyahị ọlẹ. Ene ká iJisọsị rụ ka epwoohe, o byi angịjụgbẹyị nyamwụ yẹkẹẹ: “Anụ ka ye ọngịrị nya Ohe Oluhye ụka ká Olegu Ịgọgọ á chị kụrụụnụ kpá. Ọọwa lẹ, anụ ka ri alibeenu nyam . . . ju kele ka ọbaba nya odehe ọlẹ wuu lẹlẹ.” (Ụkụr. 1:8) Ẹlẹwẹ wẹẹ họ jịra kpẹẹkpẹẹ alẹ. Bwula ụbwọ ọdada nya olegu ịgọgọ, angịnyị uku ineku bẹhya yẹjula awụlẹ bwu ụpa nya odehe wuu, wẹẹ gbịgba ha iJihova lẹẹlẹẹ. Ịnyịnyị, angịnyị nya Ohe Oluhye kaa yẹjula awụlẹ ẹ-ẹpwụ nya  okpunyi, chajị olegu nya Ohe Oluhye kaa dahị ụbwọ la abwụma ịnyịịla lala ọháha, ọkẹkẹnị, okpunyi, ugbodu ojuju, ọnahị, ọngịnyị ọnyịịla oriri, ọmyịmyị, ọdụmwọ, ang ọ-họ ba o-oyi. Abwụma ịwẹ à ri “ugbe nya Olegu Ịgọgọ” lẹ. (Gal. 5:22, 23) Olegu ịgọgọ ri āhị ọnyịịla ịnyịlẹhị!

14. Ụbwọ ọdada oyina ahị tị́ kaa ye ụka nya ẹrụ ọnyịịla ọ-kpa pyẹ, kahị tị jẹ́-ẹ yẹ lẹhị ka?

¹⁴ Ahị la āhị ọtụka-ọtụka nyọka ‘họ ụkụrwọ lawụlẹ’ bala iJihova bala ogu nyamwụ olepwoohe. (2 Kọr. 6:1) Ahị kaa họ ịnyị ụka myị́ ụka kahị kpehe ka họ ká angịkịla ka ri angịjụgbẹyị. ỊPọlụ ya nyori ọwa bala angịkịla ịlẹ kị kaa họ ụkụrwọ ọwẹ nyị ri “alụkụrwọ ị-da Ohe Oluhye ụbwọ ẹ-ẹpwụ nya ụkụrwọ nyamwụ.” (1 Kọr. 3:9) Ụka myị́ ụka kahị kpa ẹrụ ọnyịịla pyẹ, ahị ri angị ba ụkụrwọ ba họ bala iJisọsị ịnyịnyị. Kpịtịya nyori ụka ká iJisọsị da angịjụgbẹyị nyamwụ ehile nyị ‘họ ká angịnyị nyị ri angịjụgbẹyị,’ ọ byaa yẹkẹẹ, “M ka juwa tanụ.” (Mat. 28:19, 20) Alegu-ẹrụ tị bẹẹ? O ri ahị ọwawa ọtụka-ọtụka nyọlẹ ká alegu-ẹrụ wẹẹ kpahị ụgbẹyị jaabwọ kahị wẹẹ kpa “ẹrụ ọnyịịla o-gbe oyi myị́ oyi . . . kaka ya pyẹ je angịlẹ kị kụ odehe ọlẹ.”—Ọwụ. 14:6.

15. Oja oyina bwu ịBayịbụụ à tị́ mẹ ụkụrwọ ọlẹ ká iJihova kaa họ ẹ-ẹrụ ọnyịịla ọ-kpa pyẹ jẹ?

¹⁵ Ịyẹ ahị tị́ jẹ́-ẹ họ bwula ụbwọ ọdada ọlẹ kahị kaa ye bwu epwoohe? Jaabwọ kahị wẹẹ kpa ajẹ nya Ịpyị-Adịrahụ ọlẹ hụ, ịhyẹ nyaa rị chị ka ẹpwụ nya ọkịlẹtụ ọnyịịla kpụ̀ ị nwà. (Mat. 13:18, 23) Oowo à tị́ ju ọmwụ du ká ajẹ nya ẹlịlẹhị ịwẹ kaa bwu bala ọ-nwụ́ egbe ịnyịịla? IJisọsị ya nyori ọngọngọhẹ nyị́ ka jẹ́-ẹ ri ọngọjụgbẹyị nyọwa ka, kẹnẹ-kẹnẹ kori ká “Adịda . . . á kpa ọngịrị nyamwụ mwụ ọngọọwa” mẹ ịnyị. (Jọn. 6:44) Ọ-chụ pwokwita nya ọngịnyị ọlịnyị juwa ẹ-ẹpwụ nya ịBayịbụụ. A kpịtịya nya ụka ọhẹ ọlẹ ká ịPọlụ ya ẹrụ ọnyịịla ju anyang ịhyẹ odehe nya epweji nya iFilipayị? U-uhye nya ọnyang ọhẹ bwu ẹpwụ nyaa ọlẹ ká ẹnyị nyamwụ ri iLidiya, ịBayịbụụ yẹkẹẹ: IJihova “wụrụ ọkịlẹtụ nya iLidiya ọọwa lẹ, o juwa ke ụrụ la ẹla nya Ohe Oluhye oyaya nya ịPọlụ yẹẹyẹẹ lẹlẹ.” (Ụkụr. 16:13-15) Lala iLidiya, iJihova gbile uku-uku nya angịnyị ba ịlọmwụ.

16. Oowo à tị́ ka la ogbo kori kahị la ocheju ọnyịịla ẹ-ẹrụ ọnyịịla ọ-kpa pyẹ?

¹⁶ Oowo à tị́ chịla nyọka la ogbo kori ká ẹrụ ọnyịịla ọ-kpa pyẹ nyahị á la ocheju ọnyịịla? ỊPọlụ wẹ ịtọ-ẹla ọwẹ ụka kọ da ụpwụ u-uhye nya ọjịra-jịra ọla ịKọrịntị yẹkẹẹ: “M ya ugbe nya ẹrụ ọnyịịla tọ, Apolosi kpa enyi jwoo. Ma Ohe Oluhye ayịdang, a tị ri ọngọ wẹẹ họ ká ẹla ọọwa juwa nwa kịlahị-ịlahị lẹ. Chajị nya ọọwa lẹ, ọngọlẹ kị du ẹrụ warị kaka ya ugbe nya ẹla ọọwa tọ lẹ, ó ri ịngịngịhyẹ ka. Ọngọlẹ kọ tị warị ka da enyi ju ugbe ọọwa, á ri ịngịngịhyẹ ka ịnyịnyị. Kẹnẹ-kẹnẹ, Ohe Oluhye ayịdang ọlẹ kọ wẹẹ kpa ẹla ọọwa nwa ụbwọọmwụ a ri ọtọnyị lọnyị wuu lẹlẹ.” (1 Kọr. 3:6, 7) Lala ịPọlụ, ahị ka yogbo ha iJihova pyii kori kahị la ocheju ọnyịịla ọhẹ ẹ-ẹrụ ọnyịịla ọ-kpa pyẹ.

17. Ányị ahị tị́ ka bwu mẹjẹ nyori ọ myịhị lẹhị nyọlẹ kahị la iwe nyọka ‘họ ụkụrwọ lawụlẹ’ bala Ohe Oluhye, ịKịrayịsị, bala alegu-ẹrụ?

¹⁷ Ányị ahị tị́ ka bwu mẹjẹ nyori ọ myịhị lẹhị nyọlẹ kahị la iwe nyọka họ ụkụrwọ bala Ohe Oluhye, iJisọsị, bala alegu-ẹrụ? Ahị ka jẹ́-ẹ họ ịnyị bwula ọ-mwahị nya iwe nyọka ya ẹrụ ọnyịịla ju angịkịla. Agbẹyị lụmẹ-lụmẹ juwa lala ọ-kpa ẹrụ ọnyịịla pyẹ “ẹ-ẹpwụ nya uche bala o-juwa . . . tụ ẹpwa-ẹpwa da.” (Ụkụr. 20:20) Angịnyị lụmẹ-lụmẹ kaa ye ọkẹkẹnị ẹ-ẹpwụ nya ẹrụ ọnyịịla oyaya lụka ọ-kpahị ju ka ịnyịnyị. Ụka kị tọ ọngịnyị ọlẹ kị jẹ́ ẹnẹhẹ lẹka, ị  kaa dọnụ chọọ la ụmwẹhụ ọ-ọnụ bala ọ-maga nyọka joja balọọ. Kori ká ọngọọwa á tịtọ nyọka ya ẹla, ị kaa kpa ijẹẹhị dọmwụ nya ẹrụ ọnyịịla nya Ịpyị-Adịrahụ oyaya balọọ.

18-19. (a) Ányị ahị tị́ kaa bwu kpa enyi ju ajẹ nya ẹlịlẹhị? (b) Joja ọhẹ ọlẹ kọ mẹjẹ jaabwọ ká iJihova bwu da ọngọhẹ kọ kaa jẹ́ ịBayịbụụ ụbwọ wẹẹ.

¹⁸ Nyọlẹ kahị ri “alụkụrwọ ị-da Ohe Oluhye ụbwọ ẹ-ẹpwụ nya ụkụrwọ nyamwụ” wẹẹ, áhị ka ya ajẹ hụ kem ka, ma ahị ka kpa enyi jwaa ịnyịnyị. Kori ká ọngịnyị á ke ụrụ, ahị ka maga nyọka mwẹẹkpẹ kaka ya ẹla bala ọngọọwa lee o-byi ọngọkịla nyị kele nyọka dọmwụ nya ịBayịbụụ ọjẹ́jẹ balọọ. Jaabwọ ká ịBayịbụụ ọjẹ́jẹ ọọwa wẹẹ nwà, ahị kaa chị ọkẹkẹnị ụka kahị yẹ jaabwọ ká iJihova wẹẹ họ ụkụrwọ u-uhye nya ọkịlẹtụ bala irya nya ọngọọwa.

¹⁹ Kụ ẹhị yẹ ọgụ-ẹpẹtẹ nya Raphalalani kọ ri ọngọ mwụ ịnwa ịị South Africa wẹẹ. Ẹla ọlẹ kọ wẹẹ jẹ́ bwu ịBayịbụụ kpọọ ịpyọ. Ọ tị la akama ọhẹ ụka ọlẹ kọ yẹ ẹla ọlẹ ká ụpwụ ịgọgọ ya u-uhye nya ẹla o-ya bala adịda igogo ịlẹ kị gbu. (Ehile. 18:10-12) Dụmwọ-dụmwọ lẹ, ọ ya ẹga da ká Ohe Oluhye ka nwọọ me lẹlẹ. Ọ ka nọ chẹẹ, ọ pẹhi ịnwa ọmwụmwụ nyamwụ, nanana nyori ọwa kem à ri ụkụrwọ ọlẹ kọ la kaa họ lẹ. Raphalalani, kọ gu ẹka 60 lẹẹlẹẹ yẹkẹẹ: “Ọ myịm lẹhị lụmẹ nyọlẹ ká Alibeenu nya iJihova dam ụbwọ a-agbẹyị ịdatị-datị, lala ọ-dam ụbwọ ye ụkụrwọ ọkịla. Ọgụgụ wuu, ọ myịm lẹhị nyọlẹ ká iJihova dam ụbwọ nyọka yẹ ọhịhị nyam da, du kam jẹ́ kpa ẹrụ ọnyịịla pyẹ lẹẹlẹẹ lala Olibeenu nyamwụ ọhẹ ọlẹ kọ hu enyi Ohe lẹ.”

20. À tị́ cheje nyọka họ ịyẹ?

²⁰ Ẹ-ẹpwụ nya ang ọjẹ́jẹ ọlẹ, ahị ya ẹla u-uhye nya ang ụdụ ine ịlẹ kahị jẹ́-ẹ yẹ ẹ-ẹhị ka. Ọlẹ kọ gụgụ wuu bwu ẹpwụ nyaa ri iwe nya iJihova ọ-ka ri oligu nyahị. Ọọwa du kahị ka jẹ́-ẹ ye apyobwuna bwu ang-ụdụ ịkịla ịlẹ kahị ka jẹ́-ẹ yẹ ka, lala abwọ ọrịrị, ụbwọ ọdada nya olegu ịgọgọ bala ụbwọ ọdada o-bwu epwoohe ẹ-ẹrụ ọnyịịla ọ-kpa pyẹ nyahị. Ahị cheje nyọka mẹjẹ nyori ang-ụdụ ịwẹ kahị jẹ́-ẹ yẹ lẹhị ka nyị myịhị lẹhị. Ahị hwabwọ la o-ji iJihova obe chajị nyọlẹ kọ ri Oligu ọnyịịla nyahị ka.