1. Ụ-ụgbẹyị oyina iJihova à tị́ lala ịnọnyị?

“ANỤ ya ká ịnọnyị onyeewe kà jẹ-ẹ̀ deeri hi ọnyị nyamwụ”? Ịtọ ọlẹ ká iJihova tọ ụka nya ọlọmwụ Ayịsaya à wẹ lẹ. O byi angịnyị nyamwụ yẹkẹẹ, “Ó-riri ká ịnịna-á ka jẹ-ẹ̀ deeri nya ọnyị nyamwụ wẹwẹ, am-ḿ ka deeri hiinu ka.” (Ayị. 49:15) Ọ́ kaa chụ ịlọmwụ ka me ịnịna ụka myị́ ụka ka. Ma, ọ họ ịnyị ẹ-ẹga ọlẹ. IJihova chụ abwọlẹ kọ kaa yẹ anchẹ nyamwụ kaka pwoku ọháha ọtụka ọlẹ ká ịnịna la ẹ-ẹga nya anyị nyaa chajị ọ tịtọ ká anchẹ nyamwụ ka jẹ́ nyori ị họ́ọ yẹẹyẹẹ. Irya ọlẹ ká ọọnahị ọhẹ ọlẹ ká ẹnyị nyamwụ ri Jasmin la, ịnịna lụmẹ-lụmẹ à la lẹ. O yẹkẹẹ, “Jaabwọ ká wẹẹ kpẹhị rịrị ọnyị nyang, à kaa wẹ ka la ọháha ọlẹ kọ ka juwa gboyi myị́ oyi lẹ.”

2. Ányị ọ tị́ kaa la iJihova ụka ká ọnchẹ nyamwụ ọhẹ á hwabwọ la ọgbịgba họọ?

² IJihova kaa jẹ́ ụka ká ọnchẹ nyamwụ ọhẹ á ba la ọ-ka ọjịra-jịra lee ọ-kpa ẹrụ ọnyịịla pyẹ. Ọ tị ka jwọọ yẹẹyẹẹ ụka kọ yẹ jaabwọ ká ụnụnụụnọ nya angịnyị nyamwụ wẹẹ gbile ẹta ẹkpẹ * ẹka ọnyị myị́ ọnyị.

3. Ịyẹ iJihova à tị́ tịtọ?

³ Iru nya aanahị ịlẹ kị gbile eta ẹkpẹ kaa tịrẹkpẹ wẹ ọjịra-jịra myịmyị wẹẹ, ahị tị kaa daa ọwụraba! IJihova tịtọ kị ka tịrẹkpẹ, ahị ịnyịnyị tị tịtọ kị ka tịrẹkpẹ. (1 Pit. 2:25) Ányị ahị tị́ ka bwu daa ụbwọ? Ene kahị ka wẹ ịtọ ẹla ọwẹ, ọ baba kahị ka jẹ́ ang odudu ká angịhyẹ kaa ba la ọ-wẹ ọjịra-jịra bala ọ-kpa ẹrụ ọnyịịla pyẹ.

4. Ịyẹ à tị́ họ tọ angịhyẹ ọọlajị nya ụkụrwọ nyaa?

⁴ Angịhyẹ hu ụkụrwọ nyaa nya ang ọhọhẹ ẹ-ẹpwụ nya ọhịhị  nyaa. Ọọnahị ọlẹng ọlẹ ká ẹnyị nyamwụ ri Hung * ụ-ụwa Asia myị ọnụ yẹkẹẹ: “M̀ kaa bịrị ụka bala ọngịrị nyam ju ụkụrwọ kaka kpoye. M̀ kaa kpa ịlọm hu ẹmwa nyori ụka kam la okpoko gụ olene lẹ, m ka jẹ́-ẹ họ ụkụrwọ ha iJihova yẹẹyẹẹ lẹ. Lẹ m̀ kaa bịrị ụka gụ olene ọ-ọlụkụrwọ. M̀ dọmwụ nyọka chị ọjịra-jịra da gụ ọwọwa gbee kam hwabwọ la ọ-kaka gbang-gbang. Ọ lala o-ri ị họ ang ilodehe ọlẹ la ụgbẹyị ọlẹ kị ka gbile angịnyị pyịnyẹng-pyịnyẹng rụ hi Ohe Oluhye.”

5. Ányị ọọnahị ọnyang ọhẹ à tị́ họ u-uhye nya akama ịlẹ kị chọọ ọgụ?

⁵ Aanahị alẹng bala anyang ịhyẹ la akama lụmẹ-lụmẹ ịlẹ kị kaa kpaa ọkịlẹtụ enyi. Anne bwu Britain ma anyị ịrụ. O yẹkẹẹ: “Ọnyị nyam ọhẹ ju ẹjẹẹ bwu ẹpwụ-ẹpwụ. Ọ ka nọ chẹẹ, ị gba ọnyị nyam ọnyang ọhẹ kpehe hi ọjịra-jịra, ene ká ọnyị nyam ọlẹng ọkịla lẹẹ la ẹdụrụ nya ịmachị. Ọkịlẹtụ kpụm enyi gbee kam hwabwọ la ọ-ka ọjịra-jịra bala okpehe nya ẹla Ohe. Ọ lịnyị gbee kam ri ọngọ gbile ẹta ẹkpẹ ẹ-ẹpwụ nya ụkụrwọ nya Ohe Oluhye.” Ẹla nya Anne bala ugbiyegu nyamwụ tụ́ angịkịla ịlẹ kị la akama ịlịịwẹ guhi ọ-ọkịlẹtụ!

6. Ányị ọ-kpa ẹla ọlụpwụ nya Ala iKolosi 3:13 họ ụkụrwọ ka, à tị ka du ká ọngịnyị ka gbile ẹta ẹkpẹ hi angịnyị nya iJihova myị́?

⁶ Wa Ala iKolosi 3:13. Aanahị ịhyẹ kaa wụ ẹjẹ u-uhye nya ẹla ọlẹ ká ọngọhẹ họ ẹ-ẹpwụ nya ọjịra-jịra. Ọlẹrụ ịPọlụ yẹ jẹ́ nyori “ẹla ọ-hi awụlẹ ọnụ” nyị ka ji ụka ọhẹ ẹ-ẹpwarịrị nya aanahị myị́. Ọ dọmwụ ka ri ọngọhẹ kọ họhị ẹla ọkịrọrọ myị́. Kori kahị dụmwọ-dụmwọ ka, ahị ka kpa ẹla nya ọngọọwa ẹ-ẹpwụ myị́. Ụka ká ọngịnyị á ju agbama, ọ ka du kọ ka tịrẹkpẹ hi angịnyị nya iJihova myị́. Kụ irya nya ẹla ọlẹ kọ họ tọ ọọnahị Pablo ịị South America wẹẹ. Ọngọhẹ me ọnọọkịla bọọ nyị họ ang ọtịpyọ, chajị nyọọwa, angịgbahị nya ọjịra-jịra yalibyi lọọ bwula o-ye ụkụrwọ ọlẹ kọ la ọọjịra-jịra hyoo. Ányị ọ tị họ? Pablo yẹkẹẹ: “M̀ ju agbama, lẹ m dọmwụ nyọka gbile ẹta ẹkpẹ hi ọjịra-jịra dụmwọ-dụmwọ lẹlẹ.”

7. Ịyẹ à tị́ ka họ tọ ọngịnyị ọlẹ ká olegu juwa lọọ eje myị́?

⁷ O ri ká ọngịnyị á họ ọhọbịrị ọtụka ọhẹ ụka ọkẹkpẹ, olegu ka la ọngọọwa eje gbee kọ ka me nyori ọwa nyị́ há iJihova kaka myị́. Kori kọ dọmwụ yẹda kpụ iJihova yọọ ahyẹẹrwẹrwa lẹ, ọ ka lọọ lala o-ri ọwa nyị́ há kpụ ọwa nyị ka ri ọngọhẹ lẹpwụ nya angịnyị nya Ohe Oluhye kaka. Ọ la ọọnahị ọlẹng ọlẹ kị kaa wụrụ Francisco ịwịịwẹ. O yẹkẹẹ: “Angịgbahị nya ọjịra-jịra nwụm rịrị u-uhye nyọlẹ kam họ ụya. Ụka nya ọgbanyẹ, m̀ kaa ka ọjịra-jịra ịnọ, ọkịlẹtụ tị kpụm enyi, lẹ m yẹ ịlọm lala am nyị́ chịla nyọka juwa ẹ-ẹpwarịrị nya angịnyị nya iJihova kaka lẹlẹ. Ọkịlẹtụ kaa ya eje wum, lẹ m̀ ya nyori iJihova á pẹhi ga ham lẹka. Ọ ka nọ chẹẹ lẹ, m hwabwọ la ọ-ya ẹla Ohe bala ọ-ka ọjịra-jịra lẹlẹ.” Ányị ọ tị́ị̀ lang u-uhye nya aanahị alẹng bala anyang ịlẹ kị juwa ẹ-ẹpwụ nya iwe-ahụrụ ụma ịlẹ kị ya ẹla rụ wẹ? Ị lang ahyẹẹrwẹrwa? Ọlẹ kọ baba gụ wuu ri, ányị ọ tị́ị̀ la iJihova u-uhye nyaa?

8. IJihova deeri hi angịlẹ kị kaa gbịgba họọ ene-ene, kị tịị họ ịnyị lẹẹlẹẹ ka? Ịyẹ tị́ du kahị ya ịnyị?

⁸ IJihova á deeri nya angịlẹ kị kaa gbịgba họọ ene-ene, kị tị hwabwọ la ọ-họ ịnyị lẹẹlẹẹ ka, lee o-deeri nya ụkụrwọ ọlẹ kị họ họọ kpong-kpong ka. (Hib. 6:10) Ọlọmwụ Ayịsaya da omyi ẹla ịkpịpyọ-ịkpịpyọ ịhyẹ ju nyọka mẹjẹ jabwọlẹ ká iJihova kpahị ju angịnyị nyamwụ kaka ba. Ọ da yẹkẹẹ. “Ọ ka kpa ịkpịlọ nyamwụ yẹẹyẹẹ lala ọngọgbikpịlọ, ọ ka tụ anyị-kpịlọ guru, gyaa kpa a-abwọ nyamwụ.” (Ayị. 40:11) Ányị ọ tị́ kaa la iJihova Ọngọgbikpịlọ Ọtụka ụka ká ọnchẹ nyamwụ  ọhẹ á hwabwọ la ọ-gbịgba họọ? IJisọsị ya jaabwọ kọ kaa la iJihova ụka kọ tọ angịjụgbẹyị nyamwụ ịtọ ẹlạ wo yẹkẹẹ: “Ịịyẹ a tị́ ri irya nyanụ, anụ ayịdang u-uhye nya ẹla ọlẹ? Ó-ri ka ọngọgbikpịlọ á la ịkpịlọ ohu ká ookpokpo lẹpwarịrị nyaa á kpa ịlọmwụ hwahị gbee kọ gwọọ byi. Anụ ya ká ọlẹng ọọwa á ka tụụbwọ hi ịkpịlọ ihikichu kụrụ ihikichu ihihi ụ-ụwa u-uhye nya ọgbọdọ, ọwa ayịdang ka rụ kele kaka pịlahị nya ọkpịlọ obyibyi ookpokpo ọọwa gbee kọ ka yọọ ka? Ụka ká ọngọwẹ á yẹ ọkpịlọ obyibyi nyamwụ ọọwa kpá, nya ịlẹhị-ịlẹhị, m byinu yẹkẹẹ, ọwa ayịdang ka juwa chị ọkẹkẹnị ọtụka-ọtụka o-oluhye nya ọkpịlọ ookpoko ọọwa gụ, ịkpịlọ ihihi iwo ihikichu kụrụ ihikichu ịlẹ kị kpa ịlaa hwahị kaka byi kpong-kpong ka.”—Mat. 18:12, 13.

9. Ányị angịgbikpịlọ ịnyịịla ịlụka onyogo à tị́ kaa họ ẹ-ẹga nya ịkpịlọ nyaa? (Yẹ ifoto ọla ẹbẹ nya ọgbanyẹ.)

⁹ Ịyẹ tị́ du kọ chịla nyọka chụ iJihova kaka pwoku ọngọgbikpịlọ? Chajị angịgbikpịlọ ịnyịịla ịlụka onyogo kaa kpahị ju ịkpịlọ nyaa yẹẹyẹẹ. Ọ-chụ pwokwita, iDevidi ma uya ta ugẹbẹ bala ọnarwọ nyọka chewu ke ịkpịlọ nyamwụ. (1 Sam. 17:34, 35) Ọngọgbikpịlọ ọnyịịla kaa jẹ́ ụka ká ọkpịlọ ookpokpo nyamwụ á rụ byi. (Jọn. 10:3, 14) Ọngọgbikpịlọ ọlịnyị ka ya ịkpịlọ 99 nyamwụ ju ẹ-ẹpwụ nya iku lee ọ-ya ju ọngọgbikpịlọ ọkịla ụ-ụbwọ nyọka kele kaka mwahị nya ọlẹ ko byi. IJisọsị ja oja ọkpịta ọwẹ nyọka mẹ ẹlịlẹhị o-ju apyobwuna ọhẹ u-uhye nya adamwụ olepwoohe jẹ́ẹhị : “Ó ri irya nyamwụ . . . ká ọngọngọhẹ . . . nya angịnyị nya Ohe Oluhye ị-lala anjwo ichiche ịwẹ ka ta ayịreji kpong-kpong ka.”—Mat. 18:14.

10. Jaabwọ ká ụ-ụpwụ nya Isikẹlụ 34:11-16 ya, ịyẹ iJihova à tị́ myị ọnụ nyọka họ ẹ-ẹga nya ịkpịlọ nyamwụ ịlẹ kị byi?

¹⁰ IJihova la ọháha ẹ-ẹga nya ọng myị́ ọng nyahị, tụ́ angịnyị nyamwụ lala “anjwo ichiche” ịlẹ kị hwahị hi ẹpwụ nya ọgụ nyamwụ. Bwula ọlọmwụ Isikẹlụ, Ohe chehe nyori ọwa nyị ka mwahị nya ịkpịlọ nyọwa ịlẹ kị byi bala ọ-ka daa ụbwọ kị ka jẹ́-ẹ ri igu balọọ myị́myị́. Ọ myịmyị gu ẹnyị nya ọgụ-ẹpẹtẹ ịlẹ kọ ka hu  kpangaa nyọka daa ụbwọ. Ọgụ-ẹpẹtẹ ịịwa lala ịlẹ ká angịgbikpịlọ ịla Isirẹlụ kaa hu ụka ká ọkpịlọ nyaa ọhẹ-ẹ́ byi. (Wa Isikẹlụ 34:11-16.) Ọhọhẹ, ọngọgbikpịlọ ka bịrị ụka bala ọngịrị nyamwụ kpa mwahị nya ọkpịlọ ọọwa. Ụka kọ yẹ ọkpịlọ ọlẹ kọ byi, ọ ka kpọọ kaka jula ịkịla. Ọ́ ba ọwẹ ka, kori ká ọkpịlọ ọọwa-a mwụ ụbwọ lee imyi-i nwọọ, ọngọgbịkpịlọ ka dọọ ụbwọ, chi uji jwoo, hwoo hu kpa ụ-ụbwọ, bala ọ-ka ya ang họọ ri. Angịgbahị nya ọjịra-jịra, kị ri “angịgbikpịlọ nya Ohe Oluhye” ịnyịnyị baba nyọka da ọng myị́ ọng ọlẹ kọ rụ hwahị hi ọjịra-jịra ụbwọ. (1 Pit. 5:2, 3) Ị ka pịlahị nyaa, daa ụbwọ nyà tịrẹkpẹ wẹ ọjịra-jịra, bala ọ-mẹ ọháha jẹ ẹ-ẹga nyaa, bwula ọ-daa ụbwọ nyọka ri aligu nya iJihova. *

11. Ịyẹ ọngọgbikpịlọ ọnyịịla à tị́ jẹ́?

¹¹ Ọngọgbikpịlọ ọnyịịla jẹ́ nyori ọkpịlọ nyamwụ ka byi ụka ọhẹ myị́. Ịnyịnyị, kori ká ọkpịlọ ọhẹ á rụ byi hi ịkịla, ọngọgbikpịlọ á kaa yọọ akama ka. Kụ ẹhị ya ọgụ-ẹpẹtẹ ọlẹ ká iJihova ya deeji ụka kọ juwa da ạnchẹ nyamwụ ịlẹ kị tịrẹkpẹ hyoo ụka ọhẹ ụbwọ wẹẹ.

12. Ányị iJihova à tị́ họ ẹ-ẹga nya iJona?

¹² Ọlọmwụ iJona rụnyẹ rụ hi ụkụrwọ ọlẹ ká iJihova ya họọ nyị họ. Ọlịnyị odu lẹ, abwọ á chị iJihova pyẹpyẹ ahyaahị ẹ-ẹga nyamwụ ka. Lala ọngọgbikpịlọ ọnyịịla, iJihova chọọ da bala ọ-dọọ ụbwọ la ọngịrị ọlẹ kọ baba nyọka jụ ụkụrwọ ọlẹ kọ ya họọ họ. (Jon. 2:7; 3:1, 2) Ụka ọkịla, Ohe Oluhye kpa ukoji nya akwọ da iJona ụbwọ nyọka jẹ́ jaabwọ ká ọhịhị nya ọngịnyị ehe ju apyobwuna. (Jon. 4:10, 11) Ẹlịyẹ ahị tí jẹ́ bwu ọọwa? Abwọ á ka chị angịgbahị nya ọjịra-jịra pyẹpyẹ ahyaahị ẹ-ẹga nya angịlẹ kị gbile ẹta ẹkpẹ ka. Ọkọkọ nyọọwa, ị ka maga nyọka jẹ́ ang odudu ọlẹ ká ọkpịlọ ookpokpo rụ hwahị hi ịkịla. Ịnyịnyị, ụka ká ọkpịlọ ọọwa á nyà tịrẹkpẹ wẹ ẹga nya iJihova, angịgbahị nya ọjịra-jịra ka kịnyaa la ọ-mẹ ọháha jẹ bala ọ-kpọọ i-irya nyaa.

13. Ẹlịyẹ ahị tị́ ka jẹ́ u-uhye nya abwọlẹ ká iJihova họ ẹ-ẹga nya ọngọ da Eje Ọnyịịla 73?

¹³ Ọkịlẹtụ kpa ọngọ da Eje Ọnyịịla 73 enyi,  ụka kọ yẹ alọkwọ lala o-ri ị juwa pyẹ pyọ́ọọ kịlahị-kịlahị. Ọ juwa me irya kori ká apyobwuna ọhẹ-ẹ́ ji nyọka họ irya nya Ohe Oluhye. (Eje. 73:12, 13, 16) Ányị iJihova à tị́ họ? Ọ́ ya eje wu ọlẹng ọwẹ ka. Ohe Oluhye dọmwụ da omyi ẹla nyamwụ ju ị-ịBayịbụụ. Ụka ohyẹẹkpẹ, ọngọ da Eje Ọnyịịla wẹ ka jẹ́ nyori igu oriri bala iJihova ju apyobwuna gụ ang ịkịla wuu ẹ-ẹpwụ nya ọhịhị. (Eje. 73:23, 24, 26, 28) Ẹlịyẹ ahị tí jẹ́ bwu ọọwa? Angịgbahị nya ọjira-jịra á ka la angịlẹ kị dọmwụ nyọka la ịwẹẹ ọdada u-uhye nya apyobwuna ọ-juwa ẹ-ẹpwu nyọka gbịgba ha iJihova eje ahyaahị ka. Ọkọkọ nyọka ya eje waa, angịgbahị nya ọjịra-jịra ka maga nyọka jẹ́ ang odudu kị ya ẹla bala ọ-họ ẹla ụ-ụgbẹyị ọlịịwẹ. Bwula ọ-họ ịnyị, angịgbahị nya ọjịra-jịra à ka jẹ́-ẹ jẹ́ Ụpwụ Ịgọgọ ọlẹ kị kpa jwaa ọhụ lẹ.

14. Ịyẹ tị́ du ká Ịlayịja baba nya ụbwọ ọdada? Ányị iJihova à tị́ dọọ ụbwọ?

¹⁴ Ọlọmwụ Ịlayịja rụnyẹ rụ hi Adịrahụ Ọnyang ọlẹ kọ ri iJesebẹlụ. (1 Ịdị. 19:1-3) Ọ me irya nyori ọlọmwụ nya iJihova ọhẹ-lọhẹ á hi da lọọ kaka. Ọ myịmyị kụ irya nyori ụkụrwọ ọlẹ kọ họ wuu nyị ri ododu bala ododu. Ọkịlẹtụ kpụ Ịlayịja enyi gbee kọọ tịtọ nyọka gbu. (1 Ịdị. 19:4, 10) Ọkọkọ nyọka ya eje woo, iJihova yahị ọdahile họọ nyori ọ́ la ụbwọmwụ ka, ọ ka jẹ́-ẹ dahịhile ọngịrị nya Ohe Oluhye. Ọ myịmyị byoo nyori ụkụrwọ nyị ji lụmẹ họọ kọ ka họ wẹẹ. IJihova ke ụrụ dụmwọ wo ẹla ọlẹ kọ ri akama nya Ịlayịja bala ọ-ya ụkụrwọ onyeewe họọ. (1 Ịdị. 19:11-16, 18) Ẹlịyẹ ahị tí jẹ́ bwu ọọwa? Ahị wuu, ọgụgụ angịgbahị nya ọjịra-jịra ka kpa ịkpịlọ nya iJihova dụmwọ-dụmwọ. Ụka ká ọngịnyị á ya nyori ọwa nyị ja  ju agbama, lee ọ-yẹ ịlọmwụ lala o-ri iJihova á ka jẹ́-ẹ hịnyọhi họọ kaka, angịgbahị nya ọjịra-jịra ka ke ụrụ lọọ ụka kọ juwa ya ẹla olirya nyamwụ. Ọọwa lẹ, i ka yahị ọdahile họọ nyori, ọ há iJihova lẹlẹ.

15. Jaabwọ ká ụpwụ nya ịJọn 6:39 ya, ányị iJisọsị à tị́ yẹ ịkpịlọ nya Adamwụ?

¹⁵ Ányị iJihova à tị́ tịtọ kahị ka yẹ ịkpịlọ nyamwụ ịlẹ kị byi? Ahị ka jẹ́ ang bwu ọgụ-ẹpẹtẹ nya iJisọsị. Ọ jẹ́ nyori ịkpịlọ nya iJihova wuu nyị ju apyobwuna họọ. Lẹ, iJisọsị họ ang myị́ ang ọlẹ kọ ka jụ họ myị́ nyọka da “ala Isirẹlụ ịlẹ kị hwahị ị-ịlahị nya Ohe Oluhye lala ịkpịlọ ịlẹ kị byibyi” ụbwọ kị ka nyà tịrẹkpẹ chị iJihova ọgụ. (Mat. 15:24; Luk. 19:9, 10) IJisọsị, ọngọgbikpịlọ ọnyịịla, ịnyịnyị họ ang myị́ ang ọlẹ kọ ka jụ họ myị́ chajị ká ịkpịlọ nya iJihova ọhẹ-lọhẹ á ka gwọọ byi ka.—Wa ịJọn 6:39.

16-17. Ányị angịgbahị nya ọjịra-jịra à tị́ ka yẹ ụkụrwọ ọlẹ kị la nyọka da angịlẹ kị rụ hwahị ụbwọ? (Yẹ akpa ọlẹ kọ ri, “ Abwọlẹ kọ Kaa La Ịkpịlọ Ịlẹ kị Byi.”)

¹⁶ Ọlẹrụ ịPọlụ ju angịgbahị nya ọjịra-jịra ịla Efesọsị ọhụ nyọka ba ọgụ-ẹpẹtẹ nya iJisọsị jẹ. ‘Anụ ka da angịlẹ kị la dẹwụ-dẹwụ ụbwọ bala ọ-kpịtịya nya omyi ẹla nya Ọngọlahị iJisọsị ụka kọ yẹkẹẹ, “ọkẹkẹnị ka juwa ha angịlẹ kị juwa hu ha, gụ angịlẹ kị juwa yeye kem.” ’ (Ụkụr. 20:17, 35) Ụpwụ Ịgọgọ ọwẹ mẹjẹ nyori angịgbahị nya ọjịra-jịra alẹ, la ụkụrwọ ọtụka-ọtụka kị ka họ nyọka kpahị ju anchẹ nya iJihova. Salvador, ọngọgbahị nya ọjịra-jịra ịị Spain yẹkẹẹ: “Ụka kam kụ irya jaabwọ ọlẹ ká iJihova kaa kpahị ju ịkpịlọ nyamwụ ịlẹ kị byi, ọọwa kaa gum gbịla nyọka họ ang myị́ ang ọlẹ kam ka jụ họ myị́ nyọka daa ụbwọ. M̀ jẹ́ myị̀myị̀ nyori iJihova tịtọ kam ka kpahị jwaa.”

¹⁷ Angịlẹ wuu kị gu ẹnyị a-ang ọjẹ́jẹ ọlẹ kị rụ hwahị ye ụbwọ ọdada, kpụ ị tịrẹkpẹ wẹ ẹga nya iJihova. Dọmwụ lẹẹlẹẹ, angịkịla ịlẹ wuu kị rụ hwahị tịtọ nyọka họ ịnyị ịnyịnyị. Ang ọjẹ́jẹ ọkịla ka ya ẹla u-uhye nya ang ọlẹ kahị ka họ nyọka daa ụbwọ nyà tịrẹkpe wẹ ẹga nya iJihova.