1. Ányị ọ tị́ kaa la iJihova ụka ká ọkpịlọ ookpokpo ọlẹ kọ rụ byi á nyà tịrẹkpẹ?

JAABWỌ kahị yẹ a-ang ọjẹ́jẹ ọkẹkpẹ, iJihova chụ ịlọmwụ pwoku ọngọgbikpịlọ ọnyịịla ọlẹ kọ kaa kpahị ju ọkpịlọ ọnyọnyọọnyị nyamwụ. Ọ tị kaa mwahị nya ọkpịlọ ọnyị kọ rụ byi. IJihova byi ala Isirẹlụ ịlẹ kị rụ hyoo yẹkẹẹ: “Anụ jahị kpata kanụ nya kaka bam jẹ, mẹ. Aalẹ, m̀ tịtị ka nyà tịrẹkpẹ chịnụ ọgụ.” Ahị jẹ́ nyori irya ọlịnyị ọ la wẹẹ lẹ, chajị o yẹkẹẹ: “Ḿm̀ yẹda ka.” (Mal. 3:6, 7) IJisọsị ya nyori iJihova bala alegu-ẹrụ nyị kaa chị ọkẹkẹnị ọtụka-ọtụka ụka ká ọnchẹ nyamwụ ọlẹ kọ rụ hwahị ene-ene á nyà tịrẹkpẹ wẹ ẹga nyamwụ.—Luk. 15:10, 32.

2. Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

² Ahị kụ ẹhị yẹ ẹla ọ-chụ pwokwita nya iJisọsị ịta ịhyẹ ịlẹ kị mẹ ẹla ịkpọnchị jẹ u-uhye nya abwọlẹ kahị ka bwu da angịlẹ kị rụ hwahị hi iJihova ụbwọ wẹẹ. Ahị ka ya ẹla u-uhye nya abwụma ịhyẹ ịlẹ kahị baba chajị nyọka da angịlẹ kị rụ hwahị ụbwọ nyọka nyà tịrẹkpẹ. Ahị ka myịmyị-ị̀ jẹ́ nyori ahị kaa chị ọkẹkẹnị yẹẹyẹẹ ụka kahị maga nyọka da angịlẹ kị rụ hi iJihova ụbwọ nyọka nyà tịrẹkpẹ chọọ ọgụ.

3-4. Ịyẹ tị́ du ká ọnyang ọlẹ kị gu ẹnyị ụ-ụpwụ nya iLuku 15:8-10 mwahị nya ohiri ọlẹ kọ byi kekeeke?

³ Ahị baba nyọka maga nyịlẹhị-ịlẹhị nyọka pịlahị nya angịlẹ kị tịtọ nyọka nyà tịrẹkpẹ wẹ ẹga nya iJihova. O-oja ọ-chụ pwokwita ọlụpwụ nya iLuku, iJisọsị ya jaabwọ ọlẹ ká ọnyang ọhẹ pịlahị nya ohiri o-ju apyobwuna nyamwụ ọlẹ kọ byi. Ẹla ọkpọnchị ọlẹpwụ nya oja ọwẹ ri abwọlẹ ká ọnyang ọwẹ pịlahị nya ohiri ọọwa nyịlẹhị-ịlẹhị.—Wa iLuku 15:8-10.

⁴ IJisọsị chabwọ jaabwọ kọ la ọnyang ọọwa ụka ọlẹ kọ yẹ ohiri nyamwụ ọlẹ kọ byi. Lụka nya iJisọsị, ẹnụ ọlẹ ká ọnyị ọnyang á juwa ka rwọrụ, ịnamwụ kaa ya ihiri iwo họọ ụka ọhẹ. Ọhẹka  ohiri ọwẹ juwa ẹ-ẹpwụ nya ihiri ịlẹ ká ịnamwụ ya họọ, ọọwa à du kọ jwoo apyobwuna lụmẹ ịnyị lẹ. Ọnyang ọọwa jẹ́ nyori eji ohiri ọwẹ nya-à ka chabwọ da ka wẹ lẹ. Lẹ, ọ chị ila gu otinika lẹ, ọ mwahị nyamwụ dọgịlẹ ju lẹlẹ. Ọ́ tị yọọ ka. Otinika nyamwụ á hụ́ nwà kpụ ọ ka jẹ́-ẹ yẹ ohiri nya okpoko onyoowuru ochiche-ochiche ọwẹ ka. Ọọwa lẹ, ọ tụ́ ẹpwa nyamwụ lẹpwụ-lẹpwụ wuu lẹlẹ. Nyọlẹ kọ họ ịnyị wẹẹ, ọ yẹ ohiri nyamwụ ẹ-ẹpwụ nya ajeyi ịlẹ kọ tụ́ guru, juwa hụ́ myịrị-myịrị kpehe ẹ-ẹpwụ nya ahịgboo nya otinika nyamwụ lẹlẹ! Ọ chị ọkẹkẹnị yẹẹyẹẹ nyọlẹ kọ yọọ. Ọ wụrụ aligu bala aloye ẹpwa nyamwụ guru chajị kọ ka jaa oja ọnyịịla ọwẹ.

5. Ịyẹ tị́ du kọ ka lujwo myị́ nyọka yẹ angịlẹ kị rụ hi ọjịra-jịra?

⁵ Ahị jẹ́ bwu oja nya iJisọsị nyori, kori ká ang á gụụhị byi, ahị baba nyọka maga nyịlẹhị-ịlẹhị ene kahị ka yọọ. Ịnyị ọ la ẹ-ẹga nya angịlẹ kị rụ hi ọjịra-jịra lẹ. Ahị baba nyọka maga nyịlẹhị-ịlẹhị ene kahị ka yaa. Ọhẹka, ẹka lụmẹ-lụmẹ chịpwụrụ nyọlẹ kị ba la ọ-yẹjulahị lẹ. Ọhẹka, ị dọmwụ mwụ́ rụ ka oye ọlẹ ká aanahị ịlụwa á jáa ka. Ma, ahị jẹ́ myị̀myị̀ nyori angịhyẹ ịlẹ kị gbile ẹta ẹkpẹ tịtọ kị ka tịrẹkpẹ wẹ ẹga nya iJihova lẹẹlẹẹ. Ị tịtọ kị ka gbịgba ha iJihova myịmyị bala aanaa, ma ị baba nya ụbwọ ọdada nyahị.

6. Ányị ọng myị́ ọng wuu ọọjịra-jịra à tị́ ka jẹ́-ẹ dụbwọ nyọka mwahị nya angị gbile ẹta ẹkpẹ?

⁶ Oowo anyị à tị́ ka da angịlẹ kị gbile ẹta ẹkpẹ ụbwọ? Ahị wuu—angịgbahị nya ọjịra-jịra, angị ye ịlahị nya ụgbẹyị, alugbiyegu nyaa, bala aanahị ịla ọjịra-jịra wuu ka jẹ́-ẹ dụbwọ mwahị nyaa. À la oligu lee olugbiyegu ọhẹ ọlẹ kọ kaa gbile ẹta ẹkpẹ? À tọ ọngọlịnyị ụka nya ẹrụ ọnyịịla ọ-kpa pyẹ bwu ẹpwa ka ẹpwa lee ọlẹpwụ nya alụma ẹnẹhẹ lẹ? Kori ká ọngọọwa á myị ya ẹga ọlẹ kọ kụ jeng lee ọ-ya ịnọmba nyamwụ hang, à ka jẹ́-ẹ ya ha angịgbahị nya ọjịra-jịra myị́.

7. Ẹlịyẹ a tị́ jẹ́ bwu ẹla ọlẹ ká ọọnahị Thomas ya?

⁷ Angịgbahị nya ọjịra-jịra gụgụụgụ la ụkụrwọ nyọka mwahị nya angịlẹ kị rụ hi iJihova, kị tị tịtọ nyọka nyà tịrẹkpẹ. Ányị ị tị́ ka bwu họ ịnyị? Wo ẹla ọlẹ ká ọngọgbahị nya ọjịra-jịra ọhẹ ọlẹ ká ẹnyị nyamwụ ri Thomas ya wẹẹ. * Ọ kụ Spain, ọ tị da angịnyị lala angị iwo ine ụbwọ nyọka tịrẹkpẹ wẹ ọjịra-jịra lẹ. Thomas yẹkẹẹ: “Ọhọhẹ, m̀ kaa tọ aanahị ịdatị-datị wo kori kị jẹ́ ẹga ká ọngọ gbile ẹta ẹkpẹ kụ lẹẹlẹẹ. Lee ọ-tọ aanahị wo kori kị kpịtịya nya ọngọhẹ ọlẹ kọ kaa wẹ ọjịra-jịra kaka. Ọ kaa kpụ angịnyị lụmẹ-lụmẹ ịpyọ nyọka dụbwọ chajị ịwa ịnyịnyị tịtọ nyọka da angịwẹ ụbwọ tịrẹkpẹ. Ụka kam ju aanahị ịlẹ kị rụ hi iJihova ụga, m̀ kaa taa wo nya anyị nyaa bala alugbiyegu nyaa ịkịla. Angịhyẹ nyaa kaa kpa anyị nyaa wẹ ọjịra-jịra ene-ene. Ọhẹka, anyị ịwẹ dọmwụ kaa kpa ẹrụ ọnyịịla pyẹ ụka ọhẹ lẹ. Ahị ka jẹ́-ẹ daa ịwa ụbwọ ịnyịnyị nyọka tịrẹkpẹ wẹ ẹga nya iJihova.”

8. Ányị adịda nya ọnyị oluhwo ọlụpwụ nya iLuku 15:17-24, à tị́ họ ẹ-ẹga nya ọnyị nyamwụ ọlẹ kọ yẹda?

⁸ Abwẹla iyina ahị tị́ ka la pyii nyọka da angịlẹ kị tịtọ nyọka tịrẹkpẹ wẹ ẹga nya iJihova ụbwọ? Ahị kụ ẹhị yẹ ẹla ịhyẹ ịlẹ kahị ka jẹ́ bwu oja nya ọnyị oluhwo ọlẹ ká iJisọsị ja wẹẹ. (Wa iLuku 15:17-24.) IJisọsị ya jaabwọ ká ahị chị ọnyị ọọwa gboo ụka ohyẹẹkpẹ du kọ cheje nyọka tịrẹkpẹ ka ẹpwa. Adamwụ rụnyẹ kaka tọọ ụ-ụgbẹyị bala o-woo bajẹ chajị ká ọnyị ọwẹ ka jẹ́ nyori ọwa nyị há adịdọwa yẹẹyẹẹ. Ọkịlẹtụ la ọnyị ọọwa eje u-uhye nya ang ịlẹ kọ họ, lẹ ọ me irya nyori nyị́ chịla nyọka hu ọwa lala ọnyị kaka. Nyọlẹ ká ọnyị ọwẹ ya ẹla ọlọkịlẹtụ nyamwụ je adamwụ wẹẹ, ọ lọọ ahyẹẹrwẹrwa. Ọọwa lẹ, adịda ọwẹ à họ ịngịhyẹ ọlẹ kọ ka mẹjẹ ọnyị nyamwụ nyori ọwa nyị dọọ ọwụraba wẹ ẹpwa kaka ri ọnyị olikeje ọkọkọ nyọka ri  ọnchẹ lẹlẹ. Nyọka mẹ ẹlẹwẹ jẹ, ọ wụrụ ọhụhụ ọhẹ bala ọ-ya awụrụ ọnyịịla-ọnyịịla kụrụ ọnyị nyamwụ ọlẹ kọ yẹda-à wẹ.

9. Abwụma iyina ahị tị́ ka la nyọka jẹ́-ẹ da angịlẹ kị rụ hi iJihova ụbwọ nyà tịrẹkpẹ wẹ ẹga nyamwụ? (Yẹ akpa ọlẹ ko ri, “ Abwọlẹ Kahị ka Bwu Da Angịlẹ kị Tịtọ Nyọka Tịrẹkpẹ Ụbwọ.”)

⁹ IJihova lala adịda ọla oja ọwẹ. Ọ la ọháha ẹ-ẹga nya aanahị ịlẹ kị rụ hyoo, ọ tị tịtọ kị ka tịrẹkpẹ wẹ ẹga nyamwụ. Kori kahị ba ọgụ-ẹpẹtẹ nya iJihova jẹ, ahị ka jẹ́-ẹ daa ụbwọ nyọka tịrẹkpẹ. Kori kahị tị ka họ ịnyị myị́ aalẹ, ahị baba nyọka la ugbodu ojuju, jẹ́ jaabwọ ká ẹla laa i-irya, bala ọ-la ọháha ẹ-ẹga nyaa. Ịyẹ tị́ du kahị baba nyọka la abwụma ịwẹ? Ányị ahị tị́ ka bwu laa?

10. Ịyẹ tị́ du kahị baba nya ugbodu ojuju nyọka jẹ́-ẹ da ọngịnyị ụbwọ tụ́ ju iJihova chwẹẹ myịmyị?

¹⁰ Ahị baba nyọka ju ugbodu chajị ọngịnyị á jẹ́-ẹ tịrẹkpẹ wẹ ẹga nya iJihova i-ijata ka. Angịhyẹ lụmẹ-lụmẹ ịlẹ kị gbile ẹta ẹkpẹ ene ya nyori angịgbahị bala aanahị ịkịla nyị ju ịwa ụga mwụba-mwụba ene kịịwa nyị jẹ́-ẹ tịrẹkpẹ kaka gbịgba ha iJihova. Ọọnahị Nancy, kọ bwu oye nya Asia yẹkẹẹ: “Oligu nyam ọhẹ ọọjịra-jịra dam ụbwọ yẹẹyẹẹ. M̀ họ́ọ lala ọnyịnamwụ ochiche. Ọ kpụm ịtịya jaabwọ kọ kpịpyọ ụka ọlẹ kahị juwa lawụlẹ ene-ene. Ọ kaa ke ụrụ wo lam kpẹnẹẹ ụka kam juwa ya ẹla olirya nyam joo. Ọ tị kaa jum irya ịnyịnyị. O ri oligu ọlam ọlẹ kọ nwụlanọ nyọka dụbwọ ụka wuu.”

11. Ịyẹ tị́ du kahị baba nyọka jẹ́ ẹla olirya nya ọngịnyị?

¹¹ Ụka ká ẹla-á wụ ọngịnyị ẹjẹ, ọ kaa jụjụ lala ẹbẹ. Ahị ọ-jẹ́ jaabwọ ká ẹla la ọngọọwa i-irya tị lala utoji ọlẹ kọ ka jẹ́-ẹ họọ uda. Angịhyẹ nya angịlẹ kị gbile ẹta ẹkpẹ juwa ká ẹla nya ọngọhẹ ọọjịra-jịra waa ẹjẹ ẹka lụmẹ-lụmẹ kẹkpẹ, ẹla ọọwa tị taa olujwo daalẹ wẹẹ. Chajị nyọọwa lẹ, ị́ tịtọ nyọka tịrẹkpẹ wẹ ẹga nya iJihova ka. Ọ  ka la angịhyẹ nyaa lala o-ri nyị haa ẹla ọkịrọrọ. Ị ka baba nya ọngọhẹ ọlẹ kọ ka ke ụrụ wo ẹla nyaa bala ọ-jẹ́ jaabwọ ká ẹla ọọwa laa i-irya. (Jem. 1:19) María, kọ gbile ẹta ẹkpẹ ụka ọhẹ lẹ, yẹkẹẹ: “M̀ baba nya ọngịnyị ọlẹ kọ ka ke ụrụ wo lam, kọ ka kpụm ẹjẹ, kọ ka jum irya ọnyịịla bala ọ-dam ụbwọ.

12. Ụ-ụgbẹyị ọlányị ọháha nya iJihova à tị́ lala ori?

¹² ỊBayịbụụ chabwọ nya ọháha ọlẹ ká iJihova la ẹ-ẹga nya angịnyị nyamwụ lala ochiri lee ori. Ụ-ụgbẹyị oyina ọháha nya Ohe Oluhye à tị́ lala ori? Kụ irya nya ẹla ọ-chụ pwokwita ọlẹ wẹẹ: Ọhẹka à juwa ka byi enyi ẹ-ẹpwu nya íhù ọtụka ọhẹ ọlẹ kọ juwa gu agbụ ọtụka-ọtụka, ká enyi ọlụwa tị nyiri dẹyị-dẹyị. Ọọwa le, ọngọhẹ kọ juwa ẹ-ẹpwụ nya ụmwụ nya enyi bang ba à ya ịngịhyẹ ọlẹ ká ka jẹ́-ẹ chikirii ba da wang chajị ká ka byi enyi kaka lẹlẹ. Ọ myịng lẹhị, ma kori ká chikirii ba ang ọwẹ kem, á ja chịda ka. À baba nyọka kpehe bwu ẹpwụ nya enyi ọwẹ. Lẹ, ọ baba ká angị ịlẹpwụ nya ụmwụ nya enyi ọwẹ ka ya ori da wang chajị kị ka gbileng ju ka ẹpwụ nya ụmwụ nya enyi. IJihova ya u-uhye nya ala Isirẹlụ yẹkẹẹ: “M̀ táa ba ịlọm la [ori nya] ahyẹẹrwẹrwa bala ọháha.” (Hos. 11:4) Irya ọlịnyị iJihova à la u-uhye nya angịlẹ kị ba la ọ-gbịgba họọ, ká akama myaa pwẹẹpwẹẹ lala o-ri ị juwa ka byi enyi ẹ-ẹpwụ nya akama bala uko ọchịchị lẹ. O ri irya nyamwụ kị ka jẹ́ nyori ị họ́ọ, bala o-ri ọ tịtọ nyọka táa ba ịlọmwụ. IJihova tị ka jẹ́-ẹ kpang mẹ ọháha nyamwụ ọọwa jẹ.

13. Ányị oja nya Pablo à tị́ mẹjẹ nyori ọháha nyahị ka jẹ́-ẹ da angịkịla ụbwọ nyọka tịrẹkpẹ wẹ ẹga nya iJihova?

¹³ Ọ baba kahị ka mẹjẹ angịlẹ kị gbile ẹta ẹkpẹ nyori ị há iJihova yẹẹyẹẹ bala o-ri nyị háahị ịnyịnyị. Pablo, kahị gu ẹnyị a-ang ọjẹ́jẹ ọkẹkpẹ, họ ẹka iwo ịta ene kọọ tịrẹkpẹ wẹ  ẹga nya iJihova. Ọ yẹkẹẹ: “Ẹnụmwụ ọhẹ lụtụrụ kam wẹẹ kpehe bwu ẹpwa nyam, ọọnahị ọnyang ọgbahị ọdụmwọ ọhẹ tom, ọ tị ya ẹla tam ẹ-ẹpwụ nya ọháha. M̀ jida lala onjwo ọlụbwọ. M̀ byoo nyori iJihova à ka doo ẹrụ wẹ ka ya ẹla tam-m̀ wẹ lẹ. Ụka ọwẹ m cheje nyọka tịrẹkpẹ ka ẹga nya iJihova lẹlẹ.”

14. Jaabwọ ká oja ọ-chụ pwokwita ọlụpwụ nya iLuku 15:4, 5 mẹjẹ, ịyẹ ọngọgbikpịlọ à tị́ họ nyọlẹ kọ yẹ ọkpịlọ ọlẹ kọ hwahị?

¹⁴ Ahị baba nyọka kịnyaa la ọ-da angịlẹ kị gbile ẹta ẹkpẹ ụbwọ bala o-jwaa ọhụ ụka kahị yaa kpá. Lala ọnyị oluhwo ọla oja nya iJisọsị, angịwẹ ka la ọjụjụ ọ-ọkịlẹtụ ọlẹ kọ ka tata ene kọ ka há gụ. Ị́ ju iJihova chwẹẹ lala olene kaka chajị nya ẹla ọlẹ kọ họ taa odehe nya Olegu Onyobyi. Ahị baba nyọka daa ụbwọ nyọka ju ọmyịmyị nyaa ọngịrị ẹ-ẹga nya iJihova. O-oja nya ọkpịlọ ọlẹ kọ rụ hwahị, iJisọsị ya jaabwọ ká ọngọgbikpịlọ hwoo nọ ụmwụchwọ nyamwụ, kpọọ tịrẹkpẹ ka ẹga nya ịkpịlọ ịkịla. Ọngọgbikpịlọ ọwẹ kpa ụka bala ọngịrị nyamwụ mwahị nya ọkpịlọ ọwẹ. Ma, nyọlẹ kọ yọọ, ọ jẹ́ nyori ọ baba nyọka hwoo kpa tịrẹkpẹ chajị ọkpịlọ ọwẹ á la ọngịrị nyọka jẹdịyẹ lịlọmwụ kaka.—Wa iLuku 15:4, 5.

15. Ányị ahị tị́ ka bwu da angị dẹwụ-dẹwụ ịlẹ kị tịtọ nyọka tịrẹkpẹ wẹ ẹga nya iJihova ụbwọ? (Yẹ akpa ọlẹ ko ri, “ Ang Abwọ Ọnyịịla-ọnyịịla.”)

¹⁵ Ahị ka baba nya ọ-kpa ụka bala ọngịrị nyahị họ ụkụrwọ yẹẹyẹẹ nyọka da angịlẹ kị gbile ẹtẹ ẹkpẹ ụbwọ nyọka kụrụ ọdẹwụ-dẹwụ nyaa. Ma, bwula ụbwọ ọdada nya olegu nya iJihova, Omyi Ẹla nyamwụ, bala ang-abwọ ị-da ịBayịbụụ wụlẹ ịlẹ kahị kaa ye bwu ọjịra-jịra, ahị ka jẹ́-ẹ daa ụbwọ ká igu oriri nyaa bala iJihova ka la ọngịrị. (Rom. 15:1) Ányị ahị tị́ ka bwu  họ ịnyị? Ọngọgbahị nya ọjịra-jịra ọhẹ ọlẹ kọ jẹ́ ang u-uhye nya ẹla ọlịịwẹ yẹkẹẹ: “Ọ baba nyọka mẹ ịBayịbụụ jẹ iru nya angịlẹ kị gbile ẹta ẹkpẹ, kị tị myịmyị tịtọ nyọka tịrẹkpẹ wẹ ẹga nya iJihova.” * Lẹ, kori kị bying nyị mẹ ang jẹ ọngọlịnyị, à ye myị la abwiye-abwiye. Ọngọgbahị nya ọjịra-jịra ọwẹ myịmyị yẹkẹẹ: “Ọngọlẹ kọ ka mẹ ang jẹ ọngọlịnyị baba nyọka ri oligu ọnyịịla bala ọngọlẹ kọ ka jẹ́-ẹ ya ẹla ọlọkịlẹtụ nyamwụ ju.”

16. Ányị ahị tị́ họ kahị jẹ́ nyori alegu-ẹrụ ka dahị ụbwọ?

¹⁶ Oja lụmẹ-lụmẹ ji kị mẹjẹ nyori alegu-ẹrụ kaa dahị ụbwọ ẹ-ẹpwụ nya ụkụrwọ nyọka mwahị nya angị gbile ẹta ẹkpẹ ịlẹ kị tịtọ nyọka tịrẹkpẹ wẹ ẹga nya iJihova (Ọwụ. 14:6) Ọ-chụ pwokwita, ọọnahị Silvio bwu Ecuador, bịlẹ iJihova nyịlẹhị-ịlẹhị kọ ka du ọngịnyị wẹ ka dọọ ụbwọ nyọka tịrẹkpẹ wẹ ọjịra-jịra. Nyọlẹ kọ wẹẹ kpa abwọ rị wẹẹ, angịgbahị nya ọjịra-jịra imiiye à ya ụbwọ kpụ ụgbẹyị nyamwụ lẹlẹ. Ụka ọlẹ kị jwoo ụga, ị chị ọkẹkẹnị nyọka dọọ ụbwọ nyà tịrẹkpẹ wẹ ẹga nya iJihova.

17. Ahị ọwawa oyina ahị tị́ kaa ye ụka kahị da angị dẹwụ-dẹwụ ụbwọ?

¹⁷ Ahị ka ye ọkẹkẹnị ọtụka ẹ-ẹpwụ nya ọ-da angịlẹ kị la dẹwụ-dẹwụ ẹ-ẹpwụ nya olegu ụbwọ nyọka tịrẹkpẹ wẹ ẹga nya iJihova. Wo ẹla ọlẹ ká Salvador ọngọ ye ịlahị nya ụgbẹyị ọhẹ ọlẹ kọ kaa maga nyọka da angị gbile ẹta ẹkpẹ ụbwọ ya lẹẹ wẹẹ: “Ụka ọhẹ, ḿ jẹ́-ẹ wu egbejida kpa myị́ ka ọọlajị nya ọkẹkẹnị. M̀ kaa chị ọkẹkẹnị chajị nyori m̀ jẹ́ họ ụkụrwọ bala iJihova nyọka da ọngọhẹ lẹpwụ nya anchẹ ịlịkẹjẹ nyamwụ ụbwọ kọ ka gba kpehe bwu ẹpwụ nya odehe nya Olegu Onyobyi tịrẹkpẹ wẹ ẹpwụ nya ọjịra-jịra nyamwụ.”—Ụkụr. 20:35.

18. Kori ká ri ọngọ gbile ẹta ẹkpẹ, ẹlịyẹ a tị́ ka jẹ́ myị̀myị̀?

¹⁸ À ri ọngọhẹ ẹ-ẹpwụ nya angịlẹ kị hwabwọ la ọ-yẹjula angịnyị nya iJihova? Jẹ́ myị̀myị̀ nyori a họ́ọ wẹẹ. Ọ tịtọ ká ka tịrẹkpẹ wẹ ẹga nyamwụ. À baba nyọka hu ẹta ẹdịyẹ nyọka nyà tịrẹkpẹ wẹ ẹga nyamwụ. Ma, jaabwọ ká adịda ọlẹpwụ nya oja nya iJisọsị họ, iJihova wẹẹ kụ ọlọyị gbeng nyọka nyà, ọ tị ka dang ọwụraba la abwiye-abwiye ịnyịnyị.