AHỊ wuu jẹ́ nyori iJihova à wẹẹ kpa angịnyị nyamwụ ụgbẹyị bala ọ-kpaa la ang oriri nya olegu “lụka ohyẹẹkpẹ nya odehe ọlẹ” lẹ. (2 Tim. 3:1) Ịnyịlẹhị lẹ, o ri ụkụrwọ nya ọngọngọọngụ nyọka ju ihi nya iJihova. Ahị ka jẹ́-ẹ chụ iwe-ahụrụ nyahị kaka pwọku ịnya ala Isirẹlụ ụka kị juwa u-ugbileji myị́. Ị baba nyọka họ jaabwọlẹ ká omyi nya ẹkụrwẹ ya.

IJihova byi iMosisi nyị họ ẹkụrwẹ ịhyẹ lokpoko onyoowuru “nyọka kpa chị wụrụ angịnyị bala ọ-ka byi angịnyị nyị wuleji ẹdịyẹ mẹ.” (Ọwa. 10: 2) Alegbeju ikiliya ka chị ẹkụrwẹ ịwẹ ụ-ụgbẹyị ọdatị-datị nyọka ya je angịnyị ang ọlẹ kị baba nyọka họ. (Ọwa. 10:3-8) Alẹ, angịnyị nya Ohe Oluhye kaa ye ọmẹjẹ bwu agbẹyị ịdatị-datị. Kụ ẹhị ya agbẹyị ịta lẹpwụ nyaa ịlẹ kị kpụhị ịtịya nya omyi nya ẹkụrwẹ ọlẹ kị kaa kpa wụrụ angịnyị lụka onyogo wẹẹ. Agbẹyị ịta ịịwa ri ụka kị wụrụụhị ka ọtụguru ịtụka, ụka kị mẹ ang jẹ angịgbahị nya ọjịra-jịra, bala ụka ká ọnwuhọ á ji ẹ-ẹga nya abwọlẹ kahị kaa bwu họ ang ọọjịra-jịra.

Ụka ká iJihova á tịtọ ká “aluche wuu” ka wẹ kaka tụguru ẹ-ẹga nya ọnang nya ọdụ, angịkiliya ka chị ẹkụrwẹ imimiiye. (Ọwa. 10:3) Ogang ọnyị myị́ ọnyị wuu, ịlẹ kị kụ dokoko ju ọdụ ebwo ine wẹ, kaa wo lanụ nyamwụ. Angịlẹ kị ji ba ụwa ba gụ ka jẹ́-ẹ pweeji i-ijata. Angịkịla ịlẹ kị tị ji lụrụ gụ tị ka bịrị ụka pyịnyẹng ene kị ka jẹ́-ẹ pwụ ụwa. Jaabwọ myị́ abwọ ká iwe-ahụrụ-ụ́ la, iJihova tịtọ ká ọng myị́ ọng wuu ka tụguru nyọka wo ẹla nyamwụ.

Áhị kaa tụguru ẹ-ẹga nya ọdụ alẹ ka, ma ị tị kaa wụrụụhị ka ọtụguru nya angịnyị nya Ohe Oluhye, lala ọjịra-jịra ọtụka bala ọtụguru ụma ịkịla ịlẹ kị kaa mẹ ẹla o-ju apyobwuna bala ụgbẹyị jẹẹhị. Ẹ-ẹpwụma ọnyị myị́ ọnyị wuu chị odehe ọnụ, angịnyị nya iJihova kaa jẹ́ ang abwụma ookpokpo. Lẹ, angịlẹ kị ye ọwụ́rụ-wụrụ nyọka ka ọtụguru ọọwa myị kaa yẹjula ogu nya angịnyị ịlẹ kị kaa chị ọkẹkẹnị. Ẹdịyẹ nya angịhyẹ kaa lụrụ gụ ịnya angịkịla. Kpọkpọọkpọ, angịlẹ wuu kị pwụ myị́ kaa myị ọnụ nyori ị́ gbu ẹta ẹdịyẹ ododu ka.

Angịlẹ kị tị ji ụbwaa lụrụ hwẹẹ hi ẹga ọlẹ ki kaa la ọjịra-jịra ọtụka ọlịnyị bẹẹ? Chajị nya ang ọjẹ́jẹ nya ichene, iru nya angị lịnyị kaa ye apyobwuna bwu ọtụguru ọlịnyị kpụ ị dọmwụ kaa yẹ ịlaa lala ụpa nya ọtụguru ịịwa. Ọ-chụ pwọkwita, ụka kị du ọọnahị ọhẹ bwu egbeju-ẹpwa nyahị ọ-la odehe wuu kaka ju ụga ịị Benin, egbeju-ẹpwa ọlụwa ya ẹla ọ-la ọjịra-jịra ọọwa kpata du ọ-ọhụ ka Arlrit, epweji ọhẹ ịị Niger. Angị iwo-imiiye kụrụ ookpokpo nya aanahị alẹng bala anyang tụ́ angịlẹ ká ẹla nyahị kaa kpaa ịpyọ tụguru. Nanana nyori ị ji ẹga ọlụrụ, ọ laa lala o-ri nyị yẹjula ụmụmẹ  nya angịnyị angị 44,131 ẹ-ẹga ookpokpo. Ọọnahị ọlẹng ọhẹ da ụpwụ yẹkẹẹ: “Ahị jinụ obe ọhọhọ bwu ẹpwụ ọkịlẹtụ nyahị nyọlẹ kanụ ya ẹla nya ọjịra-jịra ọwẹ kpata du wahị ọ-ọhụ. Ọ mẹjẹ́ẹhị jaabwọ kanụ kpahị i-irya kaka ba.”

Ụka ká angịkiliya nya ala Isirẹlụ á chị ẹkụrwẹ ookpokpo kem, “alegbeju i-bwu ogang datị-datị kem” à kaa wẹ ẹga nya ọdụ lẹ. (Ọwa. 10:4) Ụ-ụwa ịMosisi à kaa ya ẹla jaa bala ọ-mẹ ang jaa lẹ. Ọọwa kaa daa ụbwọ nyọka jẹ́-ẹ họ ụkụrwọ ọlẹ kị la ogang nyaa. Kori ká ri ọngọhẹ ẹ-ẹpwụ nya alegbeju ịịwa, á ka cheri nyịlẹhị-lẹhị nyọka juwa i-ijata nyọka ye apyobwuna bwu ụwa ka?

Alẹ, angịbgahị nya ọjịra-jịra á ri “alegbeju” ka; ị́ tị kaa kpa ụbwọ ọngịrị kpa ịkpịlọ nya Ohe ịlẹ kị́ị̀ kpẹhị rịrị ka ịnyịnyị. (1 Pit. 5:1-3) Ma, ị tị kaa họ jaabwọ kị ka họ ba myị́ ẹ-ẹpwụ nya ẹhị ọ-kpa rịrị ịkpịlọ ịịwa. Lẹ, ị́ kaa họ atịmẹ ụka kị wụraa nyọka ye ang ọjẹ́jẹ onyeewe ka, lala Ube-ụpwụ nya Angịgbahị nya Ọjịra-jịra bala Angị Myị Ẹrụ. Ẹ-ẹpwụ nya ang ọjẹ́jẹ ọọwa, angịgbahị nya ọjịra-jịra kaa jẹ́ jaabwọ kị ka bwu kpahị ju ẹla ịla ọjịra-jịra kẹmbẹẹ gụ olene. Ọọwa ka du ká ala ọjịra-jịra wuu kaa tụ ju iJihova chwẹẹ gụ ọwọwa. Kori ká dọmwụ ka ube-ụpwụ ọhẹ lẹpwụ nyaa ẹnẹhẹ lẹka wẹwẹ, à kaa ye apyobwuna chajị nyọlẹ ká angịlẹ kị́ ka ẹnẹhẹ lẹ kaa kpa ẹla ọlẹ kị jẹ́ bwu ụwa họ ụkụrwọ ẹ-ẹpwụ nya ọjịra-jịra.

Angịkiliya nya ala Isirẹlụ kaa chị ẹkụrwẹ la omyi ọ-ka uhye weji ụka ọhẹ. Ọwẹ kaa ya jaa nyori iJihova tịtọ ká aluche wuu ka wuleji ẹdịyẹ. (Ọwa. 10:5, 6) Ụka ká aluche ịwẹ wuu á ka wuleji ẹdịyẹ, ị kaa jẹ ụ-ụgbẹyị ọlẹ kọ la kẹmbẹẹ, ma o tị ri ụkụrwọ ọtụka ha ọngọọngụ nyaa. Angịhyẹ nyaa tị ka họ atịmẹ la ọ-ka wuleji ẹdịyẹ myị́. Ịyẹ à tị́ ka du?

Ọhẹka ọ ka la angịhyẹ lala o-ri ọwụrụ-wụrụ ọwẹ nyị jam la hyaahyaa bala ọ-la kpịraka lụmẹ myị́. Ụka ọhẹ, “egbamwụ ka godayị bwu alobyi da ka alụtụrụ nya ahị ọpyẹpyẹ ọọnamwụ kem.” Ụka ọkịla, ọ ka ri “ẹnụtụrụ imiiye lee ọya lee ọ-gụ ọwẹ” ene kị́ ka wuleji ẹdịyẹ. (Ọwa. 9:21, 22) Ụka ịmanyị kpangga aluche ịwẹ à tị́ jẹ bwu ẹga ọhẹ ka ọkịla? Ụpwụ nya Ọwawa egbeju 33 gu ẹnyị nya ẹga 40 ịdatị-datị ịlẹ ká ala Isirẹlụ chị kụ.

Ụka ọhẹ, ị ka ye ẹga ọlẹ kọ ju ụrụrụ ọnyịịla-ọnyịịla myị́. Ọ-ka chị kụ e-ekpeleji nya ụrụrụ ọlịnyị ka kpụ ịpyọ ụ-ụwa “ugbileji ọgbamgbam oluhi-uhi” ọọwa. (Ehile. 1:19) Ọlịnyị kà du kị́ ka juhi nyọka rụ ka ẹga ọkịla myị́. Ọọwa tị ka ri ọmayẹ haa.

Ụka ká imwawụ ọhẹ-ẹ́ juwa wuleji hi tọ ọkịla, ọ ka ta angịhyẹ ta nyọka dayị kọ ka hi pwaa myị́. Ịwa wuu kaa wo anụ nya ẹkụrwẹ ụka ookpokpo, ma ị́ ka wuleji ẹdịyẹ ụka ookpokpo ka. Omyi nya ẹkụrwẹ ọ-ka uhye weji ri ang ẹjẹe nyori imwawụ ịla ọmwẹnụ ụtụrụ kị ri iJuda, Isakaa, bala ịSebulọn ka rụ. (Ọwa. 2:3-7; 10:5, 6) Ụka kị rụ kpa, angịkiliya ka chị ẹkụrwẹ ụka oheeye wụrụ ebwo nya imwawụ ịta ịlẹ kị kụ ka oye edii. Angịkiliya ka kịnyaa ịịwẹ gbee ká ebwo ọnyị myí ọnyị ka rụ kpá.

Ọhẹka ẹla ọyẹda ọhẹ ji kpụ ọ lang nyaa-nyaa la ọ-ka ye myị ẹnẹhẹ lẹ. Ịyẹ tị́ du kọ lịnyị? Ọhẹka ọ lang lala o-ri ọyẹda ịwẹ nyị juwa lụmẹ lẹ. Lee, ọhẹka ụgbẹyị ọlẹ kị kaa bwu họ ang ene-ene bang ahị lẹ, du kọ ka háng ịnọ kị́ ka yọọ da kaka. Ó-ri ang myị́ ang kọ du, à ka yẹ jẹ́ nyori ọ lang ujwo nyọka ju ugbodu jaabwọ ká wẹẹ maga nyọka ba agbẹyị inyeewe ịịwa jẹ. Jaabwọ myị́ abwọ kọ tị la, ụka kahị jẹ́ nyori ọ baba kahị ka bọọ jẹ, kahị tị họ ịnyị, ahị ka yẹ nyori Ohe à wẹẹ wahị kụrụụhị lẹ.

Lụka nya iMosisi, iJihova kpa uku-uku nya angịnyị alẹng bala anyang, tụ́ anjwo ụgbẹyị bwu ugbileji. Ó ri ẹhị ọ-kpa rịrị bala ụgbẹyị ọkpakpa nyamwụ ka ịnọ, ị́ ka be myị́ ka. Alẹ, iJihova à wẹẹ kpahị ụgbẹyị bwu ẹpwụ nya ahyẹẹnụ ihyẹẹkpẹ nya odehe onyobyi ọlẹ lẹ. Ọ kaa dahị ụbwọ nyọka ri oligu nyamwụ bala ọ-ka la ọmyịmyị ọnyọọngịrị. Chajị nyọọwa lẹ, ahị wuu a cheje nyọka wuleji ẹdịyẹ jaabwọ ọlẹ ká ala Isirẹlụ kaa họ ụka kị wo omyi nya ẹkụrwẹ mẹ!