ANG ỌJẸ́JẸ 10
Ọháha Bala Ẹla nya IJihova ọ-Myịng Lẹhị ka Gung Gbịla Nyọka Hu Enyi Ohe
“Ịịyẹ a tị́ tụtụm ka ku iwe, du ká ka hum enyi Ohe kaka mẹ?”—ỤKỤR. 8:36.
EJE 37 Serving Jehovah Whole-Souled
ẸHỊ NYA ẸLA *
1-2. Jaabwọ ká ụpwụ nya Ụkụrwọ nya Alẹrụ 8:27-31, 35-38 mẹjẹ, ịyẹ à tị́ gu ọlẹng ọla Itiyopiya gbịla nyọka hu enyi Ohe?
À TỊTỌ á ka hu enyi Ohe nyọka ri ọngọjụgbẹyị nya ịKịrayịsị? Ọháha bala ẹla ọ-myịng lẹhị ka gung gbịla nyọka cheje ọwẹ. Kụ irya nya ẹla ọlẹ kọ họ ẹ-ẹga nya ọlẹng ọhẹ ọlẹ kọ kaa họ ụkụrwọ ha adịrahụ ọnyang nya ala Itiyopiya wẹẹ.
2 Ọlẹng ọla Itiyopiya ọwẹ hu enyi Ohe ahyaahị nyọlẹ kọ jẹ́ bwu Ụpwụ Ịgọgọ nyori ọ chịla kọ ka họ ịnyị. (Wa Ụkụrwọ nya Alẹrụ 8:27-31, 35-38.) Ịyẹ à tị́ gwoo gbịla nyọka họ ịnyị? Omyi ẹla nya Ohe Oluhye myọọ lẹhị, chajị ọ wẹẹ wa ọgba ọhẹ bwu ụpwụ nya Ayịsaya ụka ọlẹ kọ hụhụ ẹ-ẹpwụ nya ang ọrụnyẹ nyamwụ. Nyọlẹ ká iFilipu tị ya ẹla balọọ kpá, ẹla ọlẹ ká iJisọsị họ họọ myọọ lẹhị ịnyịnyị. Ma, ịyẹ tị́ du ká ọlẹng ọwẹ ka iJerusalẹm ene? Chajị iJihova họ́ọ. Ahị tị́ họ anyị kahị jẹ́? Ọ ka iJerusalẹm kaka gbịgba ha iJihova ịnyị. Ọlẹng ọwẹ rụ hi ịgba ọgbagba ọlẹ kị mọọ ẹ-ẹpwụ nyamwụ kaka yẹjula ẹpwụma ookpokpo ọlẹ kị ya ịlaa chị ịgọgọ ha Ohe nyịlẹhị. Ọháha ọlẹ kọ la ẹ-ẹga nya iJihova wẹ à myịmyị gwoo gbịla nyọka hu ẹta ẹdịyẹ ọkịla ọle kọ baba lẹ. O hu enyi Ohe nyọka ri Ọngọjụgbẹyị nya ịKịrayịsị.—Mat. 28:19.
3. Ịyẹ à tị́ ka wu ọngịnyị kpa la o-hu enyi Ohe myị́? (Yẹ akpa ọlẹ ko ri, “ Ịyẹ à tị́ Juwa ọ-Ọkịlẹtụ Nyang?”)
3 Ọháha ọlẹ ká la ẹ-ẹga nya iJihova ka jẹ́-ẹ gung gbịla nyọka hu enyi Ohe. Ma, ọháha ịnyịnyị tị ka jẹ́-ẹ wung kpa la ọ-họ ịnyị. Ányị ọ tị ka bwu lịnyị? Ọ-chụ pwokwita, alugbiyegu nyang bala aligu nyang ịlẹ kị jẹ́ iJihova ka, ka háng yẹẹyẹẹ myị́, du ká ka chuko nyori à ka waa ẹjẹ kori ká hu enyi Ohe. (Mat. 10:37) Lee abwẹla ịhyẹ ịlẹ ká jẹ́ nyị wụ́ Ohe Oluhye ẹjẹ tị ka háng myị́, du kọ ka lang ujwo nyọka pẹhyaa. (Eje. 97:10) Ọ tị chịkpẹẹ ịnyịnyị nyori, bwu eji-eji à kaa họ ịhọhọ nya ẹka ịhyẹ ịlẹ kị dori wu ịgba ọgbagba nya ọnọọkịla. Ang ịkpịpyọ-kpịpyọ ịlẹ kanụ tị kaa họ lụka nya ẹka ịwẹ tị háng yẹẹyẹẹ. Chajị nyọọwa lẹ, ọ ka lang ujwo myị́ nyọka cheji ba hi ịhọhọ ịlẹ kị wụ́ iJihova ẹjẹ. (1 Kọr. 10:20, 21) Ịtọ ẹla ọlẹ á tị ka tịlọng ri, “Ịyẹ lee owo à tị́ hám gụ?”
ỌNGỌLẸ KỌ KA HÁAHỊ GỤ WUU
4. Ịyẹ à tị́ ka guhi gbịla nyọka hu enyi Ohe gụgụụgụ?
4 Ang ịnyịịla lụmẹ-lụmẹ ji ịlẹ kị háng bala ọ-myịng lẹhị. Ọ-chụ pwokwita, ene kaa dọmwụ nyọka jẹ́ ịBayịbụụ bala Alibeenu nya iJihova, ẹla ọlẹpwụ nya ịBayịbụụ ka myịng lẹhị yẹẹyẹẹ myị́. IJisọsị tị ka háng yẹẹyẹẹ ịnyịnyị myị́. Ọlẹẹlẹẹ ká tị jẹ́ Alibeenu nya iJihova, ọ kaa háng nyọka yẹjulaa. Ma, a-ang ịnyịịla ịwẹ ọ-háng há à ka gung gbịla nyọka hu ịlọng ju iJihova ụ-ụbwọ bala o-hu enyi Ohe ka. Ang ọlẹ kọ ka gung gbịla nyọka hu enyi Ohe gụgụụgụ ri ọháha ọlala ẹ-ẹga nya iJihova ayịdang. Kori ká iJihova á háng gụ ang ịkịla wuu, á ka ya iwe da ha ịngịngịhyẹ lee ọngọngọhẹ nyọka hung abwọ hi ịgba ọgbagba nyamwụ ka. Lẹ, ọháha ọlala ẹ-ẹga nya iJihova ka gung gbịla nyọka hu enyi Ohe bala ọ-dang ụbwọ nyọka godayị giri-giri ẹ-ẹga nyamwụ kori ká hu enyi Ohe kpá.
5. Ịtọ ẹla iyina ahị tị́ ka kụ ẹhị yẹ?
5 IJisọsị ya nyori iJihova nyị ka háahị bwu ẹpwụ nya ọkịlẹtụ, ugbodu okpukpuru, irya omeme, bala ọngịrị nyahị wuu. (Mak. 12:30) Ányị a tị́ ka bwu la ọháha bala ihi ojuju okpori-kpori ụma ọlịịwẹ ẹ-ẹga nya iJihova? Kori kahị kụ irya u-uhye nya ọháha ọlẹ ká iJihova la ẹ-ẹga nyahị, ọ ka guhi gbịla nyọka la ọháha họọ. (1 Jọn. 4:19) Irya bala abwẹla ụma iyina a tị́ ka la kori ká la ọháha ụma ọwẹ kọ baba gụgụ wuu? *
6. Jaabwọ ká ụpwụ nya Ala iRom 1:20 mẹjẹ, ụgbẹyị oyina ahị tị́ ka jẹ́-ẹ bwu jẹ́ ang u-uhye nya iJihova?
6 Jẹ́ ang u-uhye nya iJihova bwu ang ịlẹ kọ họ. (Wa Ala iRom 1:20; Ọwụ. 4:11) Kụ irya u-uhye nya ekeji bala iyo ịlẹ ká iJihova họ bala abwọlẹ kị chị ẹla ọjẹ́jẹ nyamwu ehe. Jẹ́ ang pyịnyẹng u-uhye nya ụgbẹyị ọlẹ ká iJihova họ ịnyịrọ nyang. (Eje. 139:14) Myịmyị kụ irya u-uhye nya ọngịrị ọlẹ ká iJihova ya ha ẹnụ, ko ri ookpokpo ẹ-ẹpwụ nya uku-ụnọ nya ịdịchụ. * (Ayị. 40:26) Jaabwọ ká wẹẹ kụ irya u-uhye nya ang ịwẹ, à ka ju iJihova ihi kpori-kpori gụ ọwọwa. Ma, ahụ ọ-jẹ́ nyori iJihova jẹ́ ẹla yẹẹyẹẹ bala ọ-la ọngịrị ri itiwe nya igu oriri nyang balọọ wẹẹ ịnyị. À baba nyọka jọ́ọ gụ ọọwa nyọka ju ọháha nyang ọngịrị ẹ-ẹga nyamwụ.
7. Kori ká iJihova á ka háng kpori-kpori aalẹ, ẹlịyẹ a tị́ baba nyọka jẹ́ myị̀myị̀?
7 À baba nyọka jẹ́ myị̀myị̀ nyori iJihova kpahị jung ahụ kpangga. Ọ lang ujwo nyọka myị ọnụ nyori Ọngọlẹ kọ họ epwoohe bala odehe jẹ́ nyori à juwa ẹ-ẹgẹhẹ bala ọ-kpahị jung? Kori kọ lịnyị, kpịtịya nyori iJihova á ‘lụrụ hiihi ahị angịnyị ehe kpong-kpong ka.’ (Ụkụr. 17:26-28) Ọ “jẹ irya bala obyi omeme ọlọkịlẹtụ nya angịnyị wuu,” ọ tị chị ehe nyori, kori “ká tịtọ nyamwụ, à ka yọọ.” (1 Ego. 28:9) Ang odudu ká dọmwụ wẹẹ jẹ́ ịBayịbụụ lẹẹlẹẹ ri ọchajị nyọlẹ ká iJihova gbileng chị ịlọmwụ ọgụ. (Jer. 31:3) Jaabwọ ká wẹẹ jẹ́ ang ịlẹ ká iJihova họ hang gụ ọwọwa, ịnyịnyị ọháha nyang ẹ-ẹga nyamwụ à ka juwa la ọngịrị kịlahị-ịlahị lẹlẹ.
8. Ányị a tị́ ka bwu mẹjẹ nyori ọháha nya iJihova myịng lẹhị?
8 Ụgbẹyị ọhẹ ọlẹ kahị ka jẹ́-ẹ mẹjẹ nyori ọháha nya iJihova myịhị lẹhị ri ọ-ka ya ẹla balọọ ẹ-ẹpwụ nya abwọ ọrịrị. Ọháha nyang ẹ-ẹga nya iJihova ka juwa la ọngịrị jaabwọ ká wẹẹ ya ẹla joo u-uhye nya ang ịlẹ kị ri uko ọchịchị nyang bala o-joo obe nya ang ịlẹ kọ họ hang. Igu nyang bala iJihova tị ka la ọngịrị ịnyịnyị jaabwọ ká wẹẹ ye ọwẹwẹ nya abwọ ọrịrị nyang. (Eje. 116:1) À ka myị ọnụ nyori ọ jẹ́ng yẹẹyẹẹ. Ma, kori ká ka tụ́ ju iJihova chwẹẹ gụ ọwọwa aalẹ, à baba nyọka jẹ́ ang ịlẹ kị họ́ọ, ang ịlẹ kị wọọ ẹjẹ, bala abwọlẹ kọ kaa họ ang ọhẹ bala ọkịla. À baba nyọka jẹ́ ang ọlẹ kọ tịtọ bwu ẹga nyang ịnyịnyị. Ụgbẹyị ookpokpo ọlẹ kem á ka jẹ́-ẹ bwu la ẹla ọjẹ́jẹ ọwẹ à ri ịBayịbụụ ọjẹ́jẹ lẹlẹ.
Ụgbẹyị ọlẹ kọ há gụ wuu nyọka tụ́ ju Ohe Oluhye chwẹẹ bala ọ-jẹ́ ang ọlẹ kọ tịtọ ri ịBayịbụụ ọjẹ́jẹ (Yẹ ọgba 9) *
9. Ányị a tị́ ka bwu mẹjẹ nyori ịBayịbụụ myịng lẹhị?
9 Omyi Ẹla nya Ohe Oluhye a myịng lẹhị. Ẹ-ẹpwụ nya ịBayịbụụ kem ẹlịlẹhị chajị nya iJihova bala irya ọlẹ kọ la u-uhye nyang à ji lẹ. À ka mẹjẹ nyori ịBayịbụụ myịng lẹhị bwula ọ-wọọ ẹnụ myị́ ẹnụ, nwụlanọ gbe ang ọjẹ́jẹ nyang, bala ọ-kpa ang ọlẹ ká wẹẹ jẹ́ họ ụkụrwọ. (Eje. 119:97, 99; Jọn. 17:17) À hu ụka nọ nyọka wa ịBayịbụụ ẹnụ myị́ ẹnụ? À kaa ba ụka ọọwa jẹ?
10. Ịyẹ à tị́ ri ang ookpokpo ọhẹ ẹ-ẹpwụ nya ang ịlẹ kị du ká ịBayịbụụ datị hi apwụ ịkịla?
10 Ang ookpokpo ọhẹ ẹ-ẹpwụ nya ang ịlẹ kị du ká ịBayịbụụ datị hi apwụ ịkịla ri, angịlẹ kị da oja nya iJisọsị yọọ lẹhị nya ịlaa. Ọwa kem à ri ụpwụ ọlẹ kọ ya ẹla ọlẹ ká iJisọsị họ hang kpẹẹkpẹẹ lẹ. Jaabwọ ká wẹẹ jẹ́ ẹla ọlẹ ká iJisọsị ya bala ọhọhọ, ọ ka háng nyọka ri igu balọọ.
11. Ịyẹ à tị́ ka dang ụbwọ nyọka la ọháha ha iJihova?
11 La ọháha ẹ-ẹga nya iJisọsị, aalẹ ọháha nyang ẹ-ẹga nya iJihova ka la ọngịrị. Ịyẹ tị́ du? Chajị iJisọsị kaa gbịla abwụma nya Adamwụ kpẹẹkpẹẹ. (Jọn. 14:9) Lẹ jaabwọ ká wẹẹ jẹ́ ang u-uhye nya iJisọsị, ịnyịnyị a ka jẹ́ iJihova bala ẹla nyamwụ ọ-myịng lẹhị kịlahị-ịlahị lẹ. Kụ irya nya ahyẹẹrwẹrwa ọlẹ ká iJisọsị la u-uhye nya alẹbyahị, alẹdụrụ, bala angị dẹwụ-dẹwụ ịlẹ ká angịnyị ịlụka nyamwụ kaa yẹhị da bwee wẹẹ. Kụ irya ịnyịnyị u-uhye nya ẹla ọlẹ kọ mẹjẹ́ng bala abwọlẹ ká ọhịhị nyang há gụ olene nyọlẹ ká kpa họ ụkụrwọ wẹẹ.—Mat. 5:1-11; 7:24-27.
12. Ọháha ọlala ẹ-ẹga nya iJisọsị tị́ ka gung gbịla nyọka họ ẹlịyẹ?
12 Ọháha nyang ẹ-ẹga nya iJisọsị ka la ọngịrị gụ ọwọwa jaabwọ ká wẹẹ kụ irya kpori-kpori u-uhye nya iya ọlẹ kọ kịla chajị ká iJihova ka jẹ́-ẹ hịnyọhi ịhọbịrị nyahị. (Mat. 20:28) Kori ká jẹ́ nyori iJisọsị ya ịlọmwụ ha nyọka gbu chajị nyang, ọọwa ka gung gbịla myị́ nyọka yẹda bala ọ-tịtọ nya ọhịnyọhi bwu ẹga nya iJihova. (Ụkụr. 3:19, 20; 1 Jọn. 1:9) Jaabwọ ká wẹẹ la ọháha ẹ-ẹga nya iJisọsị bala iJihova, ịnyịnyị a ka tịtọ nyọka tụ́ ju angịlẹ kị la irya ọlịnyịịnyị chwẹẹ lẹ.
13. Ịyẹ iJihova à tị́ ya hang?
13 La ọháha ẹ-ẹga nya ugbiyegu nya iJihova. Alugbiyegu nyang ịlẹ kị jẹ́ iJihova ka bala aligu nyang inyogo á ka jẹ́ ang odudu ká tịtọ nyọka hu ịlọng ju iJihova ụ-ụbwọ ka myị́. Ị dọmwụ ka tụ́ng pyịpyị myị́. IJihova tị ka dang ụbwọ bwula ọ-ya ugbiyegu nya olegu hang. Kori ká tụ́ ju ugbiyegu nya olegu ọwẹ chwẹẹ, à ka ye ọháha bala ụbwọ ọdada ọlẹ ká baba. (Mak. 10:29, 30; Hib. 10:24, 25) Kori kọ nọ chẹẹ, alugbiyegu nyang ka dọmwụ nyọka gbịgba ha iJihova balang bala o-ju ihi nya ehile nyamwụ myị́.—1 Pit. 2:12.
14. Jaabwọ ká ụpwụ nya 1 ịJọn 5:3 ya, ẹlịyẹ a tị́ wẹ ka yẹ u-uhye nya ehile nya iJihova?
14 Ehile nya iJihova a myịng lẹhị ká kpa họ ụkụrwọ. Ene ká-à wẹ ka jẹ́ iJihova, ọhẹka à kaa chị eje hịlọng u-uhye nya ang ọlẹ kọ há bala ang ọlẹ kọ tịpyọ, ma ọlẹẹlẹẹ à yẹ nyori ehile nya iJihova à há gụ lẹ. (Eje. 1:1-3; Wa 1 ịJọn 5:3.) Kụ irya nya ẹla ọlẹ ká ịBayịbụụ mẹjẹ ọrụ-ahụ, ahụ, adịda bala ịnịna, bala anjwo wẹẹ. (Efe. 5:22–6:4) Nyọlẹ ká ugbiyegu nyang kpa ẹla ọwẹ họ ụkụrwọ lẹ, anụ chị ọkẹkẹnị gụ ọwọwa? Nyọlẹ ká ju ihi nya ẹla ọmẹjẹ nya iJihova u-uhye nya aligu ịnyịịla ọchụchụ lẹ, à yẹ nyori abwẹla nyang há gụ olene? À chị ọkẹkẹnị gụ ọwọwa? (Etu 13:20; 1 Kọr. 15:33) Ọwẹwẹ nya ịtọ ẹla ịwẹ ka ri, ee myị́.
15. Ányị a tị́ ka họ kori ká baba nya ụbwọ ọdada nyọka kpa itiwe nya ehile ịlẹpwụ nya ịBayịbụụ họ ụkụrwọ?
15 Ụka ọhẹ, ọ ka lang ujwo myị́ nyọka jẹ́ jaabwọ á ka bwu kpa itiwe nya ehile ịlẹpwụ nya ịBayịbụụ ịlẹ ká wẹẹ jẹ́ họ ụkụrwọ. Ịnyị à du ká iJihova kpa ogu nyamwụ họ ang abwọ ị-da ịBayịbụụ wụlẹ, nyọka dang ụbwọ gu ang ọnyịịla ene hi ọtịpyọ lẹ. (Hib. 5:13, 14) Kori ká wa apwụ ịwẹ bala ọ-jáa yẹẹyẹẹ, à ka yẹ jaabwọ ká itiwe nya ehile ịlẹpwụ nya ịBayịbụụ la kpụrụrụ bala o-ju apyobwuna kaka ba. Ọ ka du ká ka tịtọ nyọka wẹ ẹpwụ nya ogu nya iJihova.
16. Ányị iJihova à tị́ nwụla angịnyị nyamwụ nọ?
16 La ọháha ẹ-ẹga nya ogu nya iJihova bala ọ-godayị giri-giri họọ. IJihova ya angịnyị nyamwụ ju ẹ-ẹpwụ nya ọjịra-jịra ịdatị-datị. IJisọsị ọnyị nyamwụ à tị ri olegbeju nyaa wuu lẹ. (Efe. 1:22; 5:23) IJisọsị chụ ebwo ochiche ọhẹ nya angịlẹ ká Ohe ya ida wụ́ nyọka kpịlahị ẹ-ẹpwụ nya ụkụrwọ ọlẹ kọ tịtọ ká angịnyị nyamwụ ka họ alẹ. IJisọsị wụrụ ebwo ọwẹ nya “ọnchẹ ọ-chịla o-hu ọkịlẹtụ ha bala ọngọ jẹ́ ẹla.” Angịwẹ tị kaa yahị ju ụkụrwọ nyaa nyọka ya ang oriri nya olegu hang bala o-chewu ke igu oriri nyang bala iJihova. (Mat. 24:45-47) Ụgbẹyị ọhẹ ọlẹ ká ọnchẹ ọ-chịla o-hu ọkịlẹtụ haa kaa kpẹhị rịrịng ri ọ-chụ alẹng ịlẹ kị pwoku nyọka ri angịgbahị nya ọjịra-jịra ịlẹ kị ka gbeng bala ọ-kpang ụgbẹyị. (Ayị. 32:1, 2; Hib. 13:17; 1 Pit. 5:2, 3) Angịgbahị ịwẹ nwụlanọ nyọka ya ịlaa dẹẹchụ dẹja hang, kpụ́ng ẹjẹ, bala ọ-dang ụbwọ nyọka tụ́ ju iJihova chwẹẹ gụ ọwọwa. Ma, ang o-ju apyobwuna ọhẹ ọlẹ kị ka jẹ́-ẹ họ hang ri ọ-ka dang ụbwọ nyọka mẹ ang jẹ angịkịla chajị nya iJihova.—Efe. 4:11-13.
17. Jaabwọ ká ụpwụ nya Ala iRom 10:10, 13, 14 mẹjẹ, ịyẹ tị́ du kahị kaa ya ẹla ju angịkịla u-uhye nya iJihova?
17 Da angịkịla ụbwọ nyọka la ọháha ha iJihova. IJisọsị byi angịjụgbẹyị nyamwụ nyị mẹ ang jẹ angịkịla u-uhye nya iJihova. (Mat. 28:19, 20) Ọ chịkpẹẹ kahị ka ju ihi nya ehile ọwẹ ịịwẹ myị́ chajị ahị jẹ́ nyori o ri ehile ọlẹ kahị baba nyọka kpa. Ma, jaabwọ ká ọháha nyang ẹ-ẹga nya iJihova wẹẹ nwà kịlahị-ịlahị, à ka la irya ọlẹ ká iPita bala ịJọn la. Ị yẹkẹẹ: “Áhị́ ka jẹ́-ẹ tụ ọnụ nyahị pịrị myị́, hi ọ-ka juwa kpa ya ẹla dodehe . . . u-uhye nya ang ịlẹ kahị yẹ lẹhị nya ịlọhị bala ọ-kpa ụrụ nyahị wo pyii kaka.” (Ụkụr. 4:20) Ahị ka chị ọkẹkẹnị yẹẹyẹẹ kori kahị jẹ́ da ọngịnyị ụbwọ wẹ ka la ọháha ẹ-ẹga nya iJihova. Kụ irya jaabwọ ká iFilipu ka chị ọkẹkẹnị kaka ba ụka ọlẹ kọ da ọlẹng ọla Itiyopyiya ụbwọ jẹ́ ẹlịlẹhị ịlụpwụ ịgọgọ bala o-hu enyi Ohe wẹẹ! Kori ká ba ọgụ-ẹpẹtẹ nya iFilipu jẹ bwula o-ju ihi nya ehile nya iJisọsị nyọka ya ẹrụ ọnyịịla, ọọwa ka mẹjẹ nyori à tịtọ nyọka ri Olibeenu nya iJihova. (Wa Ala iRom 10:10, 13, 14.) Ọhẹka ụka ọwẹ, à ka tọ ịtọ ẹla ọlẹ ká ọlẹng ọla Itiyopyiya ọlaanyị tọ yẹkẹẹ: ‘Ịịyẹ a tị́ tụtụm ka ku iwe, du kám ka hu enyi Ohe kaka mẹ?’—Ụkụr. 8:36.
18. Ẹlịyẹ ahị tị́ ka kụ ẹhị yẹ a-ang ọjẹ́jẹ ọkịla?
18 À ka hu ẹta ẹdịyẹ ọlẹ kọ ri ọtụka gụgụ wuu ọ-ọhịhị nyang ụka ká cheje nyọka hu enyi Ohe. Chajị nyọlẹ kọ tị ri ẹta ẹdịyẹ ọtụka lẹ, à baba nyọka kụ irya kpori-kpori u-uhye nya ẹla ọlẹ kọ juwa ẹ-ẹpwụ nyamwụ. Ẹlịyẹ á tị́ baba nyọka jẹ́ u-uhye nya enyi Ohe ohuhu? Ịyẹ a tị́ baba nyọka họ ene á ka hu enyi Ohe bala ụka ká họ ịnyị kpá? Ahị ka ye ọwẹwẹ nya ịtọ ẹla ịwẹ a-ang ọjẹ́jẹ ọkịla.
Eje 2 IJihova à Ri Ẹnyị Nyang Lẹ
^ par. 5 Angịhyẹ ịlẹ ká iJihova há, á jẹ́ myị̀myị̀ kori kị nwụlanọ nyọka hu enyi Ohe nyọka ri Alibeenu nyamwụ lẹka. Kori ká la irya ọlịnyị, ang ọjẹ́jẹ ọlẹ ka dang ụbwọ nyọka kụ ẹhị yẹ ịngịhyẹ ịlẹ ká ka họ chajị nyọka hu enyi Ohe.
^ par. 5 Angịnyị datị-datị hi awụlẹ. Lẹ, ụgbẹyị ọlẹ kị kaa bwu kpa ahị nya ẹla ịlẹ kị gba kpehe a-ang ọjẹ́jẹ ọlẹ họ ụkụrwọ, datị hi awụlẹ ịnyịnyị.
^ par. 6 Nyọka ye ọ-chụ pwokwita ịkịla, yẹ apwụ ịlẹ kị ri, Was Life Created? bala The Origin of Life—Five Questions Worth Asking.
^ par. 61 ABWỌ ỌCHỊCHỊ NYA IFOTO: Ọọnahị ọnyang ya ịtịrakị ha ọnyang ọhẹ ọlẹ kọ tọ ụka kọ wẹẹ ra ang.
