1-2. Ịyẹ à tị́ ri etu nya ẹla ọlẹ ká iJisọsị ya ụ-ụpwụ nya ịJọn 4:35, 36?

IJISỌSỊ wẹẹ jẹdịyẹ bwu ụgbẹyị nya ẹrụ ọhẹ. Ọ chịkpẹẹ kọ ka ri ẹrụ nya ajẹ nya amẹ ịlẹ kị wụrụ nya ibali, kị ju jwee-jwee myị́. (Jọn. 4:3-6) Ọ ka hi lala ọya ine ene ká ang-ẹrụ ịwẹ ka há kpụ ọ-ka chịchị. Ịnyị à du ká ẹla ọlẹ ká iJisọsị ya la ẹbyẹbyị lẹ. O yẹkẹẹ: “Anụ hu ẹhị nyanụ hwaa kanụ chẹhị kele kaka yẹ . . . egbe nya ekeji [ang-ẹrụ] ịlẹ kị gaga kpụ, ọ-ka tụguru lẹ.” (Wa ịJọn 4:35, 36.) Ịyẹ à tị́ ri etu nya ẹlẹwẹ?

² O ri nyịlẹhị nyori iJisọsị wẹẹ ya ẹla u-uhye nya angịnyị ọ-tụguru, a-ang ẹrụ ka. Kụ ẹhị yẹ ẹla ọlẹ kọ họ wẹẹ. Nanana nyori, ala iJuu kaa cheji ba hi ala ịSameriya, iJisọsị ya ẹla nya Ohe ju ọnyang ọla ịSameriya ọhẹ, ọ tị ke ụrụ! Ụka ọlẹ ká iJisọsị dọmwụ wẹẹ ya ẹla u-uhye nya ‘ang-ẹrụ ịlẹ kị gaga kpụ, ọ-ka tụguru,’ iru nya ala ịSameriya ịlẹ ká ọnyang ọwẹ ya ẹla ju u-uhye nya iJisọsị wẹẹ pa tọ́ọọ wẹ ẹga nyamwụ nyọka jẹ́ ang ịnyịnyị. (Jọn. 4:9, 39-42) Ẹla ọhẹ ọlẹ kị da kpehe u-uhye nya oja ọla ịBayịbụụ ọwẹ yẹkẹẹ: “Nyọlẹ ká angịwẹ wẹ ẹga nya iJisọsị ahyaahị bala o-ke ụrụ wo ẹla nyamwụ wẹẹ, . . . ọ mẹjẹ nyori ị lala ang-ẹrụ ịlẹ kị ga kpụ ọ-tụguru lẹ.”

3. Ányị ọ-yẹ angịnyị ụ-ụgbẹyị ọlẹ ká iJisọsị yaa à tị́ ka dang ụbwọ nyọka ri ọngọmẹjẹ ọlam-ọlam?

³ Ányị a tị kaa họ ẹ-ẹga nya angịlẹ á kaa ya ẹrụ ọnyịịla ju? À kaa yaa lala ang-ẹrụ ịlẹ kị ga kpụ ọ-tụguru lẹ? Kori kọ lịnyị aalẹ, ang ịta ka họ mẹjẹ. Ọhọhẹ, a ka ya ẹla nya Ohe lagaga gụ olene. Ụka nya ang ọ-tụguru la kpii; ụka á kaa ji nyọka bịrị kpongkpong ka. Oheeye, à ka chị ọkẹkẹnị ụka ká angịnyị á ke ụrụ wo oja ọnyịịla ọlẹ. ỊBayịbụụ yẹkẹẹ: “Angịnyị kaa chị ọkẹkẹnị lụka nya ang-ẹrụ ọwụwụ.” (Ayị. 9:3) Ọhata, à ka yẹ ọngọngọọngụ lala ọngọlẹ kọ ka jẹ́-ẹ ri ọngọjụgbẹyị myị́, lẹ a ka nwụ̀ ẹla oyaya nyang họ ka ang ọlẹ kọ ka kpụ ọngọọwa ịpyọ lẹlẹ.

4. Ẹlịyẹ ahị tị́ ka jẹ́ bwu ẹga nya ọlẹrụ ịPọlụ, a-ang ọjẹ́jẹ ọlẹ?

 ⁴ IJisọsị á be ala ịSameriya deeji jaabwọ ká angịjụgbẹyị nyamwụ ịhyẹ ka họ myị́ ka. Ọkọkọ nyọọwa, ọ yaa lala angịlẹ kị ka jẹ́-ẹ ri angịjụgbẹyị myị́. Ahị ịnyịnyị baba nyọka yẹ aloye nyahị lala angịlẹ kị ka jẹ́-ẹ ri angịjụgbẹyị nya ịKịrayịsị myị́. Ọlẹrụ ịPọlụ ya ọgụ-ẹpẹtẹ ọnyịịla-ọnyịịla deeji hahị nyọka ba jẹ. Ẹlịyẹ ahị tị́ ka jẹ́ bwu ẹga nyamwụ? A-ang ọjẹ́jẹ ọlẹ, ahị ka ya ẹla u-uhye nya abwọlẹ kọ bwu (1) jẹ́ ang u-uhye nya ọmyịmyị nya angịlẹ kọ kaa ya ẹla nya Ohe ju, (2) jẹ́ ẹla ọlẹ kọ ka kpaa ịpyọ, bala (3) ọ-yaa lala angịlẹ kị ka jẹ́-ẹ ri angịjụgbẹyị nya iJisọsị.

5. Ịyẹ tị́ du ká ịPọlụ jẹ́ ọhịhị nya angịlẹ kọ wẹẹ ya ẹla ju u-ube ọ-mẹ ẹla nya Ohe Oluhye jẹ?

⁵ ỊPọlụ kaa ya ẹla nya Ohe u-ube ọ-mẹ ẹla nya Ohe Oluhye jẹ nya ala iJuu gụgụụgụ. Ọ-chụ pwokwita, u-ube ọlịnyị ọhẹ ị-ịTẹsalonayịka, ịPọlụ “juwa kpa ẹla nya Ohe Oluhye bwu Ụpwụ Ịgọgọ da ẹla wụlẹ ya jẹ ala iJuu . . . lala ẹpwụ nya epwihi ịta gbẹgbịlẹgbẹ.” (Ụkụr. 17:1, 2) Ọ chịkpẹẹ nyori ịPọlụ jẹ́-ẹ yi ịlọmwụ da u-ube ọ-mẹ ẹla nya Ohe Oluhye jẹ chajị o ri ọla iJuu. (Ụkụr. 26:4, 5) ỊPọlụ jẹ́ ọhịhị nya ala iJuu, lẹ ọ jẹ́-ẹ ya ẹla nya Ohe jaa la o-juhi ka. —Filip. 3:4, 5.

6. Ányị angịlẹ ká ịPọlụ ya ẹla nya Ohe ju ojiya nya ihi ọla Atẹnsị à tị́ bwu datị hi angị ịla ube ọ-mẹ ẹla nya Ohe jẹ?

⁶ Nyọlẹ ká angị tụ́ ịPọlụ pyịpyị kwoo rụ hi ịTẹsalọnayịka bala iBeriya lagbụrụ, ọ rụ ka epweji nya Atẹnsị. ỊPọlụ myịmyị “ka ube ọ-mẹ ẹla nya Ohe Oluhye jẹ nya ala iJuu ọlụwa, juwa kpa ẹla nya Ohe Oluhye ya ẹla ta ala iJuu . . . bala ala iJentayịlị ịlẹ kị ri angịnyị nya Ohe Oluhye ụ-ụwa ịnyịnyị.” (Ụkụr. 17:17) Ụka ọlẹ ká ịPọlụ tị wẹẹ ya ẹla nya Ohe ojiya nya ihi, ọ tọ angịnyị ịdatị. Angịhyẹ nyaa ri angị jẹ́ ang u-uhye nya ọhịhị olodehe ọlẹ bala ala iJentayịlị ịlẹ kị yẹ ẹla nya ịPọlụ lala “ọmẹjẹ onyeewe.” Ị byoo yẹkẹẹ: “Ang ọmẹjẹ nyang ọwẹ rihi onyeewe ụ-ụrụ.”—Ụkụr. 17:18-20.

7. Ányị ịPọlụ à tị́ bwu yẹ ụgbẹyị nya ẹla Ohe oyaya nyamwụ da, jaabwọ ká ụpwụ nya Ụkụrwọ nya Alẹrụ 17:22, 23 mẹjẹ?

⁷ Wa Ụkụrwọ nya Alẹrụ 17:22, 23. Ụ-ụgbẹyị ọlẹ ká ịPọlụ kpa ya ẹla nya Ohe ju ala iJuu ịla ube ọ-mẹ ẹla nya Ohe jẹ, ọ kpa ẹ-ẹga nya ala iJentayịlị ịla Atẹnsị ka. Ọ chịkpẹẹ ká ịPọlụ ka tịlọmwụ wo myị nyori, ‘Ẹlịyẹ angị ịla Atẹnsị à tị́ myị la?’ Ọ kpẹhị chịng yẹ ang ịlẹ ká angịnyị kaa họ bala ọ-kpa ịhọhọ nya ịgba ọgbagba nyaa i-irya. Myịmyị, ụka ọlẹ ká ịPọlụ ka ya ẹlịlẹhị ọla Ụpwụ Ịgọgọ jaa, ọ dọmwụ la ang ịlẹ kị myị ju ene-ene lẹ. Ọngọ jẹ́ ang yẹẹyẹẹ ọhẹ da ụpwụ  u-uhye nya ẹlẹwẹ yẹkẹẹ: “Nyọlẹ kọ ri ọngịnyị nya ịKịrayịsị ọlẹ kọ ri ala iJuu, ọ yẹ nyori ala iGiriki ịlẹ kịị gbịgba ha ihye nya ijiga á kaa gbịgba ha Ohe ọlẹ ká ala iJuu bala angịnyị nya ịKịrayịsị ya nyị ri Ohe ‘nyịlẹhị’ ka. Ma, ọ maga nyọka mẹjáa nyori Ohe ọlẹ kọ wẹẹ ya ẹla u-uhye nyamwụ á ri ọngga ẹ-ẹga nyaa ịnyịlẹhị ka.” Lẹ ịPọlụ nwụlanọ nyọka yẹ ụgbẹyị nya ẹla oyaya nyamwụ da. O byi ala Atẹnsị nyori ẹla ọlẹ kọọwa nyị wẹẹ ya nyị bwu ẹga nya “Ohe ọlẹ [kị] jẹ́ jẹ́ ka” kị tị wẹẹ maga nyọka gbịgba ha. Nanana nyori ala iJentayịlị á jẹ́ ẹla ọla Ụpwụ Ịgọgọ lụmẹ ka, ịPọlụ á me irya nyori nyị́ ka jẹ́-ẹ ri angịnyị nya Ohe myị́ ka lẹ ka. Ọkọkọ nyọọwa, ọ yaa lala ang-ẹrụ ịlẹ kị gaga kpụ ọ-ka tụguru lẹ, ọọwa ọ yẹ ụgbẹyị ọlẹ kọ ka bwu ya ẹrụ ọnyịịla da lẹlẹ.

8. (a) Ịyẹ à tị́ ka dang ụbwọ jẹ́ ang ọlẹ ká aloye nyang myị la? (b) Kori ká ọngịnyị-ị́ ya ọwa nyị la ịgba ọgbagba nyịlọwa, ányị a tị́ ka wẹ?

⁸ Kpẹhị chịng nya ẹla, lala ịPọlụ. Mwahị nya ang ịlẹ kị ka dang ụbwọ jẹ́ ẹla ịlẹ ká aloye nyang myị la. Ang iyina ọngọọwa à tị́ ya ba ẹ-ẹpwa lee uhye nya ang ọrụnyẹ nyamwụ? Ẹnyị nyamwụ, ang ọkụrụ-kụrụ, abwọlẹ kọ bwu kpịlọmwụ lee ẹla oyaya nyamwụ mẹ ebwo nya ịgba ọgbagba ọlẹ kọ ji jẹ? Ọhẹka ọ dọmwụ bying gbagbịla nyori ọwa nyị la ịgba ọgbagba nyịlọwa lẹ. Ụka ká ọngịnyị á byi Flutura kọ ri ọngọhẹ ọlẹ kọ kaa kpa ụka nyamwụ wuu ya ẹrụ ọnyịịla ịnyị, ọ kaa wẹ yẹkẹẹ, “Ḿ warị nyọka gbileng ka myị ju ang ọlẹ kam myị la lagbụrụ ka, ma m̀ wẹ nyọka ya ẹla u-uhye nya ẹla ọlẹ . . . ”

9. Ẹla iyina ahụ bala ọngọlẹ kọ la ịgba ọgbagba nyịlọmwụ à tị́ ka myị ju lawụlẹ myị́?

⁹ Egbeju nya ẹla iyina a tị́ ka kpa ya ẹla bala ọngọlẹ kọ la ịgba ọgbagba nyịlọmwụ? Maga ká mwahị nya ẹla ịlẹ kanụ myị ju lawụlẹ. Ọhẹka ọ kaa gbịgba ha Ohe okpokpo kem, ọ myị nyori iJisọsị à ri ọngọchịda nya angịnyị ehe lẹ, lee ọ myị nyori ahị jam hịhị lụka nya ọkwọ ọhọhọ ọlẹ kọ ka cheju lụka okpii. Kpa ang ịlẹ kanụ myị ju lawụlẹ wẹ ya ẹla ọla ịBayịbụụ ju ọngọọwa ụ-ụgbẹyị ọlẹ kọ ka kpọọ ịpyọ.

10. Ẹlịyẹ ahị tị́ ka maga nyọka họ? Ịyẹ tị́ du?

¹⁰ Kpịtịya nyori angịhyẹ á ka myị ju ẹla ịlẹ wuu ká ịgba ọgbagba nyaa kaa mẹjẹ ka myị́. Lẹ, kori ká dọmwụ jẹ́ ịgba ọgbagba nya ọngọọwa kpá wẹwẹ, maga ka jẹ́ ang ọlẹ ká ọwa lịlọmwụ myị la. David kọ ri ọngọhẹ ọlẹ kọ kaa kpa ụka nyamwụ wuu ya ẹrụ ọnyịịla ụ-ụwa Australia ya nyori, “Angịnyị lụmẹ-lụmẹ kaa kpa ẹla ọjẹ́jẹ nya angịnyị ehe kpịla la ọmyịmyị nya ịgba ọgbagba nyaa.” Donalta bwu Albania tị yẹkẹẹ, “Angịhyẹ ịlẹ kahị kaa tọ kaa ya ịwa nyị ri ala ịgba ọgbagba ọhẹ, ma ọ tị nọ chẹẹ ị kaa ya ịwa nyị́ myị la Ohe Oluhye ịnyịlẹhị ka.” Ịnyịnyị, ọọnahị ọlẹng ọhẹ bwu Argentina kọ kaa kpa ụka nyamwụ wuu ya ẹla nya Ohe yẹ nyori angịhyẹ kaa ya ịwa nyị myị la Angị Ịta ẹ-Ẹpwụ  nya Ohe Okpokpo, ma ị́ tị kaa myị ịnyịlẹhị nyori Adịda, Ọnyị bala olegu ịgọgọ nyị ri Ohe okpokpo ka. O yẹkẹẹ, “Ọ-jẹ́ ịnyị kaa dam ụbwọ nyọka ye ang ọlẹ kam bala ọngọọwa ka myị ju lawụlẹ.” Lẹ, maga ká jẹ́ ang ọlẹ kọ ri ọmyịmyị nya angịnyị kpangga. Ọọwa, a ka jẹ́-ẹ ‘ya ịlọng dẹẹchụ bala ọ-ya ịlọng dẹja ẹ-ẹga nya ụma nya angịnyị la datị-datị wuu’ jaabwọ ká ịPọlụ họ lẹlẹ.—1 Kọr. 9:19-23.

11. Jaabwọ ká ụpwụ nya Ụkụrwọ nya Alẹrụ 14:14-17 ya, ányị ịPọlụ à tị́ ya ẹla bala ala iLisitira ụ-ụgbẹyị ọlẹ kọ ka kpaa ịpyọ?

¹¹ Wa Ụkụrwọ nya Alẹrụ 14:14-17. ỊPọlụ jẹ́ ang ọlẹ kọ kaa kpụ angịlẹ kọ wẹẹ ya ẹla ju ịpyọ, lẹ ọ yẹ ẹla oyaya nyamwụ da ẹẹ. Ọ-chụ pwokwita, iru nya angịlẹ kọ ya ẹla ju i-iLisitira á la ẹla ọjẹ́jẹ nya Ụpwụ Ịgọgọ gbuu ka lee ọ-dọmwụ jẹ́ ka lichi-lichi. Lẹ, ịPọlụ ya ẹla balaa ụ-ụgbẹyị ọlẹ kị ka jẹ́-ẹ wo etu nyamwụ. O ya ẹla u-uhye nya ang-ẹrụ ọ-nwụ́ egbe lụka nyaa bala ọkẹkẹnị ọchịchị ẹ-ẹpwụ nya ọhịhị. O kpa omyi ẹla bala ọ-chụ pwokwita ịlẹ kị ká la angị ke ụrụ wo lọọ gbagbịla.

12. Ányị a tị́ ka bwu jẹ́ ang ịlẹ kị́ ka kpụ ọngịnyị ịpyọ bala ọ-yẹ ẹla oyaya nyang da?

¹² Kpa irya jẹ́ ang ịlẹ kị kaa kpụ angịnyị ịpyọ o-oye nyang, ká yẹ ẹla oyaya nyang da. Ányị a tị́ ka bwu jẹ́ ẹla ọlẹ kọ ka kpụ ọngịnyị ịpyọ ụka ká juwa jẹ ka ẹga nyamwụ lee ẹpwa nyamwụ? Myịmyị, kpẹhị chịng nya ẹla. Ọhẹka, o juwa kpahị ju ẹpwa nyamwụ, wa ụpwụ, nwụla ang ọrụnyẹ, lee o juwa họ ụkụrwọ ọkịla. À ka dọmwụ nya ẹla oyaya u-uhye nya ang ọlẹ kọ wẹ kpa họ myị́, kori ko pwoku nyọka họ ịnyị. (Jọn. 4:7) Ang ọlẹ ká ọngịnyị kụrụ ka mẹ ẹpwụma nyamwụ, ụkụrwọ lee ebwo nya ala olo ọlẹ kọ kaa họọ jẹ myị́. Gustavo ya nyori, “M̀ dọmwụ nya ẹla oyaya bala okolobya ọhẹ kọ gu ẹka iwo kụrụ ihikichu, kọ kụrụ awụrụ ọlẹ kị́ gba ụrụrụ nya ọngọmweje ọhẹ ká angịnyị jẹ́ yẹẹyẹẹ ba. M̀ tọọ ịtọ ẹla wo u-uhye nya awụrụ ọọwa, lẹ o ya ang odudu ọlẹ ká ọngọmweje ọọwa họ́ọ jem lẹlẹ. Oja ọwẹ kpahị ju ka ẹpwụ nya ịBayịbụụ ojéje. Ọlẹng ọọwa tị wẹ ka ri ọọnahị lẹẹlẹẹ lẹ.”

13. Ányị a tị́ ka bwu ya ẹla nya ịBayịbụụ ọjẹ́jẹ ta ọngịnyị ụ-ụgbẹyị ọlẹ kọ ka kpọọ ịpyọ?

¹³ Ụka ká juwa tịtọ nyọka jẹ́ ịBayịbụụ bala  ọngịnyị, họ kọ́ ka kpọọ ịpyọ; mẹjọ́ọ jaabwọ ká ang ọjẹ́jẹ ọọwa ka dọọ ụbwọ. (Jọn. 4:13-15) Ọ-chụ pwokwita, ọnyang ọhẹ ká ẹla nyahị kpọọ ịpyọ ya ẹga da ha ọọnahị ọnyang ọhẹ kọ ka wẹ ẹpwang nyamwụ. Ụka ká ọọnahị ọọwa pwụ ube kọ yẹ ụpwụ ibeenu ọhẹ u-ugulo ọlẹ kọ mẹjẹ nyori ọnyang ọwẹ ri ọngọ chị ụma ẹ-ẹga nya ụpwụ ọmẹjẹ, o ya ẹla u-uhye nyori ahị ịnyịnyị nyị kaa mẹ ang jẹ angịnyị yẹẹyẹẹ bwula ọ-jẹ́ ịBayịbụụ taa bala ọjịra-jịra nyahị ịlẹ kahị kaa la. Ọnyang ọọwa myị ọnụ nyọka jẹ́ ịBayịbụụ, ọ ka ọjịra-jịra ẹnụtụrụ ọkịla nyamwụ bala ọ-ka ọjịra-jịra nya isekut ahyaahị ẹ-ẹkpẹ nyọọwa. Ọ ka la ẹka okpokpo lẹ, o hu enyi Ohe lẹlẹ. Tịlọng wo wẹẹ: ‘Ịyẹ à tị́ kaa kpụ angịlẹ kam kaa mwẹẹkpẹ ka ẹga nyaa ịpyọ? M̀ ka jẹ́-ẹ chabwọ nya ịBayịbụụ ọlẹ kahị kaa jẹ́ bala angịnyị ụ-ụgbẹyị ọlẹ kọ ka kpaa ịpyọ?’

14. Ányị a tị́ ka bwu yẹ ịBayịbụụ ọmẹjẹ da nyọka pwoku ọngọngọọngụ?

¹⁴ Ụka ká dọmwụ nya ịBayịbụụ ọjẹ́jẹ bala ọngịnyị kpá, nwụlanọ yẹẹyẹẹ ụka myị́ ụka á ka jẹ́ ang balọọ. Kụ irya u-uhye nya ugbiyegu nyamwụ, jaabwọ kọ jẹ́ ụpwụ kaka ba, ẹla ọlẹ kọ chịpwụrụ bwu, bala ang ịlẹ kị kaa kpọọ ịpyọ. Jaabwọ ka wẹẹ nwụlanọ, chụ ụpwụ ịgọgọ ịlẹ á ka wa, ifim ịlẹ á ka mẹjẹ, bala ẹla ị-chụ pwokwita ịlẹ á ka kpa da ẹlịlẹhị ịla ịBayịbụụ wụlẹ. Tịlọng wo nyori, ‘Ẹlịyẹ à tị́ ka kpụ ọngọlẹ kam wẹẹ mẹ ang jẹ ịpyọ yẹẹyẹẹ bala o-gwoo ọ-ọkịlẹtụ?’ (Etu 16:23) Ụ-ụwa Albania, ọnyang ọhẹ ọlẹ ká ọọnahị Flora ko ri ọngọ ye ịlahị nya ụgbẹyị kaa jẹ́ ang bala ya la ọngịrị-ọngịrị yẹkẹẹ: “Ḿ ka jẹ́-ẹ ye ọmẹjẹ nya owuleji bwula igu myị ka.” Flora á byi ọnyang ọọwa nyị ka ye myị lagbụrụ ka. O yẹkẹẹ: “M̀ yẹ nyori ene kọ ka myị ju ẹla nya owuleji bwula igu, ọ baba nyọka jẹ́ Ohe ọlẹ kọ myị ọnụ nya owuleji bwula igu ọọwa jene-jene.” Bwu ụka ọwẹ kịlahị, Flora kaa ya ẹla yẹẹyẹẹ u-uhye nya ọháha, ẹla ọjẹ́jẹ, bala ọngịrị nya iJihova ụka myị́ ụka kọ juwa mẹ ang jọ́ọ. Ụka ohyẹẹkpẹ, ọnyang ọọwa myị ju ẹla nya owuleji bwula igu bwu ẹpwụ ọkịlẹtụ nyamwụ. Lẹẹlẹẹ, o ri Olibeenu nya iJihova ọlẹ kọ kaa chila-ila yẹẹyẹẹ lẹ.

15. Jaabwọ ká ụpwụ nya Ụkụrwọ nya Alẹrụ 17:16-18 ya, abwẹla iyina nya ala iGirisi onyogo à tị́ ri akama nya ịPọlụ? Ịyẹ tị́ du ká abwọ á chọọ pyẹpyẹ ka?

¹⁵ Wa Ụkụrwọ nya Alẹrụ 17:16-18. Abwọ á chị ịPọlụ pyẹpyẹ u-uhye nya ala Atẹnsị ka, nanana nyori epweji nyaa myị̀ la ijiga ịkpụ́kpụ, ụya ọhọhọ, bala ang ọmẹjẹ nya angị gbịgba ha ihye nya ijiga; lee ọ-ya iwe da ido ododo nyaa kpọọ ọkịlẹtụ enyi ka ịnyịnyị. ỊPọlụ lịlọmwụ wẹ ka rị ọngịnyị nya Ohe oluhye, kpá nyọlẹ kọ ri ọngọ “ya ẹla pyị ịKịrayịsị bala ọ-tụ ẹnyị nyamwụ pyịpyị bala ọ-chị oyoyi ju ẹnyị nyamwụ ịnyịnyị ẹnẹhẹ lẹ.” (1 Tim. 1:13) Jaabwọ ká iJisọsị dahịhile nyori ịPọlụ ka ri ọngọjụgbẹyị myị wẹẹ, ịnyịnyị ịPọlụ à dahịhile ala Atẹnsị lẹ. Ahị ọdahile nyamwụ ọọwa á tị ri ododu ka.—Ụkụr. 9:13-15; 17:34.

16-17. Ịyẹ à tị́ mẹjẹ nyori angịnyị ụma ọnyị myị́ ọnyị ka jẹ́-ẹ wẹ ka ri angịjụgbẹyị nya iJisọsị myị́? Ọ-chụ pwokwita oyina à tị́ ji?

¹⁶ Lụka nya oyi ọhọhẹ, angịnyị ụma ịdatị-datị wẹ ka ri angịjụgbẹyị nya iJisọsị. Ụka ká ịPọlụ da ụpwụ du kịla angịnyị nya ịKịrayịsị ịla iGirisi ịlepweji nya ịKọrịntị, o ya nyori angịhyẹ ẹ-ẹpwụ nya ọjịra-jịra ọlụwa nyị ri aluguru-ẹla, lee ọ-la ọhịhị nya ụya o-gbu ịnyịrọ wọọ, ụka ọhẹ lẹ. Ọ tị myịmyị yẹkẹẹ: “Ịnọ eje nya ịhọbịrị ịhọhọ ịlịịwẹ wu angịhyẹ nyanụ lụka ọlẹ kanụ jẹ́ Ohe Oluhye ene lẹka. Ma, lẹẹlẹẹ tị lẹ, anụ ri angịlẹ ká Ohe Oluhye yịlẹ ibyi nya ịhọbịrị ịhọhọ nyanụ wuu hinu lẹ.” (1 Kọr. 6:9-11) Ahụ ka dahịhile nyori angịwẹ ka yẹda wẹ ka ri angịjụgbẹyị myị́?

¹⁷ Alẹ, angịnyị lụmẹ-lụmẹ kaa nwụlanọ nyọka yẹda ụ-ụgbẹyị ọlẹ kọ baba nyọka ri angịjụgbẹyị nya iJisọsị. Ọ-chụ pwokwita, ụ-ụwa Australia  ọngọ kpa ụka nyamwụ wuu ya ẹrụ ọnyịịla ọlẹ kịị wụrụ Yukina wẹ ka jẹ́ nyori angịnyị ụma ọnyị myị́ ọnyị nyị ka jẹ́-ẹ ye ẹla ọla ịBayịbụụ myị. Ẹnẹhẹ lẹ, ọ yẹ ọyẹẹnọ ọhẹ ẹ-ẹga nya ọlụkụrwọ kọ gba ang ba ịnyịrọ bala ọ-kụrụ ang bwugu-bwugu lẹlẹ. Yukina yẹkẹẹ, “M họ atịmẹ ụka nya ọgbanyẹ ịnọ, ma m̀ tị dọmwụ nyọka ya ẹla balọọ. M̀ wẹ ka jẹ́ nyori ẹla ọla ịBayịbụụ kaa kpọọ ịpyọ yẹẹyẹẹ kpụ ọ dọmwụ da ẹla ịhyẹ bwu ẹpwụ nya ụpwụ nya Eje Ọnyịịla ba ịlọmwụ ị-ịnyịrọ!” Ọnyang ọọwa dọmwụ nya ịBayịbụụ ọjẹ́jẹ bala ọ-ka ọjịra-jịra. *

18. Ịyẹ tị́ du kahị ka la angịnyị eje ka?

¹⁸ IJisọsị yahị guru ká angịnyị lụmẹ-lụmẹ ka bọọ jẹ à du kó ya nyori ang-ẹrụ nyị ga kpụ ọtụguru lẹ lẹẹ? Ẹnẹnẹhẹ. Ụpwụ Ịgọgọ ya neeji ene nyori angị ịmanyị-manyị nya-à ka la ọmyịmyị ẹ-ẹga nyamwụ lẹ. (Jọn. 12:37, 38) IJisọsị tị myịmyị la ọngịrị ọ-kpa jẹ́ ẹla ka ẹpwụ nya angịnyị. (Mat. 9:4) Ịlẹhị lẹ, ọ kaa yẹhị rịrị angịlẹ kị myị lọọ gụ, ma ọ tị kaa ya ẹla nya Ohe Oluhye ju ọng myị́ ọng la ila ọchịchị. Lẹ, nyọlẹ káahị jẹ́-ẹ jẹ́ ẹla ka ẹpwụ nya ọngịnyị ka wẹẹ, ọ́ baba kahị ka la ọngịnyị lee aloye nyahị eje ka! Ọkọkọ nyọọwa, yaa lala angịlẹ kị ka ri angịjụgbẹyị myị́ wẹẹ. Marc, kọ ri ọngọ kpa ụka nyamwụ wuu kpa ẹrụ ọnyịịla pyẹ ẹ-ẹpwụma nya Burkina Faso ya ẹla ọọwa ị-ịlẹ: “Angịlẹ kam me irya nyori ị ka nwa kịlahị yẹẹyẹẹ kaa ba la ang ọjẹ́jẹ. Ma, angịlẹ kam tị me kị ka jẹ lụrụ ka à kaa nwa kịlahị yẹẹyẹẹ lẹ. Lẹ, m̀ wẹ ka jẹ́ nyori ọ ka hágụ nyọka ya iwe da ká olegu nya iJihova ka kpahị ụgbẹyị.”

19. Ányị ahị tị́ ka yẹ angịnyị iloye nyahị?

¹⁹ Ụka nya ọgbanyẹ, à ka kụ irya myị́ nyori angịlẹ kị lala ang-ẹrụ ịlẹ kị ga kpụ ọtụguru lẹ nyị́ lụmẹ o-oye nyọwa ka. Tị kpịtịya nya ẹla ọlẹ ká iJisọsị byi angịjụgbẹyị nyamwụ. Ang-ẹrụ ga lẹ. Ọọwa ri, ị há kpụ ị ka taa guru myị́ lẹ. Angịnyị ka jẹ́-ẹ yẹda wẹ ka ri angịjụgbẹyị nya ịKịrayịsị. IJihova yẹ angịlẹ kị ka jẹ́-ẹ wẹ ka ri angịjụgbẹyị myị́ wẹẹ lala “ang-ụdụ.” (Hag. 2:7) Kori kahị la irya ụma ọlẹ ká iJihova bala iJisọsị la ẹ-ẹga nya angịnyị aalẹ, ahị ka jẹ́ ang u-uhye nya ọhịhị nyaa bala ang ọlẹ kọ kaa kpaa ịpyọ. Ọọwa lẹ, ahị ka yaa lala angịlẹ kị ka ri aanahị myị́ wẹẹ ọkọkọ nyọka yaa lala angga lẹlẹ.