1. Ịyẹ ahị wuu à tị́ ka họ pyii?

Ọ KA háng nyọka ji ẹpwụ nya ụnyẹ ọrụrụ ọlẹ ká jẹ́ nyị ka lujwo yẹẹyẹẹ, ọgụgụụgụ kori ká jụ ẹdụrụ lee kori ká ịnyịrọ á juwa chịng pyẹpyẹ? Ehe. Ọlẹrụ ịPọlụ tị ya nyori Angịnyị nya ịKịrayịsị wuu nyị juwa ẹ-ẹpwụ nya ụnyẹ ọrụrụ. (Hib. 12:1) Ahị wuu tị baba nyọka bọhụ pwụ ocheju nyọka ye ang-ogu ọlẹ ká iJihova nwụlanọ gbehi, kori kahị ri anjwo lee angịgbahị, lee kori kahị la ogogo lee ọ-la ka wẹwẹ.—Mat. 24:13.

2. Jaabwọ ká ụpwụ nya 2 iTimoti 4:7, 8 ya, ịyẹ tị́ du ká ịPọlụ la ọnụ ọ-pwọọ ya ẹla myị́?

² ỊPọlụ la ọnụ ọ-pwọọ ya ẹla chajị ọ ‘rụnyẹ pwụ ocheju lẹ.’ (Wa 2 iTimoti 4:7, 8.) Ma, ịịyẹ kpangga à tị́ ri ụnyẹ ọrụrụ ọlẹ ká ịPọlụ ya ẹla rụ́?

3. Ịyẹ à tị́ ri ụnyẹ ọrụrụ ọlẹ ká ịPọlụ ya ẹla rụ́?

³ Ụka ọhẹ, ịPọlụ kaa kpa ang ịlẹ kị kaa họ lụka nya ayịlọ ọkọkọ nya ala iGiriki ilugbene, mẹ ẹla ịkpọnchị jẹ. (1 Kọr. 9:25-27; 2 Tim. 2:5) Ụka lụmẹ-lụmẹ ọ kaa chụ ọhịhị nya Angịnyị nya ịKịrayịsị ka pwoku ụnyẹ ọrụrụ. (1 Kọr. 9:24; Gal. 2:2; Filip. 2:16) Ọngịnyị kaa ju ka ẹpwụ nya ‘ụnyẹ ọrụrụ’ ọọwa ụka kọ hu ịlọmwụ ju iJihova ụ-ụbwọ bala o-hu enyi Ohe. (1 Pit. 3:21) Ọ ka pwụ ọya ocheju nya ụnyẹ ọrụrụ ụka ká iJihova á ya āhị nya ọhịhị ọmyịmyị-ka họọ.—Mat. 25:31-34, 46; 2 Tim. 4:8.

4. Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

⁴ Ányị ụnyẹ ọrụrụ ka ẹga ọlụrụ à tị́ pwoku ọhịhị nya Angịnyị nya ịKịrayịsị? Ang lụmẹ-lụmẹ du kị me awụlẹ. Ahị kụ ẹhị yẹ ịta bwu ẹpwụ nyaa wẹẹ. Ọhọhẹ, ahị baba nyọka bwu ụgbẹyị ọlẹ kọ pwoku; oheeye, ahị ka ya irya nyahị nọ ẹ-ẹga nya ọya ocheju nya ụnyẹ; ọhata, ahị baba nyọka bọhụ kori kahị la akama ụ-ụgbẹyị.

5. Ụgbẹyị oyina ahị tị́ ka bwu? Ịyẹ tị́ du?

⁵ Kori ká ọngịnyị á ka ye ang-ogu ẹ-ẹpwụ nya ụnyẹ ọrụrụ ọlam, ọ baba nyọka bwu ẹgẹlẹ ká alegbeju nya ayịlọ nya ụnyẹ ọrụrụ ọọwa ya nyị bwu. Ịnyịnyị-ịnyịnyị, kori kahị ka ye āhị nya ọhịhị ọmyịmyị-ka aalẹ, ahị baba nyọka bwu ụgbẹyị lee ọ-la ọhịhị nya Angịnyị nya ịKịrayịsị. (Ụkụr. 20:24; 1 Pit. 2:21) Ma, Olegu Onyobyi bala angịlẹ kị kaa ba ọgụ-ẹpẹtẹ nyamwụ jẹ á tịtọ kahị ka bwu ụgbẹyị ọwẹ ka; ị tịtọ kahị ka juwa rụnyẹ balaa ẹ-ẹpwụ nya ọhịhị onyogo nyahị. (1 Pit. 4:4) Ị kaa ya ẹla ọtịpyọ rụ́ ụgbẹyị nya ọhịhị ọlẹ kahị chụ bala o-ya nyori ịnyịwa nya-à há gụ lẹ, chajị ọngịnyị nyị kaa lịlọmwụ ụ-ụwa. Ma, ẹla nyaa ọọwa ri ọnọọkịla kị me.—2 Pit. 2:19.

6. Ẹlịyẹ a tị́ jẹ́ bwu ẹla ọlẹ kọ họ ọ-ọhịhị nya Brian?

⁶ Ọng myị́ ọng ọlẹ kọ hịhị lala angịlẹ kị la olegu nya odehe nya Olegu Onyobyi ọlẹ ka jẹ́ lụka o-kpii nyori ụgbẹyị ọlẹ kọ chụ á ka kpọọ ka ẹpwụ nya ịlọmwụ ọlala ka. Ọkọkọ nyọọwa lẹ, ọ ka kpọọ kaka ri ọnyọhị nya Olegu Onyobyi bala imyi nya irya nyịlọmwụ. (Rom. 6:16) Ahị kụ ẹhị yẹ ẹla ọlẹ kọ họ ọ-ọhịhị nya Brian wẹẹ. Adamwụ bala ịnamwụ jwoo ọhụ nyị bwu ụgbẹyị nya ọhịhị nya Angịnyị nya ịKịrayịsị. Ma, ụka kọ ri okolobya, ọ la ịwẹẹ ọdada kori ká ụgbẹyị ọwẹ á ka ya ọkẹkẹnị họọ. Brian cheje nyọka rụnyẹ ụ-ụgbẹyị nya angịlẹ kị kaa ba Olegu Onyobyi jẹ. O yẹkẹẹ: “Ḿ jẹ́ ene nyori ịlọm ọlala ọlẹ kam tịtọ ka kpam ka ju ka ẹpwụ nya ọnyọhị nya abwẹla ọtịpyọ oriri ka. Nyọlẹ kọ nọ chẹẹ, m̀ dọmwụ nyọka mile eteji ịnyịịngịrị, nwà ere kpoye-kpoye, bala ọ-la ọhịhị nya ụya ọhọhọ. Ẹ-ẹpwụ nya ẹka lụmẹ-lụmẹ kịlahị, m̀ dọmwụ nyọka mile eteji ịlẹ kị la ọngịrị gụ ịịwa bala o-ri ọnyọhị nyaa ịnyịnyị. . . . M̀ dọmwụ nyọka kpa eteji ịnyịịngịrị ra chajị nyọka ye okpoko kpa họ ang ịịwa gụ ọwọwa.” Ụka ohyẹẹkpẹ, Brian cheje nyọka kpa ehile nya iJihova họ ụkụrwọ. Ọ yẹ ọhịhị nyamwụ da bala o-hu enyi Ohe la ẹka nya 2001. Ọ chị ọkẹkẹnị ọlam-ọlam lẹẹlẹẹ nyọlẹ kọ wẹẹ bwu ụgbẹyị nya ọhịhị nya Angịnyị nya ịKịrayịsị. *

7. Jaabwọ ká ụpwụ nya ịMatiyu 7:13, 14 mẹjẹ, agbẹyị imiiye iyina à tị́ juwa ị-ịlahị nyahị?

⁷ Ọ baba yẹẹyẹẹ kahị ka bwu ụgbẹyị ọlẹ kọ pwoku! Olegu Onyobyi tịtọ káahị wuu ka hwabwọ la ọ-rụnyẹ ụ-ụgbẹyị okpiilee ọlẹ kọ kaa “kpa ọngịnyị ka ọhịhị,” chajị kahị ka rụ ka ụgbẹyị o-ju ẹpwụ gbam-gbam ọlẹ ká iru nya angịnyị wẹẹ bwu odehe alẹ. Angịnyị jẹ́ ụgbẹyị ọọwa yẹẹyẹẹ, ọ tị kaa chịkpẹẹ nyọka bwu ụwa. Ma, ọ kaa “kpa ọngịnyị ju ka ẹpwụ nya ayịreji ọtata.” (Wa ịMatiyu 7:13, 14 bwu NW  e-ekpeleji) * Kori kahị ka kịnyaa ụ-ụgbẹyị nya ọhịhị, ká ịngịngịhyẹ ka guhi irya daarụ ka aalẹ, ahị ka dahịhile iJihova bala o-ke ụrụ wo ẹla nyamwụ pyii.

8. Kori ká ọngọ rụnyẹ á chị mileji, ányị ọ tị́ kaa họ?

⁸ Angị rụnyẹ ụ-ụgbẹyị ọlụrụ kaa yẹhị nyaa nọ ẹ-ẹga ọlẹ kị wẹẹ ka ya ẹta rịrị chajị kị ka chị mileji ka. Ma, ọ chịkpẹẹ ká ọngọ rụnyẹ ọkịla ka chaa mileji la ọjẹ́jẹ ka lee ọ-ka ya ẹta kpụ ụjẹ myị́. Kori kị tị chị mileji, ị kaa wuleji bala ọ-kịnyaa la ụnyẹ ọrụrụ. A-ang ọlẹ kọ chaa keji ị kaa ya irya nyaa nọ ka, ma irya nyaa kaa juwa ọ-ọya ocheju nya ụnyẹ ọrụrụ bala ang-āhị ọlẹ kị wẹẹ ka ya haa.

9. Kori kahị chị mileji, ányị ahị tị́ ka họ?

⁹ Ẹ-ẹpwụ nya ụnyẹ ọrụrụ nyahị, ahị ka chị mileji ụka lụmẹ-lụmẹ myị́. Ọ chịkpẹẹ ká ẹla ka gụụhị ya lee ọ-gụụhị họ myị́. Angịlẹ kahị wẹẹ rụnyẹ lawụlẹ tị ka họ ẹlẹhẹ ọlẹ kọ ka wụụhị ẹjẹ myị́. Ọ́ ka lahị ẹbyẹbyị kori kọ lịnyị ka. Ọngọngọhẹ nyahị á la kpẹẹkpẹẹ ka, ahị tị wẹẹ rụnyẹ ụ-ụgbẹyị okpiilee nya ọhịhị lawụlẹ. Lẹ, ọ chịkpẹẹ kahị ka họ ẹla wụ awụlẹ ẹjẹ jaabwọ ká angị rụnyẹ kaa mịla awụlẹ ụka ọhẹ. ỊPọlụ ya nyori nyị chịkpẹẹ káahị nyị ka “họ ẹla o-hi awụle ọnụ” ụka ọhẹ myị́. (Kol. 3:13) Ọkọkọ nyọka ya irya nyahị nọ ẹ-ẹga nya ang ọlẹ kọ chịhị mileji, ahị ya irya nyahị nọ ẹ-ẹga nya ang-āhị ọlịlahị mẹ. Kori kahị chị mileji, ahi wuleji kahị kịnyaa la ụnyẹ ọrụrụ. Kori kahị ju agbama bala ọ-kpa ẹla ẹ-ẹpwụ gbee kahị pwa la o-wuleji, áhị ka pwụ ọya ocheju nya ụnyẹ ọrụrụ kpụ ahị ka ye ang-āhị ka. Datị hi ọọwa, ọ chịkpẹẹ kahị ka chị angịkịla ịlẹ kị wẹẹ rụnyẹ ụ-ụgbẹyị okpiilee nya ọhịhị, mileji myị́.

10. Ányị ahị tị́ ka bwu cheji ba hi ọ-ka ri “okoji ọkịlata” ha angịkịla?

¹⁰ Ụgbẹyị ọkịla ọlẹ kahị ka jẹ́-ẹ bwu cheji ba hi ọ-ka ri “okoji ọkịlata” ha angị rụnyẹ ịkịla ri ọ-ka ya iwe haa nyọka họ ang ọlẹ kọ háa ụka kọ chịkpẹẹ, ọkọkọ nyọka ya nyori nyị ka họ ẹla olirya nyahị pyii. (Rom. 14:13, 19-21; 1 Kọr. 8:9, 13) Ụgbẹyị ọkpọnchị ọhẹ ọlẹ kahị datị hi  angị rụnyẹ ọlam à wẹ lẹ. Angị rụnyẹ ịịwa kaa chị awụlẹ ọnụ. Ọngọngọọngụ nyaa tị kaa tịtọ nyọka ye ang-āhị ha ịlọmwụ kem. Irya nya ịlaa-ịlaa kem ị kaa kụ lẹ. Lẹ, ị kaa maga nyọka gu angị rụnyẹ ịkịla gbaa ka ọka chajị kị ka ji ịlahị nya ọng myị́ ọng wuu. Ịnyahị tị datị, chajị áhị kaa chị awụlẹ ọnụ ka. (Gal. 5:26; 6:4) Irya nyahị ri ọ-ka da angịnyị lụmẹ-lụmẹ ụbwọ jaabwọ kahị ka jụ họ myị́ kaka ba, nyọka chịda balahị pwụ Ịpyị-Adịrahụ nya Ohe Oluhye bala ọ-ka hịhị gboyi myị́ oyi. Lẹ, ahị kaa kpa ọhụ ojuju nya ịPọlụ họ ụkụrwọ nyọka “juwa tịtọ nya ịlahị ọkaka nya [ịlọhị-ịlọhị] kem ka. Ma, [kahị ka] juwa tịtọ nya ịlahị ọkaka nya angịnyị . . . ịkịla.”—Filip. 2:4.

11. U-uhye nya ịyẹ irya nya ọngọ rụnyẹ à tị́ kaa ji? Ịyẹ tị́ du?

¹¹ Datị hi ọ-ka yẹhị nyaa nọ ụ-ụgbẹyị ọlẹ kị wẹẹ rụnyẹ bwu, angị rụnyẹ kaa ya irya nyaa nọ ọ-ọya ocheju nya ụnyẹ ọrụrụ. Kori kị dọmwụ jẹ́ yẹ ọya ọọwa lẹhị nyaa ka wẹwẹ, ị ka jẹ́-ẹ kpa irya-irya yẹ ịlaa kị pwụ ụwa bala o-ye ang-āhị. Irya ọkụkụ u-uhye nya ang-āhị ọọwa kaa jwaa ọngịrị nyọka rụnyẹ kịlahị-ịlahị.

12. Ịyẹ iJihova à tị́ chịhị ehe?

¹² Ẹ-ẹpwụ nya ụnyẹ ọlẹ kahị wẹẹ rụ, iJihova chehe nyọka nwụ̀ angịnyị nyamwụ ịlẹ wuu kị rụnyẹ pwụ ocheju uri. Ị ka la ọhịhị ọmyịmyị-ka e-epwoohe lee ám̀ odehe ụka kọ ka ri ịParadayịsị. Ụpwụ Ịgọgọ chabwọ nya uri ọwẹ chajị kahị ka jẹ́-ẹ kụ irya jaabwọ ká ọhịhị nyahị ka kpịpyọ ụka ọọwa. Kori kahị juwa kụ irya u-uhye nya ijuju ọnyịịla ọlẹ ká iJihova chịhị ehe, eje ọchịchị nyahị ka la ọngịrị gụ ọwọwa nyọka bọhụ pwụ ọbaba.

13. Ịyẹ ahị tị́ la ká angị rụnyẹ ịlam la ka?

¹³ Angị rụnyẹ a-ayịlọ ọkọkọ nya ala iGiriki kaa bọhụ ẹ-ẹpwụ nya akama lala ịnyịrọ ọ-chị́ pyẹpyẹ bala ang ịjụjụ ịkịla. Ma, ang ọlẹ kị ka jẹ́-ẹ họ kem ri ọ-ka kpụnịrọ ọngịrị nyịlaa bala ang ọlẹ kị mẹjáa u-uhye nya ụnyẹ ọrụrụ. Ahị lala angị rụnyẹ ịwẹ chajị ị mẹjẹ́ẹhị jaabwọ kahị ka bwu rụnyẹ ọlẹ kahị wẹẹ rụ. Ma, ahị tị la ịngịhyẹ ọlẹ kị la ka. Ahị ka jẹ́-ẹ ye ọngịrị bwu ẹga nya iJihova, ụbwọ ọdada nyamwụ á tị la ọbaba ka. Kori kahị kpụnịrọ iJihova, o chehe nyọka mẹ ang jẹ́ẹhị. Ọ́ tị ba ọọwa ka, o chehe nyọka ya ọngịrị hahị ịnyịnyị!—1 Pit. 5:10.

14. Ányị ụpwụ nya 2 Ala ịKọrịntị 12:9, 10 à tị́ dahị ụbwọ nyọka bọhụ ẹ-ẹpwụ nya akama?

¹⁴ ỊPọlụ la akama lụmẹ-lụmẹ. Datị hi ọlẹ ká angịnyị kaa doo bala ọ-tọọ pyịpyị, ọ́ kaa la ịnyịrọ ogogo ka ụka ọhẹ du kọọ bọhụ ẹ-ẹpwụ nya ang ọlẹ kọ chabwọ nyị kaa “juwa gu ugbinyịrọ [nyọwa] chọọchọọ ịnyịnyịịnyi” lala ujwo. (2 Kọr. 12:7) Ma, ọkọkọ nyọka hwabwọ la ọ-gbịgba ha iJihova chajị nya akama ịwẹ, ọ hwaa lala iwe nyọka kpụnịrọ iJihova. (Wa 2 Ala ịKọrịntị 12:9, 10.) Chajị nyọlẹ ká ịPọlụ la irya ọlịịwẹ, iJihova dọọ ụbwọ ẹ-ẹpwụ nya ịmayẹ ịwẹ wuu.

15. Kori kahị gbịla ịPọlụ, ẹlịyẹ à tị́ ka họ tọhị?

¹⁵ Angịnyị ka doohi lee ọ-tụ́ụhị pyịpyị chajị nya ọmyịmyị nyahị ịnyịnyị myị́. Ahị tị ka jụ ẹdụrụ lee ịnyịrọ ọ-chị́ịhị pyẹpyẹ myị́ ụka ọhẹ. Ma, kori kahị gbịla ịPọlụ, akama ọnyọnyọọnyị ka ri iwe ọlẹ kahị la nyọka ye ụbwọ ọdada nya iJihova.

16. Kori ká la ịnyịrọ ogogo ka wẹwẹ, ányị a tị́ ka jẹ́-ẹ họ?

¹⁶ À juwa ọ-ọba nya ẹdụrụ lee à tị́ hụhụ o-oje nya angị ju ẹjẹẹ? Arụụ à kaa chị́ng pyẹpyẹ lẹ lee á tị́ jẹ́-ẹ yọyị yẹẹyẹẹ kaka? Kori kọ lịnyị, à ka jẹ́-ẹ rụnyẹ bala anjwo ịlẹ kị la ogogo? Ee! Iru nya angịgbahị bala angịlẹ kị la ịnyịrọ ogogo ka, kaa rụnyẹ ụ-ụgbẹyị nya ọhịhị. Ị́ ka jẹ́-ẹ họ ụkụrwọ ọwẹ la ọngịrị nyịlaa ka. Ọkọkọ nyọọwa lẹ, ị kaa ye ọngịrị bwu ẹga nya iJihova bwula o-ke ụrụ wo ẹla ọla ọjịra-jịra bwu ifon  lee ọ-yẹ ọjịra-jịra ọlẹ kị kịla ju. Ị kaa kpa ẹrụ ọnyịịla pyẹ bwula ọ-ya ẹla ju alutoji, angị kpẹhị rịraa, bala alugbiyegu nyaa.

17. Irya ọlanyị iJihova à tị́ la ẹ-ẹga nya angịlẹ kị la ịnyịrọ ogogo nwà ka?

¹⁷ Kori ká jẹ́ họ ụkụrwọ ha iJihova jaabwọ kọ ri irya nyang ka chajị nya ịnyịrọ ọ-la gogo ka, ọkịlẹtụ a kpụng enyi, ká me irya nyori à la dẹwụ-dẹwụ kpoye nyọka rụnyẹ ụ-ụgbẹyị nya ọhịhị ka. À há iJihova chajị nya ọmyịmyị nyang bala ang ịnyịịla ịlẹ ká họ họọ ẹ-ẹpwụ nya ẹka lụmẹ-lụmẹ kẹkpẹ. À baba nya ụbwọ ọdada nyamwụ lẹẹlẹẹ gụ olene, ọ́ tị ka tụụbwọ hing ka. (Eje. 9:10) Ọkọkọ nyọọwa lẹ, ọ ka tụ́ jung chwẹẹ gụ ọwọwa. Ọọnahị ọnyang ọhẹ ọlẹ kọ jụ ẹdụrụ yẹkẹẹ: “Jaabwọ ká ẹdụrụ nyam wẹẹ lụmẹ gụ ọwọwa, m̀ yẹ nyori ḿ kaa la iwe lụmẹ nyọka mẹ ẹlịlẹhị jẹ angịkịla kaka. Ma, m̀ jẹ́ nyori aga ọmama ọ-pyịnyẹng nyam kaa kpa ọkẹkẹnị wẹ ọkịlẹtụ nya iJihova. Ọọwa tị kaa ya ọkẹkẹnị ham.” Kori ká ọkịlẹtụ á kpụng enyi, kpịtịya nyori á lụbwọng ka. Kụ irya nya ọgụ-ẹpẹtẹ nya ọlẹrụ ịPọlụ, ká kpịtịya nya omyi ẹla nyamwụ ịlẹ: “Ang ịlẹ kị kaa wẹ chịm ọgụ wuu, lala ọdẹwụ-dẹwụ . . . ị́ kaa rim ẹlẹlẹhẹ kpong-kpong ka, . . . Chajị ụka kam juwa ẹ-ẹpwụ nya ọdẹwụ-dẹwụ, m kaa jẹ́-ẹ ye ọngịrị . . . lẹ.”—2 Kọr. 12:10.

18. Akama olujwo oyina angịhyẹ à tị́ kaa la?

¹⁸ Angịhyẹ ịlẹ kị kaa rụnyẹ ụ-ụgbẹyị nya ọhịhị kaa la akama ọkịla ọhẹ. Ị kaa bọhụ ẹ-ẹpwụ nya iwe-ahụrụ ịlẹ ká angịkịla jẹ́ lee ọ-ka jẹ́-ẹ yẹ ka. Ọ-chụ pwokwita, ị kaa la ọkịlẹtụ ọ-kpụ enyi lee uko ọchịchị kpoye-kpoye. Ịyẹ tị́ du ká akama ịlịịwẹ ka la ọngịrị lụmẹ ha anchẹ nya iJihova ịwẹ. Chaji kori ká ọngịnyị á mwụ́ ụbwọ lee ọhụhụ o-oje nya angị ju ẹjẹẹ, ọng myị́ ọng wuu kaa yẹ akama ọlẹ kị la bala ọ-tịtọ nyọka dụbwọ. Ma, angịlẹ kị la ọkịlẹtụ ọ-kpụ enyi lee uko ọchịchị okpoye-kpoye lẹ, ọngọngọhẹ á ka jẹ́ nyori ị juwa yẹ akama ka myị́. Iwe-ahụrụ nyaa jụjụ ịnyịnyị lala ọngọlẹ kọ mwụ́ ụbwọ. Ma, chajị nyọlẹ ká angịnyị jẹ́ yaa ka lẹ, ị́ ka mẹ ọháha jẹ ẹ-ẹga nyaa bala ọ-kpahị jwaa jaabwọ kọ baba ka.

19. Ẹlịyẹ ahị tị́ jẹ́ bwu ọgụ-ẹpẹtẹ nya iMefibochẹtị?

¹⁹ Kori ká la akama ọhẹ ká tị yẹ nyori angịnyị á jẹ́ iwe-ahụrụ nyang nwà ka, à ka jẹ́-ẹ ye ọngịrị bwu ọgụ-ẹpẹtẹ nya iMefibochẹtị. (2 Sam. 4:4) Ọ́ la ogogo nwà ka, Adịrahụ iDevidi tị myịmyị lọọ eje ọkịrọrọ. I-iMefibochẹtị à ju ọmwụ nya akama ịwẹ ha ịlọmwụ ka. Ma, ọ́ la ikẹjẹ-awụrụ chajị nyọọwa ka. Ang ịnyịịla ịlẹ kị họ ọ-ọhịhị nyamwụ myọọ lẹhị. Ụgbẹyị ọnyịịla ọlẹ ká iDevidi kpọọ lụka ọkẹkpẹ myọọ lẹhị yẹẹyẹẹ. (2 Sam. 9:6-10) Lẹ, nyọlẹ ká iDevidi lọọ eje ọkịrọrọ, ọ maga nyọka kpịtịya nya iwe-ahụrụ ọlẹ kọ dagaga jwoo wuu. Ọ́ ya ẹga da, eje ọlala nya iDevidi tụ́ ikẹjẹ-awụrụ rịrọọ ka.  Ọ́ tị kpụ iJihova abyị nya ẹla ọlẹ ká iDevidi họọ ka ịnyịnyị. Irya nya iMefibochẹtị wuu juwa a-abwọlẹ kọ ka bwu chẹkpẹ ju adịrahụ ọlẹ ká iJihova chụ. (2 Sam. 16:1-4; 19:24-30) IJihova ya oja ọnyịịla nya iMefibochẹtị ọwẹ ju ị-ịBayịbụụ chajị kahị ka ye apyobwuna bwu ụwa.—Rom. 15:4.

20. Uko ọchịchị kpoye-kpoye tịị kpa angịhyẹ ka họ ányị? Ahị ọdahile oyina ị tị́ la?

²⁰ Chajị nya uko ọchịchị kpoye-kpoye, aanahị ịhyẹ kaa wu ịlaa la ẹhyọ kori kị juwa ẹ-ẹpwụ nya alụma. Ọ ka laa ụjwọ nyọka juwa ẹ-ẹpwụ nya iru nya angịnyị myị́, ma ị kaa ka ọjịra-jịra ịlẹpwa, ọjịra-jịra nya isekut, bala ọjịra-jịra ọtụka. Ọ kaa laa ujwo nyọka ya ẹla ta angịlẹ kị jẹ́ ka, ma ị kaa ya ẹla ta angịnyị ụka kị jụwa kpa ẹrụ ọnyịịla pyẹ. Kori ká iwe-ahụrụ nyang á lịnyị aalẹ, kpịtịya nyori á lụbwọng ka. Angịkịla la akama ịlịịwẹ ịnyịnyị. Kpịtịya nyori aga ọmama nyang kpụ iJihova ịpyọ. Nyọlẹ ká abwọ chịng pyẹpyẹ ka wẹẹ, ọ mẹjẹ nyori iJihova juwa wahị kụrụng bala ọ-ya ọngịrị ọlẹ ká baba hang lẹ. * (Filip. 4:6, 7; 1 Pit. 5:7) Kori ká kịnyaa la ọ-gbịgba ha iJihova nanana nyori à la akama ọhẹ bwu ẹpwụ nya ịlẹ kahị kụ ẹhị yẹ-ẹ̀ wẹ, dahịhile nyori ẹla nyang kpụ iJihova ịpyọ.

21. Bwula ụbwọ ọdada nya iJihova, ịyẹ ahị wuu à tị́ ka jẹ́-ẹ họ?

²¹ Ahị ji Ohe obe nyori ụnyẹ ọrụrụ ọlam datị hi ọlẹ ká ịPọlụ ya ẹla rụ́. Ẹ-ẹpwụ nya ụnyẹ ọrụrụ ịlụka onyogo, ọngọ ookpokpo à kaa ye ang-āhị lẹ. Ụnyẹ ọrụrụ ụ-ụgbẹyị nya Angịnyị nya ịKịrayịsị tị datị chajị ọng myị́ ọng ọlẹ kọ bọhụ pwụ ocheju ka ye āhị nya ọhịhị ọmyịmyị-ka. (Jọn. 3:16) Ụ-ụnyẹ ọrụrụ ọlam, angị rụnyẹ wuu baba nyọka la ịnyịrọ ogogo pyii. Ó ri ịnyị ka, ị ka jẹ́-ẹ kụrụ ẹ-ẹpwụ nya ụnyẹ ọọwa ka. Ọlẹ tị datị, chajị iru nyahị á la ịnyịrọ ogogo nwà ka, ma ị wẹẹ bọhụ. (2 Kọr. 4:16) Bwula ụbwọ ọdada nya iJihova, ahị wuu ka rụnyẹ ọlẹ pwụ́ ocheju!