1-2. (a) Ịyẹ tị́ du ká Amagẹdọn ri oja ọnyịịla ha angịnyị ehe? (b) Ịtọ ẹla iyina ahị tị́ ka kụ ẹhị yẹ a-ang ọjẹ́jẹ ọlẹ?

À WO ká angịnyị ya nyori “Amagẹdọn” nyị ri ẹwụ ọlẹ kị ka da juwa kpa ịbọọmbụ bịrị ẹga lee ayịreji ọ-bwagaga ọtụka ẹnẹhẹ lẹ? Ẹla ọlẹ ká ịBayịbụụ ya u-uhye nya Amagẹdọn tị datị. Ọ ya nyori nyị ri oja ọnyịịla ọlẹ kọ ka kpa ọkẹkẹnị wahị! (Ọwụ. 1:3) Ẹwụ nya Amagẹdọn á ka ta angịnyị ehe ayịreji ka, ọ ka chaa da ịnyị! Ányị ọ tị́ ka bwu lịnyị?

² ỊBayịbụụ mẹjẹ nyori ẹwụ nya Amagẹdọn nyị ka chị angịnyị da bwula ọ-ta eji ọkpakpa nya angịnyị ehe ayịreji. Ẹwụ ọwẹ ka chị angịnyị ehe da bwula ọ-ta angịnyị inyibyi ayịreji bala o-chewu ke alabwẹla ọnyịịla. Ọ ka myịmyị-ị̀ chị angịnyị ehe da bwula o-chewu ke odehe ọlẹ hi ayịreji ọtata. (Ọwụ. 11:18) Nyọka jẹ́ etu nya ẹla ịwẹ yẹẹyẹẹ, ahị kụ ẹhị yẹ ịtọ ẹla ine wẹẹ: Ịyẹ Amagẹdọn à tị́ ri? Ang iyina à tị́ ka họ ene nyamwụ? Ẹlịyẹ ahị tị́ ka họ chajị kahị ka juwa ẹ-ẹpwụ nya angịlẹ kị ka chịda ụka nya Amagẹdọn? Ányị ahị tị́ ka bwu godayị giri-giri jaabwọ ká Amagẹdọn wẹẹ ju chwẹẹ gụ́ ọwọwa?

3. (a) Ịyẹ à tị́ ri etu nya “Amagẹdọn”? (b) Jaabwọ ká ụpwụ nya Ọwụrụụ-wụrụ 16:14,16 mẹjẹ, ịyẹ tị́ du kahị jẹ́ nyori Amagẹdọn á ri ẹgẹhẹ a-ayịchịng ka?

³ Wa Ọwụrụụ-wụrụ 16:14, 16. Ụka okpokpo kem, Amagẹdọn à hyehe ẹ-ẹpwụ nya ịBayịbụụ lẹ. Ọ kpehe bwu omyi ẹla nya iHiburu ọhẹ ọlẹ ká etu nyamwụ ri, “Ọgbọdọ nya iMegido.” (Ọwụ. 16:16.) IMegido ri epweji ọhẹ ẹ-ẹpwụma nya ala Isirẹlụ ọla ugbeene. (Joch. 17:11) Amagẹdọn á tị ri ẹnyị nya ẹgẹgẹhẹ ám̀ odehe ọlẹ ka. O ri iwe-ahụrụ ọlẹ ká “ịdịrịhụ ilodehe ọlẹ wuu” ka tụguru nyọka mwẹla ta iJihova. (Ọwụ. 16:14) Ma, ẹ-ẹpwụ nya ang ọjẹ́jẹ ọlẹ, ahị ka wụrụ ẹwụ ọlẹ kọ ka dọmwụ ahyaahị ụka ká ịdịrịhụ ilodehe ịwẹ á tụ guru kpá, nya Amagẹdọn ịnyịnyị. Ányị ahị tị́ bwu jẹ́ nyori Amagedon á ri ẹnyị nya ẹgẹhẹ ayịchịng ka? Họhẹ-họhẹ, ọgbọdọ ọlẹlẹhẹ á ji a-ayịchịng kọ ri ọgbọdọ nya iMegido ka. Oheeye, ẹga ịlẹ kị dagaga ju iMegido wuu á ju ẹpwụ lụmẹ kpụ “ịdịrịhụ ilodehe ọlẹ  wuu” ka jẹ́-ẹ kaka tụ gụrụ ụ-ụwa bala angịdẹwụ, tụ́ ang-abwọ ị-kpa dẹwụ nyaa wuu ka. Ọhata, jaabwọ kahị wẹẹ ka yẹ kịlahị ẹ-ẹpwụ nya ang ọjẹ́jẹ ọlẹ, ẹwụ nya Amagẹdọn ka dọmwụ ụka ká “ịdịrịhụ” nya odehe ọlẹ wuu ka jahị da angịnyị nya Ohe Oluhye ịlẹ kị kụ́ ẹga ọdatị-ọdatị ám̀ odehe ọlẹ.

4. Ịyẹ tị́ du ká iJihova ya ẹwụ ọtụka ohyẹẹkpẹ nyamwụ wụrụ iMegido?

⁴ Ịyẹ tị́ du ká iJihova ya ẹwụ ọtụka ohyẹẹkpẹ nyamwụ wụrụ iMegido? Lụka onyogo, ị da ẹwụ lụmẹ-lụmẹ e-epweji nya iMegido bala epweji nya iJesiryẹlụ ọlẹ kọ ji bọọ ba. Ụka ọhẹ, iJihova kaa da angịnyị nyamwụ ụbwọ kụrụ ẹwụ ịịwa. Ọ-chụ pwokwita, ẹ-ẹpwụ nya “ọ̀ba nya iMegido,” iJihova da ịBarakị ọngọlẹjẹ nya ala Isirẹlụ ụbwọ nyọka kụrụ alẹwụ nya ala iKenan ịlẹ ká olegbeju nyaa ri iSisẹra. ỊBarakị bala ọlọmwụ iDebora ji iJihova obe chajị nyọlẹ kọ daa ụbwọ kụrụ. Ị mwu eje yẹkẹẹ: “Ịdịchụ dẹwụ bwu uhye-ọgba . . . ta iSisẹra. Ọhụ́ụ nya Ihu iKichọn mwaa rụ.”—Ang. 5:19-21.

5. Ụgbẹyị ọkpọngchị oyina ẹwụ nya Amagẹdọn à tị́ datị hi ẹwụ ọlẹ ká ịBarakị da?

⁵ ỊBarakị bala iDebora chị eje omwumwu nyaa eju la omyi ẹla ịlẹ: “[IJihova] Ee! Họ ká aluji nyang wuu ā gbu ịịwẹ, ká aligu nyang ā hụ́ lala ẹnụ!” (Ang. 5:31) Ụka nya ẹwụ nya Amagẹdọn, Ohe Oluhye ka ta aluji nyamwụ ayịreji ịnyịnyị, ma angịlẹ kị la ọháha ha Ohe Oluhye ka la ọchịda. Ịngịhyẹ ọkpọngchị tị du ká ẹwụ imiiye ịwẹ datị hi awụlẹ. Ụka nya ẹwụ nya Amagẹdọn lẹ, angịnyị nya Ohe Oluhye á ka ma uya ka. Ị́ dọmwụ ka kpa ang-abwọ nya ẹwụ ka! Ọngịrị nyaa ka ri ọ-ka “ba kem juwa dahịhile” iJihova bala alẹwụ nyamwụ ilepwoohe.—Ayị. 30:15; Ọwụ. 19:11-15.

6. Ịyẹ iJihova à tị́ ka kpa ta aluji nyamwụ ayịreji ụka nya ẹwụ nya Amagẹdọn?

⁶ Ịyẹ iJihova à tị́ ka kpa ta aluji nyamwụ ayịreji ụka nya ẹwụ nya Amagẹdọn? Ọ ka kpa agbẹyị ịdatị-datị myị́. Ọ-chụ pwokwita, ọ ka kpa ọpyị ọ-hụ́ jigi-jigi, ekpawẹ, bala ịkpala myị́. (Job 38:22, 23; Isi. 38:19-22) Ọ ka họ ká aluji nyamwụ ka ta awụlẹ ayịreji myị́. (2 Ego. 20:17, 22, 23) Ọ tị ka kpa alegu-ẹrụ nyamwụ nwụ angịnyị inyibyi myị́ ịnyịnyị. (Ayị. 37:36) Ang myị́ ang ká Ohe Oluhye á kpa, ọ ka kụrụ pyii lẹ. Aluji nyamwụ wuu ka tayịreji. Alabwẹla ịnyịịla tị ka la ọchịda ịnyịnyị.—Etu 3:25, 26.

7-8. (a) Jaabwọ ká ụpwụ nya 1 Ala ịTẹsalonika 5:1-6 mẹjẹ, ẹla ọlẹbyẹbyị oyina alegbeju nya odehe à tị́ ka ya dodehe? (b) Ịyẹ tị́ du ká ẹlẹwẹ ri ọnọọkịla ọtịpyọ?

⁷ Ẹla o-ya dodehe nya ‘okpunyi bala ọ-hụ la o-kem’ ka ji ene nya “ẹnụtụrụ ọlẹ ká Ọngọlahị la ka kpa warị [“ahyẹẹnụ nya iJihova,” NW].” (Wa 1 Ala ịTẹsalonika 5:1-6.) Ụ-ụpwụ nya 1 Ala ịTẹsalonika 5:2, “ahyẹẹnụ nya iJihova” ri “akama ọtụka” okpelego. (Ọwụ. 7:14) Ányị ahị tị́ ka bwu jẹ́ ụka ká akama ọọwa á juwa ka dọmwụ? ỊBayịbụụ ya jehi nyori ẹla o-ya dodehe ọlẹbyẹbyị ọhẹ nyị ka ji. Ẹla o-ya dodehe ọwẹ ka ri ang ẹjẹẹ nyori akama ọtụka okpelego nyị juwa ka dọmwụ lẹ.

⁸ Ọwẹ à ka ri ọ-họ jịra nya ọmwụ ọyẹyẹ u-uhye nya ẹla o-ya dodehe nya ‘okpunyi bala ọ-hụ la o-kem’ lẹlẹ. Ịyẹ tị́ du ká alegbeju nya odehe ka ya ịnyị? Alegbeju nya ịgba ọgbagba ka ya ẹla ọọwa ịnyịnyị? Ọ chịkpẹẹ. Ahị tị jẹ́ nyori, ẹla o-ya dodehe ọwẹ ka ri ọnọọkịla ọkịla ọlẹ kọ bwu ẹga nya alegu inyibyi. Ọnọọkịla ọwẹ tị tịpyọ lụmẹ, chajị ọ ka du ká angịnyị ka me nyori okpunyi nyị ji, tụbwọ ka akama ọtụka ọlẹ kọ gụgụ wuu bwu ẹpwụ nya ịlẹ kị wẹ chị angịnyị ehe ọgụ, à wẹẹ ka dọmwụ lẹ. Ee, “ayịreji ọtata . . . ka warị chaa ọgụ lụka ọ-mwaa, jaabwọ ká ang nya ọnyị ọmama kaa wẹ chị ọnyang ọlẹnyị ọgụ.” Ẹlịyẹ à tị́ ka họ ta anchẹ nya iJihova ịlẹ kị godayị giri-giri họọ? Ọ ka laa ẹbyẹbyị  myị́ jaabwọ ká ahyẹẹnụ nya iJihova ọwẹ ka bwu dọmwụ kpịraka, chajị ị́ jẹ́ ahyẹẹnụ ọọwa kpangga ene ka, ma ọ́ ka bwaa agaga ka.

9. Ụgbẹyị oyina iJihova à tị́ wẹẹ ka bwu ta odehe nya Olegu Onyobyi ayịreji?

⁹ IJihova á ka ta odehe nya Olegu Onyobyi ọlẹ wuu ayịreji ụka ookpokpo bwụram jaabwọ kọ họ lụka nya iNuwa ka. Ọkọkọ nyọọwa lẹ, ọ ka ta ụpa ookpokpo nyamwụ ayịreji ụka ọhẹ, ene kọ ka ta ọkịla ayịreji ụka ọkịla. Ọ ka ta ịBabịlọn Ọtụka, kọ ku ọmwakpa nya ịgba ọgbagba nya ịnịịkịla wuu, ayịreji họhẹ-họhẹ. Ọọwa, ụka nya ẹwụ nya Amagẹdọn lẹ, ọ ka ta ụpa ohihi nya odehe nya Olegu Onyobyi, kọ ri ụpa nya alupe, alẹwụ, bala alọhị, ayịreji lẹlẹ. Ahị kụ ẹhị yẹ ẹla imiiye ịwẹ kpori-kpori wẹẹ.

10. Jaabwọ kahị yẹ ụ-ụpwụ nya Ọwụrụụ-wụrụ 17:1, 6 bala 18:24, ịyẹ tị́ du ká iJihova ka ta ịBabịlọn Ọtụka ayịreji?

¹⁰ “Akama nya ọnyang ọlakpara ọtụka.” (Wa Ọwụrụụ-wụrụ 17:1, 6; 18:24.) ỊBabịlọn Ọtụka ju ọmwụ nya ido ododo lụmẹ-lụmẹ u-uhye nya ẹnyị nya Ohe Oluhye lẹ. Ọ mẹ ọnọọkịla jẹ u-uhye nya Ohe Oluhye. Lala ọnyang ọlakpara, ịgba ọgbagba nya ọnọọkịla á dayị giri-giri ẹ-ẹga nya iJihova ka, bwula ọ-chẹkpẹ ju eji ọkpakpa nya angịnyị ehe. Ịgba ọgbagba nya ọnọọkịla yẹ angị ịla ekpeleji nyamwụ akama bala o-naa okpoko. Ọ tị nwụ angịnyị lụmẹ-lụmẹ lẹ, tụ́ anchẹ nya iJihova. (Ọwụ. 19:2) Ányị iJihova à tị́ ka bwu ta ịBabịlọn Ọtụka ayịreji?

11. (a) Ịyẹ à tị́ ri ukpilo nya “iyo ọnyọmịla”? (b) Ányị Ohe Oluhye à tị́ ka kpọọ họ ụkụrwọ u-uhye nya ịBabịlọn Ọtụka?

¹¹ IJihova ka kpa “achụ iwo” nya ukpilo nya “iyo ọnyọmịla” ọhẹ ta “ọlakpara ọtụka” ọwẹ ayịreji. Ukpilo nya iyo ọọwa ku ọmwakpa nya Otume nya Ẹpwụma. Achụ iwo ịịwa ku ọmwakpa nya igomenti ịlẹ kị chẹkpẹ ju ogu ọwẹ. Ụka ọlẹ ká Ohe Oluhye hu nọ á họ, igomenti ịwẹ ka jahi da ịBabịlọn Ọtụka. “Ị ka nu ọnyang ọọwa ang myị́ ang nyamwụ wuu . . . gbee kọ ka ji lọhị-lọhị.” Ị ka họ ịnyị bwula o-noo ang ụdụ nyamwụ kpẹng-kpẹng bala o-bwuroo apwụ dodehe jaabwọ kọ la ọkwọ kaka ba. (Ọwụ. 17:3, 16) Ayịreji ọwẹ ka wẹ lọọ kpịraka, du kọ ka lala o-ri ọ họ ẹ-ẹpwụ nya ahyẹẹnụ ookpokpo kem. Ọ ka la  angịlẹ kị myị ju ịgba ọgbagba nya ọnọọkịla ẹbyẹbyị, ọgụgụụgụ chajị nyọlẹ kọ kaa kpọnụ yẹkẹẹ: “Am ri ọngọ la ihi-ihi lụmẹ lala adịrahụ ọnyang lẹ. Ḿ ri ahụ-ogu kpong-kpong ka. Ḿ tị ka yẹ ida ọbaba ẹ-ẹhị kpá ẹnẹnẹhẹ kaka ịnyịnyị.”—Ọwụ. 18:7, 8.

12. Ẹlịyẹ iJihova à tị́ ka ya ẹga da ká alẹpwụma ka họ ka? Ịyẹ tị́ du?

¹² IJihova á ka ya ẹga da alẹpwụma ịwẹ ka ta angịnyị nyamwụ ayịreji ka. Ọ kpụ angịnyị nyamwụ ịpyọ nyọka ri alibeenu nyamwụ, ị tị ju ihi nyamwụ nyọlẹ kọ byaa nyị kpehe bwu ẹpwụ nya ịBabịlọn Ọtụka. (Ụkụr. 15:16, 17; Ọwụ. 18:4) Ị tị kaa maga ịnyịnyị nyọka da angịkịla ụbwọ kpehe bwu ẹpwụ nyamwụ. Anchẹ nya iJihova á ka ri ugu nya “akama ọlẹ kọ wẹẹ ka wẹ chaa ọgụ” ka. Ma, ị ka baba nya ọmyịmyị ọnyọọngịrị nyọka bọhụ myị́ ẹ-ẹpwụ nya ẹla ọkịla ọlẹ kọ wẹẹ ka họ.

13. (a) Owo à tị́ ri ịGọọgụ? (b) Jaabwọ ká ụpwụ nya Isikẹlụ 38:2, 8, 9 mẹjẹ, ịyẹ à tị́ ka gu ịGọọgụ gbịla nyọka jahị da anchẹ nya iJihova?

¹³ Ẹwụ nya ịGọọgụ. (Wa Isikẹlụ 38:2, 8, 9.) Ụka ká iJihova á ta ịgba ọgbagba nya ọnọọkịla wuu ayịreji, angịnyị nya Ohe Oluhye kem à ka hi lẹ. Ị ka lala okoji ọlẹ kọ hi godayị riri kem u-ugbileji ụka ká ịkịla wuu á tụrụ. Ọọwa ka du ká Olegu Onyobyi ka ju agbama pwùuu. Ọ ka mẹ agbama ọọwa jẹ bwula ọ-kpa ịnịịkịla bwu ẹga nya “alegu inyibyi” du ịdịrịhụ ilodehe ju kị ka tụchawụlẹ jahị da anchẹ nya iJihova. (Ọwụ. 16:13, 14) Ọtụchawụlẹ nya ịdịrịhụ ọọwa à ri ‘ịGọọgụ ọlọpyị nya ịMagọọgụ’ lẹ. Ụka ká alẹpwụma ka wuleji jahị da anchẹ nya iJihova lẹ, ẹwụ nya Amagẹdọn à ka dọmwụ ahyaahị lẹlẹ.—Ọwụ. 16:16.

14. Ẹlịyẹ ịGọọgụ à tị́ ka jẹ́?

¹⁴ ỊGọọgụ ka dahịhile “ọngịrị nya ọngịnyị ehe amamadiroko” ọlẹ kọ ri ang-abwọ nya ẹwụ ịlẹ kọ la. (2 Ego. 32:8) Ahị tị ka dahịhile iJihova, Ohe Oluhye nyahị. Ọọwa ka du ká alẹpwụma ka yẹhị lala aluchi. Ịyẹ tị́ du? Chajị ịBabịlọn Ọtụka la ọngịrị yẹẹyẹẹ. Ma, ihye nyamwụ á jẹ́ chọọ da bwu ụbwọ nya ukpilo nya “iyo ọnyọmịla” bala “achụ . . . iwo” nyamwụ myị́ ka! (Ọwụ. 17:16) Lẹ, ịGọọgụ ka me kọ ka chọọ kpẹẹ nyọka tahị ayịreji. Ọ ka “wẹ tuuu lala igbachịwụ ọtụka-à yịrị ẹga yịrị” jahị da angịnyị nya  iJihova. (Isi. 38:16) Ma, ọ́ ka tata ene ká ịGọọgụ ka yẹ nyori ọwa nyị chabwọ kpụ ẹpwụ nya ụnya lẹ kaka. Ọ ka jẹ́ nyori iJihova ọwa nya-à wẹẹ mwẹla ta lẹ, jaabwọ kọ la iFero ẹ-ẹpwụ nya ihu ọtụka lụka onyogo.—Ehe. 14:1-4; Isi. 38:3, 4, 18, 21-23.

15. Ẹlịyẹ ịKịrayịsị à tị́ ka họ ẹ-ẹwụ nya Amagẹdọn?

¹⁵ ỊKịrayịsị bala alẹwụ nyamwụ ilepwoohe ka dẹwụ yẹ angịnyị nya Ohe Oluhye dada bala ọ-ta ịGọọgụ bala alẹwụ nyamwụ ayịreji gbang-gbang. (Ọwụ. 19:11, 14, 15) Lẹ, ẹlịyẹ à tị́ ka họ ta Olegu Onyobyi, oluji nya Ohe Oluhye ọgụgụ wuu, ọlẹ kọ me ọnọọkịla ju alẹpwụma du kị dọmwụ nyọka ma uya ta anchẹ nya iJihova ẹ-ẹwụ nya Amagẹdọn? IJisọsị ka woo bala alegu inyibyi nyamwụ ịkịla ju ka ẹpwụ nya ụjẹ ọ-la ọbaba-ka, ọọwa lẹ ọ ka pyị ang daa ụ-ụwa ẹ-ẹpwụ nya ẹka ụnọ lẹlẹ.—Ọwụ. 20:1-3.

16. (a) Ányị ahị tị́ ka mẹjẹ nyori ahị “jẹ́ Ohe Oluhye”? (b) Ụka nya ẹwụ nya Amagẹdọn, ẹlịyẹ à tị́ ka họ ta angịlẹ kị jẹ́ iJihova?

¹⁶ Kori kahị tata ẹ-ẹpwụ nya ẹlịlẹhị lẹ lee kori kahị tata ka wẹwẹ, ahị ka la ọchịda ụka nya Amagẹdọn kẹnẹ-kẹnẹ kori kahị mẹjẹ nyori ahị “jẹ́ Ohe Oluhye” bala o-ri ahị “ju ihi nya ẹrụ ọnyịịla nya Ọngọlahị iJisọsị ịKịrayịsị” ịnyị. (2 Tẹs. 1:7-9) Ahị ka jẹ́-ẹ ya nyori ahị “jẹ́ Ohe Oluhye” lẹ, kori kahị jẹ́ ang ịlẹ kị họ́ọ bala ang ịlẹ kị họ́ọ ka, bala ehile nyamwụ ịnyịnyị. Ahị ka mẹjẹ nyori ahị jọ́ọ ịnyịnyị kori kahị la ọháha họọ, jwoo ihi, bala ọ-gbịgba họọ ọwa ụbwọọmwụ kem. (1 Jọn. 2:3-5; 5:3) Ụka kahị mẹjẹ nyori ahị jẹ́ Ohe Oluhye, ahị ka la iwe ọtụka nya Ohe Oluhye ọ-ka ‘jẹ́ẹhị’ ịnyịnyị. Ọọwa à ka du kahị ka la ọchịda ụka nya Amagẹdọn lẹ! (1 Kọr. 8:3) Ịyẹ tị́ du kọ lịnyị? Chajị Ohe Oluhye á ‘jẹ́ẹhị’ lẹ aalẹ, ẹla nyahị kpọọ ịpyọ lẹ.

17. Ịyẹ à tị́ ri etu nyọka “ju ihi nya ẹrụ ọnyịịla nya Ọngọlahị iJisọsị ịKịrayịsị”?

¹⁷ “Ẹrụ ọnyịịla nya Ọngọlahị iJisọsị ịKịrayịsị” ri ẹlịlẹhị ịlẹ wuu ká iJisọsị mẹjẹ, kahị kaa wa bwu Omyi Ẹla nya Ohe Oluhye. Ahị kaa ju ihi nya ẹrụ ọnyịịla ọwẹ kori kahị kpa họ ụkụrwọ ọ-ọhịhị nyahị. Ahị myịmyị kaa hu ụkụrwọ nya Ohe Oluhye kụ ịlahị nya ang ịkịla wuu ọ-ọhịhị nyahị, ba ehile nya Ohe Oluhye jẹ, bala o-ya ẹla u-uhye  Ịpyị-Adịrahụ nyamwụ ju angịkịla. (Mat. 6:33; 24:14) Ahị kaa da aanịna nya ịKịrayịsị ịlẹ ká Ohe Oluhye ya ida wụ́ ụbwọ ịnyịnyị jaabwọ kị wẹẹ kpẹhị rịrị ụkụrwọ ọtụka ọlẹ ká Ohe Oluhye ya jwaa ụ-ụbwọ.—Mat. 25:31-40.

18. Ụgbẹyị oyina anchẹ nya Ohe Oluhye ịlẹ kọ ya ida wụ́ à tị́ ka bwu nwụ uri nya ụbwọ ọlẹ kị daa?

¹⁸ Lụka o-kpii, anchẹ nya Ohe Oluhye ịlẹ kọ ya ida wụ́, ka jẹ́-ẹ nwụ ‘ịkpịlọ ịkịla’ uri nya ụbwọ ọdada nyaa. (Jọn. 10:16) Ányị ọ tị́ ka bwu chịkpẹẹ ịnyị? Ene ká ẹwụ nya Amagẹdọn ka dọmwụ, angịnyị angị 144,000 ịlẹ kị ya ida wụ́ wuu, ka wuleji bwula igu rụ ka epwoohe ka ri alegu ịlẹ kị ka jẹ́-ẹ gbu myị́ ẹnẹnẹhẹ kaka. Ụka ọwẹ, ị ka juwa ẹ-ẹpwụ nya alẹwụ ilepwoohe ịlẹ kị ka ta ịGọọgụ ayịreji bala o-chewu ke “iru nya angịnyị” ịlẹ kị ji oye nya Ohe Oluhye. (Ọwụ. 2:26, 27; 7:9, 10) Iru nya angịnyị ịwẹ ka chị ọkẹkẹnị nyịlẹhị-ịlẹhị nyọlẹ kị jẹ́ da anchẹ nya iJihova ịlẹ kọ ya ida wụ́ ụbwọ, ụka ọlẹ kị jam odehe wẹẹ!

19-20. Kori kahị juwa ẹ-ẹpwụ nya akama wẹwẹ, ányị ahị tị ka bwu godayị giri-giri jaabwọ ká Amagẹdọn wẹẹ ju chwẹẹ?

¹⁹ Anchẹ nya iJihova lụmẹ-lụmẹ juwa chịpwụrụ bwu ẹpwụ nya ịmayẹ lụka nya ahyẹẹnụ ihyẹẹkpẹ ilujwo ịlẹ. Ahị tị ka jẹ́-ẹ bọhụ la ọkẹkẹnị myị́. (Jem. 1:2-4) Ịngịhyẹ ọlẹ kọ ka dahị ụbwọ yẹẹyẹẹ ri ọ-ka raabwọ ụka myị́ ụka bwu ọkịlẹtụ nyahị. (Luk. 21:36) Áhị ka ba a-abwọ ọrịrị kem ka, ahị ka wa Ụpwụ Ịgọgọ bala ọ-kụ irya ju ẹla ịlụwa kpori-kpori, tụ́ ọmwụ ọyẹyẹ ịlẹpwụ nyamwụ u-uhye nya ụka nyahị. (Eje. 77:12) Kori kahị họ ang ịwẹ wuu bala ọ-kpa ọngịrị nyahị wuu họ ụkụrwọ nya Ohe Oluhye, ọmyịmyị bala ẹhị ọrịrịị-rịrị nyahị ka la ọngịrị.

²⁰ Kụ irya jaabwọ á ka chị ọkẹkẹnị kaka ba ụka ká ịBabịlọn Ọtụka ka ta ayịreji bala ụka ká ẹwụ nya Amagẹdọn ka cheju wẹẹ! Ọlẹ kọ gụgụ wuu, kụ irya jaabwọ á ka chị ọkẹkẹnị kaka ba ụka ká ọng myị́ ọng wuu ka ju ẹnyị nya Ohe Oluhye bala eji ọkpakpa nyamwụ ihi wẹẹ! (Isi. 38:23) Amagẹdọn ri oja ọnyịịla ịnyịlẹhị ha angịlẹ kị jẹ́ Ohe Oluhye, ju ihi nya Ọnyị nyamwụ, bala o-ju ugbodu pwụ ọbaba.—Mat. 24:13.