1. Irya ọlanyị iJihova à tị́ la ẹ-ẹga nya angị kpịlaa keji? Ịyẹ tị́ du?

IJIHOVA la ọháha ẹ-ẹga nya angịlẹ kị kpịlaa keji. Angịlẹ kị kpịlaa keji nya ịlẹhị kem, à ka jẹ́-ẹ jwoo chwẹẹ ẹ-ẹpwụ nya igu oriri lẹ. Ma, ọ kaa “kpa ẹhị dịrẹ ọlọbọọchẹ bwu ẹga ọlụrụ hwẹ̀ẹẹ.” (Eje 138:6) Ahị wuu tịtọ ká ẹla nyahị ka kpụ iJihova ịpyọ bala ọ-ka jwoo chwẹẹ. Lẹ, ọwẹ ri ang ọtụka-ọtụka ọlẹ kọ du áhị ka kpịlọhị keji.

2. Ẹlịyẹ ahị tị́ wẹẹ ka jẹ́ bwu ang ọjẹ́jẹ ọlẹ?

² Ẹ-ẹpwụ nya ang ọjẹ́jẹ ọlẹ, ahị ka ye ọwẹwẹ nya ịtọ-ẹla ịta: (1) Ịyẹ à tị́ ri ịlọng ọ-kpa keji? (2) Ịyẹ tị́ du kahị baba nyọka la abwụma ọwẹ? (3) I-iwe-ahụrụ iyina ọ tị́ kaa lujwo nyọka kpịlọhị keji? Jaabwọ kahị wẹẹ ka jẹ́, kori kahị kpịlọhị keji, ahị kaa kpa ọkẹkẹnị wẹ ọkịlẹtụ nya iJihova bala o-ye apyobwuna lịlọhị.—Etu 27:11; Ayị. 48:17.

3. Ịyẹ à tị́ ri ịlọng ọ-kpa keji?

³ Ọngọ kpa ịlọmwụ keji á kaa hu ịlọmwụ nya ọngọ ju apyobwuna gụ angịkịla ka. Ọ́ ri ọngọ hi ọbọọchẹ lee ọ-chẹhị chịrị ka. Ọngọ kpa ịlọmwụ keji kaa jẹ́ nyori ọwa nyị ri ochiche amamadiroko ị-ịlahị nya Ohe Oluhye, bala ọ-jẹ́ iwe-ahụrụ ọlẹ ká angịkịla ji ịnyịnyị. Ọ kaa myị nyori, angịkịla gwọọ ụ-ụgbẹyị ọhẹ lee ọkịla.—Filip. 2:3, 4.

4-5. Ịyẹ tị́ du ká ịlọhị ọ-kpa keji á ri ang ọ-ka mẹjẹ ba odehe kem ka?

⁴ Angịhyẹ kaa me angị kpịlaa keji ẹ-ẹhị kem ịnyị, ị́ tị lịnyị ẹ-ẹpwụ ka. Ị ka ri angị ju oyi myị́. Ị ka ju angịkịla ihi bala ọ-họ ẹla ụ-ụgbẹyị ọnyịịla myị́, chajị ịnyị adaa bala ịnaa anyị à mẹ  jáa lẹ. Ma, ẹ-ẹpwụ nyaa, i ka ri angị hi ọbọọchẹ onyobyi-obyi. Ị-ịlahị, ụma nya ọngịnyị ọlẹ kị ri ka chehe gegilee.—Luk. 6:45.

⁵ Angịkịla tị juwa kị kaa ya ẹla la ahị ọdahile bala o-ya ẹla ọlọkịlẹtụ nyaa. Ọọwa á ri yẹkẹẹ, ị ri angị hi ọbọọchẹ ka. (Jọn. 1:46, 47) Ma, angịlẹ kị kaa ju oyi ka, ka dụmwọ-dụmwọ kị ka kpụnịrọ ọngịrị nya ịlaa ka. Kori kahị ri angị ju oyi lee angị ju oyi ka wẹwẹ, ahị wuu ka maga pyii nyọka la olegu nya ịlọhị ọ-kpa keji.

6. Ẹlịyẹ ahị tị́ ka jẹ́ bwu ọgụ-ẹpẹtẹ nya ịPọlụ ọlụpwụ nya 1 Ala ịKọrịntị 15:10?

⁶ Kụ irya nya ọgụ-ẹpẹtẹ ọnyịịla nya ịPọlụ ọngọmyẹrụ nya ịKịrayịsị wẹẹ. IJihova kpọọ họ ụkụrwọ ọtụka-ọtụka nyọka ya ọjịra-jịra inyeewe yeji bwu epweji ọhẹ ka ọkịla. Ang ịlẹ kọ họ ha iJihova dọmwụ ka gụ ịnya angịmyẹrụ nya iJisọsị ịKịrayịsị ịkịla myị́. Ma, ịPọlụ á me irya nyori ọ gụ aanamwụ ịkịla ka. Chajị nya ịlọmwụ ọ-kpa keji, ọ yẹkẹẹ: “Am ịPọlụ ọlẹ ayịdang kpangga a ri ọhịnyẹnyẹ kpa wuu ẹ-ẹpwụ nya alẹrụ ọnyịịla ọlẹ lẹlẹ. Ịnọ, ḿ dọmwụ chịla kpikpiri kpụ, ị ka wụrụm ọlẹrụ ọnyịịla ọlẹ kpong-kpong ka. Chajị, m kaa tụ [ala ọjịra-jịra] nya Ohe Oluhye pyịpyị lụmẹ ene-ene.” (1 Kọr. 15:9) ỊPọlụ myịmyị ya kpakpa nyori, a-abwẹla lee ụkụrwọ nyọwa nya-à du ká ọwa nyị ri igu bala iJihova myị́ ka, ma ọnahị nya iJihova ọlẹ ká ọwa ịPọlụ chịla ịnọ ka, nya-à du lẹ. (Wa 1 Ala ịKọrịntị 15:10.) ỊPọlụ ri ọgụ-ẹpẹtẹ ọnyịịla nya ọngọ kpa ịlọmwụ keji. Ụka kọ da ụpwụ du ta angịnyị nya ịKịrayịsị ịla ịKọrịntị, ọ́ chị ọgọm u-uhye nya ịlọmwụ ka, nanana nyori angịhyẹ ụ-ụwa ya ẹla ọtịpyọ bọọ.—2 Kọr. 10:10.

7. Ányị ọọnahị ọhẹ à tị́ mẹjẹ nyori ọ kpa ịlọmwụ keji?

⁷ Oja nya ọhịhị nya Ọọnahị Karl F. Klein, kaa ju iru nya anchẹ nya iJihova ọhụ yẹẹyẹẹ. Ọ juwa ẹ-ẹpwụ nya Angị Kpẹhị  Rịrị Ogu nya iJihova ẹnẹhẹ lẹ. O-oja ọọwa, Ọọnahị Klein ya ẹla u-uhye nya ọdẹwụ-dẹwụ ịhyẹ ịlẹ kọ la ẹ-ẹpwụ nya ẹka lụmẹ-lụmẹ. Ọ-chụ pwokwita, ọ maga nyọka kpa ẹrụ ọnyịịla pyẹ bwu ẹpwa ka ẹpwa ụka nya ọgbanyẹ la ẹka nya 1922. Chajị nyọlẹ kọ lọọ ujwo lụmẹ ẹnụmwụ ọọwa lẹ, ọ́ myị ka gụ ọwẹ kaka lala ẹka imiiye lẹpwụ-lẹpwụ. Ụka ọkịla nyọlẹ kọ kaa họ ụkụrwọ ị-ịBẹtẹlụ, ọ kpa ẹla nya ọọnahị ọhẹ ẹ-ẹpwụ chajị ọọnahị ọọwa nwọọ rịrị. Ịnyịnyị, ọ la ọkịlẹtụ ọ-kpụ enyi ọọlajị nya imahị omeme, ọ tị ka nọ chẹẹ, ọ ye ọkẹkẹnị myịmyị. Nanana nyori ọ lịnyị, ọ họ akụrwọ ịtụka lụmẹ-lụmẹ ha iJihova ịlẹ kị kpịpyọ yẹẹyẹẹ. Ọngịnyị ọlẹ kị jẹ́ yẹẹyẹẹ ọlịịwẹ baba nya ịlọmwụ ọ-kpa keji ọtụka-ọtụka nyọka ya ẹla u-uhye nya ọdẹwụ-dẹwụ nyamwụ! Aanahị alẹng bala anyang lụmẹ-lụmẹ kaa kpịtịya nya Ọọnahị Klein bala oja nya ọhịhị nyamwụ ọwẹ. * Ẹla nyamwụ kpaa ịpyọ lụmẹ.

8. Ányị ụpwụ nya 1 iPita 5:6 à tị́ mẹjẹ nyori ịlọhị ọ-kpa keji kaa kpụ iJihova ịpyọ?

⁸ Ang odudu ọlẹ kahị kaa tịtọ nyọka kpịlọhị keji gụgụụgụ ri, ọọwa kaa kpụ iJihova ịpyọ. IPita ọngọmyẹrụ ya ẹlẹwẹ gbagbịla. (Wa 1 iPita 5:6.) Ụpwụ ọlẹ kọ ri, Come Be My Follower, ya ẹla u-uhye nya omyi ẹla nya iPita ọwẹ. Ọ, yẹkẹẹ: “Ọbọọchẹ ohihi lala ẹhwa. Ọ kaa họ ọngịnyị ang onyobyi-obyi. O ri abwụma ọlẹ kọ du ká ọngọlẹ kọ dọmwụ jẹ́ ang yẹẹyẹẹ kaa ju apyobwuna ha Ohe ka. Ma, ọngọnyị kọ jẹ́ ang lụmẹ ka wẹwẹ, kaa ju apyobwuna ha iJihova kori kọ kpa ịlọmwụ keji. . . . Ọ ka kpụ Ohe Oluhye ịpyọ yẹẹyẹẹ . . . nyọka wahị kụrụng chajị nya ịlọng ọ-kpa keji.” * Ang ọlẹ kọ há kahị ka họ gụgụ wuu ri ọ-ka kpa ọkẹkẹnị wẹ ọkịlẹtụ nya iJihova.—Etu 23:15.

9. Ịyẹ tị́ du ká angịnyị kaa tịtọ nyọka tụ́ juhi chwẹẹ kori kahị kpịlọhị keji?

⁹ Datị hi ọ-kpụ iJihova ịpyọ, ahị kaa ye apyobwuna lụmẹ-lụmẹ kori kahị kpịlọhị keji. Kori kahị kpịlọhị keji, angịkịla kaa tịtọ nyọka tụ́ juhi chwẹẹ. Kori ká tịtọ nyọka jẹ́ ang odudu kọ lịnyị, kụ irya nya angịnyị ụma ịlẹ káahụ lịlọng kaa tịtọ nyọka ju ogu bala wẹẹ. (Mat. 7:12) Ọ́ kaa háahị nyọka ju ogu bala ọngọlẹ kọ kaa tịtọ ká angịkịla ka họ irya nyamwụ ụka myị́ ụka, lee ọngọlẹ kọ kaa ke ụrụ wọ ẹla nya angịkịla ka, lẹ ka. Ma, ọ kaa kpụhị ịpyọ nyọka yẹjula ọọnahị ọlẹ kọ ‘la olegu nya ahyẹẹrwẹrwa, la ọháha, bala ọ-la dụmwọ.’ (1 Pit. 3:8) Kori ká ẹla nya angịlịnyi  á háahị aalẹ, ẹla nyahị ka há angịkịla ịnyịnyị kori kahị kpịlọhị keji.

10. Ányị ịlọhị ọ-kpa keji à tịị du ká ọhịhị kaa chịkpẹẹ hahị?

¹⁰ Ịlọhị ọ-kpa keji kaa du ká ọhịhị kaa chịkpẹẹ hahị. Ụka ọhẹ, ẹlẹhẹ kaa họ ịlẹ kahị me irya nyori ọ́ chịla nyọka lịnyị ka. ISolomọn, Adịrahụ ọ-jẹ́ ẹla, yẹkẹẹ: “M̀ yẹ anchẹ kịị kụ anyịrẹ, ká angị la ihi-ihi tị juwa jẹdịyẹ ẹ-ẹpẹtẹ.” (Ọngọ 10:7) Ụka ọhẹ, a-angịlẹ kị jẹ́-ẹ họ ang yẹẹyẹẹ, ị kaa ya ogbo ha ka. Angịlẹ kị jẹ́-ẹ họ ang lala ịwa ka, ị kaa ya ogbo ha dachichi lẹ. Ọ lịnyị odu lẹ, iSolomọn yẹ nyori ahị baba nyọka ye iwe-ahụrụ nya ọhịhị myị jaabwọ kọ la, ọkọkọ nyọka wụ ẹjẹ u-uhye nya abwọlẹ ká iwe-ahụrụ nya ọhịhị tịpyọ kaka ba. (Ọngọ 6:9) Kori kahị kpịlọhị keji, ọ ka chịkpẹẹ nyọka ye ọhịhị myị jaabwọ kọ la, ọkọkọ nya abwọlẹ kahị tịtọ kọ ka la.

11. Ányị ahị tị́ ka họ ụka kị nwụhị rịrị?

¹¹ Ahyẹẹnụ ọnyị myị́ ọnyị, ahị kaa la iwe nyọka mẹjẹ nyori ahị kpịlọhị keji. Kụ irya nya iwe-ahụrụ ịmanyị-ịmanyị ịlẹ wẹẹ. Ụka kị nwụhị rịrị. Ahị baba nyọka kpịtịya nyori, kori ká ọngịnyị á kpa ụka nyamwụ nwụhị rịrị lẹ aalẹ, ahị họ ẹla tịpyọ kpoye nya ọlẹ kahị me irya lẹ. Kori ká ọngịnyị á nwụrị rịrị, ụka nya ọgbanyẹ áhị kaa tịtọ nyọka ye myị ka. Ahị ka kpụ ọngọlẹ kọ nwụrị rịrị abyị lee ọ-wụ́ ẹjẹ u-uhye nya ụgbẹyị ọlẹ kọ bwu yoo myị́. Ma, kori kahị tị kpịlọhị keji, ahị ka nwụ irya nyahị rịrị.

12. Ẹlịyẹ ahị tị́ jẹ́ bwu ụpwụ nya Etu 27:5, 6 u-uhye nya ang odudu kọ ka myịhị lẹhị ụka ká ọngịnyị á nwụhị rịrị? Ọ-chụ pwokwita oyina à tị́ ji?

¹² Kori kị nwụ ọngọ kpa ịlọmwụ keji rịrị, ọ kaa myọọ lẹhị. Kụ irya nya ẹla ọ-chụ pwokwita ọlẹ wẹẹ. À juwa ọọjịra-jịra, wẹẹ joja bala aanang ịdatị-datị. Ọọwa lẹ, ọngọhẹ bwu ẹpwụ nyaa à ya ụbwọ chịng ka ọka lẹ, ọ bying nyori ang oriri nyị báang ugbọnụ ẹẹ. Ọ ri ịnyịlẹhị, ọ ka lang oyoyi. Ma, ọ́ ka myịng lẹhị nyori ọ myị ya jeng ka? Ọ dọmwụ ka háng ịnọ ká ọngọhẹ ka ya jeng ene nya ụka ọwẹ! Ịnyịnyị, ọ baba kahị ka kpịlọhị keji bala ọmẹjẹ nyori, ọ myịhị lẹhị nyọlẹ ká ọọnahị la ọkịlẹtụ nyọka nwụhị rịrị ụka ọlẹ kahị baba nyamwụ. Ahị ka hu ọngọọwa nya oligu nyahị, o-oluji ka.—Wa Etu 27:5, 6; Gal. 4:16.

13. Ányị ahị tị́ ka mẹjẹ nyori ahị kpịlọhị keji kori ká angịkịla á la ụkụrwọ ọọjịra-jịra?

¹³ Ụka ká angịkịla á la ụkụrwọ ọọjịra-jịra. Ọngọgbahị nya ọjịra-jịra ọhẹ ọlẹ ká ẹnyị nyamwụ ri Jason yẹkẹẹ: “Ụka kam yẹ akụrwọ ịlẹ ká angịkịla kaa họ ọọjịra-jịra, m̀ kaa kụ irya nya ang odudu kị chụm am ka.” Ọ  lang ịnyị ụka ọhẹ lẹ? Ọ́ tịpyọ nya ọngịnyị ọ-ka “juwa tịtọ” nyọka họ ụkụrwọ nya iJihova gụ ọwọwa ka. (1 Tim. 3:1) Ma, ahị ka dụmwọ-dụmwọ ẹ-ẹga nya irya ọkụkụ nyahị. Kori kahị dụmwọ-dụmwọ ka, ọbọọchẹ ohihi ka jụ wẹ ẹpwụ nya ọkịlẹtụ nyahị. Ọ-chụ pwokwita, ọọnahị ọlẹng ọhẹ ka dọmwụ nyọka kụ irya myị́ nyori ọwa nya-à ka jẹ́-ẹ họ ụkụrwọ ọhẹ gụ ọọjịra-jịra lẹ. Lee, ahụ nya ọọnahị ọhẹ ka ya myị́ yẹkẹẹ, ‘Ọrụm ka jẹ́-ẹ họ ụkụrwọ ọwẹ gụ ọọnahị ọkịla ọlaanyị!’ Ma, kori kahị kpịlọhị keji ịnyịlẹhị aalẹ, áhị ka la irya ọkụkụ ụma ọlịịwẹ ka.

14. Ịyẹ ahị tị́ ka jẹ́ bwu ẹla ọlẹ ká iMosisi họ?

¹⁴ Ahị ka jẹ́ ang bwu ẹla ọlẹ ká iMosisi họ ụka ká angịkịla la iwe nyọka họ ụkụrwọ nya iJihova gụ ọwọwa. Ụkụrwọ ọlẹ ká Ohe Oluhye ya jwoo ụ-ụbwọ nyọka kpa ala Isirẹlụ ụgbẹyị, myọọ lẹhị yẹẹyẹẹ. Ma, ụka ká iJihova ya ọngịrị ha angịkịla nyọka họ akụrwọ ịhyẹ ịlẹ ká iMosisi kaa họ ene-ene, ányị ọ tị́ họ? Ọ́ lọọ ijiiji ka. (Ọwa. 11:24-29) Chajị nya ịlọmwụ ọ-kpa keji, ọ ya ẹga da angịkịla họ ụkụrwọ nya eje ọlala balọọ. (Ehe. 18:13-24) Ọọwa ri, nyọlẹ ká ala Isirẹlụ la angịnyị lụmẹ-lụmẹ nyọka họ ụkụrwọ ọwẹ wẹẹ, ị́ ka dayị tata lụmẹ ene ká angịleje ka ke ụrụ wo ẹla nyaa kaka. Ọwẹ mẹjẹ nyori, iMosisi kpa angịkịla i-irya gụ akụrwọ ịlẹ kọ kaa họ. Ọgụ-ẹpẹtẹ ọnyịịla à wẹ kahị ka bajẹ lẹ! Ahị kpịtịya nyori, kori kahị tịtọ ká iJihova ka kpahị họ ụkụrwọ aalẹ, ịlọhị ọ-kpa keji ka juhi apyobwuna gụ ang ịmanyị ọlẹ kahị jẹ́. ‘IJihova la uhye gidogboo kpá odu ịnyị, ọ kaa kpẹhị ju ọngọ kpa ịlọmwụ keji.’—Eje. 138:6.

15. Ányị iwe-ahụrụ nya aanahị ịhyẹ à tị́ yẹda?

¹⁵ Ụka ká iwe-ahụrụ nyahị á yẹda. La ẹka ịkpangjẹ, ụkụrwọ nya iru nya aanahị alẹng bala anyang ịlẹ kị họ ha iJihova lụka ọtata lẹ, yẹda. Ọ-chụ pwokwita, la ẹka nya 2014, ogu nya iJihova ya nyori ụkụrwọ nya Angị kpẹhị rịrị idistrit nyị́ ka ji kaka, lẹ ị ya ụkụrwọ onyeewe ha aanahị ịwẹ bala ịhụ nyaa.  Ẹka ọwọwa, ogu nya iJihova ya nyori angị kpẹhị rịrị isekut nyị ka ba la ụkụrwọ nyaa ụka kị pwu ẹka iwo irwiye. Ịnyịnyị, aanahị ịlẹ kị gu ẹka iwo ineku lee ọ-gụ ọọwa á ka họ ụkụrwọ nya angị kpịlahị ẹ-ẹpwụ nya angịgbahị nya ọjịra-jịra kaka. Ịnyịnyị, ẹka ịmanyị-ịmanyị kẹkpẹ, ị ya aanahị ịla ịBẹtẹlụ lụmẹ-lụmẹ du ka ye ịlahị nya ụgbẹyị. Angịkịla pẹhi ụkụrwọ nyaa chajị nya ẹdụrụ, chajị nya alugbiyegu nyaa ọ-baba nya ụbwọ ọdada, lee iwe-ahụrụ ịkịla.

16. Ányị aanahị alẹng bala anyang à tị́ kpịlaa keji bala o-ye iwe-ahụrụ nyaa onyeewe myị?

¹⁶ Ọ la aanahị ịwẹ ujwo nyọka nwụhọ. Ọ la gbagbịla Iru nyaa ịlẹ kị ya ụkụrwọ onyeewe ha, la ọháha nya ịlẹhị-ịlẹhị u-uhye nya ụkụrwọ nyaa onyogo, iru nyaa dọmwụ kaa họ ẹ-ẹpwụ nya ẹka lụmẹ-lụmẹ lẹ. Angịhyẹ nyaa “bida” jaabwọ kị wẹẹ nwụhọ nyọka pwoku iwe-ahụrụ onyeewe nyaa. Nyọlẹ kọ nọ chẹẹ, ị jẹ́ nwụhọ. Ịyẹ tị́ du? Ọgụgụụgụ ri ọlajị nya ọháha ọlẹ kị la ha iJihova. Ohe Oluhye ị ya ịlaa ju ụ-ụbwọ lẹ, ụkụrwọ lee ẹnyị ọhẹ ka. (Kol. 3:23) Ị chị ọkẹkẹnị nyọka kpa iwe ọnyị myị́ ọnyị họ ụkụrwọ ha iJihova. Ị “kpa imahị omeme [nyaa wuu] kịla Ohe Oluhye,” chajị ị jẹ́ nyori ọ kpahị jwaa.—1 Pit. 5:6, 7.

17. Ịyẹ tị́ du kọ myịhị lẹhị nyọlẹ ká Ụpwu Ịgọgọ juhi ọhụ nyori, ahị nyị kpịlọhị keji?

¹⁷ Ọ myịhị lẹhị lụmẹ nyọlẹ ká Ụpwu Ịgọgọ juhi ọhụ nyori, ahị nyị kpịlọhị keji. Kori kahị kpịlọhị keji, angịkịla kaa tịtọ nyọka ju ogu balahị, ahị bala angịkịla ịịwa tị kaa ye apyobwuna ịnyịnyị. Ahị jẹ́-ẹ bọhụ ẹ-ẹpwụ nya akama ịnyịnyị gụ olene. Ọlẹ kọ tị gụgụ wuu ri, ahị jẹ́-ẹ tụ́ ju Adahị olepwoohe chwẹẹ gụ olene ịnyịnyị. Ahị chị ọkẹkẹnị lụmẹ nyọka jẹ́ nyori, nanana nyọlẹ ká Ohe Oluhye ri “Agụgụ ọngọlẹ kọ luhye gụ ang wuu” lẹ, ọ la ọháha u-uhye nya anchẹ nyamwụ ịlẹ kị kpịlaa keji, ị tị ju apyobwuna họọ ịnyịnyị!—Ayị. 57:15.