ỤKA ká ọngọ ya iwe-ahụrụ nya ẹga dodehe á yẹ ká igbachịwụ ọnyọọngịrị á juwa da jahị da ka epweji ọhẹ ọlẹ ká angịnyị lụmẹ ụ-ụwa, ọ kaa maga la ọngịrị nyamwụ wuu nyọka da angị ịlụwa ọna ene nya ụka. Ịyẹ tị́ du kọ kaa họ ịnyị? Chajị ọ tịtọ ká angịịwa ka chịda.

Ụgbẹyị ọwọwa, iJihova wẹẹ da alodehe ọna alẹ, u-uhye nya “igbachịwụ” ọlẹ kọ nyọọngịrị gụ ịkịla ịlẹ kị wo oja chajị nyaa wuu. Ányị ọ tị́ wẹẹ bwu họ ịnyị? Ịyẹ tị́ du kahị jẹ́ nyori ọ wẹẹ ya ụka da ha angịnyị dẹẹ nyọka họ abwẹhẹ u-uhye nyamwụ? Nyọka ye ọwẹwẹ, ahị kụ ẹhị yẹ ọna ọdada ịhyẹ ịlẹ ká iJihova da angịnyị lụka ọkẹkpẹ wẹẹ.

Lụka onyogo, iJihova da angịnyị ọna u-uhye nya “igbachịwụ ọnyọọngịrị” ịdatị-datị lee eje ọlala nyamwụ, ịlẹ kọ ka kpa wẹ uhye nya angịlẹ kị mamachịng pwa la o-ju ihi nya ehile nyamwụ. (Etu 10:25; Jer. 30:23) Ene nya eje ọlala ọnyọnyọọnyị, ọ ya ju angị la egbeju ọngịrị neeji tata, bala ọ-byaa nyị yẹda kaka họ ẹla pwoku irya nyamwụ. (2 Ịdị. 17:12-15; Neh. 9:29, 30) Chajị nyọka da angịnyị ụbwọ yẹda, ọ kaa kpa anchẹ nyamwụ ilodehe, ya ẹla nya eje ọlala nyamwụ dodehe bala ọ-da angịnyị ụbwọ jẹ́ nyori ị baba nyọka yẹda ahyaahị.—Emọ. 3:7.

INuwa ri ọngọhẹ ẹ-ẹpwụ nya anchẹ nya Ohe Oluhye ịlịnyị. Ẹ-ẹpwụ nya ẹka lụmẹ-lụmẹ, ọ da angị họ ụya bala alabwẹga ịlụka nyamwụ ọna u-uhye nya ukpenyi ọlẹ kọ wẹẹ ka ta odehe wuu ayịreji. (Ọmwụ. 6:9-13, 17) Ọ ya ang ọlẹ kị ka họ chajị kị ka chịda jaa. INuwa ya ẹla nya Ohe yẹẹyẹẹ, du ká Ụpwụ Ịgọgọ wụrwọọ nya ọngọ “ya ẹla nya Ohe Oluhye . . . rụ́ abwẹla ọnyịịla ọhọhọ.”—2 Pit. 2:5.

Nanana nyori iNuwa da angịnyị ịlụka nyamwụ ọna, angịịwa ya ụrụ nyí ẹla o-bwu ẹga nya Ohe ọlẹ kọ wẹẹ ya jaa daarụ. Ị́ la ọmyịmyị kwẹnggẹ ka. Chajị nya ọọwa lẹ, ị gbu ụka ọlẹ ká “ukpenyi ọtụka ọọwa do mịlaa.” (Mat. 24:39; Hib. 11:7) Ụka ọlẹ ká ayịreji ọtata nyaa pwụ eji, angịwẹ á ka jẹ́-ẹ ya nyori Ohe nyị́ da ịwa ọna ka lẹ ka.

Ụka ọkịla ji ká iJihova kaa da angịnyị ọna lụka o-kpii ene ká “igbachịwụ” nya eje ọlala nyamwụ ka pwụ eji. Ọ lịnyị odu lẹ, ọ kaa ya ụka da ha angịịwa yẹẹyẹẹ kị ka yẹda ene nya ụka. Ọ-chụ pwokwita, ọ da ala Ijipiti ọna neeji ụka ọlẹ kọ kpa akama iwo chaa ọgụ ugbeene. Ụka ọhẹ, iJihova du iMosisi bala Erọn ẹrụ kaka ya ẹla jẹ iFero bala anchẹ nyamwụ u-uhye nya akama ọharwiye ọlẹ kọ kpa chaa ọgụ. Akama ọharwiye ọọwa ri ekpawẹ ịtụka-ịtụka ododo. Nyọlẹ ká ekpawẹ wẹẹ ka dọmwụ nya ododo ẹnụtụrụ ọ-ba ọọwa ba, Ohe ya ẹga da haa nwà nyọka rụnyẹ kpịbaa wẹẹ? ỊBayịbụụ yẹkẹẹ: “Angịhyẹ ẹ-ẹpwụ nya alegbeju ịtụkụ yi Adịrahụ iFero ịlẹ kị ju uhi nya ọna ọdada nya [iJihova] chị agaga kaka kpa anyịhị bala iyo ileji nyaa wuu kele ka ẹpwang. Ma, angịlẹ ká ọna ọdada nya [iJihova-á] laa nya ẹla ka pẹhi anyịhị bala iyo ileji nyaa ụ-ụwa ẹ-ẹrụ.” (Ehe. 9:18-21) Ọ la gbagbịla nyori ọna ọdada nya iJihova nwà kpụ, angịlẹ kị bọọ jẹ ahyaahị á yẹ akama lala angịkịla ka.

IJihova da iFero bala anchẹ nyamwụ ọna ịnyịnyị ene nya akama okiriwo. Ma, ị mẹjẹ nyori ị chị́ uchi bwula ọ-ya ụrụ nyóo daarụ. (Ehe. 4:22, 23) Chajị nyọọwa lẹ, anyị alẹng ịhọhẹ nyaa wuu gbu. Ọ jụjụ lụmẹ! (Ehe. 11:4-10; 12:29) Ị ka jẹ́-ẹ ba ẹlẹwẹ jẹ ịnọ ene nya ụka? Ee! IMosisi da anyị nya ala Isirẹlụ ọna u-uhye nya akama okiriwo ọlẹ kọ wẹẹ jẹ warị ahyaahị ịnyịnyị bala o-ya jaa jaabwọ kị ka bwu chị ugbiyegu nyaa da. (Ehe. 12:21-28) Angị ịmanyị à tị́ ju ihi nya ẹla nya iMosisi? Ego ịhyẹ  mẹjẹ nyori, angịnyị lala angị uku ịta à chịda ẹnụmwụ bala o-kpehe bwu Ijipiti lẹ. Angịịwa ri ala Isirẹlụ bala “iru nya angịkịla datị-datị” ịlẹ kị ri ala Isirẹlụ ka bala ala Ijipiti.—Ehe. 12:38.

Jaabwọ ká ọ-chụ pwokwita ọwẹ mẹjẹ, iJihova kaa ya ụka da yẹẹyẹẹ ká angịnyị ka kpa ọna ọdada nyamwụ họ ụkụrwọ. (Ehile. 32:4) Ịyẹ tị́ du ká Ohe Oluhye kaa họ ịnyị? IPita ya nyori iJihova “ayịdang á tịtọ ká ọngọngọhẹ ka ta ayịreji ẹ-ẹpwụ nya ọhọbịrị ọhọhọ kpong-kpong ka. Ma, ká ọng myị́ ọng wuu ka yẹ irya da.” (2 Pit. 3:9) Ee, iJihova kpahị ju angịịwa. Ọ tịtọ kị ka yẹda bala ọ-kpa ẹla nyamwụ họ ụkụrwọ ene ká eje ọlala nyamwụ ka pwụ eji.—Ayị. 48:17, 18; Rom. 2:4.

Alẹ ịnyịnyị, angịnyị baba nyọka ju ihi nya ọna ọdada o-ju apyobwuna ọhẹ ọlẹ kọ wẹẹ pwụ ụpa nya odehe wuu alẹ. Ụka ká iJisọsị jam odehe, o ya neeji nyori odehe onyobyi ọlẹ nyị ka ta ayịreji ụka nya “akama ọtụka okpelego.” (Mat. 24:21) Ụka kọ wẹẹ ya ẹla u-uhye nya eje ọlala ọlịlahị ọwẹ, ọ yọmwụ neeji u-uhye nya ang ịlẹ ká angịnyị nyamwụ ka chịpwụrụ bwu, jaabwọ ká ụka ọọwa wẹẹ ju chwẹẹ. IJisọsị ya ẹla u-uhye nya ang ịdatị-datị ịlẹ kị wẹẹ họ odehe wuu alẹ.—Mat. 24:3-12; Luk. 21:10-13.

Jaabwọ ká ọmwụ ọyẹyẹ ọwẹ mẹjẹ, iJihova wẹẹ byi angịnyị lẹẹlẹẹ nyị cheje nyọka gbịgba họọ bala o-ju ẹla nyamwụ ihi. Ọ tịtọ ká angịlẹ kị jwoo ihi ka la ọhịhị ọkpịpyọ lẹẹlẹẹ bala o-ye ahị ọwawa ịlẹ kọ nwụlanọ gbaa odehe onyeewe. (2 Pit. 3:13) IJihova tịtọ ká angịnyị ka la ọmyịmyị u-uhye nya ehe ọchịchị nyamwụ. Ọ kaa họ ịnyị bwula o-ya omyi ẹla nyamwụ du ẹrụ taa. Omyi ẹla ọọwa à ri “ẹrụ ọnyịịla chajị nya ịpyị-adịrahụ nya Ohe Oluhye” lẹ. IJisọsị tị ya nyori nyị ka kpa ya pyẹ ‘ẹ-ẹga myị́ ẹga nya odehe ọlẹ wuu, chajị kọ ka ri ang nya ibeenu ha alepwoja myị́ epwoja wuu.’ (Mat. 24:14) Ohe Oluhye nwụla angịnyị nyamwụ nọ kị ka ri “ibeenu” nyamwụ lee ọ-kpa omyi ẹla nyamwụ ọwẹ pyẹ ọ-ọpyị ohu imiiye da iwo ine (240). IJihova tịtọ ká angịnyị ka ke ụrụ wo la ọna ọdada ọwẹ chajị kị ka chịda ụka nya “igbachịwụ ọnyọọngịrị” nya eje ọlala ọkpẹẹkpẹẹ nyamwụ.—Sẹf. 1:14, 15; 2:2, 3.

IJihova kaa ya ụka da ha angịnyị nwà nyọka kpa ọna ọdada nyamwụ họ ụkụrwọ? Ịtọ ẹla ọwẹ à baba lụmẹ lẹẹlẹẹ ka. Ẹla ọlẹ kahị kụ ẹhị yẹ wẹ wuu mẹjẹ nyori ọ kaa họ ịnyị. Ịtọ ẹla ọlẹ kọ baba ri: Angịnyị ka myị ba ọna ọdada nyamwụ jẹ lụka ọlẹ kọ ji haa? Ahị angịmyẹrụ nya Ohe Oluhye a kịnyaa juwa maga nyọka da angịnyị lụmẹ-lụmẹ ụbwọ jaabwọ kahị ka jụ́ họ kaka ba, nyọka chịda ụka nya ocheju nya odehe onyobyi ọlẹ mẹ.