1. Ịyẹ tị́ du kọ baba kahị ka gbịgba ha iJihova bwu ẹpwụ nya ọkịlẹtụ nyahị?

AHỊ baba nyọka gbịgba ha iJihova bwu ẹpwụ nya ọkịlẹtụ nyahị wuu chajị ọwa à họhị bala ọ-ya ọhịhị hahị lẹ. (Ọwụ. 4:11) Ma, ọ́ kaa chịkpẹẹ hahị ụka myị́ ụka ka. Nanana nyori iJihova háahị bala o-ri ahị kaa jwoo ihi, ang ịkịla ịhyẹ ka du myị́ kọ ka lahị ujwo nyọka gbịgba họọ bwu ẹpwụ nya ọkịlẹtụ nyahị wuu. Ahị baba nyọka jẹ́ jaabwọ kọ kaa bwu lịnyị. Họhẹ-họhẹ, ahị kụ ẹhị yẹ etu nya ẹla ọlẹ kọ ri, ọ-ka gbịgba ha iJihova bwu ẹpwụ nya ọkịlẹtụ nyahị wuu wẹẹ.

2. Jaabwọ ká ụpwụ nya Ehe Ọkpụkpụ 34:14 mẹjẹ, ányị ahị tị́ ka họ kori kahị kaa gbịgba ha iJihova bwu ọkịlẹtụ nyahị wuu?

² Ẹ-ẹpwụ nya ịBayịbụụ, ọ-ka la ọháha okpori-okpori ẹ-ẹga nya Ohe Oluhye bala ọ-ka gbịgba họọ bwu ẹpwụ nya ọkịlẹtụ nyahị wuu gu awụlẹ yẹẹyẹẹ. Kori kahị kaa gbịgba ha iJihova bwu ẹpwụ nya ọkịlẹtụ nyahị wuu, áhị ka ya ẹga da họ ịngịngịhyẹ nyọka ya iwe nyamwụ ku ọ-ọkịlẹtụ nyahị ka.—Wa Ehe Ọkpụkpụ 34:14.

3. Ịyẹ tị́ du kahị ka ya nyori áhị gbịgba ha iJihova ododu ka?

³ Áhị gbịgba ha iJihova ododu ka. Ịyẹ tị́ du kahị ya ịnyị? Chajị ịgba ọgbagba nyahị họọ kpụnịrọ ẹla nya ịlẹhị ịlẹ kahị jẹ́ chajị nyamwụ. Ahị wẹ ka la ọháha u-uhye nya abwụma ịnyịịla-ịnyịịla nyamwụ. Ahị jẹ́ ang ịlẹ kị họ́ọ bala ịlẹ kị họ́ọ ka, bala ọ-myị ju ẹla ịịwa ịnyịnyị. Ahị jẹ́ irya ọlẹ kọ la ẹ-ẹga nya angịnyị ehe, bala ọ-kaa chẹkpẹ ju irya nyamwụ ọọwa. Ịnyịnyị, ọ myịhị lẹhị nya ịlẹhị-ịlẹhị nya iwe ọlẹ kọ ya hahị nyọka ri oligu balọọ. (Eje. 25:14) Ang myị́ ang ọlẹ kahị jẹ́ u-uhye nya Ọngọlẹ kọ họhị kaa tụ́ụhị jwoo chwẹẹ gụ ọwọwa.—Jem. 4:8.

4. (a) Ịyẹ Olegu Onyobyi à tịị kpa họ ụkụrwọ chajị ká ịgba ọgbagba nyahị ha iJihova ka la dẹwụ-dẹwụ? (b) Ịyẹ ahị tị́ ka kụ ẹhi yẹ a-ang ọjẹ́jẹ ọlẹ?

⁴ Olegu Onyobyi à kpa odehe ọlẹ ụ-ụbwọ lẹ, ọ tị kaa kpa họ ụkụrwọ chajị kahị ka hu ang ịlẹ kị kaa ma angịnyị ehe ma kụ ịlahị ẹ-ẹpwụ nya ọhịhị bala ọ-họ kọ ka lujwo hahị nyọka  wu ịlọhị kpa. (Efe. 2:1-3; 1 Jọn. 5:19) Irya nyamwụ ri ọ-ka họ kahị ka la ọháha ẹ-ẹga nya ang ịkịla datị hi iJihova kem. Ahị kụ ẹhị yẹ agbẹyị imiiye ịlẹ ká Olegu Onyobyi kaa bwu họ ịnyị wẹẹ. Ọhọhẹ, ọ kaa mahị yẹ nyọka ku ang ụdụ. Oheeye, ọ kaa tịtọ kahị ka chụ ụya ọyaya ịlẹ kị há ka.

5. Ịyẹ tị́ du kahị baba nyọka kpahị ju ịlọhị ẹ-ẹga nya ọháha nya okpoko ọlala?

⁵ Ahị wuu kaa tịtọ nyọka la ang oriri ọlẹ kọ ka nwahị yẹẹyẹẹ, ang ịkụrụ-ịkụrụ ịnyịịla-ịnyịịla, bala ẹpwa ọlam-ọlam. Ma, ahị baba nyọka kpahị ju ịlọhị chajị nyọka la ọháha ẹ-ẹga nya okpoko ka. Angịnyị lụmẹ-lụmẹ ám̀ odehe nya Olegu Onyobyi ọlẹ kaa “charịnya nya okpoko ọlala” bala ọ-la ọháha ẹ-ẹga nya ang ịlẹ ká okpoko jẹ́-ẹ ra. (2 Tim. 3:2) IJisọsị jẹ́ nyori angịjụgbẹyị nyọwa nyị ka la irya ọlịnyị myị́. Ịnyị à dudu kọ yẹkẹẹ: “Ọnchẹ ookpokp á ka jẹ́-ẹ juwa myị ẹrụ ha ayịbaba imiiye lụka ookpokp myị́ kpong-kpong ka. Chajị, ó-ri kọ họ ịnyị aalẹ, ayịbaba ọhẹ ka họ́ọ. Ma, ayịbaba ọkịla tị ka wọọ ẹjẹ. Ọ ka ju ọngọhẹ nyaa ihi. Ma, ọ ka ju ọngọkịla nyaa ẹpẹ ịnyịnyị pyii lẹ. Ịnyịnyị, ọ la lẹ. Ánụ́ ka jẹ́-ẹ juwa myị ẹrụ ha ụdụ nya odehe ọlẹ lala ọnchẹ, anụ ka myịmyị jẹ́-ẹ juwa ju Ohe Oluhye ihi kpẹẹkpẹẹ myị́ kpong-kpong ka.” (Mat. 6:24) Ọnchẹ nya iJihova ọlẹ kọ juwa kpa ụka bala ọngịrị nyamwụ wuu ku ang ụdụ nya odehe ọlẹ wẹẹ maga nyọka myị ẹrụ ha ayịbaba imiiye ịnyị. Ọ́ ka jẹ́-ẹ gbịgba ha iJihova bwu ẹpwụ nya ọkịlẹtụ nyamwụ wuu ka.

6. Ẹlịyẹ ahị tị́ ka jẹ́ bwu ẹla ọlẹ ká iJisọsị byi ala ọjịra-jịra ọla iLawodisiya?

⁶ Lụka nya ocheju nya oyi ọhọhẹ nyọlẹ kị ma ịKịrayịsị kpá, ala ọjịra-jịra ọla epweji nya iLawodisiya juwa kpịlaa chị ogu yẹkẹẹ: “Am tị ri ọngọ kpụ ụdụ lụmẹ lẹ. Ang myị́ ang wuu tị jam kịlahị ham yẹẹyẹẹ ịnyịnyị lẹlẹ, ịngịngịhyẹ á gam amwụ kpong-kpong kaka.” Ma, a-ahị nya iJihova bala iJisọsị, i ri ‘ikpehika ikwookwee ịlẹ kị la ahyẹẹrwẹrwa, kpụ idu chwiichwii, bala o-ji lọhị-lọhị.’ IJisọsị-ị́ gbilaa  ụbwọ ụ-ụrụ chajị nya ụdụ ọkpụkpụ nyaa ka, ma ọọlajị nya ọháha ọlẹ kị la ẹ-ẹga nya okpoko gbee kọ juwa bịrị igu nyaa bala iJihova ịnyị. (Ọwụ. 3:14-17) Kori kahị yẹ nyori ọháha nya okpokpo juwa nwà ọ-ọkịlẹtụ nyahị aalẹ, ahị baba nyọka ku irya ọlịnyị rụ ahyaahị. (1 Tim. 6:7, 8) Kori kahị họ ịnyị ka, ahị ka chị ọkịlẹtụ nyahị agiye, iJihova á tị ka ye ịgba ọgbagba nyahị myị ka. O “ri Ohe Oluhye ọ-jẹ́ ijiiji.” (Ehile. 4:24) Ányị ahị tị́ ka bwu hu okpoko nya ang ọbaba lụmẹ ọ-ọhịhị?

7-9. Ẹlịyẹ a tị́ jẹ́ bwu oja nya ọngọgbahị nya ọjịra-jịra ọlẹ ká ẹnyị nyamwụ ri iDevidi?

⁷ Kụ ẹhị yẹ ọgụ-ẹpẹtẹ nya iDevidi, ọngọgbahi nya ọjịra-jịra ọlẹ kọ kaa họ ụkụrwọ yẹẹyẹẹ, kọ tị bwu United States wẹẹ. Ọ chabwọ nya ịlọmwụ nya ọngọ kaa họ ụkụrwọ kpịra-kpịra. Ị hwoo hwaa ka iwe-ahụrụ ọgbẹgbịlẹ i-ikompeni ọlẹ kọ kaa họ ụkụrwọ. Ị myịmyị jọ́ọ nya ọngọ jẹ́ họ ụkụrwọ ọọwa yẹẹyẹẹ ẹ-ẹpwụma nyamwụ. IDevidi yẹkẹẹ: “Ụka nya ọgbanyẹ, m̀ me nyori iJihova à wẹẹ wahị kụrụm dudu kam wẹẹ nwà kịlah-ịlahị lẹ.” Ma, iJihova à wẹẹ wahị kụrwọọ ịnyịlẹhị lẹ?

⁸ IDevidi wẹ ka jẹ́ dụmwọ-dụmwọ nyori ụkụrwọ nyamwụ ọọwa juwa bịrị igu oriri nyamwụ bala iJihova. Ọ yẹkẹẹ: “M kaa juwa kụ irya nya akama ọlụkụrwọ nyam ụka kam juwa ọọjịra-jịra, tụ́ ụka kam juwa ẹ-ẹrụ ọnyịịla ọ-kpa pyẹ. M kaa la okpoko yẹẹyẹẹ, ma ḿ la ịnyọ ọmwụmwụ kpong-kpong ka. Myịmyị, m̀ dọmwụ nyọka la akama bala ahụ nyam.”

⁹ IDevidi wẹ ka jẹ́ nyori ọ baba nyọka chụ ang ọlẹ kọ baba gụgụ wuu hịlọmwụ. Ọ yẹkẹẹ: “M̀ cheje la ọngịrị-ọngịrị nyọka nwụ iwe-ahụrụ nyam họ.” IDevidi nwụ ụka nyamwụ ẹ-ẹga nya ụkụrwọ họ, ọọwa lẹ o ya ju ọngọlẹ kọ kaa họ ụkụrwọ ha ẹẹ. Ịyẹ à tị́ ri ocheju nya ẹla ọọwa? Ị kwoo hi ụkụrwọ ọọwa! Ányị ọ tị́ họ? Ọ yẹkẹẹ: “Ahyẹẹnụ ọkịla nya ẹnụmwụ ọwẹ kpangga, m̀ yụbwọ ju ụpwụ ẹ-ẹpwụ nyọka kịnyaa juwa chịchịịchị ye ịlahị nya ụgbẹyị.” Nyọka ye ang kpa ụ-ụbwọ nyọka  kpa họ ịbaba nyịlaa, iDevidi bala ahụ nyamwụ kaa họ ụkụrwọ nya ẹpwa ọ-kpa cheri-cheri. Nyọlẹ kọ nọ chẹẹ, ọ dọmwụ nya o-ye ịlahị nya ụgbẹyị kpụrụrụ. Ọ ka nọ chẹẹ ịnyịnyị lẹ, ahụ nyamwụ à ye ịlahị nya ụgbẹyị balọọ ẹẹ. Ahụ bala ọrụ ọwẹ kaa họ ụkụrwọ ọlẹ ká angịnyị kaa yẹhị da bwee, ma ụkụrwọ ọọwa à tị baba haa gụ ẹ-ẹpwụ nya ọhịhị ka. Nanana nyori okpoko ọlẹ kị kaa ye á lụmẹ lala olene ka, ọya ọnyị myị́ ọnyị, ị kaa la ọlẹ kị ka kpa họ ịbaba nyaa. Ahụ bala ọrụ ọwẹ tịtọ nyọka hu iJihova kụ ịlahị nya ang ịkịla wuu. Ị tị myịmyị wẹ ka jẹ́ bwu ọhịhị nyaa nyori iJihova kaa kpahị ju angịlẹ kị tịtọ nya Ịpyị-Adịrahị nyamwụ jene-jene.—Mat. 6:31-33.

10. Ányị ahị tị́ ka bwu chewu ke irya ọlọkịlẹtụ nyahị?

¹⁰ Ahị wuu baba nyọka kpahị ju irya ọlọkịlẹtụ nyahị, kori kahị la okpoko lụmẹ lee áhị la lụmẹ ka. Ányị ahị tị́ ka bwu họ ịnyị? A la ọháha ẹ-ẹga nya okpoko ka. A hu ụkụrwọ nyang nya ang ọlẹ kọ baba hang gụ ẹla nya iJihova ka ịnyịnyị. Ányị a tị́ ka họ á ka jẹ́ kori ká ẹla ọlịịwẹ á juwa họ tang? Ịtọ ẹla ịhyẹ ịlẹ ká ka tọ ịlọng wo ri: ‘Ụka lụmẹ-lụmẹ, m̀ kaa juwa kụ irya nya ụkụrwọ nyam ọọjịra-jịra bala ụka nya ẹrụ ọnyịịla ọ-kpa pyẹ? M̀ kaa chị uko ụka myị́ ụka nya okpoko ọ-ka lala ka ị-ịlahị? M̀ kaa la akama bala ahụ nyam lee ọrụm ọọlajị nya okpoko lee ang ịkịla ịlẹ kahị la? M̀ kaa myị-ị họ ụkụrwọ ọlẹ ká angịkịla kaa yẹhị da bwee chajị nyọka jẹ́-ẹ kpụ ụka nyam họ ụkụrwọ ha iJihova gụ ọwọwa?’ (1 Tim. 6:9-12) Ụka kahị juwa kụ irya ju ịtọ ẹla ịwẹ, ahị kpịtịya nyori ahị há iJihova yẹẹyẹẹ, ọ tị chị angịlẹ kị kaa gbịgba họọ bwu ẹpwụ nya ọkịlẹtụ nyaa wuu ehe ọlẹ: “Am Ohe Oluhye á ka kpanụ anụ angịnyị nyam keji kpong-kpong ka lee ọ-tụụbwọ hiinu kpá ẹnẹnẹhẹ kaka.” Ịnyị à du ká Ọngọmyẹrụ ịPọlụ da yẹkẹẹ: “Anụ cheri kanụ juwa gba ụbwọ nyanụ kpehe hi ẹpwụ nya ẹhị nyanya nya okpoko ọchịchị wuu mẹ.”—Hib. 13:5, 6.

11. Ịyẹ à tị́ ka họ ta ọngịnyị myị́ chajị nya ụya ọyaya?

¹¹ IJihova tịtọ kahị ka chị ọkẹkẹnị ẹ-ẹpwụ nya ọhịhị, ụya ọyaya tị kaa dahị ụbwọ nyọka họ ịnyị. Ụpwụ Ịgọgọ dọmwụ ya nyori, “ang ọhagụ ọlẹ ká ọngịnyị ehe ka họ ri ọ-ka ri ang bala ọ-nwụ ere bala ọ-ya ụya ju ụkụrwọ ọlẹ kọ họ.” (Ọngọ. 2:24) Ma, ụya ọyaya lụmẹ-lụmẹ odehe ọlẹ ka jẹ́-ẹ họhị ang ọtịpyọ myị́. Ụya ọyaya ịhyẹ kaa ju angịnyị lụmẹ-lụmẹ ọhụ nyọka myị ọnụ ju lee ọ-la ọháha ẹ-ẹga nya ang ịlẹ ká ịBayịbụụ ya nyị́ há ka.

12. Jaabwọ ká ụpwụ nya 1 Ala ịKọrịntị 10:21, 22 mẹjẹ, ịyẹ tị́ du kọ baba kahị ka chụ ụya ọyaya nyahị dụmwọ-dụmwọ?

¹² Ahị tịtọ nyọka gbịgba ha iJihova bwu ẹpwụ nya ọkịlẹtụ nyahị wuu, lẹ áhị ka jẹ́-ẹ  ‘bába ri ang oriri ị-ịTẹbwụrụ nya iJihova’ myịmyị juwa ‘bába ri ang oriri ị-ịTebwuru ookpokpo bala Ohe Onyobyi ka.’ (Wa 1 Ala ịKọrịntị 10:21, 22.) Ang oriri bala ọngịnyị ụka lụmẹ-lụmẹ kaa mẹjẹ nyori ahụ bala ọngọọwa nyị ri aligu. Ịnyịnyị, kori kahị chụ ụya ọyaya ịlẹ kị myị ọnụ ju ọkwọ ọhọhọ, ojiga ọkpụkpụ, ụya ọhọhọ, irya lee abwẹla ịtịpyọ ịkịla aalẹ, ọ lala ahị nyị wẹẹ bába ri ang oriri ta aluji nya Ohe Oluhye lee o-ri ang oriri ọlẹ kị kpụ́. Lẹ, áhị hịlọhị ang kem ka, ma ahị bịrị igu nyahị bala iJihova ịnyịnyị.

13-14. Jaabwọ ká ụpwụ nya iJemsi 1:14, 15 mẹjẹ, ịyẹ tị́ du kọ baba kahị ka dụmwọ-dụmwọ ẹ-ẹga nya ụya ọyaya ọlẹ kahị ka chụ? Ọ-chụ pwokwịta oyina tí ji?

¹³ Kụ ẹhị yẹ agbẹyị ịlẹ ká ụya ọyaya lala ang oriri wẹẹ. Ụka kahị ka ri ang, ahị ka jẹ́-ẹ chụ ang ọlẹ kahị ka ya ju ka ọnụ nyahị. Ma, ụka kahị tị da ang ọọwa mile lẹ, áhị la ọngịrị u-uhye nya abwọlẹ ká ang oriri ọọwa ka bwu họ ụkụrwọ ị-ịnyịrọ nyahị kaka. Ang oriri ọlam-ọlam ka jẹ́-ẹ da ịnyịrọ nyahị ụbwọ; ma, ang oriri ọtịpyọ ka du kahị ka la ịnyịrọ ogogo ka. Áhị ka yẹ ọdatị nyamwụ i-ijata ka. Ma jaabwọ ká ụka juwa chịpwụrụ, ahị ka jẹ́.

¹⁴ Ịnyịnyị, ụka kahị chụ ụya ọyaya, ahi ka jẹ́-ẹ chụ ọlẹ kahị ka ya ju ka irya nyahị. Ma, ụka ká ọọwa á chịpwụrụ kpá lẹ, ụya ọyaya ọlẹ kahị chụ à kaa gu abwẹla nyahị bala irya ọkụkụ nyahị lẹlẹ. Ụya ọyaya ọnyịịla ka họ ahị ka chị ọkẹkẹnị; ma ụya ọyaya ọtịpyọ ka họhị ang ọtịpyọ. (Wa iJemsi 1:14, 15.) Ang ọlẹ ká ụya ọyaya ọtịpyọ ọchụchụ kaa họ ta ọngịnyị á kaa chehe ahyaahị ka, ma jaabwọ ká ụka juwa chịpwụrụ, à ka yẹ ang ọọwa. Ịnyị à dudu ká ịBayịbụụ gbileehi ụbwọ ụ-ụrụ yẹkẹẹ: “Anụ myị kị pịrịịnụ ju koo! Chajị, ọngọngọhẹ á ka jẹ́-ẹ họ Ohe Oluhye ri myị kpong-kpong kaka. Chajị, ugbe ọlẹ ká ọngịnyị á ya tọ ẹ-ẹrụ, ụma nya ugbe ọọwa pyii, ọngọọwa a kaa hya ịnyịnyị lẹ. Chajị, ọng myị́ ọng ọlẹ kọ juwa tọ ugbe nya abwẹla ọhọhọ ha ugbinyịrọ nyamwụ bwula o-juwa dịrẹ imyi nya ugbinyịrọ nya ịlọmwụ kem aalẹ, ọngọọwa tịtị ka bwula ugbinyịrọ nyamwụ ọọwa hya igu ogbugbu ta ayịreji pyịyọọ.”(Gal. 6:7, 8) Lẹ, ọ baba yẹẹyẹẹ kahị ka cheji ba hi ụya ọyaya ịlẹ wuu kị myị ọnụ ju ang ịlẹ kị wụ́ iJihova ẹjẹ!—Eje. 97:10.

15. Ang āhị oyina iJihova à tị́ ya hahị nyọka dahị ụbwọ ye ọkẹkẹnị?

¹⁵ Ọ kaa kpụ Alibeenu nya iJihova lụmẹ-lụmẹ ịpyọ yẹẹyẹẹ nyọka yẹ JW Broadcasting, ẹga ọ-yẹ ifim ịnyịịla-ịnyịịla nyahị intanẹtị. Ọọnahị ọnyang ọhẹ ká ẹnyị nyamwụ ri Marilyn yẹkẹẹ: “JW Broadcasting dam ụbwọ ri ọngọ kaa chị ọkẹkẹnị yẹẹyẹẹ. M̀ kaa yẹ ang myị́ ang ọlụwa, chajị ịwa wuu há. Ụka kám la ịlọm nwee, lee ụka ká ọkịlẹtụ á kpụm enyi, m̀ kaa kpahị nya ẹla ị-ya dodehe bwu ịBayịbụụ bala Ang Ọjẹ́jẹ nya Ụtụrụ ịlẹ kị ka jụm ọhụ. Ọọwa kaa dam ụbwọ tụ́ ju iJihova chwẹẹ bala ogu nyamwụ. JW Broadcasting yẹ ọhịhị nyam da yẹẹyẹẹ.” À kaa ye apyobwuna bwu ang āhị ọ-bwu ẹga nya iJihova ọwẹ? Datị hi ẹla inyeewe-inyeewe ịlẹ kị kaa gba kpehe ọya ọnyị myị́ ọnyị, JW Broadcasting la ẹla ị-kịla ju lụmẹ-lụmẹ, ifim bala eje ịnyịịla-ịnyịịla ịlẹ ká ka jẹ́-ẹ yẹ bala o-ke ụrụ wo la ụka myị́ ụka kọ háng.

16-17. (a) Ịyẹ tị́ du kọ baba kahị ka wu ịlọhị kpa, ẹ-ẹga nya ụka ọlẹ kahị kaa bịrị ju ụya ọyaya? (b) Ányị ahị tị́ ka bwu họ ịnyị?

¹⁶ Ahị baba nyọka dụmwọ-dụmwọ ẹ-ẹga nya ụka ọlẹ kahị kaa bịrị ju ụya ọyaya ịnyịnyị, ẹ-ẹga nya ụma nya ụya ọyaya ọlẹ kahị kaa chụ kem ka. Kori kahị họ ịnyị ka, ụka ọlẹ kahị ka bịrị ju ụya ọyaya, ka gụ ụka ọlẹ kahị ka kpa họ ẹla nya iJihova. Ọ kaa la angịhyẹ ujwo nya ịlẹhị-ịlẹhị nyọka wu ịlaa kpa ẹ-ẹga nya ụka ọlẹ kị kaa bịrị ju ụya ọyaya. Ọọnahị Abigẹlụ ọlẹ kọ gu ẹka iwo kụrụ ineku yẹkẹẹ: “Ifim ọyẹyẹ kaa dam ụbwọ nyọka mwịịnyọ, ụka kam họ ụkụrwọ nya ahyẹẹnụ jụ ịlọm kpá wuu. Ma, kori kam  dụmwọ-dụmwọ ka, m̀ ka bịrị ụka lụmẹ-lụmẹ juwa yẹ ifim myị́.” Ọọnahị ọlẹng ọkịla ọlẹ ká ẹnyị nyamwụ ri ịSamwẹlụ yẹkẹẹ: “Ụka ọhẹ, m̀ kaa bịrị ụka lụmẹ-lụmẹ intanẹtị juwa yẹ ifim ịlẹ kị la kpii. M̀ kaa dọmwụ nyọka yẹ ookpokpo, ene kam ka jẹ́ kpá kaka lẹ, awa ịta lee ine à kaa kam ẹẹ.”

¹⁷ Ányị a tị́ ka bwu wu ịlọng kpa ẹ-ẹga nya ụka ọbịrị lụmẹ-lụme ju ụya ọyaya? Ẹta ẹdịyẹ ọhọhẹ-họhẹ ri ọ-ka jẹ́ ụka ọle ká kaa bịrị ju ụya ọyaya kpangga. À ka jẹ́-ẹ da ụka ọlẹ ká bịrị ju ang myị́ lala epwihi. Da ụka ọlẹ ká kpa yẹ ifim, ka intanẹtị bala ọ-kpa da igem ju ang. Kori ká yẹ nyori à bịrị ụka lụmẹ ka kpoye ju ang ịwẹ aalẹ, maga ká da ụka ọlẹ ká ka bịrị ju ang ọnyọnyọọnyị ju ụ-ụpwụ. Chụ ụka ọle ká ka kpa họ ang ịlẹ kị baba jene-jene, ọọwa lẹ, a chụ ụka ọlẹ ká ka bịrị ju ụya ọyaya ẹẹ. Ang ọkịla ọlẹ ká ka họ ri, bịlẹ iJihova nyọka dang ụbwọ ba ụka ịịwa jẹ. Kori ká họ ịnyị, à ka la ụka bala ọngịrị ọlẹ ká baba nyọka kpa jẹ́ ịBayịbụụ nyịlọng, ang ọjẹ́jẹ nya ugbiyegu, ka ọjịra-jịra, kpa ẹrụ ọnyịịla pyẹ bala ọ-mẹ ang jẹ. Ọhẹka, ụka ọlẹ ká kaa bịrị ju ụya ọyaya ka kpụng ịpyọ yẹẹyẹẹ gụ ọọwa ịnyịnyị, chajị à hu iJihova kụ ịlahị.

18-19. Ányị ahị tị́ ka mẹjẹ nyori iJihova kem ahị tịtọ nyọka gbịgba ha bwu ọkịlẹtụ nyahị wuu lẹ?

¹⁸ Nyọlẹ ká iPita ọngọmyẹrụ ya ẹla u-uhye nya ocheju nya odehe nya Olegu Onyobyi ọlẹ bala odehe onyeewe ọlẹ kọ wẹẹ ka wẹ kpá, ọ myịmyị da yẹkẹẹ: “Anụ angị hám há, ụka ọlẹ kanụ wẹẹ godayị gbe ọwẹwẹ nya ang ịwẹ wuu wẹẹ lẹ, anụ cheri kanụ juwa la kpịra-kpịra ẹ-ẹpwụ nya ọngịnyị nya Ohe Oluhye oriri nyanụ, chajị kanụ ka la abyị ọkpụkpụ ọhẹ kaka lee ukpuru ọdada ị-ịlahị nya Ohe Oluhye kaka mẹ. Ọkọkọ nya ọọwa lẹ, ká okpunyi, anụ ka la ị-ịlahị nyamwụ mẹ.” (2 Pit. 3:14) Lẹ, ụka kahị ke ụrụ wo ọna ọdada ọwẹ, kahị maga nyọka hịhị bala ọ-gbịgba ha iJihova ụ-ụgbẹyị ọlẹ kọ tịtọ, ahị mẹjẹ nyori ọwa ahị tịtọ nyọka gbịgba ha kem bwu ẹpwụ nya ọkịlẹtụ nyahị wuu lẹ.

¹⁹ Olegu Onyobyi bala odehe nyamwụ ka kịnyaa juwa maga nyọka họ kahị ka hu ang ịkịla kụ ịlahị hi ẹla nya iJihova. (Luk. 4:13) Ma, ẹ-ẹpwụ nya ọmayẹ ọnyị myị́ ọnyị ọlẹ kọ chịhị ọgụ, áhị ka ya ẹga da ha ọngọngọhẹ lee ịngịngịhyẹ nyọka ya iwe nya iJihova ku ọ-ọkịlẹtụ nyahị ka. Lẹ, ahị cheje nyọka gbịgba ha iJihova bwu ẹpwụ nya ọkịlẹtụ nyahị wuu, chajị ọwa à chịla lẹ!