1-2. (a) Ẹlịyẹ alegbeju nya odehe à tị́ ka ya dodehe lụka o-kpii? (b) Ịtọ ẹla iyina ahị tị́ baba nyọka ye ọwẹwẹ nyaa?

KỤ IRYA nyori alegbeju dọmwụ nya ẹla o-ya dodehe nya ‘okpunyi bala ọ-hụ la o-kem’ ọlẹ kahị lẹẹ yahị guru gbe gbalẹ-gbalẹ wẹẹ. Ọhẹka ị ka juwa chị ọgọm nyori, odehe nyị la okpunyi yẹẹyẹẹ lẹ. Alegbeju ịwẹ ka tịtọ kahị ka kụ irya nyori, ị chị akama nya angịnyị ehe eju myị́ lẹ. Ma, ị́ tị ka jụ́ ẹlẹlẹhẹ họ u-uhye nya ang ọlẹ kọ ka họ ba ọọwa ba myị́ ka. Ịịyẹ tị́ du? ỊBayịbụụ yọmwụ neeji nyori, ‘ayịreji ọtata ka warị chaa ọgụ lụka ọ-mwaa. Ị́ ka jẹ́-ẹ be bwu ẹpwụ nya ayịreji ọtata ọọwa myị́ kpongkpong ka.’—1 Tẹs. 5:3.

² Ịtọ ẹla ịkpọngchị ịhyẹ ji ịlẹ kahị baba nyọka ye ọwẹwẹ nyaa: Ẹlịyẹ à tị́ ka họ lụka nya “akama ọtụka okpelego” ọwẹ? Ányị iJihova à tị́ tịtọ kahị ka họ ụka ọọwa? Ányị ahị tị́ ka bwu nwụla ịlọhị nọ lẹẹlẹẹ chajị kahị ka jẹ́-ẹ godayị giri-giri lụka nya akama ọtụka okpelego ọwẹ?—Mat. 24:21.

3. Jaabwọ ká ụpwụ nya Ọwụrụụ-wụrụ 17:5, 15-18 mẹjẹ, ányị Ohe Oluhye à tị́ ka bwu ta “ịBabịlọn ọtụka” ayịreji?

³ Wa Ọwụrụụ-wụrụ 17:5, 15-18. “ỊBabịlọn ọtụka” ka tayịreji pyii lẹ! Jaabwọ kahị jẹ́ lẹẹ ene, alegbeju ị́ ka jụ́ ịngịngịhỵe họ u-uhye nya ang ọlẹ kọ ka họ lụka ọwẹ kaka. Ịyẹ tị́ du? Chajị “Ohe Oluhye [ka] hu irya ọọwa ju ka ẹpwụ nya ọkịlẹtụ nyaa.” Irya oyina tị́? Irya nyọka ta ịgba ọgbagba nya ịnịịkịla wuu ayịreji tụ́ ịlẹ kị wa ịlaa nya angịnyị nya ịKịrayịsị. * Ohe Oluhye ka ya irya nyamwụ ju ka ẹpwụ nya ọkịlẹtụ nya “achụ iwo” nya ukpilo nya “iyo ọnyọmịla” ọhẹ. Achụ iwo ịwẹ  ku ọmwakpa nya igomenti ịlẹ wuu kị kaa chẹkpẹ ju “ukpilo nya iyo” ọwẹ kọ ri, Ọ-Tụ Chawụlẹ nya Ẹpwụma. (Ọwụ. 17:3, 11-13; 18:8). Ụka ká alegbeju ịtụka ịwẹ á dọmwụ nyọka jahị da ịgba ọgbagba nya ịnịịkịla lẹ aalẹ, ang ẹjẹẹ nya ọmwụ ọdada nya akama ọtụka okpelego à wẹ lẹlẹ. Ọ ka ri ang oluhihi lụmẹ ọlẹ kọ ka gu ọng myị́ ọng wuu ám̀ odehe ọlẹ.

4. (a) Ẹlịyẹ alegbeju à tị́ ka ya myị́ nyori ọwa à ju ọmwụ du kị ta ịgba ịgbagba nya ịnịịkịla ayịreji lẹ? (b) Ányị angịlẹ kị ji ịgba ịgbagba ịwẹ ene-ene à tị́ ka họ myị́?

⁴ Áhị jẹ́ ẹla ọlẹ ká alegbeju ka ya nyori, ọwa à ju ọmwụ du kị ta ịBabịlọn ọtụka ayịreji lẹka. Ọhẹka, ị ka ya nyori ala ịgba ịgbagba ịwẹ nyị du ká okpunyi nyị ji ẹpwụma ka bala ọ-kaa ya ọnụ ju ẹla nya igomenti lụmẹ. Lee o-ya nyori ala ịgba ịgbagba ịwẹ nyị la okpoko bala ang ụdụ lụmẹ lẹ myị́. (Ọwụ. 18:3, 7) Ụka ká alegbeju ka jahị da ịgba ịgbagba nya ịnịịkịla ịwẹ, ọchịkpẹẹ myị́ nyori a-angịnyị nyaa wuu à ka tayịreji lụka ọwẹ ka. Ọkọkọ nyọọwa, ogu nya ịgba ịgbagba nya ịnịịkịla ịwẹ, alegbeju à ka tayịreji lẹ. Ụka kị ta ogu nyaa wuu ayịreji gbanggbang lẹ, angịlẹ kị kaa dịraa ene-ene à ka yẹ nyori alegbeju nyịwa nyị dịwa lụgba lẹlẹ. Ụka ọwẹ, ị ka maga nyọka chịlaa ebwo hi ịgba ọgbagba nya ịnịịkịla myị́.

5. Ẹlịyẹ iJihova à tị́ myị ọnụ u-uhye nya akama ọtụka okpelego? Ịyẹ tị́ du?

⁵ ỊBayịbụụ á ya jaabwọ ká ayịreji ọtata nya ịBabịlọn ọtụka ka tata ka ba ka, ma ahị jẹ́ nyori ọ́ ka tata lụmẹ-lụmẹ ka. (Ọwụ. 18:10, 21) IJihova myị ọnụ u-uhye nya akama ọtụka ọwẹ ene-ene nyọka “chị ụtụrụ ọọwa eku” chajị ká “angịnyị . . . ịlẹ kọọwa ayịdang chụchụ” bala ịgba ọgbagba nyịlẹhị ka la ọchịda. (Mak. 13:19, 20) Ẹlịyẹ iJihova à tị́ ka tịtọ kahị ka họ bwu ụka nya ọmwụ ọdada nya akama ọtụka okpelego ọwẹ gbee da ka ụka nya ẹwụ nya Amagẹdọn?

6. Ịyẹ ahị tị́ ka myịmyị-ị̀ họ nyọka chịlọhị ebwo hi ịgba ọgbagba nya ịnịịkịla?

⁶ Jaabwọ kahị jẹ́ bwu ang ọjẹ́jẹ ọkẹkpẹ, iJihova tịtọ ká angịlẹ kị kaa gbịgba họọ ka chịlaa ebwo gbanggbang hi ịBabịlọn ọtụka. Tị wẹẹ, ọ́ nwa nyọka chịlọhị ebwo hi  ịgba ọgbagba nya ịnịịkịla ịwẹ kem ka. O ri opyii kahị ka cheje nyọka yụbwọ chị ịgba ọgbagba nyịlẹhị giri-giri ịnyịnyị. Kụ ẹhị yẹ agbẹyị imiiye ịlẹ kahị ka jẹ́-ẹ bwu họ ịnyị wẹẹ.

7. (a) Ányị ahị tị́ ka bwu ju ihi nya ehile nya iJihova yẹẹyẹẹ u-uhye nya abwẹla ocheri-cheri? (b) Ịyẹ tị́ du ká ụpwụ nya Ala iHiburu 10:24, 25 ya ahị nyị tụguru lawụlẹ? Ịyẹ tị́ du kọọwa baba lụmẹ lẹẹlẹẹ?

⁷ Họhẹ-họhẹ, ahị ka ju ihi nya ehile nya iJihova yẹẹyẹẹ u-uhye nya abwẹla ocheri-cheri pyii lẹ. Áhị ka yụbwọ ju abwẹla ọchịrị nya alodehe ọlẹ ẹnẹnẹhẹ ka. Lala ọ-chụ pwokwita, áhị ka myị ọnụ ju ẹla nya ụya ọhọhọ ụ-ụgbẹyị ọlẹlẹhẹ ka, tụ́ ẹla nya anyang-anyang lee alẹng-alẹng i-ye awụlẹ, lee abwẹla ịchịrị ịkịla ụma ịlịịwẹ. (Mat. 19:4, 5; Rom. 1:26, 27) Oheeye, ahị ka kịnyaa juwa tụguru gbịgba lawụlẹ bala aanahị ịkịla pyii lẹ. Ahị ka họ ịnyị ẹ-ẹga myị́ ẹga ọlẹ kọ chịkpẹẹ, ó ri ẹpwụ nya Ube nya Ịpyị-Adịrahụ nyahị, lee ẹpwa nya ọọnahị ọhẹ lee ẹga ọ-kpịbaa wẹwẹ. Jaabwọ myị́ abwọ ká iwe-ahụrụ ka la, áhị ka hwabwọ la ọ-ka ọjịra-jịra ẹnẹnẹhẹ ka. Ahị dọmwụ baba nyọka tụguru lawụlẹ yẹẹyẹẹ “nyọlẹ [káahị] ayịdang wẹẹ yẹ, jaabwọ ká ẹnụtụrụ . . . juwa ju chwẹẹ lụmẹ lẹ.”—Wa Ala iHiburu 10:24, 25.

8. Ányị ẹla nya Ohe ọlẹ kahị wẹẹ ya, à tị́ ka bwu yẹda myị́ ị-ịlahị?

⁸ Ọ chịkpẹẹ ká ẹla nya Ohe ọlẹ kahị wẹẹ ya, ka yẹda myị́ lụka nya akama ọtụka okpelego. Lẹẹlẹẹ, ahị wẹẹ kpa ẹrụ ọnyịịla nya Ịpyị-Adịrahụ pyẹ bala ọ-maga ká angịkịla ka ri angịjụgbẹyị. Ma lụka ọwẹ, ahị ka ya ẹrụ ọlẹ kọ ka la ọngịrị-ọngịrị myị́. ỊBayịbụụ chụ ẹrụ ọọwa ka pwoku ekpawẹ ịtụka-ịtụka. (Ọwụ. 16:21) Ahị ka ya dodehe nyori, odehe nya olegu onyobyi ọlẹ juwa ka tayịreji gbanggbang lụka o-kpii lẹ myị́. Ụka juwa warị, kahị ka jẹ́ ẹla ọlẹ kahị ka ya kpangga bala abwọlẹ kahị ka bwu yoo. Ahị ka kpa ụgbẹyị ọlẹ kahị lẹẹ kpa ya ẹla nya Ohe bala ọ-mẹ ang jẹ lẹẹlẹẹ lala ẹka ohu ịmanyị tị́ myịmyị? Lee ahị tị́ ka kpa ụgbẹyị ọkịla? Ahị ka godayị kahị ka yẹ. Jaabwọ myị́ abwọ kahị ka bwu ya ẹla nya Ohe lụka ọwẹ, ọ chịkpẹẹ myị́ nyori ahị ka la iwe nyọka ya ẹrụ nya eje ọlala nya iJihova dodehe la o-juhi ka!—Isi. 2:3-5.

9. Ányị alegbeju à tị́ ka họ ẹ-ẹga nya ẹla nya Ohe oyaya nyahị myị́? Ahị ọdahile oyina ahị tị́ la?

⁹ Ọ chịkpẹẹ ịnyịnyị nyori, ẹla nya Ohe oyaya nyahị ka ju alegbeju agbama pwuu. Ọọwa ka du kị ka maga nyọka huhi abwọ la o-ya ẹla nya Ohe gbanggbang. Jaabwọ kahị wẹẹ dahịhile iJihova nyọka dahị ụbwọ kpa ẹrụ ọnyịịla pyẹ lẹẹlẹẹ, ịnyịnyị ahị ka kpụnịrọ ụbwọ ọdada nyamwụ lụka ọwẹ lẹ. Ahị la ahị ọdahile nyori, Ohe Oluhye nyahị ka ya ọngịrị nyamwụ myịhị pwẹẹpwẹẹ chajị kahị ka jẹ́-ẹ họ irya nyamwụ pwụ ocheju.—May. 3:8.

10. Jaabwọ ká ụpwụ nya iLuku 21:25-28 mẹjẹ, ányị iru nya angịnyị à tị́ ka họ lụka nya akama ọtụka okpelego?

¹⁰ Wa iLuku 21:25-28. Ụka nya akama ọtụka okpelego, ejiri ka wu angịnyị yẹẹyẹẹ ụka ká ang ịlẹ kị me irya nyori nyị ka juwa gboyi myị́ oyi, á dọmwụ nyọka tayịreji. Ị ka ju ẹ-ẹpwụ nya “ọjụjụ” ọtụka-ọtụka juwa chị uko nyori ị ka tayịreji lụka olujwo ọwẹ. (Sẹf. 1:14, 15) Ụka ọwẹ, ọhịhị ka lujwo gụ ọwọwa ẹ-ẹga nya angịnyị nya iJihova myị́. Chajị nyọlẹ kahị ri ịnya odehe ka lẹ, ahị ka yẹ akama ụ-ụgbẹyị ọhẹ lee ọkịla lee ọ-lang ịhyẹ ịlẹ kị baahị ba ka myị́.

11. (a) Ịyẹ tị́ du ká alegbeju bala angịkịla ka jahị da Alibeenu nya iJihova? (b) Ịyẹ tị́ du kahị baba nyọka juhi nya akama ọtụka okpelego ka?

¹¹ Ụka kọ nọ pyịnyeng, angịhyẹ ka dọmwụ nyọka wụ́ ẹjẹ yẹẹyẹẹ nyọlẹ kị ta ịgba  ọgbagba nyaa ayịreji, ká ịnya Alibeenu nya iJihova á tị tayịreji ka. Ị ka họ ká ẹla ọọwa ka dodehe ha angịkịla pyii. Ị tị ka họ ịnyị bwu intanẹtị myị́. Ẹla nyahị ka wụ́ angịkpeji nya ẹpwụma bala olegbeju nyaa ọlẹ kọ ri Olegu Onyobyi ẹjẹ yẹẹyẹẹ, chajị nyọlẹ ká ebwo nya ịgba ọgbagba nyahị kene-kene à hi kọ tayịreji ka. Ọ́ chaa kpẹẹ myị́ kpụ ị ha obyi omeme nyaa jịra nyọka ta ịgba ịgbagba ilodehe ọlẹ wuu ayịreji ka. Lẹ, ị ka dọmwụ nyọka jahị dahị ugbẹnyị. Ụka ọwẹ lẹ, alegbeju nya ẹpwụma ka yẹ kaka ri ịGọọgụ ọla ịMagọọgụ. * Ị ka yẹkpẹ chawụlẹ jahị da angịnyị nya iJihova la ọngịrị nyaa wuu. (Isi. 38:2, 14-16) Ọ chịkpẹẹ myị́ nyori, ahị ka juwa chị uko u-uhye nya ang ọlẹ kọ ka họ lụka nya akama ọtụka okpelego ọwẹ, ọgụgụ wuu chajị nyọlẹ kahị jẹ́ jaabwọ kọ ka la kpangga ka. Ma, ahị jẹ́ myị̀myị̀ nyori, áhị baba nyọka juhi nya akama ọtụka okpelego ọwẹ ka. IJihova ka mẹjẹ́ẹhị jaabwọ kahị ka bwu la ọchịda. (Eje. 34:19) Ahị ka jẹ́-ẹ “hu ẹhị [nyahị] hwaa ka uhye,” chajị ahị ka jẹ́ nyori “ọchịda [nyahị] juwa ju chwẹẹ lẹ.” *

12. Ányị “anchẹ ị-chịla o-hu ọkịlẹtụ ha bala angị jẹ́ ẹla” à tị́ wẹẹ nwụlahị nọ gbe ang ịlẹ kị ka họ ị-ịlahị?

¹² “Anchẹ ị-chịla o-hu ọkịlẹtụ ha bala angị jẹ́ ẹla” wẹẹ nwụlahị nọ chajị kahị ka godayị giri-giri ụka nya akama ọtụka okpelego. (Mat. 24:45) Ị họ ịnyị a-agbẹyị lụmẹ-lụmẹ. Ụgbẹyị ọhẹ bwu ẹpwụ nyaa ri ọjịra-jịra ọtụka nyahị bwu ẹka nya 2016 ka 2018. Ẹla oyaya ịla ọjịra-jịra ịwẹ juhi ọhụ nyọka ju abwẹla ịlẹ kahị baba ọngịrị jaabwọ ká ahyẹẹnụ nya iJihova wẹẹ ju chwẹẹ. Ahị kụ ẹhị yẹ abwẹla ịwẹ wẹẹ.

13. Ányị ahị tị́ ka bwu ju o-godayị giri-giri nyahị ọngịrị ẹ-ẹga nya iJihova? Ịyẹ tị́ dudu kahị ka họ ịnyị pyii lẹẹlẹẹ?

¹³ O-Godayị Giri-giri: Egbeju nya ọjịra-jịra ọtụka nya 2016 ri “Godayị Giri-giri Ha IJihova!” Ọjịra-jịra ọwẹ mẹjẹ́ẹhị nyori, kori ká igu oriri nyahị bala iJihova á la ọngịrị yẹẹyẹẹ aalẹ, ahị ka godayị giri-giri ẹ-ẹga nyamwụ. Ị kpụhị ịtịya nyori ahị ka jẹ́-ẹ tụ́ ju iJihova chwẹẹ bwula ọ-raabwọ họọ bwu ọkịlẹtụ nyahị bala ọ-jẹ́ Omyi Ẹla nyamwụ kpori-kpori. Kori kahị họ ịnyị, ọ ka dahị ụbwọ kụrụ akama ọlẹ kọ ka dọmwụ lụmẹ gụgụ wuu. Jaabwọ ká ocheju nya odehe nya Olegu Onyobyi wẹẹ ju chwẹẹ wẹẹ, ahị ka yẹhị nọ gbe ọmayẹ ọ-ka chịhị ọgụ gụ ọwọwa ẹ-ẹga nya o-godayị giri-giri nyahị ha Ohe Oluhye bala Ịpyị-Adịrahụ nyamwụ. Angịnyị ka kpahị họ gụ ọwọwa myị́ ịnyịnyị. (2 Pit. 3:3, 4) Ịngịhyẹ ọlẹ kọ du kọ kaa lịnyị ri yẹkẹẹ, áhị kaa chẹkpẹ ju ụpa nya odehe nya Olegu Onyobyi ọlẹlẹhẹ ka. Ahị ka ju o-godayị giri-giri nyahị ọngịrị lẹẹlẹẹ chajị kahị ka jẹ́-ẹ họ ịnyị ụka nya akama ọtụka okpelego.

14. (a) Ọyẹda oyina à tị́ ka ji ẹ-ẹga nya aanahị ịlẹ kị kaa kpịlahị odehe? (b) Ịyẹ tị́ baba kahị ka họ nyọka mẹjẹ nyori ahị godayị giri-giri ẹ-ẹga nya iJihova ụka ọwẹ?

¹⁴ Ụka nya akama ọtụka okpelego, ọyẹda ọhẹ ka ji ẹ-ẹga nya aanahị ịlẹ kị wẹẹ kpịlahị. Ọ́ nọ chẹẹ, Ohe Oluhye ka kpa angịlẹ kọ ya ida wụ́ wuu rụ ka epwoohe chajị kị ka da ẹwụ nya Amagẹdọn. (Mat. 24:31; Ọwụ. 2:26, 27) Ọọwa ri, Angị Kpẹhị Rịrị Ogu á ka  jam balahị odehe kaka. Ma, iru nya angịnyị ịlẹ kị ka hi ám̀ odehe á ka nyí epepe ka. Aanahị ịlẹ kị ka jẹ́-ẹ jụ ụkụrwọ ọwẹ họ bwu ẹpwụ nya ebwo nya ịkpịlọ ọkịla ka kpịlahị ụka ọwẹ. Ahị ka mẹjẹ nyori ahị godayị giri-giri ẹ-ẹga nya iJihova bwula ọ-chẹkpẹ ju aanahị ịwẹ bala ọ-ba ọmẹjẹ ọlẹ kị ye bwu ẹga nya iJihova jẹ. Ahị ka ba ọmẹjẹ nyaa jẹ pyii kori kahị tịtọ nyọka chịda!

15. (a) Ányị ahị tị́ ka bwu ju ọhụ ọbaba nyahị ọngịrị? (b) Ịyẹ tị́ du kọ baba nyọka họ ịnyị lẹẹlẹẹ?

¹⁵ Ọhụ Ọbaba: Egbeju nya ọjịra-jịra ọtụka nya 2017 ri “Abwọ a Chịng Pyẹpyẹ ka!” Ọjịra-jịra ọwẹ juhi ọngịrị nyọka jẹ́-ẹ bọhụ ẹ-ẹpwụ nya akama. Ahị jẹ́ nyori, i-iwe-ahụrụ ọnyịịla ọlẹ kahị ji à kaa du kahị ka bọhụ myị́ ka. Ahị ka jẹ́-ẹ ju ọhụ ọbaba nyahị ọngịrị bwula ọ-kpụnịrọ iJihova. (Rom. 12:12) Ahị deeri hi ehe ọchịchị nya iJisọsị ẹnẹnẹhẹ ka: “Ọng myị́ ọng ọlẹ kọ ka kpa ugbodu ojuju nyamwụ pwụ ọbaba lẹ aalẹ, ọngọọwa a ka wu ọchịda nya Ohe Oluhye ọyị lụka ohyẹẹkpẹ lẹlẹ.” (Mat. 24:13) Etu nya ehe ọchịchị ọwẹ ri, ahị ka godayị kpakpa bala iJihova pyii ẹ-ẹpwụ nya akama ọnyị myị́ ọnyị ọlẹ kahị la. Kori kahị bọhụ ẹ-ẹpwụ nya akama nyahị wuu lẹẹlẹẹ, ahị ka la ọngịrị ene nya akama ọtụka okpelego.

16. Ịyẹ à tị́ kaa ya ugbodu ojuju hahị? Ányị ahị tị́ ka bwu ju ogbodu ojuju nyahị ọngịrị lẹẹlẹẹ?

¹⁶ Ugbodu Ojuju: Egbeju nya ọjịra-jịra ọtụka nya 2018 ri “Ju Ugbodu!” Ọjịra-jịra ọwẹ kpụhị ịtịya nyori ọ-ọngịrị nya ịlọhị à kaa ya ugbodu ojuju hahị ka. Jaabwọ kahị baba nyọka kpụnịrọ iJihova nyọka la ọhụ ọbaba, ịnyị ahị baba nyọka kpụnịrọọ nyọka la ugbodu ojuju lẹ. Ányị ahị tị́ ka jẹ́-ẹ kpụnịrọọ gụ ọwọwa? Bwula ọ-wa Omyi Ẹla nyamwụ ẹnụ myị́ ẹnụ bala ọ-kụ irya ju abwọlẹ ká iJihova bwu chị angịnyị nyamwụ da lụka ọkẹkpẹ. (Eje. 68:20; 2 Pit. 2:9) Ụka nya akama ọtụka okpelego, ká alẹpwụma ịwẹ ka wuleji jahị dahị, ahị ka baba nya ugbodu ojuju bala ọ-kpụnịrọ iJihova ụ-ụgbẹyị ọlẹ kahị họ ẹnẹnẹhẹ lẹka. (Eje. 112:7, 8; Hib. 13:6) Kori kahị kpụnịrọ iJihova lẹẹlẹẹ, ahị ka la ugbodu ojuju ọlẹ kahị ka baba ụka ká ịGọọgụ ka jahị dahị. *

17. Ịyẹ tị́ du kahị ka juhi nya Ẹwụ nya Amagẹdọn kpong-kpong ka? (Yẹ ifoto ọla ẹbẹ nya ọgbanyẹ)

¹⁷ Jaabwọ kahị jẹ́ a-ang ọjẹ́jẹ ọkẹkpẹ, iru nyahị hịhị lụka ohyẹẹkpẹ nya odehe ọlẹ. Ma, ahị lahị ọdahile nyọka chịda bwu akama ọtụka okpelego ịnyịnyị. Ẹwụ nya Amagẹdọn à ka ri ocheju nya odehe onyobyi ọlẹ lẹ. Ma, áhị ka juhi kpong-kpong ka. Ịyẹ tị́ du? Chajị ẹwụ ọdada ọwẹ á ri nyahị ka, ịnya iJihova o ri lẹ. (Etu 1:33; Isi. 38:18-20; Sẹk. 14:3) Ụka ká iJihova á hụ́ ọnụ pile bwaa lẹ, iJisọsị à ka kpa angịdẹwụ nya Ohe Oluhye ị-ịlahị ka ẹwụ lẹlẹ. Ọ ka kpa ebwo nya angị wụ́ ida ịlẹ kị wuleji bwula igu bala ụnụnụụnọ nya alegu-ẹrụ ba ịlọmwụ. Ị ka ya ụbwọ da awụlẹ mwẹla ta Olegu Onyobyi, alegu-ẹrụ nyamwụ bala angịdẹwụ nyamwụ ilodehe ọlẹ.—Dan. 12:1; Ọwụ. 6:2; 17:14.

18. (a) Ehe oyina iJihova à tị́ chị? (b) Ányị ụpwụ nya Ọwụrụụ-wụrụ 7:9, 13-17 à tị́ ya ahị ọdahile hang u-uhye nya ijuju nyang?

¹⁸ IJihova chehe yẹkẹẹ: “Ang-abwọ nya ẹwụ ọnyị myị ọnyị kị họ nyọka kpa jahị dang á ka jụ́ng họ ịngịngịhyẹ ka.” (Ayị. 54:17) “Iru nya angịnyị lụmẹ-lụmẹ” nya anchẹ nya iJihova ịlẹ kị godayị giri-giri họọ ka “bebe bwu ẹpwụ nya akama ọtụka-ọtụka” ọọwa! Ọọwa lẹ, ị ka kịnyaa juwa gbịgba họọ lẹlẹ (Wa Ọwụrụụ-wụrụ 7:9, 13-17.) ỊBayịbụụ ya ang odudu lụmẹ-lụmẹ ọlẹ kahị ka lahị ọdahile nyori ahị ka chịda ị-ịlahị. Ahị jé nyori “[iJihova] kaa chewu ke angị dịrọọ kpẹẹkpẹẹ.” (Eje. 31:23) Ọ ka kpụ angịlẹ ká iJihova há bala angịlẹ kị kaa gbịgba họọ ịpyọ nyọka yẹ jaabwọ ká iJihova ka chị ịgọgọ ju ẹnyị nyamwụ.—Isi. 38:23.

19. Ijuju ọnyịịla oyina à tị́ juwa godayị gbehi?

¹⁹ Kụ irya jaabwọ ká ụpwụ nya 2 iTimoti 3:2-5 ka ya ịnọ kori kọ juwa ya ẹla u-uhye nya angị ilodehe onyeewe ịlẹ kị ba Olegu Onyobyi jẹ ka wẹẹ. (Yẹ akpa ọlẹ ḳo ri “ Jaabwọ ká Angịnyị ka La Ụka Ọọwa.”) Ọọnahị George Gangas, * kọ juwa ẹ-ẹpwụ nya Angị Kpẹhị Rịrị Ogu ụka ọhẹ lẹ, chabwọ nyamwụ ị-ịlẹ: “Odehe ka kpịpyọ lụmẹ ụka ká ọng myị́ ọng wuu ka gbịgba ha iJihova! Lụka o-kpii, à ka la ịwẹ nyọka hịhị odehe onyeewe. À ka hịhị jaabwọ ká iJihova á hịhị tata ka ba. Ahị ka hịhị gbe oyi myị́ oyi.” Ẹhị ọrịrịị-rịrị ọwẹ há lụmẹ!