À ka jẹ́-ẹ wẹ ịtọ ẹla ịlẹ kị kpehe lẹẹ bwu Ẹpwang ọ-Kụ Gbeji nya ẹka nya 2019?

Ohe Oluhye yẹkẹẹ: “Ang-abwọ nya ẹwụ ọnyị myị ọnyị kị họ nyọka kpa jahị dang á ka jụng họ ịngịngịhyẹ ka.” Etu nya ehe ọchịchị ọwẹ tị́ ri ányị? (Ayị. 54:17)

Ahị ka jẹ́-ẹ dahịhile nyori Ohe Oluhye ka chewu keehi bwu ẹga nya ang ịlẹ kị ka jẹ́-ẹ ta ọngịnyị ayịreji lala “ọtụpyịpyị o-bwu ẹga nya aluji.” (Ayị. 25:4, 5) Aluji nyahị á ka jẹ́-ẹ họhị ịngịngịhyẹ ọlẹ kọ ka juwa gboyi myị́ oyi ka.—w19.01, ẹbẹ 6-7.

Ányị ẹla ọlẹ ká Ohe Oluhye họ ẹ-ẹga nya ala iKenan bala ala Isirẹlụ ịlẹ kị la egbeju ọngịrị à tị́ mẹjẹ nyori ọ ri Ọngọ la eje ọkpẹẹkpẹẹ?

Ohe Oluhye kpa eje ọlala wẹ uhye egbeju nya angịlẹ kị lụbwọ ẹ-ẹpwụ nya abwẹla ọchịrị nya ụya ọhọhọ lee angịlẹ kị kaa họ anyang bala anyị anjwo ọkwọ to ọkịrọrọ. Ọ wahị kụrụ angịlẹ kị jwoo ihi bala ọ-họ angịkịla ẹla kịrọrọ ka.—w19.02, ẹbẹ 22-23.

Ányị a tị́ ka họ kori ká juwa ụka ká ọngọlẹ ko ri ọnchẹ nya iJihova ka á juwa raabwọ?

Ahị ka hu ujiji bala ọ-họ ẹla ụ-ụgbẹyị ọlẹ kọ ka lihi-ihi myị́, ma áhị ka yẹkẹẹ “ọ lịnyị mẹ” lee ọ-ya ụbwọ chị awụlẹ bala angịkịla ịlẹ kị juwa ka. Ahị ka jẹ́-ẹ raabwọ nyịlọhị ẹ-ẹpwụ-ẹpwụ myị́.—w19.03, ẹbẹ 31.

Ányị ọnyị onjwo ọbịrịị-bịrị à tị́ tịpyọ kaka ba?

Ọnyị onjwo ọbịrịị-bịrị ri ọhọbịrị ẹ-ẹga nya ọnyị ọọwa, ẹ-ẹga nya ọjịra-jịra, ẹ-ẹga nya eji ọkpakpa, bala ẹga nya Ohe Oluhye. Kori ká ehile nya ẹga ọọwa á ya nyori nyị kpa ẹla ọọwa ka ẹga nya alidanggeri, angịgbahị nya ọjịra-jịra ka họ ịnyị.—w19.05, ẹbẹ 9-10.

Ányị a tị́ ka bwu yẹ irya nyang da lee ọ-họ kọ ka há gụ olene?

Ang ịlẹ kị baba á ka họ ri: Ya ẹla bala iJihova ẹ-ẹpwụ nya abwọ ọrịrị. Kụ irya kpori-kpori nyọka yẹ ịlọng rige-rige. Chụ aligu nyang la ẹla ọjẹ́jẹ.—w19.06, ẹbẹ 11.

Ányị ahị tị́ ka jẹ́-ẹ họ lẹẹlẹẹ nyọka nwụlanọ gbe ọtụpyịpyị?

Ahị baba nyọka ju igu oriri nyahị ọngịrị bala iJihova. Dahịhile nyori ahi họ́ọ, ọ́ tị ka tụụbwọ hiihi ẹnẹnẹhẹ ka. Wa ịBayịbụụ ẹnụ myị́ ẹnụ, ká raabwọ ụka myị́ ụka. La ọ-jẹ́ myị̀myị̀ nyori ahị ọwawa nya Ịpyị-Adịrahụ nyị ka we ịnyịlẹhị. Kpa ẹla ịlụpwụ ịgọgọ bala eje ịlẹ kị kaa kpụng ịpyọ yẹẹyẹẹ e-egbeju.—w19.07, ẹbẹ 2-4.

Ịyẹ ahị tị́ ka họ nyọka da alugbiyegu nyahị ụbwọ kị ka la ọchịda?

Ọ baba kahị ka mẹjáa nyori ahị jẹ́ ẹla olirya nyaa, ká abwẹla ọnyịịla nyahị ka dahị ụbwọ ya ẹrụ ọnyịịla jaa. Ahị baba nyọka ju ugbodu taa bala ọ-ya ẹla lihi-ihi taa.—w19.08, ẹbẹ 15-17.

Ányị ahị tị́ bwu ye ịnyọ ọmwụ́mwụ nya ọkịlẹtụ jaabwọ ká iJisọsị ya ụ-ụpwụ nya ịMatiyu 11:28?

Ahị la angị kpẹhị rịrị ịlẹ kị la ọháha, ahị la aligu ịlẹ kị há gụ wuu, ahị la ụkụrwọ ọlẹ kọ há gụ wuu ịnyịnyị.—w19.09, ẹbẹ 23.

Ányị Ohe à tị́ ka jẹ́-ẹ ya irya bala ọngịrị nyọka kpa họ ụkụrwọ hahị? (Filip. 2:13)

Jaabwọ kahị wẹẹ wa Ụpwụ Ịgọgọ bala ọ-kụ irya jwoo kpori-kpori, Ohe ka jẹ́-ẹ dahị ụbwọ bwula ọ-ya imyi nyọka họ irya nyamwụ hahị bala ọ-ya ọngịrị ọlẹ kahị baba nyọka kpa họ ụkụrwọ hahị. Olegu Ịgọgọ nyamwụ kaa họ ká ang ọlẹ kahị jẹ́ ka rụhị gụ ọwọwa.—w19.10, ẹbẹ. 21.

Ẹta ẹdịyẹ ịnyịịla iyina ahị tị́ ka hu ene kahị ka cheje ọnyọọngịrị?

Ẹta ẹdịyẹ iru ịịwa ri: Mwahị nya ẹla ịlẹ kị ka dang ụbwọ. Raabwọ bịlẹ ẹla ọjẹ́jẹ. Kụ ẹhị yẹ ang ọlẹ kọ du ká wẹẹ cheje ọọwa. Chụ ang ọlẹ á ka ku kpangga. A maga nyọka họ kpoye nya ọngịrị nyang ka.—w19.11, ẹbẹ 27-29.

Ọmẹjẹ nyori ugbodu okpukpuru nya ọngịnyị ehe á kaa gbu ka kpehe bwu ẹla ọlẹ ká Olegu Onyobyi byi Iivu ịnyị?

Ọ la gbagbịlaa nyori ụ-ụwa ọ kpehe bwu ka. Olegu Onyobyi byi Iivu nyori nyị́ ka gbu ka ịnyị. Ọ́ byoo nyori angịnyị nyị ka mẹ kịị nyị gbu ka lẹ ka. Ọmẹjẹ nya ịgba ọgbagba nya ọnọọkịla ọlẹlẹhẹ á ka kpoye nya ukpenyi ọtụka ọlụka nya iNuwa ka. Ọhẹka, ọmẹjẹ nyori ugbodu okpukpuru nya ọngịnyị ehe á kaa gbu ka ọwẹ dọmwụ ene ká Ohe Oluhye nyí angịlẹ kị wẹẹ nwụ́ ube oluhye nya ịBabẹlụ ẹpẹpẹ ịnyị.—w19.12, ẹbẹ. 15.