1-2. Jaabwọ ká oja nya Angelito mẹjẹ, ẹlịyẹ ọngọngọọngụ nyahị à tị́ ka họ?

ADANG bala ịnang ri Alibeenu nya iJihova? Kori kọ lịnyị aalẹ, kpịtịya nyori á ka jẹ́-ẹ wẹ ka ri oligu nya iJihova chajị nyori adang bala ịnang ri oligu nyamwụ ka. Kori ká adahị bala ịnahị á kaa gbịgba ha Ohe Oluhye lee ị́ kaa gbịgba họọ ka wẹwẹ, ọngọngọọngụ nyahị baba nyọka nwụ́ igu oriri nyamwụ bala iJihova lịlọmwụ.

² Kụ irya ju oja nya ọọnahị ọhẹ ká ẹnyị nyamwụ ri Angelito wẹẹ. Alugbiyegu nyamwụ wuu ri Alibeenu nya iJihova. Ma ụka kọ ri onjwo, ọ́ lọọ lala o-ri ọ tụ́ ju Ohe Oluhye chwẹẹ yẹẹyẹẹ ka. Ọ yẹkẹẹ: “M̀ kaa gbịgba ha iJihova chajị m̀ tịtọ nyọka họ ang ọlẹ ká alugbiyegu nyam wẹẹ họ kem ịnyị.” Ọọwa, Angelito à cheje nyọka kpa ụka nyamwụ wa Omyi Ẹla nya Ohe Oluhye yẹẹyẹẹ bala ọ-kụ irya jwoo kpori-kpori lẹlẹ. Ọ myịmyị kaa raabwọ ha iJihova gụ olene-ene. Ẹlịyẹ à tị́ ri ocheju nyamwụ? Angelito yẹkẹẹ, “M̀ wẹ ka jẹ́ nyori, ụgbẹyị ọlẹ kam ka jẹ́-ẹ bwu tụ́ ju iJihova Adam chwẹẹ kene-kene, ri ọ-ka jọ́ọ lịlọm.” Oja nya Angelito ọwẹ dahị ụbwọ nyọka kụ irya ju ịtọ ẹla ịkpọngchị ịhyẹ: Ịyẹ à tị́ ri ọdatị nyọka jẹ́ ẹla ịhyẹ u-uhye nya ọngịnyị bala ọ-ka jọ́ọ yẹẹyẹẹ? Ányị ahị tị́ ka họ chajị kahị ka jẹ́ iJihova yẹẹyẹẹ?

3. Ịyẹ à tị́ ri ọdatị nya ọ-jẹ́ iJihova bala ọ-jọ́ọ yẹẹyẹẹ?

³ Ahị ka me nyori ahị jẹ́ iJihova myị́, chajị nyọlẹ kahị jẹ́ ẹnyị nyamwụ lee ọ-jẹ́ ẹla ịhyẹ ịlẹ kọ ya bala ọ-họ. Ma, ọ-ka jẹ́ iJihova gụ ọwe wẹẹ. Ahị ka kpa ụka nyahị jẹ́ ang u-uhye nya  iJihova bala abwụma ịnyịịla-ịnyịịla nyamwụ. Lẹ, ahị ka jẹ́-ẹ jẹ́ ang odudu kọ kaa ya ẹla bala ọ-họ ẹla lẹlẹ. Ọọwa ka dahị ụbwọ nyọka jẹ́ kori ka irya ọkụkụ bala abwẹla nyahị á há iJihova. Ụka kahị jẹ́ ang ọlẹ ká iJihova tịtọ kahị ka họ lẹ aalẹ, ahị baba nyọka họ ẹla ọlẹ kahị jẹ́ wẹ.

4. Ányị ọ-kụ ẹhị yẹ ọgụ-ẹpẹtẹ ịla ịBayịbụụ à tị́ ka bwu dahị ụbwọ?

⁴ Angịhyẹ ka kpahị họ chajị nyori ahị tịtọ nyọka gbịgba ha iJihova. Ị ka tụ́ụhị pyịpyị myị́ ụka kahị dọmwụ nyọka ka ọjịra-jịra. Kori kahị tị dahịhle iJihova, Ọ́ ka nyẹẹkpẹ dahị ẹnẹnẹhẹ ka. Ahị ka juwa nwụ́ igu oriri ọlẹ kọ ka juwa gboyi myị́ oyi bala Ohe Oluhye. Ahị ka jẹ́-ẹ jẹ́ iJihova pwụ ọlịịwẹ myị́? Ee, ahị ka jẹ́-ẹ họ ịnyị! Ọgụ-ẹpẹtẹ ọlẹ ká angịnyị ehe ịlẹ kị la kpẹẹkpẹẹ ka lala iMosisi bala Adịrahụ iDevidi ya deeji, mẹjẹ nyori ọ chịkpẹẹ myị́. Jaabwọ kahị wẹẹ ka kụ ẹhị yẹ ang ịlẹ kị họ, ahị ka wẹ ịtọ ẹla imiiye ịlẹ: Ányị ị tị bwu wẹ ka jẹ́ iJihova? Ẹlịyẹ ahị tị ka jẹ́ bwu ọgụ-ẹpẹtẹ nyaa?

5. Ẹlịyẹ iMosisi à tị́ chụ nyọka họ?

⁵ IMosisi chụ nyọka gbịgba ha Ohe Oluhye. Ụka ọlẹ ká iMosisi gu ẹka lala iwo ine, ọ chụ nyọka yẹjula angịnyị nya Ohe Oluhye kị ri ala Isirẹlụ, ọkọkọ kị ka jọ́ọ nya “ọnyị ọlata nya ọnyị ọnyang nya iFero Adịrahụ.” (Hib. 11:24) IMosisi tụụbwọ hi iwe-ahụrụ ọlẹ kọ la gbẹgbịlẹ. Bwula ọ-chẹkpẹ ju ala Isirẹlụ ịlẹ kị ri anyịhị ọ-ọpyị nya Ijipiti, iMosisi jẹ́ nyori Adịrahụ iFero ọlẹ ká angịnyị kaa yẹ lala Ohe nyị ka ju agbama tọwa nyịlẹhị-ịlẹhị. Ọmyịmyị ọnyọọngịrị à wẹ kọ mẹjẹ lẹ! IMosisi dahịhile iJihova. Ahị ọdahile ọọwa à ri ẹjwọ nya itiwe nya igu oriri ọlẹ kọ kaa ri ehe gboyi myị́ oyi lẹ.—Etu 3:5.

6. Ẹlịyẹ ahị tị́ ka jẹ́ bwu ọgụ-ẹpẹtẹ nya iMosisi?

⁶ Ẹlịyẹ ahị tị́ ka jẹ́? Ahị wuu la eje ka chị lala iMosisi: Ahị ka chụ nyọka gbịgba ha Ohe Oluhye bala ọ-yẹjula angịnyị nyamwụ? Ọhẹka, ahị ka tụụbwọ hi ịngịhyẹ deeji chajị nyọka gbịgba ha Ohe Oluhye. Angịlẹ kị tị jẹ́ iJihova ka, ka tụụhị pyịpyị ịnyịnyị myị́. Ma, kori kahị dahịhile Adahị olepwoohe, ahị jẹ́ myịmyị nyori ọ ka dahị ụbwọ!

7-8. Ẹlịyẹ iMosisi à tị́ kịnyaa juwa jẹ́?

⁷ IMosisi kịnyaa juwa jẹ́ ang u-uhye nya abwụma nya iJihova bala ọ-họ irya nyamwụ. Lala ọ-chụ pwokwita, ụka ọlẹ ká iJihova du iMosisi ẹrụ nyọka gba ala Isirẹlụ kpehe bwu ọpyị nya Ijipiti, ọ juhi yẹẹyẹẹ. Ụka lụmẹ-lụmẹ, o byi iJihova nyori ọwa nyị́ ka jẹ́-ẹ myị ẹrụ ọwẹ myị ka. Ọwẹwẹ nya Ohe Oluhye mẹjẹ nyori, Ọ la ahyẹẹrwẹrwa nyịlẹhị ẹ-ẹga nya iMosisi. Ọ jẹ́ jaabwọ kọ lọọ, ọọwa lẹ Ọ dọọ ụbwọ lẹlẹ. (Ehe. 4:10-16) Ọọwa da iMosisi ụbwọ nyọka ya ẹrụ ọnyọọngịrị ju iFero. IMosisi yẹ jaabwọ ká iJihova kpa ọngịrị nyamwụ chị ala Isirẹlụ da bala ọ-ta iFero ayịreji bala alẹwụ nyamwụ wuu ẹ-ẹpwụ nya ihu oṭụka.—Ehe. 14: 26-31; Eje. 136:15.

⁸ Nyọlẹ ká iMosisi kpa ala Isirẹlụ kpehe bwu ọpyị nya Ijipiti kpá, ị kaa mwala ya ịnyịnyịịnyị. Ọ tị yẹ jaabwọ ká iJihova kịnyaa juwa mẹ ugbodu ojuju onyudiyo jẹ ẹ-ẹga nya angịnyị ịlẹ kọ gba kpehe bwu ọnyọhị oriri. (Eje. 78:40-43) IMosisi yẹ ịnyịnyị jaabwọ ká iJihova kpịlọmwụ keji nyịlẹhị-ịlẹhị, ụka ọlẹ kọ ta ala Isirẹlụ ayịreji ka chajị nyọlẹ ká iMosisi bịlọọ.—Ehe. 32:9-14.

9. Ányị igu oriri nya iMosisi bala iJihova à tị́ la ká ụpwụ nya Ala iHiburu 11:27 chabwọ?

⁹ Nyọlẹ kị gba kpehe kpá, iMosisi ri oligu nya iJihova la apatabwọ kiwa ka. Ọ lala o-ri, ọ kaa yẹ Adamwụ olepwoohe lẹhị nyịlọmwụ. (Wa Ala iHiburu 11:27.) ỊBayịbụụ mẹjẹ jaabwọ ká igu oriri ọọwa la ọngịrị kaka  ba ụka ọlẹ kọ yẹkẹẹ: “[IJihova ] kaa ya ẹla ta iMosisi a-ahịchịng jaabwọ ká ọngịnyị kaa ya ẹla bala oligu nyamwụ.”—Ehe. 33:11.

10. Ẹlịyẹ ahị tị́ ka họ nyọka jẹ́ iJihova yẹẹyẹẹ?

¹⁰ Ẹlịyẹ ahị tị́ ka jẹ́? Nyọka jẹ́ iJihova yẹẹyẹẹ, ahị baba nyọka jẹ́ ang u-uhye nya abwụma nyamwụ bala ọ-họ irya nyamwụ ịnyịnyị. O ri irya nya iJihova “ká angịnyị ehe wuu ka chịda bala ọ-ka ri angị jẹ́ ẹla nya ịlẹhị . . . yẹẹyẹẹ.” (1 Tim. 2:3, 4) Ụgbẹyị ọhẹ ọlẹ kahị ka bwu họ irya nya Ohe Oluhye ri ọ-ka mẹ ẹla nyamwụ jẹ angịkịla.

11. Ányị ahị tị́ kaa bwu jẹ́ iJihova gụ ọwọwa jaabwọ kahị juwa mẹ ẹla nyamwụ jẹ angịkịla?

¹¹ Ahị kaa jẹ́ iJihova gụ ọwọwa ụka kahị juwa mẹ ẹla nyamwụ jẹ angịkịla ịnyịnyị. Lala ọ-chụ pwokwita, ahị kaa yẹ ahyẹẹrwẹrwa nyamwụ ẹ-ẹga nya angịnyị gede-gede ụka kọ dahị ụbwọ nyọka yẹ angịlẹ kị juwa tịtọ nyọka ri oligu nyamwụ. (Jọn. 6:44; Ụkụr. 13:48) Ahị kaa yẹ nyori, Omyi Ẹla nya Ohe Oluhye la ọngịrị, jaabwọ kọ wẹẹ da angịlẹ kahị kaa mọọ jẹ ụbwọ, nyọka tụụbwọ hi abwẹla ọtịpyọ deeji bala o-hu abwụma onyeewe dakụrụ. (Kol. 3:9, 10) Ahị myịmyị kaa yẹ ugbodu ojuju nya iJihova, jaabwọ kọ wẹẹ ya iwe da ha angịnyị lụmẹ-lụmẹ o-oye nyahị nyọka jẹ́ ang u-uhye nyamwụ chajị kị ka la ọchịda.—Rom. 10:13-15.

12. Ẹlịyẹ iMosisi à tị́ bịlẹ ụ-ụpwụ nya Ehe Ọkpụkpụ 33:13? Ịyẹ tị́ du?

¹² IMosisi hu igu oriri nyamwụ bala iJihova nya ang o-ju apyobwuna yẹẹyẹẹ. Nanana nyori iMosisi họ akụrwọ ẹbyẹbyị la ẹnyị nya Ohe Oluhye, ọ myịmyị kaa bịlọọ lihi-lihi nyori nyị da ọwa ụbwọ nyọka jọ́ọ gụ ọwọwa. (Wa Ehe Ọkpụkpụ 33:13.) Ụka ọlẹ ká iMosisi bịlẹ ẹlẹwẹ, o kpoye nya ẹka iwo ineku lẹ, ma ọ jẹ́ nyori ang lụmẹ-lụmẹ ji kọ ka jẹ́ u-uhye nya Adamwụ olepwoohe, ọlẹ kọ la ọháha wẹẹ.

13. Ụgbẹyị oyina ahị tị́ ka bwu mẹjẹ nyori, ahị hu igu oriri nyahị bala Ohe Oluhye nya ang o-ju apyobwuna?

¹³ Ẹlịyẹ ahị tị́ ka jẹ́? Jaabwọ myị́ abwọ kọ tata ka ba kahị kaa gbịgba ha iJihova lẹ, áhị ka yẹhị da igu oriri nyahị balọọ bwee ẹnẹnẹhẹ ka. Ụgbẹyị ọhẹ ọlẹ kahị ka bwu mẹjẹ nyori ahị hu igu oriri nyahị bala Ohe Oluhye nya ang o-ju apyobwuna ri ọ-ka ya ẹla balọọ ụka myị́ ụka ẹ-ẹpwụ nya abwọ ọrịrị.

14. Ịyẹ tị́ du ká abwọ ọrịrị ri ang ọkpọngchị ọlẹ kọ ka dahị ụbwọ jẹ́ ang u-uhye nya iJihova?

¹⁴ Ẹla oyaya lawụlẹ ọlam-ọlam, à ri ochiri ọlẹ kọ kaa wu igu oriri kpa kọ ka la ọngịrị lẹ. Lẹ, tụ́ ju Ohe Oluhye chwẹẹ bwula ọ-raabwọ họọ ụka myị́ ụka. A juhi nyọka ya ẹla ọlọkịlẹtụ nyang wuu joo ẹnẹnẹhẹ ka. (Efe. 6:18) Krista, kọ kụ Turkey yẹkẹẹ: “Ọháha bala ahị ọdahile nyam ẹ-ẹga nya iJihova kaa nwà gụ ọwọwa ụka myị́ ụka kam ya ẹla ọlọkịlẹtụ nyam joo ẹ-ẹpwụ nya abwọ ọrịrị bala ọ-yẹ jaabwọ kọ dam ụbwọ. Ụka kam yẹ jaabwọ ká iJihova bwu wẹ abwọ ọrịrị nyam, m̀ kaa tụ́ jwoo chwẹẹ gụ ọwọwa. Lẹẹlẹẹ, m̀ kaa yẹ iJihova lala Adam bala Oligu nyam.”

15. Ányị iJihova à tị́ ya u-uhye nya iDevidi?

¹⁵ Ị ma Adịrahụ iDevidi ẹ-ẹpwụma ọlẹ kị kaa gbịgba ha iJihova. Ma, iDevidi-í kaa gbịgba ha iJihova chajị nyori alugbiyegu nyamwụ kaa gbịgba họọ ịnyịnyị ka. Ọ nwụ́ igu oriri nyamwụ bala iJihova lịlọmwụ, ẹla nyamwụ tị há iJihova yẹẹyẹẹ ịnyịnyị. IJihova ya ẹla u-uhye nya iDevidi yẹkẹẹ: ‘O ri ọngọlẹ kọ kaa họ ẹla wum am Ohe Oluhye ẹpwụ hiigu lụmẹ.’ (Ụkụr. 13:22) Ányị iDevidi à tị́ bwu tụ́ ju iJihova chwẹẹ ịịwẹ?

16. Ẹlịyẹ iDevidi à tị́ jẹ́ u-uhye nya iJihova bwula ọ-kụ ẹhị yẹ ang ịlẹ kọ họ?

¹⁶ IDevidi jẹ́ ang u-uhye nya iJihova bwula ang ịlẹ kọ họ. Ụka ọlẹ ká iDevidi ri onjwo, ọ kaa juwa odehe ụka lụmẹ-lụmẹ juwa kpẹhị  rịrị ịkpịlọ nya adamwụ. Ọ chịkpẹẹ myị́ nyori, ụka ọwẹ ọ dọmwụ nyọka kụ irya ju ang ịlẹ ká iJihova họ lẹ. Lala ọ-chụ pwokwita, ụka ká iDevidi á chẹhị ka uhye-ọgba kaka yẹ iru nya ịdịchụ lodu, ọ́ kaa ịdịchụ ịwẹ kem ka, ma o ka yẹ abwụma nya ọngọlẹ kọ haa myị́. Olegu gu iDevidi gbịla nyọka da ụpwụ yẹkẹẹ: “Uhye-ọgba chị ụmụmẹ nya Ohe Oluhye ehe! Uhye-ọgba mẹ ụkụrwọ ọlẹ kọ họ jẹ gede-gede.” (Eje. 19:1, 2) Ụka ká iDevidi á kụ irya ju ụgbẹyị ọlẹbyẹbyị ọlẹ ká Ohe Oluhye họ angịnyị ehe ịkịla, ọ kaa yẹ jaabwọ ká ẹla ọjẹ́jẹ nyamwụ la kpori-kpori kaka ba. (Eje. 139:14) Jaabwọ ká iDevidi wẹẹ kụ irya ju ang ịlẹ ká iJihova họ, ọ yẹ jaabwọ kọ la hịnyẹẹ kaka ba ị-ịlahị nya iJihova.—Eje. 139:6.

17. Ẹlịyẹ ahị tị́ ka jẹ́ kori kahị kụ irya ju ang ịlẹ ká Ohe Oluhye họ?

¹⁷ Ẹlịyẹ ahị tị́ ka jẹ́? A gu irya nyang daarụ hi ang ịlẹ ká Ohe Oluhye họ ka. Maga ká kpa ụka nyang kụ ẹhị yẹ odehe ọhụ́hị-hụ́hị ọlẹ ká iJihova họ wẹ, ká ang ịlẹpwụ nyamwụ a gung o-olegu ịnyịnyị. Ẹ-ẹpwụ nya ahyẹẹnụ nyang ọnyị myị́ ọnyị, kụ irya ju ẹla ọlẹ ká ang ịlẹ kị dagaga jung mẹjẹ́ng u-uhye nya iJihova. Ang lala ekeji, iyo bala angịnyị ehe. Ọọwa a ka jẹ́ ang gụ ọwọwa u-uhye nya Adang ọnyịịla olepwoohe, ẹnụ myị́ ẹnụ lẹlẹ. (Rom. 1:20) À ka myịmyị-ị̀ yẹ jaabwọ ká ọháha nyang ẹ-ẹga nyamwụ ka juwa nwà gụ ọwọwa ẹnẹnẹẹnụ.

18. Ẹlịyẹ iDevidi à tị́ jẹ́, ká ụpwụ nya Eje Ọnyịịla egbeju 18 ya?

¹⁸ IDevidi yẹ nyori iJihova wẹẹ dọọ ụbwọ. Lala ọ-chụ pwokwita, ụka ọlẹ ká iDevidi chewu ke ịkpịlọ nya adamwụ bwu ẹga nya ugẹbẹ bala ọnarwọ, ọ yẹ nyori iJihova à dọọ ụbwọ nwụ iyo ịnyịịngịrị ịlịịwẹ lẹ. Ụka ọlẹ kọ kụrụ iGolayatị ọgẹwụ ọtụka, iDevidi yẹ gede-gede nyori iJihova à wẹẹ kpọọ ụgbẹyị lẹ. (1 Sam. 17:37) Ụka ọlẹ kọ be bwu ẹpwụtụbwọ nya Adịrahụ ịSọlụ ọla ijiiiji onyobyi, ọ jẹ́ nyori iJihova à chọọ da lẹ. (Ẹhị nya ẹla oluhye nya Eje. 18) Kori ká iDevidi á ri ọngọ hu ịlọmwụ hwaa ịnọ, ọ ka me ká ọngịrị nyịlọmwụ ọ kpa họ ang ịwẹ wuu. Ma, ọ kaa kpịlọmwụ keji, lẹ ọ jẹ́ nyori iJihova nya-à wẹẹ dọọ ụbwọ ẹ-ẹpwụ nya ọhịhị nyamwụ lẹ. —Eje. 138:6.

19. Ẹlịyẹ ahị tị́ ka jẹ́ bwu ọgụ-ẹpẹtẹ nya iDevidi?

¹⁹ Ẹlịyẹ ahị tị́ ka jẹ́? Áhị ka juwa bịlẹ ụbwọ ọdada nya iJihova ịịwẹ kem ka. Ọ baba kahị ka maga nyọka jẹ́ ụka bala abwọlẹ kọ bwu dahị ụbwọ ịnyịnyị pyii lẹ. Kori kahị kpịlọhị keji, ahị ka yẹ nyori áhị ka jẹ́-ẹ họ ang myị́ ang wuu lịlọhị ka. IJihova à kaa dahị ụbwọ nyọka họ ang ịlẹ kahị ka jẹ́-ẹ họ myị́ ka lẹ. Ụka myị́ ụka kahị yẹ jaabwọ ká iJihova bwu dahị ụbwọ, igu oriri nyahị balọọ ka nwà gụ ọwọwa. Ọọnahị Isaac bwu Fiji, kọ kaa gbịgba ha iJihova lẹka lụmẹ-lụmẹ, yẹ nyori ẹla ọwẹ ri ẹlịlẹhị. Ọ yẹkẹẹ: “Ụka kam kụ irya kẹkpẹ ẹ-ẹpwụ nya ọhịhị nyam, m̀ kaa yẹ jaabwọ ká iJihova dam ụbwọ bwu ụka ọlẹ kam dọmwụ nya ịBayịbụụ ọjẹ́jẹ gbee daalẹ. Ọọwa dudu kam tụ́ ju iJihova chwẹẹ gụ ọwọwa.”

20. Ẹlịyẹ ahị tị́ ka jẹ́ bwu igu ọlẹ ká iDevidi ri bala iJihova?

²⁰ IDevidi gbịla abwụma nya iJihova. IJihova họhị ụ-ụgbẹyị ọlẹ kahị ka jẹ́-ẹ gbịla abwụma nyamwụ. (Ọmwụ. 1:26) Jaabwọ kahị wẹẹ jẹ́ ang u-uhye nya abwụma nya iJihova gụ ọwọwa, ịnyịnyị ahị ka jẹ́-ẹ gbịlọọ yẹẹyẹẹ lẹ. IDevidi jẹ́ Adamwụ olepwoohe yẹẹyẹẹ, lẹ ọ jẹ́ gbịla abwụma nyamwụ ụka kọ juwa họ ẹla ẹ-ẹga nya angịkịla. Kụ ẹhị yẹ ọ-chụ pwokwita ọhẹ wẹẹ. IDevidi họ ọhọbịrị ba iJihova ụka ọlẹ kọ họ ụya ta ịBatịchẹba bala ọ-họ kị ka nwụ ọrụmwụ. (2 Sam. 11:1-4, 15) Ma, iJihova yẹ ahyẹẹrwẹrwa nya iDevidi jaabwọ ká ọwa ayịdang yẹ ahyẹẹrwẹrwa nya angịkịla ịnyịnyị. Chajị nyọlẹ ká iDevidi ri igu ọlam-ọlam bala iJihova  lẹ, ẹla nyamwụ há ala Isirẹlụ yẹẹyẹẹ. IJihova myịmyị hwoo nya ọgụ-ẹpẹtẹ ọlẹ ká ịdịrịhụ ịkịla ịla Isirẹlụ ka ba jẹ.—1 Ịdị. 15:11; 2 Ịdị. 14:1-3.

21. Jaabwọ ká ụpwụ nya Ala Efesọsị 4:24 bala 5:1 mẹjẹ, apyobwuna iyina ahị tị́ kaa ye ụka kahị “gbịla Ohe Oluhye”?

²¹ Ẹlịyẹ ahị tị́ ka jẹ́? Ọ baba kahị ka “gbịla Ohe Oluhye.” Kori kahị họ ịnyị, ahị kaa ye apyobwuna bala ọ-jẹ́ Ohe Oluhye gụ ọwọwa. Ụka kahị gbịla abwụma nya Ohe Oluhye, ahị kaa mẹjẹ ịnyịnyị nyori ahị ri anyị nyamwụ.—Wa Ala Efesọsị 4:24; 5:1.

22-23. Ẹlịyẹ à tị́ ka họ kori kahị kpa ẹla ọlẹ kahị jẹ́ u-uhye nya iJihova họ ụkụrwọ?

²² Jaabwọ kahị yẹ wẹẹ, ahị kaa jẹ́ ang u-uhye nya iJihova bwula ang ịlẹ kọ họ bala ịBayịbụụ kọ ri Omyi Ẹla nyamwụ. Ọgụ-ẹpẹtẹ nya anchẹ nya Ohe Oluhye ịlẹ kahị ka gbịla juwa ẹ-ẹpwụ nya ịBayịbụụ yẹẹyẹẹ. Angịnyị lala iMosisi bala iDevidi. IJihova họ ụpa nyamwụ ọwa lẹ, ohihi ju ụbwọ nyahị kahị ka wụrụ ẹhị, ụrụ bala ọkịlẹtụ nyahị da gbadaa họọ.

²³ Áhị ka jẹ́-ẹ hwabwọ la ọ-ka jẹ́ ang u-uhye nya iJihova ẹnẹnẹhẹ kaka. (Ọngọ. 3:11) A-abwọlẹ kahị jẹ́ ang lụmẹ u-uhye nyamwụ à tị́ baba lụmẹ ka, ma ang ọlẹ kahị họ la ẹla ọjẹ́jẹ ọọwa, à baba gụgụ lẹ. Kori kahị kpa ẹla ọlẹ kahị wẹẹ jẹ́ họ ụkụrwọ bala ọ-maga nyọka gbịla Adịda ọnyịịla nyahị, ọ ka kịnyaa juwa tụ́ juhi chwẹẹ. (Jem. 4:8) Ọ ya ahị ọdahile hahị bwula Omyi Ẹla nyamwụ nyori, ọwa nyị́ ka nyẹẹkpẹ da angịlẹ kị wẹẹ maga nyọka jọ́ọ ẹnẹnẹhẹ ka.