Ọ la gbagbịla nyori ọọwa ka. Olegu Onyobyi á byi Iivu nyori ugbinyịrọ nyamwụ nyị ka gbu, ma olegu nyamwụ nyị tị ka rụ ka hịhị ẹ-ẹgẹhẹ, kori kọ ri ugbe nya okoji ọwẹ ka. Olegu Onyobyi kpa ilo byi Iivu nyori, kori kọ ri ugbe nya okoji ọwẹ, nyị́ ka ‘gbu kpong-kpong ka’. Ọ wẹẹ ya nyori ọ ka kịnyaa juwa hịhị, ọhịhị nyamwụ odehe ọlẹ nyị ka há gụ olene, bala o-ri ọ ka la ọhịhị ọlẹ kọ ka baba nya ụbwọ ọdada nya Ohe Oluhye ka.—Ọmwụ. 2:17; 3:3-5.

Kori ká ọmẹjẹ nya ugbodu okpukpuru nya ọngịnyị ọhịhị gboyi myị́ oyi á dọmwụ bwu iku nya Iden ka, ụka oyina ọ tị́ dọmwụ tịng tị? Áhị jẹ́ kpangga ka. Ahị tị jẹ́ nyori ukpenyi ọlụka nya iNuwa ta ịgba ọgbagba nya ịnịịkịla ịlụka ọọwa wuu ayịreji. Nyọlẹ ká iNuwa bala ugbiyegu nyamwụ kem à chịda, kị tị ri anchẹ nya iJihova wuu lẹ, ọngọngọhẹ á juwa nyọka mẹ ọnọọkịla jẹ ka.

Lẹ, ọmẹjẹ nya ugbodu okpukpuru nya ọngịnyị o-gbu ka ọwẹ ka dọmwụ nyọlẹ ká ukpenyi ọlụka nya iNuwa do kpá ịnyị. Ụka ọlẹ ká Ohe Oluhye yi òja ju awụlẹ ị-ịBabẹlụ, ká angịnyị “nyi . . . epepe yịrị odehe yịrị” wuu, ị la irya nyori angịnyị ehe la ugbodu okpukpuru ọlẹ kọ ka gbu ka ene lẹ, ị kpọọ bịlaa. (Ọmwụ. 11:8, 9) Ụka myị́ ụka ọlẹ ká ọnọọkịla ọwẹ á dọmwụ bwu, ahị jẹ́ nyori Olegu Onyobyi, kọ ri “adịda nya ọnọọkịla” à dọmwụ nyamwụ lẹ. Ọ tị kpọọ ịpyọ nyọlẹ kọ pyẹ myị́ ẹga myị́ ẹga wẹ kpanggbaa.—Jọn. 8:44.