1-2. (a) Ịyẹ à tị́ kaa dahị ụbwọ nyọka bọhụ ẹ-ẹpwụ nya ahyẹẹnụ ọnyị myị́ ọnyị? Ịyẹ tị́ du kahị ya ịnyị? (b) Ẹlịyẹ ahị tị́ wẹẹ ka jẹ́?

“ỤKA kam chẹhị kẹkpẹ kaka yẹ akama ịlẹ kam chịpwụrụ bwu wuu, m̀ kaa jẹ́ nyori kori kọ ri ọngịrị nyam am ụbwọọm ịnọ, ḿ ka bọhụ ẹ-ẹpwụ nyaa myị́ ka.” À ya ịnyị ẹnẹhẹ lẹ? Iru nyahị kaa ya ịnyị. Ọhẹka à ya ịnyị ụka ká jẹ́ bọhụ ẹ-ẹpwụ nya ẹdụrụ ọtụka ọhẹ lee ụka ká ọngọ háng há ọhẹ gbu. Ụka ká kụ irya nya ọmayẹ ọọwa, à kaa yẹ nyori à jẹ́ bọhụ ahyẹẹnụ myị́ ahyẹẹnụ chajị Olegu Ịgọgọ nya iJihova ya ‘ọngịrị ọtụka’ hang.—2 Kọr. 4:7-9.

² Ahị kaa kpụnịrọ Olegu Ịgọgọ ịnyịnyị chajị ká odehe onyobyi ọlẹ ka gbileehi la ijẹẹhị nyamwụ ka. (1 Jọn. 5:19) Datị hi ọọwa, ahị myịmyị la uya ọmama ta “alegu inyibyi.” (Efe. 6:12) Ahị ka kụ ẹhị yẹ agbẹyị imiiye ịlẹ ká Olegu Ịgọgọ kaa dahị ụbwọ ẹ-ẹpwụ nya akama ịwẹ wuu. Ọọwa lẹ, ahị ka kụ ẹhị yẹ ang ịlẹ kahị ka họ chajị kahị ka ye apyobwuna bwu ẹga nya Olegu Ịgọgọ nya Ohe Oluhye lẹlẹ.

3. Ịyẹ à tị́ ri ụgbẹyị ọhẹ ọlẹ ká iJihova kaa dahị ụbwọ nyọka bọhụ ẹ-ẹpwụ nya ịmayẹ?

³ Olegu Ịgọgọ nya iJihova kaa dahị ụbwọ bwula ọ-ya ọngịrị hahị nyọka họ ụkụrwọ ọlẹ kahị baba nyọka họ kori kahị dọmwụ juwa ẹ-ẹpwụ nya ịmayẹ wẹwẹ. ỊPọlụ ọngọmyẹrụ yẹ nyori ọ jẹ́ gbịgba ha iJihova kịnyaa kịlahị-ịlahị myị́ chajị nyọlẹ kọ kpụnịrọ “ọngịrị ọtụka nya ịKịrayịsị” ịnyị. (2 Kọr. 12:9) Ụka nya ogu-ẹdịyẹ nya ẹrụ ọnyịịla ọ-kpa pyẹ nya ịPọlụ oheeye, ọ kaa kpa ẹrụ ọnyịịla pyẹ yẹẹyẹẹ myịmyị juwa họ ụkụrwọ ọkịla nyọka kpahị ju ịbaba nyịlọmwụ ịnyịnyị. Ọ kụ ịKọrịntị ẹ-ẹpwa nya Akwila bala iPirisila. Ị ri angị nwụ́ ọdụ. Nyọlẹ ká ịPọlụ jẹ́ ụkụrwọ ọwẹ ịnyịnyị lẹ, ọ kaa họ ụkụrwọ balaa ẹnẹhẹ. (Ụkụr. 18:1-4) Olegu Ịgọgọ ya ọngịrị ha ịPọlụ nyọka họ ụkụrwọ ọwẹ bala ẹrụ ọnyịịla ọ-kpa pyẹ lawụlẹ.

4. Jaabwọ ká 2 Ala ịKọrịntị 12:7-9 ya, akama oyina ịPọlụ à tị́ la?

⁴ Wa 2 Ala ịKọrịntị 12:7-9. Ẹ-ẹpwụ nya ọgba ịwẹ, ịyẹ à tị́ ri etu  nya ẹla ọlẹ ká ịPọlụ ya nyori ịngịhyẹ nyị “juwa gu ugbinyịrọ [nyọwa] chọọchọọ ịnyịnyịịnyị”? Kori ká ujwo á dụrụng juwa u-ugbinyịrọ, ọ ka ri akama ọtụka hang. Lẹ, ẹla ọlẹ ká ịPọlụ wẹẹ ya ri, ọ la ọmayẹ ọhẹ ọlẹ kọ ri akama ọtụka-ọtụka họọ. Ọ wụrwọọ nya “ọlẹrụ nya Ohe Onyobyi” ọlẹ kọ kaa juwa ‘nyóo enyiri.’ Ọhẹka, o-Olegu Onyobyi bala alegu-ẹrụ nyamwụ à ju ọmwụ nya ọmayẹ nya ịPọlụ ọwẹ kpangga, lala o-ri ị juwa ya ujwo dụrọọ ị-ịnyịrọ ka. Ma, ụka ká alegu inyibyi ịlọkwọ ịwẹ á yẹ ujwo nya akama ọlịnyị, ị ka tịtọ nyọka tọọ dụrwọọ gụ ọwọwa chajị ká akama nyamwụ ka gụ olene. Ányị ịPọlụ à tị́ họ?

5. Ányị iJihova à tị́ bwu wẹ abwọ ọrịrị nya ịPọlụ?

⁵ Ụka nya ọgbanyẹ, ịPọlụ tịtọ ká iJihova ka gba “ujwo” nya akama ọwẹ hyoo gbanggbang. Ọ yẹkẹẹ: ‘M bịlẹ Ọngọlahị [iJihova] . . . ugbabwọ ịta gbẹgbịlẹ, chajị kọ ka tụ ang ọọwa kịnyaa him.’ Nanana nyori, ịPọlụ kịnyaa juwa bịlẹ ẹ-ẹpwụ nya abwọ ọrịrị, ujwo ọla ugbinyịrọ ọọwa á gba hyoo ka. Ọwẹ mẹjẹ nyori, iJihova á wẹ abwọ ọrịrị nya ịPọlụ ka? Ehehe. Ọ wọọ. Ịlẹhị lẹ, iJihova á tụ́ akama ọọwa hyoo gbanggbang ka, ma Ọ ya ọngịrị nyọka bọhụ myị́ ha ịPọlụ. IJihova yẹkẹẹ: “Ẹga ká ọdẹwụ-dẹwụ ọlala á ji lụmẹ, ụ-ụwa kpangga, ọngịrị ọtụka nyam Am Ọngọlahị a kaa jẹ́-ẹ chị ehe gede-gede jịra myị́ lẹ.” (2 Kọr. 12:8, 9) Bwula ụbwọ ọdada nya Ohe Oluhye, ịPọlụ kịnyaa juwa chị ọkẹkẹnị bala o-ye okpunyi nya ọkịlẹtụ!—Filip. 4:4-7

6. (a) Ányị iJihova à tị́ ka bwu wẹ abwọ ọrịrị nyahị myị́? (b) Ọnụ ọmyịmyị iyina bwu ụpwụ ịgọgọ ịla ọgba ọlẹ à tị́ ya ọngịrị hang?

⁶ À raabwọ bịlẹ iJihova kọ ka gbang kpehe bwu ẹpwụ nya ọmayẹ ọhẹ lala ịPọlụ ẹnẹhẹ lẹ? Ọhẹka à raabwọ nyịlẹhị-ịlẹhị chajị nyamwụ, ma akama ọọwa á myị tụ́ kịnyaa hing ka lee ọ dọmwụ juwa tịpyọ gụ olene-ene. Ọọwa dudu ka juwa chị uko nyori, ẹla nyang á há iJihova kaka? Kori kọ lịnyị aalẹ, kpịtịya nya ẹla nya ịPọlụ. Jaabwọ ká iJihova wẹ abwọ ọrịrị nyamwụ, ọ ka wẹ ịnyang ịnyịnyị pyii lẹ! Ọhẹka, iJihova á ka myị akama ọọwa gbanggbang ka myị́. Ma, bwula ụbwọ ọdada nya Olegu Ịgọgọ, Ọ ka ya ọngịrị ọlẹ kọ ka dang ụbwọ bọhụ myị́ hang. (Eje. 61:3, 4) Akama ka tụng beji myị́, ma iJihova á ka tụụbwọ hing ẹnẹnẹhẹ ka.—2 Kọr. 4:8, 9; Filip. 4:13

7-8. (a) Ụgbẹyị oyina Olegu Ịgọgọ à tị́ bwu lala igbachịwụ? (b) Ányị iPita à tị́ chabwọ nya abwọlẹ ká Olegu Ịgọgọ kaa bwu họ ụkụrwọ?

⁷ Ugbeyi ọkịla oyina Olegu Ịgọgọ à tịị bwu dahị ụbwọ myịmyị? Ahị ka jẹ́-ẹ chụ Olegu Ịgọgọ ka pwoku igbachịwụ. Jaabwọ ká igbachịwụ ọlẹ kọ juwa da ụ-ụgbẹyị ọlẹ kọ pwoku, kaa kpa ụgbọ nya enyi jẹ ka pwụ ẹga ọlẹ kọ wẹẹ ka la okpunyi, kori ká enyi á dọmwụ juwa gu agbụ ọtụka-ọtụka wẹwẹ, ịnyịnyị Olegu Ịgọgọ à kaa dahị ụbwọ nyọka kịnyaa juwa gbịgba ha iJihova kori ká ịmayẹ á chịhị ọgụ wẹwẹ lẹ, gbee kahị ka pwụ odehe onyeewe ọlẹ ká iJihova myị ọnụ hahị.

⁸ IPita ọngọmyẹrụ jẹ́ ẹla nya ụgbọ nya enyi ojuju yẹẹyẹẹ chajị o ri ọngọ durwe-enyi. Ọhẹka, ọọwa à dudu kọ kpa omyi ẹla ọlẹ kọ gu ụgbọ nya enyi ojuju ya ẹla ụka kọ wẹẹ chabwọ nya abwọlẹ ká Olegu Ịgọgọ kaa bwu họ ụkụrwọ lẹ. Ọ da ụpwụ yẹkẹẹ: “Ọmwụ ọyẹyẹ nyaa ọhẹ-lọhẹ á bwula irya omeme nya alọmwụ ịịwa ayịdang la ịlaa kpong-kpong ka. Ma, ị yẹ ọmwụ ịịwa wuu dodehe, jaabwọ ká Olegu Ịgọgọ nya Ohe Oluhye juwa kpaa ya kem.” Etu nya omyi ẹla nya iGiriki ọlẹ kị yẹda ka ri “kpaa ya” ri ọ-ka kpa ang jẹ, kori kị yọọ da kpụrụrụ ịịwẹ.—2 Pit. 1:21.

9. Ụrụrụ nya ẹlịyẹ iPita à tị́ wẹẹ tịtọ kọ ka gba kpehe la omyi ẹla ọlẹ kọ ri, ọ-ka kpa ang jẹ?

⁹ Ụrụrụ nya ẹlịyẹ iPita à tị́ wẹẹ tịtọ kọ ka gba kpehe la omyi ẹla ọlẹ kọ ri, ọ-ka kpa ang jẹ? ILuku, ọngọlẹ kọ da ụpwụ nya Ụkụrwọ nya Alẹrụ kpa omyi ẹla nya iGiriki ọlịịwẹ chabwọ nya ụgbọ nya enyi ọlẹ ká igbachịwụ juwa gbile  ‘kpa rụ’ ịnyịnyị. (Ụkụr. 27:15) Ọngọ jẹ́ ang u-uhye nya ịBayịbụụ yẹẹyẹẹ ọhẹ ya nyori, ụka ọlẹ ká iPita da ụpwụ nyori Olegu Ịgọgọ nyị kpa angị da ịBayịbụụ họ ụkụrwọ, ọ kpa omyi ẹla ọlẹ kọ ka kpa irya nya angịnyị ka ẹga nya ụgbọ ojuju. IPita wẹẹ ya nyori, jaabwọ ká igbachịwụ kaa tụ́ ụgbọ nya enyi tuuu ka pwụ ẹga ọlẹ kọ wẹẹ ka, ịnyịnyị Olegu Ịgọgọ à kpa angịlẹ kị da ịBayịbụụ họ ụkụrwọ lẹ. Ọngọ jẹ́ ang ọọwa myịmyị yẹkẹẹ: “Angị da ịBayịbụụ lala ụgbọ nya enyi ọlẹ kọ nwụlanọ nyọka dọmwụ nya ẹdịyẹ.” Ọọwa lẹ, iJihova à họ ụpa nyịlọmwụ lẹlẹ. Ọ ya “igbachịwụ” lee Olegu Ịgọgọ ọlẹ kị baba haa. Angị da ịBayịbụụ tị họ ụpa nyịlaa ịnyịnyị. Ị họ ụkụrwọ ba ụgbẹyị ọlẹ ká Olegu Ịgọgọ mẹjáa jẹ.

10-11. Ang imiiye iyina ahị tị́ ka họ nyọka ye ụbwọ ọdada bwu ẹga nya Olegu Ịgọgọ? Ọ-chụ pwokwita oyina à tị́ ji?

¹⁰ Ịlẹhị lẹ, iJihova á jam kpa Olegu Ịgọgọ nyamwụ da angịnyị ụbwọ nyọka da ụpwụ nya ịBayịbụụ ọhẹ-lọhẹ lẹẹlẹẹ kaka. Ma, ọ kaa kpa anchẹ nyamwụ ụ-ụgbẹyị bwula Olegu Ịgọgọ wẹẹ. IJihova kaa họ ụpa nyịlọmwụ daalẹ ịnyịnyị wẹẹ. Lẹ, ányị ahị tị́ ka họ chajị ká Olegu Ịgọgọ ka kpahị ụgbẹyị? Ahị ka maga nyọka họ ụpa nyịlọhị. Ányị ahị tị ka bwu họ ịnyị?

¹¹ Kụ irya ju ọ-chụ pwokwita ọlẹ wẹẹ. Kori ká ọngọ ju ụgbọ nya enyi á tịtọ ká igbachịwụ ka dọọ ụbwọ aalẹ, ọ ka họ ang imiiye. Họhẹ-họhẹ, ọ ka ji ụgbọ nyamwụ ahị da ka ẹga ká igbachịwụ juwa da. Ọ́ ka chịkpẹẹ ká ụgbọ nyamwụ ka juwa kpịlọmwụ rụ kịlahị myị́ ka, kori kọ ji lụrụ hwẹẹ ọ-ọnụka hi ẹga ká igbachịwụ juwa da. Oheeye, ọ baba nyọka yi ápwụ nya ụgbọ da bala ọ-wụrọọ da gbadam jaabwọ kọ chịkpẹẹ kaka ba. Ọ la gbagbịla nyori, kori ká igbachịwụ á juwa da wẹwẹ, ụgbọ ka jẹ́-ẹ jẹ kịlahị myị́ kẹnẹ-kẹnẹ kori ká igbachịwụ ọọwa á juwa da ápwụ nyamwụ yẹẹyẹẹ ịnyị. Ịnyịnyị, ahị ka jẹ́-ẹ kịnyaa juwa gbịgba ha iJihova myị́, kẹnẹ-kẹnẹ kori ká Olegu Ịgọgọ á dahị ụbwọ. Nyọka ye ụbwọ ọdada ọọwa, ahị ka họ ang imiiye ịhyẹ pyii. Họhẹ-họhẹ, ahị ka họ ụkụrwọ ịlẹ ká Olegu Ịgọgọ nya Ohe Oluhye kaa kpa anchẹ nyamwụ ụgbẹyị nyọka họ. Oheeye, ahị ka họ ụkụrwọ ịịwa la ọngịrị nyahị wuu. (Eje. 119:32) Kori kahị họ  ịnyị, Olegu Ịgọgọ ka kịnyaa juwa guhi gbaa kịlahị-ịlahị bwu ẹpwụ nya ịtụpyịpyị bala ịmayẹ. Ọ ka dahị ụbwọ nyọka kịnyaa juwa gbịgba ha iJihova gbee kahị ka pwụ odehe onyeewe.

12. Ẹlịyẹ ahị tị́ wẹẹ ka kụ ẹhị yẹ lẹẹlẹẹ?

¹² Ahị ya ẹla u-uhye nya agbẹyị imiiye ịlẹ ká Olegu Ịgọgọ kaa bwu dahị ụbwọ lẹ. Ọ kaa ya ọngịrị hahị bala ọ-dahị ụbwọ nyọka godayị giri-giri ụka nya ịmayẹ. Olegu Ịgọgọ myịmyị kaa kpahị ụgbẹyị bala ọ-dahị ụbwọ nyọka họ ụkụrwọ ịlẹ ká iJihova tịtọ kahị ka họ, kị tị ka ya ọhịhị ọmyịmyị-ka hahị ịnyịnyị. Lẹẹlẹẹ, ahị ka kụ ẹhị yẹ ang ine ịlẹ kahị ka họ nyọka ye ụbwọ ọdada bwu ẹga nya Olegu Ịgọgọ gụ ọwọwa.

13. (a) Jaabwọ ká ụpwụ nya 2 iTimoti 3:16, 17 mẹjẹ, ẹlịyẹ Ụpwụ Ịgọgọ à tị́ ka họ hahị myị́? (b) Ányị ahị tị́ baba nyọka họ pyii?

¹³ Họhẹ-họhẹ, jẹ́ ang bwu omyi ẹla nya Ohe Oluhye. (Wa 2 iTimoti 3:16, 17.) Ohe Oluhye ya irya nyamwụ ju ka ẹpwụ nya ọkịlẹtụ nya angịlẹ kọ kpa da ịBayịbụụ bwula Olegu Ịgọgọ nyamwụ. Ụka kahị wa ịBayịbụụ bala ọ-kụ irya jwoo kpori-kpori, ẹla ọmẹjẹ nya Ohe Oluhye ka juhi ka ẹpwụ nya ọkịlẹtụ bala irya nyahị. Ọọwa kaa dahị ụbwọ nyọka yẹ ọhịhị nyahị da ụ-ụgbẹyị ọlẹ kọ ka kpụ iJihova ịpyọ. (Hib. 4:12) Tị wẹẹ, nyọka ye ụbwọ ọdada bwu ẹga nya Olegu Ịgọgọ gụ ọwọwa, ahị ka hu ụka nọ nyọka wa ịBayịbụụ ụka myị́ ụka bala ọ-kụ irya jwoo kpori-kpori pyii lẹ. Ọọwa Omyi Ẹla nya Ohe Oluhye à ka jẹ́-ẹ yẹ ẹla oyaya bala abwẹla nyahị wuu da myị́ lẹlẹ.

14. (a) Ịyẹ tị́ du kahị ka jẹ́-ẹ ya nyori Olegu Ịgọgọ kaa juwa ọọjịra-jịra nyahị? (b) Ịyẹ à tị́ ka dahị ụbwọ nyọka ye apyobwuna yẹẹyẹẹ bwu ẹga nya Olegu Ịgọgọ ọọjịra-jịra nyahị?

¹⁴ Oheeye, Gbịgba ha iJihova bala angịkịla. (Eje. 22:22) Olegu Ịgọgọ nya iJihova kaa juwa ọọjịra-jịra nyahị. (Ọwụ. 2:29) Ịyẹ tị́ du kahị ka jẹ́-ẹ ya ịnyị? Chajị, ụka kahị ta awụlẹ bala aanahị ịkịla nyọka gbịgba lawụle, ahị kaa raabwọ bịlẹ Olegu Ịgọgọ, mwu eje ịlụpwụ nya eje nyahị ịlẹ kị kpụnịrọ Omyi Ẹla nya Ohe Oluhye, bala ọ-ke ụrụ wo ẹla ọmẹjẹ bwu ịBayịbụụ bwula aanahị alẹng ịlẹ ká Olegu Ịgọgọ chụ. Olegu Ịgọgọ ọọwa à kaa da aanahị anyang ụbwọ nyọka nwụla ụpa nyaa nọ bala ọ-ka họọ ịnyịnyị lẹ. Nyọka ye ụbwọ ọdada bwu ẹga nya Olegu Ịgọgọ gụ ọwọwa, ahị baba nyọka nwụlanọ chajị kahị wẹ ịtọ ẹla ọọjịra-jịra. Ụ-ụgbẹyị ọlịịwẹ, ụka kahị ka ọjịra-jịra, ahị nwụlanọ nyọka ye apyobwuna bwu ẹga nya Olegu Ịgọgọ lala ụgbọ nya enyi ọlẹ kị yi ápwụ nyamwụ da.

15. Ányị Olegu Ịgọgọ à tị́ kaa dahị ụbwọ ẹ-ẹpwụ nya ẹrụ ọnyịịla ọ-kpa pyẹ?

¹⁵ Ọhata, kpa ẹrụ ọnyịịla pyẹ. Ụka kahị kpa ịBayịbụụ ya ẹla nya Ohe ju angịnyị bala ọ-kpa mẹ ang jáa, ahị wẹẹ ya iwe da ha Olegu Ịgọgọ nyọka dahị ụbwọ ẹ-ẹpwụ nya ẹrụ ọnyịịla ọ-kpa pyẹ. (Rom. 15:18, 19) Nyọka ye ụbwọ ọdada bwu ẹga nya Olegu Ịgọgọ gụ ọwọwa, ahị baba nyọka kpa ẹrụ ọnyịịla pyẹ ụka myị́ ụka bala o-ya ẹla bwu ịBayịbụụ ụka kọ chịkpẹẹ. À ka jẹ́-ẹ ya ẹla bala angịnyị yẹẹyẹẹ myị́ ụka nya ẹrụ ọnyịịla ọ-kpa pyẹ, bwula ọ-ba ụgbẹyị ọlẹ áhị ka bwu ya ẹla jẹ ọlụpwụ ọ-kpa jẹ́ ang nyahị ọlẹ kọ ri, Ọhịhị Bala Ụkụrwọ Nyahị Ahị Angịnyị nya ỊKịrayịsị.

16. Ụgbẹyị oyina ahị tị́ ka bwu ye ụbwọ ọdada nya Olegu Ịgọgọ kpụrụrụ?

¹⁶ Ohene, raabwọ ha iJihova. (Mat. 7:7-11; Luk. 11:13) Ụgbẹyị ọlẹ ahị ka bwu ye ụbwọ ọdada nya Olegu Ịgọgọ kpụrụrụ à ri ọ-ka raabwọ bịlẹ iJihova chajị nyamwụ ẹẹ. Ịngịngịhyẹ á ka jẹ́-ẹ wu abwọ ọrịrị nyahị kpa la ọ-ka pwụ ẹga nya iJihova ka lẹ ka. Lee o-wu Olegu Ịgọgọ kpa nyọka pwụ ẹga nyahị ka lẹ ka. Olegu Ịgọgọ ka jẹ́-ẹ dahị ụbwọ kori kahị dọmwụ ju u-ube nya agba wẹwẹ. Olegu Onyobyi á ka jẹ́-ẹ wuhi kpa la ọ-ka ye Olegu Ịgọgọ myị́ ka lẹ ka. (Jem. 1:17) Ányị ahị tị́ ka bwu raabwọ chajị kahị ka ye ụbwọ ọdada bwu ẹga nya Olegu Ịgọgọ gụ ọwọwa? Nyọka wẹ ịtọ ẹla ọwẹ, ahị jẹ́  ang u-uhye nya oja ọ-chụ pwokwita nya abwọ ọrịrị ọlẹ kọ juwa ụ-ụpwụ nya iLuku kem wẹẹ. *

17. Ẹlịyẹ ahị tị́ ka jẹ́ u-uhye nya abwọ ọrịrị bwu oja ọ-chụ pwokwita nya iJisọsị ọlụpwụ nya iLuku 11:5-9, 13?

¹⁷ Wa iLuku 11:5-9, 13. Oja ọ-chụ pwokwita nya iJisọsị mẹjẹ́ẹhị jaabwọ ahị ka bwu raabwọ bịlẹ Olegu Ịgọgọ. Ẹ-ẹpwụ nya oja ọwẹ, ọlẹng ọwẹ ye ang ọlẹ kọ tịtọ chajị nyọlẹ kọ “juwa bịlẹ kịlahị-ịlahị.” Ọ́ ju oyoyi nyọka bịlẹ oligu nyamwụ ang ka, nanana nyori o-ri alepwodu lẹ. (Luk. 11:8) Ẹlịyẹ oja ọwẹ à tị́ mẹjẹ ẹ-ẹga nya abwọ ọrịrị ká iJisọsị ya? Ọ yẹkẹẹ: ‘Anụ juwa bịlẹ ang ka ẹpwụtụbwọ nya Ohe Oluhye mẹ! Ọ ka ya ang ọọwa hanụ. Anụ juwa tịtọ nya ang ka ẹpwụtụbwọ nya Ohe Oluhye mẹ! Ọ ka họ kanụ ka yẹ ang ọọwa. Anụ yụbwọ kpụ ọnụ ụgbẹyị ịnyịnyịịnyị mẹ! Ohe Oluhye ka wụrụ ụgbẹyị ọọwa hanụ ịnyịnyị.’ Lẹ, ẹlịyẹ ahị tị́ ka jẹ́? Nyọka ye ụbwo ọdada bwu ẹga nya Olegu Ịgọgọ, ahị ka kịnyaa juwa raabwọ bịlẹ chajị nyamwụ pyii lẹ.

18. Jaabwọ ká oja ọ-chụ pwokwita nya iJisọsị mẹjẹ, ịyẹ tị́ du kahị jẹ́ myị̀myị̀ nyori iJihova ka ya Olegu Ịgọgọ nyamwụ hahị?

¹⁸ Oja ọ-chụ pwokwita ọwẹ dahị ụbwọ nyọka jẹ́ ang odudu ọlẹ ká iJihova ka ya Olegu Ịgọgọ nyamwụ hahị ịnyịnyị. Ọlẹng ọla oja ọwẹ tịtọ nyọka kpahị ju ọngga nyamwụ yẹẹyẹẹ. Ọ yẹ nyori ọ baba nyọka ya ang oriri ha oligu nyamwụ ọlẹ kọ jwoo ụga lodu, ma ọ́ tị la ang oriri ọhẹ-lọhẹ juwa ka. IJisọsị ya nyori, ọngọ-lẹpwa ọwẹ nyị ya ịkaa ha ọlẹng ọwẹ chajị nyọlẹ kọ kịnyaa juwa bịlẹ. Ẹlịyẹ iJisọsị à tị́ wẹẹ tịtọ kọ ka mẹjẹ? Kori ká ọngịnyị ehe ọlẹ kọ la kpẹẹkpẹẹ ka, á jẹ́ da ọngọkịla nyamwụ ọlẹ kọ kịnyaa juwa bịlọọ ang ụbwọ lẹ aalẹ, ahị ka lahị ọdahile nyori Adahị ọlọnahị olepwoohe ka da angịlẹ kị kịnyaa juwa bịlẹ Olegu Ịgọgọ ụbwọ. Lẹ, ahị ka jẹ́ myị̀myị̀ nyori, iJihova ka wẹ abwọ ọrịrị nyahị ụka kahị raabwọ bịlẹ Olegu Ịgọgọ nyamwụ.—Eje. 10:17; 66:19.

19. Ịyẹ tị́ du kahị ka lahị ọdahile nyori ahị ka kụrụ myị́?

¹⁹ Nanana nyori Olegu Onyobyi kaa kịnyaa juwa tụụhị pyịpyị, ahị ka lahị ọdahile nyori ahị ka kụrụ myị́. Ịyẹ tị́ du? Chajị Olegu Ịgọgọ kaa dahị ụbwọ a-agbẹyị imiiye. Ọhọhẹ, ọ kaa ya ọngịrị hahị nyọka bọhụ ẹ-ẹpwụ nya ịmayẹ. Oheeye, Ọ ri ọngịrị ọlẹ kọ kaa dahị ụbwọ nyọka kịnyaa juwa gbịgba ha iJihova gbee kahị ka pwụ odehe onyeewe. Lẹ, ahị cheje bwu ẹpwụ nya ọkịlẹtụ nyahị nyọka ye ụbwo ọdada bwu ẹga nya Olegu Ịgọgọ gụ ọwọwa mẹ!