1. Ányị ahị tịị yé apyobwuna ụka kahị joja u-uhye nya abwọlẹ kahị bwu wẹ ka jẹ́ “ẹlịlẹhị”?

 “ÁNYỊ a tị́ bwu wẹ ka jẹ́ ẹlịlẹhị?” À ka wẹ ịtọ ẹla ọwẹ lụka lụmẹ-lụmẹ myị́ lẹ. Ọ ri ịtọ ẹla ọhọhẹ lẹpwụ nya ịlẹ kahị kaa tọ aanahị ụka kahị ja tịtọ nyọka jáa gụ ọọwa. Ọ kaa háahị nyọka wo jaabwọ ká aanahị wẹ ka jẹ́ iJihova bala ọ-la ọháha họọ, ọ tịị kpụhị ịpyọ ịnyịnyị nyọka ya ang odudu ọlẹ kọ háahị nyọka ri ọngọhẹ nya Alibeenu nya iJihova jaa. (Rom. 1:11) Oja ịlịịwẹ kaa dahị ụbwọ ịnyịnyị nyọka kịnyaa la ọ-kụ irya u-uhye nya abwọlẹ kọ háahị kaka ba nyọka ri ọngọhẹ nya Alibeenu nya iJihova. Myịmyị, ahị kaa cheje bwu ọkịlẹtụ nyahị gụ ọọwa nyọka “hịhị ba ẹla nya ịlẹhị jẹ.” Ọọwa ri ọ-ka kịnyaa la ọ-hịhị ụ-ụgbẹyị ọlẹ kọ ka kpụ iJihova ịpyọ kahị tị ka yé ahị ọwawa bwu ẹga nyamwụ ịnyịnyị.—3 Jọn. 4.

2. Ẹlịyẹ ahị tị wẹẹ ka kụ ẹhị yẹ a-ang ọjẹ́jẹ ọlẹ?

² Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ang ịhỵe ịlẹ kị du ká ẹlịlẹhị háahị. Ọọwa lẹ, ahị ka myịmyị-ị̀ yẹ abwọlẹ kahị ka bwu kịnyaa la ọ-mẹjẹ nyori āhị ọnyịịla-ọnyịịla ọwẹ háahị lẹlẹ. Ọ la gbagbịla nyori ẹhị ọ-da wụlẹ ẹla ọwẹ ka du kọ ka myịhị lẹhị gụ ọọwa nyọlẹ ká iJihova tụ́ụhị ba ẹlịlẹhị. (Jọn. 6:44) Ọ ka myịmyị-ị̀ ju irya nyahị ọngịrị nyọka mẹ ẹlịlẹhị ọla ịBayịbụụ je angịkịla.

3. Ịyẹ à tị ri ang ọkpọnchị ọlẹ kọ du ká ẹlịlẹhị háahị?

³ Ẹlịlẹhị háahị chajị nya ang lụmẹ-lụmẹ. Ang ọkpọnchị ọhẹ lẹpwụ nya ang ịịwa tị ri, iJihova Ohe Oluhye ọngọlẹ kọ la ẹlịlẹhị ọwẹ háahị. Bwula ịBayịbụụ ko ri Omyi Ẹla nyamwụ, ahị wẹ ka jọ́ọ nyori ọ́ ri ọngọ la ọngịrị gụgụ wuu ọlẹ kọ Họ epwoohe  bala odehe kem ka, ma ọ ri Adahị olepwoohe ọ-la ọháha ọlẹ kọ kaa kpẹhị rịrịịhị la ọdụmwọọ. (1 Pit. 5:7) Ahị jẹ́ nyori Ohe nyahị ri “ọlahyẹẹrwẹrwa bala ọlọnahị ọlẹ kọọ ju agbama hyaa ka, kọ la ọháha o-gbu enyi-ka bala o-ju ọdahịhile.” (Ehe. 34:6) Eje ọ-la kpakpa há iJihova. (Ayị. 61:8) Ọ kaa tọọ olujwo nyọka yẹhị juwa yẹ akama, ọ tị nwụlanọ bala ọ-charịnya nyọka myị́ akama nyahị wuu lụka ọlẹ kọ hu nọ. (Jer. 29:11) Ahị ịnyịnyị wẹẹ yẹhị rịrị gbe ụka ọkpịpyọ-kpịpyọ ọọwa! Ọwẹ ri ọhẹ lẹpwụ nya ang ịlẹ kị du ká iJihova háahị yẹẹyẹẹ!

4-5. Ịyẹ tị́ du ká ọlẹrụ ịPọlụ chụ ẹhị ọrịrịị-rịrị nyahị ka pwoku ang o-wu ụgbọ nya enyi kpa?

⁴ Ịyẹ à tị́ ri ang ọkịla ọlẹ kọ du ká ẹlịlẹhị háahị? Ahị kaa yé apyobwuna lụmẹ-lụmẹ bwu ẹpwụ nyamwụ. Kụ ẹhị yẹ ọ-chụ pwokwita ọhẹ lẹẹ wẹẹ. Ẹhị ọrịrịị-rịrị nya ijuju ọnyịịla juwa ẹ-ẹpwụ nya ẹlịlẹhị ịla ịBayịbụụ. Nyọka họ kahị ka jẹ́ jaabwọ ká ẹhị ọrịrịị-rịrị ọwẹ ju apyobwuna kaka ba, ọlẹrụ ịPọlụ da ụpwụ yẹkẹẹ: “Ẹhị ọrịrịị-rịrị ọnyịịla ọọwa kpangga, a ri ang o-wu ugbodu okpukpuru nyahị kpa giri-giri ẹ-ẹpwụ nya ọ-jẹ́ myịmyị ọlala nyahị lẹ.” (Hib. 6:19) Jaabwọ ká ang o-wu ụgbọ nya enyi kpa kaa du kọ ka jẹ kele-kele u-uhye nya enyi ka, ịnyịnyị ẹhị ọrịrịị-rịrị ọlẹ kahị la bwu ịBayịbụụ à ka jẹ́-ẹ dahị ụbwọ godayị kpọọ ụka kahị la akama lẹ.

⁵ Ẹ-ẹga ọwẹ, ịPọlụ wẹẹ ya ẹla rụ́ ẹhị ọrịrịị-rịrị nyọka ka epwoohe ọlẹ ká angịnyị nya ịKịrayịsị ịlẹ ká Ohe ya ida wụ́ la. Ma ẹla oyaya nyamwụ ọwẹ tị gu angịlẹ kị wẹẹ yẹhị rịrị nyọka hịhị gboyi myị́ oyi ị-ịparadayịsị ám̀ odehe ọlẹ ịnyịnyị. (Jọn. 3:16) Ẹlịlẹhị ri, ang ọjẹ́jẹ u-uhye nya ẹhị ọrịrịị-rịrị nya ọhịhị ọmyịmyị-ka du ká ọhịhị nyahị la etu.

6-7. Ányị Yvonne à tị́ yé apyobwuna bwu ẹlịlẹhị ọjẹ́jẹ u-uhye nya ijuju?

⁶ Kụ ẹhị yẹ oja nya ọọnahị ọnyang ọhẹ ká ẹnyị nyamwụ ri Yvonne wẹẹ. Ị kpọọ nwà ugbiyegu ọlẹ ká alụwa ri Alibeenu nya iJihova ka, ọ tị kaa juhi nya igu ụka ko ri onjwo. Ọ kpịtịya nya ẹla ọhẹ kọ wa kọ tị kaa deeri nyamwụ myị́ ka: “Ahị wuu kpa uri nya igu.” Ọ yẹkẹẹ: “Ẹlẹwẹ du kam kaa kụ irya u-uhye nya ijuju la ọ-kpa une ka ẹhị lepwodu ka. M̀ kaa kụ irya nya ang odudu kahị-ị́ ri ehe tata ka kahị tị kaa gbu. ‘Ịyẹ tị́ du kahị jam ẹ-ẹgẹlẹ?’ Ḿ tịtọ kam ka gbu ka!”

⁷ Nyọlẹ kọ nọ chẹẹ ká Yvonne nwà ka ri ọyẹẹnọ, ọ gba chị Alibeenu nya iJihova ịhyẹ. Ọ yẹkẹẹ: “M̀ dọmwụ nyọka myị nyori m̀ ka jẹ́-ẹ la ẹhị ọrịrịị-rịrị nyọka hịhị ị-ịParadayịsị gboyi myị́ oyi ám̀ odehe ọlẹ.” Ányị ọọnahị ọwẹ à tị́ yé apyobwuna bwu ẹlịlẹhị ọjẹ́jẹ? Ọ myịmyị yẹkẹẹ: “Ḿ kaa chuko u-uhye nya ijuju lee igu la ọ-kpa une ka ẹhị lepwodu ka lẹ kaka.” Ọ la gbagbịla nyori ẹlịlẹhị ịla ịBayịbụụ há Yvonne, ọ tịị kpọọ ịpyọ yẹẹyẹẹ nyọka mẹ ẹhị ọrịrịị-rịrị nya ijuju ọnyịịla ọlẹ kọ la jẹ angịkịla.—1 Tim. 4:16.

8-9. (a) Ẹ-ẹpwụ nya oja ọkpịta nya iJisọsị ọhẹ, ányị ang-ụdụ ọlẹ ká ọlẹng ọhẹ yé à tị́ jwoo apyobwuna ka ba? (b) Ányị ẹlịlẹhị à tị́ jung apyobwuna kaka ba?

⁸ Oja ọnyịịla u-uhye nya Ịpyị-Adịrahụ nya Ohe juwa ẹ-ẹpwụ nya ẹlịlẹhị ịla ịBayịbụụ ịnyịnyị. IJisọsị chụ ẹlịlẹhị chajị nya Ịpyị-Adịrahụ ọọwa ka pwoku ang-ụdụ ọlẹ kọ kpịbaa. Ụ-ụpwụ nya ịMatiyu 13:44, iJisọsị yẹkẹẹ: “Ịpyị-adịrahụ nya epwoohe lala ụdụ ọlẹ kọ kpịbaa ẹ-ẹpwụ nya ẹrụ ọhẹ. Ọlẹ ká ọlẹng ọhẹ kele kaka ye ụdụ ọlẹpwụ ẹrụ ọọwa, kọ myịmyị tụ ọpyị kụrụ ụdụ ọọwa kpịrẹ-kpịrẹ. Ọọwa lẹ, ọ rụ kele ka ẹpwa kaka go ang myị́ ang nyamwụ ịlẹ kọ la wuu ra lẹ, ọ kpa okpoko ọọwa kele kaka ra ẹrụ ọọwa lẹlẹ.” Ahị yẹ wẹ nyori ọlẹng ọọwa á juwa pịlahị nya ang-ụdụ ọwẹ ka. Ma ụka ọlẹ kọ tị yóo, ọ tụụbwọ hi ang lụmẹ-lụmẹ chajị kọ ka jẹ́-ẹ lọọ. Ọ dọmwụ go  ang myị́ ang nyamwụ ịlẹ kọ la wuu ra. Ịyẹ tị́ du? Chajị ọ jẹ́ nyori ang-ụdụ ọwẹ nyị ju apyobwuna yẹẹyẹẹ. Ọ kpịnya lụmẹ gụ́ ịngịngịhyẹ ọlẹ kọ tụụbwọ hi.

⁹ Ịnyị ahụ à yẹ ẹlịlẹhị lẹ? Ọ la gbagbịla nyori ịnyị ọ lang lẹ! Ahị jẹ́ nyori ịngịngịhyẹ odehe ọlẹ á ka jẹ́-ẹ há lala ọkẹkẹnị ọlẹ kahị kaa yé ẹ-ẹpwụ nya ịgba ọgbagba nya iJihova lẹẹlẹẹ bala ẹhị ọrịrịị-rịrị nya ọhịhị ọmyịmyị-ka e-ekpeleji nya Ịpyị-Adịrahụ nya Ohe ị-ịlahị kaka. Iwe ọlẹ kahị la nyọka ri oligu bala iJihova la apatabwọ kiwa-ka ju apyobwuna gụ́ ịngịngịhyẹ ọlẹ kahị ka tụụbwọ hi. Ọkẹkẹnị nyahị ọlẹ kọ tị gụgụ wuu ri ọ-ka “la ụma nya ọhịhị ọchịla-chịla ọlẹ kọ kaa kpụ Ọngọlahị Ohe Oluhye ayịdang ịpyọ yẹẹyẹẹ.”—Kol. 1:10.

10-11. Ịyẹ à tị́ gu Michael gbịla nyọka yẹ ọhịhị nyamwụ da ụ-ụgbẹyị ọkpọnchị?

¹⁰ Iru nyahị tụụbwọ hi ang lụmẹ-lụmẹ chajị nyọka họ ẹla kpụ iJihova ịpyọ lẹ. Angịhyẹ ba la ọ-ka ebe-apwụ ịgbẹgbịlẹ nya odehe. Angịkịla hwabwọ la ọ-maga nyọka kpụdụ. Angịkịla tị myịmyị yẹ ọhịhị nyaa da gbanggbang ụka ọlẹ kị jẹ́ ang u-uhye nya iJihova. Ịnyị Michael à họ lẹ. Ị́ kpọọ nwà ẹ-ẹpwụ nya ẹlịlẹhị ka. Ụka ko ri okolobya, ị mẹ ang jọ́ọ u-uhye nya uya ọ-mama. O yẹkẹẹ: “Ọ baba ham yẹẹyẹẹ nyọka la ịnyịrọ ogogo ụka wuu. Ụka ọhẹ, ọ kaa lam lala o-ri ọngọhẹ nyị́ ka họm abwọhẹ myị́ ka.” Ma nyọlẹ ká Michael dọmwụ nyọka jẹ́ ịBayịbụụ, ọ yẹ jaabwọ ká ẹla nya abwẹga la iJihova. (Eje. 11:5) Michael ya ẹla u-uhye nya ahụ bala ọrụ ịlẹ kị mẹ ịBayịbụụ jọ́ọ yẹkẹẹ: “Ị́ byim ẹnẹnẹhẹ nyori am nyị hwabwọ la ẹla nya uya mẹ ka; ị kịnyaa la ọ-mẹ ẹlịlẹhị ịla ịBayịbụụ jẹ́m kem.”

¹¹ Jaabwọ ká Michael wẹẹ jẹ́ ang u-uhye nya iJihova, ịnyịnyị ọháha ọlẹ kọ la ẹ-ẹga Nyamwụ à kịnyaa la ọ-nwà gụ ọọwa lẹ. Ahyẹẹrwẹrwa ọlẹ ká iJihova la ẹ-ẹga nya angịnyị nyamwụ à gwoo o-olegu gụgụ wuu ẹẹ. Nyọlẹ kọ nọ pyịnyẹng, Michael yẹ nyori ọ baba nyọka cheje ọlẹ kọ ka yẹ ọhịhị nyamwụ da. O yẹkẹẹ: “M̀ jẹ́ nyori ọ-hwabwọ la ẹla nya uya à ka ri ang olujwo gụgụ wuu kam ka họ ẹẹ. Ma m̀ jẹ́ nyori ọ ka kpụ iJihova ịpyọ, m̀ tị jẹ́ myị̀myị̀ ịnyịnyị nyori ọ-gbịgba ha iJihova ju apyobwuna gụ ịngịngịhyẹ ọlẹ kam tụụbwọ hi.” Michael jẹ́ nyori ẹlịlẹhị ọlẹ kọ yé wẹ kpịnya lụmẹ, ịnyị à dudu kọ nwụlanọ nyọka yẹ ọhịhị nyamwụ da ụ-ụgbẹyị ọkpọnchị lẹ.—Jem. 1:25.

12-13. Ányị ẹlịlẹhị ịla ịBayịbụụ à tị́ da Mayli ụbwọ?

¹² ỊBayịbụụ chụ ẹlịlẹhị ka pwoku otinika ọlẹ kọ juwa hụ́ ahịgboo ẹ-ẹpwụ nya ukpowu nyọka mẹjẹ jaabwọ ká ẹlịlẹhị ju apyobwuna kaka ba. (Eje. 119:105; Efe. 5:8) Ụbwọ ọdada ọlẹ ká Mayli bwu Azerbaijan yé bwu Omyi Ẹla nya Ohe myọọ lẹhị yẹẹyẹẹ. Adamwụ bala ịnamwụ á la ọmyịmyị ụma okpokpo ka. Adamwụ ri ọngọhẹ nya Angị Kpeteji, ịnamwụ tị ri ala iJuu. O yẹkẹẹ: “Ịlẹhị lẹ, ḿ la ịwẹẹ ọdada nyori Ohe-é ji ka ẹnẹnẹhẹ lẹka, ma m̀ la ịtọ ẹla lụmẹ-lụmẹ. M̀ kaa kụ irya, ‘Ịyẹ tị́ du ká Ohe họ angịnyị ehe? Ịyẹ tị́ du ká ọngịnyị ka yẹ akama gbee ẹ-ẹpwụ nya ọhịhị nyamwụ kị ka myịmyị-ị̀ yọọ akama ọkịla o-obwila gboyi myị́ oyi?’ Nyọlẹ ká angịnyị kaa ya nyori ang myị́ ang ọlẹ kọ họ nyị ri irya nya Ohe wẹẹ, m̀ kaa kụ irya nyori, ‘Ohe à kaa kpa angịnyị họ ang myị́ ang wuu bala ọ-kpọọ ịpyọ nyọka yẹ angịnyị juwa yẹ akama lẹ?’ ”

¹³ Mayli kịnyaa la ọ-mwahị nya ọwẹwẹ nya ịtọ ẹla nyamwụ. Ọ ka nọ chẹẹ, ọ myọnụ nyọka jẹ́ ịBayịbụụ bala ọ-wẹ ka ri ọngọhẹ nya Alibeenu nya iJihova. O yẹkẹẹ: “Ẹla ọmẹjẹ ọkpẹẹkpẹẹ ịla ịBayịbụụ dam ụbwọ nyọka yé ọkẹkẹnị ẹ-ẹpwụ nya ọhịhị nyam. Ẹla ọdawụlẹ ọgbagbịla ịlẹ kam jẹ́ bwu Omyi Ẹla nya Ohe ya okpunyi nya ọkịlẹtụ ham.” Lala Mayli, ahị wuu kaa yogbo ha iJihova, “Ọngọlẹ kọ  [gbahị] kpehe bwu ẹpwụ nya ukpowu . . . kaka ju ka ẹpwụ nya ahịgboo ọlẹbyẹbyị nyamwụ.”—1 Pit. 2:9.

14. Ányị ahị tị́ ka họ ká ọháha nyahị ẹ-ẹga nya ẹlịlẹhị ka la ọngịrị gụ ọọwa? (Yẹ akpa ọlẹ ko ri, “ Ọ-chụ Pwokwita Ịkịla.”)

¹⁴ Oja ịmanyị-ịmanyị ịlẹ kị mẹjẹ jaabwọ ká ẹlịlẹhị ju apyobwuna kaka ba à wẹ lẹ. Ọ chịkpẹẹ nyori à dọmwụ ka jẹ́ ịkịla lụmẹ-lụmẹ myị́. À ka jẹ́-ẹ hu ụka nọ nyọka jẹ́ ang u-uhye nya ang ịkịla ịlẹ kị du ká ẹlịlẹhị chịla nyọka háahị myị́? Jaabwọ ká ẹlịlẹhị wẹẹ háahị gụ ọọwa, ịnyịnyị ahị kaa mwahị nya agbẹyị ịkịla ịlẹ kahị ka bwu mẹ ọháha ọọwa jẹ gụ ọọwa lẹ.

15. Ụgbẹyị oyina ahị tị́ ka bwu mẹjẹ nyori ẹlịlẹhị háahị?

¹⁵ Ahị ka mẹjẹ nyori ẹlịlẹhị háahị bwula ọ-jẹ́ ịBayịbụụ bala apwụ ị-da ịBayịbụụ wụlẹ ụka myị́ ụka. Chajị jaabwọ myị́ abwọ kahị ri anchẹ nya iJihova tata ka ba wẹwẹ, ang inyeewe kaa ji kahị ka jẹ́ pyii. Ụpwụ nya Ẹpwang ọ-Kụ Gbeji ọhọhẹ-họhẹ yẹkẹẹ: “Ịnịịkịla ilodehe ọlẹ lụmẹ kpọrịkọọ dudu kọ kaa lujwo nyọka jẹ́ ẹlịlẹhị datị. À ka kụ kee nyọka yóo. . . . À ka maga nyịlẹhị-ịlẹhị nyọka lọọ. Ẹlịlẹhị okpokpo ọlẹ ka yé wẹ, a nwang ba ụ-ụwa ka. . . . Maga ụka myị́ ụka nyọka yé ẹlịlẹhị ịla ịBayịbụụ gụ ọọwa.”  Ang ọjẹ́jẹ ri ụkụrwọ ọtụka, ọ tị ju apyobwuna yẹẹyẹẹ ịnyịnyị.

16. Ụgbẹyị oyina à tị́ kaa háng ahụ gụ nyọka kpa jẹ́ ang? (Etu 2:4-6)

¹⁶ Ọ́ng myị́ ọng nyahị wuu ọ kaa kpụ ịpyọ nyọka wa ụpwụ bala ọ-jẹ́ ang ka. Ma iJihova tị byihi nyori ahị nyị “juwa pịlahị” bala o-juwa “tịtọ,” chajị kahị ka jẹ́ ẹlịlẹhị gụ ọọwa. (Wa Etu 2:4-6.) Ụka kahị maga ụ-ụgbẹyị ọlịnyị, ahị kaa yé apyobwuna pyii lẹ. Corey ya ẹla u-uhye nya ịBayịbụụ ọwawa nyịlọmwụ nyori, ọwa nyị kaa yẹhị ku ọgba okpokpo kem lụka-ụka. O yẹkẹẹ: “M̀ kaa wa ẹla ọdawụlẹ oleji ọnyị myị́ ọnyị, kụ ẹhị yẹ ịBayịbụụ ịkịla ịlẹ wuu kị dụbwọ ka ọgba ọọwa, bala ọ-mwahị nya ẹla ịkịla u-uhye nyamwụ. . . . Ụgbẹyị ọlịịwẹ dam ụbwọ nyọka jẹ́ ang lụmẹ-lụmẹ!” Kori kahị kpa ụgbẹyị ụma ọwẹ lee ọkịla wẹwẹ, ahị kaa mẹjẹ nyori ẹlịlẹhị juhi apyobwuna ụka kahị kpa ụka bala ọngịrị nyahị jọ́ọ.—Eje. 1:1-3.

17. Ịyẹ à tị́ ri etu nyọka hịhị ba ẹlịlẹhị jẹ? (IJemsi 1:25)

¹⁷ Ahị tị jẹ́ ịnyịnyị nyori ọ́ nwà nyọka jẹ́ ang u-uhye nya ẹlịlẹhị ịịwẹ kem ka. Nyọka yé apyobwuna yẹẹyẹẹ, ahị ka hịhị ba ẹlịlẹhị jẹ pyii, ọọwa ri ọ-ka kpa ẹla ọlẹ kahị jẹ́ họ ụkụrwọ ọ-ọhịhị nyahị. Ọọwa ẹlịlẹhị à ka jẹ́-ẹ ya ọkẹkẹnị nyịlẹhị hahị wẹẹ lẹ. (Wa iJemsi 1:25.) Ányị ahị tị́ ka bwu jẹ́ myị̀myị̀ nyori ahị juwa hịhị ba ẹlịlẹhị jẹ? Ọọnahị ọlẹng ọhẹ gba irya kpehe nyori ahị nyị kụ ẹhị yẹ ọhịhị nyahị nyọka jẹ́ kori kahị juwa kpa ang ịlẹ kahị jẹ́ họ ụkụrwọ bala ẹga ọlẹ kahị baba nyọka họ ịnyị gụ ọọwa. Ọlẹrụ ịPọlụ yẹkẹẹ: “Ahị cheri kahị juwa yụbwọ chị ang ọnyịịla ọlẹ kahị la ene lẹ, kpa ụ-ụwa gogo, juwa kpa họ ụkụrwọ pyịyọọ mẹ.”—Filip. 3:16.

18. Ịyẹ tị́ du kahị kaa maga yẹẹyẹẹ nyọka “hịhị ba ẹla nya ịlẹhị jẹ”?

¹⁸ Kụ irya u-uhye nya apyobwuna ịlẹ kahị kaa yé bwula ọ-maga yẹẹyẹẹ nyọka “hịhị ba ẹla nya ịlẹhị jẹ” wẹẹ! Ọọ họ ká ọhịhị nyahị ka há gụ ọọwa. Ahị myịmyị kaa kpa ọkẹkẹnị wẹ iJihova bala aanahị ịkịla. (Etu 27:11; 3 Jọn. 4) Ẹlịlẹhị ri, ang ịnyịịla-ịnyịịla ịlẹ kị ka du ká ẹlịlẹhị ka háahị bala ọ-ka hịhị ba ẹlịlẹhị jẹ, à wẹ lẹ!