1. Ịyẹ tị́ du ká iJisọsị bịlẹ iJihova nyọka kpẹhị rịrị angịlẹ kị kaa bọọ jẹ?

 LA OBYI nya ahyẹẹnụ ohyẹẹkpẹ ene ká iJisọsị ka gbu, ọ bịlẹ ịngịhyẹ ọkpọnchị bwu ẹga nya Adamwụ olepwoohe. Ọ bịlẹ iJihova kọ ka kpẹhị rịrị angịjụgbẹyị nyamwụ. (Jọn. 17:15, 20) Ẹlịlẹhị tị dọmwụ ri, iJihova kaa kpẹhị rịrị angịnyị nyamwụ, kaa kpahị jwaa bala ọ-chị ewu kaa ụka wuu. Ma, iJisọsị jẹ́ nyori angị bọọ jẹ nyị ka la ọtụpyịpyị ọnyọọngịrị bwu ẹga nya Olegu Onyobyi. IJisọsị jẹ́ ịnyịnyị nyori ị ka baba nya ụbwọ ọdada nya iJihova nyọka jẹ́-ẹ la ọkụrụ-kụrụ ẹ-ẹpwụ nya akama ịnyịịngịrị ịlẹ ká Olegu Onyobyi ka kpa wẹ ẹga nyaa.

2. Jaabwọ ká Eje Ọnyịịla 33:18-20 ya, ịyẹ tị́ du kahị baba nyọka ju uhi nya ịmayẹ ka?

² Odehe nya Olegu Onyobyi ọlẹ kaa kpa akama lụmẹ-lụmẹ wẹ angịlẹ kị ri angịnyị nya ịKịrayịsị nya ịlẹhị alẹ. Ahị kaa la akama ịlẹ kị ka kpụhị ọkịlẹtụ enyi bala ọ-dọmwụ ma ogodayị giri-giri nyahị ha iJihova yẹ. Ma jaabwọ kahị wẹẹ ka yẹ ẹ-ẹpwụ nya ang ọjẹ́jẹ ọlẹ, áhị la ịngịhyẹ ka juhi ka. IJihova wẹẹ kpẹhị rịrịịhị, akama ịlẹ kahị kaa yẹ wuu á kpịbaa hi ẹhị nyamwụ ka, ọ tị nwụlanọ ụka wuu nyọka dahị ụbwọ bọhụ ẹ-ẹpwụ nyaa. Ahị kụ ẹhị yẹ ọ-chụ pwokwita imiiye ịhyẹ bwu ịBayịbụụ ịlẹ kị mẹjẹ nyori iJihova kaa “kpẹhị rịrị angịlẹ kị ju uhi nyamwụ” wẹẹ.—Wa Eje Ọnyịịla 33:18-20.

3. Ụka ọlanyị ahị tị́ ka la ịlọhị nwee myị́?

³ Ịlẹhị lẹ, ahị la aanịna alẹng bala anyang lụmẹ-lụmẹ ẹ-ẹpwụ nya ọjịra-jịra, ahị tị kaa la ịlọhị nwee ụka ọhẹ. Ọ-chụ pwokwita, anjwo ka la ịlaa nwee ụka kị ja ya ẹla u-uhye nya ang ọlẹ kị myị la je ala ịkịlasị nyaa uube-ụpwụ lee ụka kị ja mwụ́ ka ọjịra-jịra onyeewe myị́. Ọ ka jụ angịhyẹ nyahị lee ọ-dọmwụ la ọkịlẹtụ ọ-kpụ enyi, chajị ahị ka me irya nyori ahị la ịlọhị nya-à wẹẹ ka  ma uya ọwẹ kem lẹ myị́. Ahị ka họ atịmẹ la ọ-ka ya irya nyahị je angịkịla myị́ chajị ahị chuko nyori ị́ ka jẹ́ jaabwọ kọ lahị ka. Ụka ọhẹ tị ịnyịnyị, ọ kaa lahị lala o-ri ọngọhẹ nyị́ dọmwụ kpahị juhi ka. Ụka kahị la ịlọhị nwee chajị nya ịngịngịhyẹ, ọngịrị kaa gụụhị myị́ bala uko ọ-kaa chịhị. IJihova á tịtọ kọ ka lahị ịnyị ẹnẹnẹhẹ ka. Ịyẹ tị́ du kahị ka jẹ́-ẹ ya ịnyị?

4. Ịyẹ tị́ du ká ọlọmwụ Ịlayịja ya nyori: “Am ụbwọọm kẹnẹ-kẹnẹ à hi lẹẹ lẹlẹ”?

⁴ Kụ irya nya Ịlayịja kọ ri ọngọ la ọmyịmyị wẹẹ. IJesebẹlụ cheje lọngịrị-ọngịrị nyọka nwọọ, lẹ ọ wẹẹ rụnyẹ nya ọhịhị nyamwụ gụ́ ahyẹẹnụ 40 myị́ lẹ. (1 Ịdị. 19:1-9) Ụka ohyẹẹkpẹ kọ juwa ụgbụ ọhẹ ụbwọomwụ, o jida ju iJihova yẹkẹẹ: “Am ụbwọm kẹnẹ-kẹnẹ à [ri ọlọmwụ ọlẹ kọ] hi lẹẹ lẹlẹ.” (1 Ịdị. 19:10) Alọmwụ ịkịla juwa ọ-ọpyị ọwẹ. Obadaya maga kpụ ọ chị alọmwụ 100 da bwu ụbwọ nya iJesebẹlụ ọlẹ kọ tịtọ nyọka nwaa. (1 Ịdị. 18:7, 13) Ịyẹ tị́ tịtị du ká Ịlayịja la ịlọmwụ nwee ịịwẹ? O me nyori alọmwụ ịlẹ ká Obadaya chịda wuu nyị gbu lẹẹlẹẹ lẹ ịnyị? Ọlẹ ká angịkịla á yẹ julọọ gbịgba ha iJihova ka, nanana nyọlẹ ká iJihova mẹjẹ nyori ọwa-à ri Ohe nyịlẹhị lẹ, à du kọ la ịlọmwụ nwee lẹ? Ọ lọọ lala o-ri ọngọhẹ nyị́ jẹ́ ẹla ọ-la uhi-uhi ọlẹ kọ ji ẹpwụ nyamwụ ka, lẹẹ ọ tị́ kụ irya nyori akama nyọwa nyị́ ri ẹla nya ọngọhẹ ka ịnyị? ỊBayịbụụ á ya ang odudu kpangga kọ la Ịlayịja ịịwẹ ka. Ma ẹla ọlẹ kahị jẹ́ myị̀myị̀ ri iJihova jẹ́ ang odudu kọ la Ịlayịja ịịwẹ bala o-ri Ọ jẹ́ jaabwọ kọ ka bwu dọọ ụbwọ kpangga.

5. Ányị iJihova à tị́ họ ká Ịlayịja jẹ́ myị̀myị̀ nyori ọ́ la ụbwọọmwụ ka?

⁵ IJihova da Ịlayịja ụbwọ a-agbẹyị lụmẹ-lụmẹ. O ju Ịlayịja ọhụ nyọka ya ẹla. Ọ tọ Ịlayịja wo ụka imimiiye yẹkẹẹ: “Ịyẹ ā tịị họ ẹgẹlẹ?” (1 Ịdị. 19:9, 13) IJihova tị kaa ke ụrụ ụka ká Ịlayịja á ka ya ẹla ọla ọkịlẹtụ nyamwụ. IJihova wa Ịlayịja ẹla bwula ọ-ya ijata ojiji bala ọngịrị ọtụka nyamwụ chehe mẹjọ́ọ. Ọ myị́myị họ ká Ịlayịja jẹ́ myị̀myị̀ nyori angịkịla juwa ịlẹ kị kaa gbịgba ha Ohe wẹẹ. (1 Ịdị. 19:11, 12, 18) Ịwẹẹ ọdada á juwa ka, ọhụ ka pwọ Ịlayịja kpuru nyọlẹ kọ ya ẹla ọla ọkịlẹtụ nyamwụ je iJihova bala o-wo ọwẹwẹ nyamwụ ịnyịnyị. IJihova ya akụrwọ i-ju apyobwuna lụmẹ-lụmẹ ha Ịlayịja. O byoo nyị ya ida wụ ịHasẹlụ nyọka ri adịrahụ  nya ala iSiriya, iJehu nyọka ri adịrahụ nya Isirẹlụ, bala Ịlayịcha nyọka ri ọlọmwụ. (1 Ịdị. 19:15, 16) Bwula ụkụrwọ ịlẹ ká iJihova ya ha Ịlayịja wẹ, ọ dọọ ụbwọ nyọka ya irya nọ u-uhye nya ang ịnyịịla. Ohe ya oligu o-chii, kọ ri Ịlayịcha họọ ịnyịnyị. Ányị a tị́ ka bwu yé ụbwọ ọdada nya iJihova ụka ká la ịlọng nwee?

6. Ịyẹ a tị́ ka raabwọ chajị nyaa myị́ ụka ká la ịlọng nwee? (Eje Ọnyịịla 62:8)

⁶ IJihova wụrụng nyọka raabwọ họọ. Ọ yẹ ang ọlẹ ká wẹẹ chịpwụrụ bwu, ọ tị wẹẹ ya ọ-jẹ́ myị̀myị̀ hang nyori ọ ka ke ụrụ wo abwọ ọrịrị nyang ụka myị́ ụka. (1 Tẹs. 5:17) Ọ kaa kpọọ ịpyọ la o-ke ụrụ wo la angị kaa gbịgba họọ. (Etu 15:8) Ịyẹ a tị́ ka raabwọ gu ẹnyị myị́ ụka ká la ịlọng nwee? Ya ẹla ọla ọkịlẹtụ nyang je iJihova, jaabwọ ká Ịlayịja họ. (Wa Eje Ọnyịịla 62:8.) Ya ẹla ọlẹ ko ri uhi nyang bala ang odudu kọ lang ịnyị joo. Bịlẹ iJihova kọ dang ụbwọ nyọka jẹ́ ẹla ọlẹ ká ka họ ụka ká la ịlọng nwee. Ọ-chụ pwokwita, ó ri ká la ịlọng nwee lee o-ju uhi ụka ká ja ya ẹla u-uhye nya ọmyịmyị nyang uube-ụpwụ, bịlẹ iJihova kọ ya ugbodu ojuju hang nyọka jẹ́-ẹ ya ẹla myị́. À dọmwụ ka jẹ́-ẹ bịlọọ nyọka ya ẹla ọjẹ́jẹ hang ká ka jẹ́-ẹ wụlẹ ọmyịmyị nyang dodehe ụ-ụgbẹyị ọdụmwọọ myị́. (Luk. 21:14, 15) Ó ri ká ọkịlẹtụ á ja kpụng enyi aalẹ, bịlẹ iJihova kọ ka dang ụbwọ nyọka jẹ́-ẹ ya ẹla ọọwa bala ọngọ gbẹgbịlẹ ọhẹ. À ka jẹ́-ẹ bịlẹ iJihova nyọka da ọngọlẹ ká wẹẹ ya ẹla nyang gba kọ ka jẹ́-ẹ ke ụrụ wo lang yẹẹyẹẹ. Ya ọkịlẹtụ nyang je iJihova, yẹ jaabwọ kọ ka wẹ abwọ ọrịrị nyang, ká ye ụbwọ ọdada nya angịkịla myị ịnyịnyị. Kori ká họ ịnyị, á ka la ịlọng nwee lụmẹ kaka.

7. Ẹlịyẹ a tị́ jẹ́ bwu oja nya Mauricio?

⁷ IJihova ya ụkụrwọ ọnyịịla-ọnyịịla hahị wuu kahị ka họ. Jẹ́ myị̀myị̀ nyori ọ jẹ́ ang myị́ ang ịlẹ ká kaa họ wuu ọọjịra-jịra bala ẹrụ ọnyịịla ọ-kpa pyẹ, ọ tị myọọ lẹhị ịnyịnyị. (Eje. 110:3) Ányị ụkụrwọ ịwẹ ọ-họ la ila ọchịchị à tị́ ka dang ụbwọ ụka ká la ịlọng nwee? Kụ irya nya ọọnahị okolobya ọhẹ ká ẹnyị nyamwụ ri Mauricio * wẹẹ. Lụka o-kpii nyọlẹ ko hu enyi Ohe kpá, ọngọhẹ nya aligu nyamwụ i-chii dọmwụ nyọka rụ hi ẹlịlẹhị. Mauricio yẹkẹẹ: “Ọlẹ kam yẹ jaabwọ kọ nyẹẹkpẹ da ẹlịlẹhị dudu kam kaa dahịhile ịlọm nwà ka. M̀ kaa chuko kori kam ka kpa ọnụ ọmyịmyị nya ịlọm o-hu ju Ohe ụ-ụbwọ bala ọ-kịnyaa la o-ri ọngọhẹ ẹ-epwụ nya ugbiyegu nyamwụ pwụ ocheju myị́. M̀ la ịlọm nwee bala o-me irya nyori ọngọngọhẹ-ẹ́ jẹ́ jaabwọ kọ lam ka.” Ịyẹ à tị́ da Mauricio ụbwọ? Ọ yẹkẹẹ: “M̀ kaa kpa ẹrụ ọnyịịla pyẹ gụ́ olene. Ọọwa dam ụbwọ nyọka hwabwọ la ọ-kụ irya u-uhye nya ịlọm bala ang ịlẹ kị ri akama nyam. M̀ kaa chị ọkẹkẹnị, ẹrụ ọnyịịla ọ-kpa pyẹ bala angịkịla tị du kam kaa la ịlọm nwee ịnyị kaka.” Ẹlịlẹhị ri, kori kahị dọmwụ jẹ́ bajẹ bala aanahị kaka ya ẹla nya Ohe ka wẹwẹ, ahị ka jẹ́-ẹ yé  ọngịrị bwula ọ-yẹ julaa ẹ-ẹpwụ nya ẹla nya Ohe oyaya bwula ileta ọdada bala ifon. Ang ọkịla oyina à tị́ da Mauricio ụbwọ? Ọ myịmyị yẹkẹẹ: “M̀ kaa họ ụkụrwọ ẹ-ẹpwụ nya ọjịra-jịra yẹẹyẹẹ ịnyịnyị. M̀ kaa maga jaabwọ kam ka họ myị́ nyọka nwụla ụpa nya ọjịra-jịra ọlẹ kị ya ham nọ bala ọ-họọ yẹẹyẹẹ. Akụrwọ ịlịịwẹ du kam kaa yẹ nyori m̀ ju apyobwuna ha iJihova bala angịkịla.”

8. Ányị akama ịnyịịngịrị à tị́ ka jẹ́-ẹ guhi myị́?

⁸ Ahị ya ahị guru nyọka la akama la ahyẹẹnụ ihyẹẹkpẹ ịlẹ. (2 Tim. 3:1) Kpọkpọọkpọ, ụma nya akama ịlẹ kahị ka la bala ụka kị ka pwụ eji ka bwuhi agaga. Ọhẹka ahị ka la akama nya okpoko, ẹdụrụ ọnyọọngịrị, lee igu ka kpa ọngọ háahị há rụ myị́. Ụka ọlịnyị, ọkịlẹtụ ka kpụhị enyi myị́, ọgụgụụgụ kori kọ lala o-ri ahị nyị ja chịpwụrụ bwu akama ọhẹ hi ta ọkịla lee ọ-dọmwụ ji ẹpwụ nya akama lụmẹ-lụmẹ ụka ookpokpo. Ma, kpịtịya nyori iJihova kaa kpẹhị rịrịịhị, lẹ bwula ụbwọ ọdada nyamwụ, ahị ka jẹ́-ẹ bọhụ ẹ-ẹpwụ nya akama ọnyị myị́ ọnyị la ọhụ ọ-dapịlẹ.

9. Chabwọ nya akama ịhyẹ ịlẹ ká iJobu la wẹẹ.

⁹ Kụ irya u-uhye nya abwọlẹ ká iJihova da iJobu kọ ri ọngọ la ọmyịmyị ụbwọ wẹẹ. Ọ la akama ị-chị olegu pyẹpyẹ ịdatị-datị ẹ-ẹpwụ nya ụka o-kpii. Ẹ-ẹpwụ nya ahyẹẹnụ ookpokpo, ị wẹ ka byi iJobu nyori iyo ileji nyamwụ wuu nyị́ juwa kaka, anchẹ nyamwụ nyị gbu lẹ, ọlẹ kọ tị tịpyọ gụ́ wuu ri anjwo ịlịkẹjẹ nyamwụ nyị gbu ịnyịnyị lẹ. (Job. 1:13-19) Nyọlẹ kọ nọ pyịnyẹng ká iJobu juwa ẹpwụ nya ọjụjụ ọtụka-ọtụka wẹẹ, ọ myịmyị jụ ẹdụrụ ọla oyoyi ọlẹ kọ kaa bịrị ọngịnyị ịnyịrọ. (Job. 2:7) Iwe-ahụrụ nyamwụ tịpyọ gbee kọọ yẹkẹẹ: “Ọhịhị ọlẹ chịm aga pwẹẹpwẹẹ lẹ, ọ-hị kịlahị á baba ham kaka.”—Job. 7:16.

10. Ányị iJihova à tị́ bwu ya ang ịlẹ ká iJobu baba nyọka jẹ́-ẹ bọhụ ẹ-ẹpwụ nya ịmayẹ họọ? (Yẹ ifoto ọla ẹbẹ nya ọgbanyẹ.)

¹⁰ IJihova kpẹhị rịrị iJobu. Chajị nyọlẹ ká iJobu há iJihova lẹ, Ọ dọọ ụbwọ la ang myị́ ang ịlẹ kọ baba nyọka jẹ́-ẹ bọhụ ẹ-ẹpwụ nya ọmyịmyị. IJihova ya ẹla bala iJobu, kpọọ ịtịya nya ẹla ọjẹ́jẹ ọ-la ọbaba-ka Nyamwụ bala abwọlẹ Kọ kaa kpahị ju ang ịlẹ kọ họ la ọháha. O ya ẹla u-uhye nya iru nya iyo ịlẹbyẹbyị. (Job. 38:1, 2; 39:9, 13, 19, 27; 40:15; 41:1, 2) IJihova myị́myị́ kpa ọlẹng ọ-la ọmyịmyị ọlẹ ká ẹnyị nyamwụ ri Elihu ju iJobu ọngịrị bala ọ-kpọọ ẹjẹ. Elihu họ ká iJobu jẹ́ myị̀myị̀ nyori iJihova kaa nwụ angịlẹ kị gbịgba họọ ẹ-ẹpwụ nya ọhụ ọbaba uri ụka wuu. Ma iJihova tị gu Elihu gbịla nyọka ya alibyi la iJobu ịnyịnyị. Elihu da iJobu ụbwọ nyọka ya ẹhị rịrị u-uhye nya ịlọmwụ lụmẹ ka chajị ahị la pyịnyẹng kori kị chụhị kaka pwoku iJihova, ko ri Ọngọ họ uhye-ọgba bala eji. (Job. 37:14) IJihova myịmyị ya ụkụrwọ ọhẹ ha iJobu; ụkụrwọ ọọwa ri ọ-ka raabwọ chajị nya aligu nyamwụ ịta ịlẹ kị họ ịhọbịrị. (Job. 42:8-10) Ányị iJihova à tị́ kaa dahị ụbwọ alẹ ụka kahị ji ẹpwụ nya ịmayẹ ịnyịịngịrị?

11. Ànyị ịBayịbụụ à tị́ ka dahị ụbwọ ụka kahị ji ẹpwụ nya ịmayẹ?

¹¹ IJihova á kaa ya ẹla balahị kpụrụrụ jaabwọ kọ họ ẹ-ẹga nya iJobu ka, ma Ọ kaa ya ẹla balahị bwula Omyi Ẹla nyamwụ kọ ri ịBayịbụụ. (Rom. 15:4) Ọ kaa kpụ́ụhị ẹjẹ bwula ọ-ya ẹhị ọrịrịị-rịrị nya ijuju ọnyịịla hahị. Kụ irya u-uhye nya ẹla ịmanyị-ịmanyị ịhyẹ bwu ịBayịbụụ ịlẹ kị ka jẹ́-ẹ kpụ́ụhị ẹjẹ ụka kahị la ịmayẹ lẹẹ wẹẹ. Ẹ-ẹpwụ nya Ụpwụ Ịgọgọ, iJihova ya ọ-jẹ́ myị̀myị̀ hahị nyori ịngịngịhyẹ—tụ́ ịmayẹ ịnyịịngịrị—‘á ka jẹ́-ẹ la ọngọrị chịhị ebwo hi ọháha nya Ohe Oluhye ẹnẹnẹhẹ kaka.’ (Rom. 8:38, 39) Ọ myị́myị́ họ kahị jẹ́ myị̀myị̀ nyori ọ “kaa ju angịlẹ kịị raabwọ họọ chwẹẹ.” (Eje. 145:18) IJihova byihi nyori kori kahị nyị́  kpụnịrọọ, ahị kà jẹ́-ẹ bọhụ ẹ-ẹpwụ nya ọmayẹ ọnyị myị́ ọnyị bala ọ-dọmwụ ka jẹ́-ẹ chị ọkẹkẹnị pwụ ẹgẹhẹ ụka kahị ja yẹ akama myị́. (1 Kọr. 10:13; Jem. 1:2, 12) Omyi Ẹla nya Ohe myịmyị kpụhị ịtịya nyori ịmayẹ nyahị nyị la kpii bala ọ-la pwee kori kahị chwaa kaka pwoku ahị ọwawa ịlẹ kọ ka ya hahị gboyi myị́ oyi. (2 Kọr. 4:16-18) IJihova ya ẹhị ọrịrịị-rịrị hahị nyori ọwa nyị ka ta angịlẹ kị kaa ju ọmwụ nya akama nyahị ayịreji, kị ri Olegu Onyobyi bala angịlẹ kị la ọkwọ lala ọwọwa. (Eje. 37:10) À kpa Ụpwụ Ịgọgọ ịhyẹ ịlẹ kị kaa ya ẹjẹ ọkpụkpụ ha ọngịnyị e-egbeju nyọka dang ụbwọ bọhụ ụka nya akama ịla ịlahị lẹẹ?

12. Ịyẹ iJihova à tị́ ya ahị guru kahị ka họ kori kahị ka yé apyobwuna yẹẹyẹẹ bwu Omyi Ẹla nyamwụ?

¹² IJihova ya ahị guru kahị ka hu ụka nọ nyọka wa ịBayịbụụ ụka myị́ ụka bala ọ-kụ irya kpori-kpori ju ẹla ọlẹ kahị wa. Ụka kahị kpa ẹla ọlẹ kahị jẹ́ họ ụkụrwọ, ọmyịmyị nyahị kaa la ọngịrị gụ́ olene, ahị tị ka tụ́ ju Adahị olepwoohe chwẹẹ gụ́ ọọwa ịnyịnyị. Ọọwa kaa dudu kahị kaa la ọngịrị nyọka bọhụ ẹ-ẹpwụ nya ịmayẹ. IJihova kaa ya olegu ịgọgọ nyamwụ ha angịlẹ kị kpụnịrọ Omyi Ẹla nyamwụ ịnyịnyị. Olegu ọọwa tị ka jẹ́-ẹ ya “ọngịrị ọgụgụ ọtụka nya Ohe Oluhye” hahị nyọka jẹ́-ẹ bọhụ ẹ-ẹpwụ nya akama ọnyị myị́ ọnyị.—2 Kọr. 4:7-10.

13. Ànyị ang oriri nya olegu ọlẹ ká “ọnchẹ ọ-chịla o-hu ọkịlẹtụ ha bala ọngọ jẹ́ ẹla” kaa ya hahị à tị́ị̀ dahị ụbwọ nyọka bọhụ ẹ-ẹpwụ nya ịmayẹ?

¹³ Bwula ụbwọ ọdada nya iJihova, “ọnchẹ ọ-chịla o-hu ọkịlẹtụ ha bala ọngọ jẹ́ ẹla” họ apwụ, ifim bala eje hahị. Ang ịwẹ ka jẹ́-ẹ dahị ụbwọ nwụ́ ọmyịmyị ọnyọọngịrị bala ọ-ka ri igu o-chii bala iJihova. (Mat. 24:45) Ahị baba nyọka kpa ang ịlẹ ká iJihova họ hahị wẹ wuu họ ụkụrwọ yẹẹyẹẹ. Ọọnahị ọnyang ọhẹ bwu United States ya kpangjẹ jaabwọ ká ang oriri nya olegu nyahị myọọ lẹhị kaka ba. Ọ yẹkẹẹ: “Ẹ-ẹpwụ nya ẹka 40 ịlẹ kam kaa gbịgba ha iJihova, m̀ la ịmayẹ ẹ-ẹga nya o-godayị giri-giri nyam ha iJihova ụka lụmẹ-lụmẹ.” Ọ la ịmayẹ ịnyịịngịrị. Ọngọ nwa ere ọhẹ pá ang-ọrụnyẹ kaka nwụ adamwụ ọgbahị, adamwụ bala ịnamwụ jụ ẹdụrụ gbee kịị gbu, ọwa tị la ẹbẹ ọgọ́ja ụka imimiiye ịnyịnyị. Ịyẹ à tị́ dọọ ụbwọ du kọ jẹ́ bọhụ? Ọ wụlẹ yẹkẹẹ: “IJihova kaa kpẹhị rịrịịm ụka wuu. Ang oriri nya olegu ọlẹ kọ kaa ya hahị bwula ọnchẹ ọ-chịla o-hu ọkịlẹtụ ha bala ọngọ jẹ́ ẹla dam ụbwọ du kam jẹ́ bọhụ. Chajị nya ọọwa, ọ lam jaabwọ kọ la iJobu, kọ yẹkẹẹ: ‘M̀ godayị rịrị ẹ-ẹga kam ji gbee kị ka bwu ọpyị bam.’ ”—Job. 27:5.

14. Ányị iJihova à tị́ kaa kpa aanahị ịla ọjịra-jịra dahị ụbwọ ụka nya ịmayẹ? (1 Ala ịTẹsalonika 4:9)

¹⁴ IJihova mẹ ang jẹ anchẹ nyamwụ nyọka la  ọháha ẹ-ẹga nya awụlẹ bala ọ-ka kpụ́ awụlẹ ẹjẹ lụka nya ajụjụ. (2 Kọr. 1:3, 4; wa 1 Ala ịTẹsalonika 4:9.) Jaabwọ ká Elihu họ, aanahị alẹng bala anyang kaa charịnya nyọka dahị ụbwọ chajị kahị ka kpa ọmyịmyị nyahị kpọọ ụka kahị la akama. (Ụkụr. 14:22) Ọ-chụ pwokwita, kụ ẹhị yẹ abwọlẹ ká alọjịra-jịra nya Diane kpọ́ọ ẹjẹ bala ọ-dọọ ụbwọ nyọka ya ụbwọ chị iJihova giri-giri nyọlẹ ká ẹdụrụ ọnyọọngịrị ọhẹ jụ ọrụmwụ wẹẹ. Ọ yẹkẹẹ: “O lujwo. Ma ahị yẹ ụbwọ ọngịrị nya iJihova bala ọháha nyamwụ ẹ-ẹpwụ nya ọya ilujwo ịịwa. Alọjịra-jịra nyahị tuubwu yiihi a-agbẹyị lụmẹ-lụmẹ. Ụga ojuju, ọwụrụ-wụrụ bwu ifon, bala o-wuhi bajẹ nyaa dahị ụbwọ nyọka bọhụ myị́. Nyọlẹ kam kaa pá ang ọrụnyẹ ka wẹẹ, aanahị alẹng bala anyang kaa jẹ́ myị̀myị̀ nyori m̀ jẹ́ pwụ ọjịra-jịra bala o-kpehe nya ẹrụ ọnyịịla ụka kọ chịmkpẹẹ myị́.” O ri ọkẹkẹnị ọtụka-ọtụka hahị nyọlẹ kahị la aanịna alẹng bala anyang ịlẹ kị la ọháha ọlịịwẹ ẹ-ẹpwụ nya ọjịra-jịra!

15. Ịyẹ tị́ du kahị jẹ́ myị̀myị̀ nyori ahị ka bọhụ ẹ-ẹpwụ nya ịmayẹ myị́?

¹⁵ Ahị wuu kaa la akama ọhẹ lee ọkịla. Ma, jaabwọ kahị jẹ́ wẹẹ, áhị kaa la ụbwọọhị ẹ-ẹpwụ nya akama ịịwa ka. Lala adịda ọ-la ọháha, iJihova kaa kpẹhị rịrịịhị ụka wuu. O ji báahị ba, ọ nwụlanọ nyọka wo ọbịlẹ-bịlẹ nya ụbwọ ọdada nyahị, ọ tị charịnya nyọka dahị ụbwọ ịnyịnyị. (Ayị. 43:2) Ahị jẹ́ kpakpa nyori ahị ka bọhụ ẹ-ẹpwụ nya ịmayẹ myị́ chajị ọ ya ang ịlẹ kahị baba wuu nyọka họ ịnyị myị́ hahị. Ọ ya āhị nya abwọ ọrịrị, ịBayịbụụ, ang oriri nya olegu lụmẹ-lụmẹ bala aanịna ị-la ọháha ịlẹ kị kaa dahị ụbwọ lụka nya ọbaba hahị.

16. Ányị ahị tị́ ka bwu juwa e-ekpeleji nya ẹhị ọ-kpa rịrị nya iJihova pyịyọọ?

¹⁶ Ọ myịhị lẹhị yẹẹyẹẹ nyọlẹ kahị la Adịda olepwoohe ọlẹ kọ kaa kpẹhị rịrịịhị! “Ahị chị ọkẹkẹnị ọọ-lajị nyamwụ.” (Eje. 33:21) Ahị ka jẹ́-ẹ mẹjẹ iJihova nyori ẹhị ọ-kpa rịrị la ọháha nyamwụ nyị myịhị lẹhị bwula o-yé apyobwuna bwu ang ịlẹ wuu kọ họ nyọka dahị ụbwọ. Ahị tị baba ịnyịnyị nyọka họ ụpa nyahị nyọka juwa e-ekpeleji nya ẹhị ọ-kpa rịrị nya Ohe. Etu nya ọọwa ri, ó-ri kahị kịnyaa la o-ju ihi nya iJihova jaabwọ kahị ka họ ba myị́ bala ọ-họ ang ọnyịịla a-ahị nyamwụ, ọ ka kpẹhị rịrịịhị gboyi myị́ oyi!—1 Pit. 3:12.