ANG ỌJẸ́JẸ 33
EJE 130 Kịnyaa Juwa Hịnyọhi
Abwọlẹ ká IJihova Tịtọ ká Ọjịra-jịra ka Kpa Angị Họ Ọhọbịrị Ọtụka
“Ọ́ tị ri ká ọngọhẹ nyanụ a chabwọ kpụ ẹpwụ nya ọhọbịrị ọhọhọ aalẹ, ahị la [ọngọlẹ kọ juwa bịlẹ] wọnụ nyahị ju.”—1 JỌN. 2:1.
ẸHỊ NYA ẸLA
Ang ọkpọnchị ọlẹ kahị ka jẹ́ bwu ẹla ọlẹ kọ họ ọọjịra-jịra ọla ịKọrịntị ụka ká ọngọhẹ họ ọhọbịrị ọtụka.
1. Ịyẹ iJihova à tị́ tịtọ ha angịnyị nyamwụ?
IJIHOVA họ angịnyị ehe ụ-ụgbẹyị ọlẹ kị jẹ́-ẹ cheje nya ẹla la ịlaa. Ahị kaa cheje nya ẹla ẹnụ myị́ ẹnụ. Eje nya ẹla ọlẹ kọ la kpọnchị gụ́ wuu ká ọngịnyị kaa chị à ri eje nyọka hu ịlọmwụ ju iJihova ụ-ụbwọ bala ọ-ka ri ụpa nya ugbiyegu nya angị kaa gbịgba họọ lẹ. O ri irya nya iJihova ká ọng myị́ ọng ka họ ịnyị. Ịyẹ tị́ du? Chajị angịnyị họ́ọ, ọ tị tịtọ kị ka chị ọkẹkẹnị ịnyịnyị. Ọ tịtọ kị ka ri igu balọọ bala ọ-ka hịhị gboyi myị́ oyi.—Ehile. 30:19, 20; Gal. 6:7, 8.
2. Irya ọlányị iJihova à tị́ la ẹ-ẹga nya angịlẹ kị yẹda lẹka? (1 ịJọn 2:1)
2 Ma, iJihova á tị kaa gbile ọngọngọhẹ la agbụrụ kaka gbịgba họọ ka. Ọ kaa ya iwe da ha ọngịnyị nyọka chụ ẹla ọlẹ kọ tịtọ nyọka họ. Ọ́ tị ri ká Ọngịnyị nya ịKịrayịsị ọlẹ kọ hu enyi Ohe lẹ á bịrị ehile nya Ohe bwula ọ-họ ọhọbịrị ọtụka bẹẹ? Kori kọ yẹ irya da ka aalẹ, ị ka gbọọ hi ọjịra-jịra pyii. (1 Kọr. 5:13) Ma, ọ tị lịnyị odu lẹ, iJihova kaa ya ẹhị rịrị ká ọlọhọbịrị ka tịrẹkpẹ wẹ ẹga nyamwụ. Ọọwa à dọmwụ ri ẹla ọkpọnchị ọlẹ kọ du ko ya Ọnyị nyamwụ kịliya lẹ, chajị nyọka họ ká ọ-hịnyọhi ka ji ha alịhọbịrị ịlẹ kị yẹ irya da. (Wa 1 ịJọn 2:1.) IJihova ri Ohe nya ọháha ọlẹ kọ kaa bịlẹ alịhọbịrị nyọka yẹ irya da.—Sẹk. 1:3; Rom. 2:4; Jem. 4:8.
3. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?
3 IJihova tịtọ kahị ka la irya ọlẹ kọ la ẹ-ẹga nya ọhọbịrị bala angị họ ọhọbịrị ọtụka. Ang ọjẹ́jẹ ọlẹ ka ya ẹla u-uhye nya ụgbẹyị ọlẹ kahị ka bwu họ ịnyị. Jaabwọ ká wẹẹ wa ang ọjẹ́jẹ ọlẹ, ya ẹhị rịrị u-uhye nya ang ịlẹ: (1) abwọlẹ ká angịgbahị ịla ọjịra-jịra ọla ịKọrịntị họ ụka ká ọngọhẹ họ ọhọbịrị ọtụka lụka nya oyi ọhọhẹ, (2) ẹla ọlẹ ká ọlẹrụ ịPọlụ mẹjáa nyọka họ ụka ká ọlọhọbịrị ọọwa yẹ irya da, bala (3) ẹla ọlẹ ká oja ọwẹ mẹjẹ u-uhye nya irya ọlẹ ká iJihova la ẹ-ẹga nya anchẹ nyamwụ ịlẹ kị họ ọhọbịrị ọtụka.
ẸLA ỌLẸ KÁ ỌJỊRA-JỊRA HỌ ỤKA KÁ ỌNGỌHẸ HỌ ỌHỌBỊRỊ ỌTỤKA
4. Ẹlịyẹ à tị́ họ ọọjịra-jịra ọla ịKọrịntị? (1 Ala ịKọrịntị 5:1, 2)
4 Wa 1 Ala ịKọrịntị 5:1, 2. Lụka nya ogu-ẹdịyẹ ọhata nya ẹrụ ọnyịịla ọ-kpa pyẹ nya ịPọlụ, o wo oja nya ẹla ọtịpyọ ọhẹ kọ ji ọjịra-jịra onyeewe ọla ịKọrịntị. Ọngọhẹ ẹ-ẹpwụ nya ọjịra-jịra juwa kọ kaa nọ ta ahụ nya adamwụ. Abwẹla ọlịịwẹ gbu ịnyịrọ wọọ, “angịlẹ kị dọmwụ ri angịnyị nya Ohe Oluhye riri ka lẹ, ị́ ka byẹjẹ họ ụma nya ang onyobyi ọlịnyị myị́ kaka”! Ala ọjịra-jịra tị me irya nyori nyị́ tịpyọ nyọka ya ẹga da ha ọngọ họ abwẹla ọtịpyọ ọwẹ kọ ka kịnyaa ja yẹjula angịkila ka. Ọhẹka angịhyẹ yọọ lala o-ri, ị wẹẹ mẹ ahyẹẹrwẹrwa jẹ ẹ-ẹga nya ọngọọwa jaabwọ ká iJihova kaa họ ẹ-ẹga nya angịnyị ehe ịlẹ kị la kpeẹkpẹẹ ka ịnyị. Ma, iJihova á kaa ya iwe nya ang ọtịpyọ da ẹ-ẹga nya anchẹ nyamwụ kpong-kpong ka. Ọ la gede-gede nyori ang ọtịpyọ ọlẹ ká ọlẹng ọwẹ họ ka bịrị ẹnyị nya ọjịra-jịra ẹ-ẹga nya angịlẹ kị kaa gbịgba ha iJihova ka. Abwẹla nyamwụ ọwẹ tị dọmwụ ka chị kịla Angịnyị nya ịKịrayịsị ịkịla ịlẹ kị kaa yẹ julọọ myị́. Lẹ, ẹlịyẹ ịPọlụ à tị́ byi ala ọjịra-jịra nyị họ?
5. Ẹlịyẹ ịPọlụ à tị́ byi alọjịra-jịra nyị họ? Ịyẹ tị́ du? (1 Ala ịKọrịntị 5:13) (Yẹ ifoto ịnyịnyị.)
5 Wa 1 Ala ịKọrịntị 5:13. Olegu ịgọgọ kpa ịPọlụ da ụpwụ nyori nyị gba ọlọhọbịrị ọlẹ kọ yẹda ka kpehe bwu ọjịra-jịra. Ányị Angịnyị nya ịKịrayịsị ị-la ọmyịmyị à tị́ ka kpa ọngọlịnyị? ỊPọlụ byaa nyị hwabwọ la ọ-ka ‘yẹ ju la’ ọngọlịnyị. Ọ myị́myị́ ya nyori nyị dọmwụ “baba ju epwedii nya ang oriri ta ọngọọwa kpong-kpong kaka.” (1 Kọr. 5:11) Ịyẹ tị́ du? Ụka ká juwa kpa ang ri bala ọngịnyị, à kaa bịrị ụka balọọ bala o-joja balọọ. Ọọwa ka du ká ka dọmwụ nyọka bịrị ụka balọọ gụ ọwọwa myị́. Lẹ, apyobwuna oyina ọjịra-jịra à tị́ ka ye kori kị hwabwọ la ọ-yẹ ju la ọngọọwa? Ọọwa ka du ká abwẹla ọtịpyọ nyamwụ ka chị kịla angịkịla ịlọjịra-jịra ka. (1 Kọr. 5:5-7) Datị hi ọọwa, ọ ka da ọlọhọbịrị ọọwa ụbwọ nyọka yẹ jaabwọ kọ hwahị kaka ba hi ụgbẹyị nya iJihova, ọ ka tọọ olujwo bala ọ-gwoo gbịla nyọka yẹda bwu ọhọbịrị nyamwụ myị́.
IJihova kpa ịPọlụ da ụpwụ du kịla alọjịra-jịra kaka byaa nyori nyị ka gba ọlẹng ọlẹ kọ myị yẹda bwu ịhọbịrị nyamwụ ka kpehe pyii lẹ (Yẹ ọgba 5)
6. Ányị alọjịra-jịra ọwẹ à tị́ họ nyọlẹ ká ụpwụ nya ịPọlụ waa ọyị? Ẹlịyẹ ọlọhọbịrị ọọwa à tị́ họ ịnyịnyị?
6 Nyọlẹ ká ịPọlụ da ụpwụ du ta ala ịKọrịntị kpá, ọ dọmwụ nyọka kụ irya jaabwọ ká alọjịra-jịra ọwẹ ka họ u-uhye nya ẹla ọlẹ kọ byaa. Nyọlẹ kọ nọ chẹẹ, ịTayịtọsị kpa oja ọnyịịla bwu ụwa wọọ. O ya joo nyori alọjịra-jịra ọwẹ nyị họ jaabwọ kọ byaa, bwula ọ-gba ọlọhọbịrị ọọwa kpehe bwu ẹpwarịrị nyaa. (2 Kọr. 7:6, 7) Ọlẹ kọ há gụ wuu ri, nyọlẹ ká alọjịra-jịra ọwẹ kpa ẹla ọlẹ ká ịPọlụ ya họ ụkụrwọ, ọlẹng ọwẹ yẹda bwu ẹpwụ nya ọhịhị nya ọhọbịrị nyamwụ! Ọ yẹ abwẹla bala irya ọkụkụ nyamwụ da bala ọ-dọmwụ nyọka hịhị ba ehile ịkpẹẹkpẹẹ nya iJihova jẹ. (2 Kọr. 7:8-11) Ẹlịyẹ ịPọlụ à tị́ ka byi alọjịra-jịra nyị họ ugbẹnyị mẹ?
JAABWỌ KÁ ALỌJỊRA-JỊRA CHỊLA NYỌKA KPA ỌNGỌLẸ KỌ YẸDA BWU ỌHỌBỊRỊ NYAMWỤ
7. Ang ọnyịịla oyina à tị́ họ nyọlẹ kị gba ọlọhọbịrị ọwẹ kpehe hi ọjịra-jịra? (2 Ala ịKọrịntị 2:5-8)
7 Wa 2 Ala ịKọrịntị 2:5-8. ỊPọlụ byaa yẹkẹẹ: ‘Akama ọlẹ kaanụ aluche hu ha ọngọọwa lẹ, ọ nwa ba ịnyị mẹ.’ Ọọwa ri, nyọlẹ kị gba ọlọhọbịrị ọwẹ kpehe hi ọjịra-jịra lẹ, ọ yẹ nyori ọ baba nyọka yẹda. Nyọlẹ kọ tị yẹda lẹ wẹẹ, ọ́ chịla kị ka kịnyaa la ọ-yalibyi lọọ kaka.—Hib. 12:11.
8. Ányị ịPọlụ à tị́ byi alọjịra-jịra nyị họ ugbẹnyị?
8 Chajị nyọlẹ ká ọlẹng ọwẹ yẹda lẹ, ịPọlụ byi angịgbahị nya ọjịra-jịra nyị ya ẹga da họọ nyọka nyà wẹ ọjịra-jịra mẹ. Ọ myịmyị byaa nyị “hịnyọhi ha ọngọọwa bala o-juwa kpụ́ ọngọọwa ẹjẹ” bala ọ-ka “kpa ọháha ọlala ye ọngọọwa myịmyị tịrẹkpẹ.” ỊPọlụ tịtọ ká alọjịra-jịra ka mẹjẹ ọlẹng ọwẹ bwula ẹla ọlẹ kị kaa họ bala ẹla oyaya nyaa nyori nyị hịnyọhi họọ ịnyịlẹhị lẹ bala o-ri nyị la ọháha ẹ-ẹga nyamwụ. Ị ka họ kọ ka la gede-gede nyori nyị dọọ ọwụraba wẹ ọjịra-jịra.
9. Ịyẹ tị́ du kọ ka la angịhyẹ ujwo myị́ nyọka hịnyọhị ha ọlọhọbịrị ọlẹ kọ yẹda-à wẹ?
9 Ọ la angịhyẹ ọọjịra-jịra ọwẹ ujwo nyọka da ọlẹng ọwẹ ọwụraba wẹ ẹpwarịrị nyaa myịmyị? Ụpwụ Ịgọgọ á ya ịnyị ka, ma ọ ka chịkpẹẹ myị́. Chajị ẹla nyamwụ ọwẹ ka kpa akama wẹ ọjịra-jịra lẹpwụ-lẹpwụ bala o-hu oyoyi ju angịhyẹ kpangga ọọjịra-jịra myị́. Alọjịra-jịra ọwẹ ma uya nyịlẹhị-ịlẹhị nyọka la abwẹla ocheri-cheri. Lẹ, ọ ka la angịhyẹ myị́ nyori nyị́ pwoku nyọka ye ọngọlẹ kọ họ ang onyobyi ọlịịwẹ tịrẹkpẹ wẹ ọjịra-jịra myịmyị ka. (Yẹ iLuku 15:28-30.) Ma, ịyẹ tị́ du kọ baba ká alọjịra-jịra ka mẹ ọháha jẹ ẹ-ẹga nya ọọnaa ọlẹ kọ yẹda-à wẹ?
10-11. Ịyẹ à tị́ ka họ myị́ kori ká angịgbahị nya ọjịra-jịra á myị hịnyọhi ha ọlọhọbịrị ọwẹ ka?
10 Ányị ọ tị́ ka la ọlẹng ọwẹ kori ká angịgbahị nya ọjịra-jịra á myị yoo tịrẹkpẹ wẹ ọjịra-jịra nyọlẹ kọ yẹda kpá ka? Lee ányị ọ tị́ ka lọọ ụka kọ nyà tịrẹkpẹ kpá, ká aanamwụ-ụ́ tị myị mẹ ọháha jẹ ẹ-ẹga nyamwụ ka? Ọ chịkpẹẹ kọ ka mileji ahyaahị myị́ ọọlajị nyọlẹ ká ‘ọkịlẹtụ ọkpenyi nya ujujwo nya ẹla ọọwa kịlọọ kịla.’ Ọ ka lọọ lala o-ri ọwa nyị́ ka jẹ́-ẹ ri ụpa nya ọjịra-jịra kaka. Ọ ka kụ irya myị́ nyori iJihova á ka jẹ́-ẹ hịnyọhi họọ kaka, lẹ ọbaba nyọka yẹda nyị́ ji ka ịnyịnyị.
11 Ẹlịyẹ ọkịla à tị́ ka họ myị́ kori ká angịkịla ịlọjịra-jịra á hịnyọhi ha ọngọlẹ kọ yẹda-à wẹ ka? Ọọwa ka bịrị igu oriri nyaa ịwa bala iJihova. Ịyẹ tị́ du? Chajị ị́ ba ọgụ-ẹpẹtẹ nya iJihova kọ kaa hịnyọhi ha alịhọbịrị ịlẹ kị yẹda jẹ ka. Ọkọkọ nyọọwa lẹ, abwẹla nya Olegu Onyobyi kọ kaa yẹ ọngịnyị ahyẹẹrwẹrwa ka bala ọ-kaa kpa angịnyị lụbwọ ọngịrị, ị wẹẹ gbịla lẹ. Ị ka yẹ ịlaa la ang-abwọ nya Olegu Onyobyi ịlẹ kọ ka kpa họ ụkụrwọ nyọka hu ọlẹng ọwẹ abwọ la ọ-gbịgba ha iJihova.—2 Kọr. 2:10, 11; Efe. 4:27.
12. Ányị ọjịra-jịra ọwẹ à tị́ ka bwu gbịla iJihova?
12 Lẹ, ányị alọjịra-jịra ọla ịKọrịntị à tị́ ka bwu gbịla iJihova ọkọkọ nya Olegu Onyobyi? Bwula ọ-hịnyọhi ha ọlọhọbịrị ọlẹ kọ yẹda jaabwọ ká iJihova kaa họ. Wo ẹlẹhẹ ịlẹ ká angị da ịBayịbụụ ya lẹẹ u-uhye nya iJihova. IDevidi ya nyị kaa “hịnyọhi bala ọ-họ ang ọnyịịla hahị lụmẹ.” (Eje. 86:5) ỊMayịka da yẹkẹẹ: “Oowo a tị́ lala ahụ Ohe Oluhye wẹ-ẹ; ahụ ọngọ hịnyọhi ịhọbịrị, bala o-deeri nya ang inyibyi nya angịnyị nyang?” (May. 7:18) Ayịsaya yẹkẹẹ: “Angị họ ang onyobyi ā tụ hi ụgbẹyị onyobyi nyaa deeji, kị pẹhi irya ịtịpyọ nyaa ịnyịnyị mẹ. Ị jahị kpata nyà wẹ ẹga nya [iJihova] mẹ, ọ ka yẹ ahyẹẹrwẹrwẹ nyaa. Ee, ị wẹ ẹga nya Ohe Oluhye nyahị mẹ, ọ ka hịnyọhi haa.”—Ayị. 55:7.
13. Ịyẹ tị́ du kọ pwoku nyọlẹ kị godayị tata lụmẹ ene kịị ye ọlẹng ọwẹ tịrẹkpẹ wẹ ọjịra-jịra ka? (Yẹ akpa ọlẹ kọ ri “ Ụka Oyina Ị tị́ Tịrị Ọlẹng Ọla ịKọrịntị Ẹkpẹ?”)
13 Nyọka gbịla iJihova, alọjịra-jịra ọla ịKọrịntị baba nyọka da ọlọhọbịrị ọlẹ kọ yẹda ọwụraba wẹ ẹpwarịrị nyaa bala ọ-mẹjọ́ọ nyori ọ háa wẹẹ. Alọjịra-jịra ọwẹ ka mẹ “ihi ojuju [nyaa jẹ] ẹ-ẹpwụ nya ang myị́ ang” wuu bwula ọ-kpa ẹla ọlẹ ká ịPọlụ byaa họ ụkụrwọ nyọka ye ọlẹng ọọwa tịrẹkpẹ. (2 Kọr. 2:9) Nanana nyori ọya ịmanyị-ịmanyị kem à chịpwụrụ nyọlẹ kị gbọọ wẹẹ lẹ, alibyi ọọwa tị gwoo o-olegu kpụ ọ yẹda lẹ. Lẹ, angịgbahị nya ọjịra-jịra á baba nyọka godayị tata lụmẹ ene kị ka yoo tịrẹkpẹ wẹ ọjịra-jịra kaka.
ABWỌLẸ KAHỊ KA BWU GBỊLA AHYẸẸRWẸRWA BALA ẸLA Ọ-HỌ KPAKPA NYA IJIHOVA
14-15. Ẹlịyẹ ahị tị́ jẹ́ bwu ẹla ọlẹ kọ họ ị-ịKọrịntị? (2 iPita 3:9) (Yẹ ifoto ịnyịnyị.)
14 Ị da oja nya abwọlẹ kị họ ẹ-ẹga nya ọlẹng ọla ịKọrịntị ọwẹ ju ang chajị kọ ka ri “ẹla ọmẹjẹ hahị” alẹ. (Rom. 15:4) Oja ọwẹ mẹjẹ́ẹhị nyori iJihova á kaa ya iwe da ha ọngọlẹ kọ kịnyaa la ọhọbịrị ọtụka ọhọhọ nyọka juwa ẹ-ẹpwụ nya angịnyị nyamwụ ka. Angịhyẹ ka me irya myị́ nyori nyọlẹ ká iJihova ri ọlahyẹẹrwẹrwa wẹẹ, nyị ka ya iwe da ha ọngọlẹ kọ myị yẹda ka, kọ ka kịnyaa ẹ-ẹpwụ nya ọjịra-jịra. Ma ịnyị iJihova à kaa mẹ ahyẹẹrwẹrwa nyamwụ jẹ ka. Nanana nyori o ri ọlahyẹẹrwẹrwa, ọ́ kaa ye abwẹla ụma ọnyị myị́ ọnyị myị ka. Ehile nyamwụ u-uhye nya ang ọnyịịla bala ọtịpyọ á kaa yẹda ka ịnyịnyị. (Jud. 4) Ẹlịlẹhị ri, kori ká iJihova á ya iwe da họ ọngọ kịnyaa ẹ-ẹpwụ nya ịhọbịrị nyọka juwa ọọjịra-jịra aalẹ, ahyẹẹrwẹrwa à wẹ kọ mẹjẹ kaka chajị ọọwa ka kpa akama wẹ ọjịra-jịra lẹpwụ-lẹpwụ myị́.—Etu 13:20; 1 Kọr. 15:33.
15 Tị kpọkpọọkpọ, ahị jẹ́ nyori iJihova á tịtọ ká ọngọngọhẹ ka tayịreji ka. Ọ tịtọ nyọka chị angịnyị da ụka myị́ ụka ká ọọwa á chịkpẹẹ. Ọ kaa yẹ ahyẹẹrwẹrwa nya angịlẹ kị la irya ọyẹda bala ọ-tịtọ nyọka nwụla igu oriri nyaa balọọ. (Isi. 33:11; wa 2 iPita 3:9.) Lẹ, ụka ká ọlẹng ọla ịKọrịntị ọwẹ yẹ irya da bala ọ-pẹhi ọhịhị nya ọhọbịrị ọhọhọ nyamwụ, iJihova kpa ịPọlụ wụlẹ ju ala ọjịra-jịra ọwẹ nyori nyị hịnyọhi họọ bala ọ-dọọ ọwụraba tịrẹkpẹ.
Ahị kaa gbịla ọháha bala ahyẹẹrwẹrwa nya iJihova ụka kahị da ọngọlẹ kị ye tịrẹkpẹ wẹ ọjịra-jịra ọwụraba bwu ọkịlẹtụ (Yẹ ọgba 14-15)
16. Ányị ụgbẹyị ọlẹ kị bwu họ ẹla ẹ-ẹga nya ọlẹng ọla ịKọrịntị à tị́ lang?
16 Bwula ọ-kụ ẹhị yẹ ẹla ọlẹ kọ họ ị-ịKọrịntị, ahị wẹ ka yẹ nyori iJihova ri Ohe ọlẹ kọ la ọháha, abwẹla ọnyịịla, bala ọ-kaa họ ẹla kpakpa yẹẹyẹẹ. (Eje. 33:5) Ẹla ọlẹ kahị jẹ́ wẹ guhi gbịla nyọka gwogbo ha iJihova gụ ọwọwa! Ẹlịlẹhị ri, ahị wuu dọmwụ ri alịhọbịrị, ọngọngọhẹ nyahị-ị́ hi ka. Ahị tị baba nya ọhịnyọhi nya iJihova ịnyịnyị. Ọ myịhị lẹhị lụmẹ nyọlẹ ká iJihova ya āhị nya ọ-ra kpehe hahị chajị kọ ka jẹ́-ẹ hịnyọhi hi ịhọbịrị nyahị hahị. Ọ ri ẹjẹ ọkpụ́kpụ hahị yẹẹyẹẹ nyọka jẹ́ nyori iJihova la ọháha nyịlẹhị ẹ-ẹga nya angịnyị nyamwụ bala ọ-tịtọ kahị ka chị ọkẹkẹnị gboyi myị́ oyi!
17. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ịkịla?
17 Kori ká ọngịnyị á tị họ ọhọbịrị ọtụka alẹ, ányị angịgbahị nya ọjịra-jịra à tị́ ka bwu gbịla ọháha nya iJihova bala ọ-da ọngọọwa ụbwọ nyọka yẹda? Ányị ọ tị́ ka la alọjịra-jịra kori ká angịgbahị á cheje nyọka gba ọngịnyị kpehe bwu ọjịra-jịra lee ọ-tịrọọ ẹkpẹ wẹ ọjịra-jịra? Ahị ka ya ẹla u-uhye nya ịtọ ẹla ịwẹ ẹ-ẹpwụ nya ang ọjẹ́jẹ ịkịla.
EJE 109 Love Intensely From the Heart
