1. Ịyẹ ọngịnyị ọlẹ kọ yẹ irya da à tị́ kaa họ?

 ỤKA kahị họ ẹla ọtịpyọ, ahị baba nyọka yẹ irya da. ỊBayịbụụ ya nyori ọngịnyị ọlẹ kọ yẹ irya da kaa ba ang ọtịpyọ ọlẹ kọ họ ẹtẹ, hwabwọ hi abwẹla ọọwa, bala ọ-cheje nyọka ma ẹla ọọwa họ kaka.—Mat. 3:8; Ụkụr. 3:19; 2 Pit. 3:9.

2. Ịyẹ tị́ du kaahị wuu baba nyọka jẹ́ ang u-uhye nya irya ọ-yẹda? (INehemaya 8:9-11)

² Ọng myị́ ọng ọlẹ kọ ji la ọhịhị baba nyọka jẹ́ ang u-uhye nya irya ọ-yẹda. Ịyẹ tị́ du? Chajị ahị kaa họ ọhọbịrị ẹnụ myị́ ẹnụ. Nyọlẹ kahị ri anyị ị-tụma nya Adam bala Iivu wẹẹ, ọngọngọọng nyahị ri ugu nya ọhọbịrị bala igu. (Rom. 3:23; 5:12) Ọngọngọhẹ nyahị á hi ka. Ọ́ kaa chịkpẹẹ lụmẹ ha angịlẹ kị dọmwụ la ọmyịmyị ọnyọọngịrị, lala ọlẹrụ ịPọlụ, nyọka ma uya kụrụ ọhọbịrị ka. (Rom. 7:21-24) Ọwẹ mẹjẹ nyori ọkịlẹtụ ka kpụhị enyi ụka wuu ọọlajị nya ịhọbịrị nyahị? Ehe, iJihova kaa yẹ ahyẹẹrwẹrwa, ọ tịtọ kahị ka chị ọkẹkẹnị. Kụ ẹhị yẹ oja nya ala iJuu ịlụka nya iNehemaya wẹẹ. (Wa iNehemaya 8:9-11.) IJihova á tịtọ ká ọkịlẹtụ ka kpaa enyi kpoye-kpoye u-uhye nya ịhọbịrị ịlẹ kị họ lụka ọkẹkpẹ ka, ma ọ tịtọ kị ka gbịgba họọ la ọkẹkẹnị. IJihova jẹ́ nyori irya ọ-yẹda kaa kpa ọkẹkẹnị wẹ ọngịnyị. Lẹ, ọ mẹ ang jẹẹhị u-uhye nyọọwa. Kori kahị yẹ irya da, ahị ka jẹ́ myị̀myị nyori Adahị ọla ahyẹẹrwẹrwa ka hịnyọhi hahị.

3. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

³ Ahị jẹ́ ang gụ́ ọọwa u-uhye nya irya ọ-yẹda wẹẹ. Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ang ịta. Ọhọhẹ, ahị ka jẹ́ ẹla ọlẹ ká iJihova mẹjẹ ala Isirẹlụ u-uhye nya irya ọ-yẹda. Ba ọọwa ba, ahị ka yẹ jaabwọ ká iJihova kaa da angịnyị ụbwọ nyọka yẹ irya da. Ohyẹẹkpẹ, ahị ka ya ẹla u-uhye nya ang ọlẹ ká iJisọsị mẹjẹ angịjụgbẹyị nyamwụ u-uhye nya irya ọ-yẹda.

 ẸLA ỌLẸ KÁ IJIHOVA MẸJẸ ALA ISIRẸLỤ U-UHYE NYA IRYA Ọ-YẸDA

4. Ẹlịyẹ iJihova à tị́ mẹjẹ ẹpwụma nya ala Isirẹlụ u-uhye nya irya ọ-yẹda?

⁴ Ụka ká iJihova ya ehile nyamwụ ha ala Isirẹlụ, ị myọnụ nyọka jwoo ihi. IJihova tị myọnụ nyọka chewu kaa bala ọ-wahị kụrwaa ịnyịnyị, kori kị kpa ọnụ ọmyịmyị nyaa. IJihova ya ẹla rụ ehile ị-ịwa yẹkẹẹ: “Ehile ọlẹ kam wẹẹ danụ alẹ á la ujwo kịlaanụ kịla lọkpakpa ka.” (Ehile. 30:11, 16) Ma kori kị la egbeju ọngịrị lee kori kị chụ nyọka gbịgba ha ihye ịkịla, ọ ka wu āhị ọwawa nyamwụ kpa hyaa, ị tị ka yẹ akama ịnyịnyị. Ma, ọọwa á tị ri iJihova nyẹẹkpẹ daa gbang-gbang ka. Ị ka jẹ́-ẹ “nyà wẹ ẹga nya [iJihova, kị ka] dọmwụ nyọka ju ihi nya ehile nyamwụ.” (Ehile. 30:1-3, 17-20) Ọọwa ri, ị ka jẹ́-ẹ yẹ irya da wẹẹ. Kori kị họ ịnyị, iJihova ka tụ jwaa chwẹẹ bala ọ-wahị kụrwaa myị́myị́.

5. Ányị iJihova à tị́ mẹjẹ nyori abwọ á chọọ pyẹpyẹ ẹ-ẹga nya angịnyị nyamwụ ka? (2 Ịdịrịhụ 17:13, 14)

⁵ Angịnyị ịlẹ ká iJihova chụ ha ịlọmwụ wẹ la egbeju ọngịrị tọọ ụka lụmẹ-lụmẹ. Ị gbịgba hi ijiga bala ọ-họ abwẹla ịtịpyọ ịkịla. Ọọwa du kị yẹ akama. Ma iJihova tị kịnyaa la ọ-daa ụbwọ nyọka jẹ́-ẹ gbịgba họọ myị́myị́. O du alọmwụ ẹrụ ugbabwọ ịmanyị tị́ kaka byi angịnyị nyamwụ nyị yẹ irya da kị nyị tịrẹkpẹ wẹ ẹga nya ọwa mẹ.—Wa 2 Ịdịrịhụ 17:13, 14.

6. Ányị iJihova à tị́ kpa alọmwụ nyamwụ mẹ ang jẹ angịnyị nyamwụ u-uhye nya ọbaba nyọka yẹ irya da? (Yẹ ifoto ịnyịnyị.)

⁶ IJihova kaa kpa alọmwụ nyamwụ da angịnyị nyamwụ ọna bala ọ-nwaa rịrị. Ọ-chụ pwokwita, Ohe byi iJeremaya nyị byi ala Isirẹlụ yẹkẹẹ: “Ahu Isirẹlụ ọ-la kpẹẹkpẹẹ-ka ee, nyà tịrẹkpẹ chịm ọgụ mẹ, m̀ ri ọlahyẹẹrwẹrwa, ḿ ka wụ ẹjẹ tang kaka, ḿ ka ju agbama tang kịlahị pyịyọọ kaka. Ọkẹnẹ-kẹnẹ ri, myị abyị nyang nyori à la egbeju-ọngịrị tam . . . mẹ.” (Jer. 3:12, 13) IJihova du iJuwẹlụ kaka byaa yẹkẹẹ: “Anụ yẹ irya da bwu ọkịlẹtụ nyanụ wuu kanụ wẹ ẹga nyam mẹ.” (Juw. 2:12, 13) O byi Ayịsaya nyị ya dodehe yẹkẹẹ: “Anụ hụ́ ịlọnụ kanụ la cheri-cheri. Anụ kpụba la ang onyobyi ịlẹ kam yẹ kanụ wẹẹ họ. Anụ hịnyọ la ang onyobyi ọhọhọ mẹ.” (Ayị. 1:16-19) IJihova tị taa  ịtọ ẹla bwula Isikẹlụ yẹkẹẹ: “Anụ me ka igu ogbugbu nya ala [ọhọbịrị] haam, gụ ọ ka yẹ irya da kị ka hị? . . . Am tịtọ ka ọngọngọhẹ ka gbu ka chajị nya ọọwa lẹ anụ yẹ irya da bwu ẹpwụ nya ịhọbịrị nyanụ kanụ hị mẹ.” (Isi. 18:23, 32) Ọ kaa kpụ iJihova ịpyọ ụka kọ yẹ angịnyị kị yẹ irya da chajị ọ tịtọ kị ka hịhị gboyi myị́ oyi! Lẹ, iJihova á kaa godayị ịịwẹ gbe angị họ ọhọbịrị nyọka yẹ irya da ene kọ ka daa ụbwọ ka. Ahị yẹ ọ-chụ pwokwita ịkịla u-uhye nya ẹlẹwẹ wẹẹ.

7. Ẹlịyẹ iJihova à tị́ mẹjẹ angịnyị nyamwụ bwula oja nya iHoseya bala ahụ nyamwụ?

⁷ IJihova mẹjẹ angịnyị nyamwụ jaabwọ kọ nwụlanọ kaka ba nyọka daa ụbwọ yẹ irya da bwula oja nya ọlọmwụ iHoseya bala ịGọma ahụ nyamwụ. Nyọlẹ kọ họ ụya kpá, ọ myị́myị́ rụ ba ọlẹng ọkịla hi iHoseya ọrụmwụ. Iwe-ahụrụ nyamwụ tịpyọ kpoye nyọka yẹda? IJihova ọngọlẹ kọ jẹ́-ẹ yẹ ọkịlẹtụ nya ọngịnyị byi iHoseya yẹkẹẹ: “Kele ka myịmyị mẹ ọháha nyang jẹ ahụ nyang, ịnọ ọ la oligu juwa lẹ, ọ tị ri ọlakpara. Tị la ọhaha ẹ-ẹga nyamwụ myịmyị mẹ. Ịịwẹ [am iJihova à] mẹ ọháha nyam jẹ u-uhye nya ala Isirẹlụ ụka kị dọmwụ jahị kpata him juwa gbịgba ha ijiga” lẹ. (Hos. 3:1; Etu 16:2) Jẹ́ nyori ahụ nya iHoseya juwa ẹ-ẹpwụ nya ọhọbịrị ọtụka ọhọhọ ụka ọwẹ wẹẹ. Ma, iJihova tị byi iHoseya nyị hịnyọhi họọ kị nyị yoo tịrẹkpẹ. a IJihova tịtọ kọ ka bwula oja ọwẹ mẹ ang jẹ angịnyị nyamwụ jaabwọ ká ẹla nyaa lọọ. Ọ la ọháha ẹ-ẹga nyaa, nanana nyori ị wẹẹ họ ang ịlẹ kị tịpyọ kaka kpoye. Ọ kịnyaa la o-du alọmwụ nyamwụ erụ taa nyọka daa ụbwọ kị ka yẹ irya da bala ọ-yẹ abwẹla nyaa da. Oja ọwẹ mẹjẹ nyori iJihova jẹ́ ẹla ọla ọkịlẹtụ nya ọngịnyị wuu, ọ tị kaa da ọngịnyị ọlẹ kọ juwa ẹ-ẹpwụ nya ọhọbịrị ọhọhọ ụbwọ nyọka yẹda. (Etu 17:3) Ahị yẹ abwọlẹ ká iJihova kaa bwu họ ịnyị wẹẹ.

JAABWỌ KÁ IJIHOVA KAA DA ANGỊNYỊ ỤBWỌ NYỌKA YẸ IRYA DA

8. Ẹlịyẹ iJihova à tị́ họ nyọka da iKen ụbwọ yẹ irya da? (Ọmwụ Ọdada 4:3-7) (Yẹ ifoto ịnyịnyị.)

⁸ IKen à ri ọnyị nya ọgbanyẹ nya Adam bala Iivu lẹ. Lẹ, ọ ri ugu nya ọhọbịrị bwu ẹga nya adamwụ bala ịnamwụ. Da ọọwa u-uhye, ịBayịbụụ ya ẹla rwọọ yẹkẹẹ: ‘Abwẹla nya iKen ayịdang tịpyọ.’ (1 Jọn. 3:12) Ọhẹka ọọwa à ka dudu ká iJihova á “ye iKen ayịdang lee ọhaha nyamwụ kpong-kpong ka” ụka kọ kịliya lẹ. Ọkọkọ nyọka yẹ abwẹla nyamwụ da, ‘iKen wụ ẹjẹ lụmẹ-lụmẹ, juwa bwọ ayiiji ọtụka-ọtụka chajị nya ọọwa.’ Ẹlịyẹ iJihova à tị́ họ ba ọọwa ba? O ya ẹla bala iKen. (Wa Ọmwụ Ọdada 4:3-7.) À ka yẹ wẹ nyori iJihova ya ẹla ta iKen kpẹnẹẹ, ya ahị ọdahile họọ nyori ọ ka dọọ ụbwọ. IJihova myị́myị́ da iKen ọna nyori ọhọbịrị nyamwụ nyị ka kpọọ kaka họ ang ọtịpyọ myị́. Ọ tị tolujwo nyori iKen á myị ke ụrụ ka. Ọ́ myị iJihova ka dọọ ụbwọ kpụ ọ ka yẹ irya da ka. Nyọlẹ ká ẹla nya iKen la ịịwẹ kpá, iJihova hwabwọ la ọ-ka da alịhọbịrị ụbwọ nyọka yẹ irya da? Ọ́ lịnyị kpong-kpong ka!

9. Ányị iJihova à tị́ da iDevidi ụbwọ nyọka yẹ irya da?

⁹ IJihova la ọháha ẹ-ẹga nya Adịrahụ iDevidi hiigu-hiigu. Ọ dọmwụ wụrụ iDevidi nya “ọngọlẹ kọ kaa họ ẹla wum Am Ohe Oluhye ẹpwụ hiigu lụmẹ.” (Ụkụr. 13:22) Ma iDevidi họ ịhọbịrị ịtịpyọ-tịpyọ, lala ụya bala ọngịnyị ọnwụnwụ. Jaabwọ ká Ehile nya iMosisi ya, iDevidi chịla kọ ka gbu ịnọ. (Liv. 20:10; Ọwa. 35:31) Ma, iJihova tị tịtọ nyọka dọọ ụbwọ kọ ka yẹda. b Ọ du  ọlọmwụ iNatan ẹrụ kaka ju adịrahụ ụga, nanana nyori iDevidi á mẹjẹ nyori ọ yẹ irya da lẹka. INatan kpa ẹla ọ-chụ pwokwita ọhẹ ya ẹla nyọka da iDevidi ụbwọ jẹ́ abyị nya ẹla ọlẹ kọ họ. Nyọlẹ ká iDevidi jẹ́ jaabwọ ká ẹla ọọwa wụ iJihova ẹjẹ kaka ba, ọ yẹ irya da. (2 Sam. 12:1-14) Ọ da ụpwụ nya eje ọnyịịla ọhẹ nyọka mẹjẹ jaabwọ ká ẹla ọlẹ kọ họ tọọ olujwo kaka ba. (Eje. 51, egbeju nya ẹla oluhye) Iru nya angịnyị ịlẹ kị họ ịhọbịrị kaa yé ẹjẹ ọkpụ́kpụ ụka kị wa eje ọnyịịla ọwẹ, ọ tị kaa gwaa gbịla nyọka yẹ irya da ịnyịnyị. Ọ́ myịhị lẹhị nyọlẹ ká iJihova la ọháha ẹ-ẹga nya iDevidi ọnchẹ nyamwụ bala ọ-dọọ ụbwọ nyọka yẹ irya da ka?

10. Ányị ọ tị́ lang nyọka jẹ́ nyori iJihova kaa ju ugbodu balahị bala ọ-hịnyọhi hahị?

¹⁰ Ọhọbịrị wụ iJihova ẹjẹ, ọ́ kaa ya iwe da họọ ụ-ụgbẹyị ọhẹ-lọhẹ ka. (Eje. 5:4, 5) Ma, ọ tị jẹ́ nyori ahị wuu nyị ri alịhọbịrị, lẹ ọháha ọlẹ kọ la ẹ-ẹga nyahị du kọ kaa dahị ụbwọ nyọka ma uya kụrụ ọhọbịrị. Ọ kaa maga ụka wuu nyọka da ọngọlẹ kọ dọmwụ họ ọhọbịrị yẹẹyẹẹ ụbwọ nyọka yẹ irya da bala ọ-tụ jwoo chwẹẹ. Ọ ri ẹjẹ ọkpụ́kpụ hahị nyọka jẹ́ nyori iJihova tịtọ kọ ka hịnyọhi hahị! Jaabwọ kahị wẹẹ kụ irya u-uhye nya ugbodu ojuju bala ọ-hịnyọhi nya iJihova, ahị kaa cheje nyọka godayị giri-giri ẹ-ẹga nyamwụ bala ọ-ka yẹ irya da ahyaahị ụka kahị họ ọhọbịrị. Ahị kụ ẹhị yẹ ẹla ọlẹ ká iJisọsị mẹjẹ angịjụgbẹyị nyamwụ u-uhye nya irya ọ-yẹda ugbẹnyị wẹẹ.

ẸLA ỌLẸ KÁ IJISỌSỊ MẸJẸ ANGỊJỤGBẸYỊ NYAMWỤ U-UHYE NYA IRYA Ọ-YẸDA

11-12. Oja ọkpịta oyina iJisọsị à tị́ ja nyọka mẹjẹ́ẹhị nyori Adamwụ kaa nwụlanọ nyọka hịnyọhi hahị? (Yẹ ifoto ọla ẹbẹ nya ọgbanyẹ.)

¹¹ Nyọlẹ ká ụka họ ká iMesaya ka wẹ odehe ọlẹ, iJihova kpa ịJọn Ọngọ Hu Enyi Ohe ya ẹla nya Ohe je angịnyị nyamwụ bala ọ-jwaa ọhụ kị ka yẹda. Ụka ká iJisọsị tị dọmwụ nyọka kpa ẹrụ ọnyịịla pyẹ ịnyịnyị, ọ mẹjẹ angịnyị nyori irya ọ-yẹda nyị baba yẹẹyẹẹ.—Mat. 3:1, 2; 4:17.

¹² Ụka ká iJisọsị jam odehe ọlẹ, ọ mẹjẹ angịnyị nyori Adamwụ nyị nwụlanọ nyọka hịnyọhi hahị ụka kahị họ ọhọbịrị. IJisọsị mẹ ẹla ọkpọnchị ọwẹ jẹ ụka kọ ja oja nya ọnyị oluhwo. Ọnyị okolobya ọwẹ chụ nyọka rụ hi ẹpwa kaka họ ang ọtịpyọ pwụ ụka ọhẹ. Ma nyọlẹ kọ nọ chẹẹ, kọ “jẹ́ ịlọmwụ ogu kpá lẹ,” ọ  nyà wẹ ẹpwa lẹlẹ. Ányị adamwụ à tị́ họ? IJisọsị ya nyori “ụka ọlẹ ká adamwụ chẹhị kaka yọọ ẹ-ẹga ọlụrụ kọ juwa nya wẹ ẹpwa lẹ, ọ la adamwụ ahyẹẹrwẹrwa lụmẹ lẹlẹ. Ọọwa lẹ, ọ rụnyẹ kele kaka tọọ ụ-ụgbẹyị, juwa woo ba ajẹ, juwa jwoo ọnụ ụ-ụwa ịnyịnyị lẹlẹ.” Irya nya ọnyị ọwẹ ịnọ ri ọ-ka nyà ka ri ọnchẹ ẹ-ẹpwa nya adamwụ ịnyị, ma adamwụ tị wụrọọ nya “ọnyị nyam” bala o-yoo tịrẹkpẹ juka ugbiyegu nyamwụ. Adịda ọọwa yẹkẹẹ: “Ọ gum byi gbalẹ-gbalẹ, ma, lẹẹlẹẹ lẹ, m tị yọọ ịnyịnyị lẹ.” (Luk. 15:11-32) Ụka ká iJisọsị juwa e-epwoohe ene kọọ wẹ odehe ọlẹ, ọ la iwe kpụ ọ yẹ jaabwọ ká Adamwụ kaa mẹ ahyẹẹrwẹrwa ọlịịwẹ jẹ ẹ-ẹga nya iru nya alịhọbịrị ịlẹ kị yẹ irya da. Oja ọlẹ ká iJisọsị ja wẹ ya ẹjẹ ọkpụ́kpụ hahị ịnyịlẹhị, ọ tị mẹjẹ jaabwọ ká iJihova Adahị la ahyẹẹrwẹrwa kaka ba ịnyịnyị!

13-14. Ẹlịyẹ ọlẹrụ iPita à tị́ jẹ́ u-uhye nya irya ọ-yẹda? Ẹlịyẹ ọ tị́ mẹjẹ angịkịla u-uhye nyamwụ? (Yẹ ifoto ịnyịnyị.)

¹³ Ọlẹrụ iPita jẹ́ ẹla ọkpọnchị bwu ẹga nya iJisọsị u-uhye nya irya ọ-yẹda bala ọ-hịnyọhi. IPita họ ẹla abyị ụka lụmẹ-lụmẹ, iJisọsị tịị nwụlanọ nyọka hịnyọhi họọ ịnyịnyị. Ọ-chụ pwokwita, nyọlẹ ká iPita pwa Ayịbamwụ arwarụ ụka ịta kpá, ẹla ọọwa tọọ olujwo kaka kpoye. (Mat. 26:34, 35, 69-75) Ma nyọlẹ ká iJisọsị wuleji bwula igu kpá, ọ mẹ ịlọmwụ jẹ iPita ụka ọlẹ kọ juwa ụbwọọmwụ chajị nyọka ya ẹla balọọ. (Luk. 24:33, 34; 1 Kọr. 15:3-5) IJisọsị jẹ́ nyori iPita yẹ irya da lẹ, lẹ ọ tịtọ nyọka họ kọ ka jẹ́ myị̀myị̀ nyori ọwa nyị hịnyọhi họọ ịnyịnyị lẹ.

¹⁴ IPita la ịlọmwụ jẹ́ jaabwọ kọ kaa la ụka ká ọngịnyị á yẹ irya da kị hịnyọhi họọ. Lẹ, ọ jẹ́ mẹ ang jẹ angịkịla u-uhye nya ẹla ọlẹ kọ jẹ́. Ụka ọhẹ nyọlẹ kị họ ọhụhụ ọlụka nya iPentikọsị kpá, iPita mẹ ang jẹ ị-ịlahị nya iru nya ala iJuu kpụ ọ wụlẹ ya jaa nyori ịwa nya-à nwụ iMesaya lẹ. Ma, ọ tị byaa yẹkẹẹ: “Lẹ, anụ yẹ irya da lẹẹlẹẹ bwu ẹpwụ nya ịhọbịrị ịhọhọ nyanụ, kanụ nya tịrẹkpẹ chị Ohe Oluhye ọgụ, ká Ohe  Oluhye a yịlẹ ibyi nya ịhọbịrị ịhọhọ nyanụ ịịwa wuu hiinu mẹ. Chajị kanụ ka jẹ́-ẹ la ila ọchịchị o-bwu ijata nya Ọngọlahị Ohe Oluhye ẹ-ẹpwụ nya ọhịhị onyeewe nyanụ ọọwa ịnyịnyị mẹ.” (Ụkụr. 3:14, 15, 17, 19) Lẹ, iPita mẹjẹ nyori irya ọ-yẹda nyị kaa gu ọlọhọbịrị gbịla nyọka nwụ ọhịhị nyamwụ họ. Ọọwa ri ọ kaa yẹ irya ọtịpyọ nyamwụ da, hwabwọ la ang ọtịpyọ ọhọhọ, bala ọ-họ ẹla ọlẹ kọ ka kpụ Ohe ịpyọ. IPita myị́myị́ mẹjẹ nyori iJihova nyị ka hịnyọhi haa chẹpwụ-chẹpwụ. Ọ lala o-ri nyị hịlẹ ịhọbịrị ịịwa du kị myị gbanggbang lẹ. Nyọlẹ ká ẹka lụmẹ-lụmẹ chịpwụrụ kpá, ọlẹrụ iPita myị́myị́ họ ká Angịnyị nya ịKịrayịsị ka jẹ́ myị̀myị̀ yẹkẹẹ: “[IJihova] juwa ju ugbodu ẹ-ẹga nyanụ, juwa ya ẹga da hanụ, chajị kanụ ka jẹ́-ẹ yẹ irya da ịnyị. Chajị, Ohe Oluhye ayịdang á tịtọ ká ọngọngọhẹ ka ta ayịreji ẹ-ẹpwụ nya ọhọbịrị ọhọhọ kpong-kpong ka. Ma, ká ọng myị́ ọng wuu ka yẹ irya da . . . ịnyị!” (2 Pit. 3:9) Ẹhị ọrịrịị-rịrị ọtụka à wẹ hahị ụka kahị họ ọhọbịrị lẹ, kori kọ dọmwụ rị ọhọbịrị ọtụka wẹwẹ!

15-16. (a) Ányị ọlẹrụ ịPọlụ à tị́ bwu jẹ́ ang u-uhye nya ọ-hịnyọhi? (1 iTimoti 1:12-15) (b) Ẹlịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọkịla?

¹⁵ ỊSọlụ ọla ịTaasọsị họ ang ọtịpyọ lụmẹ-lụmẹ. Ọ tụ angịjụgbẹyị nya ịKịrayịsị pyịpyị la ọngịrị-ọngịrị. (Ụkụr. 7:58–8:3) Ọ ka la iru nya Angịnyị nya ịKịrayịsị lala o-ri nyị́ ka jẹ́-ẹ yẹda ẹnẹnẹhẹ kaka. Ma, iJisọsị ọwa jẹ́ nyori ịSọlụ ka jẹ́-ẹ nwụhọ bala ọ-yẹ irya da myị́ wẹẹ. Ọwa bala Adamwụ yẹ abwẹla ịnyịịla u-uhye nya ịSọlụ. IJisọsị yẹkẹẹ: “M chụ ịSọlụ ọwẹ kọ ka ri ang-abwọ ọ-kpa họ ụkụrwọ nya ẹrụ ọnyịịla.” (Ụkụr. 9:15) IJisọsị dọmwụ kpa ụkụrwọ ẹbyẹbyị da ịSọlụ ụbwọ nyọka yẹ irya da. (Ụkụr. 9:1-9, 17-20) Nyọlẹ ká ịSọlụ ọlẹ kịị wụrụ nya ọlẹrụ ịPọlụ wẹ ka ri Ọngịnyị nya ịKịrayịsị kpá, ọ kaa ya jaabwọ ká ụgbẹyị ọlẹ ká Ohe họọ ọnahị bala ọ-yọọ ahyẹẹrwẹrwa myọọ lẹhị kaka ba. (Wa 1 iTimoti 1:12-15.) ỊPọlụ yẹkẹẹ: ‘Ohe Oluhye wẹẹ yẹ angịnyị ahyẹẹrwẹrwa tata ịnyị, chajị kaahị angịnyị ehe ka yẹ irya da bwu ẹpwụ nya ịhọbịrị ịhọhọ nyahị.’—Rom. 2:4.

¹⁶ Ụka ká ịPọlụ wo ẹla nya ụya ọhọhọ ọtịpyọ ọlẹ kọ ji ọjịra-jịra nya Angịnyị nya ịKịrayịsị ọla ịKọrịntị, ányị ọ tị́ họ? Ọ họ ẹla ụ-ụgbẹyị ọlẹ kọ mẹ ẹla ọkpọnchị jẹẹhị u-uhye nya abwọlẹ ká iJihova kaa yalibyi la ọngịnyị ẹ-ẹpwụ nya ọháha bala u-uhye nya ọbaba nyọka yẹ ahyẹẹrwẹrwa. Ẹ-ẹpwụ nya ang ọjẹ́jẹ ọkịla, ahị ka kụ ẹhị yẹ ẹla ọlẹ kọ họ ọọjịra-jịra ọla ịKọrịntị rige-rige.