ANG ỌJẸ́JẸ 35
EJE 123 Loyally Submitting to Theocratic Order
Jaabwọ ká Angịgbahị nya Ọjịra-jịra ka Da Ọngọlẹ kị Gba Kpehe Ụbwọ
“Ọkẹkẹnị ọtụka ka juwa e-epwoohe u-uhye nya ọngọhọbịrị ookpokpo ọlẹ kọ yẹ irya da gụ ọkẹkẹnị oluhye nya alabwẹla ọnyịịla [iwo ihikichu kụrụ ihikichu] ịlẹ kị yẹ irya da kpá gbalẹ-gbalẹ ene-ene lẹ.” —LUK. 15:7.
ẸHỊ NYA ẸLA
Ang odudu kị baba nyọka ku angịhyẹ kpehe hi ọjịra-jịra bala abwọlẹ ká angịgbahị ka daa ụbwọ nyọka yẹ irya da bala ọ-tịrẹkpẹ ka ri igu bala iJihova myị́myị́.
1-2. (a) Ányị iJihova à tịị yẹ alịhọbịrị ịlẹ kị myị yẹda ka? (b) Ẹlịyẹ iJihova à tị́ tịtọ ká angị họ ọhọbịrị ka họ?
IJIHOVA á ri Ohe ọlẹ kọọ myọnụ ju abwẹla ọnyị myị́ ọnyị ka. Ọhọbịrị wọọ ẹjẹ. (Eje. 5:4-6) Bwula ẹla ọjẹ́jẹ, o ya ahị nyị ba ehile ịlẹ kọ da ẹ-ẹpwụ nya Omyi Ẹla nyamwụ jẹ. Ẹlịlẹhị tị ri, iJihova á yẹhị rịrị nyori ahị ka ju ihi nya ehile nyamwụ kpẹẹkpẹẹ ka, chajị áhị la kpẹẹkpẹẹ ka. (Eje. 130:3, 4) Tị wẹẹ, ‘angịle kị myị ju ihi nya Ohe Oluhye ka, kị wẹẹ pyị ẹrụ ọnyịịla nya ọnahị anyoko chajị kị ka hi iwe ha ịlaa ẹ-ẹpwụ nya ịhọbịrị ịhọhọ,’ á kaa họ́ọ kpong-kpong ka. (Jud. 4) ỊBayịbụụ ya gbagbịla nyori Ohe nyị ka “ya eje nyamwụ wu alọhọbịrị bala ọ-ka taa ayịreji gbanggbang” ụka nya ẹwụ nya Amagẹdọn.—2 Pit. 3:7; Ọwụ. 16:16.
2 Ma, iJihova á tịtọ ká ọngọngọhẹ ka tayịreji ka. Ẹ-ẹpwụ nya Ẹpwang ọ-Kụ Gbeji ọlẹ, ahị yẹ jaabwọ ká ịBayịbụụ ya gbagbịla nyori Ohe tịtọ “ká ọng myị́ ọng wuu ka yẹ irya da.” (2 Pit. 3:9) Lala iJihova, angịgbahị nya ọjịra-jịra kaa ju ugbodu ụka kị ja maga nyọka da angịlẹ kị họ ọhọbịrị ụbwọ nyọka yẹ irya da bala ọ-tịrẹkpẹ ka ri igu bala iJihova myị́myị́. Ma, a-angịlẹ wuu kị họ ang ọtịpyọ à kaa myọnụ nyọka yẹ irya da ka. (Ayị. 6:9) Nanana nyori angịgbahị nya ọjịra-jịra kaa maga ụka lụmẹ-lụmẹ nyọka da angịhyẹ ụbwọ kị ka yẹ irya da, ịị kịnyaa la ang ọtịpyọ ọhọhọ. Ányị angịgbahị à tị́ ka họ ụka kọ lịnyị?
‘ANỤ GBA ỌLỌHỌBỊRỊ KPEHE’
3. (a) Ányị ịBayịbụụ à tị́ ya nyị họ ẹ-ẹga nya alịhọbịrị ịlẹ kị myị yẹda ka? (b) Ịyẹ tị́ du kahị ka jẹ́-ẹ ya nyori ọlọhọbịrị lịlọmwụ à chụ kị ka gbọọ kpehe hi ọjịra-jịra lẹ?
3 Ụka ká ọngọ họ ang ọtịpyọ á myị yẹ irya da ka, o ri o-pyii ká angịgbahị nya ọjịra-jịra ka ba ẹla ọlụpwụ nya 1 Ala ịKọrịntị 5:13, NW jẹ. Ụwa yẹkẹẹ: “Anụ [gba] ọngọhọbịrị ọwẹ kpehe hi ẹpwụ nya ogu nyanụ.” Ọngọ họ ọhọbịrị ọwẹ jẹ́ ene-ene nyori nyị ka gbọọ kpehe hi ọjịra-jịra kori kọ myị yẹ irya da ka. Lẹ, ọ lala o-ri ọwa lịlọmwụ à chụ kị ka gbọọ kpehe lẹ. Ang ọlẹ kọ ya tọọ, ọ wẹẹ wụ lẹ. (Gal. 6:7) Ịyẹ tị́ du kahị ka jẹ́-ẹ ya ịnyị? Chajị ọngọ họ ọhọbịrị ọwẹ pwa la ọ-ka yẹ irya da nanana nyori angịgbahị nya ọjịra-jịra maga ụka lụmẹ-lụmẹ nyọka dọọ ụbwọ. (2 Ịdị. 17:12-15) Abwẹla nyamwụ mẹjẹ nyori ọ́ tịtọ nyọka ba ehile nya iJihova jẹ ka.—Ehile. 30:19, 20.
4. Ịyẹ tị́ du kị kaa ya dodehe ụka kị gba ọlọhọbịrị kpehe hi ọjịra-jịra?
4 Ụka kị gba ọlọhọbịrị ọlẹ kọ myị yẹ irya da ka kpehe hi ọjịra-jịra, ị kaa ya dodehe je alọjịra-jịra nyori ọngọọwa nyị́ ri ọngọhẹ nya Alibeenu nya iJihova kaka. a Ẹla o-ya dodehe ọọwa á ri ọchajị nyọka hu oyoyi ju ọngọ họ ang ọtịpyọ ọọwa ka. Ma, i họ ịnyị chajị ká alọjịra-jịra ka ba ehile ọla ịBayịbụụ jẹ ịnyị. Ehile ọọwa yẹkẹẹ: “Anụ juwa ju ogu” ta ọngọ họ ang ọtịpyọ lee ọ-dọmwụ “juwa baba ju epwedii nya ang oriri ta ọngọọwa kpong-kpong kaka.” (1 Kọr. 5:9-11) IJihova yẹ ang ọnyịịla ọhẹ ọlẹ kọ du kọ kpa da ehile ọwẹ. Ọlẹrụ ịPọlụ da ụpwụ nyori, “ịjọnwa ochiche-ochiche nyaa kaa họ ká ẹbẹ nya ịkaa ọlẹpwụ-lẹpwụ nyị kaa mịrị hum myị́ lẹ.” (1 Kọr. 5:6) Kori ká ọngọ họ ang ọtịpyọ á pwa ọ-yẹ irya da kị tị pẹhyoo juwa ọọjịra-jịra aalẹ, ọ ka du ká angịkịla ka me irya nyori ịwa nyị́ baba nyọka ju ihi nya ehile nya iJihova ka ịnyịnyị. —Etu 13:20; 1 Kọr. 15:33.
5. Ányị ahị tị́ ka yẹ ọngọlẹ kị gba kpehe hi ọjịra-jịra? Ịyẹ tị́ du?
5 Lẹẹlẹ, ányị ahị tị́ ka yẹ ọọnahị ọlẹ kị gba kpehe hi ọjịra-jịra? Nanana nyori áhị ka yẹju lawule balọọ ka, ahị baba nyọka yọọ lala ọngọlẹ ká ahị ọdahile ji ha wẹẹ. Ọ lala ọkpịlọ ọlẹ kọ byi ịnyị. Kori ká ọkpịlọ ọhẹ á tị hwahị hi ịkịla, ọ ka nyà tịrẹkpẹ myị́ wẹẹ. Ahị kpịtịya nyori ọngọọwa hu ịlọmwụ ju iJihova ụ-ụbwọ lụka ọkẹkpẹ lẹ. Ọ tị tolujwo nyori ọlẹẹlẹẹ, ọ́ myị họ ọnụ ọmyịmyị nyamwụ jịra nyọka godayị giri-giri ha iJihova kaka. Ọọwa du kọ hu ịlọmwụ ju iiwe-ahụrụ ọlẹ kọ la uhi-uhi. (Isi. 18:31) Tị wẹẹ, ahị la ẹhị ọrịrịị-rịrị nyori nyọlẹ ká ụka ji wẹẹ ká iJihova tị nwụlanọ nyọka yẹ ahyẹẹrwẹrwa lẹ, ọngọọwa ka yẹda myị́ wẹẹ. Lẹ, ányị angịgbahị nya ọjịra-jịra à tị́ ka bwu da ọngọlẹ kị gba kpehe ụbwọ?
ABWỌLẸ KÁ ANGỊGBAHỊ NYA ỌJỊRA-JỊRA KA DA ỌNGỌLẸ KỊ GBA KPEHE ỤBWỌ
6. Ẹlịyẹ angịgbahị nya ọjịra-jịra à tị́ ka họ nyọka da ọngọlẹ kị gba kpehe ụbwọ?
6 Angịgbahị nya ọjịra-jịra ka hwabwọ la ọ-da ọngọlẹ kị gba kpehe hi ọjịra-jịra ụbwọ nyọka tịrẹkpẹ wẹ ẹga nya iJihova? Ehehe! Ụka ká angịgbahị á ja ya je ọngịnyị nyori nyị ja ka gbọọ kpehe hi ọjịra-jịra lẹ, ị ka wụlẹ ẹta-ẹdịyẹ ịlẹ kọ ka hu nyọka tịrẹkpẹ joo ịnyịnyị. Ma, ị́ tị ka ba ọọwa kem ka. Iiwe-ahụrụ lụmẹ-lụmẹ, ị ka byi ọngọ họ ang ọtịpyọ ọwẹ nyori nyị ka há ịwa nyọka yọọ myị́myị́ kori ká ọya ịmányị-mányị á chịpwụrụ kpá nyọka yẹ kori kọ yẹ irya da lẹ. Kori ká ọlọhọbịrị ọọwa á myọnụ nyọka taa myị́myị́ aalẹ, angịgbahị ka jwoo ọhụ la irya ọnyịịla ụka kị ka tọ awụlẹ nyọka maga kọ ka yẹ abwẹla nyamwụ da bala ọ-tịrẹkpẹ chị ọjịra-jịra ọgụ. Kori kọ tị dọmwụ yẹ ọkịlẹtụ nyamwụ da ụka ọọwa lẹka, angịgbahị ka maga nyọka yọọ ị-ịlahị myị́myị́ nyọka jwoo ọhụ kọ ka yẹda.
7. Ányị angịgbahị à tị́ ka mẹ ahyẹẹrwẹrwa jẹ lala iJihova ụka kị ja họ ẹla ẹ-ẹga nya ọngọlẹ kị gba kpehe hi ọjịra-jịra? (IJeremaya 3:12)
7 Angịgbahị nya ọjịra-jịra ka maga kị ka mẹ ahyẹẹrwẹrwa jẹ lala iJihova ụka kị ja họ ẹla ẹ-ẹga nya ọngọlẹ kị gba kpehe hi ọjịra-jịra. Ọ-chụ pwokwita, lụka ọnyọgọ, iJihova á godayị gbe ala Isirẹlụ angịnyị nyamwụ nyọka yẹ irya da ene kọọ maga nyọka daa ụbwọ ka. Ọkọkọ nyọọwa, ọ du alọmwụ nyamwụ ẹrụ taa, ene kị dọmwụ yẹ abwẹla nyaa da. Jaabwọ kị wụlẹ ya jehi a-ang ọjẹ́jẹ oheeye ọlẹpwụ nya Ẹpwang ọ-Kụ Gbeji ọlẹ, iJihova kpa ọ-chụ pwokwita mẹjẹ jaabwọ kọ kaa yẹ ahyẹẹrwẹrwa kaka ba ụka kọ byi ọlọmwụ iHoseya nyori nyị ye ahụ nyamwụ tịrẹkpẹ mẹ nanana nyori ahụ nyamwụ ọọwa juwa họ ụya wẹẹ. (Hos. 3:1; Mal. 3:7) Nyọka gbịla iJihova, angịgbahị nya ọjịra-jịra ka mẹjẹ nyịlẹhị-ịlẹhị nyori ị tịtọ ká ọngọ họ ang ọtịpyọ ọwẹ ka yẹda bala ọ-tịrẹkpẹ, lẹ ị́ ka họ ịngịngịhyẹ ọlẹ kọ ka du ká ọ-họ ịnyị ka lujwo họọ ka.—Wa iJeremaya 3:12.
8. Ányị oja ọkpịta nya iJisọsị u-uhye nya ọnyị oluhwo à tị́ dahị ụbwọ nyọka yẹ jaabwọ ká iJihova la ahyẹẹrwẹrwa kaka ba? (ILuku 15:7)
8 Kpịtịya nya oja ọkpịta nya iJisọsị u-uhye nya ọnyị olujwo ọlẹ kị ya ẹla rụ́ a-ang ọjẹ́jẹ oheeye nya Ẹpwang ọ-Kụ Gbeji ọlẹ. Ụka ká adamwụ chẹhị kaka yọọ bwu ẹga ọlụrụ kọ ja nyà wẹ ẹpwa, “ọ rụnyẹ kele kaka tọọ ụ-ụgbẹyị, juwa woo ba ajẹ, juwa jwoo ọnụ.” (Luk. 15:20) Ahị yẹ wẹ nyori adịda ọwẹ á godayị gbe ọnyị nyamwụ kọ ka bịlẹ ọhịnyọhi ene ka. Ọkọkọ nyọọwa, ọwa à hu ẹta-ẹdịyẹ ọhọhẹ nyọka ta ọnyị nyamwụ lẹ, jaabwọ ká adịda ọ-la ọháha kaa họ. Angịgbahị nya ọjịra-jịra ka maga kị ka la irya ọlịịwẹ ịnyịnyị ẹ-ẹga nya angịlẹ kị hwahị. Ị tịtọ ká ịkpịlọ ịlẹ kị byi wẹ, ka “nyà tịrẹkpẹ wẹ ẹpwa.” (Luk. 15:22-24, 32) Ọkẹkẹnị ka juwa e-epwoohe ụka ká ọlọhọbịrị-ị́ yẹ irya da, ọkẹkẹnị tị ka jam odehe ịnyịnyị!—Wa iLuku 15:7.
9. Ẹlịyẹ iJihova à tị́ tịtọ ká alịhọbịrị ka họ?
9 Bwu ẹla ọlẹ kahị kụ ẹhị yẹ wẹ, ọ la gbagbịla nyori iJihova-á chị ọkẹkẹnị bala angị họ ang ọtịpyọ ịlẹ kị pwa ọ-ka yẹ irya da ka. Ma, ọ́ kaa ji ẹkpẹ nyamwụ daa ka ịnyịnyị. Ọ tịtọ kị ka tịrẹkpẹ chọọ ọgụ. IJihova ya jehi jaabwọ kọ kaa lọọ ụka ká angị họ ọhọbịrị á yẹ irya da. Ọ ya ụ-ụpwụ nya iHoseya 14:4 yẹkẹẹ: “M̀ ka tịrị angịnyị nyam ẹkpẹ nyà chị ịlọm ọgụ myịmyị. Ị ka hám bwu ẹpwụ nya ọkịlẹtụ nyam wuu. Ḿ ka myịmyị-ị́ ju agbama taa kaka.” Nyọlẹ ká angịgbahị jẹ́ jaabwọ ká ẹlẹwẹ la iJihova wẹẹ, ị ka yẹhị reeji nyọka yẹ ang-ẹjẹẹ ọhẹ ọlẹ kọ ka mẹjẹ nyori ọngọọwa ja yẹ irya da lẹ. Ẹlẹwẹ ịnyịnyị tị ka ya ọ-jẹ́ myị̀myị̀ ha angịlẹ kị rụ hi iJihova lẹ nyori ị họ́ọ wẹẹ, ọ tị tịtọ kị ka tịrẹkpẹ wẹ ẹga nyamwụ.
10-11. Ányị angịgbahị nya ọjịra-jịra à tị́ ka bwu maga nyọka da angịlẹ kị gbaa kpehe lụka ọtata lẹ ụbwọ?
10 Angịlẹ kị tị gbaa kpehe hi ọjịra-jịra lụka ọkẹkpẹ lala ẹka ịmányị tị́ lẹ bẹ? Ọhẹka, angịịwa ka hwabwọ la ọ-họ ang ọtịpyọ ọlẹ kọ du kị kpa gbaa kpehe lẹ myị́. Ụka ọhẹ, angịhyẹ nyaa á ka dọmwụ kpịtịya nya ang ọlẹ kị họ du kị gbaa kpehe kaka. Jaabwọ myị́ abwọ kọ tata kaka ba ká angịwẹ-ẹ́ chị ebwo hi ọjịra-jịra lẹ, angịgbahị ka maga nyọka jẹ́ ẹga kị ji bala ọ-jwaa ụga. Ụka kị jwaa ụga ọlịnyị, angịgbahị ka raabwọ balaa bala ọ-jwaa ọhụ kị ka tịrẹkpẹ wẹ ọjịra-jịra. Tị wẹẹ, kori ká ọngịnyị á kpehe hi ọjịra-jịra la ẹka lụrụ-lụrụ lẹ, ọ ri ịnyịlẹhị nyori ọ ka baba nya ụbwọ ọdada nyọka jẹ́ iJihova bala ẹlịlẹhị ịlẹpwụ nya ịBayịbụụ myị́myị́. Lẹ, kori ká ọngọlịnyị-ị́ tịtọ nyọka tịrẹkpẹ, ọ ka chịkpẹẹ myị́ ká angịgbahị nya ọjịra-jịra ka ya je ọngọhẹ kọ ka dọmwụ nyọka mẹ ịBayịbụụ jọ́ọ myị́myị́, kori kị dọmwụ tịrọọ ẹkpẹ wẹwẹ lẹka. Iiwe-ahụrụ ịlịịwẹ wuu tị, angịgbahị nya ọjịra-jịra à ka chụ ọngọlẹ kọ ka jẹ́ ịBayịbụụ bala ọngọọwa lẹ.
11 Angịgbahị nya ọjịra-jịra ka maga nyọka gbịla ahyẹẹrwẹrwa ọlẹ ká iJihova la ẹ-ẹga nya angịnyị. Lẹ, ị ka mwahị nya angịlẹ wuu kị hwahị hi ẹga nya iJihova nyọka jwaa ọhụ kị ka tịrẹkpẹ wẹ ẹga nyamwụ. Ụka ká ọngọ họ ọhọbịrị á mẹjẹ nyori ọ yẹda bala ọ-hwabwọ hi abwẹla ọtịpyọ nyamwụ lẹ aalẹ, ị ka tịrọọ ẹkpẹ ahyaahị la ọ-họ atịmẹ ka.—2 Kọr. 2:6-8.
12. (a) Ẹ-ẹpwụ nya iwe-ahụrụ iyina angịgbahị à tị́ baba nyọka dụmwọ-dụmwọ? (b) Ịyẹ tị́ du kahị ka me irya nyori iJihova á ka jẹ́-ẹ yẹ ahyẹẹrwẹrwa nya angịhyẹ ẹnẹnẹhẹ ka lẹ ka? (Yẹ ọdawụlẹ oleji ịnyịnyị.)
12 Ẹ-ẹpwụ nya iwe-ahụrụ ịhyẹ tị lẹ, angịgbahị nya ọjịra-jịra ka dụmwọ-dụmwọ nyịlẹhị-ịlẹhị ene kị ka tịrị angịịwa ẹkpẹ. Ọ-chụ pwokwita, kori kị ya eje wu ọngịnyị nyori ọ họ ụya ta onjwo ochiche lee o-ji ẹkpẹ da ogu lee ọ kpa ijẹẹhị myị́ awụlẹ oyeye nyaa, angịgbahị ka maga kị ka jẹ́ myị̀myị̀ nyori ọngọọwa yẹ irya da yẹẹyẹẹ ịnyịlẹhị lẹ. (Mal. 2:14; 2 Tim. 3:6) Ị ka chewu ke ịkpịlọ nya Ohe pyii lẹ. Ma, ahị tị jẹ́ ịnyịnyị nyori ọng myị́ ọng ọlẹ kọ họ ang ọtịpyọ, kọ tị yẹda ịlẹhị bala ọ-hwabwọ la ọ-họ ang ọọwa lẹ, ka jẹ́-ẹ ri oligu nya iJihova myị́myị́ wẹẹ. Lẹ, nanana nyori angịgbahị nya ọjịra-jịra ka dụmwọ-dụmwọ ẹ-ẹga nya ọngọlẹ kọ kpa ijẹẹhị họ angịkịla ẹla ọtịpyọ, ị́ ka me irya nyori iJihova á ka jẹ́-ẹ yẹ ahyẹẹrwẹrwa nya ọngọọwa ẹnẹnẹhẹ ka lẹ ka. b—1 Pit. 2:10.
ẸLA ỌLẸ KÁ ALỌJỊRA-JỊRA KA JẸ́-Ẹ HỌ
13. Ịyẹ à tị́ ri ọdatị nya abwọlẹ kahị kaa họ ẹ-ẹga nya ọngọlẹ kị chị ega bala ọngọlẹ kị gba kpehe hi ọjịra-jịra?
13 Jaabwọ kahị jẹ́ a-ang ọjẹ́jẹ ọlẹ kọ jene nyọlẹ, ụka ọhẹ kori kị ya dodehe nyori nyị chị ọọnahị ọhẹ ega lẹ, ahị ka kịnyaa la ọ-yẹ jula ọngọọwa iiwe-ahụrụ ọlịịwẹ myị́ chajị ahị jẹ́ nyori ọ yẹ irya da bala ọ-hwabwọ la ọ-họ ang ọtịpyọ lẹ. (1 Tim. 5:20) Ọngọọwa ri ụpa nya ọjịra-jịra wẹẹ, ọ tị baba nya ọhụ ojuju ọlẹ kahị kaa ye bwu ẹga nya aanahị ịkịla ịnyịnyị. (Hib. 10:24, 25) Ma, ọwẹ tị datị hi ụka kị gba ọngịnyị kpehe hi ọjịra-jịra. Áhị ka ju ogu lee ọ-dọmwụ “juwa baba ju epwedii nya ang oriri ta ọngọọwa kpong-kpong kaka.”—1 Kọr. 5:11.
14. Ányị angịnyị nya ịKịrayịsị à tị́ ka kpa irya oleje nyaa họ ụkụrwọ ụka kị ja họ ẹla ẹ-ẹga nya angịlẹ kị gbaa kpehe hi ọjịra-jịra? (Yẹ ifoto ịnyịnyị.))
14 Lẹ, ọna ọdada ọwẹ mẹjẹ nyori áhị ka jẹ́-ẹ wụrụ ọngọlịnyị wẹ ọjịra-jịra lee ọ-dọnụ chọọ ụka kọ wẹ ka ịnyị? Ehe. Ẹlịlẹhị tị ri, áhị ka ju ogu tọọ ka. Ma, kori ká ọngọọwa á ri olugbiyegu nyahị lee oligu o-chii nyahị ene kị wẹẹ gbọọ kpehe, ahị ka kpa irya oleje nyahị bwula ẹla ọlẹ kahị jẹ́ bwu ịBayịbụụ cheje kori kahị ka wụrọọ wẹ ọjịra-jịra myị́. Ụka kọ tị wẹ ọjịra-jịra bẹ? Ene-ene, áhị kaa dọnụ chị ọngọlịnyị ka. Lẹẹlẹẹ tị myị́myị́, ọngọngọọng nyahị ka kpa irya oleje nyamwụ cheje u-uhye nya ang ọlẹ kọ ka họ. Ọ ka chị angịhyẹ kpẹẹ nyọka dọnụ chọọ lee ọ-dọọ ọwụraba wẹ ọjịra-jịra myị́. Ma, áhị ka ya ẹla lụmẹ bala ọngọọwa lee ọ-yẹ julọọ họ ang ịkịla ka.
Ọngịnyị nya ịKịrayịsị ka jẹ́-ẹ kpa irya oleje nyamwụ cheje kori kọ ka wụrụ ọngọlẹ kị gba kpehe wẹ ọjịra-jịra lee ọ-dọnụ chọọ pyịnyẹng ụka kọ wẹ ọjịra-jịra myị́ (Yẹ ọgba 14)
15. Alịhọbịrị ịlányị ị tị́ ya ẹla rụ ụ-ụpwụ nya 2 ịJọn 9-11? (Ịnyịnyị, yẹ akpa ọlẹ kọ ri “ Ọhọbịrị Ụma Ookpokpo ỊJọn Bala ỊPọlụ à Wẹẹ Ya Ẹla Rụ lẹ?”)
15 Angịhyẹ tị ka tọ wo myị́ nyori, ‘ịBayịbụụ-ụ́ ya nyori ọngọ dọnụ chị ọngọlịnyị nyị ri ọngọ da ọlabwẹla onyobyi ọọwa ụbwọ ẹ-ẹpwụ nya ang onyobyi ọhọhọ nyamwụ ka?’ (Wa 2 ịJọn 9-11.) Ẹla ịkịla ịlẹ kị dakoko ju ọgba ọwẹ mẹjẹ nyori, ẹgẹwẹ wẹẹ ya ẹla rụ́ angịlẹ kị ji ẹkpẹ da ogu lee angịlẹ kị kaa maga nyọka tụ́ angịkịla tutu ka họ ẹla ọlẹ ká ịBayịbụụ ya nyị tịpyọ ịnyị. (Ọwụ. 2:20) Lẹ, kori ká ọngịnyị-ị́ ji ẹkpẹ da ogu lee o-juwa du angịkịla ju ang ọtịpyọ ọhọhọ aalẹ, angịgbahị nya ọjịra-jịra á ka ju ọngọọwa ụga ka. Ẹhị ọrịrịị-rịrị tị ji nyori ahị́ ka da ọngọọwa cháa kpụ ọ ka yẹ irya da myị́ wẹẹ. Ma, gbee kọ ka yẹda ịnyị, áhị ka dọnụ chị ọngọlịnyị lee ọ-wụrọọ wẹ ọjịra-jịra ka.
GBỊLA ỌHÁHA BALA AHYẸẸRWẸRWA NYA IJIHOVA
16-17. (a) Ẹlịyẹ iJihova à tị́ tịtọ ká alịhọbịrị ka họ? (Isikẹlụ 18:32) (b) Ányị angịgbahị nya ọjịra-jịra à tị́ ka mẹjẹ nyori ị wẹẹ họ ụkụrwọ bala iJihova ụka kị ja maga nyọka da angị họ ọhọbịrị ụbwọ?
16 Ẹlịyẹ ahị tị́ jẹ́ ẹ-ẹpwụ nya Ẹpwang ọ-Kụ Gbeji ọlẹ wẹ wuu? IJihova-á tịtọ ká ọngọngọhẹ ka ta ayịreji ka! (Wa Isikẹlụ 18:32.) Ọ tịtọ ká angịlẹ kị họ ọhọbịrị ka họ okpunyi balọọ. (2 Kọr. 5:20) Ang odudu ká iJihova kaa byi angịnyị nyamwụ ịlẹ kị rụ hyoo nyori nyị yẹ irya da bala ọ-nyà tịrẹkpẹ chị ọwa ọgụ mẹ ụka myị́ ụka à wẹ lẹ. Angịgbahị nya ọjịra-jịra la iwe nyọka họ ụkụrwọ bala iJihova jaabwọ kị wẹẹ maga nyọka da angị họ ọhọbịrị ụbwọ kị ka yẹ irya da.—Rom. 2:4; 1 Kọr. 3:9.
17 Kụ irya jaabwọ ká ọkẹkẹnị ka lụmẹ kaka ba e-epwoohe ụka ká alịhọbịrị-ị́ yẹ irya da wẹẹ! IJihova, Adahị olepwoohe kaa chị ọkẹkẹnị yẹẹyẹẹ ụka myị́ ụka ká ọkpịlọ nyamwụ ọlẹ kọ byi á nyà tịrẹkpẹ wẹ ọjịra-jịra. Ọháha ọlẹ kahị la ẹ-ẹga nya iJihova kaa nwà kịlahị gụ ọọwa jaabwọ kahị wẹẹ kụ irya ju ọháha, ahyẹẹrwẹrwa bala ọnahị ọgahị nyamwụ.—Luk. 1:78.
EJE 111 Ọkẹkẹnị Ọtụka Nyahị
a Áhị ka ya nyori nyị ku ọngọọwa kpehe kaka. Ma, jaabwọ ká ịPọlụ ya ụ-ụpwụ nya 1 Ala ịKọrịntị 5:13, NW lẹ, ahị ka wụrụ angịlịnyị nya angịlẹ kị gbaa kpehe hi ọjịra-jịra lẹẹlẹẹ lẹ.
b ỊBayịbụụ ya nyori angịhyẹ juwa kị ka jẹ́-ẹ hịnyọhi haa kaka. Angịlịnyị ri angịlẹ kị cheje lọngịrị-ọngịrị nyọka ji ẹkpẹ da Ohe ụka wuu. IJihova bala iJisọsị kẹnẹ-kẹnẹ à tị ka jẹ́-ẹ chị eje kori kị ka hịnyọhi ha ọngịnyị ka lẹ.—Mak. 3:29; Hib. 10:26, 27.
