Ọlẹrụ ịPọlụ da ụpwụ kaka byi Angịnyị nya ịKịrayịsị ịla ịTẹsalonika yẹkẹẹ: “Ó ri ká [ọngọngọhẹ] lẹpwụ nyanụ á pwa o-ju ihi nya ẹla ọlẹ kahị wẹẹ ya jenu ẹ-ẹpwụ nya ileta ọlẹ lẹ aalẹ, anụ́-ụ ju ọngọọwa ẹjẹẹ datị.” (2 Tẹs. 3:14) Ene-ene, ahị kaa ya nyori angịgbahị nya ọjịra-jịra ẹlẹwẹ à gu lẹ. Kori ká ọngịnyị a tọchị-tọchị pwa la ọ-ka ju ihi nya itiwe nya ehile ịla ịBayịbụụ, nanana nyori ị dọọ ọna ụka ịmanyị-ịmanyị lẹ, angịgbahị nya ọjịra-jịra ka ya ẹla o-ya dodehe ọhẹ nyọka da alọjịra-jịra ọna. Ụka kị họ ịnyị kpá lẹ aalẹ, alọjịra-jịra á ka yẹjula ọngọlẹ kị ju ẹjẹẹ wẹ họ ịngịngịhyẹ ọkịla kaka, kẹnẹ-kẹnẹ ka hi ụka kị juwa ọọjịra-jịra lee ẹrụ ọnyịịla ọ-kpa pyẹ mẹ ịnyị.

Ma, ọbaba nya ọ-nwụ họ ji. Ahị jẹ́ lẹẹlẹẹ nyori ụbwọ o-gbile ụ-ụrụ nya ịPọlụ ọwẹ ri eje ọlẹ ká Ọngịnyị nya ịKịrayịsị ọnyị myị́ ọnyị ka chị ẹ-ẹpwụ nya iwe-ahụrụ ịhyẹ kpangga. Lẹ, ọ́ baba nya angịgbahị nya ọjịra-jịra ọ-ka ya ẹla dodehe nyọka da angịkịla ọna kaka. Ịyẹ tị́ du ka ọ-nwụ họ ọwẹ ji? Kụ ẹhị yẹ ẹla ọlẹ kọ dagaga ju ụbwọ o-gbile ụ-ụrụ nya ịPọlụ ọwẹ wẹẹ.

ỊPọlụ yẹ nyori angịhyẹ ẹ-ẹpwụ nya ọjịra-jịra nyị “juwa la ọhịhị nya ụbwọ ọtata,” lee ọhịhị ojigi-jigi. Ọ kpa ẹla ọla Ụpwụ Ịgọgọ gbilaa ụbwọ ụ-ụrụ, ma ị́ tị myị ju ihi nyamwụ ka. Ụka ọkịla ọlẹ kọ jwaa ụga ene nya ụka ọwẹ, ọ daa ọna yẹkẹẹ: “Ọng myị́ ọng ọlẹ kọ myị họ ụkụrwọ ka, tụbwọ aalẹ, ọngọọwa a tịtị ri ang oriri kpong-kpong kaka ịnyịnyị.” Kpọkpọọkpọ angịhyẹ pwa la ọ-ka họ ụkụrwọ nyọka kpa da ịlaa ụbwọ nanana nyori ị ka jẹ́-ẹ họ ịnyị myị́. Ịnyịnyị, ị juwa ya ọnụ ju ẹla nya angịkịla ịlẹ kọ gwaa ka. Lẹ, ányị Angịnyị nya ịKịrayịsị à tị́ ka bwu kpa angịlẹ kị wẹẹ họ ẹla ụ-ụgbẹyị o-pwoku ka?—2 Tẹs. 3:6, 10-12.

ỊPọlụ yẹkẹẹ: “Anụ́-ụ ju ọngọọwa ẹjẹẹ datị.” Omyi ẹla nya iGiriki ọwẹ wẹẹ ya ẹla rụ́ ọ-ka ya ẹhị ba ọngọlịnyị kpangga. ỊPọlụ wẹẹ da ọng myị́ ọng ẹ-ẹpwụ nya ọjịra-jịra ọna ịnyị, a-angịgbahị nya ọjịra-jịra kem ka. (2 Tẹs. 1:1; 3:6) Lẹ, Ọngịnyị nya ịKịrayịsị ọnyị myị́ ọnyị ọlẹ kọ yẹ ọọnamwụ ọlẹng lee ọnyang ẹ-ẹpwụ nya ịKịrayịsị kọ myị ju ihi nya ẹla ọla Ụpwụ Ịgọgọ ka aalẹ, ọ ka chụ nyọka “cheji ba ọngọọwa gbang-gbang” myị́.

Ọọwa ri ahị ka kpa ọngịnyị ọlịnyị lala ọngọlẹ kị gba kpehe hi ọjịra-jịra? Ehe, chajị ịPọlụ ya dọọ u-uhye yẹkẹẹ: “Anụ́-ụ juwa da ọngọọwa ọna yẹẹyẹẹ lala ọnyadanụ ẹ-ẹpwụ nya ịKịrayịsị mẹ.” Lẹ, Ọngịnyị nya ịKịrayịsị ọnyị myị́ ọnyị ka jẹ́-ẹ yẹju la ọngọlẹ kị ju ẹjẹẹ ụka nya ọjịra-jịra bala ẹrụ ọnyịịla ọ-kpa pyẹ myị, ma ị́ ka bịrị ụka balọọ ẹ-ẹpwụ nya ang ịkịla ka. Ịyẹ tị́ du? ỊPọlụ yẹkẹẹ: “Chajị ká oyoyi ka jẹ́-ẹ jwoo.” Ụka kahị ba la ọ-yẹju la ọngọlịnyị ụ-ụgbẹyị ọlịịwẹ, ọ ka la ịlọmwụ oyoyi chajị nya ang ọlẹ kọ wẹẹ họ du kọ ka yẹ abwẹla nyamwụ da.—2 Tẹs. 3:14, 15.

Ányị Angịnyị nya ịKịrayịsị à tị́ ka bwu jẹ́ ụka kị ka ju ọngịnyị ẹjẹẹ? Ọhọhẹ, ahị ka maga kahị ka jẹ́ myị̀myị̀ nyori ọngọọwa juwa la abwẹla nya ọhịhị ojigi-jigi ịlẹhị jaabwọ ká ịPọlụ chabwọ. A-angịlẹ kị họ ẹla ọlẹ ká irya oleje nyahị á myị ju ka, ma ká ẹla ọọwa á tị bịrị ehile ịla ịBayịbụụ lee itiwe nyaa ka, ịPọlụ à wẹẹ ya ẹla rụ ka ka. A-angịlẹ kị tị họ ẹla wụụhị ẹjẹ, ọ wẹẹ ya ẹla rụ ka ịnyịnyị. Ọkọkọ nyọọwa, ịPọlụ wẹẹ ya ẹla u-uhye nya angịlẹ kpangga kị kaa tọchị-tọchị pwa la ọ-ka ju ihi nya ọna ọdada o-bwu ẹpwụ nya ịBayịbụụ.

Alẹ, kori kahị yẹ ọọnahị ọlẹng lee ọnyang ọhẹ kọ ja kịnyaa la ọ-pwa o-ju ihi nya ọna ọdada o-bwu Omyi Ela nya Ohe aalẹ, a ahị ka chị eje la ịlọhị kahị ka yẹjula ọngọlịnyị họ ang lawụlẹ lee ọ-ya ụya lawụlẹ ka. Chajị nyọlẹ kọ tị ri eje ká ọng myị́ ọng ka chị lịlọmwụ lẹ, alugbiyegu nyahị ịlẹ kahị kụ lawụlẹ kị tị kaa gbigba ha iJihova kem, ahị ka ya ẹla u-uhye nyamwụ bala lẹ. Ahị tị ka kịnyaa la ọ-yẹju la ọngọlịnyị ọọjịra-jịra bala ẹrụ ọnyịịla ọ-kpa pyẹ myị wẹẹ. Ụka kọ tị nwụ ọgụ-ẹpẹtẹ nyamwụ rịrị, ahị ka jẹ́-ẹ yẹjulọọ ẹ-ẹpwụ nya ang ịkịla myị́myị́.