1. Eje nya ẹla ọkpọnchị oyina angịnyị à tị́ baba nyọka chị?

 ANGỊNYỊ alẹ la eje nya ẹla ọkpọnchị ka chị. Ị tị́ ka chẹkpẹ ju iJihova Ohe Oluhye ko ri Ọngọ chịla nyọka kpeji odehe bala epwoohe, lee ị tị́ ka ji ẹkpẹ nya oluji nya Ohe ko ri Olegu Onyobyi ọlọkwọ? Ọng myị́ ọng ka chụ ọhẹ pyii lẹ, ị́ ka jẹ́-ẹ ji arịrị nya ụpa imiiye ịwẹ kaka. Ọlẹ kị tị chụ à ka ya kori ị́ ka la ọhịhị o-gboyi myị́ oyi lee kori ị́ ka la ka lẹ. (Mat. 25:31-33, 46) Lụka nya ‘akama ọtụka,’ ị ka chaa ịna nyọka chịda lee ọ-ka ta ayịraji lẹlẹ.​—Ọwụ. 7:14; 14:9-11; Isi. 9:4, 6.

2. (a) Ịyẹ Ala iHiburu 10:35-39 à tị́ juhi ọhụ nyọka họ? (b) Ányị ụpwụ nya Ọwụrụụ-wụrụ à tị́ ka jẹ́-ẹ dahị ụbwọ?

² Wa Ala iHiburu 10:35-39. Ó ri ká chụ nyọka chẹkpẹ ju eji ọkpakpa nya iJihova aalẹ, à jẹ́ cheje ọnyịịla lẹ. Lẹẹlẹẹ ọ ka háng nyọka da angịkịla ụbwọ kị ka jẹ́-ẹ cheje ọnyịịla ịnyịnyị. Nyọka họ ịnyị, à ka jẹ́-ẹ kpa ẹla ọla ụpwụ nya Ọwụrụụ-wụrụ daa ụbwọ. Ụpwụ ọnyịịla ọwẹ ya ang ọlẹ kọ ka họ ta angị la egbeju ọngịrị ta iJihova, ma ọ tị ya ahị ọwawa ịlẹ ká angị chẹkpẹ ju eji ọkpakpa nyamwụ ka ye ịnyịnyị. Ahị baba nyọka jẹ́ ang u-uhye nya ẹlịlẹhị ịkpọnchị ịwẹ. Ọọwa ka dahị ụbwọ nyọka kịnyaa la ọ-gbịgba ha iJihova. Da ọọwa u-uhye, ahị ka jẹ́-ẹ kpa ẹla ọlẹ kahị jẹ́ da angịkịla ụbwọ kị ka cheje nyọka gbịgba ha iJihova bala ọ-kịnyaa la ọ-họ ịnyị.

3. Ịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

³ Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ịtọ ẹla ịlẹ: Ịyẹ à tị́ nụwa ị-ịlahị gbe angịlẹ kị chẹkpẹ ju eji ọkpakpa nya Ohe? Ịyẹ à tị́ ka họ ta angịlẹ kị chụ nyọka chẹkpẹ ju iyo ọnyọmịla ọlẹ kị chabwọ ụ-ụpwụ nya Ọwụrụụ-wụrụ?

4. Ebwo nya angị iyina ọlẹrụ ịJọn à tị́ yẹ bala iJisọsị e-epwoohe?

⁴ Ẹ-ẹpwụ nya ọyị ọyẹyẹ a-arụrụ, ọlẹrụ ịJọn yẹ ebwo imiiye nya angịnyị ịlẹ kị chẹkpẹ ju eji ọkpakpa nya iJihova kị tị yé ọhịhị ọmyịmyị-ka chajị nya ọọwa. Ebwo ọhọhẹ la angịnyị angị 144,000. (Ọwụ. 7:4) Ohe kpaa rụ bwu odehe kaka yaa ri igomenti, lee Ịpyị-Adịrahụ, ta iJisọsị e-epwoohe. Ị ka yẹ julọọ kpeji u-uhye nya odehe ọlẹ. (Ọwụ. 5:9, 10; 14:3, 4) Ẹ-ẹpwụ nya ọyị ọyẹyẹ a-arụrụ ọwẹ, ịJọn yaa kị godayị bala iJisọsị u-uhye nya Ọgbọdọ ịSayọn, ọlẹ kọ ku ọmwakpa nya epwoohe.​—Ọwụ. 14:1.

5. Ịyẹ à tị́ ka họ lụka okpii ta angị ihihi nya angịlẹ ká Ohe ya ida wụ?

⁵ Bwu ụka nya alẹrụ nya iJisọsị gbee da wa alẹ, Ohe chụ ụnọ ịmanyị tị́ nya angịnyị nyọka ri ụpa nya angị 144,000 ịwẹ lẹ. (Luk. 12:32; Rom. 8:17) Ma, ịJọn jẹ́ bwula ọyị ọyẹyẹ ọwẹ nyori angị ịmanyị-ịmanyị lẹpwụ nya angịwẹ nya-à ka jam la ọhịhị odehe la ahyẹẹnụ ihyẹẹkpẹ lẹ. ‘Angị ihihi’ nyaa ka ye ‘ang o-ju ẹjẹẹ’ nyaa ene ká akama ọtụka okpelego ka dọmwụ. (Ọwụ. 7:2, 3; 12:17) Ụka ká akama ọtụka okpelego á tị jẹ pwụ ẹgẹhẹ lẹ, Ohe à ka kpa angị ihihi nya angị 144,000 ịwẹ kaka tọ angịlẹ kị gbu ẹ-ẹpwụ nya ọmyịmyị kpụ kị juwa e-epwoohe ene-ene lẹlẹ. Ụ-ụwa, ị ka kpeji ta ịKịrayịsị ị-Ịpyị-Adịrahụ nya Ohe lẹlẹ.​—Mat. 24:31; Ọwụ. 5:9, 10.

6-7. (a) Ebwo nya angịkịla iyina ịJọn à tị́ yẹ myị́myị́? Ẹlịyẹ ahị tị́ jẹ́ u-uhye nyaa? (b) Ịyẹ tị́ du ká angị ihihi nya angịlẹ ká Ohe ya ida wụ bala “iru nya angịnyị” ka ya ẹhị rịrị gbe ọ-họ jịra nya Ọwụrụụ-wụrụ egbeju 7?

⁶ Nyọlẹ ká ịJọn yẹ ebwo olepwoohe ọwẹ kpá, ọ yẹ “iru nya angịnyị” ịkịla. ỊBayịbụụ ya nyori nyị́ ka jụ angịịwa wa kpá myị́ ka. (Ọwụ. 7:9, 10) Ẹlịyẹ ahị tị́ jẹ́ u-uhye nyaa? Olegu-ẹrụ byi ịJọn yẹkẹẹ: “Angịlẹ, a ri angị bebe bwu ẹpwụ nya akama ọtụka-ọtụka ọlaanyị lẹlẹ. Ịwa, a tị ri angịlẹ kị kpa ịwọ nya Ọnyị ọkpịlọ nya Ohe Oluhye hụ́ ịwụrụ igbileji nyaa wuu, du kị pwo owuru wẹ keri-keri ịnyịnyị lẹlẹ.” (Ọwụ. 7:14) Ụka ká “iru nya angịnyị” ịwẹ á be bwu ẹpwụ nya akama ọtụka okpelego ọọwa kpá lẹ, ị ka hịhị odehe ọlẹ bala o-yé ahị ọwawa ịnyịịla-ịnyịịla lẹlẹ.​—Eje. 37:9-11, 27-29; Etu 2:21, 22; Ọwụ. 7:16, 17.

⁷ Ó ri kị chụhị nyọka rụ ka epwoohe lee ahị ja ka hịhị ám̀ odehe, ahị yẹ ịlọhị ẹ-ẹpwụ nya ẹla ọlẹ kị chabwọ ụ-ụpwụ nya Ọwụrụụ-wụrụ egbeju 7? Ọ chịla kahị ka họ ịnyị. Ụka ọwẹ ka kpịpyọ yẹẹyẹẹ ha ebwo imimiiye nya anchẹ nya Ohe ịwẹ! Ọkẹkẹnị ka myị̀ ẹpwụ nyahị pwẹẹpwẹẹ nyọlẹ kahị chụ nyọka chẹkpẹ ju eji ọkpakpa nya iJihova. Ẹla ọkịla oyina ụpwụ nya Ọwụrụụ-wụrụ à tị́ ya jehi u-uhye nya akama ọtụka okpelego ọwẹ?​—Mat. 24:21.

8. Ányị akama ọtụka okpelego à tị́ ka bwu dọmwụ? Ịyẹ ụmụmẹ nya angịnyị à tị́ ka họ ụka ọọwa?

⁸ Ang ọjẹ́jẹ ọlẹ kọ jene nya ọlẹ họ kahị jẹ́ nyori angị kpa ọngịrị nya upe ọla odehe ọlẹ ka jahị da ịBabịlọn Ọtụka, kọ ri ọ-yẹ jula awụlẹ nya ịgba ọgbagba nya ọnọọkịla ịla odehe wuu. (Ọwụ. 17:16, 17) Ọọwa à ka ri ọmwụ ọdada nya akama ọtụka okpelego lẹlẹ. Ma ọọwa ka dudu ká iru nya angịnyị ka dọmwụ nyọka gbịgba ha iJihova? Ehe. Ọkọkọ nya ọọwa, Ọwụrụụ-wụrụ egbeju 6 họ kahị jẹ́ nyori ụka ọwẹ, angịlẹ kị kaa gbịgba ha iJihova ka nyị ka mwahị nya ewu ọ-chị kẹ ka ẹga nya alupe bala alọhị nya odehe ịlẹ ká ịBayịbụụ chụ ka me ịgbọdọ. Nyọlẹ ká angịwẹ ka myị-ị̀ chẹkpẹ ju Ịpyị-Adịrahụ nya Ohe ka wẹẹ, iJihova ka yaa lala aluji nyamwụ lẹ.​—Luk. 11:23; Ọwụ. 6:15-17.

9. Ányị anchẹ nya iJihova à tị́ ka bwu datị hi angịkịla lụka nya akama ọtụka okpelego? Ịyẹ à tị́ ka ri ocheju nya ọọwa?

 ⁹ Ẹlịlẹhị ri, anchẹ nya iJihova ka datị lụka nya akama olujwo ọwẹ. Ịwa kem à ka ri ebwo nya angịlẹ kị kaa gbịgba ha iJihova ám̀ odehe bala ọ-pwa la ọ-chẹkpẹ ju “iyo” ọwẹ lẹ. (Ọwụ. 13:14-17) Chajị nyọlẹ kị godayị giri-giri ha iJihova wẹẹ, ọ ka du agbama ju angịlẹ kị la egbeju ọngịrị ta iJihova. Ọọwa ka dudu ká ẹpwụma ka yẹ jula awụlẹ nyọka gba mịla angịnyị nya iJihova chị odehe ọnụ wuu. ỊBayịbụụ wụrụ ụla nya agbama ọọwa nya ọpyị o-be ẹpwa nya ịGọọgụ.​—Isi. 38:14-16.

10. Jaabwọ ká Ọwụrụụ-wụrụ 19:19-21 ya, ányị iJihova à tị́ ka họ ụka kị ka gba mịla angịnyị nyamwụ?

¹⁰ Ányị iJihova à tị́ ka họ ụka kị ka gba mịla angịnyị nyamwụ? O byihi yẹkẹẹ: “Agbama nyam ka wuleji.” (Isi. 38:18, 21-23) Ọwụrụụ-wụrụ egbeju 19 chabwọ nya ang ọlẹ kọ ka họ ba ọọwa ba. IJihova ka du Ọnyị nyamwụ ẹrụ wẹ ka chị angịnyị Nyamwụ da bala ọ-ka kụrụ aluji nyamwụ. “Iru nya ịsọja ịdẹwụ ilepwoohe,” kị ri alegu-ẹrụ ịlẹ kị họ kpẹẹkpẹẹ, bala angịnyị angị 144,000 ịlẹ kị ka kpeji bala ịKịrayịsị, ka bajẹ balọọ wẹ ka dẹwụ ta aluji. (Ọwụ. 17:14; 19:11-15) Ịyẹ à tị́ ka ri ocheju nya ẹwụ ọwẹ? Ayịreji ọtata gbang-gbang nya angịnyị ehe bala ogu ịlẹ kị kaa la egbeju ọngịrị ta iJihova!​—Wa Ọwụrụụ-wụrụ 19:19-21.

11. Ẹla oyina à tị́ ka họ kọ ri ẹla ọkpọnchị gụ wuu ụ-ụpwụ nya Ọwụrụụ-wụrụ?

¹¹ Kụ irya nya abwọlẹ kọ ka la angị họ kpẹẹkpẹẹ ụka kị ka chịda lụka ká aluji nya Ohe ka ta ayịreji gbang-gbang wẹẹ! Ụka ọwẹ ka ri ụka nya ọkẹkẹnị ọtụka-ọtụka! Ịlẹhị lẹ ọkẹkẹnị ọtụka ka juwa e-epwoohe ụka ká ịBabịlọn Ọtụka á ta ayịreji, ma ang ọkịla ọhẹ tị juwa kọ ka kpa ọkẹkẹnị ọ-gụ ọọwa gụ warị. (Ọwụ. 19:1-3) O ri ẹla ọkpịpyọ-kpịpyọ ọhẹ ụ-ụpwụ nya Ọwụrụụ-wụrụ, ko ri “ahụ oyeye nya Ọnyị ọkpịlọ.”​—Ọwụ. 19:6-9.

12. Jaabwọ ká ụpwụ nya Ọwụrụụ-wụrụ 21:1, 2 ya, ụka oyina ahụ oyeye nya Ọnyị Ọkpịlọ à tị́ ka ji?

¹² Ụka oyina awụlẹ oyeye ọwẹ à tị́ ka ji? Angịnyị angị 144,000 wuu ka chọnụ e-epwoohe ene ká ẹwụ nya Amagẹdọn ka dọmwụ. Ma ụ-ụka ọwẹ à ka ri ụka nya ahụ oyeye nya Ọnyị Ọkpịlọ ka. (Wa Ọwụrụụ-wụrụ 21:1, 2.) Ụka kị dẹwụ nya Amagẹdọn kpá ká aluji nya Ohe wuu á ta ayịreji, ahụ oyeye nya Ọnyị Ọkpịlọ à laa ka ji lẹ.​—Eje. 45:3, 4, 13-17.

13. Ịyẹ à tị́ ka họ lụka nya ahụ oyeye nya Ọnyị Ọkpịlọ?

¹³ Ịyẹ ahụ oyeye nya Ọnyị Ọkpịlọ à tị́ ka ri ha angịlẹ kị la ụbwọ ẹ-ẹpwụ nyamwụ? Awụlẹ oyeye ọlam kaa tụ ọlẹng bala ọnyang chị awụlẹ. Ụ-ụgbẹyị ọlịnyị-ịnyị, ahụ oyeye nya Ọnyị Ọkpịlọ ọwẹ ka tụ Adịrahụ, ko ri iJisọsị ịKịrayịsị, bala “ahụ onyeewe” nyamwụ kị ri angị 144,000 chị awụlẹ. Ẹla ọkpịpyọ-kpịpyọ ọwẹ à ka ya igomenti onyeewe yeji ọlẹ kọ ka kpeji u-uhye nya odehe ọlẹ ẹ-ẹpwụ nya ẹka 1,000 lẹlẹ.​—Ọwụ. 20:6.

14-15. Ọwụrụụ-wụrụ egbeju 21 tị́ chụ angị 144,000 kaka pwoku ịyẹ? (Yẹ ifoto ọla ẹbẹ nya ọgbanyẹ.)

¹⁴ Ba ọọwa ba, Ọwụrụụ-wụrụ egbeju 21 chụ angị 144,000 kaka pwoku epweji ọhụhị-hụhị ọlẹ kị wụrụ “iJerusalẹm Onyeewe.” (Ọwụ. 21:2, 9) I me ugulọ nya epweji ọọwa hụrụ itiwe ọlẹ kị kpa ajwọ iwo kụrụ imiiye dọmwụ nyamwụ. Ị tị da “ẹnyị nya alẹrụ ọnyịịla nya Ọnyị ọkpịlọ” iwo kụrụ imiiye ba ajwọ ịịwa. Ịyẹ tị́ du ká ẹlẹwẹ kpụ ịJọn ịpyọ? Chajị ọ yẹ ẹnyị nyamwụ u-uhye nya ẹjwọ ọhẹ lẹpwụ nyaa. Ihi ọtụka-ọtụka o ri lẹ!​—Ọwụ. 21:10-14; Efe. 2:20.

 ¹⁵ Epweji ọwẹ á me ịkịla ọhẹ lọhẹ ka. Agbẹyị ịchịpwụrụ bwu ịlụwa ri okpoko igom, ogirigba 12 ịlụwa ri ịnya ogbe, ị họ ugulọ bala itiwe nyamwụ ịnyangga la ajwọ ịnyịịla-ịnyịịla, ene ká ori omeme nyamwụ tịị la memeeme ịnyịnyị. (Ọwụ. 21:15-21) Kpọkpọọkpọ, ọ tị lala o-ri ịngịhyẹ nyị gba hi wẹẹ! Wo ẹla ọlẹ ká iJọn ya ba ọọwa ba lẹẹ: “Ḿ yẹ ube ịgọgọ ọtụka nya Ohe Oluhye ọhẹ-lọhẹ e-epweji ọwẹ kpong-kpong ka. Chajị, Ọngọlahị Ohe Oluhye Agụgụ bala Ọnyị ọkpịlọ nya Ohe Oluhye a ri ube ịgọgọ ọlụwa lẹlẹ. Ọ́ tị baba ká ẹnụ oluhye-ọgba ọhẹ-lọhẹ lee ọya oluhye-ọgba ọwẹ ka chị ụ-ụwa kpong-kpong kaka. Chajị, owuruu-wuru nya ogbo nya Ohe Oluhye a ri ahịgboo ọlụwa lẹlẹ. Ọnyị ọkpịlọ nya Ohe Oluhye a tị ri otinika ọlụwa ịnyịnyị lẹlẹ.” (Ọwụ. 21:22, 23) Angịlẹ kị ri ụpa nya iJerusalẹm onyeewe ka juwa bala iJihova la ịlaa. (Hib. 7:27; Ọwụ. 22:3, 4) Lẹ, iJihova bala iJisọsị à ri ube ịgọgọ ọla epweji ọọwa lẹlẹ.

16. Ịyẹ à tị́ ka họ ta angịnyị ehe lụka nya Eji Ọkpakpa ọla Ẹka Ụnọ nya Ịpyị-Adịrahụ nya Ohe?

¹⁶ Ọ kaa kpa angịlẹ kị ya ida wụ ịpyọ nyọka kụ irya u-uhye nya epweji ọwẹ. Ma ọ ka kpụ angịlẹ kị la ahị ọdahile nyọka hịhị odehe ọlẹ ịpyọ nyọka kụ irya u-uhye nyamwụ ịnyịnyị. Lụka nya Eji Ọkpakpa ọla Ẹka Ụnọ nya Ịpyị-Adịrahụ nya Ohe, iJerusalẹm Onyeewe ka kpa ahị ọwawa lụmẹ-lụmẹ warị. ỊJọn yẹ ká ahị ọwawa ịịwa juwa mwụ lala “ihu nya enyi nya ọhịhị.” ‘Ekeji nya ọhịhị ịlẹ ká apwụ nyaa ri ang ọ-kpa họ alepwoja wuu uda bwu rịrị ịkịka oyiye-oyiye nya ihu ọọwa.’ (Ọwụ. 22:1, 2) Angịnyị ehe ịlẹ kị ka hịhị ụka ọọwa wuu ka la iwe nyọka yé apyobwuna bwu ẹpwụ nya ang ịnyịịla ịwẹ. Dụmwọ-dụmwọ lẹ, angịlẹ wuu kị ju ihi nya iJihova à ka wẹ ka la kpẹẹkpẹẹ lẹlẹ. Ẹdụrụ á ka ji kaka, ang ọjụjụ á ka ji kaka, egbejida nya ajụjụ á tị ka ji kaka ịnyịnyị.​—Ọwụ. 21:3-5.

17. Jaabwọ ká Ọwụrụụ-wụrụ 20:11-13 mẹjẹ, owo anyị à tị́ ka yé apyobwuna nya Eji Ọkpakpa ọla Ẹka Ụnọ?

¹⁷ Owo anyị à tị́ ka yé apyobwuna bwu ẹpwụ nya ang ịnyịịla-ịnyịịla ịwẹ wuu? Angị ịhọhẹ-họhẹ ịlẹ kị ka yé apyobwuna ri iru nya angịnyị ịlẹ kị ka be bwu Amagẹdọn bala anyị ịlẹ kị ka ma myị́ odehe onyeewe. Ma Ọwụrụụ-wụrụ egbeju  20 tị myị ọnụ ịnyịnyị nyori angịlẹ kị gbu nyị ka wuleji bwula igu. (Wa Ọwụrụụ-wụrụ 20:11-13.) “Alabwẹla ọnyịịla” ịlẹ kị godayị giri-giri, kị tị gbu kam kẹkpẹ lẹ bala  “alabwẹla onyobyi” ịlẹ kị la iwe nwà nyọka jẹ́ ẹla nya iJihova ka, ka tịrẹkpẹ wẹ ọhịhị ám̀ odehe ọlẹ. (Ụkụr. 24:15; Jọn. 5:28, 29) Ọọwa ri ọng myị́ ọng à ka wuleji bwula igu wẹ ọhịhị ọla odehe lụka nya Eji Ọkpakpa ọla Ẹka Ụnọ lẹ? Ehe. Angịlẹ kị tọchị-tọchị nyẹẹkpẹ da iwe ọlẹ kị la nyọka gbịgba ha iJihova ene kịị gbu á ka wuleji wẹ ọhịhị kaka. Ị la iwe ọọwa ma ị tị mẹjẹ nyori ị́ chịla nyọka hịhị ị-ịParadayịsị ka.​—Mat. 25:46; 2 Tẹs. 1:9; Ọwụ. 17:8; 20:15.

18. Ányị iwe-ahụrụ nya odehe à tị́ ka la locheju nya ẹka 1,000?

¹⁸ Ụka ká ẹka 1,000 á myị́ kpá, angịlẹ wuu kị ka ji la ọhịhị ka la kpẹẹkpẹẹ lẹ. Ọhọbịrị ọlẹ kahị ri ugu bwu ẹga nya Adam ene-ene á ka chị wu ọngọngọhẹ nyahị ụka ọọwa kaka. (Rom. 5:12) Abyị nya ọhọbịrị o-bwu ẹga nya Adam ọọwa ka hịlẹ hiihi gbang-gbang lẹ. Ọọwa lala o-ri angịlẹ kị ka jam odehe ka “wuleji bwula igu” wẹ ka ri angị la kpẹẹkpẹẹ la ocheju nya ẹka 1,000.​—Ọwụ. 20:5.

19. Ịyẹ tị́ du ká ọbaba ji nya ọmayẹ ohyẹẹkpẹ-ẹkpẹ?

¹⁹ Ahị jẹ́ nyori iJisọsị godayị giri-giri ha Ohe ụka ká Olegu Onyobyi mọọ yẹ. Ma angịnyị ehe ịlẹ kị la kpẹẹkpẹẹ ka myị ọnụ nyọka họ ịnyị ịnyịnyị ụka kị ya iwe da ha Olegu Onyobyi nyọka maa yẹ? Ọngọngọọng ka jẹ́-ẹ wẹ ịtọ ẹla ọwẹ ha ịlọmwụ ụka kị gba Olegu Onyobyi kpehe bwu ẹpwụ nya ụjẹ ọ-la ọbaba ka la ocheju nya ẹka 1,000. (Ọwụ. 20:7) Angịlẹ kị godayị giri-giri lụka nya ọmayẹ ohyẹẹkpẹ-ẹkpẹ ọọwa ka ye ọhịhị ọmyịmyị-ka bala ọ-ka la ịlaa ọlam-ọlam. (Rom. 8:21) Angịlẹ kị la egbeju ọngịrị ka ta ayịreji pyịyọọ, tụ́ Ohe Onyobyi bala alegu inyibyi nyamwụ.​—Ọwụ. 20:8-10.

20. Ányị ọmwụ ọyẹyẹ ịkpịpyọ-kpịpyọ ịla ụpwụ nya Ọwụrụụ-wụrụ à tị́ lang?

²⁰ Ányị ọ tị́ lang nyọlẹ ká kụ ẹhị yẹ ala ịmanyị-ịmanyị bwu ụpwụ nya Ọwụrụụ-wụrụ wẹẹ? Ọ́ kpịpyọ nyọka yẹ ịlọng ẹ-ẹpwụ nya ọmwụ ọyẹyẹ ịnyịịla-ịnyịịla ịwẹ ka? Ọ́ gung gbịla nyọka wụrụ angịkịla warị kị ka yẹ julahị ẹ-ẹpwụ nya ịgba ọgbagba ocheri-cheri nya Ohe nyahị ka? (Ọwụ. 22:17) Ọkịlẹtụ kpụhị nyii nyọlẹ kahị kụ ẹhị yẹ ang ịlẹ kị ka họ ị-ịlahị wẹ, lẹ ahị tịtọ nyọka ya jaabwọ ká ọlẹrụ ịJọn yẹkẹẹ: “Amẹn. Ee, kẹwẹ mẹ, Ahụ Ọngọlahị iJisọsị!”​—Ọwụ. 22:20.