1. Ịyẹ tị́ du kaahị wuu baba nya ẹla ọjẹ́jẹ o-bwu ẹga nya Ohe? (Etu 4:7)

 KORI ká cheje ọkpọnchị ẹnẹhẹ lẹ, ọ chịkpẹẹ nyori à raabwọ bịlẹ ẹla ọjẹ́jẹ chajị à jẹ́ nyori à baba nyamwụ. (Jem. 1:5) Adịrahụ iSolomọn da ụpwụ yẹkẹẹ: “Ẹla ọjẹ́jẹ à kpa gụ ang ịkịla wuu lẹlẹ.” (Wa Etu 4:7.) Ẹ-ẹla ọjẹ́jẹ nya angịnyị ehe iSolomọn à wẹẹ ya ẹla rụ ka. Ọ wẹẹ ya ẹla u-uhye nya ẹla ọjẹ́jẹ ọlẹ kọ bwu ẹga nya iJihova Ohe Oluhye ịnyị. (Etu 2:6) Ma ẹla ọjẹ́jẹ nya Ohe ka jẹ́-ẹ dahị ụbwọ kụrụ ụma nya akama ịlẹ kahị kaa la alẹ? Ee, ọ ka jẹ́-ẹ họ ịnyị, jaabwọ kahị wẹẹ ka yẹ a-ang ọjẹ́jẹ ọlẹ.

2. Ụgbẹyị oyina à tị́ ri ọhẹ ọlẹ kahị ka jẹ́-ẹ bwu la ẹla ọjẹ́jẹ nyịlẹhị?

² Ụgbẹyị ọhẹ ọlẹ kahị ka bwu la ẹla ọjẹ́jẹ nyịlẹhị ri ọ-ka jẹ́ ang u-uhye nya ẹla ọmẹjẹ nya alẹng imiiye ịlẹ kị jẹ́ ẹla yẹẹyẹẹ bala ọ-kpa ẹla ọọwa họ ụkụrwọ. Họhẹ-họhẹ, ahị ka kụ ẹhị yẹ iSolomọn. ỊBayịbụụ yẹkẹẹ: “Ohe Oluhye ya ẹla ọjẹ́jẹ okpori-kpori ha iSolomọn.” (1 Ịdị. 4:29) Oheeye, ahị ka kụ ẹhị yẹ iJisọsị, ọngọlẹ kọọwa à jẹ́ ẹla gụgụ wuu odehe ọlẹ. (Mat. 12:42) Ị yọmwụ neeji u-uhye nya iJisọsị yẹkẹẹ: “Olegu nya [iJihova] ka mwụ ịnyọ u-uhye nyamwụ. Olegu ka ya ẹla ọjẹjẹ họọ, ọ ka ya ọngịrị nya olegbeju oriri ọlẹ kọ ka jẹ-ẹ̀ kpẹhị rịrị angịnyị nyamwụ họọ.”​—Ayị. 11:2.

3. Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

³ Ohe ya ẹla ọjẹ́jẹ ha iSolomọn bala iJisọsị yẹẹyẹẹ, lẹ ị jẹ́ mẹ ẹla ịnyịịla ịlẹ kị baba hahị wuu jẹ́ẹhị. Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ẹla ịta bwu ẹpwụ nyaa: Ọ-baba nyọka la irya ọkpakpa ẹ-ẹga nya okpoko, ụkụrwọ bala u-uhye nyịlọhị.

4. Ányị iwe-ahụrụ nya ang ọlala nya iSolomọn à tị́ bwu datị hi ịnya iJisọsị?

⁴ ISolomọn kpụdụ lụmẹ, ọ kụ́ ẹpwa ọnyịịla-ọnyịịla ọlẹ kọ hụ́hị yẹẹyẹẹ. (1 Ịdị. 10:7, 14, 15) IJisọsị ọwa á tị lang gbuu ka, ọ́ dọmwụ la ẹpwa nyịlọmwụ ka. (Mat. 8:20) Tị wẹẹ, alẹng imiiye ịwẹ la irya ọkpakpa ẹ-ẹga nya ang-ụdụ chajị ẹla ọjẹ́jẹ nyaa bwu ẹga nya Ohe.

5. Irya ọkpakpa oyina iSolomọn à tị́ la ẹ-ẹga nya okpoko?

⁵ ISolomon ya nyori okpoko nyị kaa “chẹwụ ke ọngịnyị.” (Ọngọ. 7:12) Kori kahị la okpoko, ahị jẹ́-ẹ ra ang ịlẹ kị ri ịbaba nyahị bala ịhyẹ ịlẹ kahị tịtọ. Ma nanana nyori iSolomọn kpụdụ yẹẹyẹẹ, ọ jẹ́ nyori ang ịkịla juwa ịlẹ kị baba gụ okpoko wẹẹ. Ọ-chụ pwokwita, ọ da ụpwụ yẹkẹẹ: “Ẹnyị ọnyịịla hagụ ụdụ.” (Etu 22:1) ISolomọn myịmyị ya nyori angịlẹ ká okpoko há lụmẹ nyị-ị́ yé ọkẹkẹnị bwu ọlẹ kị la ka. (Ọngọ. 5:10, 12) Ọ myịmyị gbileehi ụbwọ ụ-ụrụ nyori ahị nyị ya ahị ọdahile nyahị wuu nịrọ okpoko ka, chajị okpoko ọnyị myị́ ọnyị ọlẹ kahị la ka jẹ́-ẹ myị́ yịra-yịra ẹ-ẹpwụ nya ẹhị ọ-mwụbìri myị́.​—Etu 23:4, 5.

6. Irya ọkpakpa oyina iJisọsị à tị́ la u-uhye nya ang-ụdụ? (ỊMatiyu 6:31-33)

⁶ IJisọsị la irya ọkpakpa ẹ-ẹga nya ang-ụdụ. Ọ kaa ri ang bala ọ-nwa ere. (Luk. 19:2, 6, 7) Ụka ọhẹ, ọ họ ere ọnyịịla-ọnyịịla nya ụkụrwọ ẹbyẹbyị nya ọgbanyẹ ọlẹ kọ họ. (Jọn. 2:10, 11) Ọ myịmyị kụrụ awụrụ ọlịnya-lịnya ẹnụmwụ ọlẹ kọ gbu. (Jọn. 19:23, 24) Ma iJisọsị á tị hu ang-ụdụ kụ ịlahị ọ-ọhịhị nyamwụ ka. Ọ byi angịjụgbẹyị nyamwụ yẹkẹẹ: “Ọnchẹ ookpokpo á ka jẹ́-ẹ juwa myị ẹrụ ha ayịbaba imiiye lụka ookpokpo myị́ kpong-kpong ka. . . . Ánụ́ ka jẹ́-ẹ juwa myị erụ ha ụdụ nya odehe ọlẹ lala ọnchẹ, anụ ka myịmyị jẹ́-ẹ juwa ju Ohe Oluhye ihi kpẹẹkpẹẹ myị́ kpong-kpong kaka.” (Mat. 6:24) IJisọsị mẹjẹ nyori kori kahị tịtọ nya Ịpyị-Adịrahụ jene, iJihova ka ya ang ịlẹ kahị baba hahị.​—Wa ịMatiyu 6:31-33.

7. Ányị ọọnahị ọhẹ à tị́ yé apyobwuna nyọlẹ kọ la irya ọkpakpa ẹ-ẹga nya okpoko?

⁷ Iru nya aanahị yé apyobwuna chajị nyọlẹ kị kpa ẹla ọmẹjẹ ọnyịịla ọlẹ ká iJihova mẹjẹ́ẹhị u-uhye nya okpoko họ ụkụrwọ. Kụ ẹhị yẹ ọ-chụ pwokwita nya ọọnahị ọhẹ kọ ye ahụ  lẹka ká ẹnyị nyamwụ ri Daniel wẹẹ. Ọ yẹkẹẹ: “Ụka ọlẹ kam ri onjwo, m̀ cheje nyori ịgba ọgbagba nya iJihova m ka hu kụ́ ịlahị ọ-ọhịhị nyam lẹ.” Chajị nyọlẹ ká Daniel hu ọhịhị nyamwụ hukee lẹ, ọ jẹ́ họ iru nya ang ịdatị-ịdatị ha iJihova. Ọ myịmyị yẹkẹẹ: “M̀ ka jẹ́-ẹ ya bwu ọkịlẹtụ nyam wuu nyori ḿ chị ijẹma kpong-kpong u-uhye nya eje ọchịchị nyam ka. Ịlẹhị lẹ, ọ chịkpẹẹ kam ka la okpoko yẹẹyẹẹ kori kam hu ẹla nyọọwa kụ ịlahị ọ-ọhịhị nyam myị́. Ma okpoko ka jẹ́-ẹ ku ọmwakpa nya aligu ịnyịịla ịlẹ kam la wẹẹ? Kori kam hu ẹla nya okpoko kụ́ ịlahị, ḿ ka jẹ́-ẹ chị ọkẹkẹnị jaabwọ kam wẹẹ chị lẹẹlẹẹ chajị nyọlẹ kam hu ẹla nya iJihova ọhọhọ kụ́ ịlahị ka. Okpoko ọhẹ-lọhẹ á ka jẹ́-ẹ lala ahị ọwawa ịlẹ ká iJihova ya ham wẹ ka.” Ọ la gbagbịla nyori ahị kaa yé apyobwuna ụka kahị hu ẹla nya iJihova ọhọhọ kụ́ ịlahị ọkọkọ nya ẹla nya okpoko.

8. Ahị tị́ họ ányị kahị jẹ́ nyori iSolomọn la irya ọkpakpa ẹ-ẹga nya ụkụrwọ? (Ọngọlirya 5:18, 19)

⁸ ISolomọn ya nyori ụkụrwọ ọ-họ la ọngịrị nyị kaa kpa ọkẹkẹnị wẹ ọngịnyị yẹẹyẹẹ. ISolomọn ya ọọwa nyị ri ‘ang-ahị nya Ohe Oluhye.’ (Wa Ọngọlirya 5:18, 19.) Ọ da ụpwụ yẹkẹẹ: “Ụkụrwọ ọhọhọ la apyobwuna oyeye.” (Etu 14:23) ISolomọn jẹ́ nyori ẹlẹwẹ ri ẹlịlẹhị. Ọ ri ọngọ họ ụkụrwọ la ọngịrị-ọngịrị. Ọ nwụ́ ebe lụmẹ-lụmẹ, wu ẹrụ nya ang iriri yẹẹyẹẹ tụ́ ịnya ekeji ịdatị-datị bala o-wu iru nya ẹmwụ nya enyi ịnyịnyị. Ọ myịmyị nwụ́ epweji ịdatị-datị. (1 Ịdị. 9:19; Ọngọ. 2:4-6) Ụkụrwọ ọtụka à wẹ kọ họ lẹ, ọ tị ya ọkẹkẹnị họọ. Ma iSolomọn jẹ́ nyori ọ baba nyọka họ ang ọkịla chajị kọ ka ye ọkẹkẹnị nyịlẹhị. Ọ họ ang lụmẹ-lụmẹ ẹ-ẹpwụ nya ịgba ọgbagba nya iJihova ịnyịnyị. Ọ-chụ pwokwita, ọ kpịlahị ẹ-ẹpwụ nya ụkụrwọ nya ube ịgọgọ ọhụ́hị-hụ́hị ọlẹ kị nwụ́ chajị nya ịgba ọgbagba nya iJihova. Ụkụrwọ ọọwa kpaa pwụ́ ẹka irwiye myị́! (1 Ịdị. 6:38; 9:1) Nyọlẹ ká iSolomọn họ iru nya ang ịdatị-datị kpá, ọ yẹ nyori ang ọlẹ kọ baba gụ wuu ká ọngịnyị ka họ ri ọ-ka gbịgba ha iJihova. Ọ da ụpwụ yẹkẹẹ: “A tị́ wo ẹla myị ẹla-a wẹ lẹ, ẹla ookpokpo ohihi ọlẹ kam ka ya jung i-irya ri: Ju uhi nya Ohe Oluhye, ká kpa ehile nyamwụ.”​—Ọngọ. 12:13.

9. Ányị iJisọsị à tị́ hu ẹla nya ụkụrwọ memelabwọ?

⁹ IJisọsị ri ọngọ họ ụkụrwọ kpịra-kpịra. Ụka ọlẹ ko ri onjwo, ọ họ ụkụrwọ nya ekeji ọkọkọ. (Mak. 6:3) Ụbwọ ọdada nyamwụ ka myị adamwụ anyị lẹhị yẹẹyẹẹ jaabwọ kị wẹẹ maga nyịlẹhị-ịlẹhị nyọka họ ịbaba nya ugbiyegu ọtụka nyaa. IJisọsị la kpẹẹkpẹẹ bala ọ-jẹ́ họ ụkụrwọ kpẹẹkpẹẹ. Lẹ ọ chịkpẹẹ ká angịnyị lụmẹ-lụmẹ ka tịtọ nya ang ịlẹ kọọ họ. Ụkụrwọ nya iJisọsị ọwẹ ka kpọọ ịpyọ. Ma nanana nyori ọ jẹ́-ẹ họ ụkụrwọ yẹẹyẹẹ, ọ kaa hu ụka nọ ụka myị́ ụka nyọka gbịgba ha iJihova. (Jọn. 7:15) Ị-ịlahị, nyọlẹ kọ kaa kpa ụka nyamwụ wuu ya ẹrụ ọnyịịla, ọ byi angịlẹ kị wẹẹ ke ụrụ wo lọọ yẹkẹẹ: “Anụ juwa nwụ ịlọnụ la ụkụrwọ u-uhye nya ang oriri ọlam-ọlam ọlẹ kọ kaa bịrị-bịrị ka. Ma, ọkọkọ nya ọọwa lẹ, anụ tụtụ juwa họ ụkụrwọ, chajị nya ang oriri ọlẹ kọ kaa kpa angịnyị ehe gbee ju ka ẹpwụ nya ọhịhị ọmyịmyị-ka mẹ.” (Jọn. 6:27) Myịmyị, ẹ-ẹpwụ nya Ang Ọmẹjẹ Oluhye nya Ọgbọdọ, iJisọsị yẹkẹẹ: “Anụ nwụla ụdụ nyanụ nọ kele ka epwoohe.”​—Mat. 6:20.

10. Akama oyina angịhyẹ à tị́ ka la ọ-ọlụkụrwọ nyaa myị́?

¹⁰ Ụka kahị kpa ẹla ọmẹjẹ ọnyịịla nya iJihova họ ụkụrwọ, ahị ka la irya ọkpakpa ẹ-ẹga nya ụkụrwọ. Ị mẹ ang jẹ́ẹhị ahị angịnyị nya ịKịrayịsị nyọka “họ ụkụrwọ . . . jaabwọ kọ chịla.” (Efe. 4:28) Ụka lụmẹ-lụmẹ alegbeju nyahị ọ-ọlụkụrwọ kaa yẹ nyori ahị kaa họ ụkụrwọ kpịra-kpịra bala o-ya ẹlịlẹhị. Ị ka byihi  nyori ụkụrwọ nyahị nyị myị ịwa lẹhị myị́. Ọọwa ka du kahị ka họ ụkụrwọ gụ́ olene myị́ chajị ahị tịtọ ká olegbeju nyahị ka kpẹhị ọnyịịla yẹ Alibeenu nya iJihova. Ma kori kahị họ ịnyị, ọhẹka áhị ka ye ụka nwà nyọka bịrị bala ugbiyegu nyahị lee ọ-kpa họ ụkụrwọ ha iJihova ka. Ahị baba nyọka nwụhọ chajị kahị ka yé ụka yẹẹyẹẹ kpa họ ang ịlẹ kị baba gụ.

11. Ẹlịyẹ ọọnahị ọhẹ à tị́ jẹ́ u-uhye nyọka la irya ọkpakpa ẹ-ẹga nya ụkụrwọ?

¹¹ Ọọnahị okolobya ọhẹ ká ẹnyị nyamwụ ri William jẹ́ ang bwu ọgụ-ẹpẹtẹ nya ọọnahị ọkịla ọlẹ kọ kaa họ ụkụrwọ ha ene-ene nyori ọ baba nyọka la irya ọkpakpa ẹ-ẹga nya ụkụrwọ. William yẹkẹẹ: “[Ọọnahị ọwẹ] ri ọgụ-ẹpẹtẹ ọnyịịla nya ọngọhẹ ọlẹ kọ la irya ọkpakpa ẹ-ẹga nya ụkụrwọ ọhọhọ. Ọọ họ ụkụrwọ nyịlẹhị-ịlẹhị, angịlẹ kị tị kaa họ ụkụrwọ balọọ kaa yẹ julọọ yẹẹyẹẹ chajị ụkụrwọ nyamwụ-ụ̀ há. Ma ụka ká ụkụrwọ nya ahyẹẹnụ á cheju, ọọ hu abwọ hi ụkụrwọ, lẹ ọ kaa kpa ụka bala ọngịrị nyamwụ họ ang ha ugbiyegu nyamwụ bala iJihova lẹlẹ. Ẹlịlẹhị tị ri, ọ ri ọngọhẹ lẹpwụ nya angị chị ọkẹkẹnị gụgụ wuu ịlẹ kam jẹ́!” *

12. Ányị iSolomọn à tị́ mẹjẹ nyori ọ la irya ọkpakpa u-uhye nyịlọmwụ ụka nya ọgbanyẹ? Ányị ọ tị́ yẹda ụka ohyẹẹkpẹ?

¹² Ụka ọlẹ ká iSolomọn la ọmyịmyị kaa gbịgba ha iJihova lẹ, ọ la irya ọkpakpa u-uhye nyịlọmwụ. Ụka kọ ri onjwo okolobya, ọ kpịlọmwụ keji myọnụ nyori ọwa nyị́ la ẹla ọjẹ́jẹ nwà ka bala ọ-bịlẹ iJihova kọ ka kpọọ ụgbẹyị. (1 Ịdị. 3:7-9) Ịnyịnyị la ọmwụ ọdada nya eji ọkpakpa nyamwụ, iSolomọn jẹ́ akama ọlẹ kọ juwa ẹ-ẹpwụ nya ọngịnyị ọ-ka hu ịlọmwụ hwaa. Ọ da ụpwụ yẹkẹẹ: “Ọbọọchẹ ohihi kpa ayịreji wẹ ọngịnyị, ahị ohihi kpa ọngịnyị kaka mịla eji.” (Etu 16:18) Ọ tị tolujwo lụmẹ nyori iSolomọn á kpa ẹla ọlẹ kọọwa lịlọmwụ mẹjẹ họ ụkụrwọ ị-ịlahị ka. Nyọlẹ kọ nọ chẹẹ ẹ-ẹpwụ nya eji ọkpakpa nyamwụ, ọ dọmwụ  nyọka hu ịlọmwụ hwaa bala ọ-nyẹẹkpẹ da ehile nya Ohe. Ọ-chụ pwokwita, ehile ọhẹ ya nyori adịrahụ nya ala iHiburu ọhẹ-lọhẹ nyị “ye iru nya ịhụ koo. Ọlịnyị ka gwoo ahị gboo hi [iJihova].” (Ehile. 17:17) ISolomọn nyẹẹkpẹ da ehile ọwẹ kaka ye ịhụ 700 bala ịhụ-igu 300. Iru nya ịhụ ịịwa á kaa gbịgba ha Ohe ka! (1 Ịdị. 11:1-3) Ọ chịkpẹẹ ká iSolomọn ka me irya nyori ẹlẹwẹ nyị́ ka ri akama họwa ka myị́. Ma ụka ohyẹẹkpẹ, ihi nya iJihova o-juju ka kpa ocheju ọtịpyọ wẹ ẹga nya iSolomọn.​—1 Ịdị. 11:9-13.

13. Ẹlịyẹ ahị tị́ ka jẹ bwula ọ-kụ irya ju abwọlẹ ká iJisọsị kpịlọmwụ keji?

¹³ IJisọsị kpịlọmwụ keji bala ọ-la irya ọkpakpa u-uhye nyịlọmwụ. Ene ká iJisọsị wẹ odehe ọlẹ, ọ họ ang ịlẹbyẹbyị lụmẹ-lụmẹ ụka kọ wẹẹ họ ụkụrwọ bala iJihova. O-bwula iJisọsị, “Ohe Oluhye a họ ang myị́ ang wuu ịlẹ kị juwa e-epwoohe bala ịlẹ kị jam odehe ọlẹ wuu” lẹ. (Kol. 1:16) IJisọsị kpịtịya nya ang ịlẹ kọ họ bala Adamwụ ụka kọ hu enyi Ohe. (Mat. 3:16; Jọn. 17:5) Ọọwa á tị du kọ hu ịlọmwụ hwaa ka. Ọ́ dọmwụ họ ịngịngịhyẹ ọlẹ kọ ka mẹjẹ nyori ọ há gụ́ angịkịla ka. Ọ byi angịjụgbẹyị nyamwụ nyori, “ḿ warị nya ọngọ ọtụka, kị ka myị ẹrụ ham ka. Ma, m warị kaka myị ẹrụ ha angịnyị ehe lala ọnchẹ nyaa, gbee kam lẹẹ ka hu ọhịhị nyam kịla iya wọnụ nyaa ịwa wuu ju.” (Mat. 20:28) Ọ myịmyị ya nyori ọwa nyị́ kaa be ịngịngịhyẹ be họ la ịlọwa ka. (Jọn. 5:19) IJisọsị kpịlọmwụ keji nyịlẹhị-ịlẹhị! Ọ ya ọgụ-ẹpẹtẹ ọnyịịla-ọnyịịla deeji hahị kahị ka ba jẹ.

14. Ẹlịyẹ ahị tị́ ka jẹ́ bwu ẹga nya iJisọsị ẹ-ẹga nyọka la irya ọkpakpa u-uhye nyịlọhị?

¹⁴ IJisọsị mẹ ang jẹ angịjụgbẹyị nyamwụ kị ka la irya ọkpakpa u-uhye nyịlaa. Ụka ọhẹ, ọ ya ahị ọdahile haa nyori: “Ohe Oluhye dọmwụ jẹ́ ịnọmba nya uke-inyi olegbeju nyanụ wuu jịra ene-ene lẹ.” (Mat. 10:30) Ẹlẹwẹ kpụ́ụhị ẹjẹ yẹẹyẹẹ, ọgụgụ wuu kori kahị kaa la irya ọtịpyọ u-uhye nyịlọhị. Ọ mẹjẹ nyori Adahị olepwoohe kpahị juhi yẹẹyẹẹ, ahị kpịnya a-ahị nyamwụ. Kori ká iJihova á ya ẹga da hahị nyọka gbịgba họọ bala ọ-yẹhị nyori ahị chịla nyọka hịhị gboyi myị́ oyi odehe onyeewe, ahị kụ irya nyori ọ́ jẹ́ chụ ka lẹ ka.

15. (a) Ụpwụ nya Ẹpwang ọ-Kụ Gbeji tị juhi ọhụ nyọka la irya ọkpakpa oyina u-uhye nyịlọhị? (b) Jaabwọ kahị wẹẹ yẹ i-ifoto ọla ẹbẹ 24, ahị ọwawa iyina à tị́ ka nyẹ́ẹhị kori kahị kaa ya irya nọ u-uhye nyịlọhị kpoye?

 ¹⁵ Lala ẹka 15 kẹkpẹ, ụpwụ nya Ẹpwang ọ-Kụ Gbeji juhi ọhụ nyọka la irya ọkpakpa u-uhye nyịlọhị ị-ịlẹ: “Áhị ka kụ irya kpoye u-uhye nyịlọhị dudu kahị ka dọmwụ nyọka hu ịlọhị hwaa ka. Ịnyịnyị, áhị tị ka kụ irya lụmẹ nyori áhị ri ịngịngịhyẹ ka kpụ̀ ọkịlẹtụ ka dọmwụ nyọka kpụhị enyi ka. Ọkọkọ nyọọwa, ahị ka maga nyọka la irya ọkpakpa u-uhye nyịlọhị, ọọwa ri, ahị ka jẹ́ nyori ahị la ang ịnyịịla ịlẹ kahị jẹ́-ẹ họ bala ịtịpyọ ịlẹ kịị gụ́ụhị gụ họ ịnyịnyị. Ọọnahị ọnyang ọhẹ ya ẹlẹwẹ ị-ịlẹ: ‘Ám̀ à ri ọngọ tịpyọ gụgụ wuu ka, ám̀ à tị ri ọngịnyị ọnyịịla gụgụ wuu ka ịnyịnyị. M̀ la ang ịnyịịla ịlẹ kam jẹ́-ẹ jụ́ họ bala ịtịpyọ ịlẹ kịị gụm gụ họ ịnyịnyị, ị-ịwẹ ọ tị la ẹ-ẹga nya ọng myị́ ọng wuu lẹ. ‘” * À yẹ jaabwọ ká ọ-la irya ọkpakpa u-uhye nyịlọhị ka ju apyobwuna hahị kaka ba wẹ?

16. Ịyẹ tị́ du ká iJihova kaa mẹ ụgbẹyị ọnyịịla jẹ́ẹhị?

¹⁶ IJihova kaa kpa Omyi Ẹla nyamwụ mẹ ụgbẹyị ọnyịịla jẹ́ẹhị. Ahị họ́ọ, ọ tị tịtọ kahị ka chị ọkẹkẹnị ịnyịnyị. (Ayị. 48:17, 18) Eje ọchịchị ọlẹ kọ há gụgụ wuu kahị ka chị, kọ tị ka ya ọkẹkẹnị nyịlẹhị hahị ri ọ-ka kịnyaa la ọ-họ ang ịlẹ kị kpụ iJihova ịpyọ. Ụka kahị họ ịnyị, ahị ka cheji ba hi akama lụmẹ-lụmẹ ịlẹ kị kaa wẹ chị angịlẹ kịị ya irya nyaa wuu nọ u-uhye nya okpoko, ụkụrwọ bala ịlaa ọgụ. Ọngọngọọng nyahị a cheje nyọka jẹ́ ẹla, kahị họ ká iJihova a chị ọkẹkẹnị!​—Etu 23:15.