1-2. Ịyẹ à tị́ ka du myị́ ká Ụpwụ Ịgọgọ ịhyẹ ka la etu hahị gụ́ olene ụka ká iwe-ahụrụ nyahị á yẹda?

 AHYẸẸNỤ ọlẹ ká ahụ bala ọrụ wẹẹ ye awụlẹ, ị kaa ke ụrụ wo ẹla o-ya dodehe bwu ịBayịbụụ u-uhye nya awụlẹ oyeye. Ụpwụ Ịgọgọ ịlẹ kị kaa ya ẹla bwu ẹnẹwẹ á ri onyeewe nyaa kaka. Ma bwu ahyẹẹnụ ọwẹ ka ịlahị, ẹlẹwẹ kaa la etu haa gụ́ olene. Ịyẹ à tị́ du? Chajị ị ka kpa họ ụkụrwọ lala ahụ bala ọrụ ugbẹnyị lẹ.

² Ịnyịnyị ọ la ụka ká ahụ bala ọrụ ịlẹ kị ri angịnyị nya ịKịrayịsị á ma ọnyị lẹ. Ẹ-ẹpwụ nya ẹka lụmẹ-lụmẹ, ị ka wo ẹla o-ya dodehe u-uhye nya ẹla nya ọnyị ọ-kpa nwà myị́. Ma lẹẹlẹẹ itiwe nya ehile ịla ịBayịbụụ ịịwa kaa la etu haa gụ́ olene. Ị la ọnyị nya ịlaa ka kpa nwa ugbẹnyị lẹ. Ụkụrwọ ọtụka o ri lẹ! Lẹ ụka ká iwe-ahụrụ nyahị á yẹda, Ụpwụ Ịgọgọ ịhyẹ ịlẹ kahị jẹ́ yẹẹyẹẹ ene kaa la etu hahị gụ́ olene. Ọwẹ ri ang odudu ọhẹ ọlẹ ká anchẹ nya iJihova kaa wa Ụpwụ Ịgọgọ bala o-me irya jwoo ‘lụka nya ọhịhị nyaa wuu,’ jaabwọ ká Ohe byi ịdịrịhụ ịla Isirẹlụ nyị họ.​—Ehile. 17:19.

3. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

³ Adịda bala ịnịna, ẹla nya iJihova ọ-ka mẹjẹ anyị nyanụ ri ọhẹ lẹpwụ nya akụrwọ ịkpọnchị ịlẹ ká angịnyị nya ịKịrayịsị ka jẹ́-ẹ la. Ma anụ-ụ́ ka mẹ ẹla nya Ohe jẹ anyị nyanụ ịịwẹ kem ka. Anụ ka daa ụbwọ ká Ohe ka háa kẹpwụ-kẹpwụ. Ịyẹ a tị́ ka họ chajị ká anyị nyang ka la ọháha ẹ-ẹga nya iJihova bwu ẹpwụ ọkịlẹtụ nyaa? Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya itiwe nya ehile ine bwu ịBayịbụụ ịlẹ kị ka danụ ụbwọ lala  adịda bala ịnịna. (2 Tim. 3:16) Ahị ka yẹ ịnyịnyị jaabwọ ká adịda bala ịnịna ịhyẹ ịlẹ kị ri Angịnyị nya ịKịrayịsị yé apyobwuna bwula ọ-kpa ẹla ọmẹjẹ nya ịBayịbụụ họ ụkụrwọ.

4. Itiwe nya ehile oyina à tị́ ka da adịda bala ịnịna ụbwọ nyọka mẹjẹ anyị nyaa ká iJihova ka háa ka ọkịlẹtụ? (IJemsi 1:5)

⁴ Itiwe nya ehile 1: Bịlẹ iJihova kọ kpang ụgbẹyị. Bịlẹ iJihova kọ ya ẹla ọjẹ́jẹ ọlẹ ká baba hang nyọka da anyị nyang ụbwọ kị ka la ọháha ẹ-ẹga nya iJihova. (Wa iJemsi 1:5.) Ọwa à ri Ọngọlẹ kọ ka jẹ́-ẹ mẹ ẹla jẹ́ẹhị gụ́ wuu ẹẹ. Ang lụmẹ-lụmẹ du kọ lịnyị. Yẹ imiiye nyaa lẹẹ. Ọhọhẹ, a-alẹ iJihova à ri adịda kaka, lẹ ọ jẹ́ ang u-uhye nya adịda oriri gụ́ ọng myị́ ọng wuu. (Eje. 36:9) Oheeye, ẹla ọmẹjẹ nyamwụ kaa kpa apyobwuna wẹ ọngịnyị ụka wuu.​—Ayị. 48:17.

5. (a) Ịyẹ ogu nya iJihova à tị́ họ nyọka da adịda bala ịnịna anyị ụbwọ? (b) Jaabwọ kị mẹjẹ i-ifim ọlẹ kị dụbwọ ka wẹ, ẹlịyẹ a tị́ jẹ́ bwu ụgbẹyị ọlẹ ká ọọnahị Amorim bala ahụ nyamwụ kpa anyị nyaa nwà?

⁵ Bwula Omyi Ẹla bala ogu nyamwụ, iJihova ya ang oriri nya olegu lụmẹ-lụmẹ ha adịda bala ịnịna anyị nyọka jẹ́-ẹ kpa anyị nyaa nwà ụ-ụgbẹyị ọlẹ ká iJihova ka háa. (Mat. 24:45) Ọ-chụ pwokwita, à ka yé ẹla i-ju apyobwuna yẹẹyẹẹ ẹ-ẹpwụ nya “Help for the Family,” kị ri egbeju nya ang ọjẹ́jẹ ịlẹ kị kaa da kpehe ẹ-ẹpwụ nya Awake! la ẹka lụmẹ-lụmẹ. Ma ị tị juwa ị-ịwẹbsayịtị nyahị lẹẹlẹẹ lẹ. Ịnyịnyị, iru nya ifim juwa ịị jw.org kị ka jẹ́-ẹ da adịda bala ịnịna ụbwọ nyọka kpa ẹla ọmẹjẹ nya iJihova họ ụkụrwọ jaabwọ kị wẹẹ kpa anyị nyaa nwà. *​—Etu 2:4-6.

6. Ányị ọ tị́ la ọọnahị ọhẹ u-uhye nya ụbwọ ọdada ọlẹ ká ọwa bala ahụ nyamwụ yé bwu ogu nya iJihova?

⁶ Iru nya adịda bala ịnịna ịhyẹ kaa ya jaabwọ ká ụbwọ ọdada ọlẹ ká iJihova ya haa bwula ogu nyamwụ myaa lẹhị kaka ba. Adịda ọhẹ ká ẹnyị nyamwụ ri Joe myọnụ yẹkẹẹ: “Anjwo ịtịta ọ-kpa nwà ẹ-ẹpwụ nya ẹlịlẹhị á ri ụkụrwọ ochiche kpong-kpong ka. Am bala ahụ nyam kaa raabwọ ụka myị́ ụka ha iJihova nyọka dahị ụbwọ. Ahị tị kaa yẹ nyori ogu nyamwụ kaa gba ụpwụ lee ifim ọhẹ kpehe lụka ọlẹ kọ pwoku nyọka dahị ụbwọ ẹ-ẹpwụ nya  iwe-ahụrụ ọlẹ kahị ji. Ahị kaa kpụnịrọ ẹla ọmẹjẹ nya iJihova ụka myị́ ụka.” Joe bala ahụ nyamwụ yẹ nyori apwụ bala ifim ịlịnyị kaa da anyị nyaa ụbwọ nyọka tụ́ ju iJihova chwẹẹ gụ́ olene.

7. Ịyẹ tị́ du kọ baba ká adịda bala ịnịna anyị ka maga yẹẹyẹẹ nyọka ya ọgụ-ẹpẹtẹ ọnyịịla deeji? (Ala iRom 2:21)

⁷ Itiwe nya ehile 2: Ri ọgụ-ẹpẹtẹ ọnyịịla. Anjwo kaa kpa ẹhị ba adaa bala ịnaa, ị tị kaa gbịlaa ịnyịnyị. Ịlẹhị lẹ, adịda bala ịnịna ọhẹ-lọhẹ á la kpẹẹkpẹẹ ka. (Rom. 3:23) Ọlịnyị odu lẹ, adịda bala ịnịna ịlẹ kị jẹ́ ẹla kaa maga nyọka ya ọgụ-ẹpẹtẹ ọnyịịla deeji ha anyị nyaa. (Wa Ala iRom 2:21.) Adịda ọhẹ chabwọ nya anjwo yẹkẹẹ: “Ị lala ichocho ọnụụ-nụụ ọlẹ kọ jẹ́-ẹ go enyi bala ang ọkịla mile.” Ọ myịmyị yẹkẹẹ: “Ị kaa ya jehi ụka ká abwẹla nyahị á pwoku ẹla ọlẹ kahị kaa mẹjáa ka.” Lẹ ó ri kahị tịtọ ká anyị nyahị á ka la ọháha ẹ-ẹga nya iJihova aalẹ, ọháha ọlẹ kahị la ẹ-ẹga nyamwụ chịla kọ ka la ọngịrị, ahị tị ka ya ọháha ọọwa chehe ịnyịnyị.

8-9. Ẹlịyẹ a tị́ jẹ́ bwu ẹla ọlẹ ká Andrew bala Emma ya?

⁸ Agbẹyị lụmẹ-lụmẹ ji ká adịda bala ịnịna anyị ka mẹjẹ anyị nyaa nyọka la ọháha ẹ-ẹga nya iJihova. Wo ẹla ọlẹ ká ọọnahị Andrew, ko gu ẹka iwo kụrụ irwiye ya lẹẹ wẹẹ: “Adam bala ịnam kaa mẹjẹ́m ụka myị́ ụka nyori abwọ ọrịrị nyị baba yẹẹyẹẹ. Alodu ọnyị myị́ ọnyị, adam kaa raabwọ balam, ó ri kam dọmwụ raabwọ la ịlọm kpá wẹwẹ lẹ. Ị kaa kpụhị ịtịya ụka myị́ ụka yẹkẹẹ: ‘À ka ya ẹla bala iJihova ụka lụmẹ-lụmẹ jaabwọ kọ háng myị́.’ Ẹla ọlẹ kị kaa ya u-uhye nya abwọ ọrịrị jum ka ọkịlẹtụ pyịị, o du kam jẹ́-ẹ la ịlọm ụka kam ja raabwọ ha iJihova bala ọ-kaa yọọ lala Adịda ọ-la ọháha.” Adịda bala ịnịna, anụ kpịtịya ụka myị́ ụka nyori ọháha ọlẹ kanụ la ẹ-ẹga nya iJihova kaa da anyị nyanụ ụbwọ nyọka la ọháha ẹ-ẹga nyamwụ ịnyịnyị.

⁹ Kụ ẹhị yẹ o-chụ pwokwita nya Emma lẹẹ ịnyịnyị wẹẹ. Ụka ká adamwụ nyẹẹkpẹ da ugbiyegu nyaa, ọ rụ hi uri ọtụka-ọtụka ọlẹ kọ kpa angịnyị ká ahụ nyamwụ ka nwụ. Emma yẹkẹẹ: “Ụka lụmẹ-lụmẹ ji ká ịnam á kaa la okpoko nwà ka, ma ọ tị kaa ya ẹla ụka wuu u-uhye nya abwọlẹ ká iJihova kaa kpahị ju anchẹ nyamwụ. M̀ yẹ bwula ụgbẹyị ọlẹ kọ kaa kpa ọhịhị nyamwụ nyori ọ myị ju ẹlẹwẹ ịlẹhị. Ịnam kaa kpa ẹla ọlẹ kọ mẹjẹ́m họ ụkụrwọ.” Ẹlịyẹ ahị tị́ jẹ́? Adịda bala ịnịna ka jẹ́-ẹ ya ọgụ-ẹpẹtẹ ọnyịịla deeji ha anyị nyaa o-ri kị dọmwụ ji ẹpwụ nya iwe-ahụrụ olujwo wẹwẹ.​—Gal. 6:9.

10. Ụka ọlanyị iru nya adịda bala ịnịna ịla Isirẹlụ à tị́ la nyọka ya ẹla u-uhye nya iJihova bala anyị nyaa? (Ehile Ọmada 6:6, 7)

¹⁰ Itiwe nya ehile 3: Ya ẹla bala anyị nyang ụka myị́ ụka. IJihova byi ala Isirẹlụ ịla ụka onyogo nyị mẹ ẹla nya ọwa jẹ anyị nyaa ụka myị́ ụka. (Wa Ehile Ọmada 6:6, 7.) Adịda bala ịnịna ịịwa la iwe lụmẹ-lụmẹ e-ẹpwụ nya ahyẹẹnụ nyọka ya ẹla bala anyị nyaa bala ọ-ka họ kị ka la ọháha ẹ-ẹga nya iJihova. Ọ-chụ pwokwita, lụka nya ala Isirẹlụ onjwo okolobya ọhẹ ka bịrị ụka yẹẹyẹẹ bala adamwụ juwa dọọ ụbwọ wu ẹrụ lee tụ́ ang-ẹrụ guru myị́. Ọnyịnamwụ ọnyang ka bịrị ụka bala ịnamwụ ẹ-ẹpwa juwa nụ ang, gá ang, lee ọ-họ ụkụrwọ ịla ẹpwa ụma ịkịla myị́. Jaabwọ ká adịda lee ịnịna bala anjwo nyaa wẹẹ họ ụkụrwọ la awụlẹ, ị ka jẹ́-ẹ ya ẹla u-uhye nya ala lụmẹ-lụmẹ ịlẹ kị ju apyobwuna. Ọ-chụ pwokwita, ị ka jẹ́-ẹ ya ẹla u-uhye nya abwọlẹ ká iJihova há kaka ba bala abwọlẹ kọ kaa da ugbiyegu nyaa ụbwọ.

11. Ụka oyina adịda bala ịnịna alẹ à tị́ la nyọka kpa ya ẹla bala anyị nyaa?

¹¹ Ang tị yẹda lẹẹlẹẹ lẹ. Ẹ-ẹpwụma lụmẹ-lụmẹ alẹ, Adịda bala ịnịna tụ́ anyị nyaa á jẹ́-ẹ bịrị ụka lawụlẹ kaka gbee ká ahyẹẹnụ  ka chịpwụrụ. Adịda bala ịnịna ka juwa ọ-ọlụkụrwọ, anjwo tị ka juwa uube-ụpwụ myị́. Ọọwa dudu ká adịda bala ịnịna kaa mwahị nya iwe ene kị ka jẹ́-ẹ ya ẹla bala anyị nyaa. (Efe. 5:15, 16; Filip. 1:10) Ang ọjẹ́jẹ nya ugbiyegu ri iwe ọlịnyị ọhẹ. Ọọnahị okolobya ọhẹ ká ẹnyị nyamwụ ri Alexander yẹkẹẹ: “Adam kaa nwụlahị nọ gbe ang ọjẹ́jẹ nya ugbiyegu ụka wuu, ọ́ tị kaa ya iwe da ká ịngịngịhyẹ ka ye ụka ọlẹ kahị kaa la bala awụlẹ wẹ ka. Ụka ká ang ọjẹ́jẹ á myị́ kpá, ahị kaa ja oja la awụlẹ.”

12. Ẹlịyẹ ayịdẹpwa à tị́ ka kpa i-irya ụka nya ang ọjẹ́jẹ nya ugbiyegu?

¹² Ó ri ká ri ayịdẹpwa, ịyẹ a tị́ ka họ chajị ká ang ọjẹ́jẹ nya ugbiyegu nyang ka kpụ anjwọ nyang ịpyọ? À ka jẹ́ ụpwụ ọkpịpyọ-kpịpyọ nyahị onyeewe ọlẹ ko ri Chị Ọkẹkẹnị Gboyi Myị́ Oyi! bala anyị nyang myị́? Ụpwụ ọwẹ họ kọ ka chịkpẹẹ la ọ-ka ya ẹla lawụlẹ yẹẹyẹẹ. À tịtọ ká anyị nyang ka ya ẹla ọla irya nyaa bala ang ọlẹ ko ri uhi nyaa jeng, lẹ a kpa ụka nya ang ọjẹ́jẹ nya ugbiyegu kpaa abyị lee ọ-kpa ẹla yẹ rịraa ka. Ọ́ tị ri ká anjwo nyang á ya ẹla ọlẹ ko pwoku itiwe nya ehile ịla ịBayịbụụ ka, a ju agbama ka. Ọkọkọ nya ọọwa, chị ọkẹkẹnị nyọlẹ kị myị ya ẹla ọlẹ kọ juwa i-irya nyaa jeng, ká jwaa ọhụ nyọka họ ịnyị kịnyaa. Ụka ká jẹ́ ẹla ọla irya nya anyị nyang, à ka jẹ́-ẹ daa ụbwọ yẹẹyẹẹ wẹẹ lẹ.

13. Iwe ịkịla iyina adịda bala ịnịna à tị́ la nyọka kpa da anyị nyaa ụbwọ tụ́ ju iJihova chwẹẹ?

¹³ Adịda bala ịnịna, anụ mwahị nya iwe ẹ-ẹpwụ nya ahyẹẹnụ ọnyị myị́ ọnyị nyọka da anyị nyanụ ụbwọ tụ́ ju iJihova chwẹẹ. Anụ-ụ́ ka dayị gbe ụka nya ịBayịbụụ ọjẹ́jẹ ọlam pyii ene kanụ ka mẹ ang jáa u-uhye nya Ohe ka. Wo ẹla ọlẹ ká ịnịna ọhẹ ká ẹnyị nyamwụ ri Lisa ya lẹẹ: “Ahị kaa kpa ang myị́ ang ịlẹ kị dakoko juhi mẹ ang jáa u-uhye nya iJihova. Ọ-chụ pwokwita, ụka ká ayịlọ nya ebwu nyahị á kpụ anyị nyahị ẹlẹhụ, ahị kaa họ kị ka jẹ́ jaabwọ ká ọọwa mẹjẹ nyori Ọngọ họhị jẹ́ ang chajị nya ẹlẹhụ o-du ọngịnyị bala o-ri ọhịhị họ́ọ jaabwọ kọ háahị.”

14. Ịyẹ tị́ du kọ baba nya adịda bala ịnịna ọ-ka da anyị nyaa ụbwọ chụ aligu ịnyịịla? (Etu 13:20)

¹⁴ Itiwe nya ehile 4: Da anyị nyang ụbwọ nyọka chụ aligu ịnyịịla. Omyi Ẹla nya Ohe họ kahị jẹ́ nyori abwẹla nya aligu ịlẹ kahị la kaa chị  wuhi ụ-ụgbẹyị ọnyịịla lee ọtịpyọ. (Wa Etu 13:20.) Adịda bala ịnịna, anụ jẹ́ aligu nya anyị nyanụ? Anụ taa bala ọ-bịrị ụka balaa chẹẹ ẹnẹhẹ lẹẹ? Ịyẹ a tị́ ka họ nyọka da anyị nyang ụbwọ kị ka chụ aligu ịlẹ ká iJihova há? (1 Kọr. 15:33) À ka jẹ́-ẹ daa ụbwọ nyọka chụ aligu ịnyịịla bwula ọ-wụrụ angịlẹ kị kaa họ yẹẹyẹẹ ẹ-ẹga nya ang nya olegu wẹ ka yẹ jula ugbiyegu nyanụ họ ang.​—Eje. 119:63.

15. Ịyẹ adịda bala ịnịna anyị à tị́ ka họ kị ka da anyị nyaa ụbwọ nyọka chụ aligu ịnyịịla?

¹⁵ Ọọnahị ọhẹ ká ẹnyị nyamwụ ri Tony wụlẹ abwọlẹ ká ọwa bala ahụ nyamwụ kaa họ nyọka da anyị nyaa ụbwọ kị ka chụ aligu ịnyịịla. O yẹkẹẹ: “Ẹ-ẹpwụ nya ẹka lụmẹ-lụmẹ, am bala ahụ nyam kaa wụrụ aanahị alẹng bala anyang ịlẹ kị bwu ẹga datị-datị, anjwo tụ́ angịgbahị, wẹ ẹpwa nyahị. Ahị kaa ri ang bala ọ-jẹ́ ang nya ugbiyegu lawụlẹ. Ọwẹ ri ụgbẹyị ọkpọnchị ọlẹ ká ọngịnyị ka bwu jẹ́ angịlẹ ká iJihova há bala ọ-kaa gbịgba họọ la ọkẹkẹnị. Ahị kaa wụrụ angị kpẹhị rịrị isekut, angị bwu ẹpwụma ọkịla wẹ ka kpa ẹrụ ọnyịịla pyẹ, bala angịkịla wẹ ẹpwa nyahị. Oja bala ila ọchịchị nyaa, tụ́ olegu nya ịlaa o-hu ha kaa gu anyị nyahị ọ-ọkịlẹtụ bala ọ-daa ụbwọ nyọka tụ́ ju iJihova chwẹẹ.” Adịda bala ịnịna, anụ cheje nyọka da anyị nyanụ ụbwọ kị ka la aligu ịnyịịla.

16. Ó ri ká ọnyị nyang á ya nyori ọwa nyị́ tịtọ nyọka gbịgba ha iJihova ka bẹ?

¹⁶ Ọ́ tị ri ká ọnyị nyang ọhẹ á ya ọwa nyị́ tịtọ nyọka gbịgba ha iJihova ka, nanana nyori à maga da ịlọng bẹ? A ya ọwa nyị mileji lala adịda lee ịnịna lẹ ka. IJihova ya āhị nyọka cheje la ịlọhị hahị wuu, tụ́ ọnyị nyang. Āhị ọọwa du kahị jẹ́-ẹ chụ nyọka gbịgba ha Ohe lee ọ-ka gbịgba họọ ka. Ó ri ká ọnyị nyang á chụ nyọka nyẹẹkpẹ da iJihova, ẹhị ọrịrị-rịrị nyori ọ ka tịrẹkpẹ ẹnẹhẹ wẹẹ a gụng myị́ ka. Kpịtịya nya oja ọ-chụ kpịta nya ọnyị oluhwo. (Luk. 15:11-19, 22-24) Ọnyị okolobya ọọwa hwahị hi ụgbẹyị nya abwẹla ọnyịịla, ma ụka ohyẹẹkpẹ, ọ nya tịrẹkpẹ. Angịhyẹ tị ka tọ myị́ nyori “Oja ọ-chụ kpịta à wẹ lẹ, ọ ka jẹ́-ẹ lịnyị a-ahịchịng?” Ee, ọ ka lịnyị myị́! Ịnyị ọ dọmwụ la ẹ-ẹga nya ọnyị okolobya ọlẹ ká ẹnyị nyamwụ ri Elie lẹ.

17. Ányị oja nya Elie à tị́ bwu jung ọhụ?

 ¹⁷ Elie ya ẹla rụ adamwụ bala ịnamwụ yẹkẹẹ: “Ị maga da ịlaa nyọka họ ká iJihova bala Omyi Ẹla nyamwụ ko ri ịBayịbụụ ka hám. Ma ụka kam gu ẹka lala iwo kụrụ ịrụ, m̀ dọmwụ nyọka la egbeju ọngịrị.” Elie dọmwụ nyọka họ ang ịtịpyọ kpịbaa. Adamwụ bala ịnamwụ maga nyọka dọọ ụbwọ tụ ju iJihova chwẹẹ, ma ọ́ tị ke ụrụ ka. Ụka kọ rụ hi ẹpwa, ọ ju ka ẹpwụ nya abwẹla ọtịpyọ. Ọ tị lịnyị odu lẹ, ọ kaa ya ẹla nya ịBayịbụụ tọ ọngọhẹ lẹpwụ nya aligu nyamwụ. Elie yẹkẹẹ: “Jaabwọ kam wẹẹ ya ẹla nya iJihova je oligu nyam gụ́ olene, ịnyịnyị m kaa kụ irya nya iJihova gụ́ ọọwa lẹ. Dụmwọ-dụmwọ lẹ, ẹjẹ nya ẹlịlẹhị ịla ịBayịbụụ ịlẹ ká adam bala ịnam maga kị ya tọ ẹ-ẹpwụ ọkịlẹtụ nyam à dọmwụ nyọka bwu lẹlẹ.” Nyọlẹ kọ nọ chẹẹ, Elie tịrẹkpẹ wẹ ẹpwụ nya ẹlịlẹhị. * Kụ irya nya abwọlẹ kọ ka kpụ adamwụ bala ịnamwụ ịpyọ nyọlẹ kị maga kị mẹ ang jọ́ọ bwu ụka kọ ri onjwo nyọka la ọháha ẹ-ẹga nya iJihova wẹẹ!​—2 Tim. 3:14, 15.

18. Ányị ẹla nya adịda bala ịnịna ịlẹ kị kaa maga yẹẹyẹẹ nyọka mẹjẹ anyị nyaa kị ka la ọháha ẹ-ẹga nya iJihova à tị́ kaa lang?

¹⁸ Adịda bala ịnịna, iJihova ya āhị ọnyịịla-ọnyịịla hanụ, ko ri ọ-ka kpa oyi onyeewe nya angị gbịgba ha iJihova nwà. (Eje. 78:4-6) Ụkụrwọ ochiche à wẹ ka, lẹ ahị danụ ọlẹẹkwaa yẹẹyẹẹ nyọlẹ kanụ wẹẹ maga nyọka da anyị nyanụ ụbwọ! Ó ri kanụ kịnyaa la ọ-họ jaabwọ kanụ ka họ ba myị́ nyọka da anyị nyanụ ụbwọ kị ka la ọháha ẹ-ẹga nya iJihova bala ọ-mẹjáa kị ka ju ihi nyamwụ aalẹ, jẹ́ myị̀myị̀ nyori ọ ka kpụ Adahị olepwoohe ịpyọ.​—Efe. 6:4.