ANG ỌJẸ́JẸ 24
À ka Wu Ang nya Olegu Ịlẹ Ká Chịnọ Ọyị Myị́
“Anụ myị ká abwọ a juwa chị́ịhị pyẹpyẹ ẹ-ẹpwụ nya ụkụrwọ ọnyịịla ọhọhọ kpong-kpong kaka. Chajị ó-ri kahị kpụ ịbwọ ẹ-ẹpwụ nya ụkụrwọ nyahị ọọwa ọhọhọ ka aalẹ, ahị ka ye uri nyahị lụka ohyẹẹkpẹ pyii.”—GAL. 6:9.
EJE 84 Họ Ụkụrwọ
ẸHỊ NYA ẸLA a
1. Ịyẹ à tị́ kaa la iru nyahị ujwo nyọka họ?
À CHỊ ang nya olegu ọhẹ nọ ha ịlọng, kọ tị lujwo hang nyọka woo ọyị myị́ ẹnẹhẹ lẹ? b Kori kọ lịnyị aalẹ, á la ụbwọọng ka. Ọ-chụ pwokwita, Philip tịtọ nyọka raabwọ hyaahyaa gụ olene bala ọ-ka họ ká abwọ ọrịrị nyamwụ ka há gụ ọọwa, ma ọ kaa lujwo họọ nyọka yé ụka raabwọ. Erika ọwa chị nọ ha ịlọmwụ nyori ọ ka pwụ ọjịra-jịra nya ẹrụ ọnyịịla ọ-kpa pyẹ hyaa; ma, ụka lụmẹ-lụmẹ ọ́ ka pwụ ụwa hyaa ka. Tomáš maga ụka lụmẹ-lụmẹ nyọka wa ịBayịbụụ bwu ọmwụ ọdada ka pwụ ocheju ịnyịnyị. Ọ yẹkẹẹ: “ỊBayịbụụ ọwawa á tị kaa kpụm ịpyọ ka. M̀ maga lala ụka ịta myị́ lẹ, ma ẹ-ẹpwụ nya ụka ọnyị myị́ ọnyị ḿ kaa wa kpoye nya ụpwụ nya Ala iLivayị ene kam ka hwabwọ ka.”
2. Kori kahị chị ang nya olegu ọhẹ nọ ha ịlọhị kahị tị woo ọyị myị́ lẹka, ịyẹ tị́ du ká ọkịlẹtụ á ka kpụhị enyi ka?
2 Kori ká chị ịngịhyẹ nọ ha ịlọng ka tị woo ọyị myị́ lẹka, ọkịlẹtụ a kpụng enyi ka. Ọ-ka dọmwụ wu ang ochiche ọlẹ kahị chị nọ kaa ye ụka bala o-ju ụkụrwọ ẹ-ẹpwụ yẹẹyẹẹ. Nyọlẹ ká wẹẹ maga nyọka wu ang ịlẹ ká chị nọ ha ịlọng ọyị mẹjẹ nyori igu oriri nyang bala iJihova myịng lẹhị, à tị tịtọ nyọka họ jaabwọ ká ka họ ba myị́ ẹ-ẹpwụ nya ịgba ọgbagba nyamwụ. Aga ọmama nyang myị iJihova lẹhị. Ọ́ tịtọ nya ang ọlẹ kọ kịla ọngịrị nyang kịla bwu ẹga nyang ka. (Eje. 103:14; May. 6:8) Lẹ, chụ ang ọlẹ ká ọngịrị nyang ka họ myị́ bala ọlẹ kọ pwoku iwe-ahụrụ nyang. Ụka ká chị ang nọ ha ịlọng kpá, ányị a tị́ ka bwu woo ọyị? Ahị ya ẹla u-uhye nya ang ịmanyị-ịmanyị ịlẹ kị ka dahị ụbwọ wẹẹ.
LA OLEGU NYỌKA WU ANG ỌYỊ PYII
Raabwọ ká ka la olegu nyọka wu ang ọlẹ ka chị nọ ọyị Yẹ ọgba 3-4)
3. Ịyẹ tị́ du kọ baba kahị ka la olegu nyọka wu ang ọyị pyii?
3 Olegu nyori m̀ ka wu ang ọlẹ kam chị nọ ọyị pyii ka dahị ụbwọ yẹẹyẹẹ nyọka wụ ang ịlẹ kahị chị nọ ọyị ịnyịlẹhị. Ọngịnyị ọlẹ kọ la olegu nyọka wu ang ọyị kaa maga nyọka họ ụkụrwọ jahị da ang ọlẹ kọ chị nọ ha ịlọmwụ. Ahị ka jẹ́-ẹ chụ olegu ọlịnyị ka pwoku ọhụ ọlẹ kọ kaa kpa ụmwụ nya enyi jẹ ka ẹga ọlẹ kọ wẹẹ jẹ ka. Kori ká ọhụ á da kịnyaa, ọngọ ju ụmwụ ka pwụ ẹga ọlẹ kọ wẹẹ ka myị́. Kori ká ọhụ á tị dọmwụ da yẹẹyẹẹ, ọ ka pwụ ụwa hyaa myị́. Ịnyịnyị-ịnyịnyị, kori ká olegu nyahị a ji uhye nyori ahị ka wu ang ịlẹ kahị chị nọ pyii, ọ ka chịkpẹẹ la ọ-ka waa ọyị myị́. Ọọnahị ọhẹ bwu El Salvador ká ẹnyị nyamwụ ri David yẹkẹẹ: “Kori ká la olegu nyọka wu ang ọlẹ ka chị nọ ọyị, à ka maga jwoo gụ́ ọọwa. Á kaa myị ịngịngịhyẹ ka chịng ochuchuu la ọ-ka wu ang ịlẹ ka chị nọ ha ịlọng ọyị ka.” Lẹ, ịyẹ a tị́ ka họ nyọka la olegu ọlịnyị gụ ọọwa?
4. Ịyẹ ahị tị́ ka bịlẹ ẹ-ẹpwụ nya abwọ ọrịrị? (Ala iFilipayị 2:13) (Yẹ ifoto ịnyịnyị.)
4 Raabwọ ká ka la olegu nyọka wu ang ọyị gụ́ ọọwa. IJihova kaa kpa olegu ịgọgọ nyamwụ gung gbịla nyọka wu ang ịlẹ ka chị nọ ọyị myị́. (Wa Ala iFilipayị 2:13.) Ụka ọhẹ ahị kaa chị ang nọ chajị ahị jé nyori ahị baba nyọka họ ịnyị, ọọwa tị há yẹẹyẹẹ. Ma irya nyọka waa ọyị á tị ka ji ọkịlẹtụ nyahị ịlẹhị ka myị́. Ọ la ịnyị ẹ-ẹga nya ọọnahị ọnyang ọhẹ bwu Uganda ká ẹnyị nyamwụ ri Norina. Ọ chị nọ ha ịlọmwụ nyọka mẹ ịBayịbụụ jẹ angịnyị, ma ọ́ la olegu nyọka woo ọyị myị́ ka, chajị ọ kaa yẹ ịlọmwụ lala ọngọ ka jẹ́-ẹ ma ang jẹ ka. Ịyẹ à tị́ dọọ ụbwọ? Ọ yẹkẹẹ: “M̀ dọmwụ nyọka bịlẹ iJihova ẹnụ myị́ ẹnụ kọ ka họ kam ka la irya nyọka mẹ ịBayịbụụ jẹ angịnyị gụ ọọwa. M̀ tị họ ụkụrwọ ba abwọ ọrịrị nyam jẹ bwula ọ-maga nyọka jẹ́-ẹ mẹ ang jẹ gụ́ ọọwa ịnyịnyị. Nyọlẹ kọ la ọya ịmanyị-ịmanyị, m̀ yẹ nyori irya nyọka mẹ ang jẹ angịnyị dọmwụ nyọka wẹ ọkịlẹtụ nyam. Ẹ-ẹpwụ nya ẹka ọwọwa, m̀ dọmwụ nyọka mẹ ịBayịbụụ jẹ angị imiiye.”
5. Ịyẹ ahị tị́ ka kụ irya ju chajị kahị ka la olegu nyọka wu ang ọlẹ kahị chị nọ ọyị?
5 Kụ irya u-uhye nya ang ịlẹ ká iJihova họ hang. (Eje. 143:5) Ọlẹrụ ịPọlụ kụ irya u-uhye nya ọnahị ọlẹ ká iJihova mẹjẹ ẹ-ẹga nyamwụ, ọọwa gwoo gbịla nyọka họ ụkụrwọ nya iJihova gu ọọwa. (1 Kọr. 15:9, 10; 1 Tim. 1:12-14) Ịnyịnyị, kori ka ja kụ irya u-uhye nya ang ịlẹ ká iJihova họ hang, ọọwa ka gung gbịla nyọka wu ang ịlẹ ka chị nọ ọyị. (Eje. 116:12) Yẹ ang ọlẹ kọ da ọọnahị ọnyang ọhẹ ká ẹnyị nyamwụ ri Honduras ụbwọ nyọka wu ang ọlẹ kị chị nọ ọyị, kọ ri ọ-ka ye ịlahị nya ụgbẹyị ọkpụrụrụ wẹẹ. Ọ yẹkẹẹ: “M̀ kụ irya u-uhye nya ọháha ọlẹ ká iJihova mẹjẹ ẹ-ẹga nyam. M̀ ri ọngọhẹ ẹ-ẹpwụ nya angịnyị nyamwụ. Ọ kpahị jum bala ọ-chewu kem. Irya ọkụkụ u-uhye nya ang ịnyịịla ịwẹ ju ọháha ọlẹ kam la ẹ-ẹga nyamwụ ọngịrị bala ọ-gụm gbịla nyọka họ ụkụrwọ họọ gụ ọọwa.”
6. Ang ọkịla oyina à tị́ ka dahị ụbwọ nyọka la olegu nyọka wu ang ọlẹ kahị chị nọ ọyị?
6 Ya irya nọ u-uhye nya apyobwuna ịlẹ ká ka ye ụka ká wu ang ọlẹ ka chị nọ ọyị. Yẹ ang ọlẹ kọ da Erika ọlẹ kahị ya ẹla nyamwụ lẹẹ ụbwọ nyọka pwụ ẹga lụka wẹẹ. Ọ yẹkẹẹ: “M̀ yẹ nyori ang lụmẹ-lụmẹ kaa nyịm nyọlẹ kam kaa pwụ ọjịra-jịra nya ẹrụ ọnyịịla ọ-kpa pyẹ hyaa ka. Kori kam ka hyaa, m̀ kaa la iwe nyọka dọnụ chị aanahị alẹng bala anyang bala ọ-ka yé ụka joja balaa. M̀ kaa myị́myị́ yé irya ị-gba kpehe ịlẹ kị ka dam ụbwọ nyọka jẹ́-ẹ kpa ẹrụ ọnyịịla pyẹ gụ́ ọọwa bala ọ-ka yé ịpyọ ọkpụkpụ nyamwụ.” Erika ya irya nọ u-uhye nya apyobwuna nya ẹga ọ-ka lụka, ọọwa ọ jẹ́ họ ịnyị myị́ lẹlẹ. Apyobwuna iyina ahụ à tị́ ka ya irya nịrọ? Kori ká ang ọlẹ ká chị nọ á ri ịBayịbụụ ọwawa lee abwọ ọrịrị aalẹ, kụ irya jaabwọ ka ọọwa ka ju igu oriri nyang bala iJihova ọngịrị. (Eje. 145:18, 19) Kori ká ang ọlẹ ká chị nọ á ri ọ-ka la abwẹla nya ọngịnyị nya ịKịrayịsị aalẹ, ya irya nọ u-uhye nya abwọlẹ ká ọọwa ka dang ụbwọ ẹ-ẹpwụ nya ọ-yẹ jula awụlẹ nyang bala angịkịla. (Kol. 3:14) Da ang odudu ọlẹ ká ka wụ ang ịlẹ ka chị nọ ọyị jụ ụpwu, ka ja kụ ẹhị yẹ ụpwụ ọọwa ụka myị́ ụka. Tomáš ọlẹ kahị ya ẹla rụ́ lalẹ ene yẹkẹẹ: “Ụka kam yẹ nyori ang lụmẹ-lụmẹ du kam baba nyọka wu ang ịlẹ kam chị nọ ọyị, ọọwa kaa du kam ka ya iwe da ká ịngịngịhyẹ ka hum abwọ la o-waa ọyị ka lẹ ka.”
7. Ịyẹ à tị́ da Julio bala ahụ nyamwụ ụbwọ nyọka jẹ́-ẹ wu ang ọlẹ kị chị nọ ọyị?
7 Yẹ jula angịlẹ kị ka jung ọhụ nyọka wu ang ịlẹ ka chị nọ ọyị. (Etu 13:20) Yẹ ang ọlẹ kọ da Julio bala ahụ nyamwụ ụbwọ nyọka jẹ́-ẹ kpa ẹrụ ọnyịịla pyẹ gụ olene lẹẹ. Ọ yẹkẹẹ: “Ahị chụ aligu ịlẹ kị chẹkpẹ ju ang ọlẹ kahị chị nọ, ahị tị kaa ya ẹla u-uhye nya ang ịlẹ kahị wẹẹ ku jwaa ịnyịnyị. Angịhyẹ nyaa dọmwụ wu ang ịlẹ kahị chị nọ ọyị lẹ, lẹ ị ka jẹ́-ẹ juhi irya ịnyịnyị. Ị kaa tọhị wo nya abwọlẹ kahị wẹẹ maga ka ba bala ọ-kaa juhị ọhụ ụka kahị baba nyamwụ.”
ỤKA KAHỊ LA OLEGU NYỌKA WU ANG ỌYỊ KA
Họ ụkụrwọ jahị da ang ọlẹ ká chị nọ (Yẹ ọgba 8)
8. Ịyẹ à tị́ ka họ myị́ kori kahị kaa họ ụkụrwọ jahị da ang ọlẹ kahị chị nọ ụka ká olegu á guhi gbịla kem? (Yẹ ifoto ịnyịnyị.)
8 Ẹlịlẹhị ri, ahyẹẹnụ ịhyẹ kaa ji kahị kaa la olegu nyọka wu ang ọyị ka. Ọọwa mẹjẹ nyori áhị ka jẹ́-ẹ họ ụkụrwọ jahị da ang ọlẹ kahị chị nọ kaka? Ehe. Nyọka chụ pwokwita: Igbachịwụ ri ọngịrị ọhẹ ọlẹ kọ jẹ́-ẹ kpa ụmwụ nya enyi jẹ ka pwụ ẹga ọlẹ kọ wẹẹ ka. Ma, igbachịwụ tị kaa da la ọngịrị-ọngịrị ụka ọhẹ gụ́ ụka ọkịla, ahyẹẹnụ ịhyẹ tị dọmwụ ji ká igbachịwụ á kaa da ka lichi-lichi. Ọọwa mẹjẹ nyori ọngọ ju ụmwụ ọọwa á ka jẹ́-ẹ kịnyaa la ẹdịyẹ nyamwụ kaka? Ịnyị ọ kaa la ka. Ọ-chụ pwokwita, ụmwụ ịhyẹ ịlẹ ká igbachịwụ kaa kpa jẹ la injini; ịkịla tị kaa la okoji ọlẹ kịị kpa jwaa. Ọngọ ju ụmwụ ka jẹ́-ẹ kpa injini lee okoji ju ụmwụ ọọwa pwụ ẹga kọ wẹẹ jẹ ka myị́. Ahị ka jẹ́-ẹ chụ irya ọlẹ kọ kaa guhi gbịla nyọka họ ang ka pwoku igbachịwụ ọwẹ myị́. Ẹnẹhẹ, irya kaa guhị gbịla gụ́ ahyẹẹnụ ịkịla. Ahyẹẹnụ ịkịla tị dọmwụ ji ká olegu á ka guhi gbịla nyọka họ ụkụrwọ jahị da ang ọlẹ kahị chị nọ ka. Lẹ, kori kahị kaa họ ụkụrwọ jahị da ang ọlẹ kahị chị nọ ụka ká olegu á guhi gbịla kem aalẹ, áhị ka jẹ́-ẹ wu ang ọọwa ọyị myị́ ẹnẹnẹhẹ ka. Ma jaabwọ ká ọngọ ju ụmwụ kaa kpa agbẹyị ịkịla ju ụmwụ nyamwụ pwụ ẹga ọlẹ kọ wẹẹ ka, ahị ka jẹ́-ẹ maga ịnyịnyị nyọka wu ang ọlẹ kahị chị nọ ọyị tụ́ ụka ká olegu á dọmwụ guhi gbịla nyọka họ ang ọọwa ka wẹwẹ. Ịlẹhị lẹ, ọọwa á ka chịkpẹe lụmẹ ka myị́, ma a ka chị ọkẹkẹnị ụka ka wu ang ọọwa ọyị. Ene kahị ka ya ẹla u-uhye nya ang ọlẹ kahị ka jẹ́-ẹ họ, ahị kụ ẹhị yẹ ịtọ ẹla ọhẹ ọlẹ kahị ka tọ myị́ lẹẹ wẹẹ.
9. Ọ tịpyọ nyọka kịnyaa la ọ-họ ụkụrwọ jahị da ang ọlẹ kahị chị nọ kori kahị la olegu nyọka wu ang ọọwa ọyị ka? Ịyẹ tị́ du kahị ya ịnyị?
9 IJihova tịtọ kahị ka gbịgba họọ bwu ọkịlẹtụ bala ọ-ka họ ịnyị la ọkẹkẹnị. (Eje. 100:2; 2 Kọr. 9:7) Lẹ, ahị ka kịnyaa la ọ-họ ụkụrwọ jahị da ang ọlẹ kahị chị nọ kori kahị la olegu nyọka wu ang ọọwa ọyị ka? Kụ ẹhị yẹ ọ-chụ pwokwita nya ọlẹrụ ịPọlụ wẹẹ. Ọ yẹkẹẹ: “M kaa juwa yẹ ugbinyịrọ nyam ọlẹ akama nya ịlẹhị-ịlẹhị, chajị kọ ka jẹ́-ẹ juwa ju ihi hiigu-hiigu myị́.” (1 Kọr. 9:25-27) ỊPọlụ kaa wu ịlọmwụ họ ang ọnyịịla la agbụrụ tụ́ ụka kọ dọmwụ lọọ ujwo la ọ-ka họ ịnyị. IJihova chị ọkẹkẹnị ta ọlẹrụ ịPọlụ chajị nya ụkụrwọ ọlẹ kọ họ họọ? Ee! IJihova tị nwọọ uri chajị nya ụkụrwọ ọọwa ịnyịnyị.—2 Tim. 4:7, 8.
10. Apyobwuna oyina ahị tị́ kaa yé ụka kahị họ ụkụrwọ nanana nyori olegu á guhi gbịla ka?
10 Ụ-ụgbẹyị ọlịnyị-ịnyị, ọ kaa kpụ iJihova ịpyọ ụka kọ yẹhị kahị ja họ ụkụrwọ jahị da ang ọlẹ kahị chị nọ, tụ́ ụka kahị la olegu nyọka wu ang ọọwa ọyị ka. Ọ kaa kpọọ ịpyọ chajị ọ jẹ́ nyori kori ká ang ọlẹ kahị wẹẹ họ á dọmwụ kpụhị ịpyọ ụka ọhẹ ka wẹwẹ, ahị kaa họọ chajị nyori Ọ háahị. Jaabwọ ká iJihova wahị kụrụ ịPọlụ, Ọ ka wahị kụrụ aga ọmama nyahị ịnyịnyị. (Eje. 126:5) Ụka kahị tị yẹ ká iJihova á ja wahị kụrụụhị, ọọwa ka guhi gbịla myị́. Ọọnahị ọnyang ọhẹ bwu Poland ká ẹnyị nyamwụ ri Lucyna yẹkẹẹ: “Ụka ọhẹ, ọ kaa lam ujwo nyọka kpehe ka ya ẹla nya Ohe, ọgụgụ ri ụka ká ịnyịrọ á chịm pyẹpyẹ. Ma, ọkẹkẹnị ọlẹ kam kaa yé ụka kam kpehe kpá kaa myịm lẹhị yẹẹyẹẹ.” Lẹ, ahị maga kahị tụ́ ịlọhị tutu ụka ká olegu á guhi gbịla nyọka họ ụkụrwọ ka wẹwẹ.
11. Ányị iJihova à tị́ ka bwu dahị ụbwọ nyọka jụ ịlọhị wu kpa myị́?
11 Raabwọ nyọka wu ịlọng kpa myị́. Omyi ẹla ọwẹ kaa ya ẹla rụ ọ-ka chị ịlọhị ebwo hi ang ọtịpyọ ọhọhọ. Ma, ịlọhị o-wu kpa tị ka guhi gbịla nyọka họ ang ọnyịịla ịnyịnyị, ọgụgụ ri ụka ká ang á lahị ujwo la ọhọhọ lee ụka ká olegu á guhi gbịla ka. Kpịtịya nyori, ịlọng o-wu kpa ri ụpa nya ugbe nya olegu, lẹ bịlẹ iJihova kọ ya olegu ịgọgọ nyamwụ hang nyọka jẹ́-ẹ la abwẹla ọnyịịla ọwẹ. (Luk. 11:13; Gal. 5:22, 23) David ọngọlẹ kahị ya ẹla rụ ene lẹẹ, ya jaabwọ ká abwọ ọrịrị dọọ ụbwọ. Ọ tịtọ ká ịBayịbụụ ọjẹ́jẹ la ịlọmwụ ka la hyaa-hyaa gụ olene. Ọ yẹkẹẹ: “M kaa bịlẹ iJihova nyọka dam ụbwọ la abwẹla nya ịlọm o-wu kpa. Bwula ụbwọ ọdada nyamwụ, m̀ jẹ́ dọmwụ nya ịBayịbụụ nya ịlọm ọjẹ́jẹ bala ọ-kpọọ kịnyaa kịlahị.”
12. Ányị ẹla ọlụpwụ nya Ọngọlirya 11:4 à tị́ ka jẹ́-ẹ dahị ụbwọ wu ang ọlẹ kahị chị nọ ọyị?
12 A godayị gbe iwe-ahụrụ ọkpẹẹkpẹẹ ka. Ẹ-ẹpwụ nya odehe ọlẹ, áhị ka jẹ́-ẹ yé iwe-ahụrụ ọlẹ kọ la kpẹẹkpẹẹ ka. Kori kahị ja godayị gbe iwe-ahụrụ ọlịnyị, áhị ka wu ang ịlẹ kahị wẹẹ ku ọyị ka myị́. (Wa Ọngọlirya 11:4.) Ọọnahị ọhẹ ká ẹnyị nyamwụ ri Dayniel yẹkẹẹ: “Iwe-ahụrụ ọkpẹẹkpẹẹ á ji ẹgẹgẹhẹ ka. Ụka kahị dọmwụ nya ang lẹ à ri ụka ọlẹ kọ há gụ lẹlẹ.” Ọọnahị ọhẹ bwu Uganda ká ẹnyị nyamwụ ri Paul ya ang ọkịla ọlẹ kọ dudu kahị ka tụ ang nọ ka. Ọ yẹkẹẹ: “Kori kahị dọmwụ nya ang nanana nyori iwe-ahụrụ á chịkpẹẹ ka, ahị wẹẹ ya iwe da ha iJihova nyọka dahị ụbwọ.”—Mal. 3:10.
13. Ịyẹ tị́ du kọ há nyọka chị ang ịlẹ ká wẹẹ ku ebwo pyịnyẹng-pyịnyẹng?
13 Dọmwụ pyịnyẹng-pyịnyẹng. Kori ká ang ọlẹ kahị chị nọ á lujwo la ọ-ka wu ọyị, olegu á ka guhi gbịla ka myị. O ri ịnyị kọ la ẹ-ẹga nyang, à ka jẹ́-ẹ chị ang ịlẹ ka wẹẹ ku ebwo pyịnyẹng-pyịnyẹng myị́? Kori kọ ri abwẹla ọnyịịla ọhẹ ká chị nọ, à ka jene mọọ jẹ a-agbẹyị ichiche-ichiche myị́? Kori ká ịnyang ahụ á tị ri ọ-ka wa ịBayịbụụ bwu ọmwụ ọdada ka pwụ ocheju, à ka dọmwụ bwula ọ-chị ụka ọpyịnyẹng-pyịnyẹng nọ ha ịlọng nyọka kpa wa ịBayịbụụ myị́? Tomáš ọlẹ kahị ya ẹla rụ bwu ọmwụ ọdada nya ang ọjẹ́jẹ ọlẹ, la akama ẹ-ẹga nyọka wa ịBayịbụụ kpá ẹ-ẹpwụ nya ẹka. Ọ yẹkẹẹ: “M̀ yẹ nyọrị m̀ kaa maga nyọka wa lụmẹ-lụmẹ. Lẹ, m̀ chụ nyọka mọọ yẹ myị́myị́, ma ugbẹnyị tị lẹ, m̀ kaa wa ịgba ịmanyị-ịmanyị bala ọ-kaa kụ irya jwoo. Ọ ka nọ chẹẹ lẹ, m dọmwụ nyọka jẹ́ ịpyọ ọkpụkpụ nya ịBayịbụụ ọwawa lẹlẹ.” Nyọlẹ ká Tomáš wẹẹ jẹ́ ịpyọ nya ịBayịbụụ ọwawa gụ ọọwa, ọ kaa ya ụka dọọ gụ olene ịnyịnyị. Ọ ka nọ chẹẹ lẹ, ọ wa ịBayịbụụ bwu ọmwụ ọdada ka ocheju lẹlẹ. c
ỌKỊLẸTỤ A KPỤNG ENYI KORI KÁ ỊNGỊHYẸ-Ẹ́ DANG KẸKPẸ KA
14. Ịyẹ à tị́ ka họ dudu kọ ka lahị ujwo nyọka wu ang ọlẹ kahị chị nọ ọyị myị́?
14 Ọ tolujwo nyori, jaabwọ myị́ abwọ ká olegu á guhi gbịla nya ụkụrwọ lee kahị kaa maga kaka ba, ọ ka lujwo la ọ-ka wu ang ịlẹ kahị chị nọ ọyị myị́. Ọ-chụ pwokwita, ẹla ọ-họ ‘lụka ọ-kpahị ju ka’ ka nuhi ụka ọlẹ kahị baba nyọka kpa họ ang ọlẹ kahị chị nọ myị́. (Ọngọ. 9:12) Ahị ka ju ka ẹpwụ nya akama ọhẹ ọlẹ kọ ka kpụhị ọkịlẹtụ enyi bala ọ-nuhi ọngịrị myị́. (Etu 24:10) Ọkpẹẹkpẹẹ ọlala ka nyahị tị ka du kahị ka họ ang ọtịpyọ ọhẹ ọlẹ kọ ka du kọ ka lahị ujwo nyọka wu ang ọlẹ kahị chị nọ ọyị myị́. (Rom. 7:23) Lee ọ dọmwụ ka ri ịnyịrọ ọ-chịhị pyẹpyẹ kem myị́. (Mat. 26:43) Ịyẹ à tị́ ka dahị ụbwọ nyọka jẹ́-ẹ kụrụ akama ịlịịwẹ ịlẹ kị kaa kpahị kẹkpẹ?
15. Kori ká ẹlẹhẹ á dahị kẹkpẹ, ọọwa mẹjẹ nyori ahị mịleji lẹ? Ịyẹ tị́ du kahị ya ịnyị? (Eje Ọnyịịla 145:14)
15 Kpịtịya nyori ẹla ọ-dang kẹkpẹ á ri, à mịleji lẹ ka. ỊBayịbụụ ya nyori ahị nyị ka la akama ụka lụmẹ-lụmẹ myị́. Ma, ọ tị họ kọ la gede-gede ịnyịnyị nyori ahị nyị ka jẹ́-ẹ wuleji myị́, ọgụgụụgụ bwula ụbwọ ọdada nya iJihova. (Wa Eje Ọnyịịla 145:14.) Ọọnahị Philip ọlẹ kahị ya ẹla nyamwụ lalẹ yẹkẹẹ: “Ḿ kaa ya irya nịrọ ụka ịmanyị tị́ ọlẹ kam wu ang ọlẹ kam chị nọ ọyị myị́ ka lẹ ka. Ọkọkọ nya ọọwa, m̀ kaa ya ẹhị rịrị u-uhye nya ụka ọlẹ kam wẹẹ ka dọmwụ nyamwụ myị́myị́.” David ọlẹ kahị ya ẹla nyamwụ lalẹ ene, yẹkẹẹ: “M̀ kaa maga nyọka yẹ ang ịlẹ kị dam kẹkpẹ lala iwe nyọka mẹjẹ iJihova jaabwọ kọ hám kaka ba, ọkọkọ nyọka yaa lala akama.” Ee, bwula ọ-kịnyaa la ọ-maga nyọka wu ang ọlẹ kahị chị nọ ọyị nanana nyori ẹlẹhẹ dang kẹkpẹ, à wẹẹ họ ká iJihova ka jẹ́ nyori à tịto nyọka họ ẹla kpọọ ịpyọ. IJihova kaa chị ọkẹkẹnị yẹẹyẹẹ ụka kọ yẹ nyori à wẹẹ maga nyọka wu ang ọlẹ ká chị nọ ọyị!
16. Ẹlịyẹ ang ọ-dahị kẹkpẹ à tị́ ka mẹjẹ́ẹhị myị́?
16 Yẹ ang ọlẹ kọ dang kẹkpẹ lala ang ọ-ka mẹ ẹla jẹ́ng. Kụ irya u-uhye nya ang ọlẹ kọ ju ọmwụ nyamwụ, ká tọ ịlọng wo nyori, ‘Ịngịhyẹ ji kam ka nwụ họ chajị kọ ka lịnyị myị́myị́ kaka?’ (Etu 27:12) Ma, kori kahị jẹ́ wu ang ọlẹ kahị chị nọ ọyị ka ụka ọhẹ, ọ ka mẹjẹ myị́ nyori ọhẹka ang ọlẹ kahị chị nọ wẹ kịlaahị kịla à du lẹ. Kori kọ lịnyị ẹ-ẹga nyang, maga ká wụla ang ọlẹ ká chị nọ ha ịlọng wẹ yẹ nyọka jẹ́ kori kọ meme la ọngịrị nyang. d Kori ká ang ọlẹ ká chị nọ á kịla ọngịrị nyang kịla du ka woo ọyị myị́ ka, iJihova á ka yẹng lala ọngọ mịleji ka.—2 Kọr. 8:12.
17. Ịyẹ tị́ du kahị ka kpịtịya nya ang ịlẹ kahị wu ọyị myị́ lụka ọkẹkpẹ?
17 Kpịtịya nya ang ịlẹ ká jụ́ họ myị́ lụka ọkẹkpẹ. ỊBayịbụụ ya nyori ‘Ohe Oluhye ayịdang nyị́ ri ọlabwẹla onyobyi kpụ ọ ka deeri nya ụkụrwọ nyanụ kpong-kpong ka.’ (Hib. 6:10) Lẹ, ahụ ịnyịnyị a deeri nya ụkụrwọ ọlẹ ká họ ka. Kụ irya u-uhye nya ang ịlẹ ká wu ọyị myị́ ene lẹ. Ọ ka ri igu oriri bala iJihova, ẹla nyamwụ o-ya je angịkịla, lee enyi Ohe ohuhu myị́. Jaabwọ ká maga ká wu ang ịlẹ ká chị nọ ọyị lụka ọkẹkpẹ myị́, à ka jẹ́-ẹ maga a ka wu ịlẹ ká chị nọ lẹẹlẹẹ ọyị ịnyịnyị.—Filip. 3:16.
Yé ịpyọ ọkpụkpụ nya ẹdịyẹ nyang (Yẹ ọgba 18)
18. Ịyẹ ahị tị́ ka kpịtịya nyọka họ jaabwọ kahị wẹẹ họ ụkụrwọ nyọka wu ang ọlẹ kahị chị nọ ọyị? (Yẹ ifoto ịnyịnyị.)
18 Bwula ụbwọ ọdada nya iJihova, à ka wu ang ọlẹ ká chị nọ ọyị myị́, lala ọngọ ju ụmwụ ọlẹ kọ jẹ́ pwụ ẹga ọlẹ kọ wẹẹ jẹ ka la ọkẹkẹnị. Ma kpịtịya nyori, angị ju ụmwụ lụmẹ-lụmẹ kaa ye ịpyọ okpụkpụ nya ẹdịyẹ ọọwa. Ịnyịnyị-ịnyịnyị, maga ụka myị́ ụka nyọka yẹ jaabwọ ká iJihova wẹẹ dang ụbwọ, ọọwa ka du ká ka jẹ́-ẹ chị ọkẹkẹnị jaabwọ ká wẹẹ maga nyọka wu ang ịlẹ ká chị nọ ọyị. (2 Kọr. 4:7) Kori ká abwọ á chịng pyẹpyẹ ka, à ka yé ahị ọwawa ịlẹ kị dọmwụ gụ ịwẹ wẹẹ.—Gal. 6:9.
EJE 126 Kụ Lahị, Godayị, Ká La Ọngịrị
a Ogu nya iJihova kaa juhi ọhụ nyọka kụ irya u-uhye nya agbẹyị ịlẹ kahị ka jẹ́-ẹ họ gụ ọọwa ẹ-ẹpwụ nya ịgba ọgbagba nyahị ha iJihova. Ma kori kahị chị ang nya olegu ọhẹ nọ ha ịlọhị kọ tị ja lujwo hahị nyọka woo ọyị bẹ? Ang ọjẹ́jẹ ọlẹ ka ya ẹla u-uhye nya agbẹyị ịdatị-datị ịlẹ kị ka dahị ụbwọ nyọka wụ ang ịlẹ kahị chị nọ ọyi.
b OMYI ẸLA ỌDAWỤLẸ: Ang nya olegu ọ-chị nọ ka ri ịngịngịhyẹ ọlẹ ká wẹẹ maga nyọka jẹ́-ẹ họ gụ́ ọọwa lee ọ-ka wu ọyị chajị ká ka jẹ́-ẹ gbịgba ha iJihova yẹẹyẹẹ bala ọ-họ kọ ka chị ọkẹkẹnị. Ọ-chụ pwokwita, à ka chị nọ ha ịlọng nyọka la abwẹla nya ọngịnyị nya ịKịrayịsị oriri lee ọ-ka họ gụ ọọwa ẹ-ẹpwụ nya ịgba ọgbagba nya iJihova ẹ-ẹga nya ang lala ịBayịbụụ ọwawa, ang ọjẹ́jẹ la ịlọng, lee ẹrụ ọnyịịla ọ-kpa pyẹ myị́.
c Yẹ ụpwụ ọlẹ kọ ri Benefit From Theocratic Ministry School Education, ẹbẹ 10-11, ọgba 4.
d Nyọka jẹ́ gụ ọọwa, yẹ egbeju nya ẹla ọlẹ kọ ri “Cultivate Reasonable Expectations, and Be Joyful” ẹ-ẹpwụ nya Ẹpwang ọ-Kụ Gbeji nya Ọya Ọharwiye 15, 2008.
